ដើមខែវិច្ឆិកា៖ CDC អនុម័តគំរោងវិនិយោគចំនួន៦ ដែលមានតម្លៃទឹកប្រាក់ ១៧៣លានដុល្លារ

November 6, 2018

ដោយ គង់ សូរិយា

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជាហៅកាត់ CDC បានអនុម័តយល់ព្រមចុះបញ្ជីរវិនិយោគក្រុមហ៊ុនផ្នែកឧស្សាហកម្ម និងសណ្ឋាគារចំនួន៦ ដែលមានទុនវិនិយោគជាង ១៧៣លានដុល្លាអាមេរិក។

យោងតាមសេចក្តីប្រកាសព័ត៌មានរបស់ CDC ដែល Propertyarea.asia ទើបទទួលបាននារសៀលថ្ងៃទី៦ វិច្ឆិកានេះឲ្យដឹងថា នៅក្នុងវិច្ឆកា ឆ្នាំ២០១៨នេះ គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរជូនដល់ក្រុមហ៊ុនចំនួន៦ ដែលក្រុមហ៊ុនទាំងនោះមានគម្រោងវិនិយោគលើផ្នែកឧស្សាហកម្ម និងសណ្ឋាការ ដែលជាផ្នែកមួយក្នុងការចូលរួមចំណែកក្នុងការអភិវឌ្ឍន៍ លើផ្នែកសេដ្ឋកិច្ចកម្ពុជាបន្ថែម។

ក្រុមហ៊ុនទាំង៦នោះ មានដូចជា ទី១ ក្រុមហ៊ុន LING XIU INT’L គ្រោងសាងសង់ និងបង្កើតអាជីវកម្មសណ្ឋាគារថ្នាក់ផ្កាយ៥ ចំនួន៤១០បន្ទប់ ដែលមានទីតាំងវិនិយោគស្ថិតនៅភូមិ៦សង្កាត់លេខ៤ ក្រុងព្រះសីហនុ ខេត្តព្រះសីហនុ មានទុនវិនិយោគសរុបមាណជិត៦៩លានដុល្លារអាមេរិក។ ក្រោយពីការសាងសង់រួច សណ្ឋាគារមួយត្រូវការកំលាំងពលកម្មប្រមាណ១៣៣កន្លែង ជាពិសេសបានចូលរួមចំណែកដ៏សំខាន់ ក្នុងការបម្រើសេវាដល់វិស័យទេសចរ។

ទី២ ក្រុមហ៊ុន NORO MALL ដែលកំពុងវិនិយោគផ្សារទំនើប Noro Mall មានទីតាំងស្ថិត សង្កាត់បឹងកេងកងទី១ ខណ្ឌចំការមនរាជធានីភ្នំពេញ ក្នុងទឹកប្រាក់ចំនួន៩,២លានដុល្លារអាមេរិក។ ទី៣ ក្រុមហ៊ុន CATH PHARMA គ្រោងវិនិយោគបង្កើតរោងចក្រផលិតថ្នាំពេទ្យ ដែលមានទីតាំងវិនិយោគស្ថិតនៅភូមិទីទុយ សង្កាត់ព្រៃស ខណ្ឌដង្កោ រាជធានីភ្នំពេញ ដែលមានទុនវិនិយោគចំនួន ៦,៣ លានដុល្លារអាមេរិកផងដែរ។

ទី៤ ក្រុមហ៊ុន CHNEITEC RENEWABLE មានគម្រោងសាងសង់ស្ថានីយ៍ ផលិតថាមពលអគ្គិសនី ដើរដោយថាមពលពន្លឺព្រះអាទិត្យ ដែលមានកម្លាំ ៦០មេហ្គាវ៉ាត់ គ្រោងវិនិយោគក្នុងទំហំទឹកប្រាក់ប្រមាណជាង៥៨ លានដុល្លារអាមេរិក ដែលមានទីតាំងវិនិយោគស្ថិតនៅឃុំដំណាក់រាំង ស្រុកឧដុង្គ ខេត្តកំពង់ស្ពឺ។ ទី៥ ក្រុមហ៊ុន HERSHEY PLASTIC INDUSTRIAL (CAMBODIA) គម្រោងបង្កើតរោងចក្រផលិតទុយោ និងផលិតផលប្លាស្ទិកគ្រប់ប្រភេទ គ្រោងវិនិយោគទុនប្រមាណជាង២៦លានដុល្លារអាមេរិក ដែលមានទីតាំងវិនិយោគស្ថិតនៅឃុំត្រពាំងគង ស្រុកសំរោងទង ខេត្តកំពង់ស្ពឺ ។

និងទី៦ក្រុមហ៊ុន SAIER (CAMBODIA) GARMENT ដែលមានគម្រោងបង្កើតរោងចក្រកាត់ដេរសម្លៀកបំពាក់វិញ គ្រោងវិនិយោគទុនប្រមាណជាង ៤លានដុល្លារអាមេរិក ដែលមានទីតាំងវិនិយោគស្ថិតនៅភូមិព្រៃសណ្តែក សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។

ក្រុមហ៊ុនទាំងនេះក្រោយពីការសាងសង់ និងដាក់ឲ្យដំណ់ការជាផ្លូវការនោះ ក្រុមហ៊ុនទាំងនេះ ត្រូវការកំលាំងពលកម្មចូលរួមក្នុងវិស័យការងារជិត២ពាន់កន្លែងផងដែរ៕

មហាយក្សចិនដាក់ចេញយុទ្ឋសាស្រ្តថ្មីក្នុងការផ្លាស់ប្តូរពាណិជ្ជកម្មជាមួយ បណ្តាប្រទេសនានា

November 6, 2018

0

ដោយ : វុត្ថា
ភ្នំពេញៈ ក្នុងគោលដៅសម្រួលពាណិជ្ជកម្ម និងកាត់បន្ថយផលប៉ះពាល់ពីសង្រ្គាមពាណិជ្ជកម្មជាមួយអាមេរិក មេដឹកនាំកំពូលរបស់ប្រទេសចិនបានសន្យាថា នឹងខិតខំកាត់បន្ថយអត្រាពន្ធគយថែមទៀត សម្រាប់ប្រទេសដែលជាគូទាំងអស់ ដើម្បីសម្រួលការធ្វើពាណិជ្ជកម្មឱ្យមានលក្ខណៈកាន់តែល្អប្រសើរ។

