ដោយៈ ម៉ាណា

    ភ្នំពេញៈ ក្រសួងចំនួន២ បានធ្វើពិធីចុះអនុស្សរណៈ នៃការយោ​គ​យល់គ្នា ស្តីពីកិច្ចសហប្រតិបត្តិការ ក្នុងការដំឡើងអំពូលភ្លើងបំភ្លឺប្រើថាមពលពន្លឺព្រះអាទិត្យ តាមបណ្តាញផ្លូវសាធារណៈ នៃព្រះរាជាណាចក្រកម្ពុជា។

ពិធីចុះហត្ថលេខានេះធ្វើឡើងរវាង លោកប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន និងលោកកែវ រតនៈ រដ្ឋមន្រ្តីក្រសួងរ៉ែ និងថាមពល។

ពិធីចុះអនុស្សរណៈនាពេលនេះមានគោលបំណង ដើម្បីធ្វើកិច្ចសហប្រតិបត្តិការ ក្នុងការដំឡើងភ្លើងបំភ្លឺ ដោយប្រើថាមពលពន្លឺព្រះអាទិត្យតាមបណ្តាញផ្លូវសាធារណៈ និងផ្លូវថ្នល់នានា ដើម្បីជួយលើកកម្ពស់សុវត្ថិភាពចរាចរណ៍ និងសន្តិសុខតាមបណ្តាញផ្លូវសាធារណៈ ជាពិសេសរួមចំណែក កាត់បន្ថយគ្រោះថា្នក់ពេលយប់ តាមបណ្តាញផ្លូវថ្នល់។

ទោះជាយ៉ាងណាក្រសួងទាំងពីរ មិនបានបញ្ជាក់ពីទំហំនៃការចំំណាយ និងបណ្តាញផ្លូវជាតិទាំងអស់ នឹងមានការបំពាក់ឬធ្វើលើបណ្តាផ្លូវសំខាន់ៗមួយចំនួននោះទេ៕

ដោយៈ ចំណាន

    ភ្នំពេញៈ លោកស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) បានអនុញ្ញាតជូនគណៈប្រតិភូក្រុមហ៊ុន Bangsheng Space-Time (Guangxi) Technology Co., Ltd. ដឹកនាំដោយលោក Peng Wenbin ប្រធានក្រុមហ៊ុន ចូមជួបសម្តែងការគួរសម និងពិភាក្សាការងារ ដើម្បីស្វែងយល់បន្ថែមអំពីកាលានុវត្តភាព នៃការវិនិយោគលើវិស័យបច្ចេកវិទ្យានៅកម្ពុជា។

នៅក្នុងជំនួបនារសៀលនេះ លោកប្រធានក្រុមហ៊ុន បានសម្តែងនូវការគោរព និងអំណរគុណយ៉ាងជ្រាលជ្រៅជូនចំពោះ លោកឧប​នាយករដ្ឋមន្ត្រី ដែលបានឆ្លៀតពេលវេលាដ៏មមាញឹក និងមានតម្លៃ ផ្តល់ឱកាសឱ្យគណៈប្រតិភូបានចូលជួបសម្តែងការគួរសម និងពិភាក្សាការងារដោយផ្ទាល់នាពេលនេះ។

ជាមួយគ្នានេះ តំណាងក្រុមហ៊ុនបានធ្វើបទបង្ហាញជម្រាបជូន ឯកឧត្តមឧបនាយករដ្ឋមន្ត្រី ក៏ដូចជាអង្គជំនួបទាំងមូលអំពីប្រវត្តិ និងសាវតាក្រុមហ៊ុន ជំនាញឯកទេស បទពិសោធន៍ សមិទ្ធផលការងារធំៗ និងទិសដៅវិនិយោគនៅកម្ពុជា លើវិស័យឯកទេសរបស់ខ្លួន។

ជាការឆ្លើយតប លោកឧបនាយករដ្ឋមន្ត្រី បានសម្តែងនូវការស្វាគមន៍ចំពោះវត្តមានរបស់គណៈប្រតិភូ និងបានថ្លែងអំណរគុណចំពោះថ្នាក់ដឹកនាំក្រុមហ៊ុន ដែលបានសម្លឹងឃើញកម្ពុជាជាគោលដៅវិនិយោគដ៏មានសក្តានុពល និងមានភាពទាក់ទាញខ្ពស់។

ទន្ទឹមនេះ លោកឧបនាយករដ្ឋមន្ត្រី បានចែករំលែកនូវគោលគំនិត និងអនុសាសន៍ចង្អុលបង្ហាញមួយចំនួន ដើម្បីក្រុមហ៊ុនអាចយកជាមូលដ្ឋានក្នុងការបន្តជំហានបន្ទាប់របស់ខ្លួន ក្នុងការវិនិយោគនៅកម្ពុជាឱ្យបានត្រឹមត្រូវ និងមានប្រសិទ្ធភាពខ្ពស់បំផុត៕

