ការដោះស្រាយផលប៉ះពាល់ជាមួយប្រជាពលរដ្ឋមិនទាន់ចប់ធ្វើឲ្យការសាងសង់ស្ពានអាកាសចោមចៅត្រូវពន្យាពេល

November 8, 2018

ដោយ គង់ សូរិយា

ភ្នំពេញ៖ គំរោងស្ពានអាកាសនិងផ្លូវក្រោមដី នៅរង្វង់មូលចោមចៅកន្លែងដែលមានការកកស្ទះចរាចរជាប្រចាំ បាននិងកំពុងពន្យាពេល ដោយសារការដោះស្រាយផលប៉ះពាល់ជាមួយប្រជាពលរដ្ឋមិនទាន់បញ្ចប់។

អ្នកនាំពាក្យរដ្ឋបាលរាជធានីភ្នំពេញ លោកឈាង ប៊ុនថា បានមានប្រសាសន៍ឲ្យ ដឹងតាមទូរស័ព្ទនាព្រឹកថ្ងៃទី៨ វិច្ឆិកានេះថា ការសាងសង់ស្ពាននេះមិនទាន់អាចចាប់ផ្តើមនៅឡើយទេ ដោយសារការដោះស្រាយផលប៉ះពាល់ ជាមួយប្រជាពលរដ្ឋមិនទាន់បញ្ចប់ ប៉ុន្តែលោករំពឹងថា ការសាងសង់អាចនឹងចាប់ផ្តើម នៅដើមឆ្នាំ២០១៩ខាងមុខនេះ។លោកបន្តថា កាលពីម្សិលម៉ិញអាជ្ញាធរខ័ណ្ឌ បានចុះដោះស្រាយជាមួយប្រជាពលរដ្ឋ ប៉ុន្តែមិនទាន់ដឹងបានទទួលលទ្ឋផលបែបណានៅឡើយទេ។

លោកបន្តថា “ការដោះស្រាយជាមួយប្រជាពលរដ្ឋជារឿងលំបាក ហេតុនេះទើបគំរោងមិនទាន់អាចបើកការដ្ឋានសាងសង់ជាផ្លូវការបាន។

អគ្គនាយករងក្រុមហ៊ុន OCIC លោកទូច សំណាងបានមានប្រសាសន៍ឲ្យដឹងតាមទូរស័ព្ទស្រដៀងគ្នាថា ការដោះស្រាយផលប៉ះពាល់ជាមួយប្រជាពលរដ្ឋកំពុងប្រព្រឹត្តិទៅ ដូច្នេះនៅពេលវាបញ្ចប់ពេលណា ការសាងសង់នឹងចាប់ផ្តើមភ្លាម ព្រោះគំរោងនេះបាននិងកំពុងក្លាយជាគំរោងអាទិភាពមួយ ដើម្បីសម្រួលការកកស្ទះចរាចរណ៍។

រង្វង់មូលចោមចៅ ជាចំណុចផ្លូវប្រសព្វរវាងមហាវិថីសហព័ន្ឋរុស្ស៊ី ផ្លូវវេងស្រេង និងផ្លូវជាតិលេខ៣ និងលេខ។

សម្តេចអគ្គសេនាបតីតេជោហ៊ុន សែនបានអញ្ជើញជាអធិបតីក្នុងពិធីបើកករដ្ឋានសាងសង់ស្ពាននេះកាលពីថ្ងៃទី២៩ មិថុនា ឆ្នាំ ២០១៨កន្លងមកនេះ ប៉ុន្តែដោយសារការដោះស្រាយផលប៉ះពាល់ជាមួយប្រជាពលរដ្ឋមិនទាន់បញ្ចប់ ទើបគំរោងនេះមិនទាន់អាចចេញដំណើរសាងសង់រហូតមកទល់ពេលនេះ៕

ក្រុងសៀមរាប នឹងមានការផ្លាស់ប្តូរមុខមាត់ថ្មី បន្ទាប់ពីក្រសួងវិនិយោគ១៥លានដុល្លារដើម្បីស្ថាបនាជួសជុល

November 8, 2018

0

ដោយ វុត្ថា

ភ្នំពេញ៖ ដំណឹងល្អសម្រាប់ក្រុងសៀមរាប ដែលនឹងមានផ្លូវស្អាតទាំងអស់នៅក្នុងក្រុង បន្ទាប់ពីមានការរិះគន់ពីវិស័យឯកជន ទាក់ទងនឹងហេដ្ឋារចនាសម្ព័ន្ឋក្នុងទីក្រុងដ៏ល្បីនេះ មានសភាពទ្រុឌទ្រោមនិងតំបន់ខ្លះជាផ្លូវដី ដែលគ្មានការថែរទាំពីអាជ្ញាធរក្រុងនិងក្រសួងសាធារណៈការ។

ឆ្លើយតបបញ្ហានេះ ក្រសួងសាធារណៈការ និងដឹកជញ្ជូន គ្រោងចំណាយថវិកាប្រមាណ១៥លានដុល្លារសហរដ្ឋអាមេរិក ដើម្បីជួសជុលផ្លូវខ្នែងចំនួន៥២ខ្សែ តភ្ជាប់ផ្លូវជាតិលេខ៦ និងផ្លូវ១១ខ្សែ នៅក្នុងខេត្តសៀមរាប ហើយនឹងត្រូវសាងសង់ក្នុងពេលឆាប់ៗ ដើម្បីផ្លាស់ប្តូរមុខមាត់ ខេត្តមួយនេះ ឱ្យស័ក្កិសមជាខេត្តទេសចរណ៍មួយយ៉ាងសំខាន់។

លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនថ្លែងនៅក្នុងកិច្ចប្រជុំអន្តរក្រសួងស្តីពីការងារជួសជុល និងថែទាំផ្លូវថ្នល់ក្នុងខេត្តសៀមរាបកាលពី៦ ខែវិច្ឆិកាកន្លងមកថា កិច្ចប្រជុំនេះរៀបចំឡើងដើម្បីពិភាក្សារកនីតិវិធីក្នុងការស្តារផ្លូវថ្នល់ដែលខូចខាតទ្រុឌទ្រោមដោយកត្តាផ្សេងៗ ពិសេសការដឹកជញ្ជូនលើសទម្ងន់កម្រិតកំណត់ សំដៅធានាឱ្យការគ្រប់គ្រងផ្លូវថ្នល់មាន ប្រសិទ្ធភាពខ្ពស់ និងឆ្លើយតបទៅនឹងកំណើនប្រជាជន កំណើនភ្ញៀវទេសចរជាតិ និងអន្តរជាតិនៅក្នុងខេត្តនេះ។

លោកទេសរដ្ឋមន្ត្រី បានស្នើឱ្យមន្ទីរ និងភាគីពាក់ព័ន្ធកែសម្រួលនីតិវិធីជួសជុលផ្លូវ ដើម្បីស្តារ កសាង និងជួសជុលថែទាំបណ្តាញផ្លូវថ្នល់នានាឱ្យបានល្អជាងមុន ដើម្បីបំពេញតម្រូវការរបស់ប្រជាពលរដ្ឋ ដែលជាម្ចាស់ឆ្នោត និងបានសំណូមពរឱ្យធ្វើរបាយការណ៍រួមមួយដាក់ជូនរាជរដ្ឋាភិបាលស្នើសុំថវិកា ប្រមាណ១៥លានដុល្លារសហរដ្ឋអាមេរិក ដើ ម្បីសាងសង់ផ្លូវខ្នែងចំនួន៥២ខ្សែ តភ្ជាប់ផ្លូវជាតិលេខ៦ និងផ្លូវ១១ខ្សែទៀតក្នុងខេត្តសៀមរាប ឱ្យបានឆាប់តាមដែលធ្វើទៅបាន។

លោកទេសរដ្ឋមន្ត្រី ក៏បានលើកឡើងអំពីគម្រោងដាក់ឱ្យដំណើរការ Road Care App នៅថ្ងៃទី១៥ ខែធ្នូ ឆ្នាំ២០១៨ ដែលជាគោលដៅមួយក្នុងចំណោមគោលដៅទាំងឡាយនៃផែនការ១០០ថ្ងៃ នៅក្នុងអាណត្តិទី៦នៃរាជរដ្ឋាភិបាលថ្មីនេះ ដើម្បីប្រជាពលរដ្ឋអាចទាញយកកម្មវិធីនេះថតយករូបភាព ផ្លូវខូចឬជង្ហុកសំបុកមាន់ ហើយបញ្ជូនរូបភាពនោះទៅកាន់មន្ត្រីពាក់ព័ន្ធនៃក្រសួងសាធារណការ និងដឹកជញ្ជូនបន្ទាប់មកតាមរយៈរូបភាពនោះ មន្ត្រីពាក់ព័ន្ធអាចដឹងពីទីតាំងពិតប្រាកដ ហើយធ្វើការជួសជុល បានទាន់ពេលវេលា ដើម្បីបង្ការកុំឱ្យខូចរាលដាលកាន់តែធំ។

ជាមួយគ្នានេះផងដែរ ដើម្បីចូលរួមចំណែកក្នុងការទប់ស្កាត់ ការដឹកជញ្ជូនលើសទម្ងន់ឱ្យកាន់តែមាន ប្រសិទ្ធភាព ក្រសួងសាធារណការ និងដឹកជញ្ជូន បានឯកភាពដាក់បញ្ចូលក្រសួងអភិវឌ្ឍន៍ជនបទជា សមាជិកគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ និងបានផ្តល់ជញ្ជីងចល័តចំនួនពីរគ្រឿង ដើម្បីទប់ស្កាត់ការដឹកជញ្ជូនលើសទម្ងន់កម្រិតកំណត់ផងដែរ។

លោកទេសរដ្ឋមន្ត្រីស៊ុន ចាន់ថុលក៏បានជំរុញលើកទឹកចិត្តឱ្យវិស័យឯកជនចូលរួមចំណែកក្នុងការអភិវឌ្ឍហេដ្ឋារចនាសម្ព័ន្ធផ្លូវថ្នល់នៅខេត្តសៀមរាបឱ្យមានការរីកចម្រើនផងដែរ ដើម្បីផ្លាស់ប្តូរមុខមាត់ខេត្តនេះ ឱ្យស័ក្តិសមជាខេត្តទាក់ទាញទេសចរណ៍មួយយ៉ាងសំខាន់៕

លោកបណ្ឌិតគីម ហ៊ាងពន្យល់ពីក្រុមហ៊ុនអចលនទ្រព្យធំៗនឹងលេបក្រុមហ៊ុនតូចៗ

November 8, 2018

0

ដោយស៊ីវ ម៉េង

ភ្នំពេញ: ស្របពេលទីផ្សារអចលនទ្រព្យកាន់តែមានភាពប្រកួតប្រជែង ហើយការនាំចូលFranchiseក្រុមហ៊ុនធំៗចូលមកម្ពុជាកាន់តែច្រើន អ្នកជំនាញក្នុងវិស័យនេះបានលើកឡើងពីរលកថ្មីមួយក្នុងវិស័យនេះ ដោយអះអាងថា ក្រុមហ៊ុនធំៗនឹងលេបក្រុមហ៊ុនអចលនទ្រព្យតូចៗនាពេលអនាគត។