តាមការព្យាករណ៍ ក្នុងរយៈពេល១៥ឆ្នាំខាងមុខ ការនាំចូលផលិតផលពីប្រទេសដៃគូ នឹងកើនឡើងរហូតដល់៣០ទ្រីលានដុល្លារអាមេរិក ហើយសេវាកម្មក៏នឹងមានការកើនឡើងដល់១០ទ្រីលានដុល្លារអាមេរិក។
ប្រធានាធិបតីចិន លោក ស៊ី ជីនពីង បានថ្លែងនៅក្នុងពិធីសម្ពោធពិព័រណ៍អន្តរជាតិនាំចូលចិន (China’s International Import Expo) ដែលមានការចូលរួមពីនាយកដ្ឋមន្រ្តី ឧបនាយករដ្ឋមន្រ្តី និងរដ្ឋមន្រ្តីនៃបណ្តាប្រទេសនានានៅក្នុងតំបន់ និងពិភពលោកកាលពីទី៥ ខែវិច្ឆិកា ម្សិលមិញនេះបានអះអាងបន្ថែមទៀតថា គោលជំហររបស់ប្រទេសចិន គឺបន្តការពារនូវបទប្បញ្ញតិ អង្គការពាណិជ្ជកម្មពិភពលោក (WTO) និងគាំទ្ររាល់កំណែទម្រង់របស់អង្គការមួយនេះ ដើម្បីរួមគ្នាការពារប្រព័ន្ធពាណិជ្ជកម្មពហុភាគី ជាពិសេសការធ្វើពាណិជ្ជកម្មប្រកបដោយស្មើភាព និងតម្លាភាព។
លោកបន្តថា «ប្រទេសចិន ជាមហាអំណាចសេដ្ឋកិច្ចទី២លើពិភពលោក និងជាទីផ្សារដ៏ធំ ដែលមានសក្តានុពលអតិថិជន១,៣០០លាននាក់ ដូច្នេះចិននឹងពង្រឹងគោលនយោបាយបើកចំហរ ហើយបន្តរៀបចំពិព៌ណនាំចូលអន្តរជាតិចិននេះ ឱ្យកាន់តែធំឡើងៗរៀងរាល់ឆ្នាំ»។

ព្រឹត្តិការណ៍ពិព័រណ៍នាំចូលអន្តរជាតិចិនឆ្នាំនេះ បានរៀបចំនៅលើផ្ទៃក្រឡា៣០ម៉ឺនម៉ែត្រការ៉េ ដែលមានការចូលរួមពីប្រទេស និងអង្គការអន្តរជាតិសរុប ចំនួន ១៧២ នៅក្នុងនោះមានក្រុមហ៊ុន សហគ្រាសចំនួន៣,៦០០ក្រុមហ៊ុន ដែលមានអ្នកបញ្ជាទិញធំៗក្នុងពិភពលោកជាង៤០ម៉ឺននាក់។
សម្រាប់ប្រទេសកម្ពុជា ក៏មានការចូលរួមពីតំណាងក្រុមហ៊ុនចំនួន១០ និងមានការរៀបចំពន្លាជាតិតាមរចនាបទខ្មែរទំហំ១៣៦ម៉ែត្រការ៉េ ដើម្បីផ្សព្វផ្សាយពីសក្តានុពលវិនិយោគ ពាណិជ្ជកម្ម ទេសចរណ៍ និងវប្បធម៌ជាតិផងដែរ៕

តោះមកឈ្វេងយល់សេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០១៩

November 6, 2018

0

ដោយ វុត្ថា

ភ្នំពេញ៖ រដ្ឋសភានៃព្រះរាជាណាចក្រកម្ពុជាកំពុងពិនិត្យ និងសិក្សាលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ ឲ្យបានហ្មត់ចត់ គ្រប់ជ្រុងជ្រោយ និងស៊ីជម្រៅ ជាពិសេសធ្វើឲ្យប្រាកដថាការវិភាជន៌ថវិកា ពិតជាឆ្លើយតបទៅនឹងវិស័យជាអាទិភាពរបស់ជាតិ ដែលជាចលករនៃកំណើនសេដ្ឋកិច្ចរបស់កម្ពុជា បន្ទាប់ពីទទួលបានពីរដ្ឋាភិបាល មុននឹងដាក់ជូនរដ្ឋសភាពិភាក្សានិងអនុម័តនាពេលខាងមុខនេះ។

លោកជាម យៀប ប្រធានគណៈកម្មការសេដ្ឋកិច្ចហិរញ្ញវត្ថុក៏បានឲ្យដឹងថា ថវិកាឆ្នាំ២០១៩ នឹងដើរតួនាទីជាឧបករណ៍គោលនយោបាយដ៏មានសារៈសំខាន់ ដើម្បីអនុញ្ញាតឲ្យរាជរដ្ឋាភិបាលអនុវត្តនូវ “ផែនការយុទ្ធសាស្ត្រ អភិវឌ្ឍន៍ជាតិឆ្នាំ២០១៩-២០២៣” និង “យុទ្ធសាស្ត្រចតុកោណដំណាក់កាលទី៤” ដើម្បីបន្តរក្សាស្ថិរភាពនយោបាយ បន្តពង្រឹងនិងពង្រីកការអនុវត្តលទ្ធិប្រជាធិបតេយ្យ បន្តរក្សាបាននូវស្ថិរភាព ម៉ាក្រូសេដ្ឋកិច្ច និងធានាបាន នូវប្រសិទ្ធិភាពខ្ពស់ក្នុងការគ្រប់គ្រងហិរញ្ញវត្ថុសាធារណៈ និងឈានទៅសម្រេចឲ្យបាននូវគោលនយោបាយគ្រឹះ គឺការធានាឲ្យបាននូវកំណើនសេដ្ឋកិច្ច ប្រកបដោយចីរភាពក្នុងរយៈពេលវែង មានអត្រាខ្ពស់ប្រមាណ៧%ក្នុងមួយឆ្នាំ នៅលើមូលដ្ឋានទូលាយ និងមានសមត្ថភាពប្រកួតប្រជែងជាងមុន។

តួអង្គសំខាន់មួយរូបទៀត ដែលជាសេនាធិការរបស់រដ្ឋាភិបាល លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានគូសបញ្ជាក់ថា ការកសាងសេចក្តីព្រាងច្បាប់ហរិញ្ញវត្ថុសម្រាប់ការគ្រប់គ្រង ឆ្នាំ២០១៩នេះឡើង ដើម្បីឆ្លើយតបទៅនឹងសេចក្តីទុកចិត្តដ៏ច្រើន លើសលប់របស់ប្រជាពលរដ្ឋ មកលើការដឹកនាំរបស់រាជរដ្ឋាភិបាល មកពីគណបក្សប្រជាជនកម្ពុជា តាមរយៈលទ្ធផលការបោះឆ្នោតជ្រើសតាំងតំណាងរាស្ត្រនីតិកាលទី៦ កាលពីខែកក្កដា ឆ្នាំ២០១៨នេះ។

លោករដ្ឋមន្ត្រីបានបញ្ជាក់ថាសេចក្តីព្រាងច្បាប់នេះ មានគោលដៅគាំទ្រ ដល់ការអនុវត្តកម្មវិធីនយោបាយរបស់រាជរដ្ឋាភិបាល ជាពិសេសការអនុវត្តអាទិភាពគោលនយោបាយសំខាន់ៗ និងវិធានការកែទម្រង់ជាក់ស្តែងនានា ដែលនឹងត្រូវផ្តើមអនុវត្តនៅក្នុងឆ្នាំ២០១៩ ដែលជាឆ្នាំទី១នៃរាជរដ្ឋាភិបាលអាណត្តិទី៦ ឱ្យសម្រេចបាននូវលទ្ធផលផ្លែផ្កាជាអតិបរមាជូនប្រទេសជាតិ និងប្រជាពលរដ្ឋ។

