ដោយ៖ គង់ សូរិយា

ភ្នំពេញ៖ មាន​សម្បុរ​ស្រអែម ញញឹម​ស្រស់​ស័ក្តិ​សមជា​នារី​ខ្មែរ អ្នកនាង​អាន សុធី​តា​បាន​ឆ្លងកាត់​ចេញពី​គ្រួសារ​ក្រីក្រ​មួយ និង​ធ្លាប់​តស៊ូ​ធ្វើការ​ផង​រៀន​ផង​បាន​ក្លាយជា​ថ្នាក់ដឹកនាំ​ក្រុមហ៊ុន​លំដាប់​អន្តរជាតិ ដ៏​ជោគជ័យ​ម្នាក់។

កុមារភាព​ក្នុង​ភាពក្រីក្រ

ចាប់កំណើត​ក្នុងភូមិ​ឬ​ស្សី​ស្រស់ សង្កាត់​និរោធ ខ័​ណ្ឌ​មានជ័យ (បច្ចុប្បន្ន​ខ័​ណ្ឌ​ច្បារអំពៅ) ឆាកជីវិត​ក្មេងស្រី​ម្នាក់នេះ មាន​ភាពបត់បែន​ជាច្រើន ទម្រាំ​បានមក​កាន់​មុខដំណែង​ជា​នាយិកា​ប្រចាំ​ប្រទេស ក្នុង​ក្រុមហ៊ុន​អចលនទ្រព្យ​លំដាប់​អន្តរជាតិ CBRE កម្ពុជា។

ផ្តើម​ពី​ថ្នាល​បណ្តុះបណ្តាល​នៅ​គ្រឹះស្ថានសិក្សា​សាធារណៈ គឺ​សាលាបឋមសិក្សា​ឬ​ស្សី​ស្រស់ មុន​បន្ត​កម្រិត​មធ្យម​សិក្សា​បឋមភូមិ និង​ទុតិយភូមិ​នៅ​វិទ្យាល័យ​ច្បារអំពៅ ក្មេងស្រី​ដ៏​ស្រស់​សោភា​នេះ ត្រូវ​រែកពន់​ការងារ​ច្រើន ដោយ​បង្ខំចិត្ត​ទៅធ្វើ​ការ​នៅ​រោងចក្រ ក្នុងនាម​ជា​ស្មៀន​ការិយាល័យ ដើម្បី​យកប្រាក់​មក​បន្ត​ការសិក្សា​មហាវិទ្យាល័យ​នៅពេល​យប់ នា​សាកលវិទ្យាល័យ​ជាតិ​គ្រប់គ្រង ដែល​ពេលនោះ​មានឈ្មោះ​ជា​វិទ្យាស្ថាន​ជាតិ​គ្រប់គ្រង។

ភាពជូរចត់

គ្មាន​អ្នកណា​មិន​ជួប​បញ្ហា​ក្នុង​ឆាកជីវិត​ទេ មនុស្ស​តែង​ស្គាល់​បរាជ័យ និង ជោគជ័យ។ អ្នកនាង​អាន សុធី​តា​ក៏​ដូចគ្នា ព្រោះ​ពេល​ប្រលង​បាក់​ឌុប​ជាប់ អ្នកនាង​ប្រលង​ចូលរៀន នៅ​មហាវិទ្យាល័យ​ណា​ក៏​មិន​ជាប់​ដែរ។

កើត​ក្នុង​គ្រួសារ ដែលមាន​ឪពុក​ជា​មន្ត្រីរាជការ និង​ម្តាយ​ជា​មេផ្ទះ ហើយ​ឪពុកម្តាយ​ត្រូវ​ផ្គត់ផ្គង់​បងប្រុស​ពីរ​នាក់​ទៀត​ដែល​កំពុង​សិក្សា ជីវភាព​គ្រួសារ​របស់​នាយិកា​រូបនេះ​មិន​ធូរធារ​នោះទេ។

ក្នុងកាលៈទេសៈបែបនេះហើយ ទើបកញ្ញាធីតាបានសម្រេចចិត្តក្រោកឈរដោយខ្លួនឯង ដោយបានធ្វើការដំបូងនៅរោងចក្រតាំងពីអាយុ១៧ឆ្នាំ ប៉ុន្តែក្រោយមកអ្នកនាងបានផ្លាស់ប្តូរមកធ្វើការនៅក្រុមហ៊ុនផែស្ងួត ជាកន្លែងការងារដែលបានផ្តល់បទពិសោធន៍ច្រើនដល់នាង។

ចាប់ផ្តើមការងារអចលនទ្រព្យ

រៀនជំនាញផ្នែក Accounting ប៉ុន្តែបែរជាក្លាយជាអ្នកដឹកនាំក្រុមហ៊ុនអចលនទ្រព្យអន្តរជាតិ មិនមែនជារឿងងាយស្រួល និងខ្វះការប្រឹងប្រែងឡើយ។

អ្នកនាងអាន សុធីតាបាននិយាយដោយស្នាមញញឹម ប៉ុន្តែបង្កប់ភាពម៉ឺងមាត់ថា នៅឆ្នាំ២០១០ អ្នកនាងបានឃើញសេចក្តីប្រកាសរើសបុគ្គលិក ផ្នែកគណនេយ្យ អ្នកនាងមានការចាប់អារម្មណ៍ បន្ទាប់ពីបានមើលពីសាវតាក្រុមហ៊ុន CBRE Cambodia ដែលជាក្រុមហ៊ុនអចលនទ្រព្យធំបំផុត និង មានបណ្តាញទូទាំងពិភពលោក។

ទីបំផុតអ្នកនាងបានជាប់ និងចូលធ្វើការនៅក្រុមហ៊ុនអចលនទ្រព្យ CBRE Cambodia ជាគណនេយ្យករ។

ក្នុងពេលបំពេញការងារ អ្នកនាងមិនដែលប្រកាន់ការងារនោះឡើយ គឺធ្វើការលើសជំនាញអ្វីដែលខ្លួនមាន នៅទីបំផុតអ្នកនាងត្រូវបាននាយកប្រចាំប្រទេស ជនជាតិអង់គ្លេស សម្រេចចិត្តឲ្យធ្វើការងារលើជំនាញទិញ លក់អចលនទ្រព្យ ដែលធ្វើឲ្យអ្នកនាងកាន់តែមានជំនាញច្រើនថែមទៀត។

វិធីសាស្រ្តឆ្ពោះទៅមុខ

ការទទួលតំណែងធំប្រចាំក្រុមហ៊ុនមួយ មិនមែនជាការងាយឡើយ តើអ្នកនាងធីតាមានវិធីសាស្រ្តយ៉ាងដូចម្តេច ទើបអាចឡើងកាន់តំណែងមួយខ្ពស់ដែលមនុស្សជាច្រើនចង់បានផងដែរ?។

អ្នកនាងសុធីតាបានបកស្រាយថា “ខ្ញុំតែងតែចាត់ទុកក្រុមហ៊ុនខ្ញុំធ្វើការ ជាក្រុមហ៊ុនរបស់ខ្លួន និង ទទួលខុសត្រូវនូវអ្វីដែលជាកាតព្វកិច្ចដែលត្រូវបំពេញ”។

អ្នកនាងបន្ថែមថា “ជាមួយគ្នានេះ យើងត្រូវមានភាពស្មោះត្រង់ គោរពក្រមសីលធ៌មវិជ្ជាជីវៈ និងធ្វើការងារដោយទឹកចិត្តចេញពីបេះដូង”។

ជាមួយនឹងការងារកាន់តែមមាញឹក តំណែងក៏កាន់តែខ្ពស់ការទទួលខុសត្រូវកាន់តែច្រើន ហេតុនេះហើយទើបអ្នកនាងអាន សុធីតាមិនដែលបោះបង់ការសិក្សាឡើយ គឺនៅតែបន្តការសិក្សានៅវិទ្យាស្ថាន Cam-Ad ជំនាញ ACCA។ លើសពីនេះ យើងក៏ត្រូវរៀបចំពីការងារគ្រួសារ ឲ្យមានភាពរលូនជាមួយគ្នាផងដែរ។

បែងចែកការងារនិងគ្រួសារ

ក្នុងតរុណវ័យ អ្នកនាងធីតា បានរៀបការនៅឆ្នាំ២០០៣ ជាមួយលោករ័ត្ន ប៊ុនរិទ្ឋ ដែលជាជាងជួសជុលយន្តហោះនៃក្រុមហ៊ុន Thai Airway និងមានបុត្រជាចំណងដៃពីរនាក់នាពេលបច្ចុប្បន្ននេះ។

តើអ្នកនាងបែងចែកការងារ និងកាតព្វកិច្ចគ្រួសារយ៉ាងដូចម្តេច? អ្នកនាងអាន សុធីតាបានលើកឡើងថា “ខ្ញុំតែងតែបង្រៀនកូនឲ្យចេះទទួលខុសត្រូវលើខ្លួនឯង ចេះជួយការងាផ្ទះ មានភាពស្មោះត្រង់ និងមានភាពតសូ។ ភាពជោគជ័យរបស់កូន មិនមែនសំរាប់ខ្លួនម្នាក់នោះទេ វាជាភាពជោគជ័យ សំរាប់គ្រួសារ និងសំរាប់ប្រទេសជាតិ”។