លោកបណ្ឌិតគីម ហ៊ាងប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ឲ្យដឹងកាលពីពេលថ្មីៗនេះថា រយៈពេលបីឆ្នាំខាងមុខ ក្រុមហ៊ុនភ្នាក់ងារអចលនទ្រព្យតូចៗ ដែលមានបុគ្គលិកចន្លោះពី២០ ទៅ៣០នាក់នឹងស្លាប់ដោយខ្លួនឯង ប្រសិនជាពួកគេមិនជ្រកក្រោមស្លាកឬទិញFranchiseពីក្រុមហ៊ុនធំៗ ដើម្បីធ្វើប្រតិបត្តិការទេនោះ។

លោកបានលើកជាឧទាហរណ៍ថា នៅពេលអ្នកអភិវឌ្ឍន៍បុរី ឬខុនដូមួយ ត្រូវការក្រុមហ៊ុនមួយ ដែលដើរតួនាទីជាភ្នាក់ងារលក់គំរោងរបស់ពួកគេ ពួកគេនឹងជ្រើសរើសយកក្រុមហ៊ុនដែលមានបុគ្គលិក ឬអ្នកលក់២០០ទៅ៣០០នាក់ ពួកគេមិនរើសក្រុមហ៊ុនដែលមានភ្នាក់ងារលក់២០ទៅ៣០នាក់នោះទេ។

លោកគីម ហ៊ាងបានបន្តថា “នេះជានិន្នាការទីផ្សារសេរី អ្នកខ្លាំងរស់ អ្នកខ្សោយនឹងស្លាប់ដោយខ្លួនឯង ហេតុនេះជម្រើសល្អគឺក្រុមហ៊ុនតូចៗត្រូវរំលាយ ឬមកជ្រកក្រោមស្លាកក្រុមហ៊ុនធំៗ”។

បច្ចុប្បន្នក្រុមហ៊ុនអចលនទ្រព្យលំដាប់ពិភពលោកជាច្រើន បានចូលមកកាន់ទីផ្សារកម្ពុជា ដូចជា Century21 Cambodia, ERA, CBRE, Knight Frank, Keller Williamជាដើម ដែលធ្វើឲ្យទីផ្សារនេះកាន់តែមានទំនុកចិត្ត ព្រមទាំងចរិកនៃការប្រកួតប្រជែងកើនឡើង។

លោកបណ្ឌិតគីម ហ៊ាងបានបន្តថា ក្រុមហ៊ុនអាមេរិកធំៗ មុនចូលមកកម្ពុជាពួកគេបានសិក្សាទីផ្សារ៤ទៅ៥ឆ្នាំមុន ទើបពួកគេសម្រេចចិត្តចូលមក ហេតុនេះនៅពេលពួកគេចូលមកដល់ មានន័យថាទីផ្សារនេះរៀបរយសម្រាប់ពួកគេរួចហើយ។លោកបន្តថា អ្នករកស៊ីអចលនទ្រព្យគ្មានអាជ្ញាប័ណ្ណ នឹងកាត់បន្ថយ ហើយពួកគេនឹងរត់មករកក្រុមហ៊ុនដែលមានអាជ្ញាប័ណ្ណដោយខ្លួនឯង នៅពេលទីផ្សារកាន់តែមានទំនុកចិត្តជាមួយក្រុមហ៊ុនដែលមានអាជ្ញាប័ណ្ណ និងមានកេរ្ត៍ឈ្មោះល្បីនៅលើពិភពលោក៕

ចិន ចិន ចិន តោះទៅមើលអាគារខ្ពស់ទី៣នៅចិនមានអ្វីប្លែកគេ??

November 7, 2018

0

ដោយ វុត្ថា

ភ្នំពេញ៖ មហាយក្សចិនមានអាគារកប់ពពកយ៉ាងច្រើន ថ្ងៃនេះជាថ្មីម្តងទៀត យើងនឹងផ្តោតលើប្រទេសចិនជាថ្មី តើប្រទេសនេះមានសំណង់អាគារអ្វីដែលគួរឲ្យចាប់អារម្មណ៍?។

Propertyarea.asia សូមលើកយកអាគារ ដែលមានស្ថាបត្យកម្មដ៏អស្ចារ្យមួយទៀតមកបង្ហាញ នោះគឺមជ្ឈមណ្ឌលហិរញ្ញវត្ថុដ៏ទំនើប និងខ្ពស់កប់ពពក Guangzhou Chow Tai Fook Finance Centre ឬគេហៅថាអគារ Eas Tower។ វាជាអគារខ្ពស់កប់ពពកប្រើប្រាស់ចម្រុះ ស្ថិតនៅក្នុងទីក្រុងGuangzhou ដែលមានកំពស់ប្រមាណជា ៥៣០ ម៉ែត្រ។ អាគារនេះបានចាប់បផ្តើមសាងសង់នៅក្នុងឆ្នាំ២០០៩ និងបញ្ចប់នៅក្នុងខែតុលា ឆ្នាំ2016។

Eas Tower គឺជាអគារខ្ពស់កបពពកលំដាប់ទី៣ ក្នុងប្រទេសចិន និងស្ថិតក្នុងលំដាប់អាគារខ្ពស់កប់ពពកលំដាក់ទី៧លើពិភពលោក ដែលចំណាថវិកាក្នុងការសាងសង់អស់ចំនួន១៥០០លានដុល្លារសហរដ្ឋអាមេរិក។

