សម្តេចតេជោនាយករដ្ឋមន្រ្តី ហ៊ុន សែន បានបង្ហាញនូវក្តីសោមនស្សរីករាយ និងមានមោទនៈភាពចំពោះកិច្ចសហប្រតិបត្តិការគណៈកម្មការទន្លេមេគង្គនេះ បានជំរុញការអភិវឌ្ឍន៍សេដ្ឋកិច្ចសង្គម និងលើកកម្ពស់ការគ្រប់គ្រងធនធានទឹកប្រកបដោយនិរន្តភាព ជាពិសេសការពារតុល្យភាពអេកូឡូស៊ីនៃអាងទន្លេមេគង្គ។ ជាមួយគ្នានោះ យើងក៏បានអនុម័តយុទ្ធសាស្រ្តតាមវិស័យជាច្រើនទៀតដូចជា យុទ្ធសាស្រ្តសម្របសម្រួលមេគង្គនិងផែនការសកម្មភាពសម្រាប់ការប្រែប្រួលអាកាសធាតុ និងយុទ្ធសាស្ត្រគ្រប់គ្រងនិងអភិរក្សជលផល។
ជាពិសេសការអនុម័តនិងការអនុវត្តរចនាសម្ព័ន្ធថ្មីរបស់លេខាធិការដ្ឋានគណៈកម្មការទន្លេមេគង្គដែលបង្កើតនូវវេទិកាមានប្រយោជន៍សម្រាប់កិច្ចសហប្រតិបត្តិការដែលបន្តរួមទាំងកិច្ចព្រមព្រៀងលើរូបមន្តវិភាគទានជាតិឆ្ពោះទៅរកនិរន្តរភាពដោយខ្លួនឯងរបស់គណៈកម្មាធិការទន្លេមេគង្គនៅឆ្នាំ ២០៣០។

ថ្លែងនៅក្នុងពិធីបើកកិច្ចប្រជុំកំពូលពេញអង្គនៃគណៈកម្មការទន្លេមេគង្គលើកទី៣ នៅថ្ងៃទី ០៥ ខែមេសា ឆ្នាំ ២០១៨ នេះ សម្តេចតេជោ ហ៊ុន សែន បានមានប្រសាសន៍បន្តថា ទន្លេមេគង្គគឺជាប្រភពនៃជីវិតប្រកបដោយនិរន្តភា ពនិងការអភិវឌ្ឍន៍នៃបណ្តា ប្រទេសតាមដងទន្លេ។ ទោះជាយ៉ាងណាក៏ដោយ យើងក៏ទទួលស្គាល់ផងដែរថាអាងទឹកនៅតែបន្តប្រ ឈមមុខនឹងបញ្ហាមួយចំនួនដូច ជាកំណើនប្រជាជន ការអភិវឌ្ឍយ៉ាងឆាប់រហ័ស និងតម្រូវការកាន់តែច្រើនឡើងៗដូចជាតម្រូវការទឹក ស្បៀងអាហារ សន្តិសុខ និងថាមពលនៅក្នុងបណ្តាប្រទេសតាមដងទន្លេមេគង្គ។ លើសពីនេះ គឺផលប៉ះពាល់នៃការប្រែប្រួល អាកាសធាតុកាន់តែច្បាស់ពីមួយឆ្នាំទៅមួយឆ្នាំ។

និន្នាការនេះនឹងបង្កការគំរាមកំហែងបន្ថែមទៀតទៅលើ ប្រព័ន្ធទន្លេមេគង្គ ជាពិសេសលើធនធានធម្មជាតិនិងនិរន្តរភាពរបស់វា។ ដូច្នេះអាណត្តិ និងគោលដៅរួមរបស់យើង គឺដើម្បីធានាថាអត្ថប្រយោជន៍ដែលផ្តល់ដោយមេគង្គសម្រាប់ប្រទេសដែលមានទន្លេនៅតាមដងទន្លេអាចនឹងមាននិរន្តរភាពសម្រាប់មនុស្សជំនាន់ក្រោយ។

សម្តេចតេជោនាយករដ្ឋមន្ត្រីក៏បានផ្តល់នូវទស្សនៈមួយចំនួនដល់ប្រទេសជាសមាជិកគណៈកម្មការទន្លេមេគង្គ ដែលគួរតែផ្តោតការយកចិត្តទុកដាក់បន្ថែមលើបញ្ហាមួយចំនួនដូចជា៖

