ដោយ ដែន ចែងចាំង

ភ្នំពេញ៖ ទុនវិនិយោគនៅក្នុងវិស័យសហគ្រាសធុនតូច និងមធ្យម និងសិប្បកម្ម ប្រើប្រាស់ទុនសមមូលសរុបប្រមាណជាង ៤ពាន់ ៧រយលានដុល្លាអាមេរិក និងនាំមកនូវផលរបរប្រចាំឆ្នាំប្រមាណជាង ៩៣ពាន់លានដុល្លារអាមេរិក ។

យោងតាមរបាយការណ៍បូកសរុបលទ្ធផលការងាររបស់ក្រសួងឧស្សាហកម្ម និងសិប្បកម្មរយៈពេល៥ឆ្នាំ ២០១៣- ២០១៧ និងលើកទិសដៅអនុវត្តន៍បន្ត បានបង្ហាញឲ្យដឹងថា សហគ្រាសធុនតូច និងមធ្យម និងសិប្បកម្មឆ្នាំ២០១៧ សរុប មានប្រមាណជាង១៥ម៉ឺនមូលដ្ឋាន ស្មើជាង២៩% នៃចំនួនសហគ្រាសធុនតូច និងមធ្យម និងសិប្បកម្មទាំងអស់ និងបាន បង្កើតការងារសរុបចំនួនជាង១លានកន្លែង និងបានប្រើប្រាស់ទុនសមមូលសរុបសម្រាប់ការវិនិយោគប្រមាណជា ៤ពាន់ ៧រយលានដុល្លាអាមេរិក និងនាំមកនូវផលរបរប្រចាំឆ្នាំប្រមាណជាង ៩៣ពាន់លានដុល្លាអាមេរិកផងដែរ ។

ពាក់ព័ន្ធនឹងការវិនិយោគនៅលើសហគ្រាសធុនតូច និងមធ្យម និងសិប្បកម្ម នៅក្នុងរយៈពេល៥ឆ្នាំកន្លងមកនេះ បានបង្ហាញឲ្យឃើញថា មានការកើនឡើងជាលំដាប់ ជាក់ស្តែងនៅក្នុងឆ្នាំ២០១៧ សហគ្រាសធុនតូច និងមធ្យម និងសិប្បកម្មថ្មី បានកើនឡើងជាង ៣ពាន់មូលដ្ឋាន ស្មើជាង២% បើប្រៀបធៀបទៅឆ្នាំ២០១៦ ក្នុងនោះបានផ្តល់ប្រកាស បង្កើតសហគ្រាសសិប្បកម្មថ្មីថ្នាក់ជាតិ មានចំនួន៧៧៤មូលដ្ឋាន និងថ្នាក់ក្រោមជាតិជាង២ពាន់មូលដ្ឋានបន្ថែមទៀត និងបានបង្កើតការងារថ្មីជាង២ម៉ឺនកន្លែង បានប្រើប្រាស់ទុនវិនិយោគជាង១រយលានដុល្លាអាមេរិក និងនាំមកនូវផលរបរ ប្រចាំឆ្នាំប្រមាណជិត ២ពាន់លានដុល្លាអាមេរិកផងដែរ ។

នៅក្នុងវិស័យទាំង៣នេះ សម្រាប់សហគ្រាសធុនមធ្យមកម្មន្តសាល កម្ពុជាមានសហគ្រាសប្រមាណជាង១ពាន់មូល ដ្ឋាន ស្មើជិត១% នៃសហគ្រាសធុនតូច និងមធ្យមកម្មន្តសាល និងសិប្បកម្មទាំងអស់ ដោយបានបង្កើតការងារចំនួនជាង ១០ម៉ឺនកន្លែង និងបានប្រើប្រាស់ផលទុនសរុបសម្រាប់ការវិនយោគប្រមាណជាង ៥រយលានដុល្លាអាមេរិក និងនាំមកនូវ ផលរបរប្រចាំឆ្នាំប្រមាណជាង៣ពាន់លានដុល្លា ។ ដោយឡែកសម្រាប់សហគ្រាសធុនតូចកម្មន្តសាល កម្ពុជាមានសហ គ្រាសធុនតូចប្រមាណជាង១ម៉ឺនមូលដ្ឋាន ស្មើជាង៩% បានបង្កើតការងារជាង៤០ម៉ឺនកន្លែង និងប្រើប្រាស់ផលទុន សមមូលសរុបសម្រាប់ការវិនិយោគប្រមាណជាង ២ពាន់លានដុល្លា និងនាំមកនូវផលរបរប្រចាំឆ្នាំជាង១៦ពាន់លានដុល្លា។