សម្តេចអគ្គមហាពញ្ញាចក្រហេង សំរិន ប្រធានរដ្ឋសភា បានលើកឡើងដែរថា ថវិកាជាតិឆ្នាំ២០១៩ ត្រូវបានគិតគូរដោះស្រាយ និងត្រូវបានវិភាជន៌សម្រាប់វិស័យអាទិភាព នៃគោលនយោបាយជាតិសំខាន់ៗជាសារវ័ន្ត។ “យើងចាត់ទុកថា ថវិកាជាតិឆ្នាំ២០១៩ នេះ ជាឧបករណ៍នៃគោលនយោបាយ របស់រាជរដ្ឋាភិបាលប្រកបដោយប្រសិទ្ធភាព និងស័ក្តសិទ្ធភាព ក្នុងការថែរក្សាការពារ និងពង្រឹងថែមទៀតនូវសមិទ្ធផលដ៏ធំធេងដែលកម្ពុជាសម្រេចបានកន្លងមក ក៏ដូចជាបន្តចាក់គ្រឹះរឹងមាំ សម្រាប់បម្រើឲ្យការអភិវឌ្ឍរបស់កម្ពុជាតទៅមុខទៀត។

សម្តេចក៏បានសាទរចំពោះសមិទ្ធផល ដែលរាជរដ្ឋាភិបាលកម្ពុជា សម្រេចបានដោយជោគជ័យ ក្នុងការអនុវត្តយុទ្ធសាស្ត្រចតុកោណដំណាក់កាលទី៣ នៅក្នុងនីតិកាលទី៥ នៃរដ្ឋសភាកន្លងមក ដោយរក្សាបាននូវសុខសន្តិភាពស្ថេរភាពនយោបាយ និងការឯកភាពជាតិ សម្រេចបាននូវសូចនាករសង្គមសំខាន់ៗ ដូចជា វិស័យអប់រំ សុខាភិបាល សម្រេចបានលទ្ធផលល្អ ក្នុងការគ្រប់គ្រងហិរញ្ញវត្ថុសាធារណៈ សេដ្ឋកិច្ចមានកំណើនខ្ពស់ជាមធ្យមក្នុងរង្វង់៧ភាគរយ ភាពក្រីក្ររបស់ប្រជាពលរដ្ឋត្រូវបានកាត់បន្ថយមកនៅត្រឹមក្រោម១០ភាគរយ ដែលជាមធ្យមជាង១ភាគរយក្នុងមួយឆ្នាំ ជាពិសេសបានកសាង និងប្រែក្លាយប្រទេសកម្ពុជា ពីប្រទេសក្រីក្រមានចំណូលទាប ទៅជាប្រទេសមានចំណូលមធ្យមកម្រិតទាប និងឈានទៅកា្លយជាប្រទេសមានចំណូលមធ្យម កម្រិតខ្ពស់នៅឆ្នាំ២០៣០ខាងមុខ៕

បុណ្យសមុទ្រខេត្តកោះកុងជិតមកដល់ រដ្ឋមន្ត្រីទេសចរណ៍ផ្ញើសារដ៏កក់ក្តៅដល់ភ្ញៀវ

November 6, 2018

0

ដោយ គង់ សូរិយា

ភ្នំពេញ៖ ខណៈពិធីបុណ្យសមុទ្រជិតមកដល់ រដ្ឋមន្ត្រីទេសចរណ៍លោកថោង ខុនបានផ្ញើរសារដ៏កក់ក្តៅ សម្រាប់ភ្ញៀវទេសចរណ៍ជាតិ អន្តរជាតិដែលចង់ទៅទស្សនាកំសាន្តក្នុងពិធីដ៏រីករាយនាតំបន់ឆ្នេរនេះ។

រដ្ឋមន្ត្រីក្រសួងទេសចរណ៍ និងជាប្រធានគណៈកម្មការអន្តរក្រសួង ដើម្បីរៀបចំពិធីបុណ្យសមុទ្រឆ្នាំ២០១៨ លោកថោង ខុនបានប្រកាសប្រាប់ប្រជាពលរដ្ឋកុំឱ្យមានក្តីព្រួយបារម្ភចំពោះការធ្វើដំណើរលើ ផ្លូវជាតិលេខ៤៨ ទីកន្លែងស្នាក់នៅ និងហូបចុករយៈពេលពេល៣ថ្ងៃ ក្នុងឱកាសពិធីបុណ្យសមុទ្រ ជុំទី២នៅខេត្តកោះកុង។ បុណ្យសមុទ្រនៅសល់តែជាង១ខែទៀតប៉ុណ្ណោះ ពិធីបុណ្យសមុទ្រលើកទី៧ ជុំទី២ នៅខេត្តកោះកុង នឹង ប្រព្រឹត្តឡើងទៅតាមអ្វីដែលជាការត្រៀមទុក ដោយមានការអញ្ជើញជាអធិបតីភាពដ៏ខ្ពស់ខ្ពស់របស់សម្តេច តេជោ ហ៊ុន សែន នាយករដ្ឋមន្ត្រីនៃព្រះរាជណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។

លោកបន្តថា ដូចកាលពីឆ្នាំ២០១៤ កម្ពុជានឹងសម្របសម្រួលជាមួយភាគី អាជ្ញាធរថៃ ដែលអាចអនុញ្ញាតឱ្យប្រជាពលរដ្ឋខ្មែរ ដែលទៅលេងកម្សាន្តពិធីបុណ្យសមុទ្រ បានទៅចូលទៅទឹកដីខេត្តត្រាត ករណីបើខ្វះខាតទីកន្លែងស្នាក់នៅ។

អភិបាលខេត្តកោះកុងលោកស្រីមិថុនា ភូថង បានមានប្រសាសន៍ឱ្យដឹងផងដែរថា មន្ត្រីមន្ទីរស្ថាប័នជំនាញពាក់ព័ន្ធ នឹងខិតខំពន្លឿនការតុបតែងលម្អ ទីតាំងគោលដៅទេសចរណ៍សំខាន់ៗមួយចំនួន គុណភាពផលិតផល សេវាកម្មស្នាក់នៅអោយបានល្អ។ ពិសេស ការបង្ហាញផ្ទាំងផ្សព្វផ្សាយ អំពីពិធីបុណ្យ សមុទ្រនេះ រួមមាន នៅរង្វង់មូលផ្លូវបំបែកស្រែអំបិល និងរង្វង់មូលដើមវិថីសាយភូថង ដើម្បីបម្រើដល់ពិធីបុណ្យសមុទ្រ ឱ្យកាន់តែទូលំទូលាយ។