១)បន្តជំរុញ និងពង្រឹងយន្តការសម្រាប់ការសម្របសម្រួលនិងការអភិវឌ្ឍទឹក និងនិរន្តរភាពធនធានធម្មជាតិដែលមាន និរន្តរភាពដើម្បីផលប្រយោជន៍ដល់បណ្តាប្រទេសជាសមាជិក និងសុខុមាលភាពរបស់ប្រជាពលរដ្ឋរស់នៅតាមដងទន្លេ។

២)បន្តផ្តល់អាទិភាពក្នុងការដោះស្រាយបញ្ហាប្រឈមសំខាន់ៗដែលទាក់ទងនឹងនិរន្តភាពនៃអាងទន្លេមេគង្គ ដូចជាការគ្រប់គ្រងកាកសំណល់ និងបរិស្ថានផលប៉ះពាល់បរិស្ថាន ដែលបណ្តាលមកពីការប្រែប្រួលអាកាសធាតុ ការចម្លងរោគ និងការប្រើប្រាស់ទឹកនៅតាមទន្លេ និងការគ្រប់គ្រងគម្រោងផ្សេងៗទៀត ដែលទាក់ទងនឹងនិរន្តរភាពនៃអាងទន្លេមេគង្គ និងជីវចំរុះ ។

៣)បន្តបង្កើតវិធានការនិងផែនការអនុវត្តដើម្បីឆ្លើយតបទៅនឹងគ្រោះទឹកជំនន់និងគ្រោះរាំងស្ងួត ព្រមទាំងលើកទឹកចិត្តឱ្យមានការចុះសម្រុងគ្នានៃការអភិវឌ្ឍហេដ្ឋារចនាសម្ព័ន្ធក្នុងតំបន់។

៤)បន្តពង្រឹងសមត្ថភាពធនធានមនុស្សនិងស្ថាប័នលើកិច្ចសហប្រតិបត្តិការឆ្លងកាត់ព្រំដែនក្នុងចំណោមបណ្តាប្រទេសជាសមាជិក ជាពិសេសសម្រាប់ការអនុវត្តប្រកបដោយប្រសិទ្ធភាពនៃផែនការនិងយុទ្ធសាស្រ្តដែលបានសម្រេច និងដាក់ចេញរួចហើយ។

៥)បន្តជំរុញស្មារតីនៃកិច្ចសហប្រតិបត្តិការមេគង្គក្នុងភាពជាដៃគូក៏ដូចជាពង្រឹងកិច្ចសហប្រតិបត្តិការឱ្យបានកាន់តែជិតស្និទ្ធជាមួយយន្តការថ្នាក់តំបន់ និងអន្តរជាតិឆ្ពោះទៅរកការសម្រេចបាននូវគោលដៅអភិវឌ្ឍន៍ចីរភាពនៅអាងទន្លេមេគង្គ។

សម្តេចតេជោនាយករដ្ឋមន្ត្រី បានបញ្ជាក់ពីការប្តេជ្ញាចិត្តរបស់កម្ពុជាក្នុងការធ្វើការជាមួយបណ្តាប្រទេសទន្លេមេគង្គទាំងអស់ និងជាមួយដៃគូមេគង្គដទៃៗទៀតក្នុងការពង្រឹងកិច្ចសហប្រតិបត្តិការ និងភាពជាដៃគូក្នុងតំបន់សម្រាប់ការអភិវឌ្ឍប្រកបដោយចីរភាពនៅក្នុងអាងទន្លេមេគង្គ។

ទាំងអស់នេះគឺជាការទទួលខុសត្រូវសម្រាប់អនាគតនៃការរីកចម្រើនប្រកបដោយនិរន្តរភាពរបស់ប្រទេសនៃអាងទន្លេមេគង្គទាំងអស់ក្រោមពាក្យស្លោក «មេគង្គមួយ ស្មារតីតែមួយ»៕

ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តី ក្រសួងសាធារណការ និងដឹកជញ្ជូន នឹងអញ្ជើញជាអធិបតីភាពនៅក្នុងពិធីបើកឲ្យប្រើប្រាស់ជាបណ្តោះអាសន្ន គម្រោងកាណូតដឹកអ្នកដំណើរព្រែកព្នៅ-ភ្នំពេញ-តាខ្មៅ ដែលនឹងប្រព្រឹត្តិទៅនៅ ថ្ងៃសុក្រ ទី០៦ ខែមេសា ឆ្នាំ២០១៨ វេលាម៉ោង ៧ ព្រឹក នៅស្ថានីយនាវាដឹកអ្នកដំណើរឬស្សីកែវ (គីឡូម៉ែត្រលេខ ៦ ចំណុចទីលានប្រជាធិបតេយ្យថ្មី)។