ចំពោះវិស័យសិប្បកម្មវិញ កម្ពុជាមានសិប្បកម្មប្រមាណជាង១០ម៉ឺនមូលដ្ឋាន ស្មើជិត៩០% នៃសហគ្រាសធុនតូច និងមធ្យមកម្មន្តសាល និងសិប្បកម្មទាំងអស់ ដោយបានបង្កើតការងារជាង៤០ម៉ឺនកន្លែង និងបានប្រើប្រាស់ទុនសមមូល សរុបសម្រាប់វិនោយោគប្រមាណជាង ២ពាន់លានដុល្លារ នាំមកនូវផលទុនប្រចាំឆ្នាំជាង៧៣ម៉ឺនលានដុល្លារ ដោយត្រូវ បានបែងចែកជាពីផ្នែកគឺ សិប្បកម្មមានហានីភ័យ និងសិប្បកម្មគ្មានហានីភ័យផងដែរ ៕

ដោយ គង់ សូរិយា

ភ្នំពេញ៖ វិស័យឧស្សាហកម្មកម្ពុជា កាន់តែធ្វើពិពិធកម្មក្នុងការនាំចេញ ដោយទំហំទឹកប្រាក់នៃការនចេញកាលពីឆ្នាំមុន មានទំហំទឹកប្រាក់ជិត១១ពាន់លាន​ដុល្លារអាមេរិក។

ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម និងសិប្បកម្មលោក ចម ប្រសិទ្ធ បានថ្លែង ក្នុងពិធីបើកសន្និបាតបូកសរុបលទ្ធផលការងាររបស់ក្រសួងនាព្រឹកថ្ងៃទី១២ ខែមីនានេះថា ដោយសារវិស័យឧស្សាហកម្មមានការរីកចម្រើន បានធ្វើឲ្យកំលាំងពលកម្មបម្រើការងារ ឲ្យផ្នែកវិស័យឧស្សាហកម្មបានកើនឡើង ក្នុងនោះបម្រើ ការងារផ្នែកឧស្សាហកម្មកាត់ដែរ មានកំលាំងពលកម្ម ជាង៨សែន៤ម៉ឺននាក់ និងផ្នែកផ្សេងៗទៀតមានជាង១សែននាក់ ដោយបានធ្វើឲ្យតម្លៃសរុបបរិមា​ណផលិតផលនាំចេញ មានចំនួនជិត១១ពាន់លានដុល្លារអាមេរិក ស្មើនឹង១៧០ភាគរយ បើធៀបទៅនឹងឆ្នាំ២០១៣ ។

លោកបន្តថា ចំណែកឧស្សាហកម្មបម្រើទីផ្សារក្នុងស្រុកវិញ មានចំនួនជាង២ពាន់លានដុល្លាអាមេរិកស្មើនឹង២៨០ភាគរយ ឧស្សាហកម្មនាំចេញ​កាត់ដេរសម្លៀកបំពាក់ និងស្បែកជើង មានចំនួនជាង៧ពាន់លានដុល្លារអាមេរិក ស្មើនឹង១៣៥ភាគរយ និងឧស្សាហកម្មនាំចេញផ្សេងទៀតមានដូចជា អង្ករ ស្កសរ ចំណីសត្វ កង់ កេសកាតុង កំប៉ុងស្រាបៀរ ស្រាបៀរ ភេសជ្ជ បារី ប្រដាប់ព្យូរស  ម្លៀកបំពាក់ ត្បូងពេជ្រ ខ្សែរូតកីឡា និងគ្រឿងសង្ហារឹមជាដើម មានចំនួនជាង១ពាន់លានដុល្លារអាមេរិក ស្មើនឹងកំនើន៥៩២ភាគរយ បើប្រៀបធៀបទៅឆ្នាំ២០១៣ផងដែរ ។​