រមណីយដ្ឋានទេសចរណ៍ធម្មជាតិសំខាន់ៗនៅខេត្តកោះកុង ដែលគណៈកម្មការបានរៀបចំសម្រាប់ទទួលភ្ញៀវទេសចរជាតិ និងអន្តរជាតិ មានដូចជា រមណីយដ្ឋានវិស្សមកាលតារាសាគរ (កោះស្ដេច) សហគមន៍ជាយអារ៉ែង សហគមន៍ធម្មជាតិតាតៃក្រោម ឆ្នេរសមុទ្រប៉ាកខ្លង សហគមន៍ធម្មជាតិជីផាត ច្រកទ្វារព្រំដែនអន្តរជាតិចាំយាម សហគមន៍ធម្មជាតិព្រៃកោងកាង ពាមក្រសោបជាដើម៕

តំបន់ផ្លូវ ៦០ម៉ែត្រនឹងក្លាយជាកន្លែងដើរផ្សារដ៏ពេញនិយមនា៥ឆ្នាំខាងមុខ

November 6, 2018

0

ដោយ ស៊ីវ ម៉េង

ភ្នំពេញ៖ ផ្សារទំនើបធំៗចំនួន៣ក្នុងនោះពីរកំពុងសាងសង់ និង១កំពុងស្ថិតក្នុងគំរោងដែលស្ថិតនៅតាមបណ្តោយផ្លូវ៦០ម៉ែត្រ នឹងប្រែក្លាយតំបន់នេះជាមជ្ឈមណ្ឌលដើរទិញទំនិញធំជាងគេ និងដំបូងគេនៅរាជធានីភ្នំពេញ។

បច្ចុប្បន្ននេះផ្សារទំនើបស្ថិតក្នុងគំរោងបុរីប៉េង ហួត ដែលសាងសង់លើផ្ទៃដីទំហំជាង៦ហិកតាកំពុងសាងសង់ ហើយផ្សារមួយទៀតនៅក្បែរនោះ គឺគម្រោងផ្សាររបស់បុរីជីព ម៉ុងបាននិងកំពុងសាងសង់ផងដែរ ហើយផ្សារទំនើបលំដាប់អន្តរជាតិ EAON MALL3 បាននិងកំពុងគ្រោងសាងសង់នៅតំបន់នេះ នាពេលខាងមុខផងដែរ។

ការរីកចម្រើនតំបន់នេះ សមស្របនឹងការលើកឡើងរបស់អតីតវីរស្ថាបត្យករកម្ពុជា លោកបណ្ឌិតវណ្ណ ម៉ូលីវណ្ណ ដែលធ្លាប់ផ្តល់អនុសាសន៍ឲ្យរដ្ឋាភិបាលពង្រីកទីក្រុងភ្នំពេញ ទៅកាន់ភាគខាងត្បូង ដោយសារដីតំបន់នេះមានភាពទំនេរច្រើន សណ្ឋានដីខ្ពស់មិនប្រ ឈមការលិចទឹក និងមានខ្យល់អាកាសល្អបរិសុទ្ឋ។

ជាមួយនឹងទស្សនវិស័យចំពោះមុខ និងរៀបចំតំបន់ដែលទើបអភិវឌ្ឍន៍ថ្មីនេះ សាលារាជធានីភ្នំពេញ រួមជាមួយសាលាក្រុងប៉ារីសដើម្បីសិក្សារួមគ្នាពីការអភិវឌ្ឍ និងដោះស្រាយបញ្ហាប្រឈមចំពោះមុខ ទាក់ទងនឹងការកើនឡើងនូវយានយន្ត ការបំពុលទឹកកខ្វក់ និងហេដ្ឋារចនាសម្ព័ន្ឋនានា ដើម្បីធ្វើយ៉ាងណាឲ្យតំបន់នេះសមស្របជាតំបន់ដែលមានភាពបៃតង និងត្រៀមរៀបចំនគរូបនីយកម្មឲ្យមានភាពល្អប្រសើរ និងអាចឆ្លើយតបនឹងកំនើនប្រជាសាស្ត្រនៅតំបន់នេះ។

អ្នកនាងអាន សុធីតានាយិកាប្រចាំប្រទេសនៃក្រុមហ៊ុន CBRE Cambodia បានមានប្រសាសន៍ថា តំបន់នេះពិតជាមានការរីកចម្រើនលឿន រួមទាំងតម្លៃដីធ្លីបានហក់ឡើងខ្ព

ស់លឿនផងដែរ ប៉ុន្តែតំបន់នេះត្រូវការពេលវេលាប្រមាណ៥ឆ្នាំទៀត ដើម្បីឲ្យក្រុមហ៊ុននានាអភិវឌ្ឍន៍លំនៅដ្ឋាន និងហេដ្ឋារចនាសម្ព័ន្ឋនានា មុនពេលតំបន់នេះនឹងប្រែក្លាយជាមជ្ឈមណ្ឌលពាណិជ្ជកម្មនាពេលអនាគត។

តាមការសិក្សារបស់ក្រុមហ៊ុន CBRE បានរកឃើញថា រហូតមកទល់ពេលនេះនៅរាជធានីភ្នំពេញ មានផ្សារទំនើបជាតិ និងអន្តរជាតិចំនួន២៨បានបញ្ចប់ និងដាក់ឲ្យដំណើរការ ខណៈឆ្នាំ២០១៨នេះមានផ្សារទំនើប ផ្សារបែបសហគមន៍ចំនួន១២នឹងបើកដំណើរការជាបន្តបន្ទាប់ផងដែរ៕

ដំណឹងល្អ! បារាំងនឹងសិក្សាពីលទ្ឋភាពពង្រីកផ្ទៃក្រឡាក្រុងភ្នំពេញបន្ថែមទៀត

November 5, 2018

0

ដោយ : រ៉ាវី
ភ្នំពេញ : មន្រ្តីជំនាញជាន់ខ្ពស់នៃប្រទេសបារាំង បានយល់ស្របទៅតាមសំណើររបស់លោក ឃួង ស្រេង អភិបាលនៃគណៈអភិបាលរាជធានីភ្នំពេញ ទៅលើការសិក្សាគម្រោងពង្រីករាជធានីភ្នំពេញ ឱ្យមានទំហំធំជាងពេលបច្ចុប្បន្ន ខណៈដែលកំណើនរបស់ប្រជាពលរដ្ឋ ក៏ដូចជាបណ្តាអ្នកវិនិយោគចម្រុះជាតិសាសន៍ បាននិងកំពុងកើនឡើងជាបន្តបន្ទាប់។

