ដោយ: គង់ លាងហួរ
អន្តរជាតិ: នាយករដ្ឋមន្ត្រីឥណ្ឌាលោក Narendra Modi នាពេលថ្មីៗនេះបានបើកសម្ពោធផ្លូវរូងក្រោមដីយុទ្ធសាស្ត្រ ដើម្បីជំរុញការតភ្ជាប់ផ្លូវ ដែលធន់នឹងអាកាសធាតុត្រជាក់ឆ្ពោះទៅកាន់តំបន់ព្រំដែន Himalayan ជាមួយប្រទេសចិន និងប៉ាគីស្ថាន។

ផ្លូវរូងក្រោមដី“ Z-Morh ឬ Sonmarg” នេះលាតសន្ធឹងប្រវែង៦,៤គីឡូម៉ែត្រ ពីក្រោមភ្នំរាងរង្វេល ខណៈកន្លងទៅ ផ្លូវនេះត្រូវបានកាត់ផ្តាច់នៅពេលដល់រដូវកាលធ្លាក់ព្រិលចាប់ពី៤ខែទៅ៦ខែក្នុងមួយឆ្នាំ។

ការកសាងផ្លូវរូងក្រោមដីនេះជាផ្នែកមួយនៃផែនការជំរុញការអភិវឌ្ឍន៍ហេដ្ឋារចនាសម្ព័ន្ធកាន់តែច្រើនទៅកាន់តំបន់ព្រំដែនក្រោមរដ្ឋបាលលោក Modi។ នេះបើយោងតាមការចុះផ្សាយដោយទីភ្នាក់ងារសារពត៌មាន AFP។

ផ្លូវរូងក្រោមដី“ Z-Morh ឬ Sonmarg ជួយតភ្ជាប់តំបន់ Kashmir ប៉ែកឥណ្ឌាជាមួយតំបន់ Ladakh ដោយដើរតួជាច្រកមួយក្នុងការបើកឱ្យដំណើរការផ្លូវហាយវេ Srinagar-Leh ពេញមួយឆ្នាំ ដោយមិនមានការកាត់ផ្តាច់នៅរដូវកាលធ្លាក់ព្រិល។

គម្រោង​ដែល​មាន​តម្លៃ៣១៣លាន​ដុល្លារ​អាមេរិកនេះបានវចំណាយ​ពេល​សាងសង់អស់មួយ​ទសវត្សរ៍​។​ លោក Modi បានថ្លែងថា “តាមរយៈការបើកដាក់ឱ្យប្រើប្រាស់ផ្លូវរូងក្រោមដីនៅទីនេះ ការតភ្ជាប់នឹងប្រសើរឡើងយ៉ាងខ្លាំង”។

ជាមួយគ្នានោះ គម្រោងផ្លូវរូងក្រោមដីមួយទៀតឈ្មោះ “Zojila” ប្រវែង១៣គីឡូម៉ែត្របានសម្រេចវឌ្ឍនភាពនៃការសាងសង់ជាងពាក់កណ្តាល ហើយគ្រោងនឹងបើកដាក់ឱ្យដំណើរការនៅឆ្នាំ២០២៦។

ឥណ្ឌាក៏បានសាងសង់ផ្លូវរថភ្លើងប្រវែង២៧២គីឡូម៉ែត្រ ក្រោមទុនវិនិយោគចំនួន៣,៩ពាន់លានដុល្លារ ដែលមានចំណុចចាប់ផ្តើមនៅទីក្រុង Udhampur ហើយរត់កាត់រដ្ឋធានី Srinagar ក្នុងតំបន់ Kashmir រួមទាំងការសាងសង់ស្ពានក្រាលផ្លូវដែកខ្ពស់ជាងគេបំផុតនៅលើពិភពលោកឈ្មោះ Chenab។