របាយការណ៍របស់ក្រសួងបានបង្ហាញឲ្យដឹងផងដែរថា គិតត្រឹមបំណាច់ឆ្នាំ២០១៧ នៅកម្ពុជាមានរោងចក្រធុនធំ ដែលបានចុះបញ្ជីរសរុបជាង១៥០០រោងចក្រស្មើនឹង១៣៧% បើធៀបទៅឆ្នាំ២០១៣។ ក្នុងនោះឧស្សាហកម្មតម្បាញកាត់ដេរសម្លៀកបំពាក់ ស្បែកជើង និងការបូប មានចំនួនជាង១ពាន់រោងចក្រ ស្មើនឹង១២៩%ផងដែរ។

របាយការណ៍ដដែលបានបង្ហាញថា កំលាំងពលកម្មសរុបក្នុងវិស័យនេះ មានជិត១លាននាក់ ស្មើនឹង១៤៣ភាគរយ បើធៀបទៅឆ្នាំ២០១៣ ដោយឡែកកំលាំងពលកម្ម ដែលបានបម្រើការងារលើឧស្សាហកម្ម តម្បាញ កាត់ដេរសម្លៀកបំពាក់ ស្បែកជើង និងការបូប មានចំនួនជាង៨សែននាក់ ស្មើនឹង៤១៣ភាគ​រយ។ ចំពោះសហគ្រាសធុនតូច និងមធ្យម និងសិប្បកម្ម មានចំនួនសរុបជាង១សែន៥ម៉ឺនមូលដ្ឋាន ស្មើនឹង១៣០ភាគរយ បើប្រៀបធៀបទៅនឹងឆ្នាំ២០១៣ និងបានបន្តផ្តល់ការងារជូនប្រជាពលរដ្ឋ ចំនួនប្រមាណជាង១លាន នា​ក់ស្មើនឹង២២៩ភាគរយ ហើយមានផលរបរប្រចាំឆ្នាំរហូតដល់ជិត១លានដុល្លារ ។

ឧបនាយករដ្ឋមន្រ្តីប្រចាំការ និងជារដ្ឋមន្រ្តីស្តីទីទទួលបន្ទុកទីស្តីការគណៈរដ្ឋមន្រ្តីលោកប៊ិន​ ឈិនបានថ្លែងថា សមិទ្ធផលទាំងឡាយ ប្រសិនបើគ្មានការខិតខំប្រឹងប្រែងរួមគ្នា គ្មានគោលនយោបាយ និងយុទ្ធសាស្រ្ត ដ៏ត្រឹមត្រូវរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្រ្តីនោះទេ កម្ពុជាក៏មិនមានការរីកចម្រើននោះដែរ។ ជាក់ស្តែងគោលនយោបាយឈ្នះឈ្នះ របស់សម្តេចតេជោ បាននាំមកនូវសុខសន្តិភាព និងស្ថេរភាពពេញផ្ទៃប្រទេស គឺជាមូលដ្ឋានដ៏ចាំបាច់សម្រាប់អភិវឌ្ឍន៍គ្រប់វិស័យ និងបានជម្រុញឲ្យវិស័យសេដ្ឋកិច្ចកម្ពុជា សម្រេចបានកំណើនយ៉ាងឆាប់រហ័ស ដោយរក្សាកំណើនខ្ពស់ជាមធ្យម៧,៧% នៅក្នុងរយៈពេល២ទស្សវត្សចុងក្រោមនេះ ប្រកបដោយចីរភាព សមធម៌ បរិយាប័ន្ន ហើយធន់នឹងវិបត្តិ ដោយធនាគារពិភពលោកបានកត់ត្រាថា ជាប្រទេសឯកទត្តករកំណើន និងត្រូវបានធនាគារអភិវឌ្ឍន៍អាស៊ីប្រសិទ្ឋិនាមថា “កម្ពុជាជាខ្លាសេដ្ឋកិច្ចថ្មីមួយនៅក្នុងអាស៊ី”៕

