ដោយ: គង់ លាងហួរ
អន្តរជាតិ: ហ្វីលីពីនគ្រោងនឹងបន្តនាំចូលអង្ករបន្ថែមទៀតនៅឆ្នាំនេះ និងឆ្នាំក្រោយ ដោយរក្សាតំណែងជាប្រទេសនាំចូលអង្ករច្រើនជាងគេបំផុតរបស់ពិភពលោក ខណៈបាតុភូត El Niño បាតុភូត La Niña និងព្យុះទីហ្វុងថ្មីៗនេះបានជះផលប៉ះពាល់លើផលិតកម្មអង្ករក្នុងស្រុក។

យោងតាម​តាម​របាយការណ៍​ពី​ស្ថាប័នចំណុះក្រោមក្រសួង​កសិកម្ម​អាមេរិក​ (USDA)​ បានព្យាករណ៍ថា ការ​នាំ​ចូល​អង្ករ​របស់​ប្រទេស​ហ្វីលីពីននឹង​កើន​ឡើង​ដល់ទំហំ៤,៧លាន​តោន​នៅ​ឆ្នាំ​នេះ កើន​ឡើង២,២ភាគរយ​បើធៀប​នឹង​ការ​ព្យាករណ៍​ពី​មុន​ចំនួន៤,៦លាន​តោន ដោយ​សារហ្វីលីពីនកំពុងសម្រុក​ទិញ​អង្ករ​ពីប្រទេសវៀតណាម​ក្នុងបរិមាណយ៉ាង​ច្រើន។

ការនាំចូលអង្កររបស់ប្រទេសហ្វីលីពីនត្រូវបានគេរំពឹងថា នឹងបន្តកើនឡើងបន្ថែមទៀតដល់ទំហំ៤,៩លានតោននៅក្នុងឆ្នាំ២០២៥ខាងមុខ ដោយសារតែកសិករក្នុងស្រុកដាំដំណាំស្រូវកាន់តែតិចជាងមុន។ការណ៍នេះបង្ខំឱ្យរដ្ឋាភិបាលក្រុងម៉ានីលត្រូវបង្កើនការនាំចូលអង្ករ ដើម្បីបំពេញតម្រូវការក្នុងស្រុក។

ការព្យាករណ៍ថ្មីចុងក្រោយបង្អស់របស់ USDA កើតឡើង ខណៈមានការព្យាករណ៍ថា ការនាំចូលអង្ករទូទាំងពិភពលោកនឹងកើនឡើងនៅឆ្នាំនេះ ដែលបណ្តាលមកពីការកើនឡើងនៃតម្រូវការពីប្រទេសម៉ាឡេស៊ី និងនេប៉ាល់។

របាយការណ៍ខាងលើក៏បានព្យាករណ៍ថា ការនាំចូលអង្ករជាសកលនៅឆ្នាំក្រោយនឹងបន្តកើនឡើង ដោយសារកំណើនតម្រូវការពីទីផ្សារអាហ្រ្វិក និងប្រទេសមួយចំនួននៅតំបន់អាស៊ី ខណៈការផ្លាស់ប្តូរគោលនយោបាយពាណិជ្ជកម្មរបស់ឥណ្ឌាត្រូវបានគេរំពឹងថា នឹងជួយជំរុញការផ្គត់ផ្គង់អង្ករជាសកល និងធ្វើឱ្យតម្លៃអង្ករធ្លាក់ចុះ។

USDA បានប៉ាន់ប្រមាណថា ហ្វីលីពីននឹងផលិតអង្ករក្នុងស្រុកបានចំនួន១២,៧លានតោននៅឆ្នាំ២០២៤ ហើយការផលិតក្នុងស្រុកនឹងធ្លាក់ចុះមកនៅត្រឹម១២,៣លានតោននៅឆ្នាំក្រោយ។

យោងតាមទិន្នន័យរបស់រដ្ឋាភិបាលហ្វីលីពីនបានបង្ហាញថា បរិមាណនៃការនាំចូលអង្ករទៅក្នុងប្រទេសហ្វីលីពីនបានកើនឡើងជាលំដាប់ចាប់ពីឆ្នាំ២០១៩ ដល់ឆ្នាំ២០២២ មុនពេលធ្លាក់ចុះមកវិញនៅឆ្នាំ២០២៣កន្លងទៅ៕ប្រភព:Inquirer. net៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃ ក្នុងការជួញដូរនៅព្រឹកថ្ងៃសុក្រនេះ ដោយសារភាពតានតឹងនៅតំបន់មជ្ឈិមបូព៌ាបានជំរុញឱ្យតម្រូវការមាសកើនឡើង បន្ទាប់ពីក្រុម Hezbollah អះអាងថា ខ្លួននឹងបង្កើនកំដៅសង្គ្រាមជាមួយអុីស្រាអែល ហើយការបោះឆ្នោត​នៅ​សហរដ្ឋ​អាមេរិកក៏កាន់តែខិតជិតមកដល់។

