ដោយស៊ីវ ម៉េង
ភ្នំពេញ៖ ក្រុមហ៊ុនក្នុងស្រុកមួយបានប្រកាសវិនិយោគទឹកប្រាក់៧០លានដុល្លារ ដើម្បីសាងសង់ទីក្រុងពាណិជ្ជកម្មមួយឈ្មោះក្រុងរស្មីមង្គល នៅក្នុងក្រុងព្រះសីហនុ ជាទីក្រុងដែលមានការរីកចម្រើនយ៉ាងឆាប់រហ័ស និងស្ទើរមិនគួរឲ្យជឿ។
លោក ឫទ្ធី រស្មី អគ្គនាយកក្រុមហ៊ុន K99 Group បានមានប្រសាសន៍ឲ្យដឹងនៅក្នុងពិធីក្រុងពាលី និងបញ្ចុះបឋមសិលាបើកការដ្ឋានសាងសង់ទីក្រុងរស្មីមង្គល កាលពីចុងសប្តាហ៍មុនថា គម្រោងសាងសង់ដែលមានឈ្មោះថា ទីក្រុងរស្មីមង្គលនេះ នៅលើផ្ទៃដីប្រមាណ១០ហិកាត មានអាគារចំនួន៣៦ រួមមានសណ្ឋាគារ អាគារពាណិជ្ជកម្ម អាគារស្នាក់នៅ ជាដើម។ល។ ក្រុមហ៊ុនគ្រោងចំណាយទុនប្រមាណ៧០លានដុល្លារអាមេរិក។
លោកបន្តថា ក្រោមការដឹកនាំដ៏ឆ្លៀសវៃរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ធ្វើឲ្យប្រទេសមានសុខសន្ដិភាព និងមានការអភិវឌ្ឍ។ ក្រោមដំបូលសន្ដិភាព និងការដឹកនាំ មានគោលនយោបាយច្បាស់លាស់ (ស្ថេរភាពនយោបាយ) បានផ្ដល់ឱកាសឲ្យអ្នកវិនិយោគជាតិ និងអន្ដរជាតិ សម្រុកចូលមករកស៊ីនៅប្រទេសកម្ពុជា ជាពិសេសខេត្ដព្រះសីហនុ គម្រោងវិនិយោគតូច ធំ បានបន្ដលេចធ្លោព្រោងងព្រាត បានធ្វើឲ្យខេត្ដព្រះសីហនុប្រែក្លាយមុខមាត់រីកលូតលាស់ខ្លាំង ជាពិសេសសេដ្ឋកិច្ចរបស់ខេត្ដ។
ប្រធានសភាពាណិជ្ជកម្មខេត្ដព្រះសីហនុ លោកឧកញ៉ាឡាវ កាងបានលើកឡើងស្រដៀងគ្នាថា កត្ដាសន្ដិភាព ស្ថេរភាពនយោបាយ និងច្បាប់វិនិយោគដ៏ល្អប្រសើរ បានធ្វើឲ្យអ្នកវិនិយោគមានជំនឿមកលើរាជរដ្ឋាភិបាលកម្ពុជា ក្នុងការដាក់ទុនវិនិយោគ។ លោកបន្តថា គម្រោងទីក្រុងនេះ និងជួយផ្ដល់ឱកាសការងារជូនប្រជាពលរដ្ឋជាច្រើនកន្លែង មិនបាច់ធ្វើចំណាកស្រុកទាំងប្រថុយប្រថានគ្រោះថ្នាក់ទៅក្រៅប្រទេសឡើយ និងបានចូលរួមកសាងហេដ្ឋារចនាសម្ព័នខេត្ដព្រះសីហនុ ក៍ដូចជាបានលើកកម្ពស់សេដ្ឋកិច្ចខេត្ដព្រះព្រះសីហនុ និងប្រទេសជាតិឲ្យកាន់តែល្អប្រសើរឡើង។