ដោយ ដែន ចែងចាំង

ភ្នំពេញ៖ ពិតណាស់សេវាបដិសណ្ឋារកិច្ច ជាតម្រូវការចាំបាច់សម្រាប់វិស័យទេសចរណ៍ ក៏ដូចជាធុរកិច្ចនៅកម្ពុជា ពិសេសម្រាប់ទាក់ទាញភ្ញៀវទេសចរណ៍ អន្តរជាតិ ដើម្បីទាក់ទាញពួកគេមកទស្សនាកម្ពុជាកាន់តែច្រើនថែមទៀត។

អនុរដ្ឋលេខាធិការក្រសួងទេសចរណ៍លោកហោ សារុនបានថ្លែងក្នុងពិធីបើកសិក្ខាសាលាស្ដីពីបដិសណ្ឋារកិច្ច ផ្នែកសេវាកម្មភ្ញៀវទេសចរនាព្រឹកថ្ងៃទី១២ខែមីនានេះថា រាល់មន្រ្តីសមត្ថកិច្ច និងអ្នកផ្ដល់សេវាកម្មទាំងអស់ត្រូវតែផ្ដល់បដិសណ្ឋារកិច្ចមួយយ៉ាងប្រសើរ ដើម្បីផ្ដល់ជាភាពកក់ក្ដៅដល់ភ្ញៀវទេស​ចរ និងស្រូបយកកំណើនភ្ញៀវទេសចរបន្ថែម។

នាយឧត្តមសេនិយ៍ ឃុន សំបូរអគ្គនាយករងនៃអគ្គនាយកដ្ឋានអន្តោប្រវេសន៍បញ្ជាក់ថា រាល់មន្រ្តីគ្រប់ស្ថាប័នទាំងអស់ ដែលមានតួនាទីបម្រើការ ក្នុងព្រលានយន្តហោះអន្តរជាតិភ្នំពេញ ត្រូវតែធ្វើបដិសណ្ឋារកិច្ចល្អ ចំពោះភ្ញៀវទេសចរកំឡុងពេលផ្ដល់សេវាកម្ម ដើម្បីបង្ហាញពីភាពថ្លៃថ្នូរ វប្បធ័មប្រពៃណីរបស់​កម្ពុជា។ លោកបន្តថា រាល់មន្ត្រី បុគ្គលិកបម្រើការក្នុងព្រលានយន្តហោះ ប្រៀបដូចជាអ្នកជំនួសឲ្យស្ថាប័នរបស់ខ្លួន និងជំនួសអោយប្រជាជនទាំងមូល ដោយសារពួកគាត់ជាអ្នកប្រាស្រ័យទាក់ទងជាមួយភ្ញៀវទេស​ចរមុនដំបូងគេ បន្ទាប់ពីការចុះចតឈានជើងចូលកម្ពុជា។

លោកបន្តថា ដើម្បីផ្ដល់បដិសណ្ឋារកិច្ចល្អចំពោះភ្ញៀវទេសចរ គ្រប់មន្រ្តីពាក់ពន្ធ័ត្រូវតែមានការរៀបចំខ្លួន ដោយស្លៀកពាក់ឯកសណ្ឋានបានត្រឹមត្រូវ ការប្រើប្រាស់ពាក្យសម្ដី កាយវិការផ្សេងៗសមរម្យ ដឹងច្បាស់ពីចំណេះជំនាញតួនាទីរបស់ខ្លួន និងមានឆន្ទៈក្នុងការបំពេញការងារ។

សិក្ខាសាលាស្ដីពី បដិសណ្ឋារកិច្ច ផ្នែកសេវាកម្មភ្ញៀវទេសចរនេះធ្វើឡើងក្នុងរយៈពេល១០ថ្ងៃ ដោយចាប់ផ្ដើមពីថ្ងៃទី១២ ខែមីនាដល់ថ្ងៃទី ២១មីនាខាងមុខ។ ក្នុងសិក្ខាសាលានេះ មានសិក្ខាកាមចូលរួមជា មន្រ្តីសមត្ថកិច្ចបម្រើការងារនៅអាកាសយាន្តដ្ឋានអន្តរជាតិភ្នំពេញ មន្រ្តីសមត្ថកិច្ចនានា បុគ្គលិក CAMs ព្រមទាំងផ្នែកឯកជនសរុបប្រមាណជាង៦០០នាក់។