តួយ៉ាង តម្លៃមាស Spot Gold បានងើបឡើង០,៥៤ភាគរយដល់២៧០៧,១៧ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,៥៩ភាគរយដល់២៧២៣,៦០ដុល្លារក្នុងមួយអោន គិតត្រឹមម៉ោង១០:៤៦នាទីព្រឹក។

គិតត្រឹមពេលបិទការជួញដូរកាលពីថ្ងៃព្រហស្បតិ៍ម្សិលមិញ តម្លៃមាស Spot Gold បានបិទនៅត្រឹម២៦៩២,៥៥ដុល្លារក្នុងមួយអោន ខណៈតម្លៃមាស U.S. gold futures បានបិទនៅត្រឹម២៧០៧,៥០ដុល្លារក្នុងមួយអោន។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាស៩៣ភាគរយ ដែលធនាគារកណ្តាលអាមេរិក(Fed) អាចនឹងបញ្ចុះអត្រាការប្រាក់ចំនួន០,២៥ភាគរយបន្ថែមទៀតក្នុងកិច្ចប្រជុំកំណត់គោលនយោបាយនាខែវិច្ឆិកាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិក ធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះមកនៅត្រឹម១០៣,៦៩ពិន្ទុគិតនៅត្រឹមម៉ោង១០:៤៩នាទីព្រឹកនេះ បន្ទាប់ពីបិទការជួញដូរត្រឹម១០៣,៨៣ពិន្ទុកាលពីថ្ងៃព្រហស្បតិ៍ម្សិលមិញ។

តម្លៃលោហៈធាតុប្រាក់ Spot silver បានងើបឡើង១,០៦%ដល់៣២,១១ដុល្លារ ក្នុងមួយអោន ខណៈតម្លៃផ្លាទីន បានងើបឡើង០,២៦%ដល់១០០៨,៤០ដុល្លារក្នុងមួយអោន ហើយតម្លៃ palladium បានងើបឡើង០,៧៧%ដល់១០៥៣,៥០ដុល្លារក្នុងមួយអោន គិតត្រឹមម៉ោង១០:៥០នាទីព្រឹក។

ភ្នំពេញ ថ្ងៃទី១៧ ខែតុលា ឆ្នាំ២០២៤៖ ធនាគារ ហត្ថា ដែលជាក្រុមហ៊ុនបុត្រសម័្ពន្ធរបស់ ធនាគារ ក្រុងស្រ៊ី ដែលជាធនាគារពាណិជ្ជធំជាងគេលំដាប់ទី៥ នៅក្នុងប្រទេសថៃ និងជាសមាជិកនៃសម្ព័ន្ធហិរញ្ញវត្ថុអន្តរជាតិ MUFG មានមោទនភាពក្នុងការប្រកាសពីការបញ្ចប់ដោយជោគជ័យ និងការប្រគល់-ទទួលអគារការិយាល័យកណ្តាលថ្មីរបស់ខ្លួន ដែលត្រូវបានគូសប្លង់ និងសាងសង់ឡើងដោយក្រុមហ៊ុន ស៊ីអឹមអីុឌី ខនស្ត្រាក់សិន។ ពិធីប្រគល់-ទទួលជាផ្លូវការដែលបានធ្វើឡើងនៅថ្ងៃនេះ គឺជាព្រឹត្តិការណ៍ដ៏សំខាន់មួយសម្រាប់ធនាគារ ហត្ថា ក្នុងការទទួលបានកម្មសិទ្ធិ និងការគ្រប់គ្រងប្រតិបត្តិការនៃអគារពេញលេញ។

ជាងនេះទៅទៀត អគារដ៏ទំនើបនេះ ដែលមានទីតាំងស្ថិតនៅលើមហាវិថីសម្តេចតេជោ ហ៊ុន សែន (ផ្លូវ៦០ម៉ែត្រ) ក្នុងរាជធានីភ្នំពេញ គឺជាសក្ខីភាពដ៏រឹងមាំនៃការប្តេជ្ញាចិត្តរបស់ធនាគារ ហត្ថា ចំពោះប្រទេសកម្ពុជា។ ព្រឹត្តិការណ៍នេះមានការចូលរួមពីសំណាក់ថ្នាក់ដឹកនាំជាន់ខ្ពស់របស់ធនាគារ ហត្ថា និង ក្រុមហ៊ុន ស៊ីអឹមអីុឌី ខនស្ត្រាក់សិន ដែលឆ្លុះបញ្ចាំងពីភាពជាដៃគូ និងកិច្ចសហការដ៏រឹងមាំ ដែលបានធ្វើឱ្យគម្រោងអគារនេះមានរូបរាងឡើង។

