ដោយ វុត្ថា
ភ្នំពេញ៖ ក្រុមហ៊ុនវិស្វកម្ម និងដែកថែបចិនគ្រោងសាងសង់ខ្សែកាបអុបទិកក្រោមបាតសមុទ្រ ពីភ្នំពេញទៅហុងកុង ដើម្បីជំរុញនិងលើកកម្ពុស់ប្រព័ន្ធអ៊ីនធើណែតរបស់កម្ពុជាអោយកាន់តែមានគុណភាព និងល្បឿនលឿនជាងមុន ស្របទៅលើនយោបាយបើកចំហររបស់សម្តេចតេជោ និងរាជរដ្ឋាភិបាលកម្ពុជា ដែលស្វាគមន៍អ្នកវិនិយោគបរទេសទាំងអស់ក្នុងការមកបណ្តាក់ទុនកសាងនិងអភិវឌ្ឍន៍ប្រទេស។
លោក ស៊ូ ស៊ីវេ (Xu Siwei) ប្រធានក្រុមប្រឹក្សាភិបាលនៃក្រុមហ៊ុនវិស្វកម្ម និងដែកថែបចិននៅក្នុងជំនួបសំដែងការគួរសម និងពិភាក្សាការងារជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅទីក្រុងប៉េកាំងនាថ្ងៃទី ២១ ខែមករាឆ្នាំ ២០១៩នេះឲ្យ ដឹងថា ក្រុមហ៊ុនលោកមានទំនុកចិត្តយ៉ាងខ្លាំង លើការដឹកនាំរបស់សម្តេចតេជោ ដែលធ្វើអោយប្រទេសមានសុខសន្តិភាព ស្ថិរភាព និងមានកំណើនសេដ្ឋកិច្ចខ្ពស់ ហើយទន្ទឹមនឹងនេះដែរ គឺប្រទេសចិននិងកម្ពុជាមានទំនាក់ទំនងទ្វេភាគីល្អ ដូចជាបងប្អូនទៀតផង។ ក្រុមហ៊ុនលោក ក៏មានគម្រោងសាងសង់ខ្សែកាបអុបទិកក្រោមបាតសមុទ្រ ពីភ្នំពេញទៅហុងកុង ដើម្បីជំរុញនិងលើកកម្ពុស់ប្រព័ន្ធអ៊ីនធើណែតរបស់កម្ពុជា ឲ្យកាន់តែមានគុណភាព និងល្បឿនលឿនជាងមុន។
សម្តេចតេជោហ៊ុន សែន បានសម្តែងក្តីសប្បាយរីករាយ ចំពោះក្រុមហ៊ុនចិនដែលមានជំនឿទុកចិត្តលើកម្ពុជា ហើយបានសម្រេចទៅវិនិយោគនៅទីនោះ។ សម្តេចតេជោ ក៏បានឯកភាពទៅ និងការស្នើសុំខាងលើ ព្រោះថាកម្ពុជាទើបតែមានប្រព័ន្ធខ្សែកាបអុបទិកក្រោមបាតសមុទ្រតែមួយខ្សែតែប៉ុណ្ណោះ។ កម្ពុជាត្រូវការក្រុមហ៊ុនវិនិយោគច្រើនថែមទៀតលើវិស័យបច្ចេកវិទ្យា៕