លោកហូ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជាបានថ្លែងថា សេវាបដិសណ្ឋារកិច្ចនៅកម្ពុជា​មានភាពល្អប្រសើរ ដោយសារគោលនយោបាយ​របស់រដ្ឋាភិបាល ពិសេសក្រសួងទេសចរណ៍ បានដាក់ចេញនូវសេវាកម្មបដិសណ្ឋារកិច្ចថ្នាក់ជាតិ ដើម្បីធ្វើយ៉ាងណាឲ្យភ្ញៀវទេសចរណ៍ជាតិ និងអន្តរជាតិមាន​ភាពកក់ក្តៅ ពេលមកដល់កម្ពុជា និងពេលទៅទស្សនានៅតាមរមណីយដ្ឋាននានា។

លោកបន្តថា “សេវាបដិសណ្ឋារកិច្ច ពិសេសនៅតាមច្រកទ្វារអន្តរជាតិនានាពិតជាមានសារៈសំខាន់ណាស់ ដើម្បីឲ្យភ្ញៀវ​មកទស្សនាកម្ពុជាមានភាពកក់ក្តៅ អារម្មណ៍ស្រស់ស្រាយពេលមកទស្សនាកម្ពុជា”៕

ដោយវុត្ថា

ភ្នំពេញ៖  នៅទីបំផុតលោក Jack Ma បានប្រកាសចូលវាយលុកទីផ្សារប្រទេសថៃ តាមរយៈក្រុមហ៊ុនលំដាប់ពិភពលោក Alibaba Group ដែលជាក្រុមហ៊ុនដ៏ធំរបស់លោក។

យោងតាមសេចក្តីរាយការណ៍របស់សារព័ត៌មាន Bangkok Post បញ្ជាក់ឲ្យដឹងកាលពីពេលថ្មីៗនេះថា ក្រុមហ៊ុន Alibaba Group និងរដ្ឋាភិបាលរបស់ថៃកំពុងស្វះស្វែងរកព៌តមានកាន់តែពិស្តារ ក្នុងការចុះកិច្ចព្រមព្រៀង ដើម្បីបង្កើតមជ្ឈ​មណ្ឌលឌីជីថលដ៏ទំនើបមួយនៅក្នុងប្រទេសថៃ។

លោក Angel Zhao ប្រធានក្រុមដឹកនាំសកលភាវូបនីយកម្មរបស់ក្រុមហ៊ុន Alibaba Group បាននិយាយថា ក្រុមហ៊ុនយក្សអេឡិចត្រូនិចចិន កំពុងធ្វើការពិនិត្យរបស់ការណ៍នៅដំណាក់កាលចុងក្រោយ នៃផែនការវិនិយោគសម្រាប់សម្ភោធដាក់អោយដំណើរនៅខែក្រោយនេះ បន្ទាប់ពីកិច្ចប្រជុំមួយកាលពីថ្ងៃពុធជាមួយលោក Somkid Jatusripitak ឧបនាយករដ្ឋមន្ត្រីនិង រដ្ឋមន្រ្តីឧស្សាហកម្ម Uttama Savanayana នៅទីក្រុងបាងកក។

លោក Zhao គ្រោងនឹងជួបលោក Uttama Savanayana ជាថ្មីម្តងទៀតក្នុង   រយៈពេលពីរសប្តាហ៍ទៀត ដើម្បីពិភាក្សាលម្អិតបន្ថែមទៀតអំពីកិច្ចព្រមព្រៀងនេះ។

ផែនការរបស់ក្រុមហ៊ុន Alibaba ដែលគ្រោងបង្កើតមជ្ឈមណ្ឌលឌីជីថលទំនើបនៅក្នុងប្រទេសថៃនាពេលនេះ គឺដើម្បីបំពេញតាមការសន្យារបស់លោក Jack Ma បន្ទាប់ពីការធ្វើទស្សនកិច្ចជាច្រើនលើកច្រើនសារ មកកាន់ប្រទេសនេះកាលពីប៉ុន្មានឆ្នាំកន្លងទៅ។