នៅក្នុងបរិបទនេះ លោក មិន សុផា ប្រធាននាយកប្រតិបត្តិ នៃធនាគារ ហត្ថា បានមានប្រសាសន៍ថា “ការិយាល័យកណ្តាលថ្មីនេះ មិនត្រឹមតែជាអគារការិយាល័យធ្វើការប៉ុណ្ណោះទេ ប៉ុន្តែផ្តល់នូវឱកាស និងជាសក្ខីភាពចំពោះចក្ខុវិស័យ និងគុណតម្លៃដែលជំរុញធនាគារ ហត្ថា ឱ្យមានវឌ្ឍនភាពទៅមុខ”។ លោកបានបន្ថែមថា “អគារការិយាល័យកណ្តាលថ្មីនេះ នឹងដើរតួជាបណ្តុំនៃប្រតិបត្តិការរបស់យើង ដែលអាចឱ្យយើងបម្រើអតិថិជនបានកាន់តែប្រសើរ ជំរុញនវានុវត្តភាព​​ និងបង្កើតកន្លែងធ្វើការងារដ៏ប្រសើរដែលបុគ្គលិករបស់យើងអាចបន្តផ្តល់នូវផលិតផល និងសេវាកម្មដ៏ល្អឥតខ្ចោះសម្រាប់អតិថិជនរបស់យើង”។

ក្រុមហ៊ុន ស៊ីអឹមអីុឌី ខនស្ត្រាក់សិន បានទទួលសិទ្ធិផ្នែកគូសប្លង់ និងសាងសង់សម្រាប់គម្រោងនេះ។ នាយិកាគ្រប់គ្រងនៃក្រុមហ៊ុន ស៊ីអឹមអីុឌី ខនស្ត្រាក់សិន លោកស្រី ជេននី ជា សុខយូ មានប្រសាសន៍ថា “អគារនេះត្រូវបានរចនា និងសាងសង់ដោយគិតគូរពីប្រតិបត្តិករអគារ ដោយបំពេញតាមស្តង់ដារអន្តរជាតិ និងគោរពតាមមាត្រដ្ឋានអគារ BS Code”។ ជាការទទួលស្គាល់ចំពោះសមិទ្ធិផលរបស់គម្រោង លោកស្រីបានបន្ថែមថា អគារនេះគឺជា “អគារទីមួយក្នុងប្រទេសកម្ពុជាដែលបំពេញតាមតម្រូវការរបស់ក្រសួងបរិស្ថានយ៉ាងពេញលេញ ដោយអនុលោមតាមស្តង់ដាររោងចក្របន្សុទ្ធទឹកទំហំអង្កត់ផ្ចិត១០ (STP) ហើយត្រូវបានបញ្ជាក់ដោយ Green Mark ដែលបង្ហាញពីការប្តេជ្ញាចិត្តចំពោះនិរន្តរភាព និងការទទួលខុសត្រូវបរិស្ថាន”។ ដោយសារសុវត្ថិភាពគឺជាអាទិភាពចម្បងរបស់ CMED សម្រាប់គម្រោងទាំងអស់ លោកស្រីមានសេចក្តីសោមនស្សរីករាយក្នុងការនិយាយថា “គម្រោងនេះសម្រេចបានដោយគ្មានគ្រោះថ្នាក់ការងារទាំងអស់ ដែលជាសក្ខីភាពមួយចំពោះពិធីសារសុវត្ថិភាពដ៏តឹងរឹង និងការយកចិត្តទុកដាក់គ្រប់ជ្រុងជ្រោយនៅគ្រប់ដំណាក់កាលសាងសង់ទាំងអស់”។