ការដាក់ឲ្យប្រើប្រាស់ជាបណ្តោះអាសន្នគម្រោងកាណូតដឹកអ្នកដំណើរព្រែកព្នៅ-ភ្នំពេញ-តាខ្មៅនេះ បានចូលរួមចំណែកដល់ការផ្តល់មធ្យោបាយធ្វើដំណើរបន្ថែមទៀតជូនប្រជាពលរដ្ឋ ចំណេញពេលវេលា និងកាត់បន្ថយការចំណាយរបស់ប្រជាពលរដ្ឋ ព្រមទាំងចូលរួមកាត់បន្ថយការកកស្ទះចរាចរណ៍នៅតាមដងផ្លូវផងដែរ។ ប្រជាពលរដ្ឋ អាចធ្វើដំណើរតាមកាណូតដឹកអ្នកដំណើរនេះ ដោយឥតគិតថ្លៃ ចាប់ពីថ្ងៃទី ៦ ខែ មេសា រហូតដល់ថ្ងៃទី ១ ខែសីហា ឆ្នាំ២០១៨។

ក្រសួងសាធារណការ និងដឹកជញ្ជូន សូមគោរពអញ្ជើញអ្នកសារព័ត៌មានទាំងអស់ អញ្ជើញចូលរួម និងចុះទៅ ផ្តិតយកព័ត៌មាននៃពិធីដាក់ឲ្យប្រើប្រាស់ជាបណ្តោះអាសន្ននេះដោយផ្ទាល់៕

កិច្ចប្រជុំកំពូលគណៈកម្មការទន្លេមេគង្គ(MRC) លើកទី៣ បានចាប់ផ្តើមនៅព្រឹកថ្ងៃទី ០៥ ខែមេសា ឆ្នាំ ២០១៨នេះ ដែលប្រទេសកម្ពុជាធ្វើជាម្ចាស់ផ្ទះ ក្រោមប្រធានបទ “ការលើកកម្ពស់កិច្ចខិតខំប្រឹងប្រែងរួមគ្នា និងភាពជាដៃគូ ដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាពនៅក្នុងអាងទន្លេមេគង្គ-ទន្លេមេគង្គតែមួយ ស្មារតីតែមួយ” ដែលមានការចូលរួមពីថ្នាក់ដឹកនាំជាន់ខ្ពស់នៃប្រទេសដែលជាប់នឹងទន្លេមេគង្គមានដូចជា ប្រទេសកម្ពុជា វៀតណាម ឡាវ ប្រទេសចិន និងមីយ៉ាន់ម៉ា ព្រមទាំងដៃគូអភិវឌ្ឍន៍នានាជាច្រើនរូបផងដែរ។

កិច្ចប្រជុំដែលប្រារព្វធ្វើឡើងនៅក្នុងទឹកដីនៃខេត្តសៀមរាប នឹងពិនិត្យឡើងវិញនូវវឌ្ឍនភាព និងសមិទ្ធផលដែលគណៈកម្មការទន្លេមេគង្គសម្រេចបានកន្លងមក ក្នុងការជំរុញកិច្ចសហប្រតិបត្តិការតំបន់ ពិភាក្សាលើបញ្ហាប្រឈមក្នុងអាងទន្លេមេគង្គ និងដាក់ចេញទិសដៅជាយុទ្ធសាស្រ្តដើម្បីជំរុញ និងលើកកម្ពស់កិច្ចខិតខំប្រឹងប្រែងរួមគ្នានូវកិច្ចសហប្រតិបត្តិការ និងភាពជាដៃគូ ដើម្បីសម្រេចបានគោលដៅអភិវឌ្ឍន៍ប្រកបដោយចីរភាពក្នុងអាងទន្លេមេគង្គ។