Guangzhou Chow Tai Fook Finance Centre នេះមានកម្ពស់១១១ ជាន់ និងនៅជាន់ទី៥ចុះក្រោម គឺជាការិយាល័យធ្វើការ ផ្សារទំនើប អាផាតមិន និងសណ្ឋាគារជាដើម។

អគារខ្ពស់កប់ពពកនេះ សាងសង់នៅលើទំហំដីប្រមាណជា២៧,០០០ម៉ែត្រការ៉េ ស្ថិតនៅតាមបណ្តោយផ្លូវ Zhujiang East Road ចំកណ្តាលតំបន់ពាណិជ្ជកម្មរបស់ក្រុង Guangzhou ។ អគារនេះ គឺជាផ្នែកមួយនៃអគារGuangzhou Twin Towers។

អាគារខ្ពស់មួយទៀតមានកំពស់៤៣៩ម៉ែត្រ ស្ថិតនៅតំបន់នោះ គឺ Guangzhou International Finance Center ដែលមានទីតាំងស្ថិតនៅផ្នែកម្ខាងទៀត នៃអ័ក្សនិងត្រូវបានគេស្គាល់ផងដែរថាជាអគារ “វិមានខាងលិច” (West Tower) ។ ដូច្នេះមជ្ឈមណ្ឌលក្វាងចូវ CTF ត្រូវបានគេស្គាល់ថាជា “អគារខាងកើត” ផងដែរ។

ប៉មទាំងពីរមានកម្ពស់ និងទំហំប្រហាក់ប្រហែលគ្នា និងមានទីតាំងនៅជិតអគារកម្ពស់ ៦០៤ ម៉ែត្រគឺអគារ Canton Tower៕

អាគារកប់ពពក THAI BUNRONG ផ្លាស់ប្តូរដៃគូវិនិយោគខណៈការបុកគ្រឹះទប់ដីបានបញ្ចប់

November 7, 2018

0

ដោយ គង់ សូរិយា

ភ្នំពេញ៖ អាគារភ្លោះដែលជាមជ្ឈមណ្ឌលពាណិជ្ជកម្ម កប់ពពកលំដាប់ពិភពលោក Thai Bunrong Twin Tower បានផ្លាស់ប្តូរដៃគូវិនិយោគរបស់ខ្លួនហើយ ខណៈការបុកគ្រឹះសាងសង់ជញ្ជាំងទប់ដីបានបញ្ចប់មុនផែនការ។

យោងតាមប្រភពព៌តមានគួរឲ្យទុកចិត្តបាន ដែលគេហទំព័រ Propertyarea.asia ទទួលបាននារសៀលថ្ងៃទី៧ វិច្ឆិកានេះបានឲ្យដឹងថា CMT Cosmo Pte, Ltd Group ជាថ្មីរបស់ក្រុមហ៊ុនដៃគូក្រុមហ៊ុនថៃ ប៊ុនរ៉ុង ខណៈដំបូងឡើយក្រុមហ៊ុននេះបានចាប់ដៃគ្នាជាមួយក្រុមហ៊ុន Sun Kian Ip Group របស់ប្រទេសចិន ដើម្បីសាងសង់អគារកំពស់៥៦១ម៉ែត្រនេះ។

លោកសាស្ត្រាចារ្យទួស សាភឿនស្ថាបត្យករចូលរួមគូប្លង់គំរោងនេះ និងជាមន្ត្រីជាន់ខ្ពស់នៃក្រុមហ៊ុន Thai Bunrong Group ដែលជាអ្នកអភិវឌ្ឍន៍គំរោងនេះមិនបានឆ្លើយតបសំណួរសុំការពន្យល់បានទេ។

ទាក់ទងនឹងការសាងសង់អាគារនេះ លោកទួស សាភឿនបានឲ្យដឹងថា ក្រុមស្ថាបត្យករ និងវិស្វករលំដាប់ពិភពលោក ដែលធ្លាប់មានបទពិសោធន៍សាងសង់អាគារខ្ពស់ៗមកពីបួនប្រទេស កំពុងសិក្សាពីការសាងសង់អាគារនេះ។លោកបន្តថា ក្រុមស្ថាបត្យករ និងវិស្វករចូលរួមគូរប្លង់អាគារភ្លោះកប់ពពកនេះមានមកពីប្រទេសបារាំង សហរដ្ឋអាមេរិក ប្រទេសចិន និងក្រុមស្ថាបត្យករ និងវិស្វករពោរពេញដោយជំនាញនិងបទពិសោធន៍កម្ពុជាជាច្រើនរូបផងដែរ។

លោកធ្លាប់បានមានប្រសាសន៍ឲ្យដឹងថា រហូតមកទល់ពេលនេះ ក្រុមអ្នកជំនាញនិងក្រុមហ៊ុន បានសម្រេចបន្ថែមកំពស់អាគារនេះ ដល់កំពស់៥៦១ម៉ែត្រ និងបង្កើនទុនវិនិយោគផ្នែកសំណង់រហូតដល់ជាង៣០០០លានដុល្លារអាមេរិក និងជាង៣០០០លានដុល្លារទៀត នឹងត្រូវប្រើប្រាស់ធ្វើឲ្យអាគារនេះដំណើរការដោយរសរវើក។

លោកបន្តថា “ការសាងសង់មជ្ឈមណ្ឌលពាណិជ្ជកម្មពិភពលោកនេះ មិនមានការប្រែប្រួលទេ។ វានឹងជាមោទនភាព និងជាកិត្យានុភាពសម្រាប់កម្ពុជានៅលើពិភពលោក។លោកបន្តថា “មិនមានប្រទេសទាំងអស់អាចមានសមត្ថភាពសាងសង់ទេ ជួនកាលពួកគេមានលុយ តែមិនប្រាកដថាអាចសាងសង់បាននោះឡើយ។

