ដោយៈ ម៉ាលីនណា

    ភ្នំពេញៈ នៅទីបំផុតគម្រោងសាងសង់ផ្លូវ ខ្សែក្រវាត់ក្រុងខ្សែទី២ តភ្ជាប់ពីស្ពានមិត្តភាព កម្ពុជា-កូរ៉េ (ផ្សាររាត្រី-អរិយក្សត្រ) ឆ្ពោះទៅផ្លូវល្បឿនលឿនភ្នំពេញ-បាវិត ដោយបានបង្កើតនូវក្រុមការងារ អនុវត្តន៍គម្រោងរួចរាល់ ខណៈរង់ចាំតែថ្ងៃបើកការដ្ឋានតែប៉ុណ្ណោះ។

បើតាមផែនការ ការតភ្ជាប់ពីស្ពានមិត្តភាពកម្ពុជា-កូរ៉េ ទៅផ្លូវល្បឿនលឿន ភ្នំពេញ-បាវិត និងទៅស្ពានព្រែកតាមាក់។ គឺដើម្បីជំរុញកំណើនសេដ្ឋកិច្ចរបស់ប្រជាពលរដ្ឋ ដែលរស់នៅត្រើយខាងកើតរាជធានីភ្នំពេញ ពង្រីកការតភ្ជាប់ បង្រួមរយៈពេលធ្វើដំណើរ និងបង្កើតឱកាសការងារជូនដល់ប្រជាពលរដ្ឋ។

គម្រោងសាងសង់ស្ពានមិត្តភាពកម្ពុជា-កូរ៉េតម្លៃ២៤៥លានដុល្លារ តភ្ជាប់ពីចំណុច (ផ្សាររាត្រី-ជ្រោយចង្វារ- ជ្រោយចង្វារ-អរិយក្សត្រ) ត្រើយខាងលិចទន្លេសាប គ្រោងនឹងបើកការដ្ឋានសាងសង់ នៅអំឡុងពេលឆមាសទី១ ឆ្នាំ២០២៦ នាពេលខាងមុខនេះ។

គម្រោងសាងសង់ស្ពានមិត្តភាពកម្ពុជា-កូរ៉េ (ផ្សាររាត្រី-ជ្រោយចង្វារ,ជ្រោយចង្វារ-អរិយក្សត្រ) គឺជាស្ពានប្រភេទស្ពានបេតុងខ្សែកាបយោងខ្ពស់ សាងសង់ជា៤គន្លងប្រភេទA/C ទទឹងស្ពានមានប្រវែងសរុប២៧,៥ម៉ែត្រ និងទទឹងផ្លូវប្រវែង២២,៥ម៉ែត្រ ដែលមានមេដ្យាន៣ម៉ែត្រ និងចិញ្ចើមផ្លូវ៣ម៉ែត្រ ល្បឿនអតិបរមា៨០គ.ម/ម៉ោង។

ស្ពានមិត្តភាពកម្ពុជា-កូរ៉េ នឹងសាងសង់ឆ្លងកាត់ទន្លេសាប ស្ពានទី១៖ (ចំណុចចាប់ផ្តើមពីម្តុំសួនផ្សាររាត្រី (ផ្សារចាស់) ឆ្លងកាត់ទៅត្រើយម្ខាងជ្រោយចង្វារ (ក្បែរសណ្ឋាគារសុខា) មានប្រវែង១,១៩គ.ម និងស្ពានទី២៖ ឆ្លងកាត់ទន្លេមេគង្គ ចាប់ផ្តើមពីចំណុចត្រើយម្ខាងជ្រោយចង្វារ (ក្បែរសណ្ឋាគារសុខា) ឆ្ពោះទៅប្រសព្វនឹងផ្លូវលេខ៣៨០ ឃុំអរិយក្សត្រ (ក្រុងល្វាឯម/ខេត្តកណ្តាល) មានប្រវែង១,១៨គ.ម និងផ្លូវតភ្ជាប់ទៅផ្លូវប្រសព្វនឹងផ្លូវលេខ៣៨០ មានប្រវែង១,១៧គ.ម។

គម្រោងនេះ មានរយៈពេលអនុវត្តចំនួន៥ឆ្នាំ ២ខែ(៦២ខែ)និងរយៈពេលសាងសង់ចំនួន៣ឆ្នាំ៩ខែ(៤៧ខែ) វិនិយោគក្នុងទំហំទឹកប្រា​ក់ប្រមាណ២៤៥លានដុល្លារ ក្រោមហិរញ្ញប្បទានសហប្រតិបត្តិការពីរដ្ឋាភិបាលនៃសារធារណរដ្ឋកូរ៉េ៕