លោក Jack Ma ស្ថាបនិកក្រុមហ៊ុន និងនាយកប្រតិបត្តិ Alibaba នឹងត្រឡប់មកកាន់ប្រទេសនេះជាថ្មីម្តងទៀត នៅខែមេសាខាងមុខ ដើម្បីសម្ភោធដាក់អោយដំណើរជាផ្លូវការ នៃមជ្ឈមណ្ឌលឌីជីថល រួមទាំងព័ត៌មានបន្ថែមទៀតអំពីទីតាំងរបស់ក្រុមហ៊ុន។

កាសែតបាងកកប៉ុស្តិ៍បានរាយការណ៍ថា គម្រោងនេះ នឹងរួមបញ្ចូលនូវមជ្ឈមណ្ឌលចែកចាយ កន្លែងដឹកជញ្ជូន រោងចក្រផលិត មជ្ឈមណ្ឌលបណ្តុះបណ្តាល និងមជ្ឈមណ្ឌលកែច្នៃ។

លោក Uttama Savanayana បាននិយាយប្រាប់ក្រុមអ្នកយកព័ត៌មានថា នៅក្នុងដំណាក់កាលកានៃការវិនិយោគនេះ ក្រុមហ៊ុន Alibaba នឹងត្រូវចំណាយដើមទុននៅក្នុងគម្រោងអប់រំជាលើកតំបូង ដែលត្រូវបានរចនាឡើងដើម្បីបង្កើនធនធានមនុស្សរបស់ប្រទេសថៃ។

លោកបានជំរុញឱ្យក្រុមហ៊ុន Alibaba សហការជាមួយប្រទេសថៃ ក្នុងការជំរុញគោលដៅទេសចរណ៍ ដែលមិនសូវមានប្រជាប្រិយភាព ចំពោះភ្ញៀវទេស​ចរចិន។

ក្រុមហ៊ុន Alibaba និងរដ្ឋាភិបាលថៃនឹងធ្វើការរួមគ្នា ក្នុងការជួយកសិករផ្លាស់ប្តូរ ទៅរកពាណិជ្ជកម្មអេឡិចត្រូនិក និងចាប់ផ្តើមបង្កើតវិទ្យាស្ថានអភិវឌ្ឍន៍សម្រាប់ការចាប់ផ្តើមពាណិជ្ជកម្មអេឡិចត្រូនិកផងដែរ៕

ដោយ ដែន ចែងចាំង

ភ្នំពេញ៖ ដំណឹងរីករាយ ប្រទេសកម្ពុជានឹងមានវិស័យថ្មីមួយទៀត ចូលរួមជាកំលាំងចលករក្នុងការអភិវឌ្ឍសេដ្ឋកិច្ចជាតិ នៅឆ្នាំ២០១៩ខាងមុខនេះ ខណៈ​បច្ចុប្បន្នកម្ពុជាពឹងផ្អែកលើវិស័យបួន ដើម្បីទ្រទ្រង់សេដ្ឋកិច្ចរបស់ខ្លួន។

វិស័យថ្មីនោះគឺវិស័យរ៉ែ និងថាមពល ដែលកម្ពុជានឹងអាចទាញយកដំណក់ប្រេងលើកតំបូង និងកម្ពុជាអាចផលិតមាសបានដោយខ្លួនឯង នៅចុងឆ្នាំ២០១៩ ខណៈបច្ចុប្បន្នវិស័យវាយណភ័ណ្ឌកាត់ដេរ និងស្បែកជើង វិស័យសំណង់ និងអចលនទ្រព្យ វិស័យទេសចរណ៍ និងវិស័យកសិកម្ម កំពុងឈានមុខក្នុងការរុញសេដ្ឋកិច្ចកម្ពុជាទៅមុខប្រកបដោយឧត្តមភាព។