ការដឹកនាំក្រុមហ៊ុន

ដោយសារមានសមត្ថភាព និងទទួលបានការលើកទឹកចិត្តផង អ្នកនាងសុធីតាបានក្លាយជានាយិកាប្រចាំប្រទេសនៃក្រុមហ៊ុន CBRE Cambodia នៅឆ្នាំ២០១៣ ដែលជំនាញនេះ តម្រូវឲ្យអ្នកនាងចេះការងារច្រើន មិនត្រឹមតែភាពជាអ្នកដឹកនាំឡើយ។

ក្នុងនាមជានាយិកាប្រចាំប្រទេស អ្នកនាងត្រូវមានជំនាញគណនេយ្យ ដើម្បីគ្រប់គ្រងចំណូលចំណាយច្បាស់លាស់ និងត្រឹមត្រូវ ហើយត្រូវមានជំនាញលក់ ដើម្បីធ្វើឲ្យប្រាកដថា ការលក់របស់យើងសម្រេចតាមផែនការ និងជំនាញគ្រប់គ្រងមនុស្ស ដែលអ្នកនាងមានអារម្មណ៍ថា ពិបាកជាងគេ។

អ្នកនាងធីតាបានបន្តថា “ការគ្រប់គ្រងមនុស្ស ខ្ញុំមានអារម្មណ៍ពិបាកជាងគេ ដោយសារក្រុមហ៊ុនមានបុគ្គលិកច្រើននាក់ និងមាន៦ជនជាតិ ដែលត្រូវធ្វើការជាមួយ”។អ្នកនាងបន្តថា “ក្នុងតួនាទីជាស្រ្តីខ្មែរម្នាក់ ហើយមានតួនាទីដឹកនាំមនុស្សជាង៤០នាក់ គឺធម្មតាមានអត្តចរិក៤០ប្រភេទ ហេតុនេះយើងត្រូវប្រាកដថា ពួកគេអាចធ្វើការងារជាក្រុមនិងសម្រេចគោលដៅបាន”។

ជាមួយនឹងបុគ្គលិកមាន៦សញ្ជាតិក្នុងក្រុមការងារ ការធ្វើការជាមួយគ្នាតែងមានបែបផែនខុសៗគ្នា ហេតុនេះយើងត្រូវប្រាកដថា ពួកគេសម្រេចបាននូវការងាររបស់ពួកគេនិមួយៗតាមផែនការ ហើយដើម្បីសម្រេចបានគោលដៅការងារ អ្នកនាងបានលើកឡើងថា “ខ្ញុំប្រើប្រាស់ការលើកទឹកចិត្តច្រើន ជាជាងការរុញឬចាប់បង្ខំ ព្រោះខ្ញុំត្រូវប្រើវិធីសាស្រ្តទន់ភ្លន់ ជាជាងវិធីសាស្រ្តក្តៅ ប៉ុន្តែក៏មានការតាមដានការងារយ៉ាងហ្មត់ចត់ផងដែរ នៅពេលជិតដល់ពេលកំណត់ យើងតែងតែរំលឹកពួកគេពីអ្វីដែលពួកគេមិនទាន់សម្រេចបាន”។

ផ្តល់ការងារនិងបណ្តុះបណ្តាល

ដើម្បីឲ្យស្ថាប័នមួយសម្រេចជោគជ័យ និងរីកចម្រើន ការលើកទឹកចិត្តមានសារៈសំខាន់បំផុត ដើម្បីអោយការងារដំណើរការល្អ និងទទួលបានជោគជ័យព្រមគ្នា។

វិធីសាស្រ្តរបស់នាយិការូបនេះ គឺ “យើងរួមចំណែកជោគជ័យ និងលំបាកជាមួយបុគ្គលិក ហើយយើងត្រូវផ្តល់ការងារល្អ និងចំណូលពីការងារសមរម្យសម្រាប់បុគ្គលិក”។អ្នកនាងបន្តថា “លើសពីនេះយើងត្រូវផ្តល់បរិយាកាសការងារល្អ និងពង្រឹងសមត្ថភាពរបស់បុគ្គលិក ដោយផ្តល់ការហ្វឹកហ្វឺនទាំងក្នុងនិងក្រៅប្រទេស”។

អ្នកនាងបន្តថា “ក្នុងនាមជាអ្នកដឹកនាំក្រុមហ៊ុន យើងត្រូវមានជំនាញចម្រុះដើម្បីដឹកនាំ និងធ្វើការសម្រេចចិត្តលើផ្នែកអ្វីមួយ”៕

ដោយ៖ គង់ សូរិយា

ភ្នំពេញ៖ តើ​អ្នក​បាន​ត្រៀមខ្លួន​សម្រាប់​ការផ្លាស់ប្តូរ​បែបបទ នៃ​ការរស់នៅ​របស់ខ្លួន​ហើយ​ឬ​នៅ​សម្រាប់​រយៈពេល១០ឆ្នាំ​ខាងមុខ? នៅពេល​ការកកស្ទះ​ចរាចរណ៍​ក្នុង​ទីក្រុង​កាន់តែ​អាក្រក់ និង​កំនើន​ប្រជាសាស្ត្រ​នៅក្នុង​ទីក្រុង កាន់តែច្រើន?។

អគ្គនាយក​ក្រុមហ៊ុន​ស្លឹក​រិ​ទ្ធ​រៀល​ធី លោក ឃាង ពុ​ទ្ឋី បាន​និយាយ​ឲ្យ​ដឹង​កាលពីពេលថ្មីៗនេះ​ថា មិនយូរ​ទេ​និន្នាការ​រស់នៅ​តាម​ខុន​ដូ របស់​ប្រជាពលរដ្ឋ​ខ្មែរ​នឹង​កើនឡើង។ អ្នក​ដែល​រស់នៅ​ខុន​ដូ ភាគច្រើន​ជា​អ្នក​ដែល​ធ្លាប់បាន​ទៅ​រស់នៅ ឬ​សិក្សា​នៅក្រៅ​ប្រទេស។ ការរស់នៅ​ខុន​ដូ គឺមាន​ភាព​ឯករាជ្យ និង​មាន​សុវត្ថិភាព​ខ្ពស់។ លោក​បាន​បន្តថា បច្ចុប្បន្ននេះ​មាន​ប្រជាពលរដ្ឋ​ខ្មែរ ដែលមាន​ប្រាក់ចំណូល​ពី​មធ្យម​ទៅ​ខ្ពស់​កាន់តែច្រើន បាន​ងាក​មក​ចាប់អារម្មណ៍​ចំពោះ​ការ​ស្នាក់នៅ​ខុន​ដូ​វិញ ពីព្រោះ​ខុន​ដូ​មាន​ទីតាំងនៅ​កណ្តាល​ក្រុង ស្របពេល​ការកកស្ទះ​ចរាចរណ៍ និង​ការកើនឡើង​នៃ​តម្លៃ​ដី ក៏បាន​ចូលរួមចំណែក​ធ្វើឱ្យ​ការគិត​របស់​ប្រជាពលរដ្ឋ​ប្រែប្រួល​ផងដែរ។

លោក​បាន​លើកទឹកចិត្ត​ឱ្យ​ប្រជាពលរដ្ឋ​ខ្មែរ ត្រូវតែ​មានគំនិត​សុទិដ្ឋិនិយម​ចំពោះ​ភាព​រីកចម្រើន​នៃ​វិស័យ​ខុន​ដូ និង​ត្រូវ​នាំគ្នា​គាំទ្រ ព្រោះ​បើ​យើង​មានគំនិត​អវិជ្ជមាន​ប្រាកដ​ណាស់​ថា វា​នឹង​ធ្វើឱ្យប៉ះពាល់​ដល់​ដំណើរការ​នៃ​ការអភិវឌ្ឍ​ប្រទេស​ជាមិនខាន ខណៈ​ប្រទេសជិតខាង​កម្ពុជា គេ​បានធ្វើ​ដំណើរ​លឿន​ជាង​ប្រទេស​យើង​ឆ្ងាយ​ណាស់​ទៅហើយ ចំពោះ​ផ្នត់គំនិត​នៃ​ការរស់នៅ​ខុន​ដូ ដូច្នេះ​យើង​មិនត្រូវ​គិតថា ការសាងសង់​នេះ​វា​លើស​តម្រូវការ​ទេ ព្រោះ​បើ​លើស​មែន​រាជរដ្ឋាភិបាល​នឹងមាន​វិធានការណ៍​ដោះស្រាយ​ជាមិនខាន។