ការយល់ស្របតាមសំណើរខាងលើនេះ ត្រូវបានធ្វើឡើងកាលពីចុងសប្ដាហ៍កន្លងទៅ នៅក្នុងដំណើរទស្សនកិច្ចរបស់លោក ឃួង ស្រេង ដោយអមដំណើរដោយលោក ចែម វីឌ៉្យា ឯកអគ្គរាជទូតកម្ពុជា ប្រចាំសាធារណរដ្ឋបារាំង និងគណៈប្រតិភូរដ្ឋបាលរាជធានីភ្នំពេញ ចូលជួបជាមួយលោកស្រី Pauline CARMONA អនុប្រធាននាយកដ្ឋានកិច្ចការអាស៊ី និងអូសេអានី នៃក្រសួងកិច្ចការបរទេសសាធារណរដ្ឋបារាំង។
ក្នុងជំនួបពិភាក្សាការងារ លោក ឃួង ស្រេង បានលើកឡើងអំពីទំនាក់ទំនងដ៏យូរអង្វែងរបស់កម្ពុជា-បារាំង ដែលបានជួយជ្រោមជ្រែងប្រទេសកម្ពុជា ក្នុងការស្វែងរកសន្តិភាព និងបានថ្លែងអំណរគុណដល់រដ្ឋាភិបាលបារាំង ក៏ដូចជាទីក្រុងប៉ារីស ដែលបានផ្ដល់ជំនួយជាបន្តបន្ទាប់ រួមមានទាំងជំនួយផ្នែកហិរញ្ញវត្ថុ បច្ចេកទេស ក៏ដូចការបណ្ដុះបណ្ដាលធនធានមនុស្សដល់រដ្ឋបាលរាជធានីភ្នំពេញ ក្នុងក្រមខណ្ឌកិច្ចសហប្រតិបត្តិការទ្វេភាគីនាពេលកន្លងមក។

ឆ្លៀតក្នុងឱកាសនោះផងដែរ លោកក៏បានស្នើដល់ក្រសួងកិច្ចការបរទេសនៃសាធារណរដ្ឋបារាំង តាមរយៈលោកស្រី CARMONA និងនាយកដ្ឋានកិច្ចការអាស៊ី និងអូសេអានី បន្តការគាំទ្របន្ថែមទៀតលើកិច្ចការសហប្រតិបត្តិការទ្វេភាគី រវាងកម្ពុជា-បារាំង និងរាជធានីភ្នំពេញ-ទីក្រុងប៉ារីស ព្រមទាំងបន្តគាំទ្រលើគម្រោងនានា ដែលអាចជួយឲ្យរាជធានីភ្នំពេញអាចក្លាយជាទីក្រុងបៃតង និងទីក្រុងឆ្លាតវៃនាពេលអនាគត។
ជាកិច្ចឆ្លើយតប លោកស្រី Pauline CARMONA ក៏បានសន្យាផ្តល់មន្ត្រីជំនាញរបស់ខ្លួនចុះធ្វើការសិក្សាស្រាវជ្រាវនៅក្នុងតាមតំបន់ជាយរាជធានីភ្នំពេញ ដើម្បីធ្វើការអភិវឌ្ឍ និងពង្រីកទំហំរាជធានីភ្នំពេញឱ្យធំជាងពេលបច្ចុប្បន្ន ជាពិសេសនៅតំបន់ភាគខាងត្បូង ឱ្យក្លាយជាទៅជាតំបន់ទីក្រុងបៃតង និងជាទីក្រុងឆ្លាតវៃ (smart city) ដែលមានប្រមូលផ្តុំទៅដោយអាគារធំៗទំនើបៗ មជ្ឈមណ្ឌលពាណិជ្ជកម្ម ផ្សារទំនើប ជាដើម។

បច្ចុប្បន្នទីក្រុងភ្នំពេញមានផ្ទៃក្រឡាសរុប៦៧៨គីឡូម៉ែត្រការ៉េ និងមានប្រជាពលរដ្ឋរស់នៅប្រមាណ២លាននាក់។

យោងតាមការសិក្សារបស់ក្រុមហ៊ុន Urban Living Solution បានព្យាករណ៍ថា ទីក្រុងភ្នំពេញ នឹងមានមនុស្សរស់នៅកើនឡើងដល់៤,៥លាននាក់ នៅឆ្នាំ២០៣០ខាងមុខនេះ ដែលជាពេលវេលាធ្វើឲ្យទីក្រុងនេះកាន់តែមមាញឹក និងប្រឈមមុខនឹងការកកស្ទះចរាចរកាន់តែខ្លាំង៕

ដំណឹងល្អ! ផ្លូវពីស្រុកស្រែអំបិលទៅកាន់ខេត្តកោះកុងនឹងជួសជុលចប់មុនពិធីបុណ្យសមុទ្រ

November 5, 2018

0

ដោយ វុត្ថា

ភ្នំពេញ៖ រដ្ឋមន្ត្រីក្រសួងទេសចរណ៍ និងអាជ្ញាធរខេត្តកោះកុង បានធានាអះអាងថា បច្ចុប្បន្ននេះ ក្រុមការងាររបស់ក្រសួងសាធារណការ និងដឹកជញ្ជូន រួមជាមួយរដ្ឋបាលខេត្តកោះកុង បាននិងកំពុងពន្លឿនជារៀងរាល់ថ្ងៃ នូវការងារជួសជុលផ្លូវពីស្រុកស្រែអំបិលទៅកាន់ទីរួមខេត្តកោះកុង ដើម្បីឲ្យរួចរាល់ស្រេចបាច់មុនពិធីបុណ្យសមុទ្រមកដល់នាពេលខាងមុខ។

ការពន្លឿនការជួសជុលនេះ ដើម្បីឆ្លើយតទៅនឹងការព្រួយបារម្ភមួយចំនួនពីសំណាក់ប្រជាពលរដ្ឋ និងភ្ញៀវទេសចរ អំពីបញ្ហាផ្លូវធ្វើដំណើរទៅទស្សនា ពិធីបុណ្យសមុទ្រនៅខេត្តជាប់សមុទ្រមួយនេះ។

លោក ថោង ខុន រដ្ឋមន្ត្រីក្រសួងទេសចរណ៍ឲ្យដឹង នៅក្នុងកិច្ចប្រជុំលើកទី៣ ដើម្បីត្រៀមរៀបចំបុណ្យសមុទ្រលើកទី៧ នៅសាលាខេត្តកោះកុង នាថ្ងៃទី៤ ខែវិច្ឆិកាម្សិលមិញនេះថា“ជាការពិតណាស់ យើងឃើញនៅតាមការដ្ឋានជួសជុលផ្លូវជាច្រើនកន្លែង តាមបណ្ដោយផ្លូវជាតិលេខ៤៨ ក្នុងនោះគេឃើញមានមន្ត្រីជំនាញ បុគ្គលិកបម្រើការតាមការដ្ឋាន និងគ្រឿងចក្រជាច្រើនគ្រឿងកំពុងខិតខំធ្វើកិច្ចការងារនេះយ៉ាងមមាញឹក។

លោករដ្ឋមន្ត្រីបានអះអាងទៀតថា ជាមួយគ្នានេះដែរ ក្រុមការងារកំពុងដោះស្រាយបញ្ហាសេវាស្នាក់នៅ ម្ហូបអាហារ និងសេវាតម្រូវការនានា ដើម្បីសម្រួលដល់ភ្ញៀវទេសចរណ៍ ដែលគ្រោងមកលេងកម្សាន្តនាពេលខាងមុខ ដោយធ្វើយ៉ាងណារៀបរយស្រេចបាច់មុនព្រឹត្តិការណ៍ទេសចរណ៍ដ៏ធំនេះឈានចូលមកដល់។