ធនាគារ ហត្ថា មានការវិវត្តជាច្រើនដំណាក់កាលចាប់តាំងពីការចាប់ផ្តើមរបស់ខ្លួន ដោយបានកម្លាយខ្លួនដោយជោគជ័យពីគ្រឹះស្ថានមីក្រូហិរញ្ញវត្ថុមួយ ទៅជាធនាគារពាណិជ្ជឈានមុខគេមួយនៅក្នុងប្រទេសកម្ពុជា។ ការបញ្ចប់ការិយាល័យកណ្តាលថ្មីដ៏លេចធ្លោនេះ គឺជានិមិត្តរូបនៃការយកចិត្តទុកដាក់របស់ធនាគារ ហត្ថា ចំពោះវិបុលភាព ឧត្តមភាពសេវាកម្ម និងនវានុវត្តភាព។ វាបង្ហាញពីការប្តេជ្ញាចិត្តក្នុងការផ្តល់ជូនអតិថិជននូវសេវាកម្មប្រកបដោយបទដ្ឋានខ្ពស់បំផុត ការបង្កើត និងផ្តល់នូវបរិយាកាសការងារដ៏ប្រសើរសម្រាប់បុគ្គលិករបស់ខ្លួន បន្ថែមពីលើការរួមចំណែកក្នុងការអភិវឌ្ឍវិស័យធនាគាររបស់កម្ពុជា។

ជាមួយនឹងការិយាល័យកណ្តាលថ្មីនេះ ធនាគារ ហត្ថានឹងសម្រេចបាននូវសមិទ្ធផលកាន់តែអស្ចារ្យមួយកម្រិតទៀត និងបង្កើតនូវគុណតម្លៃយូរអង្វែងសម្រាប់អតិថិជន បុគ្គលិក ព្រមទាំងភាគទុនិករបស់ខ្លួនផងដែរ។

អំពី ធនាគារ ហត្ថា

ធនាគារ ហត្ថា ជាធនាគារពាណិជ្ជដែលមានវត្តមាននៅក្នុងព្រះរាជាណាចក្រកម្ពុជាអស់រយៈកាល៣០ឆ្នាំមកហើយ   ផ្តល់ជូនសេវាហិរញ្ញវត្ថុយ៉ាងទូលំទូលាយដល់អតិថិជនរបស់ខ្លួន។ គិតត្រឹមដំណាច់ឆ្នាំ២០២៣ ធនាគារ ហត្ថា កំពុងកាន់កាប់តំណែងជាធនាគារពាណិជ្ជធំជាងគេលំដាប់ទី៤ផ្អែកលើការិយាល័យប្រតិបត្តិការរបស់ខ្លួន។ ធនាគារ ហត្ថា ជាក្រុមហ៊ុនបុត្រសម្ព័ន្ធរបស់ ធនាគារ​​ ក្រុងស្រ៊ី ដែលជាសម្ព័ន្ធហិរញ្ញវត្ថុធំបំផុតលំដាប់ទី៥ នៅក្នុងព្រះរាជាណាចក្រថៃឡង់ដ៍ ដែលមានអាយុកាលអាជីវកម្មជាង ៧៨ឆ្នាំ។ ធនាគារ ក្រុងស៊្រី ជាសមាជិកយុទ្ធសាស្ត្រនៃសម្ព័ន្ធហិរញ្ញវត្ថុអន្តរជាតិ MUFG Financial Group ដែលជាសម្ព័ន្ធហិរញ្ញវត្ថុធំជាងគេនៅក្នុងប្រទេសជប៉ុន និងធំបំផុតមួយនៅក្នុងពិភពលោក។

សូមបញ្ជាក់ថាធនាគារ ហត្ថា​ បានទទួលការវាយតម្លៃជាស្ថាប័នមានស្ថិរភាពហិរញ្ញវត្ថុរឹងមាំ តាមរយៈការរក្សាបាននូវចំណាត់ថ្នាក់ BBB+ អស់រយៈពេល០៦ឆ្នាំ ជាប់គ្នា ពីក្រុមហ៊ុន TRIS Rating ដែលចំណាត់ថ្នាក់នេះសបញ្ជាក់ឱ្យឃើញថា ធនាគារ ហត្ថា មានដំណើរការមុខជំនួញរបស់ខ្លួនប្រកបដោយស្ថិរភាព និងឈរជើងឈានមុខគេនៅក្នុងទីផ្សារហិរញ្ញវត្ថុកម្ពុជា។ បន្ថែមជាងនេះទៀត ធនាគារ ហត្ថា ទទួលបានការគាំទ្រយ៉ាងពេញទំហឹងពីសំណាក់ធនាគារ​ ក្រុងស្រ៊ី ដែលជាភាគទុនិករបស់ខ្លួន ដែលរួមចំណែកជំរុញឱ្យធនាគារ​ ហត្ថា មានធនធានគ្រប់គ្រាន់ និងមានភាពរឹងមាំយ៉ាងខ្លាំងផ្នែកហិរញ្ញវត្ថុ ក្នុងប្រតិបត្តិការអាជីវកម្មរបស់ខ្លួន។