ក្រសួងការបរទេស និងសហប្រតិបត្តិការអន្តរជាតិនៃប្រទេសកម្ពុជា បានអោយដឹងថា កិច្ចប្រជុំកំពូលនេះ នឹងអនុម័តសេចក្ដីថ្លែងការណ៍ក្រុងសៀមរាប ដែលឆ្លុះបញ្ចាំងនូវការប្តេជ្ញាចិត្តផ្នែកនយោបាយកម្រិតខ្ពស់របស់ប្រទេសជាសមាជិកគណៈកម្មការទន្លេមេគង្គ ក្នុងការបន្តធ្វើឲ្យប្រសើរនូវកិច្ចសហប្រតិបត្តិការតំបន់ ដើម្បីការអភិវឌ្ឍប្រកបដោយចីរភាពក្នុងអាងទន្លេមេគង្គ។ នៅចុងបញ្ចប់នៃកិច្ចប្រជុំកំពូល សម្តេចតេជោ ហ៊ុន សែន នឹងធ្វើសន្និសីទសារព័ត៌មានអំពីលទ្ធផលនៃកិច្ចប្រជុំកំពូលគណៈកម្មការទន្លេមេគង្គ លើកទី៣ផងដែរ។

លោក តែ ណាវុធ អគ្គលេខាធិការគណៈកម្មាធិការជាតិទន្លេមេគង្គកម្ពុជា បានឲ្យដឹងថា កិច្ចប្រជុំកំពូលគណៈកម្មការទន្លេមេគង្គ គឺជាព្រឹត្តិការណ៍ នយោបាយកម្រិតខ្ពស់បំផុត ដ៏មានសារៈសំខាន់ ដែលបានផ្ដួចផ្តើមឡើងដោយប្រទេសជាសមាជិកទាំងបួនរួមមាន៖ កម្ពុជា ថៃ ឡាវ និងវៀតណាម។ កិច្ចប្រជុំកំពូលរៀបចំធ្វើឡើងរៀងរាល់ ៤ឆ្នាំម្ដង ដែលជាវេទិកាកម្រិតតំបន់សម្រាប់ប្រមុខរដ្ឋាភិបាលនៃប្រទេសទាំងបួនធ្វើការផ្លាស់ប្ដូរទស្សនៈ ពិភាក្សាលើដំណោះស្រាយចំពោះបញ្ហាប្រឈមសំខាន់ៗដែលជួបប្រទះក្នុងតំបន់ និងពិនិត្យឡើងវិញលើវឌ្ឍនភាព និងសមិទ្ធផលដែលគណៈកម្មការទន្លេមេគង្គសម្រេចបាន ក្នុងការលើកកម្ពស់កិច្ចសហប្រតិបត្តិការពហុភាគី ដើម្បីការគ្រប់គ្រងប្រកបដោយចីរភាពក្នុងអាងទន្លេមេគង្គ ដូចមានចែងក្នុងកិច្ចព្រមព្រៀងមេគង្គ ដែលត្រូវបានចុះហត្ថលេខាដោយប្រទេសទាំងបួនកាលពីថ្ងៃទី០៥ ខែមេសា ឆ្នាំ១៩៩៥។
លោក ណាវុធ បានឲ្យដឹងទៀតថា ចាប់តាំងពីឆ្នាំ១៩៩៥ រហូតមកដល់ពេលនេះ មានការរៀបចំកិច្ចប្រជុំកំពូលចំនួនពីរលើករួចមកហើយ ដោយកិច្ចប្រជុំកំពូលលើកទី១ ត្រូវបានរៀបចំឡើងក្នុងឆ្នាំ២០១០ ដែលមានប្រទេសថៃធ្វើជាម្ចាស់ផ្ទះ ក្នុងខេត្តហួហ៊ីន និងកិច្ចប្រជុំលើកទី២ ក្នុងឆ្នាំ២០១៤ ធ្វើជាម្ចាស់ផ្ទះដោយប្រទេសវៀតណាម ក្នុងទីក្រុងហូជីមិញ។