រយៈកាល២ឆ្នាំចុងក្រោយនេះ ខេត្តព្រះសីហនុ បានក្លាយទៅជាគោលដៅយ៉ាងសំខាន់របស់អ្នកវិនិយោគមកពីតំបន់ផ្សេងៗ ហើយសព្វថ្ងៃនេះបាននឹងកំពុងធ្វើឲ្យខេត្តព្រះសីហនុ មានការអភិវឌ្ឍយ៉ាងលឿនទៅមុខ។ ខេត្ដព្រះសីហនុ ពិតជាកន្លែងសាកសមក្នុងការដាក់ទុនវិនិយោគល្អប្រពៃ។ ម្យ៉ាងវិញទៀអ្វីដែលសំខាន់បំផុតនោះ គឺប្រទេសកម្ពុជាមានសុខសន្ដិភាពពេញលេញ ក្នុងនោះខេត្ដព្រះសីហនុ ក៏ធានាបាននូវសន្ដិសុខ សុវត្ថិភាពខ្ពស់ដែរ ជាមួយនិងធនធានធម្មជាតិសម្បូរបែប ផ្ទៃដីនៅទំនេរធំទូលាយ រួមទាំងកោះល្អ៣២ ជាពិសេសនោះ គឹប្រព័ន្ធគមនាគមន៍សម្បូរបែប ផ្លូវដែក ទឹក គោគ ផ្លូវអាកាសជាដើម ។ល។
ខេត្ដព្រះសីហនុ ត្រូវបានរាជរដ្ឋាភិបាលកម្ពុជា ចាត់ទុកជាប៉ូលសេដ្ឋកិច្ចមួយ ក្នុងចំណោមប៉ូលសេដ្ឋកិច្ចទាំងបី រាជធានីភ្នំពេញ ខេត្ដសៀមរាប និងខេត្ដព្រះសីហនុ ដោយប្រកាសប្រែក្លាយខេត្ដនេះទៅជា តំបន់សេដ្ឋកិច្ចពិសេសគំរូពហុបំណង តែមួយគត់ក្នុងប្រទេសកម្ពុជា។
ការរីកចម្រើននៃក្រុងព្រះសីហនុបានធ្វើឲ្យប្រជាពលរដ្ឋ និងធុរជនជាច្រើនមានការភ្ញាក់ផ្អើល និងមិនគួរឲ្យជឿ។
អគ្គនាយិកាក្រុមហ៊ុន Amatak Property Service, Co, Ltd លោកស្រីតាំង ហួរ ដែលបានទៅកំសាន្ត និងស្វែងរកឳកាសវិនិយោគនៅខេត្តនេះបានមានប្រសាសន៍ថា ខេត្តព្រះសីហនុពិតជារីកចម្រើនលឿនមែនទែន លឿនពេក និងស្ទើរមិនគួរឲ្យជឿ ដោយសារបច្ចុប្បន្នក្រុងនេះពោរពេញដោយអាគារខ្ពស់ៗកប់ពពក ហើយសកម្មភាពសាងសង់របស់ក្រុមហ៊ុនចិន បានធ្វើឡើងទាំងយប់ទាំងថ្ងៃ ដែលធ្វើឲ្យវត្តមានអាគារកប់ពពកជាច្រើនលូតលាស់ឡើងយ៉ាងលឿន ស្ទើរមិនគួរឲ្យជឿពីមួយថ្ងៃទៅមួយថ្ងៃ។
លោកស្រីបន្តថា “រយៈពេល៣ទៅ៥ឆ្នាំខាងមុខ ទីក្រុងព្រះសីហនុនឹងក្លាយជាទីក្រុងដ៏ស៊ីវិល័យមួយ ហើយបើលោកអ្នកខានទៅលេងយូរ ពេលទៅដល់នឹងភ្ញាក់ផ្អើលជាមិនខាន។
លោកស្រីបន្តថា “យើងរីករាយ និងស្វាគមន៍ការវិនិយោគបែបនេះ ហើយចិនបានធ្វើឲ្យប្រទេសយើងផ្លាស់ប្តូរមុខមាត់មិនគួរឲ្យជឿ”៕