នៅសល់ជាងមួយខែទៀតប៉ុណ្ណោះ ពិធីបុណ្យសមុទ្រលើកទី៧ នៅខេត្តកោះកុង នឹងឈានចូលមកដល់ ដែលនឹងប្រារព្ធឡើងធ្វើឡើងរយៈពេល៣ថ្ងៃ ចាប់ពីថ្ងៃទី១៤-១៦ ខែធ្នូ ឆ្នាំ២០១៨ ក្រោមអធិបតីភាពសម្ដេចតេជោ ហ៊ុនសែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន៕

គន្លឹះសំខាន់ៗត្រូវដឹងមុនពេលសម្រេចចិត្តវិនិយោគលើអាផាតម៉ិន

November 5, 2018

0

ដោយ រ៉ាវី

ភ្នំពេញ៖ នៅពេលនេះការវិនិយោគលើអាផាតម៉ិនបាន និងកំពុងប្រឈមមុខនឹងការប្រកួតប្រជែងកាន់តែតានតឹងជាងមុន នៅពេលចំនួនយូនីតខុនដូដាក់ចូលទីផ្សារកាន់តែច្រើន ដូចនេះអ្នកវិនិយោគអាផាតម៉ិនគួរធ្វើការវិនិយោគយ៉ាងដូចម្តេច ដើម្បីទាក់ទាញអតិថិជនចូលស្នាក់នៅកាន់តែច្រើន។

លោកឧកញ៉ា នួន រិទ្ឋី អគ្គនាយកក្រុមហ៊ុន Khmer Foundation Appraisal ដែលបាននិងកំពុងទទួលជោគជ័យ លើការវិនិយោគអាផាតម៉ិនបានមានប្រសាសន៍ឲ្យដឹងថា ទីផ្សារអាផាតម៉ិននៅតែមានកំនើនយ៉ាងរឹងមាំ ដោយផ្អែកលើលំហូរចូលអ្នកវិនិយោគថ្មីៗ ស្ថិរភាពនយោបាយ កំនើនសេដ្ឋកិច្ច ពិសេសការធ្វើសមាហរណកម្មកម្ពុជា ទៅក្នុងសហគមន៍ ប្រជាជាតិអាស៊ីអាគ្នេយ៍ហៅកាត់អាស៊ាន។ លោកបានឲ្យដឹងថា ការវិនិយោគអាផាតម៉ិន ដើម្បីទទួលបានជោគជ័យត្រូវផ្អែកលើកត្តាមួយចំនួន។

ទីតាំង

ការជ្រើសរើសទីតាំងមានសារៈសំខាន់ណាស់ ដើម្បីដឹងថាគំរោងរបស់ខ្លួនគួរអភិវឌ្ឍន៍ក្នុងទំហំទឹកប្រាក់កម្រិតណា និងទាក់ទាញអតិថិជនកម្រិតណា ព្រោះប្រសិនជាទីតាំងកម្រិតA យើងអាចទទួលបានជោគជ័យ បើសិនជាសាងសង់អាផាតម៉ិនកម្រិត B ប៉ុន្តែបើទីតាំងកម្រិត B ឬ C ហើយសាងសង់អាផាតម៉ិនកម្រិត Aមិនជោគជ័យនោះទេ។ ដូច្នេះអ្នកវិនិយោគគួរតែដឹងពីទីតាំងរបស់ខ្លួន។

ការដាក់តំលៃ

ការផ្តោតលើគោលដៅអតិថិជនពិតជាសំខាន់ តែការផ្តោតលើតំលៃកាន់តែសំខាន់ ដូច្នេះការដាក់តំលៃជួលគួរតែពិនិត្យមើល ទៅលើទីតាំងអាគារអាផាតម៉ិនរបស់ខ្លួន ដើម្បីទទួលបានអ្នកជួលកាន់តែច្រើន និងធ្វើឲ្យគំរោងរបស់ខ្លួនដើរស្របតាមស្ថានភាពទីផ្សារជាក់ស្តែង។

រក្សាឌីសាញអាគារ

មិនថាទីតាំង ការដាក់តំលៃទេ និងការឌីសាញអាគារឲ្យមានភាពទាក់ទាញកាន់តែសំខាន់ផងដែរ ដើម្បីទាក់ទាញអារម្មណ៍អ្នកស្នាក់នៅឲ្យមានភាពកក់ក្តៅ និងអារម្មណ៍ប្រកបដោយភាពស្រស់ស្រាយ តាមរយៈការបំពាក់នូវស្តង់ដាអាគារមានលក្ខណៈសន្សំសំចៃថាមពល និងជាអាគារគោរពតាមស្តង់ដាបរិស្ថាន ដោយកាត់បន្ថយបាននូវការបំពុលបរិយាកាស ពោលគឺធ្វើឲ្យវាក្លាយជាអាគារបៃតង។

ការបំពាក់សម្ភារៈបរិក្ខា

ការបំពាក់សម្ភារៈបរិក្ខា ដូចជា កន្លែងហាត់ប្រាណ អាងហែលទឹក ភោជនីយដ្ឋានលើអាកាស ចំណតយានយន្តស្តង់ដា និងសេវាកម្មដទៃទៀត សុទ្ឋតែជាតម្រូវការចាំបាច់របស់អតិថិជន ប៉ុន្តែការបំពាក់សម្ភារៈបរិក្ខា និងសេវាកម្មនានានឹងធ្វើឲ្យការចំណាយកាន់តែធំ ដូច្នេះធ្វើឲ្យតំលៃជួលកាន់តែថ្លៃ។ ដូច្នេះការបំពាក់សម្ភារៈបរិក្ខាទំនើប មានសេវាកម្មសម្បូរបែប ដើម្បីធ្វើឲ្យអ្នកស្នាក់នៅមានភាពងាយស្រួល ក៏គួរពិចារណាផងដែរ ទៅលើទីតាំងគំរោង និងគោលដៅអតិថិជន។

ទំហំបន្ទប់

តាមធម្មតាអ្នកស្នាក់នៅអាផាតម៉ិនភាគច្រើនជាគ្រួសារតូច ដែលមានគ្នាមិនលើសពីរបីនាក់នោះទេ ព្រោះជនបរទេសមកធ្វើការនៅកម្ពុជា ឬប្រទេសដទៃភាគច្រើនពួកគេស្នាក់នៅបណ្តោះអាសន្ន និងមានសមាជិកគ្រួសារតូច ហេតុនេះពួកគេមិនសូវនិយមអាផាតម៉ិនដែលមានបន្ទប់ច្រើននោះទេ។

ពួកគេភាគច្រើន ត្រូវការអាផាតម៉ិនដែលមានបន្ទប់គេងមួយ ឬពីរប៉ុណ្ណោះ ហើយអាផាតម៉ិនដែលពេញនិយម និងមានអ្នកជួលច្រើន គឺជាអាផាតម៉ិនដែលមានបន្ទប់គេង១ឬពីរប៉ុណ្ណោះ។