កិច្ចប្រជុំកំពូលគណៈកម្មការទន្លេមេគង្គលើកទី៣នេះ នឹងផ្តោតលើគោលបំណងបីសំខាន់ៗចំនួន៣រួមមាន ទី១ ដើម្បីគូសបញ្ជាក់សារជាថ្មីអំពីតួនាទី ភារកិច្ច និងបេសកកម្មរបស់គណៈកម្មការទន្លេមេគង្គ និងដើម្បីលើកកម្ពស់ជាបន្ថែមទៀតនូវការពិគ្រោះយោបល់ជាចំហ និងកិច្ចសហប្រតិបត្តិការ ក្នុងអាងទន្លេមេគង្គ។ ទី២ ដើម្បីទទួលស្គាល់នូវវឌ្ឍនភាព ការរួមចំណែក និងសមិទ្ធិផលដែលគណៈកម្មការទន្លេមេគង្គសម្រេចបាន ក្នុងការលើកកម្ពស់កិច្ចសហប្រតិបត្តិការ និងការថែរក្សាសន្ដិភាព បើទោះបីជាប្រទេសជាសមាជិកមានផលប្រយោជន៍ គោលជំហរ និងការអភិវឌ្ឍខុសៗគ្នាយ៉ាងណាក៏ដោយ។ ទី៣ ដើម្បីជំរុញលើកកម្ពស់ជាបន្តនូវកិច្ចខិតខំប្រឹងប្រែងរួមគ្នា ដើម្បីដោះស្រាយនូវបញ្ហាប្រឈមនានាដែលកំពុងបន្ដកើតមាន និងច្បាមយកកាលានុវត្ថភាព ដើម្បីអាងទន្លេមេគង្គមួយមានភាពចម្រុងចម្រើនផ្នែកសេដ្ឋកិច្ច យុត្ដិធម៌សង្គម និងបរិស្ថានល្អ ដែលរួមចំណែកសម្រេចបាននូវគោលដៅអភិវឌ្ឍន៍ប្រកប ដោយចីរភាពរបស់សហប្រជាជាតិ លើផ្នែកការកាត់បន្ថយភាពក្រីក្រ កំណើនសេដ្ឋកិច្ច សន្ដិសុខស្បៀង ការផលិតថាមពលក្នុងតម្លៃសមស្របនិងអាចជឿទុកចិត្តបាន និងបម្រែបម្រួលអាកាសធាតុ៕

ដួង ចន្រ្ទា

​ភ្នំពេញ ប្រទេសកម្ពុជាកំពុងធ្វើជាម្ចាស់ផ្ទះ រៀបចំកិច្ចប្រជុំកំពូលនៃគណកម្មាធិការទន្លេមេគង្គ នៅខេត្តសៀមរាប ដែនដីដ៏ពិសិដ្ឋ ដែលនឹងមានការអញ្ជើញចូលរូមពីបណ្តាមេដឹកនាំបណ្តាប្រទេសក្នុងតំបន់នេះ។
​កិច្ចប្រជុំកំពូលនៃគណកម្មការធិកាទន្លេមេគង្គ បានចាប់ផ្តើមពីថ្ងៃទី៤ដល់ទី៥ មេសាខាងមុខនេះ។
​ថ្ងៃនេះគេហទំព័រPropertyarea.asia សូមនាំលោកអ្នកទៅស្វែងយល់ពីសក្តានុពលសេដ្ឋកិច្ច កត្តាប្រជាសាស្រ្តនៃបណ្តាប្រទេស៤នៃដងទន្លេមេគង្គ រួមទាំងប្រទេសភូមាផងដែរ។

​ប្រទេសកម្ពុជា
​ប្រទេសកម្ពុជាមានកំនើបសេដ្ឋកិច្ច៧,៧ភាគរយ ក្នុងរយៈពេលជាងពីរទស​វត្សរ៍កន្លងមកនេះ។ ប្រទេសនេះស្ថិតក្នុងចំណោមប្រទេស៨ ដែលមានសេដ្ឋកិច្ច​រីកលូតលាស់លឿនជាងគេនៅលើពិភពលោក។
ប្រទេសកម្ពុជា មានចំនួនប្រជាជនសរុបចំនួនប្រមាណ១៦លាននាក់ ប្រជាជនប្រទេសនេះ មានប្រាក់ចំណូល១៤៣៥ដុល្លារក្នុងម្នាក់ ក្នុងមួយឆ្នាំកាលពីឆ្នាំ​២០១៧។

​ប្រទេសនេះបានចាកចេញ ពីប្រទេសអភិវឌ្ឍន៍តិចតួចបំផុតកាលពីឆ្នាំ២០១៥ និងក្លាយជាប្រទេសមានប្រាក់ចំណូលមធ្យមកម្រិតទាប ហើយនឹងក្លាយ ជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងប្រទេសមាន​ប្រាក់ចំណូលខ្ពស់នៅឆ្នាំ២០៥០។