នាយក​ក្រុមហ៊ុន Spring CJW Development លោក Anthony Ong ដែល​កំពុង​វិនិយោគ​លើ​គម្រោង​ខុន​ដូ Axis Residences ដែលមាន​ចំនួន៥៦៦យូ​នី​ត ស្ថិតនៅតាម​បណ្តោយ​ផ្លូវ2004 ជិត​ព្រលានយន្តហោះ​អន្តរជាតិ​ភ្នំពេញ បានលើកឡើង​កាលពីពេលថ្មីៗនេះ​ថា“ប្រជាពលរដ្ឋ​ខ្មែរ នៅតែ​ជាស​សរ​គ្រឹះ​ដ៏​រឹងមាំ​នៃ​កំណើនសេដ្ឋកិច្ច និង​អចលនវត្ថុ​ក្នុងប្រទេស​កម្ពុជា។ លោក​បន្តថា “យើង​ពិតជា​មានការ​ជឿជាក់ និង​ចង់ឱ្យ​ប្រជា​ពល​ដ្ឋ​ខ្មែរ ទទួលបាន​កន្លែង​រស់​នៅ​ដ៏​ស្អាត​កម្រិតស្តង់ដា។

លោក Anthony បញ្ជាក់ថា “យើង​ពិតជា​ចង់​ចូលរួម​ជួយ​លើកកម្ពស់​ការរស់នៅរ​បស់​ប្រជាពលរដ្ឋ​ខ្មែរ តាម​រយៈកាល​ផ្តល់ជូន​នូវ​កន្លែង​រស់នៅ​មួយ​ដ៏​ល្អ​ដូច​នៅ​ប្រទេស​សឹង្ហ​បុរី។ លោក​បន្តថា“គោលបំណង​ដែល​យើង​ធ្វើការ​វិនិយោគ​ខុន​ដូ Axis Residences គឺ​មិន​គ្រាន់តែ​ដើម្បី​បង្កើតជា​ផ្ទះ​ស្នាក់នៅ​រួម​នោះទេ តែ​ការពិត​វា​ជា​លំនៅឋាន​ដែល​គួរឱ្យ​ចង់​រស់នៅ និង​មានអ្វីៗគ្រប់យ៉ាង​ជា​តម្រូវការ​របស់​អ្នកស្នាក់នៅ។

យោងតាម​ការសិក្សា​រប​ស់​ក្រុមហ៊ុន Urban Living Solutions បាន​រកឃើញថា ប្រជាជន​រស់នៅ​ទីក្រុង​ភ្នំពេញ នឹង​កើនឡើង​ប្រមាណ៤លាន​នាក់​នៅ​ឆ្នាំ​រហូតដល់​ឆ្នាំ២០៣៥ខាងមុខនេះ ជា​ពេលវេលា​ដែល​ការកកស្ទះ​ចរាចរ ណ៍​នឹង​កើនឡើង តម្លៃ​អចលនទ្រព្យ​ក្នុង​តំបន់​កណ្តាល​ក្រុង​ឡើងថ្លៃ​ខ្លាំង និង​បច្ចេកវិទ្យា​កាន់តែ​សម្រួល​ដល់​បែបបទ នៃ​ការរស់នៅ​កាន់តែ​ងាយស្រួល និង​មាន​ភាព​ស៊ី​វិ​ល័យ។

លោក​ឧកញ៉ា ចេង ខេង អគ្គនាយក​ក្រុមហ៊ុន​អចលនទ្រព្យ​កម្ពុជា ស៊ី​ភី​អិ​ល​ បាន​និយាយថា ការរស់នៅ​ខុន​ដូ គឺជា​បែបបទ​នៃ​ការរស់នៅ​មួយ​ដែលមាន​ភាព​ស៊ី​វិ​ល័យ និង​ទាន់សម័យ ដោយសារ​ខុន​ដូ​អាចមានអ្វីៗសព្វបែបយ៉ាង​ដូចជា ចំណតរថយន្ត​សមរម្យ ផ្សារ​ទំនើប កន្លែង​ហាត់ប្រាណ ស្ទី​ម សូ​ណា អាង​ហែល​ទឹក និង​សួនច្បារ​ជាដើម។

លោក​ឧកញ៉ា​បាន​បញ្ជាក់ថា “ខ្មែរ​យើង​ចេះតែ​គិតថា ការរស់នៅ​ខុន​ដូ​គឺ​ជើង​មិន​ជាប់​ដី (សំណង់​ដែលមាន​កម្ពស់​ច្រើន​ជាន់) ប៉ុន្តែ​បច្ចុប្បន្ន​នៅតាម​ប្រទេស​រីកចម្រើន​នានា​គេ​បានធ្វើ​រួចហើយ ព្រោះ​ការរស់នៅ​ក្នុង​ខុន​ដូ គឺ​បាន​ផ្តល់ឱ្យ​យើង​រស់នៅ​មួយ​ដែលមាន​ភាព​សុ​ខុ​ដុមរ​មនា ទំនើប និង​ទាន់សម័យ។

លោក សារុន ឫទ្ធា អ្នកនាំពាក្យ​ក្រសួង​រៀបចំ​ដែនដី នគរូបនីយកម្ម និង​សំណង់​ បាន​ទទួលស្គាល់ថា ប្រជាពលរដ្ឋ​ខ្មែរ​ពិតជា​មានការ​លំបាក ក្នុង​ការរក​ទិញ​ដី ដើម្បី​សាងសង់​ផ្ទះ​នៅ​កណ្តាល​ក្រុង​ណាស់ ព្រោះ​ដី​នៅ​តំបន់សំខាន់ៗដូចជា បឹង​កេងកង ដូនពេញ ឬ​ទួលគោក តម្លៃ​របស់​វា​បាន​ឡើងថ្លៃ​ខ្ពស់​ខ្លាំងណាស់។ ការកើនឡើង​នៃ​តម្លៃ​នេះ គឺ​ដោយសារតែ​ដី​នៅ​ក​ណ្ត​ល​ក្រុង កំពុង​ក្លាយជា​ដី​សម្រាប់​វិនិយោគិន ទិញ​យកទៅ​សាងសង់​អគារខ្ពស់ៗ អគារ​ពាណិជ្ជកម្ម​និង​ខុន​ដូ​ជាដើម។

យោងតាម​ផែនការមេ​របស់​ក្រសួង​រៀបចំ​ដែនដី នគរូបនីយកម្ម និង​សំណង់ ក៏ដូចជា​សាលា​រាជធានី​ភ្នំពេញ ក្នុងការ​ពង្រីក​ផ្ទៃដី​ចំនួន២០គីឡូម៉ែត្រ​ការ៉េ​ជុំវិញ​រាជធានី​ភ្នំពេញ​នោះ បានធ្វើឱ្យ​និន្នាការ​តម្លៃ​ដីធ្លី​នៅ​ជាយក្រុង​ក៏​កើនឡើង​ច្រើន​ផងដែរ ប៉ុន្តែ​វា​មិន​ឡើងថ្លៃ​ខ្ពស់​ដូច​នៅ​កណ្តាល​ទីក្រុង​ទេ ដែល​អាច​អនុញ្ញាតឱ្យ​អ្នកមាន​ប្រាក់ចំណូល​មធ្យម ឬ​លើសពី​មធ្យម​អាច​ទិញ​បាន។

លោក សារុន ឬ​ទ្ឋា បាន​បញ្ជាក់ថា “នៅ​រាជធានី​ភ្នំពេញ សម្រាប់​អ្នក​ដែលមាន​ផ្ទះ​ចាប់ពី១ដល់១០ គឺមាន​ប្រហែល១០ភាគរយ ចំណែក​អ្នក​មានផ្ទះ​នៅ​ដោយ​ខ្លួនឯង​មាន​ប្រហែល២០ភាគរយ និង​អ្នក​មិនមាន​ផ្ទះ​តែមាន​ប្រាក់ខែ និង​ចំណូល​មធ្យម​ថេរ ឬ​លើស​មធ្យម​អាចមាន​ចំនួន៧០ភាគរយ (ពួកគេ​ពុំទាន់​មានផ្ទះ​នៅឡើយ​ទេ​ដោយ​អ្នកខ្លះ​មានផ្ទះ​នៅ ប៉ុន្តែ​ជួនកាល​អាច​បង់​រំ​លោះ​ជាមួយ​ធនាគារ)។

របាយការណ៍​របស់​ក្រសួង​សេដ្ឋកិច្ច និង​ហិរញ្ញវត្ថុ​បាន​បង្ហាញថា កំនើន​អគារ​ខុន​ដូ​នៅ​កម្ពុជា​ក្នុង​ឆ្នាំ២០១៥ កន្លងមក​មាន​ចំនួន១៥,០០០យូ​នី​ត ហើយ​ចំនួន​នេះ​នឹង​បន្ត​កើន​ឡើងដល់៤៥,០០០យូ​នី​ត នៅក្នុង​ឆ្នាំ២០១៨ខាងមុខ៕

ដោយ៖ បុរស វុត្ថា

ភ្នំពេញ៖ តើ​លោកអ្នក​កំពុង​ចង់ដឹង​ពី​សណ្ឋាគារ​លំដាប់​ផ្កាយ៧ ដែល​ល្អ​បំផុត​សម្រាប់​ស្នាក់​នៅក្នុង​ទីក្រុង​ឌុយ​បៃ​មែន​ទេ ? គេហទំព័​ត៌ Propertyarea.asia នឹង​ណែនាំ​លោក អ្នក​អោយ​ស្គាល់​ពី​សណ្ឋាគារ Burj Al Arab ដ៏​អស្ចារ្យ​មួយ​នេះ។