សេវាគ្រប់គ្រងអាគារ

ការមានអាគារស្រស់ស្អាត មានទីតាំងល្អ និងតំលៃសមរម្យគ្រប់គ្រាន់នោះទេ គឺទាមទារឲ្យអ្នកវិនិយោគអាផាតម៉ិន មានសេវាគ្រប់គ្រងអាគារប្រកបដោយបទពិសោធន៍ និងស្តង់ដាអន្តរជាតិផងដែរ ដើម្បីឲ្យអ្នកស្នាក់នៅមានអារម្មណ៍កក់ក្តៅ និងប្រកបដោយផាសុខភាព ឧទាហរណ៍ សេវាអ៊ីនធើណេតល្បឿនលឿន មានការជួលជុលទុយោទឹកបែកជូនអតិថិជនទាន់ពេលវេលាជាដើម។

ការចងបណ្តាញ

នៅពេលបច្ចុប្បន្នពិភពជំនួញកាន់តែមានភាពប្រកួតប្រជែង ប៉ុន្តែវិធីសាស្ត្រថ្មីៗត្រូវបានអ្នកជំនួញវ័យក្មេងភាគច្រើនកំពុងចាប់យក គឺការចងបណ្តាញជំនួញរបស់ខ្លួន ដើម្បីធ្វើឲ្យជំនួញរបស់ខ្លួនទទួលបានជោគជ័យ និងមានអតិថិជនច្រើន ដែលជាការផ្តល់ផលប្រយោជន៍ឲ្យគ្នាទៅវិញទៅមក។

លោកឧកញ៉ានួន រិទ្ឋីបានបញ្ជាក់ពីបញ្ហានេះថា ការចងបណ្តាញដៃគូជំនួញមានសារៈសំខាន់ណាស់ ដើម្បីឲ្យអាផាតម៉ិនរបស់ខ្លួនទទួលជោគជ័យ ព្រោះការធ្វើជំនួញម្នាក់ឯងមិនទទួលបានជោគជ័យនោះទេ ដូច្នេះការចងបណ្តាញមានសារៈសំខាន់ណាស់ ដើម្បីផ្តល់ជូនអតិថិជនដល់គ្នាទៅវិញទៅមក និងផ្តល់ផលប្រយោជន៍ជូនគ្នាទៅវិញទៅមក៕

មន្ត្រីជាន់ខ្ពស់ក្រសួងសេដ្ឋកិច្ច៖ កម្ពុជាអាចចាប់យកកាលានុវត្តន៍ភាពចេញពីបដិវត្តន៍ឧស្សាហកម្មទី៤

November 5, 2018

0

ដោយ ស៊ីវ ម៉េង

ភ្នំពេញ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានអះអាងថា កម្ពុជាអាចចាប់យកកាលានុវត្តន៍ភាព ដែលកើតចេញពីបដិវត្តន៍ឧស្សាហកម្មទី៤ ស្របពេលដែលធនាគាតអភិវឌ្ឍន៍អាស៊ីបានសិក្សារកឃើញថា បដិវត្តន៍នេះនឹងបង្កើតតម្លៃសេដ្ឋកិច្ចដ៏ច្រើនសម្រាប់តំបន់អាស៊ាន។

រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោកវង្សី វិស្សុតបានថ្លែងក្នុងពិធីបើកសិក្ខាសាលាកម្រិតខ្ពស់ ដែលសហការរៀបចំដោយធនាគារអភិវឌ្ឍន៍អាស៊ី (ADB) ក្រោមប្រធានបទ “តើបដិវត្តឧស្សាហកម្មទី៤ និងកិច្ចសហប្រតិបត្តិការក្នុងតំបន់ អាចជំរុញការផ្លាស់ប្តូរចនាសម្ព័ន្ធសេដ្ឋកិច្ចរបស់កម្ពុជា ដោយរបៀបណា? កាលពីចុងសប្តាហ៍មុនថា កម្ពុជាអាចចាប់យកកាលានុវត្តភាពទាំងឡាយ ដែលកើតចេញពីបដិវត្តឧស្សាហកម្មទី៤នេះ។

លោកបន្តថា “កម្ពុជាមានលក្ខណៈសម្បត្តិជាច្រើនដូចជា ភាគលាភប្រជាសាស្ត្រ គឺកម្ពុជាកាន់តែសម្បូរ នូវធនធានយុវជនប្រកបដោយចំណេះដឹង ហើយអាចស្រូបយកនូវបច្ចេកវិទ្យាឌីជីថលបានលឿន និងកំណើនយ៉ាងលឿននូវការប្រើប្រាស់ទូរស័ព្ទចល័ត និងទូរស័ព្ទ រួមជាមួយនឹងអត្រាប្រើប្រាស់ខ្ពស់ ការស្រូបយកបច្ចេកវិទ្យា ពីការវិនិយោគផ្ទាល់ពីបរទេស និងការធ្វើឌីជីថលភាវូបនីយកម្ម យ៉ាងឆាប់រហ័យដែលកំពុង កើតឡើងនៅក្នុងគ្រប់វិស័យដែលសំខាន់ៗផងដែរ។

យោងតាមកាសិក្សារបស់ ADB បានបង្ហាញថា នៅមុនឆ្នាំ២០៣០ បច្ចេកវិទ្យាថ្មីៗ នៃបដិវត្តឧស្សាហកម្ម អាចបង្កើតតម្លៃសេដ្ឋកិច្ច ដែលមានទំហំពី២២០ ទៅ៦២៥ ពាន់លានដុល្លារ ចូលទៅក្នុងសេដ្ឋកិច្ចនៃតំបន់ ASEAN ផងដែរ។

លោកវង្សី វិស្សតបានបន្តថា តាមរយៈបដិវត្តឧស្សាហកម្មទី៤នេះ អាស៊ានមានសក្តានុពលធំធេង ក្នុងការជំរុញសក្តានុពលកំណើនសេដ្ឋកិច្ច និងរក្សានូវកំណើនសេដ្ឋកិច្ចខ្ពស់ និងរឹងមាំសម្រាប់តំបន់របស់យើង តាមរយៈកិច្ចសហប្រតិបត្តិការកាន់តែជិតស្និទ្ធ ក្នុងបរិបទ នៃការកើនឡើងភាពតានតឹងផ្នែកពាណិជ្ជកម្ម និងការផ្លាស់ប្តូរយ៉ាងលឿននៃការអភិវឌ្ឍបច្ចេកវិទ្យា។

លោកបន្តថា បច្ចុប្បន្នពិភពលោក កំពុងឈានចូលទៅកាន់យុគសម័យនៃបដិវត្តន៍ថ្មីមួយ ឬបដិវត្តឧស្សាហកម្មទី៤ ដែលកំពុងជះឥទ្ធិពលើដំណើការរបស់រដ្ឋាភិបាល, ដំណើការរបស់អាជីវកម្ម និងការរស់នៅរបស់មនុស្សជាតិ។ ការវិវឌ្ឍយ៉ាងលឿនផ្នែកប ច្ចេកវិទ្យា បាននិងកំពុងផ្លាស់ប្តូររចនាសម្ព័ន្ធសង្គម សេដ្ឋកិច្ច ហិរញ្ញវត្ថុ និងសន្តិសុខ ដោយរាប់ចាប់តាំងពីការបើកបរដោយស្វ័យប្រវត្តិ, ដ្រូន (Drone), ពាណិជ្ជកម្មអេឡិកត្រូនិក (e-commerce), បច្ចេកវិទ្យាហិរញ្ញវត្ថុ (FinTech), រហូតដល់ការបោះពុម្ព 3D (3D Printing), និងបញ្ញានិមិត្ត (Artificial Intelligence) ជាដើម។