ដោយៈ ចំណាន

    ព្រះសីហនុៈ  អភិបាលរងខេត្តព្រះសីហនុ លោក ឡុង ឌីម៉ង់ ដឹកនាំមន្ត្រីជំនាញពាក់ព័ន្ធ ចុះពិនិត្យទីតាំង ដើម្បីចុះបញ្ជីជាគម្រោងQIP ចំនួន២នៅស្រុកព្រៃនប់ ខេត្តព្រះសីហនុ។

លោកបានដឹកនាំមន្ត្រីជំនាញពាក់ព័ន្ធ ចុះពិនិត្យទីតាំងស្នើសុំចុះបញ្ជីគម្រោងវិនិយោគ បង្កើតរោងចក្រផលិតក្តារបន្ទះ និងរោងចក្រផលិតចំណីសត្វ ដែលមានទីតាំងនៅក្នុងឃុំសាមគ្គី និងឃុំជើងគោ ស្រុកព្រៃនប់ ខេត្តព្រះសីហនុ។

ក្នុងនាមជាអនុប្រធានអនុគណៈកម្មាធិការវិនិយោគខេត្ត លោកអភិបាលរងបានស្វែងយល់លម្អិត និងដោះស្រាយបញ្ហាប្រឈមដែលវិនិយោគិនបានជួបប្រទះ និងបានណែនាំឱ្យអាជ្ញាធរមូលដ្ឋាន និងមន្ទីរអង្គភាពពាក់ព័ន្ធខិតខំធ្វើយ៉ាងណា បង្កលក្ខណៈងាយស្រួលដល់អ្នកវិនិយោគ ដោយរក្សាទំនាក់ទំនងល្អ សម្របសម្រួលនីតិវិធី និងផ្តល់ការប្រឹក្សាជាប្រចាំ។

ជាមួយគ្នានឹងការជំរុញឱ្យក្រុមហ៊ុនទាំង២ ព្យាយាមអូសទាញអ្នកវិនិយោគិនដទៃ ឱ្យងាកមកបណ្តាក់ទុននៅខេត្តព្រះសីហនុ លោកអភិបាលរងក៏បានសំណូមពរឱ្យក្រុមហ៊ុនទាំង២ ផ្តល់អាទិភាពការងារដល់ប្រជាពលរដ្ឋមូលដ្ឋាន និងត្រូវភ្ជាប់សេវាប.ស.ស.ជូនបុគ្គលិក​ និងកម្មករឱ្យបានត្រឹមត្រូវ។ គិតគួរឱ្យបានគត់មត់ចំពោះបញ្ហាបរិស្ថាន និងសង្គមដែលអាចមានកើតឡើង។

ត្រូវមានផែនការការពារក្នុងករណីមានឧបទ្ទវហេតុណាមួយ រៀប​ចំអគារឱ្យមានខ្យល់ចេញចូលល្អ មានច្រកចេញចូលសុវត្ថិភាព និងបំពាក់ឧបករណ៍ បង្ការអគ្គិភ័យឱ្យបានគ្រប់គ្រាន់ និងចូលរួមដាំដើមឈើឱ្យបានច្រើន ដើម្បីផ្តល់ផាសុកភាពដល់បុគ្គលិក និងកម្មករនៅទីតាំងផងដែរ៕

ដោយៈ ម៉ាណា

    ភ្នំពេញៈ ក្រុមប្រឹក្សាស្តង់ដារជាតិ នៃក្រសួងឧស្សាហកម្ម បានអនុម័តស្តង់ដារកម្ពុជាចំនួន៤៥ ដើម្បីលើកកម្ពស់ភាពប្រកួតប្រជែងនៃឧស្សាហកម្ម និងការធ្វើពាណិជ្ជកម្មអន្តរជាតិ។

ព័ត៌មាននេះត្រូវបានលើកឡើង ដោយក្រុមប្រឹក្សាស្តង់ដារជាតិ  ក្នុងកិច្ចប្រជុំដឹកនាំដោយលោកហែម វណ្ឌី រដ្ឋមន្រ្តីក្រសួងឧស្សាហកម្ម បច្ចេកវិទ្យា វិទ្យាសាស្រ្ត និងនវានុវត្តន៍។

ក្រសួងបានអនុម័តស្តង់ដារកម្ពុជាចំនួន៤៥ ដើម្បីពង្រឹងហេដ្ឋារចនាសម្ព័ន្ធគុណភាពជាតិ (NQI) គាំទ្រការអភិវឌ្ឍឧស្សាហកម្ម សម្រួលពាណិជ្ជកម្មអន្តរជាតិ និងលើកកម្ពស់គុណភាព សុវត្ថិភាពផលិតផល និងការការពារអ្នកប្រើប្រាស់។