តំបន់ Kashmir ជាដែនដីមួយ ដែលដិតដាមដោយអស្ថិរភាព និងការប្រយុទ្ធតតាំងគ្នា។ ចាប់តាំងពីឆ្នាំ១៩៤៧ រហូតដល់បច្ចុប្បន្ន តំបន់នេះបានក្លាយជាប្រធានបទនៃជម្លោះប្រដាប់អាវុធ និងនយោបាយរវាងឥណ្ឌា និង ប៉ាគីស្ថាន ដែលប្រជែងគ្នាចង់ក្តោបក្តាប់លើតំបន់យុទ្ធសាស្ត្រមួយនេះ។

នៅឆ្នាំ១៩៤៩ ក្រោមអន្តរាគមន៍របស់អង្គការសហប្រជាជាតិ(UN) គេបានពុះចែកតំបន់ Kashmir ជា២ភាគបណ្តោះអាសន្ន ដោយមួយភាគដាក់ឱ្យស្ថិតក្រោមការគ្រប់គ្រងរបស់ប៉ាគីស្ថាន និង​មួយភាគទៀត​ ក្រោមការគ្រប់គ្រងរបស់ឥណ្ឌា។ប៉ុន្តែ ការណ៍នេះពុំបានបញ្ចប់ជម្លោះរវាងប្រទេសជិតខាងទាំងពីរនេះទេ។

ជាក់ស្តែង ប្រទេសប៉ាគីស្ថាន នៅតែបន្តទាមទារយកទឹកដី​មួយផ្នែកនៃតំបន់ Kashmir ដែលឥណ្ឌាកំពុងត្រួតត្រា ដោយលើកហេតុផលថា តំបន់នេះមានប្រជាជនច្រើនលើសលប់កាន់សាសនាឥស្លាម ដូចនៅប៉ាគីស្ថាន។ ដោយឡែក ក្រៅពី​ឥណ្ឌា និងប៉ាគីស្ថាន​ ចិនក៏បានកាន់កាប់ទឹកដីមួយភាគតូច នៅប៉ែកខាងលិចនៃតំបន់ Kashmir ជាប់និងព្រំប្រទល់របស់ខ្លួនផងដែរ៕ប្រភព: AFP៕

ដោយៈ គង់ សូរិយា

    ភ្នំពេញៈ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី២០ ខែមករា ឆ្នាំ២០២៥នេះ តាមរយៈវេទិកាសាធារណៈបានបង្ហាញតួលេខ បញ្ជាក់ពីការខិតខំប្រឹងប្រែងរបស់រាជរដ្ឋាភិបាល ក្នុងការជួយរកទីផ្សារជូនកសិករ។

សម្តេចមហាបវរធិបតី ហ៊ុន ម៉ាណែត បានបញ្ជាក់តាមរយៈការប្រៀបធៀប ការនាំចេញកសិផលរបស់កម្ពុជា នៅឆ្នាំ២០២២ ធៀបជាមួយឆ្នាំ២០២៤ និងប្រទេសដែលបាននាំចូលកសិផលរបស់កម្ពុជា។

សម្តេចនាយករដ្ឋមន្ត្រីបានបញ្ជាក់ថា នៅឆ្នាំ២០២២ កម្ពុជាបាននាំចេញកសិផលសរុបចំនួន៨.៦លានតោន ទៅកាន់ប្រទេសចំនួន ៧៤ ក្នុងនោះមានស្រូវចំនួន៣.៥លានតោន។ ចំណែកឆ្នាំ២០២៤ កម្ពុជានាំចេញកសិផលចំនួន​១១លានតោណ ទៅកាន់ប្រទេសចំនួន ៩៤ប្រទេស ក្នុងនោះមានស្រូវ៥លានតោន។ បើប្រៀបធៀបឆ្នាំ២០២២ និងឆ្នាំ២០២៤ កម្ពុជាបានពង្រីកទីផ្សារនាំចេញបានចំនួន ២០ប្រទេស។

ការថ្លែងរបស់សម្តេចបវរធិបតី បានធ្វើឡើងក្នុងឱកាសអញ្ជើញ សម្ពោធសមិទ្ធផល នៅមជ្ឈមណ្ឌល​អតីតយុទ្ធជនប៊ុន រ៉ានី សែនជ័យដំណាក់ទ្រយឹង ក្នុងខេត្តពោធិ៍សាត់ នាព្រឹកថ្ងៃទី២០ ខែមករា ឆ្នាំ២០២៥។