លោករដ្ឋលេខាធិការបានបន្តថា បដិវត្តឧស្សាហកម្មទី៤ នឹងធ្វើការផ្លាស់ប្តូរចនាសម្ព័ន្ធសេដ្ឋកិច្ច ពាណិជ្ជកម្ម និងឧស្សាហកម្ម តាមរយៈការកាត់បន្ថយថ្លៃដើម បង្កើនផលិតភាព និងពង្រីកវិមាត្រសេដ្ឋកិច្ចកាន់តែធំ តាមរយៈប្រព័ន្ធឌីជីថល ដូចជា ការទូទាត់ និងពាណិជ្ជកម្មតាមប្រព័ន្ធអេឡិកត្រូនិក។ ក្នុងន័យនេះ ASEAN អាចក្លាយជាទីតាំងជួរមុខនៃការផ្លាស់ប្តូរ តាមរយៈការនាំមុខមុនគេ នៃការទទួលយកបច្ចេកវិទ្យាដែលថ្មីបំផុត៕

ហេតុផលពីរសហគ្រិនវ័យក្មេងបោះទុនជាង ២លានដុល្លារវិនិយោគសាលារៀនលំដាប់អន្តរជាតិ

November 5, 2018

0

ដោយ ស៊ីវ ម៉េង

ភ្នំពេញ៖ កំណើននៃការវិនិយោគ និងកំណើនប្រជាពលរដ្ឋ បានធ្វើឲ្យសហគ្រិនវ័យក្មេងមួយក្រុមបានសហការគ្នាបោះទុនជាង ២លានដុល្លារអាមេរិក ដើម្បីដំណើរការសាលារៀនតាមស្តង់ដាជាតិ និងអន្តរជាតិនៅក្រុងប៉ោយប៉ែត។

ស្ថាបនិក និងជានាយកសាលាអេឡេហ្កឹន លោកឃុន ជឿន បានមានប្រសាសន៍ឲ្យដឹងតាមទូរស័ព្ទកាលពីចុងសប្តាហ៍មុនថា សាលាអន្តរជាតិអេឡេហ្កឹនបានបើកដំណើរការកាលពីឆ្នាំសិក្សា២០១៦ ២០១៧ ដោយផ្តោតលើកម្មវិធីសិក្សាបីផ្នែកសំខាន់ គឺកម្រិតមតេយ្យសិក្សា និងចាប់ពីថ្នាក់ទី១ដល់ទី១២។ លោកបន្តថា ក្នុងកម្មវិធីសិក្សាត្រូវបានបែងចែកជាបីផ្នែក ទី១ ជាកម្មវិធីសិក្សាចំណេះដឹងទូទៅ ដែលធ្វើឡើងស្របតាមកម្មវិធីសិក្សារបស់ក្រសួងអប់រំយុវជននិងកីឡា។

ទី២ កម្មវិធីសិក្សាអន្តរជាតិលើគ្រប់មុខវិជ្ជា ដោយសិក្សានុសិស្សត្រូវសិក្សាជាភាសាអង់គ្លេសពេញម៉ោង និងសញ្ញាបត្រត្រូវបានទទួលស្គាល់កម្រិតពិភពលោក ព្រោះយើងបានសហការជាមួយសាលា នៅតាមបណ្តាប្រទេសរីកចម្រើននានាជាច្រើន ដូចជា សហរដ្ឋអាមេរិក អូស្ត្រាលី អង់គ្លេស កាណាដាជាដើម។ ទី៣ កម្មវិធីសិក្សាចំណេះដឹងទូទៅ ដោយប្រើប្រាស់ភាសាអង់គ្លេស និងភាសាចិន។

លោកឃុន ជឿនបានបន្តថា “រហូតមកទល់ពេលនេះ សាលាអន្តរជាតិអេឡេហ្កឹនទទួលបានសិស្សានុសិស្សសរុបប្រមាណ៧៥០នាក់ និងមានសិស្សានុសិស្សបរទេសជាច្រើនបានមកចូលរៀនដូចជា សិស្សានុសិស្សជនជាតិជប៉ុន ចិន កូរ៉េ វៀតណាម ថៃ ឥណ្ឌូនេស៊ីជាដើម។ លោកបន្តថា “នាពេលអនាគត យើងគ្រោងនឹងពង្រីកការវិនិយោគលើការកម្រិតឧត្តមសិក្សា ដោយបង្កើតសាកលវិទ្យាល័យនៅទីក្រុងប៉ោយប៉ែត ប៉ុន្តែយើងត្រូវរង់ចាំរយៈពេលបីឆ្នាំទៀត។

សម្រាប់តម្លៃនៃការសិក្សា គឺសិស្សានុសិស្សសិក្សាភាសាខ្មែរសម្រាប់ចំណេះដឹងទូទៅមានតម្លៃចន្លោះពី៨០០ ទៅ១០០០ដុល្លារក្នុងមួយឆ្នាំ។ ថ្នាក់ភាសាអង់គ្លេសពេញម៉ោងមានតម្លៃសិក្សាចន្លោះ១២០០ទៅ១៣៥០ដុល្លារ ការសិក្សាសម្រាប់ថ្នាក់មតេយយអន្តរជាតិមានតម្លៃចាប់ពី២៤០០ដល់៣០០០ដុល្លារក្នុងមួយឆ្នាំ។

សាលានេះមានទីតាំងនៅក្នុងសង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។

លោកឃុន ជឿនបានបន្តឲ្យដឹងទៀតថា ដោយសារកម្មិធីសិក្សារបស់យើងគោរពបានតាមស្តង់ដាជាតិ អន្តរជាតិ ផ្តោតលើសីលធ៌ម និងគុណភាពអប់រំជាចម្បងបានធ្វើឲ្យសាលាអន្តរជាតិអេឡេហ្កឹន ទទួលបានកំនើនសិស្សចូលរៀនជារៀងរាល់ឆ្នាំ ហើយឆ្នាំនេះ យើងរំពឹងថា នឹងទទួលបានកំណើនសិស្សានុសិស្ស៤០ភាគរយបន្ថែមទៀត ធៀបនឹងឆ្នាំសិក្សា២០១៧ ២០១៨កន្លងមក។

មាតា បិតា សិស្សានុសិស្សអាចទាក់ទងចុះឈ្មោះ ចូលរៀនសាលាអន្តរជាតិអេឡេហ្កឹន តាមរយៈលេខ០១២ ៨១ ៤៤ ៦៦, ០១០ ៨១ ៤៤ ៦៦ ៕