រដ្ឋមន្រ្តីក្រសួងរ៉ែ និងថាមពលលោកស៊ុយ សែមបានថ្លែងឲ្យដឹងក្នុងពិធីបើក​សន្និបាតការងារក្រសួងកាលពីពេ​លថ្មីៗនេះថា កម្ពុជាដល់ពេលអាចប្រមូលផលពីធនធានរ៉ែរបស់ខ្លួន ដើម្បីយក​មកអភិវឌ្ឍន៍សេដ្ឋកិច្ចរបស់ខ្លួនហើយ ពិ​សេ​សប្រាក់ចំណូលពន្ឋបានមកពីវិស័យរ៉ែ និងថាមពលក៏បានកើនឡើងយ៉ាងខ្លាំងផងដែរ ក្នុងរយៈពេលប៉ុ​ន្មានឆ្នាំចុងក្រោយនេះ។លោកបន្តថា ជាមួយគ្នានេះការចែកចាយបណ្តាញថាមពលអគ្គិសនី ក៏បានកើនឡើងរហូតដល់៨០ភាគរយ នៅគ្រប់បណ្តាភូមិទូទាំងប្រទេសផងដែរ វាជាអ្វីដែលជាមោទនភាពរបស់កម្ពុជា។

លោកបន្តថា “ធនធានរ៉ែកម្ពុជាមានភាពសម្បូរបែប ប៉ុន្តែក្រុមហ៊ុនអន្តរជាតិ​មួយបានរកឃើញរ៉ែមាសក្នុងទ្រង់ទ្រាយធំមួយ ដែលអនុញ្ញាត្តឲ្យកម្ពុជាអាចផលិតមាសបានដោយខ្លួនឯងនៅឆ្នាំ២០១៩ខាងមុខនេះ”។

រដ្ឋាភិបាលកម្ពុជាកាលពីចុងឆ្នាំមុន បានចុះហត្ថលេខាជាមួយក្រុមហ៊ុន KRISENERGY ដើម្បីចាប់ផ្តើមអាជីវកម្មទាញយកប្រេងចេញពីប្លុកA របស់កម្ពុជា ដែលរំពឹងថា កម្ពុជានឹងទទួលបានប្រាក់ចំណូលចេញ ពីវិស័យប្រេងកាតបានប្រ​មាណ៥០០លានដុល្លារក្នុងមួយឆ្នាំ។

បើតាមលោកយស់ មុនីរ៉ាតអ្នកនាំពាក្យក្រសួងរ៉ែ និងថាមពលបានឲ្យដឹងថា ដំណើរការធ្វើអាជីវកម្ម និងទាញយកធនធានប្រេងកាត កំពុងប្រព្រឹត្តិទៅដោ​យរលូន ហើយកម្ពុជារំពឹងទទួលបានដំណក់ប្រេងតំបូង នៅចុងឆ្នាំ២០១៩ខាងមុខនេះ។

លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុនEmerging Market Consulting បានថ្លែងថា វាជាការល្អប្រសើរណាស់ ដែលកម្ពុជា​មានវិស័យថ្មីមួយ ដែលអាចទាញយកថវិកាចូលជាតិ និងចូលរួមអភិវឌ្ឍន៍សេដ្ឋកិច្ចជាតិ ប៉ុន្តែបញ្ហាប្រឈមរបស់យើង គឺយើងមិនទាន់មានច្បាប់គ្រប់គ្រាន់ សម្រា​ប់គ្រប់គ្រងធនធានទាំងនោះឲ្យមានប្រសិទ្ឋិភាព និងតម្លាភាពនៅឡើយ។

លោកបន្តថា “មានការព្រួយបារម្ភពីអ្នកជំនាញ ខ្លាចកម្ពុជារងបណ្តាសារពី​ធនធានធម្មជាតិទាំងនោះ និងបារម្ភខ្លាចធនធានទាំងនោះមិនបានយកមកប្រើប្រាស់សម្រាប់អភិវឌ្ឍន៍សេដ្ឋកិច្ចជាតិ”។លោកបន្តថា “ប្រសិនជាកម្ពុជាកសាងមូលដ្ឋានច្បាប់បានរ៉ឹងមាំ និងមានអ្នកជំនាញអន្តរជាតិមកជួយ ដើម្បីគ្រប់គ្រងធន​ធានទាំងនោះបាន ពិតជាល្អណាស់សម្រាប់យកធនធានទាំងនោះមកអភិវឌ្ឍន៍​ប្រទេសរបស់យើង”៕