​សេដ្ឋកិច្ចកម្ពុជាពឹងផ្អែកលើវិស័យវាយណភ័ណ កាត់ដេរសម្លៀកបំពាក់ ស្បែកជើង វិស័យសំណង់ វិស័យទេសចរណ៍ សេវាកម្ម និងវិស័យកសិកម្ម។
​ប្រទេសឡាវ
​កំណើនសេដ្ឋកិច្ច៦,៨ភាគរយកាលពីឆ្នាំ២០១៧ និងកើនដល់៧ភាគរយនៅឆ្នាំនេះ។

​ចំនួនប្រជាជនជិត៧លាននាក់នៅឆ្នាំ២០១៧
ប្រាក់ចំណួលក្នុងមនុស្សម្នាក់ ក្នុងមួយឆ្នាំជាង១៦៤២ដុល្លារកាលពីឆ្នាំ២០១៦។

​ សេដ្ឋកិច្ចប្រទេសឡាវពឹងផ្អែកលើធនធានធម្មជាតិ ការនាំចេញផលិតផល​កសិកម្ម សេវាកម្ម និងវិស័យទេសចរណ៍។

​ប្រទេសថៃ
​សេដ្ឋកិច្ចប្រទេសថៃកើន៤,៣ភាគរយកាលពីឆ្នាំ២០១៧។
​តាមការព្យាករណ៍ចំនួនប្រជាជនថៃ នឹងកើនដល់ចំនួនជាង៦៩លាននាក់នៅឆ្នាំ២០១៨នេះ។
​ចំណូលសម្រាប់មនុស្សម្នាក់ក្នុងឆ្នាំ២០១៦ មានទឹកប្រាក់៥៩០១ដុល្លារ។

​សេដ្ឋកិច្ចប្រទេសថៃមួយផ្នែកធំ ពឹងផ្អែកលើការនាំចេញទំនិញប្រើប្រាស់ ផលិតផលកសិកម្ម សេវាកម្ម ទេសចរណ៍ វិស័យសំណង់ និងអចលទ្រព្យ ជលផល និងវិស័យយានយន្តផងដែរ។

​វៀតណាម
​ប្រជាជនវៀតណាមបានកើនឡើងដល់ជាង៩៦លាននាក់នៅឆ្នាំ២០១៧។
​ចំណូលសម្រាប់មនុស្សម្នាក់មាន១៧៧០ដុល្លារសម្រាប់មនុស្សម្នាក់ កាលពីឆ្នាំ២០១៧។

​កំនើនសេដ្ឋកិច្ចមានប្រមាណ៦,២៨ភាគរយ និងរំពឹងកើនដល់៧ភាគរយនៅឆ្នាំ២០១៨។

​វិស័យសេដ្ឋកិច្ចវៀតណាម ពឹងផ្អែកលើការនាំចេញផលិតផលប្រើប្រាស់ ផលិតផលកសិកម្ម ជលផល វត្ថុធាតុដើម ទេសចរណ៍ និងវិស័យសំណង់ និងអចលនទ្រព្យ។

​ភូមា
​ប្រជាជនភូមា រំពឹងនឹងកើនដល់ជាង៥៤លាននាក់នៅឆ្នាំ២០១៨។
​កំនើនសេដ្ឋកិច្ចល្អប្រសើរកាលពីឆ្នាំមុន ដោយប្រទេសនេះសម្រេចបានកំ​នើនសេដ្ឋកិច្ច៧ភាគរយ។
​ប្រាក់ចំណូលសម្រាប់មនុស្សម្នាក់ នៅប្រទេសភូមាមានចំនួន១៤២០ដុល្លា​រកាលពីឆ្នាំ២០១៦។

​ប្រទេសភូមាពឹងផ្អែកលើធនធានធម្មជាតិ សេវាកម្ម ការនាំចេញផលិតផល​កសិកម្ម និងវិស័យវាយណភ័ណផងដែរ៕