សម្តេចនាយករដ្ឋមន្ត្រីបានបញ្ជាក់ថា “យើងគិតទាំងទីផ្សារក្នុងស្រុក និងក្រៅស្រុក។ នៅក្នុងស្រុករបស់យើង គ្រាន់តែស្រូវរបស់យើង នៅឆ្នាំ២០២៣ ការប្រមូលផលស្រូវរបស់យើងមាន១៣លានតោន ហើយប្រជាពលរដ្ឋរបស់យើង១៧លាននាក់ ហូបអស់តែ៥លានតោនទេ សល់៧លានតោនទៅណា?។

សម្តេចបន្ថែមថា អីចឹងបានយើងខិតខំរកទីផ្សារក្រៅស្រុកបន្ថែមទៀត ជូនប្រជាកសិកររបស់យើង។ ខ្ញុំគ្រាន់តែប្រៀបធៀបឆ្នាំ២០២២ និងឆ្នាំ២០២៤ ការនាំចេញកសិផលរបស់យើងនៅឆ្នាំ២០២២ យើងនាំចេញ ៨.៦លានតោន ទៅកាន់៧៤ប្រទេស ក្នុងនោះស្រូវយើងនាំចេញ ៣.៥លានតោន ទៅប្រទេសជិតខាងរបស់យើង បូកជាមួយអង្ករយើងនាំចេញ ៦៤ម៉ឺនតោន ចេញទៅ៦២ប្រទេស។ នៅឆ្នាំ២០២៤ ការនាំចេញកសិផលសរុបកើនពី៨.៦លានតោន (២០២២) ទៅ១១លានតោន នៅឆ្នាំ២០២៤ ហើយនាំចេញទៅកាន់ ៩៤ប្រទេសកើន ២០ប្រទេសក្នុង១ឆ្នាំ។ ចំពោះស្រូវយើងកើនការនាំចេញរហូតដល់ ៥លានតោន ហើយបីប្រទេស ថែមទាំងប្រទេសព័រទុយហ្គាល់មួយទៀត។ ចំណែកអង្ករឆ្នាំ២០២៤ យើងនាំចេញ៦៥ម៉ឺនតោន ទៅកាន់៧៥ប្រទេស នេះហើយ គឺជាការខិតខំរកទីផ្សារបន្ថែមជូកសិកររបស់យើង”។

សម្តេចមហាបវរធិបតី ហ៊ុន ម៉ាណែតបានប្រកាសថា រាជរដ្ឋាភិបាល សម្រេចឯកភាពដំឡើងកញ្ចប់ថវិកាបន្ថែម រហូតដល់១៥០លានដុល្លារអាមេរិក ដើម្បីធានាចរន្ដការទិញស្រូវពីប្រជាកសិករ។

សម្តេចបវរធិបតី ហ៊ុន ម៉ាណែត បានបញ្ជាក់ថា “យើងមានយុទ្ធការធានាឥណទាន សម្រាប់ការនាំចេញអង្ករ ដែលមានទំហំគម្រោងពី៣០លានដុល្លារ ដំឡើងរហូតដល់១៥០លានដុល្លារ ដែលបានឯកភាពកាលពីសប្ដាហ៍មុន […] ដើម្បីធានាដល់រោងមាស៊ីនកិនស្រូវ អាចមានលទ្ធភាពទៅខ្ចីលុយពីធនាគារឯកជន មកធ្វើជាទុនបង្វិល”។

ទន្ទឹមគ្នានេះ សម្តេចបវរធិបតី ហ៊ុន ម៉ាណែត បានគូសបញ្ជាក់ថា បើសិនជាអត់មានលុយ១៥០លានដុល្លារ សម្រាប់ដាក់ធានាឲ្យម៉ាស៊ីនកិនស្រូវទេ គឺម៉ាស៊ីនកិនស្រូវ ទៅខ្វីលុយធនាគារអត់បានទេ ដែលមានន័យថា រាជរដ្ឋាភិបាល ចេញមុខទៅជួយផ្ដល់ឥណទាន។