សណ្ឋាគារ Burj Al Arab លំដាប់ ផ្កាយ ៧ គឺជា​សណ្ឋាគារ​ដែល​ល្អ​ស្អាត​ជាងគេ​នៅលើ​ពិភពលោក ។ Burj Al Arab  គឺជា​ភាសា​អារ៉ាប់​ដែលមាន​ន័យ​ជា​ភាសា​ខ្មែរ ប៉ម នៃ អារ៉ាប់ មាន​កន្លែង​ស្នាក់នៅ​ផ្កាយ៧លំដាប់​ពិភពលោក​ក្នុងប្រទេស​អារ៉ាប់​រួម​នាទី​ក្រុង​ឌុ​បៃ។ សណ្ឋាគារ​មួយ​នេះ ត្រូវបាន​សារព័ត៌មាន Daily Telegraph ប្រគល់​ពានរង្វាន់​ជា Ultimate Luxury Luxury Travel Awards ប្រចាំឆ្នាំ​ដែលមាន​ឈ្មោះថា Best Hotel in the World’ ដែល​សណ្ឋាគារ​នេះ​ទទួល​បានជា​លើក​ទី​បី​ហើយ។ ពានរង្វាន់​នេះ​ផងដែរ ត្រូវបាន​គេ​ប្រគល់​សម្រាប់​ឆ្នាំ​ទី៩ក្នុង​លំដាប់ “សណ្ឋាគារ​ល្អ​បំផុត​នៅ​ម​ជ្ឈឹ​ម​បូព៌ា” ។

តើ​សណ្ឋាគារ Burj al Arab ទទួលបាន​ការយកចិត្ត​ទុកដាក់​ថា​ជា​សណ្ឋាគារ ផ្កាយ ៧ យ៉ាងដូចម្តេច?

អគារ Burj Al Arab ត្រូវបាន​គេ​ហៅថា​អគារ​អច្ឆរិយៈ ដ៏​ល្បីល្បាញ​មួយ​នៅលើ​ពិភពលោក។ ស្ថាបត្យកម្ម​ដ៏​ធំ​មួយ​នេះ​ត្រូវបាន​សាងសង់​ពឹង​ផ្អែកលើ​កោះ​សិប្បនិម្មិត នៅក្នុង​សមុទ្រ​ដែល​ភ្ជាប់​ទៅនឹង​ច្រាំងទន្លេ ដោយមាន​ស្ពាន​ភ្ជាប់​ទៅកាន់​សណ្ឋាគារ​នេះ ដែល​មើលទៅ​ពោរពេញ​ដោយ​អច្ចឆរិយៈ​ភាព។ វិស្វកម្ម​នៃ​សំណង់​ដ៏​គួរឱ្យ​ចាប់អារម្មណ៍​នេះ​ត្រូវបាន​សាងសង់ឡើង​ជាមួយនឹង​បច្ចេកវិទ្យា​ទំនើប​បំផុត។ អគារ​នេះ​ប្រើប្រាស់​បេតុង​ជាង៧០,០០០ម៉ែត្រ និង​ប្រើប្រាស់​ដែក​ប្រមាណ​ជាង៩០០០តោន។

ទំហំ​នៃ​ការចំណាយ​សាងសង់​សណ្ឋាគារ​កម្រិត​ផ្កាយ៧នេះ​ដ៏​អស្ចារ្យ​នេះ អស់​ទឹកប្រាក់១០០០លាន​ដុល្លារ​អាមេរិក និង​តម្លៃ​ស្នាក់នៅ២៤,០០០ដុល្លារ​ក្នុង​មួយ​យប់ ដែល​ជាប់​តម្លៃ​ខ្ពស់បំផុត​ទី១២ ក្នុងចំណោម​សណ្ឋាគារល្បីៗបំផុត​នៅលើ​ពិភពលោក។

Burj Al Arab មាន​កំពស់​សរុប៥៦ជាន់ មាន​បន្ទប់​ចំនួន២០២បន្ទប់ មាន​កំពស់​សរុប៣២១ម៉ែត្រ និង​ជាប់​ជា​សណ្ឋាគារ​ខ្ពង់​ជាងគេ​លំដាប់​ទី៣លើ​ពិភពលោក។

រូបរាង​នៃ​អាគារ​នេះ ត្រូវ​រចនា​ឡើង​ប្រៀបបាន​ទៅនឹង​រូបរាង​កា​ប៉ាល់​ដែល​ចត​នៅ​មាត់សមុទ្រ ជាពិសេស​វា​ត្រូវបាន​សាងសង់​ឡើងជា​និម្មិត​រូប​នៃ​ដែនដី​អារ៉ាប់ (នាវាចម្បាំង​អារ៉ាប់)។ ស្លាប​ពីរ​សងខាង​មាន​រូបរាង​ជា​អក្សរ​V ប្រៀប​បានជា”ដុំថ្ម” ដ៏​អស្ចារ្យ​នៅ​ចន្លោះ​នៃ​អាគារ​នោះ។ ការកសាង​ Burj Al Arabបានចាប់ផ្តើម​នៅក្នុង​ឆ្នាំ១៩៩៤ ហើយ​បាន​ដាក់អោយ​ដំណើរការ​ជា​ផ្លូវការ​នៅក្នុង​ខែធ្នូ​ឆ្នាំ១៩៩៩ ។

អាគារ​ដ៏​អស្ចារ្យ​នេះ​ត្រូវបាន​បង្កើតឡើង​ដើម្បី​និ​មិ្ម​ត​រូប និង​សារៈសំខាន់​នៃ​ទីក្រុង​ឌូ​បៃ ហើយ​ត្រូវបាន​គេ​ស្គាល់​ជាទូទៅ​ថា ជា​អគារ​ដ៏​ល្បីល្បាញ​ក្នុង​ពិភពលោក។

លក្ខណៈ​ដ៏​ពិសេស​ជាច្រើន​ដែល​សណ្ឋាគារ​ដ៏​ប្រណីត​នេះ​បានបង្ហាញ គឺមាន​បំពាក់​ភ្លើង​ព៌​ណ​ដ៏​ស្រស់ស្អាត (Ellipse)ដែល​រំលេច​និង​រួមបញ្ចូល​ជាមួយ​ទឹក និង​ភ្លើង។ ភ្លើងពណ៌​ដែល​គេ​តុបតែង​ដ៏​អស្ចារ្យ​នោះ បាន​បាញ់​ឡើង​ទៅលើ​អាកាស ពី​ប៉ម​អាគារ​នៃ​ជាន់​ទី​បួន ដែល​ស្ថិតនៅ​ច្រកចូល​មុខ​នៃ​អគារ Burj Al Arab ។  ការ​រចនា​ផ្ទៃ​ខាងក្នុង​ដ៏​អស្ចារ្យ និង​ពណ៌ផ្សេងៗ ត្រូវបាន​បំផុស​ឡើង​ដើម្បី​បង្ហាញ​ពី​ទឹកដី និង​វប្បធម៌​របស់​ប្រទេស​អារ៉ាប់។ អ្វី​កាន់តែ​អស្ចារ្យ​របស់​អាគារ​នេះ ស្ថាបត្យករ​កំពូល ដែល​បាន​រចនា​អាគារ​នេះ​ឡើង បាន​រចនា​ឲ្យ​មាន​ទឹកជ្រោះ​សប្ប​និម្មិត​ពុះ​ចំ​កណ្តាល​អាគារ​នេះ និង​មាន​អាង​ចិញ្ចឹម​ត្រី​ដ៏​ធំ​បំផុត ដែល​កសាង​ដោយ​ថ្ម​ម៉ាប ជាពិសេស​យើង​ក៏​មិន​ភ្លេច​ទេ នៅ​ខាងក្នុង​សណ្ឋាគារ​លំដាប់​ផ្កាយ៧ដ៏​ប្រណិត​នេះ ក៏មាន​ដាក់តាំង​ដុំ​មាស24កា​រ៉ា​ត ដែលមាន​ប្រវែង ១៧៩០ម៉ែត្រការ៉េ (Gold Leaf)៕

ដោយ៖ គង់ សូរិយា

ភ្នំពេញ៖ នៅ​ឆ្នាំ ២០១៧នេះ អ្នកជំនាញ និង​អភិវឌ្ឍន៍​នានា​នៅតែមាន​ក្តី​សុទិដ្ឋិនិយម​ពី​ដំណើរ​វិវត្តន៍​វិស័យ​អចលនទ្រព្យ​នៅ​កម្ពុជា ទោះជា​កំណើន​នៃ​ការវិនិយោគ និង​សកម្មភាព នៃ​ការចាប់ផ្តើម​គម្រោង​ថ្មី​បាន​ស្ងប់ស្ងាត់​បន្តិច​ក្តី ដែល​ធ្វើ​ឲ្យ​ស្រមោល​អតីតកាល​នៃ​វិបត្តិ​សេដ្ឋកិច្ច និង​ហិរញ្ញវត្ថុ​សាកល​កាលពីដើមឆ្នាំ២០០៨ ត្រលប់​មកវិញ ប៉ុន្តែ​ប្រសិនជា​យើង​ពិនិត្យមើល​ពី​ជម្រៅ និង​ទិដ្ឋភាព​ពិត​នៃ​ការវិវត្ត​ក្នុង​វិស័យនេះ យើង​អាច​និយាយបានថា វិស័យ​សំណង់ និង​អចលនវត្ថុ​កម្ពុជា​នឹង​ឆ្ពោះទៅមុខ​ប្រកបដោយ​ឧត្តមភាព។

