ដោយដែន ចែងចាំង
ភ្នំពេញ ៖ នៅពេលដែលអ្នកវិនិយោគ ដោយមិនមានព៌តមានក្នុងដៃ ការវិនិយោគអចលនទ្រព្យរបស់អ្នកអាចរងហានិភ័យខ្ពស់ ហេតុនេះការសិក្សានិងស្វែងយល់ពីព៌តមានឲ្យបានគ្រប់ជ្រុងជ្រោយមានសារៈសំខាន់ណាស់ ដើម្បីការវិនិយោគរបស់ខ្លួនប្រាសចាកហានិភ័យ។
ជាមួយនឹងព៌តមានកាន់តែមានភាពពិបាកគ្រប់គ្រង លើបណ្តាញទំនាក់ទំនងសង្គ ម ព៌តមានមួយចំនួនអាចពិត និងមួយចំនួនជាព៌តមានពិត ហេតុនេះការសិក្សា វិភាគពិចារណាឲ្យបានច្បាស់លាស់ពិតជាមានសារៈសំខាន់។
អ្នកវិភាគអចលនទ្រព្យ និងសេដ្ឋកិច្ចសង្គម លោកង៉ែត ជូបានថ្លែងឲ្យដឹងតាមទូរ ស័ព្ទកាលពីពេលថ្មីៗនេះថា នៅក្នុងវិស័យនេះ មានការបំពុលព៌តមានច្រើនទាក់ទងនឹងការបង្ហាញ ឬលើកឡើងពីគំរោងអភិវឌ្ឍន៍នានា តាមរយៈអ្នកវិនិយោគមួយចំនួននៅក្នុងវិស័យនេះដើម្បី ទាក់ទាញអតិថិជន ប្រយោជន៍ដើម្បីធ្វើឲ្យពួកគេលក់គំរោងរបស់ពួកគេឆាប់ដាច់។
លោកបន្តថា ជាក់ស្តែងយើងឃើញគំរោងព្រលានយន្តហោះថ្មី ក្នុងខេត្តកណ្តាលជាឧទាហរណ៍ស្រាប់ ដែលរដ្ឋាភិបាលបានប្រកាសសាងសង់ ហើយមានអ្នកខ្លះបានប្រើប្រាស់លុយធនាគារទៅទិញ ដើម្បីលក់យកចំណេញ ប៉ុន្តែបច្ចុប្បន្នគំរោងនោះបានស្ងប់ស្ងាត់ ចលនានៃការទិញលក់ដីធ្លីក៏ស្ងប់ស្ងាត់នៅតំបន់នោះ ដែលធ្វើឲ្យអ្នកវិនិយោគមួយចំនួនប្រឈមមុខនឹងហានិភ័យ។
លោកបន្តថា “ហេតុនេះមុនសម្រេចចិត្តវិនិយោគ ខ្ញុំសុំឲ្យប្រជាពលរដ្ឋប្រមូលព៌តមានឲ្យបានច្បាស់លាស់ និងគ្រប់ជ្រុងជ្រោយជាមុនសិន មុននឹងធ្វើការសម្រេចចិត្តវិនិយោគដើម្បីកាត់បន្ថយហានិភ័យ”។លោកបន្តថា “នៅពេលយើងមិនសូវស្វែងយល់សិក្សារៀនសូត្រ និងតាមដានព៌តមានជាក់លាក់ នឹងធ្វើឲ្យយើងវិនិយោគរបស់យើងមានហានិភ័យខ្ពស់”។
លោកង៉ែត ជូបានបន្តថា ការសិក្សារៀនសូត្រ និងប្រមូលព៌តមានបានត្រឹមត្រូវ ជាមូលដ្ឋានដ៏សំខាន់ សម្រាប់ធ្វើការសម្រេចចិត្តបានត្រឹមត្រូវ និងអាចកាត់បន្ថយឬបញ្ចៀសបាននូវហានិភ័យ ជាជាងយើងវិនិយោគបែបប្រថុយប្រថាន ព្រោះការវិនិយោគពឹងលើព្រេងសំណាង មិនមែនជាជម្រើសរបស់អ្នកវិនិយោគឆ្លាតវៃនោះឡើយ៕