កិច្ចប្រជុំលើកទី៣៣ របស់ក្រុមប្រឹក្សាស្តង់ដារជាតិ បានអនុម័តស្តង់ដារអន្តរជាតិ និងស្តង់ដារតំបន់ថ្មីចំនួន៤៣ស្តង់ដារ និងវិសោធនកម្មចំនួន ២ស្តង់ដារ ជាស្តង់ដារកម្ពុជា។ ស្តង់ដារទាំងនេះរួមមាន ស្តង់ដារសហភាពអឺរ៉ុប (Eurocode) ចំនួន ១៣, ស្តង់ដារISO ចំនួន ២៦ ស្តង់ដារIEC ចំនួន៤ និងវិសោធនកម្មស្តង់ដារចំនួន២៕

ដោយៈ ចំណាន

    ភ្នំពេញៈ ធនាគារពិភពលោក បានផ្តល់អនុសាសន៍ជាប់លាប់ថា រាជធានីភ្នំពេញ ត្រូវផ្តល់អាទិភាពដល់ហេដ្ឋារចនាសម្ព័ន្ធជាមុនសិន ហើយបន្ទាប់មកអនុញ្ញាត ឱ្យមានការអភិវឌ្ឍដែលមានដង់ស៊ីតេខ្ពស់ដូចជាអគារខ្ពស់ៗ ដែលហេដ្ឋារចនាសម្ព័ន្ធគាំទ្រមានគ្រប់គ្រាន់។

ធនាគារពិភពលោកមិនប្រឆាំងនឹងអគារខ្ពស់ៗទេ ប៉ុន្តែវាសង្កត់ធ្ងន់ថា អគារខ្ពស់ៗ គួរតែត្រូវបានផ្គូផ្គង ជាមួយនឹងផែនការទីក្រុង និងការវិនិយោគហេដ្ឋារចនាសម្ព័ន្ធដ៏រឹងមាំ។

អនុសាសន៍សំខាន់ៗរបស់ធនាគារពិភពលោករួមមាន ដូចជា

១. ធ្វើឱ្យប្រសើរឡើងនូវហេដ្ឋារចនាសម្ព័ន្ធដឹកជញ្ជូន

តាមរយៈការពង្រីកការដឹកជញ្ជូនសាធារណៈ (ប្រព័ន្ធឡានក្រុង និងការដឹកជញ្ជូនសាធារណៈនាពេលអនាគត)។ កែលម្អផ្លូវធំៗ និងផ្លូវប្រសព្វដើម្បីកាត់បន្ថយការកកស្ទះ។ រួមបញ្ចូលផែនការដឹកជញ្ជូន ជាមួយនឹងការអភិវឌ្ឍលំនៅដ្ឋាន និងពាណិជ្ជកម្មថ្មីៗ។ កែលម្អប្រព័ន្ធបង្ហូរទឹក និងការការពារទឹកជំនន់ ពង្រីកប្រព័ន្ធបង្ហូរទឹកភ្លៀង។

ការពារតំបន់សើម ដែលកាត់បន្ថយទឹកជំនន់ដោយធម្មជាតិ។ វិនិយោគលើការព្យាបាលទឹកសំណល់។

២. ពង្រឹងសេវាប្រើប្រាស់មុនពេលសាងសង់ដែលមានដង់ស៊ីតេខ្ពស់

ជាមួយគ្នានេះ ធនាគារពិភពលោក ក៏បានផ្តល់អនុសាសន៍ឲ្យរដ្ឋាភិបាលបង្កើនសមត្ថភាពផ្គត់ផ្គង់ទឹក។ ធ្វើឱ្យប្រសើរឡើងនូវការចែកចាយអគ្គិសនី។ កែលម្អការប្រមូល និងការព្យាបាលកាកសំណល់រឹង។

៣. សម្របសម្រួលការអភិវឌ្ឍអគារខ្ពស់ៗ ជាមួយនឹងហេដ្ឋារចនាសម្ព័ន្ធ

ធនាគារពិភពលោកកត់សម្គាល់ជាពិសេសថា នៅទីក្រុងភ្នំពេញ អគារមធ្យម និងខ្ពស់ៗមួយចំនួនត្រូវបានសាងសង់ តាមបណ្តោយផ្លូវតូចចង្អៀត ដែលមិនអាចទប់ទល់នឹងតម្រូវការចរាចរណ៍ និងសេវាកម្មបន្ថែមបាន។

ធនាគារនេះបានផ្តល់អនុសាសន៍ទៀតថា គម្រោង​អគារ​ខ្ពស់ៗ​ត្រូវ​បាន​គាំទ្រ​ដោយ​ផ្លូវ​ធំៗ ការ​ធ្វើ​ឲ្យ​ប្រសើរ​ឡើង​នូវ​សេវា​ប្រើប្រាស់ និង​ការ​ធ្វើ​ផែនការ​ប្រើប្រាស់​ដីធ្លី​ឲ្យ​បាន​ល្អ​ប្រសើរ។