ប្រសិនជា​ផ្អែកលើ​សូចនាករ​មួយចំនួន ដែលមាន​លក្ខណៈ​វិទ្យាសាស្ត្រ​យើង​អាច​ទាញ​ការសន្និដ្ឋាន​មួយ​ប្រកបដោយ​ទំនុកចិត្ត និង​ការទទួលខុសត្រូវ វិស័យនេះ​នឹង​បន្ត​លូតលាស់​ប្រកបដោយ​គុណភាព និង​ទំនុកចិត្ត​ក្នុង​ទីផ្សារ​រឹងមាំ​ជាង​មុន និង​អាច​និយាយបានថា វា​ជាការ​អភិវឌ្ឍន៍​ប្រកបដោយ​និរន្តរភាព​នាពេល​អនាគត។

ជាក់ស្តែង​ទុនវិនិយោគ​ក្នុង​វិស័យនេះ នៅតែ​បន្ត​កើនឡើង ដោយ​គិត​ត្រឹម​ដំណាច់ត្រីមាស​ទី៣ឆ្នាំនេះ ទុនវិនិយោគ​ក្នុង​វិស័យនេះ​បាន​កើនឡើង​ដល់​ទំហំ​ទឹកប្រាក់ ៥៦៣៦លាន​ដុល្លារ ស្មើនឹង​កំណើន ២២ភាគរយ ធៀប​រយៈពេល​ដូចគ្នា​កាលពី​ឆ្នាំមុន។

ទំហំ​ទុនវិនិយោគ​ដ៏​ធំ​នេះ ពិតជា​បានបញ្ជាក់​យ៉ាងច្បាស់​ថា អ្នកវិនិយោគ​ក្នុងស្រុក និង​អន្តរជាតិ​នៅតែមាន​ជំនឿ​ចិត្ត​លើ​ការរីកចំរើន​របស់​វិស័យនេះ ហើយ​ពួកគេ​អាច​រកប្រាក់​ចំណេញ​បាន​នៅទីនេះ​បន្តទៀត ព្រោះ​ប្រសិនជា​ពួកគេ​មិនមាន​ជំនឿ​ចិត្ត ហើយ​មើលឃើញថា ការវិនិយោគ​របស់​ពួកគេ​នឹង​ប្រឈម​ហានិភ័យ​ខ្ពស់ ពួកគេ​មិន​សម្រេចចិត្ត​បង្ហូរ​ទុនវិនិយោគ រាប់ពាន់​លាន​ដុល្លារ​នៅក្នុង​ប្រទេស​នេះ​នោះទេ។

កាលពី​ពាក់កណ្តាល​ឆ្នាំមុន ធនាគារអភិវឌ្ឍន៍អាស៊ី​បាន​ចាត់​ចំណាត់ថ្នាក់​ថ្មី​មួយ​ដល់​កម្ពុជា “ជា​ខ្លា​សេដ្ឋកិច្ច​ថ្មី​មួយ​ក្នុង​តំបន់​អាស៊ី” ដោយសារ​កម្ពុជា​រក្សាបាន​នូវ​កំណើនសេដ្ឋកិច្ច ៧.៧ភាគរយ ក្នុង​រយៈពេល​ពីរ​ទស​វត្សរ៍​ចុងក្រោយ​នេះ។ ទន្ទឹមនឹងនេះ​ធនាគារពិភពលោក ក៏បាន​ចាត់​ប្រទេស​កម្ពុជា ជា​ប្រទេសមួយ​ដែល​ឈាន​ពី​ដំណាក់កាល​ជា​ប្រទេស​មាន​ប្រាក់ចំណូល​ទាប មកកាន់​ប្រទេស​មាន​ប្រាក់ចំណូល​មធ្យម​កម្រិត​ទាប ជា​របត់​ថ្មី​មួយ​ដែល​បង្ហាញថា កម្ពុជា​បាន​ចាក​ផុតពី​ក្រសែភ្នែក​របស់​ជនបរទេស​អគតិ​មួយចំនួន ដែល​នៅតែ​ចាត់ទុក​កម្ពុជា “ជា​វាលពិឃាត និង​ស្បៃ​អ​ន្ឋ​កា​ហើយ” ប៉ុន្តែ​ជាការ​បង្ហាញ​ប្រទេស​នេះ​ទៅកាន់​ពិភពលោក​ថា “កម្ពុ​ជាមាន​សាច់ដុំ​ធំ​ជាង​មុន មាន​វិបុលភាព​ជាង​មុន” ក្នុងនាម​ជា​ប្រទេស​មាន​ប្រាក់ចំណូល​មធ្យម ដែលមាន​កំលាំង​ទិញ​ច្រើនជាង​មុន និង​អាច​ទាក់ទាញ​អ្នកវិនិយោគ​បាន​ច្រើនជាង​មុន។

សក្តានុពល​របស់​ប្រទេស​នេះ ក្រៅពី​រក្សាបាន​ស្ថិរភាព​នយោបាយ កំណើនសេដ្ឋកិច្ច​រឹងមាំ​រយៈពេល​វែង ស្ថិរភាព​ម៉ាក្រូសេដ្ឋកិច្ច ស្ថិរភាព​សង្គម និង​ប្រ​ព័​ន្ឋ​ច្បាប់​ដ៏​ទាក់ទាញ​របស់​កម្ពុជា បានធ្វើ​ឲ្យ​អ្នកវិនិយោគ​សម្លឹង និង​បាន​បង្ហូរ​ទុន​ចូលមក​កាន់​ប្រទេស​នេះ​ជា​បន្តបន្ទាប់។

លើសពីនេះ​កំលាំង​យុវជន​វ័យក្មេង ដែលមាន​វ័យ​ចន្លោះ ៣០ទៅ ៣៥ឆ្នាំ​ប្រមាណ៦០ភាគរយ ពិតជា​កំលាំង​ដ៏​ស្រួចស្រាវ និង​មាន​ថាមពល​គ្រប់គ្រាន់​ក្នុងការ​ចូលរួម​អភិវឌ្ឍន៍​សេដ្ឋកិច្ច និង​សង្គម​របស់​ពួកគេ។ កំណើន​នៃ​ប្រាក់ចំណូល នឹងធ្វើ​ឲ្យ​កំណើន​នៃ​កំលាំង​ទិញ​នឹង​កើន​ឡើងជា​ស្វ័យប្រវត្តិ ដែល​អ្នកវិនិយោគ​ក្នុង​វិស័យ​សំណង់ និង​អចលនវត្ថុ​អាច​ទាញយក​សក្តានុពល​ទីផ្សារ ពី​ធនធាន​កំពុង​កើនឡើង​របស់​ប្រទេស​នេះ។

យើង​អាច​លើក​ជា​សំណួរ​ម្តង​ទៀតថា តើ​វិស័យនេះ​ប្រឈម​នឹង​វិបត្តិ​ឬ​យ៉ាងណា? ចម្លើយ​យ៉ាងខ្លី​គឺ “មិន​ពិត​ទេ” ដោយសារ ទី១ ប្រសិនជា​អ្នកវិនិយោគ​មិន​មើលឃើញ​ឳ​កាស​ទេ ពួកគេ​មិន​បោះទុន​រាប់រយ​លាន​ដុល្លារ ដើម្បី​សាងសង់​អាគារ​កប់​ពពក​នៅ​ប្រទេស​នេះ​នោះទេ ទី២ កំណើន​ប្រាក់ចំណូល​មធ្យម​របស់​ប្រជាពលរដ្ឋ​នឹង​បន្ត​កើនឡើង ដោយ​តាម​ការព្យាករណ៍​របស់​ក្រសួង​សេដ្ឋកិច្ច និង​ហិរញ្ញវត្ថុ​កម្ពុជា​កាលពីដើម​ឆ្នាំនេះ​បាន​បង្ហាញថា ប្រជាពលរដ្ឋ​កម្ពុជា​នឹងមាន​ប្រាក់ចំណូល​ជា​មធ្យម​ក្នុង​ម្នាក់​ប្រមាណ ១៣០០ដុល្លារ ក្នុង​ឆ្នាំ២០១៦នេះ ហើយ​ផលទុនជាតិ​សរុប​នឹង​កើន​ដល់២០ពាន់​លាន​ដុល្លារ​អាមេរិក ទី៣ ការរក្សាបាន​នូវ​ស្ថិរភាព​នយោបាយ ក្នុងពេល​មានការ​ប្រែប្រួល​ទិដ្ឋភាព​នយោបាយ​តិចតួច មិន​ជះ​ឥ​ទ្ឋិ​ពល​ដល់​ប្រាក់ចំណូល និង​កំនើនសេដ្ឋកិច្ច​របស់​ក​ម្ពុ​ជា​នោះទេ។