សម្តេចបវរធិបតី ហ៊ុន ម៉ាណែត បានលើកឡើងថា ការសម្រេចដំឡើងកញ្ចប់ថវិកា រហូតដល់១៥០លានដុល្លារនេះ គឺជាវិធានជាក់ស្ដែង ដែលរាជរដ្ឋាភិបាលបានធ្វើ ហើយនឹងកំពុងធ្វើ ហើយនឹងធ្វើបន្ដទៀត ដើម្បីធានាចរន្ដការទិញស្រូវពីប្រជាកសិករ៕

ដោយ: គង់ លាងហួរ
អន្តរជាតិ: យោងតាមការចុះផ្សាយដោយកាសែត Bangkok Post បានឱ្យដឹងថា ក្រសួង​មហាផ្ទៃ​ថៃកំពុង​ពិចារណា​ចេញ​លិខិតឆ្លង​ដែន​បណ្ដោះ​អាសន្ន​សម្រាប់​ប្រជាពលរដ្ឋ ដែលពុំមែនរស់នៅជាអចិន្ត្រៃយ៍នៅ​តាម​ព្រំដែន​កម្ពុជា-ថៃ ព្រមទាំងបង្កើត​ច្រក​គយ និង​ប៉ុស្តិ៍ត្រួតពិនិត្យ​បន្ថែម​ទៀត។

លោក Ansit Sampantarat រដ្ឋលេខាធិការ​អចិន្ត្រៃយ៍​នៃក្រសួងមហាផ្ទៃថៃ បាន​បង្ហើបផែនការនេះ ក្នុងអំឡុងពេលដឹកនាំ​កិច្ចប្រជុំ​មួយកាលពី​ពេលថ្មីៗនេះដើម្បី​ពិនិត្យ​មើលវិសោធនកម្ម​លើ​កិច្ចព្រមព្រៀង​រវាង​រដ្ឋាភិបាល​ថៃ និង​កម្ពុជាទាក់ទង​នឹង​ការ​ធ្វើដំណើរឆ្លង​ព្រំដែន។

ការចេញលិខិតឆ្លងដែនបណ្តោះអាសន្នសម្រាប់ប្រជាពលរដ្ឋ ដែលមិនមានទីលំនៅអចិន្ដ្រៃយ៍នៅតាមព្រំដែនកម្ពុជា-ថៃ ជាបញ្ហាមួយក្នុងចំណោមបញ្ហាសំខាន់ៗមួយចំនួន ដែលត្រូវបានត្រួតពិនិត្យនៅក្នុងកិច្ចប្រជុំខាងលើ។លិខិតឆ្លងដែននេះនឹងមានសុពលភាពរយៈពេល១សប្តាហ៍។

លោក Ansit បានគូសបញ្ជាក់ថា អភិបាល​ខេត្ត​នានានឹង​ទទួលបានសិទ្ធិ​ក្នុង​ការ​ចេញ​លិខិតឆ្លងដែន​ទាំង​នេះ។ ទន្ទឹមនឹងនោះ ការពង្រឹងវិធានការសន្តិសុខ ការធ្វើបច្ចុប្បន្នភាពលើមូលដ្ឋានទិន្នន័យនៃប្រទេសទាំងពីរ និងកិច្ចសហប្រតិបត្តិការជិតស្និទ្ធលើសន្តិសុខតាមព្រំដែននឹងជួយបង្កើនកម្រិតសុវត្ថិភាព។

កិច្ចប្រជុំក៏បានពិនិត្យមើលផែនការបង្កើតប៉ុស្តិ៍ត្រួតពិនិត្យគយអចិន្ត្រៃយ៍នៅស្ថានីយ៍រថភ្លើង “Baan Khlong Luek” ក្នុងខេត្តស្រះកែវ ដើម្បីលើកកំពស់ការដឹកជញ្ជូនតាមផ្លូវដែក និងជំរុញការដោះដូរពាណិជ្ជកម្មឆ្លងដែន។