ដោយៈ និស្ស័យ

    ភ្នំពេញៈ ក្រុមមន្រ្តីបានបើកកិច្ចប្រជុំច្រកចេញ- ចូលតែមួយ” លើកទី១៦ ក្នុងឆ្នាំ២០២៥ ត្រូវបានរៀបចំឡើង ដើម្បីពិនិត្យពិភាក្សាលើសំណើសុំចុះបញ្ជី គម្រោងវិនិយោគមានលក្ខណៈ សម្បត្តិគ្រប់គ្រាន់ចំនួន៨គម្រោង។

កិច្ចប្រជុំពិនិត្យ និងពិភាក្សានេះ បានធ្វើឡើងនៅថ្ងៃទី៣០ ខែតុលា ឆ្នាំ២០២៥ គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានរៀបចំកិច្ចប្រជុំច្រកចេញចូលតែមួយ ដើម្បីពិនិត្យពិភាក្សាលើសំណើសុំចុះបញ្ជី គម្រោងវិនិយោគមានលក្ខណៈសម្បត្តិគ្រប់គ្រាន់ចំនួន ៨គម្រោង ក្រោមអធិបតីភាពលោកជា វុទ្ធី អគ្គលេ​ខាធិការគណៈកម្មាធិការវិនិយោគកម្ពុជា ដោយមានការអញ្ជើញចូលរួមពីសំណាក់តំណាងក្រសួង-ស្ថាប័ន និងរដ្ឋបាលរាជធានី-ខេត្តពាក់ព័ន្ធ។

គម្រោងវិនិយោគទាំងនេះ មានទុនវិនិយោគសរុបប្រមាណ ៧៤,៣លានដុល្លារអាម៉េរិក អាចបង្កើតការងារបានប្រមាណ៤,៤ពាន់កន្លែង និងមានមុខសញ្ញាវិនិយោគ ក្នុងវិស័យកសិ-ឧស្សាហកម្មចំនួន១គម្រោង (កែច្នៃកសិផល និងផលិតចំណីអាហារពីកសិផល) និងវិស័យឧស្សាហកម្មចំនួន៧គម្រោង (ផលិតឧបករណ៍តេស្ត (អគ្គិសនី និងសីតុណ្ហភាព) និងឧបករណ៍រង្វាស់ ផលិតសម្ភារៈសត្វចិញ្ចឹម (ពីប្លាស្ទិក) ផលិតសម្ភារៈបរិក្ខារប្រើប្រាស់ ក្នុងផ្ទះបាយគ្រប់ប្រភេទ ផលិតសម្ភារៈបន្ទាប់បន្សំរថយន្ត និងកប៉ាល់, ផលិតប្រដាប់ប្រដារក្មេងលេង និងផលិតសម្ភារៈបន្ទាប់បន្សំសម្រាប់ចង្ក្រាន្ត និងទូចង្ក្រាន្ត (ពីលោហធាតុកែច្នៃ)។

គម្រោងវិនិយោគទាំង៨ ដូចបានរៀបរាប់ខាងលើនេះ បានបោះទីតាំងនៅខេត្តតាកែវ កំពង់ស្ពឺ និងកំពង់ឆ្នាំង៕

ដោយ: សហសេវិក
អន្តរជាតិ: អារ៉ាប៊ីសាអូឌីតគ្រោងធ្វើពិពិធកម្មការវិនិយោគរបស់មូលនិធិវិនិយោគសាធារណៈ (PIF) ចំនួន៩២៥ពាន់លានដុល្លាររបស់ខ្លួនចេញពីគម្រោងអចលនទ្រព្យខ្នាតយក្ស ដែលប្រទេសនេះបានផ្តោតជាសំខាន់ក្នុងរយៈពេលមួយទសវត្សរ៍កន្លងមក។

ព្រះអង្គម្ចាស់ Mohammed bin Salman នាយករដ្ឋមន្ត្រីនៃប្រទេសអារ៉ាប៊ីសាអូឌីត បានដាក់ចេញនូវផែនការចក្ខុវិស័យឆ្នាំ២០៣០ (Vision 2030) កាលពីឆ្នាំ២០១៦ ដើម្បីធ្វើពិពិធកម្មសេដ្ឋកិច្ច ដោយផ្តោតលើគម្រោងអចលនទ្រព្យធំៗ។