ទន្ទឹមនឹងនេះ ក្រសួង​សេដ្ឋកិច្ច និង​ហិរញ្ញវត្ថុ​ក៏បាន​រកឃើញ​ផងដែរ​ថា គម្រោង​អចលនទ្រព្យ​នៅ​កម្ពុជា បាន​ងាក​មករក​ចំណុច​កែលម្អ​ទីផ្សារ ដែល​ផ្តោតលើ​ប្រជាពលរដ្ឋ​មាន​ប្រាក់ចំណូល​មធ្យម ធ្វើ​ឲ្យ​ហានិភ័យ​ក្នុង​វិស័យនេះ​ត្រូវបាន​កាត់បន្ថយ។ ចំណែក​ល្បឿន​នៃ​ឥណទាន ក៏មាន​ការ​ថមថយ​ផងដែរ ដែល​ធ្វើ​ឲ្យ​ហានិភ័យ​នៃ​ការកើតមាន​វិបត្តិ​សេដ្ឋកិច្ច និង​សង្គម​ក៏ត្រូវ​បាន​សម្រាល​ផងដែរ។

ការលក់​យឺត​នូវ​លំនៅដ្ឋាន និង​ខុន​ដូប្រណីតៗ ជា​អ្វីដែល​យើង​ត្រូវ​ទទួលស្គាល់​ទាំងអស់គ្នា ហើយ​អ្វី​នៅ​ពីក្រោយ​បញ្ហា​នេះ? បញ្ហា​នេះ​មិនមែន​កើតឡើង​ដោយសារ ជា​រឿង​ផ្ទៃក្នុង​របស់​កម្ពុជា​ខ្លួនឯង​ទេ តែ​បណ្តាលមកពី​កត្តា​ខាងក្រៅ ព្រោះ​ប្រទេស​មានការ​អភិវឌ្ឍ​នានា មានការ​រឹតបន្តឹង​បទបញ្ញត្តិ​មួយចំនួន ដោយ​ពួកគេ​ទប់​មិន​ឲ្យ​មាន​លំហូរ​ទុនវិនិយោគ​មកកាន់​ប្រទេស​ដទៃ។ នេះ​ជា​ហេតុផល​ពិតប្រាកដ ដែល​ធ្វើ​ឲ្យ​កំលាំង​ទិញ​ខុន​ដូ​ប្រណីត​ថយចុះ។

បើទោះបីជា​វប្ប​ធ៌​ម​នៃ​ការរស់នៅ​របស់​ប្រជាជន មិនទាន់​ចាប់អារម្មណ៍​ច្រើន​លើ​ការរស់នៅ​ខុន​ដូ​ក្តី ប៉ុន្តែ​ដំណើរ​វិវត្តន៍​នៃ​នគរូបនីយកម្ម​ទីក្រុង កត្តា​ប្រជាសាស្ត្រ និង​កត្តា​សង្គម​សេដ្ឋកិច្ច នឹង​ចាប់បង្ខំ​ឲ្យ​ប្រជាពលរដ្ឋ​ផ្លាស់ប្តូរ​ការគិត​មករ​ស់​នៅតាម​ខុន​ដូ​កាន់តែច្រើន​ជា​ស្វ័យប្រវត្តិ សម្រាប់​រយៈពេល៥ទៅ១០ឆ្នាំ​ខាងមុខ ព្រោះ​ពួកគេ​នឹង​មិនអាច​រកបាន​លំនៅដ្ឋាន​តំលៃ​សមរម្យ នៅក្នុង​ទីក្រុង​នោះទេ។ ពួកគេ​អាច​រកបាន​នៅ​តំបន់​ជាយក្រុង ប៉ុន្តែ​ពួកគេ​នឹង​ចំណាយពេល​កាន់តែច្រើន​ក្នុងការ​ធ្វើដំណើរ ពួកគេ​ត្រូវ​ចំណាយ​លើ​ថ្លៃ​សាំង​ច្រើន ហេតុនេះ​ពួកគេ​នឹង​ផ្លាស់ប្តូរ​ការគិត​មករ​ស់​នៅតាម​ខុន​ដូ​ជា​ស្វ័យប្រវត្តិ។

ផ្អែកលើ​ការសិក្សា​របស់​ក្រសួង​រៀបចំ ដែនដី នគរូបនីយកម្ម និង​សំណង់​បាន​រកឃើញថា ប្រជាពលរដ្ឋ​ចូលមក​រស់នៅក្នុង​ទីក្រុង បាន​កើនឡើង​ជាង១ភាគរយ​ក្នុង​មួយឆ្នាំ (ចំនួន​ប្រជាពលរដ្ឋ​ចន្លោះ​ពី ១៦ម៉ឺន​ដល់ ២០ម៉ឺន​នាក់) ហើយ​កម្ពុជា​ត្រូវការ​លំនៅដ្ឋានរ​ហូ​ដល់ ១លាន​ខ្នង​រហូតដល់​ឆ្នាំ២០៣០ខាងមុខ។

ដូចនេះ​ការវិនិយោគ​លើ​ខុន​ដូ ឬ​លំនៅដ្ឋាន​ប្រភេទ​ផ្សេងទៀត នៅតែ​ជាការ​វិនិយោគ​ត្រឹមត្រូវ ដើម្បី​បំពេញ​លើ​តម្រូវការ​ក្នុងប្រទេស​នេះ។

ហេតុអ្វី​បានជា​មានការ​សន្និដ្ឋាន​បែបនេះ? ចម្លើយ ទី១ ដោយសារ​ខុន​ដូ​មាន​ទីតាំង​ស្ថិតនៅ​ជិត​កន្លែងធ្វើការ​របស់​ពួកគេ ទី២ ខុន​ដូ​ផ្តល់​សេវា​រស់នៅ​ប្រកបដោយ​ផាសុខភាព មាន​សេវា​អនាម័យ សន្តិសុខ ក្លឹប​ហាត់ប្រាណ និង​មាន​កន្លែង​កម្សាន្ត​នៅលើ​ដំបូល ដែល​អាច​ញុំ​ា​ភេសជ្ជៈ​ជជែក​គ្នា​លេង ក្រោយពេល​ពួកគេ​នឿយហត់​ពី​ការងារ​ជាដើម ទី៣ ត​ក្តា​ជីវភាព និង​ជីវសាស្ត្រ ដែល​សំដៅ​ទៅដល់​ការរស់នៅ និង​តុល្យភាព​ការងារ និង​គ្រួសារ។

ដូច្នេះ​ប្រសិនជា​យើង​ផ្អែកលើ​ស្ថិរភាព​ប្រទេស ផ្អែកលើ​កំណើនសេដ្ឋកិច្ច និង​កំណើន​ប្រាក់ចំណូល​របស់​ប្រជាពលរដ្ឋ ព្រមទាំង​ផ្អែកលើ​កត្តា​ប្រជាសាស្ត្រ ស្របពេល​រដ្ឋាភិបាល​កំ​ពុង​រៀបចំ​គោលនយោបាយ ដើម្បី​រុញ​កម្ពុជា​ទៅកាន់​ប្រទេស​មាន​ប្រាក់ចំណូល​មធ្យម​កម្រិត​ខ្ពស់​នៅ​ឆ្នាំ២០៣០ខាងមុខ ពិតជា​កាលានុវត្តន៍​ភា​ព​មាស​មួយ សម្រាប់​អ្នកវិនិយោគ​លើ​វិស័យ​សំណង់ និង​អចលនទ្រព្យ​នាពេល​បច្ចុប្បន្ន និង​ពេលអនាគត​គួរ​ចាប់យក ព្រោះ​ការអភិវឌ្ឍន៍​នូវ​អ្វី​ជា​តម្រូវការ​ដោយ​ខានមិនបាន​របស់​សង្គម ជា​ដំណើរ​មួយ​កំពុង​ស្ថិតនៅ​លើផ្លូវ​ដ៏​ត្រឹមត្រូវ ស្របពេល​ប្រទេស​កម្ពុជា នឹង​ក្លាយជា​ខ្លា​សេដ្ឋកិច្ច​ធំ​មួយ ដែលមាន​មាឌធំ និង​សុខភាព​ល្អ​ជាង​មុន​ដោយ​ពិតប្រាកដ៕

ដោយ៖ ដែន ចែងចាំង

ភ្នំពេញ៖ ការអភិវឌ្ឍន៍​ឆ្ពោះទៅ​គ្រប់​ទិស​នៃ​រាជធានី​ភ្នំពេញ ដើម្បី​ពង្រាយ​របាយ​ប្រជាជន​ឲ្យ​ទៅ​រស់នៅ​គ្រប់​ទិស ស្របតាម​ផែនការអភិវឌ្ឍន៍​ក្រុង​សម្រាប់​ឆ្នាំ២០៣៥ ជា​អ្វីដែល​សាលា​រាជធានី​កំពុង​ធ្វើ ខណៈ​ល្បឿន​នៃ​ការអភិវឌ្ឍ​ឆ្ពោះទៅ​ទិស​ខាងជើង​កំពុងមាន​ល្បឿន​គួរ​ឲ្យ​ចាប់អារម្មណ៍។