• ដោយ : ដួង ចន្រ្ទា
  ភ្នំពេញ : ធនាគារធំជាងគេមួយនៅកម្ពុជា បានសម្រេចកំនើនល្អប្រសើរ ក្នុងនាមជាធនា​គារឈានមុខគេមួយលើទំហំប្រាក់កម្ចី ការដាក់ប្រាក់បញ្ញើរ និងទំហំនៃការិយាល័យប្រតិបត្តិការ។
  ប្រធាននាយកប្រតិបត្តិធនាគារអេស៊ីលីដា ភីអិលស៊ី លោកអ៊ិន ចាន់នី បានថ្លែងឲ្យដឹងកាលពីម្សិលម៉ិញនេះថា នៅក្នុងវិស័យហិរញ្ញវត្ថុទាំងមូល ក្នុងរយៈពេល៥ឆ្នាំកន្ល​ង​មកនេះ ដោ​យ​គិតពីឆ្នាំ២០១៣-២០១៧ ធនាគារអេស៊ីលីដាទទួលកំណើនពីប្រាក់បញ្ញើរសន្សំ និងឥណ​ទាន គិតជាមធ្យមជាង២០ភាគរយ។ លោកបន្តថា គិតក្នុងរយៈពេល៥ឆ្នាំមកនេះ ជាមធ្យមប្រាក់បញ្ញើរសន្សំមានកំនើនប្រមាណ១៩ភាគរយ រីឯឥណទានមានកំនើនគិតជាមធ្យមមានប្រមាណ២០ភាគរយ។
  លោកបន្តថា “ធនាគារអេស៊ីលីដាពេលបច្ចុប្បន្ន បានផ្តល់សេវាប្រើប្រាស់តាមបែបឌីជីថលច្រើន និងល្អប្រសើរជាងមុន ដើម្បីបំពេញនូវសេចក្តីត្រូវការរបស់អតិថិជន ដែលសេវាកម្មទាំងនោះ អាចជួយឲ្យអតិថិជនចំណេញទាំងពេលវេលា ងាយស្រួល សុវត្ថិភាព និងទំនើ​បទាន់សម័យ ដោយពុំចាំបាច់ធ្វើដំណើរដល់សាខាធនគារនោះទេ”។លោកបន្ថែមថា “ភាពរីកចម្រើនរបស់ធនគារ ក៏ដូចជាការផ្តល់សេវាកម្មបែបឌីជីថលឥតឈប់ឈរ ដោយសារតែការមើលឃើញពីការអភិវឌ្ឍន៍ និងស្ថានភាពសេដ្ឋកិច្ចរបស់ប្រទេសកាន់តែកើនឡើង”។
• 
  គិតមកដល់ពេលនេះ ធនាគារអេស៊ីលីដាភីអ៊ិលស៊ី បានធ្វើប្រតិតបត្តិការជាង២០ឆ្នាំហើយ ដើម្បីបម្រើសេវាកម្មហិរញ្ញវត្ថុជូនដល់សាធារណជន និងអតិថិជនទាំងវិស័យឯកជន និងវិស័យសាធារណៈ តាមរយៈហេដ្ឋារចនាសម្ព័ន្ធអេឡិចត្រូនិច ដែលភ្ជាប់បណ្តាញប្រតិបត្តិការទូទាំងសលកលោក។ ក្នុងនោះអេស៊ីលីដា មានកម្មករ និយោជិត បម្រើការងារសរុបចចំនួនជាង១ម៉ឺននាក់ កំពុងបម្រើការនៅតាមបណ្តាសាខាចំនួន២០០ការិយាល័យ នៅទូទាំងប្រទេសកម្ពុជា។
  ប្រធានសមាគមធនាគារកម្ពុជាស្តីទី លោកឆារស៍ វ៉ាន់បានថ្លែងថា សេវាកម្មធនាគារនៅកម្ពុជាមានភាពរីកចម្រើន ហើយវិស័យនេះ កំពុងចូលរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ច ព្រោះនៅពេលសេដ្ឋកិច្ចរីកចម្រើន ត្រូវការលំហូរទុនកាន់តែច្រើន ដើម្បីធ្វើឲ្យសកម្មភាព និងចរន្តសេដ្ឋកិច្ចដំណើរការ ដូច្នេះធនាគារពិតជាដើរតួនាទីចាំបាច់ណាស់ ក្នុង​សេដ្ឋកិច្ចកម្ពុជា។
  លោកបន្តថា “ទោះជាការប្រកួតប្រជែងកើនឡើងខ្លាំងក្តី ប៉ុន្តែវិស័យនេះនៅតែដំនើរការដោយល្អប្រសើរ ព្រោះការ​ប្រកួតប្រជែងស្ថិតក្នុងក្របខ័ណ្ឌមួយប្រកបដោយក្រមសីលធ៌ម”៕