លោកបន្តថា “យើងកំពុងប្រឹងប្រែងធ្វើឲ្យអាគារនេះ មានភាពភាពអស្ចារ្យ មិនមែនរាប់បញ្ចូលអង់តែននោះទេ គឺកំពស់ជាង៥០០ម៉ែត្រនេះ ជាអាគារដែលអាចប្រើប្រាស់បានដល់ចំណុចកំពូល។

ទោះជាយ៉ាងណាលោកមិនបញ្ជាក់ឲ្យដឹង ពីពេលវេលាជាក់លាក់នៃការចាប់ផ្តើមបើកការដ្ឋានសាងសង់ជាផ្លូវការទេ ដោយបានថ្លែងថា ក្រុមហ៊ុនកំពុងជ្រើសរើសរកពេលវេលាសមស្របមួយ។

នាយិកាប្រចាំប្រទេសនៃក្រុមហ៊ុន CBRE Cambodiaអ្នកនាងអាន សុធីតាបានថ្លែងថា ការសាងសង់អាគារដ៏ធំនេះ ជារឿងល្អមួយ ប៉ុន្តែបើគិតពីទំហំសេដ្ឋកិច្ច និងពាណិជ្ជកម្មកម្ពុជានាពេលបច្ចុប្បន្ននេះ ទំហំមជ្ឈមណ្ឌលពាណិជ្ជកម្មនេះ វាហាក់ធំពេក ប៉ុន្តែបើគិតពីការរីកចម្រើននៃសេដ្ឋកិច្ច និងទំហំពាណិជ្ជកម្មកម្ពុជាសម្រាប់រយៈពេល៥ទៅ១០ឆ្នាំខាងមុខ ទំហំអាគារនេះមិនធំនោះទេ។

អ្នកនាងបន្តថា “វាជាមោទនភាពសម្រាប់កម្ពុជា បើសិនជាអាគារនេះសាងសង់បានដោយជោគជ័យ”៕

រដ្ឋមន្ត្រីក្រសួងឧស្សាហកម្មស្នើឲ្យក្រុមហ៊ុន Hitachi បង្កើតរោងចក្រនៅកម្ពុជា

November 7, 2018

0

ដោយ គង់ សូរិយា

ភ្នំពេញ៖ រដ្ឋមន្ត្រីក្រសួងឧស្សាហកម្ម និងសិប្បកម្មលោកចម ប្រសិទ្ឋបានស្នើឲ្យនាយកគ្រប់គ្រងក្រុមហ៊ុន Hitachi បង្កើតរោងចក្រផលិតផលិតផលនេះនៅកម្ពុជា ដើម្បីលក់នៅកម្ពុជា និងអាចនាំចេញដោយរួចពន្ឋផងដែរ។

ក្នុងជំនួបពិភាក្សាការងារជាមួយ លោក Hitoshi Ito នាយកប្រតិបត្តិរងនៃក្រុមហ៊ុន Hitachi Co,Ltd នៅទីស្តីការក្រសួង ថ្ងៃទី៦ ខែវិច្ឆិកា ឆ្នាំ២០១៨កន្លងមកលោកចម ប្រសិទ្ឋបានមានប្រសាសន៍ថា ក្រុមហ៊ុន Hitachi Co,Ltd គឺជាក្រុមហ៊ុនមានឈ្មោះល្បីរបស់ជប៉ុន ដោយផលិតនូវផលិតផលប្រកបដោយគុណភាព ដូចជាគ្រឿងអេឡិចត្រូនិក និងអគ្គិសនីជាដើម ដូច្នេះដើម្បីឲ្យផលិតផលនេះមានវត្តមាននៅទីផ្សារកម្ពុជា កាន់តែទូលំទូលាយ ក្រុមហ៊ុនគួរបង្កើតជាកម្មវិធីតាំងពិព័រណ៌ ឬបង្កើតជាបន្ទប់តាំងបង្ហាញផ្សេងៗ ដើម្បីជម្រុញការធ្វើចរាចរផលិតផលនេះឲ្យកាន់តែប្រសើរ។

លោកបន្តថា ដើម្បីឲ្យផលិតផល Hitachi មានស្ថិរភាពក្នុងទីផ្សារនៅកម្ពុជា ក្រុមហ៊ុនគួរបង្កើតរោងចក្រផលិត ឧបករណ៍ម៉ាកHitachiនៅកម្ពុជាតែម្តង ព្រោះក្រោយពីផលិតរួចផលិតផលនេះ មិនត្រឹមតែសម្រាប់លក់ក្នុងទីផ្សារក្នុងស្រុកប៉ុណ្ណោះទេ ក្រុមហ៊ុនអាចនាំផលិតផលរបស់ខ្លួន លក់ចេញទៅផ្សារក្រៅប្រទេសបាន ដោយរួចពន្ធក្នុងការនាំចេញផងដែរ។

កន្លងមកក្រសួងឧស្សាហកម្ម និងសិប្បកម្ម បានចុះអនុស្សារណៈយោគយល់គ្នា ជាមួយការិយាល័យប្រកាសនីយ៍បត្រតក្កកម្មជប៉ុនរួចហើយ ដែលការចុះអនុស្សរណនេះធ្វើឡើងក្នុងបំណងធ្វើកិច្ចប្រតិបត្តិការ ចុះបញ្ជីការពារនូវសុពលភាពប្រកាសនីយបត្រតក្កកម្មជប៉ុននៅកម្ពុជា ដែលជាឧបករណ៍ផ្លូវច្បាប់មួយក្នុងកិច្ចការពារលួចចម្លងស្នាដៃ និងការច្នៃប្រឌិតថ្មីរបស់តក្កករ ដែលជាម្ចាស់នៃអ្នករកឃើញបច្ចេកវិទ្យាអ្វីមួយ។