លោក ម៉ម សិរី​បញ្ញា អគ្គនាយក​ក្រុមហ៊ុន Easy Property Investment Co, Ltd បាន​ថ្លែង​ឲ្យ propertyarea.asia ដឹង​កាលពីពេលថ្មីៗនេះ​ថា ភាគ​ខាងជើង​ក្រុងភ្នំពេញ​បាន និង​កំពុង​ក្លាយជា​ទីតាំង​ដ៏​មាន​សក្តានុពល តាមរយៈ​គំរោង​អភិវឌ្ឍន៍​ជាច្រើន​បាននិងកំពុង​ធ្វើឡើង និង​ការកសាង​ហេ​ដ្ឋា​រចនា​ស​ម្ព័​ន្ឋ​របស់​រដ្ឋាភិបាល​កាន់តែច្រើន និង​កាន់​តែមាន​របៀបរៀបរយ។លោក​បន្តថា គំរោង AEON MALL ទី២ បាន​លើកស្ទួយ​តំបន់​ភាគ​ខាងជើង​ឆៀង​ខាងលិច​យ៉ាង​សំបើម ដែល​ធ្វើ​ឲ្យ​តំលៃ​ដីធ្លី​នៅ​តំបន់​នោះ​ឡើងថ្លៃ​ខ្ពស់​គួរ​ឲ្យ​កត់សំគាល់។

លើសពីនេះ​តំបន់​ភាគ​ខាងជើង​ឆៀង​ខាងលិច ជា​តំបន់​ដ៏​ទាក់ទាញ ប្រៀបបាន​ដូចជា​គ្រាប់ពេជ្រ ដោយសារ​តំបន់​នេះ​មានការ​ភ្ជាប់​ផ្លូវជាតិធំៗចូលមក​កាន់​រាជធានី​ភ្នំពេញ ទាំង​ផ្លូវជាតិ​លេខ៥ ផ្លូវជាតិ​លេខ៦ ផ្លូវជាតិ​លេខ៧ និង​ផ្លូវជាតិ​លេខ៨ សុ​ទ្ឋ តែ​ជា​ផ្លូវ​ឬ​ស​សៃ​ឈាម​សេដ្ឋកិច្ច​ចូលមក​កាន់​រាជធានី​ភ្នំពេញ។

លោក ម៉ម សិរី​បញ្ញា បាន​បន្តថា តំបន់​ដែលមាន​ទន្លេ​ព័​ទ្ឋ​ជុំវិញ​នេះ ជាទី​តាំង​ដ៏​ល្អ​បំផុត​សម្រាប់​វិនិយោគ ជាក់ស្តែង​នៅតាម​បណ្តោយ​ផ្លូវជាតិ​លេខ៦ មាន​គំរោង​ទីក្រុង​រណប​ជាច្រើន​កំពុង​សាងសង់ ដូចជា ទីក្រុង​រណប​ជ្រោយចង្វារ​ដែល​គ្រោង​បោះទុន​វិនិយោគ១៦០០លាន​ដុល្លារ ទីក្រុង​រណប​នៃ​គំរោង​អ័​រ​គី​ដេ​វីឡា និង​ទីក្រុង​រណប​មិត្តភាព​កម្ពុជា ចិន (CHINA TOWN) នៅ​តំបន់​ទីក្រុង​រណប​តេ​ជោ​មរកត ដែលមាន​តំលៃ​វិនិយោគ រហូតដល់១៥០០លាន​ដុល្លារ​អាមេរិក និង​បុរី​មួយចំនួនទៀត​កំពុង​ឆ្ពោះទៅកាន់​តំបន់​នេះ។

លោក​បន្តថា “ហេ​ដ្ឋា​រចនា​ស​ម្ព័​ន្ឋ សណ្ឋាន​ដី​ល្អ និង​លក្ខ​ខ័​ណ្ឌ​អាកាសធាតុ​អំណោយផល មិនមាន​ការបំពុល​ពី​ផ្សែង​រោងចក្រ សហគ្រាស​នានា នឹងធ្វើ​ឲ្យ​តំបន់​ភាគ​ខាងជើង​កាន់តែ​មាន​ភាព​រស​រវើក​នាពេល​អនាគត។លោក​បន្តថា “ខ្ញុំ​ជឿជាក់ថា​តំបន់​នេះ​នឹង​ក្លាយជា​ប៉ូល​សេដ្ឋកិច្ច ពាណិជ្ជកម្ម និង​លំនៅដ្ឋាន​ដ៏​រស​រវើក និង​ទាក់ទាញ​ថ្មី​មួយទៀត សម្រាប់​ក្នុង​ភ្នំពេញ​នាពេល​អនាគត។

ក្នុង​ផែនការមេ ទីក្រុង​ភ្នំពេញ​ពី​ឆ្នាំ២០១៥ ដល់​ឆ្នាំ២០៣៥ សាលា​រាជធានី​ភ្នំពេញ​មាន​គោលដៅ ពង្រីក​ការអភិវឌ្ឍន៍​ទៅគ្រប់​ទិស​ទាំង​បួន នៃ​រាជធានី​ភ្នំពេញ ដោយសារ​ពីមុន មក​ការអភិវឌ្ឍន៍​បាន​រីក​ខ្លាំង​ទៅ​ភាគ​ខាងលិច និង​ខាងជើង​ក្រុងភ្នំពេញ ដែល​ធ្វើ​ឲ្យ​ចំនួន​ប្រជាពលរដ្ឋ​ចូលទៅ​រស់នៅ​តំបន់​នោះ​ច្រើន ដោយ​មើលឃើញ​បែបនេះ​ទើប​អាជ្ញាធរ​ក្រុង​បាន​ពង្រីក​ការអភិវឌ្ឍន៍​ទៅ​ភាគខាងត្បូង និង​ភាគ​ខាងកើត​រាជធានី​ភ្នំពេញ ដើម្បី​កុំ​ឲ្យ​ប្រជាជន​រស់នៅ​ប្រមូលផ្តុំ​តែមួយ​កន្លែង ដែល​នាំ​ឲ្យ​មាន​បញ្ហា​បរិស្ថាន​សង្គម និង​ធ្វើ​ឲ្យ​មានការ​ពិបាក​គ្រប់គ្រង។នេះ​បើតាម​លោក​មាន ចាន់​យ៉ា​ដា​អភិបាលរង​ក្រុងភ្នំពេញ​លើកឡើង។

លោក​បន្តថា “ប្រសិនជា​មើលទៅ​ភាគ​ខាងជើង​រាជធានី វា​ជា​តំបន់​មានការ​អភិវឌ្ឍន៍​ខ្លាំង​លើ​វិស័យ​លំនៅដ្ឋាន ពាណិជ្ជកម្ម​ខ្លាំង​នាពេល​អនាគត”៕

ដោយ ៖ រ៉ាវី

ខណៈពេលដែល​វិស័យ​អចលនទ្រព្យ​កំពុងមាន​សន្ទុះ​ខ្លាំង ជាពិសេស លើ​វិស័យ​ដីធ្លី​នាពេល​បច្ចុប្បន្ននេះ​គេ​សង្កេតឃើញថា មាន​មនុស្ស​ជាច្រើន ជាពិសេស​អ្នក​ដែលមាន​ធនធាន​មួយចំនួន​បាន​ចំណាយលុយ​ជាច្រើន​ដើម្បី​ទិញ​ដី​ទុក​ធ្វើ​វិនិយោគ ជាមួយ​ការ​រំពឹងថា​អាច​ទទួលបាន​ចំណេញ​នៅ​ថ្ងៃ​អ​នា​គត់ ។ ប្រការនេះ​ត្រូវបាន​អ្នកជំនាញ​ផ្នែក​វិស័យ​អចល​ទ្រព្យ​គ្រើន​រំលឹកថា ការទិញ​ដី​ទុក​ធ្វើការ​វិនិយោគ​មិនមែន​សុទ្ធតែ​អាច​ទទួលបាន​ចំណេញ​ទាំងអស់​នោះទេ ប្រសិនបើ​អ្នក​ទាំងនោះ​មិនមាន​ជំនាញ​លើ​ផ្នែក​នេះ​ច្បាស់លាស់ ។

លោក​ឧកញ៉ា ចេង ខេង អគ្គនាយក​ក្រុមហ៊ុន​អចលនទ្រព្យ កម្ពុជា ស៊ី​ភី​អិ​ល (CPL) បាន​លើកឡើងថា សម្រាប់​អ្នក​ដែលមាន​លុយ សុទ្ធតែ​អាចយ​កលុយ​ដែល​ខ្លួន​មាន​ទៅធ្វើ​ការវិនិយោគ​លើ​វិស័យ​អចលនទ្រព្យ ឬ​វិស័យ​ដីធ្លី បាន ប៉ុន្តែ​មិន​ប្រាកដថា​អ្នក​ទាំងនោះ​សុទ្ធតែ​ចំណេញ​នោះទេ ព្រោះ​ពួកគាត់​មិនមាន​ជំនាញ ហើយ​បើ​អាច​ទទួលបាន​ចំណេញ​ក៏​ជាការ​ចៃដន្យ​នោះដែរ។ ដូច្នេះ ដើម្បី​ចៀសវាង​ការជួប​ហានិភ័យ ពួកគាត់​គួរតែ​ឆ្លងកាត់​ការពិភាក្សា​ជាមួយ​អ្នកជំនាញ​ដែលមាន​បទពិសោធ។