លោក Ansit បានមានប្រសាសន៍ឱ្យដឹងបន្តថា ក្រុមការងារក៏បានឯកភាពគ្នាលើការបង្កើតប៉ុស្តិ៍ត្រួតពិនិត្យព្រំដែនអចិន្ត្រៃយ៍នៅស្ពានមិត្តភាពកម្ពុជា-ថៃ (ស្ទឹងបត់-បានណងអៀន)ផងដែរ បន្ទាប់ពីស្ពាននេះត្រូវបានបើកដំណើរការកាលពីថ្ងៃទី២៩ ខែតុលា ឆ្នាំ២០២៤។

លោកបញ្ជាក់ថា “ក្រសួងមហាផ្ទៃថៃផ្តល់អាទិភាពដល់ការសម្រួលការធ្វើដំណើរឆ្លងកាត់ព្រំដែន ជាពិសេសតំបន់ពាណិជ្ជកម្មសំខាន់ៗ ដើម្បីផ្តល់សុវត្ថិភាព និងភាពងាយស្រួលដល់អ្នកដំណើរ ក៏ដូចជាការលើកកម្ពស់សេដ្ឋកិច្ចមូលដ្ឋាន និងពាណិជ្ជកម្មនៅក្នុងសហគមន៍”។

លោក Ansit បានបន្ថែមថា “ការណ៍នេះស្របតាមគោលនយោបាយរបស់លោក Anutin Charnvirakul ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃថៃ ដែលសង្កត់ធ្ងន់លើកិច្ចសហប្រតិបត្តិការប្រកបដោយនិរន្តរភាពជាមួយបណ្តាប្រទេសជិតខាង”៕ប្រភព: Bangkok Post៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានស្ថិតក្នុងសភាពទ្រឹងក្នុងការជួញដូរនៅព្រឹកថ្ងៃច័ន្ទដើមសប្តាហ៍នេះ ដោយសារភាពមិនច្បាស់លាស់លើគោលនយោបាយអត្រាការប្រាក់នាពេលអនាគតរបស់ធនាគារកណ្តាលអាមេរិក (Federal Reserve)។

តួយ៉ាង តម្លៃមាស Spot Gold បានស្ថិតនៅទ្រឹងត្រឹម២.៧០២ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,២៣ភាគរយដល់២៧៤២,៥០ដុល្លារក្នុងមួយអោនគិតត្រឹមម៉ោង១០:៣៨នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៤៥ភាគរយ ដែលធនាគារកណ្តាលអាមេរិក (Fed) នឹងអាចបញ្ចុះអត្រាការប្រាក់របស់ខ្លួនចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះដល់១០៩,១៤ពិន្ទុនៅព្រឹកថ្ងៃច័ន្ទនេះ បន្ទាប់ពីបានបិទការជួញដូរត្រឹម១០៩,៣៥ពិន្ទុកាលពីថ្ងៃសុក្រសប្តាហ៍មុន។

ចំណែក តម្លៃលោហៈធាតុប្រាក់ Spot silver បានធ្លាក់ចុះ០,១៥ភាគរយដល់៣១,១ដុល្លារក្នុងមួយអោន ខណៈតម្លៃផ្លាទីនបានងើបឡើង០,០៣ភាគរយដល់៩៦៥,៨ដុល្លារក្នុងមួយអោន ហើយតម្លៃ palladium បានធ្លាក់ចុះ០,១១ភាគរយដល់៩៦៦ដុល្លារក្នុងមួយអោនគិតត្រឹមម៉ោង១០:៤២នាទីព្រឹក៕

ដោយៈ និស្ស័យ

ភ្នំពេញៈ លោកឡេង ធនយុទ្ធា រដ្ឋលេខាធិការក្រសួងសាធារណៈការ និងដឹកជញ្ជូន បានអញ្ជើញចុះត្រួតពិនិត្យស្ថានភាពទីតាំងផ្ទាល់ ផ្លូវតភ្ជាប់រវាងខេត្ត និងខេត្តក្នុងបណ្ដាខេត្តទាំងបួន នៃតំបន់ភាគឦសានប្រទេសកម្ពុជា រួមមានៈ ខេត្តក្រចេះ ស្ទឹងត្រែង រតនគិរី និងមណ្ឌលគិរី និងការតភ្ជាប់ជាមួយប្រទេសជិតខាងកម្ពុជា។

រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំប្រកប​ដោយគតិបណ្ឌិត និងចក្ខុវិស័យយ៉ាងច្បាស់លាស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បាន និងកំពុងជំរុញ និង លើកទឹកចិត្តឱ្យមានការសិក្សា និងពិនិត្យនូវលទ្ធភាពលើការអភិវឌ្ឍ នូវហេដ្ឋារចនាសម្ព័ន្ធតភ្ជាប់ក្នុងខេត្តទាំង៤ នៃតំបន់ភូមិភាគឦសាន របស់ប្រទេសឱ្យមានភាពប្រទាក់ក្រឡា ក្នុងគោលបំណង ដើម្បីអភិវឌ្ឍខេត្តទាំងបួននេះ ប្រែក្លាយទៅជាប៉ូលសេដ្ឋកិច្ចផ្នែកភាគឦសាន ជាមួយនឹងការតភ្ជាប់រួមគ្នារវាងកម្ពុជា បណ្ដាខេត្តជាប់ព្រំដែនរវាងកម្ពុជា-វៀតណាម និង កម្ពុជា-ឡាវ៕

ដោយៈ គង់ សូរិយា

ភ្នំពេញៈ ទីលានទុកដាក់សំរាមក្រុងសិរីសោភ័ណ ទីលានទី១១ក្នុងចំណោខេត្តមួយចំនួន ដែលជាគម្រោងកែលម្អ គ្រប់គ្រងបរិស្ថានក្រុងជុំវិញបឹងទន្លេសាបជំហាន២ ក្រោមកម្ចីឥណទានសម្បទានពីធនាគារអភិវឌ្ឍន៍អាស៊ី(ADB)។

លោករស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញចូលរួមជាអធិបតី ក្នុងពិធីសម្ពោធទីលានទុកដាក់សំរាម ក្រុងសិរីសោភ័ណនៃគម្រោងកែលម្អ គ្រប់គ្រងបរិស្ថានក្រុងជុំវិញបឹងទន្លេសាប ជំហានទី២  ក្រោមកម្ចីឥណទានសម្បទានពីធនាគារអភិវឌ្ឍន៍អាស៊ី(ADB)។

លោកលី សុវណ្ណារិទ្ធ អភិបាលខេត្តស្តីទីនៃគណ:អភិបាលខេត្តបន្ទាយមានជ័យ លោក អាន់តូនី ហ្គីល តំណាងធនាគារអភិវឌ្ឍន៍អាស៊ី(ADB) និងមន្រ្តីពាក់ព័ន្ឋចូលរួមផងដែរ។

ក្នុងឱកាសនោះផងដែរ លោករដ្ឋលេខាធិការ ក៏បានមានប្រ​សា​សន៍ ពន្យល់ណែនាំដល់ប្រជាពលរដ្ឋ ឱ្យបានជ្រាបពីអត្ថប្រ​យោ​ជន៍ នៃ​ការសាងសង់ទីលានទុកដាក់សំរាម ក៏ដូចជា ស្ថានីយចម្រោះទឹកកខ្វក់ ដែលយើងអាចទាញផលប្រយោជន៍ មកវិញបានយ៉ាងច្រើន តាមរយ:ការធ្វើការកែច្នៃប្រើប្រាស់ឡើងវិញ ធ្វើជាជីកំប៉ុកជាដើម ជាពិសេសបើមានការទុកដាក់សំរាម និងទឹកកខ្វក់ឱ្យបានត្រឹមត្រូវ តាមបទដ្ឋានបច្ចេកទេស វាអាចកាត់បន្ថយនូវបញ្ហាឈឺថ្កាត់របស់ប្រជាពលរដ្ឋ  ហើយប្រជាពលរដ្ឋ ពុំចាំបាច់ចំណាយច្រើនលើការព្យាបាលជំងឺផងដែរ។