លោក Hitoshi Ito នាយកប្រតិបត្តិរងនៃក្រុមហ៊ុន Hitachi Co,Ltd បានមានប្រសាសន៍ថាក្រុមហ៊ុននឹងធ្វើការពិនិត្យពិចារណា ស្របពេលដែលបរិយាកាសវិនិយោគ និងសក្តានុពលរបស់កម្ពុជា កាន់តែមានលក្ខណៈអំណោយផលល្អប្រសើរ។ ជាមួយគ្នានេះលោកក៏បានបង្ហាញនូវការភ្ញាក់ផ្អើល ចំពោះការវិវឌ្ឍន៍រីកចម្រើនយ៉ាងរហ័សនៃសេដ្ឋកិច្ច និងកំរិតជីវភាពរបស់ប្រជាពលរដ្ឋកម្ពុជា ក្នុងរយៈពេលប៉ុន្មានឆ្នាំចុងក្រោយ។

តាមរយៈនេះលោកមានក្តីសង្ឃឹមយ៉ាងមុតមាំ ក្នុងការទទួលបានភាពគាំទ្របន្ថែមទៀតលើទីផ្សាកម្ពុជា ចំពោះផលិតផលម៉ាក Hitachi៕

សម្តេចតេជោប្រាប់ឲ្យពន្លឿនការចចាជាមួយកូរ៉េដើម្បីពង្រីកផ្លូវជាតិលេខ2

November 7, 2018

0

ដោយ ស៊ីវ ម៉េង

ភ្នំពេញ៖ សម្តេចតេជោហ៊ុន សែនបានប្រាប់ឲ្យរដ្ឋមន្ត្រីក្រសួងសាធារណៈការ លោកស៊ុន ចាន់ថុលពន្លឿនការចចាជាមួយភាគីកូរ៉េ ដើម្បីពន្លឿនការជួសជុលនិងពង្រីកផ្លូវជាតិលេខ2។

ក្នុងដំណើរតាមរថយន្តចុះសំណេះសំណាលជាមួយកម្មករ និយោជិតជាង២ម៉ឺននាក់នៅស្រុកបាទី ខេត្តតាកែវ នាព្រឹកថ្ងៃទី៧ វិច្ឆិកានេះសម្តេចអគ្គមហាសេនាបតីតេជោហ៊ុន សែននាយករដ្ឋមន្ត្រីកម្ពុជា បានជំរុញឲ្យរដ្ឋមន្ត្រីក្រសួងសាធារណៈការ និងរដ្ឋមន្ត្រីក្រសួងសេដ្ឋកិច្ច ពន្លឿនការចចាជាមួយប្រទេសកូរ៉េខាងត្បូង ដើម្បី ពន្លឿនការពង្រីកផ្លូវជាតិលេខ២ ដែលជាផ្លូវសំខាន់មួយតភ្ជាប់ពីរាជធានីភ្នំពេញ ទៅកាន់ស្រុកគិរីវង្ស ខេត្តតាកែវជាប់ព្រំប្រទល់ប្រទេសវៀតណាម។ សម្តេចតេជោបានសម្តែងការងឿងឆ្ងល់ និងមិនសប្បាយចិត្ត ចំពោះភាពយឺតយ៉ាវនៃការសាងសង់ផ្លូវជាតិលេខ២នេះ។

សម្តេចបន្តថា “ស្ថានភាពក្នុងខេត្តតាកែវបានប្តូរអស់ហើយ មិនដូចពីមុននោះទេ អ្វី ដែលមិនប្តូរគឺមានតែផ្លូវជាតិលេខ២ប៉ុណ្ណោះ។

អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាធ្លាប់បានមានប្រសាសន៍ឲ្យដឹងកាលពីពេលថ្មីៗនេះថា ការសិក្សាដើម្បីចាប់ផ្តើមសាងសង់ និងពង្រីកផ្លូវជាតិលេខ២បានបញ្ចប់ហើយ ដោយការសាងសង់អាចចាប់ផ្តើមនៅឆ្នាំ២០១៩ខាងមុខនេះ ដោយគំរោងនេះស្ថិតក្រោមហិរញ្ញប្បទានសម្បទានពីរដ្ឋាភិបាលកូរ៉េ។

លោកបន្តថា “បច្ចុប្បន្នមន្ត្រីពាក់ព័ន្ឋកំពុងដោះស្រាយ ផលប៉ះពាល់ជាមួយប្រជាពលរដ្ឋ មុនពេលផ្លូវនេះនឹងចាប់ផ្តើមបើកការដ្ឋានសាងសង់”៕

ដំណឹងល្អ! គំរោងរៀបចំកែលំអរ និងលើកកំពស់ផ្លូវជាតិលេខ៤ នឹងចាប់ផ្តើមចុងឆ្នាំនេះ

November 7, 2018

0

ដោយ គង់ សូរិយា

ភ្នំពេញ៖ មន្ត្រីជំនាញក្រសួងសាធារណៈការ និងដឹកជញ្ជូនបានអះអាងថា ការកែលំអរនិងស្ថាបនាឡើងវិញនូវផ្លូវជាតិលេខ៤ នឹងអាចចាប់ផ្តើមនៅចុងឆ្នាំនេះឬដើមឆ្នាំ២០១៩ខាងមុខនេះ។

អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៧ វិច្ឆិកានេះថា ផ្លូវជាតិនេះនឹងមិនមានការពង្រីកទេ ប៉ុន្តែក្រសួងនឹងចាក់នៅលើចិញ្ចើមផ្លូវក្រួសក្រហម ដែលមាននាពេលបច្ចុប្បន្ននេះ និងលើកកំពស់តួផ្លូវនៅតំបន់ស្ពានគគីរ និងស្ពានសំរោង ដែលតែងតែប្រឈមមុខនឹងការលិចទឹកជំនន់ទឹកភ្លៀងពេលរដូវវស្សាចូលមកដល់ម្តង។លោកបន្តថា គំរោងនេះគ្រោងចំណាយថវិកា១០០លានដុល្លារអាមេរិក ដែលជាហិរញ្ញប្បទានសម្បទានពីធនាគារពិភពលោក។

លោកបន្តថា “យើងអាចនិយាយបានថា ការសិក្សាដើម្បីចាក់កៅស៊ូ និងលើកកំពស់តួផ្លូវនៅតំបន់ទាំងពីរបានបញ្ចប់ហើយ ហេតុនេះគំរោងចាប់ផ្តើមនៅចុងឆ្នាំនេះនឹងអាចដំណើរការបានឬអាចចាប់ផ្តើមឆ្នាំក្រោយ។

ផ្លូវជាតិលេខ៤ជាផ្លូវដ៏សំខាន់មួយ ដែលជាការតភ្ជាប់បណ្តាញដឹកជញ្ជូនទំនិញដ៏សំខាន់ ពីរាជធានីភ្នំពេញទៅកាន់ខេត្តព្រះសីហនុ។ ផ្លូវនេះមានប្រវែងជាង១១០គីឡូម៉ែត្រ។

ការប្រកាសពីការរៀបចំលើកកំពស់តួផ្លូវ និងចាក់កៅស៊ូនៅលើចិញ្ចើមផ្លូវជាតិនេះ បានប្រកាសដោយលោកទេសរដ្ឋមន្ត្រីស៊ុន ចាន់ថុលរដ្ឋមន្ត្រីក្រសួងសាធារណៈការ និងដឹកជញ្ជូន ក្នុងកំឡុងពេលលោកចុះពិនិត្យស្ថានភាពជំនន់ទឹកភ្លៀង ដែលបានហូរកាត់និងបង្អាក់ការធ្វើចរាចរណ៍ឆ្លងកាត់ផ្លូវជាតិដ៏សំខាន់នេះ៕

ចំនួនកាស៊ីណូនៅក្រុងប៉ោយប៉ែត នឹងកើនឡើងដល់ ៣០ទីតាំងនៅឆ្នាំ២០១៩

November 7, 2018

0

ដោយ គង់ សូរិយា

ភ្នំពេញ៖ ចំនួនកាស៊ីណូបានកើនឡើងខ្ពស់នៅក្រុងប៉ោយប៉ែត ដែលរហូតមកទល់ពេលនេះទីក្រុងជាប់ព្រំដែនជាមួយប្រទេសថៃនេះ មានកាស៊ីណូនឹងកើនឡើងដល់២០ទីតាំងហើយ និងកើនដល់៣០នាឆ្នាំខាងមុខ។

អ្នកវិនិយោគក្នុងស្រុកមួយរូប លោក សុខ ហ៊ាង បានមានប្រសាសន៍ឲ្យដឹងតាមទូរស័ព្ទកាលពីចុងសប្តាហ៍មុនថា រហូតមកទល់ពេលនេះ ក្រុងប៉ោយប៉ែតមានកាស៊ីណូសរុបចំនួន២០ទីតាំងហើយ និងរំពឹងកើនដល់៣០ទៅទីតាំងនៅឆ្នាំ២០១៩ខាងមុខនេះ។លោកបន្តថា កាស៊ីណូទាំងនោះវិនិយោគដោយអ្នកវិនិយោគក្នុងស្រុក និងអ្នកវិនិយោគបរទេសដូចជា ជនជាតិចិន ថៃ ម៉ាឡេស៊ីជាដើម។លោកបន្តថា អ្នកមកលេងកាស៊ីណូភាគច្រើននៅក្រុងប៉ោយប៉ែត ជាជនជាតិថៃ និងជនជាតិចិន និងជនបរទេសដទៃទៀត។

រដ្ឋាភិបាលបានអនុញ្ញាត្តឲ្យក្រុមហ៊ុនជាតិ អន្តរជាតិបង្វែរការសាងសង់កាស៊ីណូទៅកាន់បណ្តោយព្រំដែនកម្ពុជាថៃ និងកម្ពុជាវៀតណាម ជាក់ស្តែងក្រុងប៉ោយប៉ែត និងក្រុងបាវិតជាតំបន់មានកាស៊ីណូច្រើនជាងគេ។ ក្រៅពីនេះកម្ពុជាក៏មានការវិនិយោគកាស៊ីណូ នៅតំបន់ភ្នំដិន ស្រុកគិរីវង្ស ខេត្តតាកែវ ព្រំប្រទល់កម្ពុជា វៀតណាម និងនៅព្រំដែនច្រកអន្តរជាតិត្រពាំងផ្លុង ស្ថិតក្នុងស្រុកពញ្ញាក្រែក ខេត្តត្បូងឃ្មុំជាដើម។