អគ្គនាយក​ក្រុមហ៊ុន CPL បញ្ជាក់ថា ៖ «សម្រាប់​រូបខ្ញុំ ក្នុង​រយៈពេល​ប្រមាណ20ឆ្នាំកន្លងមក ខ្ញុំ​បាន​នាំ​អ្នកវិនិយោគ​លើ​វិស័យនេះ​ឱ្យ​ក្លាយជា​សេដ្ឋី​ជាច្រើន​នាក់​មកហើយ ហើយ​មូលហេតុ​ដែល​អ្នក​ទាំងនោះ​មក​ប្រឹក្សា​ជាមួយ​ខ្ញុំ​ក៏​ព្រោះតែ​ពួកគាត់​មានការ​ជឿជាក់​លើ​ខ្ញុំ។ ប្រសិនបើ​យើង​ចង់​វិនិយោគ​លើ​អចលនទ្រព្យ​ពិតប្រាកដ​មែន មាន​ថវិកា​ប៉ុន្មាន​ក៏​អាច​វិនិយោគ​បានដែរ អ្វីដែល​សំខាន់​គឺ​គួរតែ​មក​ពិភាក្សា​ជាមួយ​អ្នកជំនាញ ព្រោះ​ពួកគេ​អាចធ្វើ​ការងារ​នេះ​បាន​ពី Aដល់ Z ។ គេ​អាច​ដឹងថា​មាន​ថវិកា​ប៉ុន្មាន គួរ​វិនិយោគ​កន្លែង​ណា? យើង​មាន​លុយ​តិច​រកស៊ី​តាមតិច មាន​លុយ​ច្រើន​រកស៊ី​តាមច្រើន ព្រោះ​អ្នកជំនាញ​គេ​អាច​ច្នៃ​កាលទេស​បាន​ទាំងអស់» ។

យ៉ាងណាក៏ដោយ បើទោះជា​ការវិនិយោគ​លើ​វិស័យ​អចលនទ្រព្យ ក៏ដូចជា​វិស័យ​ដីធ្លី​កំពុង​តែមាន​សន្ទុះ​ក៏ដោយ ប៉ុន្តែ​ក៏មាន​អ្នកមួយ​ចំនួន​បានបង្ហាញ​ពី​ក្ដីបារម្ភ ពាក់ព័ន្ធ​ទៅនឹង​វិស័យ​នយោបាយ ខណៈដែល​វេលា​នៃ​ការបោះឆ្នោត​ជិត​ខិត​មកដល់​នាពេលខាងមុខ។

តប​ទៅនឹង​ក្ដីបារម្ភ​ខាងលើនេះ លោក​ឧកញ៉ា ចេង ខេង បាន​បញ្ជាក់ថា «ជា​ទស្សន​របស់ខ្ញុំ គឺ​គ្មានអ្វី​ជាការ​ព្រួយបារម្ភ​ទេ ព្រោះ​យើង​មើលឃើញថា នយោបាយ​នៅ​កម្ពុជា​នាពេល​បច្ចុប្បន្ន​គឺមាន​ភាពចាស់ទុំ​ហើយ ។ ដូច្នេះ​អ្វីដែល​គួរ​បារម្ភ​គឺថា តើ​យើង​អាច​រកបាន​អ្នកជំនាញ​មាន​បទពិសោធ​ពិតប្រាកដ មាន​ក្រមសីលធម៌​វិជ្ជាជីវៈ​មកជួយ​យើង​បាន​ដែរឬទេ? ដូច្នេះ មុននឹង​យើង​ជឿជាក់​លើ​មនុស្ស​ម្នាក់ យើង​ត្រូវ​មើល​ពី​ប្រ​វ​ត្ដិ​របស់គេ​ឱ្យបាន​ច្បាស់»។ លោក​បញ្ជាក់​បន្ថែមថា៖ «ភ្នាក់ងារ​អចលនវត្ថុ​មាន​ច្រើន ប៉ុន្ដែ​ភ្នាក់ងារ​ខ្លះ​អត់​មាន​សច្ចភាព​ក្នុង​ការងារ​របស់គាត់​ទេ គាត់​ក៏​មិន​គិតដល់​អនាគត​ដែរ គាត់​ធ្វើ​យ៉ាងម៉េច​ឱ្យតែបាន​លុយ​ក្នុងមួយគ្រាៗ បើ​បោកប្រាស់​គេ​បាន​កាន់តែ​ល្អ ព្រោះ​គាត់​អត់​មាន​ជំនាញ​ត្រឹមត្រូវ គ្មាន​កេរ្ដិ៍ឈ្មោះ​ក្នុងសង្គម ។ ដូច្នេះ ដើម្បី​ចៀស​ផុតពី​ហានិភ័យ ហើយ​វិនិយោគ​ទទួលបាន​ជោគជ័យ​ចាំបាច់​ត្រូវតែមាន​ជំនាញ ឬ​មាន​អ្នកជំនាញ​នៅ​ឈ​ពីក្រោយ​ទើបបាន»៕

ដោយ៖ គង់ សូរិយា

ភ្នំពេញ៖ ជាមួយនឹង​គុណភាព​នៃ​ធនធានមនុស្ស​នៅមានកម្រិត ក្នុង​វិស័យ​អចលនទ្រព្យ​នៅ​កម្ពុជា លោក​គុយ វ៉ាត​អគ្គនាយក​ប្រតិបត្តិ​នៃ​ក្រុមហ៊ុន Century21 Cambodia បាន​ថ្លែងថា អ្វីដែល​សំខាន់​នាពេលនេះ គឺ​ធ្វើយ៉ាងណា​ឲ្យ​អ្នកវិនិយោគ​ពី​ប្រទេសផ្សេងៗមាន​ទំនុកចិត្ត មកលើ​ភ្នាក់ងារ​អចលនទ្រព្យ​នៅ​កម្ពុជា ដើម្បី​ធ្វើ​ឲ្យ​មាន​ទំនុកចិត្ត​ក្នុង​ទីផ្សារ​នេះ។

យោងតាម​ការសិក្សា​រប​ស់​ក្រុមហ៊ុន Century21 Cambodia បាន​រកឃើញថា រយៈពេល៥ឆ្នាំ​ខាងមុខ​ទីផ្សារ​ខុន​ដូ​នៅ​ប្រទេស​នេះ នឹង​បង្ហាញ​ការកើនឡើង​យ៉ាង​ធំ​នៅក្នុង​ប្រតិបត្តិ​ការលក់​ខុន​ដូ ដែលជា​ធម្មតា​នៅ​កម្ពុជា​ចាប់ពី​ពេល​សម្ពោធ​គម្រោង គឺ​ចំណាយពេល​ចំនួន២៩ ខែ​ទើប​លក់​អស់ ខណៈ​ប្រទេស​ថៃ ឬ​វៀតណាម ការលក់​គម្រោង​បញ្ចប់​បាន​ចំណាយពេល​រហូតដល់៤០ខែ។

លោក គុយ វ៉ាត បាន​ថ្លែងថា “ទំនុកចិត្ត​ទីផ្សារ និង​លទ្ធភាព​ពង្រីក​ទីផ្សារ​ខុន​ដូ​នៅ​កម្ពុជា នៅ​បណ្តា​ប្រទេស​ជា​ដៃគូ​កាន់តែ​ធ្វើ​ឲ្យ​អ្នកវិនិយោគ​លើ​វិស័យ​អចលនវត្ថុ មាន​ទំនុកចិត្ត និង​ចាប់អារម្មណ៍​វិនិយោគ​នៅ​កម្ពុជា។

លោក​បន្តថា ដើម្បី​ធ្វើ​ឲ្យ​វិស័យនេះ​បន្ត​រីកចម្រើន ទាមទារ​ឲ្យ​អ្នក​នៅក្នុង​វិស័យនេះ ទាំង​អ្នក​អភិវឌ្ឍន៍ អ្នក​សាងសង់ និង​ក្រុមហ៊ុន​ភ្នាក់ងារ​អចលនទ្រព្យ​ត្រូវ​ចូលរួម​ទាំងអស់គ្នា ដើម្បី​ទាក់ទាញ​លំហូរ​ទុនវិនិយោគ​កាន់តែ​ធំ​ជាង​មុន មិន​ត្រឹមតែ​ក្នុង​កម្រិត​ទីផ្សារ​អាស៊ាន​នោះទេ តែ​យើង​អាចធ្វើ​ការងារ​ជាមួយ​គ្រប់​ប្រទេស​នៅលើ​ពិភពលោក ដែល​យើង​អាច​ធ្វើការ​ជាមួយគ្នា​បាន៕