ទន្ទឹមនឹងនេះ ប្រសិនយើងមានបរិស្ថាន ប្រកបដោយអនាម័យ នឹងរួមចំណែកបង្កើនសេដ្ឋកិច្ចជាតិ តាមរយៈការទាក់ទាញភ្ញៀវទេស​ចរណ៍ ដែលអាចឱ្យប្រជាពលរដ្ឋមានការងារធ្វើ និងបង្កើនប្រាក់ចំណូ​ល ដែលធ្វើឱ្យតំបន់នោះមានការអភិវឌ្ឍន៍ជឿនលឿន។

លោករស់ វណ្ណាបានបន្តថា រាជរដ្ឋាភិបាលអាណត្តិទី៧នៃរដ្ឋសភា ក្រោមការដឹកនាំដ៏ឈ្លាសវៃ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានផ្តល់ជូនប្រជាពលរដ្ឋរួចមកហើយនូវហេដ្ឋារចនាសម្ព័ន្ធលើដី និងក្រោមដី ដូចនេះដើម្បីបន្តនិរន្តរភាពរបស់ទីលានទុកដាក់សំរាម ក៏ដូចជាស្ថានីយចម្រោះទឹកកខ្វក់ ចាំបាច់ត្រូវមានការគាំទ្រ របស់បងប្អូនប្រជាពលរដ្ឋ តាមរយៈការចូលរួមបង់ថ្លៃសេវាប្រមូលសំរាម និងថ្លៃសេវាទឹកកខ្វក់ ដែលគោលដៅចំបងគឺការថែរក្សា សុខុមាលភាពរបស់ប្រជាពលរដ្ឋ ដូចនេះយើងត្រូវចូលរួមទាំងអស់គ្នា។

ក្រសួងសាធារណការ និងដឹកជញ្ជូនបានសាងសង់រួចមកហើយ នូវទីលានទុកដាក់សំរាមតាមបណ្តាខេត្តមួយចំនួនដូចជា ខេត្តព្រះសីហនុ ខេត្តបាត់ដំបង ខេត្តពោធិ៍សាត់ ខេត្តកំពង់ឆ្នាំង  ខេត្តកំពត ខេត្តកែប ខេត្តកំពង់ចាម ខេត្តកំពង់ធំ  ខេត្តក្រចេះ និងខេត្តស្ទឹងត្រែង។

គម្រោងសាងសង់ទីលានទុកដាក់សំរាម ក្រុងសិរីសោភ័ណនៃគម្រោងកែលម្អ គ្រប់គ្រងបរិស្ថានក្រុងជុំវិញបឹងទន្លេសាប ជំហានទី២នេះ ប្រើប្រាស់រយ:ពេលសាងសង់ចំនួន១០ខែ (លឿនជាងកាលកំណត់៧ខែ)  ដោយក្រុមហ៊ុន ហេង សម្បតិ្ត អាហរ័ណ នីហរ័ណ ដឹកជញ្ជូន និងសំណង់ ដែលមានទីតាំងស្ថិតក្នុងភូមិកង្វា សង្កាត់កំពង់ស្វាយ ក្រុងសេរីសោភ័ណ ខេត្តបន្ទាយមានជ័យ ដែលគម្រោងទាំងមូលត្រូវបានសាងសង់ឡើង នៅលើផ្ទៃដីសរុបទំហំ១១ហិកតា ដែលនឹងគ្រោងឱ្យប្រើប្រាស់ រហូតដល់ឆ្នាំ២០៤០ សម្រាប់ប្រជាជនប្រមាណជាង១២៨,​២០៨នាក់ ដែលរស់នៅក្នុងសង្កាត់ម្កាក់ កំពង់ស្វាយ ព្រះពន្លា ទឹកថ្លា អូរអំបិល ភ្នៀត និងកោះពង្សសត្វ ក្រុងសិរីសោភ័ណ ខេត្តបន្ទាយមានជ័យ៕