យុទ្ធសាស្ត្រដើមដំបូង រួមមានការអភិវឌ្ឍទីក្រុង NEOM ដែលជាទីក្រុងអនាគតមួយនៅតំបន់វាលខ្សាច់ក្បែរសមុទ្រក្រហម និងផែនការធ្វើជាម្ចាស់ផ្ទះនៃការប្រកួតកីឡារដូវរងាអន្តរជាតិនៅតំបន់ភ្នំភាគខាងជើងនៃប្រទេសនេះ ដោយជម្រាលជិះស្គីភាគច្រើនប្រើប្រាស់ព្រិលសិប្បនិម្មិត។

គម្រោងទីក្រុងអនាគត NEOM ដែលមានបំណងផ្ទុកប្រជាជនប្រមាណ៩លាននាក់ និងគម្រោងអចលនទ្រព្យខ្នាតយក្សផ្សេងទៀតបានប្រឈមមុខនឹងការពន្យារពេលម្តងហើយម្តងទៀត។

ប្រភព ដែលស្នើសុំមិនបញ្ចេញឈ្មោះដោយសារបញ្ហានេះមានភាពរសើបបានទម្លាយប្រាប់កាសែត Reuters ថា ដើម្បីធានាបាននូវផលចំណេញរយៈពេលខ្លីប្រកបដោយចីរភាពសម្រាប់មូលនិធិ PIF យុទ្ធសាស្ត្រថ្មីនេះមានគោលបំណងងាកទៅវិនិយោគលើការអភិវឌ្ឍផ្សេងទៀត ដូចជាភស្តុភារកម្ម ការជីកខួងយករ៉ែ និងការទាក់ទាញភ្ញៀវទេសចរណ៍សាសនា។

ប្រភពដដែលបានបន្ថែមថា ប្រទេសអារ៉ាប៊ីសាអូឌីត ក៏កំពុងចាប់អារម្មណ៍ចំពោះការវិនិយោគលើបច្ចេកវិទ្យាបញ្ញាសិប្បនិម្មិត និងមជ្ឈមណ្ឌលទិន្នន័យ ដែលដំណើរការដោយថាមពលអុីដ្រូកាបូន និងធនធានថាមពលផ្សេងទៀតរបស់ខ្លួន៕ប្រភព: Reuters៕

ដោយៈ គង់ សូរិយា

    តាកែវ/កំពតៈ ផ្លូវជាតិលេខ៣១ (បែកគុស-កំពង់ត្រាច) គឺជាផ្លូវសេដ្ឋកិច្ចដ៏មានសក្តានុពល តភ្ជាប់ពីផ្លូវជាតិលេខ៣ ទៅកាន់ផ្លូវជាតិលេខ៣៣ ត្រង់ចំណុចប្រសព្វនៃស្រុកកំពង់ត្រាច និងតភ្ជាប់ទៅកាន់ច្រកទ្វារព្រំដែនអន្តរជាតិកម្ពុជា-វៀតណាម (ព្រែកចាក)។

ក្រសួងសាធារណការ និងដឹកជញ្ជូនបានឲ្យដឹងងា ផ្លូវនេះដើរតួនាទីយ៉ាងសំខាន់ ក្នុងការសម្រួលដល់ការធ្វើដំណើរ របស់បងប្អូនប្រជាពលរដ្ឋ ភ្ញៀវទេសចរ និងបម្រើដល់ការដឹកជញ្ជូនទំនិញគ្រប់ប្រភេទ និងកសិផល ទៅកាន់ទីផ្សារក្នុងស្រុក និងទីផ្សារអន្តរជាតិ។

ផ្លូវជាតិលេខ៣១ មានប្រវែងសរុបចំនួន៥៣,៥៣ គីឡូម៉ែត្រមានចំណុចចាប់ផ្ដើមពីបែកគុស (ចំណុចប្រសព្វផ្លូវជាតិលេខ៣) ទៅដល់ទីរួមស្រុកកំពង់ត្រាច (ចំណុចតភ្ជាប់ផ្លូវជាតិលេខ៣៣) ត្រូវបានស្ដារ និងលើកកម្រិតគុណភាព ជាប្រភេទផ្លូវក្រា​លបេតុងកៅស៊ូAC មានកម្រាស់៧សង់ទីម៉ែត្រ និងទទឹង១១ម៉ែត្រ និងបានសម្ពោធ បើកឱ្យប្រើប្រាស់ជាផ្លូវការ កាលពីថ្ងៃទី២៩ ខែមេសា ឆ្នាំ២០២៥៕