លោក សុខ ហ៊ាង បានបន្តឲ្យដឹងថា បច្ចុប្បន្នក្រុងប៉ោយប៉ែតមានការរីកចម្រើនយ៉ាងលឿនលើវិស័យក្រៅពីកាស៊ីណូ ដោយវិស័យអចលនទ្រព្យបានកើនឡើងខ្ពស់ ដែលរហូតមកទល់ពេលនេះ បុរីលំនៅដ្ឋានចំនួន៨បានបញ្ចប់ការសាងសង់ និងបុរីជាច្រើនទៀតកំពុងសាងសង់។លោកបន្តថា ក្រៅពីបុរីលំនៅដ្ឋានក្រុងប៉ោយប៉ែត ក៏កំពុងមានការសាងសង់ខុនដូកំពស់កប់ពពក និងមជ្ឈមណ្ឌលពាណិជ្ជកម្មនិងផ្សារទំនើបផងដែរ។

លោក សាន ស៊ាងហូ អភិបាលក្រុងប៉ោយប៉ែត ខេត្តបន្ទាយមានជ័យបានមានប្រសាសន៍ឲ្យដឹងផងដែរថា ក្រុងប៉ោយប៉ែតកំពុងទាក់ទាញការចាប់អារម្មណ៍ច្រើនពីអ្នកវិនិយោគជាតិ និងអន្តរជាតិ ដោយបច្ចុប្បន្នចំនួនកាស៊ីណូថ្មីៗជាច្រើន បាននិងកំពុងសាងសង់ ដែលធ្វើឲ្យចំនួនកាស៊ីណូកើនឡើងកាន់តែច្រើននាពេលអនាគត។

លោកបន្តថា កំនើននៃការវិនិយោគ បានធ្វើឲ្យតម្លៃដីធ្លីមានកំនើនខ្ពស់ និងមានការរីកចម្រើនលើវិស័យអចលនទ្រព្យ ដែលបច្ចុប្បន្នក្រុងនេះមានអាគារកំពស់២០ជាន់ជាច្រើន និងនៅឆ្នាំ២០១៩ខាងមុខ ក្រុងនេះអាចមានការសាងសង់អាគារកំពស់២០ ទៅ៣០ជាន់កាន់តែច្រើន៕

អស្ចារ្យ! ចិនវិនិយោគប្រាក់ ១១,២ពាន់លានដុល្លារសង់ព្រលានយន្តហោះថ្មីដែលអាចទទួលអ្នកដំណើរ១០០លាននាក់

November 6, 2018

0

ដោយ វុត្ថា

ភ្នំពេញ៖ ដើម្បីពង្រីកមធ្យោយបាយដឹកជញ្ជូន ក៏ដូចជាការផ្លាស់ប្តូរពាណិជ្ជកម្មរដ្ឋាភិបាលចិនបាន និងកំពុងវិនិយោគទឹកប្រាក់១១,២ពាន់លានដុល្លារអាមេរិក ដើម្បីសាងសង់ព្រលានយន្តហោះថ្មីមួយ ដែលមានសមត្ថភាពអាចឲ្យអ្នកដំណើរឆ្លងកាត់ ១០០លាននាក់ក្នុងមួយឆ្នាំ។

បច្ចុប្បន្ននេះ ប្រទេសចិនកំពុងសម្រុកសាងសង់ ព្រលានយន្តហោះអន្តរជាតិថ្មីនេះ ដែលស្ថិតនៅជាប់ព្រុំប្រទល់ទីក្រុងប៉េកាំង និងទីក្រុង Langfang នៃខេត្ត Hebei។ ព្រលានយន្តអន្តរជាតិនេះ គឺជាព្រលានយន្តហោះធំលំដាប់ទី ២ បន្ទាប់ពីព្រលានយន្តហោះមួយទៀតស្ថិតនៅក្នុងទីក្រុងប៉េកាំង។

ព្រលានហោះនេះ ត្រូវបានគេប្រកាសសាងសង់ផ្លូវការ នៅក្នុងពាក់កណ្តាលឆ្នាំ ២០១៤ នេះ ហើយគ្រោងនឹងបញ្ចប់និងដាក់អោយប្រើប្រាស់ជាផ្លូវការ នៅក្នុងចុងឆ្នាំ ២០១៩ខាងមុខនេះ។ ព្រលានយន្តហោះនេះ សាងសង់នៅក្នុងទំហំដី ៧០០,០០០ ហិកតា នឹងក្លាយជាព្រលានយន្តហោះខ្នាតអន្តរជាតិ ដែលមានចំណតរហូត២៦០ ។

ម្យ៉ាងទៀត នៅពេលសាងសង់រួចរាល់ហើយនោះ ព្រលានយន្តហោះអន្តរជាតិនេះ នឹងក្លាយជាព្រលាន ដែលធំជាងគេបំផុតនៅលើពិភពលោក។ បន្ថែមពីនេះគេនឹងសាងសង់បន្ថែមនូវផ្លូវយន្តហោះ រត់អោយបាន៧ខ្សែរនាពេលខាងមុខទៀត ដើម្បីអាចផ្ទុកយន្តហោះចុះចតបានចំនួន៦២០,០០០ និងអ្នកធ្វើដំណើរចំនួន ១០០លាននាក់ក្នុងមួយឆ្នាំ។ គម្រោងថវិកាក្នុងការសាងសង់ព្រលានយន្តហោះនេះ គ្រោងចំណាយអស់ចំនួណ១១,២ ពាន់លានដុល្លារ រួមជាមួយនឹងការសាងសង់តភ្ជាប់ផ្លូវរថភ្លើង ចូលទៅក្នុងព្រលានផងដែរ៕