៤. លើកកម្ពស់​កំណើន​តូច​ចង្អៀត និង​មាន​ផែនការ​ល្អ

ធនាគារនេះបានផ្តល់អនុសាសន៍បន្តផងដែរ ដូចជា ការអភិវឌ្ឍ​ទីក្រុង​តូច​ចង្អៀត​ ជាជាង​ការ​រីក​រាលដាល​ទីក្រុង ​ដែល​មិន​អាច​គ្រប់គ្រង​បាន។ ការ​ចូល​ប្រើប្រាស់​សេវា​ដឹកជញ្ជូន​សាធារណៈ​កាន់តែ​ប្រសើរ។ ការវិនិយោគលើលំហ​បៃតង​កាន់តែ​ច្រើន និង​ហេដ្ឋារចនាសម្ព័ន្ធ​ដែល​ធន់​នឹង​អាកាសធាតុ និងការវិនិយោគ​លើ​ប្រព័ន្ធ​ចល័តភាព ថាមពល ទឹកសំណល់ និង​កាកសំណល់​រឹង។

ជំហរ​របស់​ធនាគារពិភពលោក​គឺថា អគារ​ខ្ពស់ៗ​គឺ​សមរម្យ​សម្រា​ប់​ទីក្រុង​ភ្នំពេញ ប្រសិនបើ​ពួកគេ​ត្រូវ​បាន​គាំទ្រ​ ដោយ​ហេដ្ឋារចនាសម្ព័ន្ធ​គ្រប់គ្រាន់។លំដាប់​ដែល​បាន​ណែនាំ​ មានដូចជា ការរៀបចំផែនការ​ទីក្រុង ហេដ្ឋារចនាសម្ព័ន្ធ (ផ្លូវ ប្រព័ន្ធ​បង្ហូរទឹក ការដឹកជញ្ជូន​សាធារណៈ សេវា​ប្រើប្រាស់) ការអភិវឌ្ឍ​អគារ​ខ្ពស់ៗ និង​ការប្រើប្រាស់​ចម្រុះ។

វិធីសាស្រ្ត​នេះ​មាន​គោលបំណង​ ជួយ​ទីក្រុង​ភ្នំពេញ​ឲ្យ​រីកចម្រើន​ទៅជា​រាជធានី ​ដែល​មាន​ការប្រកួតប្រជែង រស់នៅ​បាន​កាន់តែ​ប្រសើរ និង​ធន់ ខណៈ​ពេល​ដែល​ជៀសវាង​ ការកកស្ទះ​ចរាចរណ៍​ធ្ងន់ធ្ងរ ទឹកជំនន់ និង​សេវាសាធារណៈ​ដែល​ផ្ទុក​លើស​ទម្ងន់៕

ដោយៈ ចំណាន

    ភ្នំពេញៈ ក្រុមការងារមន្ទីរសាធារណការ និងដឹកជញ្ជូន រាជធានី-ខេត្តបានចុះជួសជុលថែទាំកំណាត់ផ្លូវជាតិ តាមបណ្ដាខេត្ត ដែលមានសភាពខូចខាត។

យោងតាមផេកផ្លូវការរបស់ក្រសួងសាធារណការបានឲ្យដឹងថា នៅចន្លោះថ្ងៃទី១០ ដល់១២កក្កដា ២០២៦ ក្រុមការងារមន្ទីរសាធារណការ និងដឹកជញ្ជូន ខេត្តសៀមរាប ពោធិ៍សាត់ បន្ទាយមានជ័យ ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី កំពង់ស្ពឺ កំពង់ឆ្នាំង កំពង់ធំ បាត់ដំបង ប៉ៃលិន កំពត កែប ព្រះសីហនុ កោះកុង កណ្តាល តាកែវ ត្បូងឃ្មុំ កំពង់ចាម ស្វាយរៀង និងខេត្តព្រៃវែង បានចុះជួសជុលថែទាំលើផ្លូវជាតិសំខាន់ៗ នៅតាមបណ្ដាខេត្តរបស់ខ្លួន។

សកម្មភាពជួសជុលថែទាំជាប្រចាំនេះ ធ្វើនៅលើកំណាត់ផ្លូវទាំង​ឡាយណា ដែលបានខូចខាត និងមានជង្ហុកសំបុកមាន់ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ ឱ្យកាន់តែមានភាពងាយស្រួល និងការដឹកជញ្ជូនទំនិញឆ្លងកាត់ បានចំណេញពេលវេលា ចំណេញថវិកា ព្រមទាំងបង្កើននូវសោភ័ណភាព តាមដងផ្លូវផងដែរ៕