ដោយ: គង់ លាងហួរ
អន្តរជាតិ: មូលនិធិរូបិយវត្ថុអន្តរជាតិ(IMF) បានព្យាករណ៍ថា បំណុលសាធារណៈសរុបរបស់ពិភពលោកនឹងកើនឡើងដល់ទំហំទឹកប្រាក់លើស១០០ទ្រីលានដុល្លារជាលើកដំបូងនៅឆ្នាំនេះ ហើយអាចនឹងកើនឡើងលឿនជាងការព្យាករណ៍។

របាយការណ៍តាមដានសារពើពន្ធថ្មីចុងក្រោយរបស់ IMF បានបង្ហាញថា បំណុលសាធារណៈសកលនឹងកើនឡើងដល់ចំនួន៩៣% នៃផលទុនជាតិសរុប(GDP)របស់ពិភពលោកនៅចុងឆ្នាំ២០២៤ និងបន្តកើនឡើងដល់១០០%នៃ GDP សកលនៅឆ្នាំ២០៣០។

បំណុលសាធារណៈសរុបរបស់ពិភពលោកធ្លាប់បានកើនឡើងដល់ចំនួន៩៩ភាគរយនៃទំហំផលទុនជាតិសរុប(GDP) របស់ពិភពលោកក្នុងកំឡុងពេលផ្ទុះវិបត្តិជំងឺកូវីដ-១៩ ដែលបានបង្ខំឱ្យរដ្ឋាភិបាលទូទាំងពិភពលោកបង្កើនថវិកាចំណាយដើម្បីទប់ទល់នឹងវិបត្តិ។នេះបើយោងតាមការដកស្រង់ដោយសារពត៌មាន Reuters។

ការព្យាករណ៍នេះត្រូវបានចេញផ្សាយមួយសប្តាហ៍ មុនពេលដែលមូលនិធិ IMF និងធនាគារពិភពលោករៀបចំកិច្ចប្រជុំប្រចាំឆ្នាំនៅទីក្រុងវ៉ាស៊ីនតោន។ មូលនិធិ IMF ជឿថា កម្រិតបំណុលនាពេលអនាគតអាចមានអត្រាខ្ពស់ជាងការព្យាករណ៍នាពេលបច្ចុប្បន្ន ខណៈប្រជាជនអាមេរិកមានបំណងចំណាយប្រាក់កាន់តែច្រើន។

IMF បានគូសបញ្ជាក់នៅក្នុងរបាយការណ៍នេះថា ភាពមិនប្រាកដប្រជានៃគោលនយោបាយសារពើពន្ធបានកើនឡើង ហើយបន្ទាត់ក្រហមនយោបាយស្តីពីការយកពន្ធកាន់តែមានភាពរឹងមាំ។

ជាមួយគ្នានេះ សម្ពាធលើការចំណាយដើម្បីដោះស្រាយការផ្លាស់ប្តូរទៅរកភាពបៃតង កំណើននៃចំនួនប្រជាជនមានវ័យចំណាស់ បូករួមទាំងការព្រួយបារម្ភអំពីសុវត្ថិភាព និងបញ្ហាប្រឈមនៃការអភិវឌ្ឍន៍រយៈពេលវែងក៏កំពុងកើនឡើងផងដែរ។

ក្តីបារម្ភរបស់មូលនិធិ IMF អំពីការកើនឡើងនៃកម្រិតបំណុលសកលកើតឡើង មុនការបោះឆ្នោតប្រធានាធិបតីសហរដ្ឋអាមេរិកចូលមកដល់ក្នុងពេលឆាប់ៗនេះ។ បេក្ខជនទាំង២ ទាំងខាងគណបក្សសាធារណៈរដ្ឋ និងគណបក្សប្រជាធិបតេយ្យ បានប្តេជ្ញាកាត់បន្ថយពន្ធដែលការណ៍នេះអាចធ្វើឱ្យឱនភាពរបស់រដ្ឋាភិបាលសហព័ន្ធកើនឡើងរាប់ពាន់លានដុល្លារ។

បំណុលក៏នឹងអាចកើនឡើងបន្ថែមទៀយដោយសារការថយចុះនៃកំណើនសេដ្ឋកិច្ចសកល លក្ខខណ្ឌហិរញ្ញវត្ថុកាន់តែតឹងរ៉ឹង និងភាពមិនច្បាស់លាស់នៃគោលនយោបាយសារពើពន្ធ និងរូបិយវត្ថុកាន់តែច្រើននៅក្នុងប្រទេសមហាអំណាច ដូចជាសហរដ្ឋអាមេរិក និងប្រទេសចិន៕ប្រភព: Reuters៕