ដោយ: គង់ លាងហួរ
អន្តរជាតិ: បណ្តាប្រទេសអាស៊ានចំនួន៥ បានប្រកាសពីការឯកភាពចែករំលែកទិន្នន័យអាកាសចរណ៍ និងព័ត៌មានឱ្យគ្នាទៅវិញទៅមក ព្រមទាំងរាយការណ៍ក្នុងករណីមានភាពចលាចលធ្ងន់ធ្ងរ ដើម្បីជួយធ្វើឱ្យការធ្វើដំណើរតាមផ្លូវអាកាសកាន់តែមានសុវត្ថិភាព។

អាជ្ញាធរអាកាសចរណ៍ស៊ីវិលរបស់ប្រទេសទាំង៥បានបញ្ជាក់នៅក្នុងសេចក្តីថ្លែងការណ៍រួមមួយថា ប្រទេសឥណ្ឌូនេស៊ី ម៉ាឡេស៊ី ហ្វីលីពីន សិង្ហបុរី និងថៃបានចុះហត្ថលេខាលើអនុស្សរណៈនៃការយោគយល់គ្នាមួយក្នុងគោលបំណងចាប់ផ្តើមអនុវត្តន៍ផែនការនេះនៅចុងឆ្នាំ២០២៤។

កិច្ចព្រមព្រៀងនេះកើតឡើង ស្របពេលដែលការធ្វើដំណើរតាមផ្លូវអាកាសបាននិងកំពុងបន្តស្ទុះងើបឡើងវិញពីផលប៉ះពាល់នៃវិបត្តិជំងឺរាតត្បាតកូវីដ-១៩ ដែលបានរំខានដល់វិស័យទេសចរណ៍ក្នុងតំបន់នារយៈពេលប៉ុន្មានឆ្នាំកន្លងទៅ។

គំនិតផ្តួចផ្តើមនេះត្រូវបានលើកយកទៅពិភាក្សាកាលពីឆ្នាំមុន។ ប៉ុន្តែ ប្រទេសអាស៊ានទាំង៥ បានចំណាយពេលវេលាយូរ មុនពេលឈានដល់ការឯកភាពគ្នាលើទិន្នន័យដែលត្រូវចែករំលែក និងបង្កើតពិធីការ ដើម្បីគ្រប់គ្រងការសម្ងាត់របស់ទិន្នន័យ។

សេចក្តីថ្លែងការណ៍រួមបានលើកឡើងថា “នេះជាគំនិតផ្តួចផ្តើមដំបូងគេបង្អស់នៅក្នុងតំបន់អាស៊ីប៉ាស៊ីហ្វិក រដ្ឋទាំង៥គ្រោងសហការ និងចែករំលែកទិន្នន័យ និងព័ត៌មានសុវត្ថិភាពដើម្បីកំណត់អត្តសញ្ញាណគ្រោះថ្នាក់ និងនិន្នាការ ព្រមទាំងបង្កើតវិធានការកាត់បន្ថយហានិភ័យដើម្បីគ្រប់គ្រងប្រព័ន្ធសុវត្ថិភាពឱ្យបានកាន់តែប្រសើរឡើង”។

ប្រទេសទាំង៥បានកំណត់ប្រភេទទិន្នន័យដំបូងចំនួន៧ ដែលត្រូវចែករំលែកគ្នាទៅវិញទៅមក រួមមានទាំងការព្រមានពីការប៉ះទង្គិចគ្នា គម្លាតពីរយៈកម្ពស់ដែលកំណត់ដោយអ្នកត្រួតពិនិត្យចរាចរណ៍ផ្លូវអាកាស និងការធ្វើឱ្យប្រសើរឡើងនូវប្រព័ន្ធបញ្ជូនសញ្ញាព្រមាន។

ចំណែក សេចក្តីរាយការណ៍ពត៌មានអំពីស្ថានភាពខ្យល់កួចធ្ងន់ធ្ងរ ខ្យល់បោកបក់ ការវាយប្រហារដោយក្រុមហ្វូងសត្វបក្សី និងការដឹកជញ្ជូនទំនិញដែលមានគ្រោះថ្នាក់ក៏នឹងត្រូវបានចែករំលែកទៅវិញទៅមកផងដែរ។

យោងតាមសេចក្តីថ្លែងការណ៍ខាងលើបានបន្តឱ្យដឹងទៀតថា អាជ្ញាធរអាកាសចរណ៍ស៊ីវិលនៃប្រទេសថៃនឹងដើរតួជាអ្នកទទួលខុសត្រូវលើការថែរក្សាទុកទិន្នន័យ ហើយប្រទេសសិង្ហបុរីនឹងដើរតួជាអ្នកវិភាគទិន្នន័យ៕ប្រភព: AFP៕

ដោយ: គង់ លាងហួរ
ហាណូយ: ប្រទេសវៀតណាមកំពុងបង្កើនកិច្ចខិតខំប្រឹងប្រែង ដូចជាការបញ្ចុះតម្លៃសណ្ឋាគារ ដើម្បីទាក់ទាញភ្ញៀវទេសចរណ៍ត្រឡប់ទៅកាន់ខេត្ត Ha Giang ក្រោយពីខេត្តមួយនេះរងការវាយប្រហារយ៉ាងធ្ងន់ធ្ងរដោយសារព្យុះកំណាចទីហ្វុង Yagi។

លោក Lai Quoc Tinh ប្រធានសមាគមទេសចរណ៍ខេត្ត Ha Giang បានប្រកាសក្នុងព្រឹត្តិការណ៍ផ្សព្វផ្សាយទេសចរណ៍នៅទីក្រុងហាណូយថា “សណ្ឋាគារនឹងផ្តល់ការបញ្ចុះតម្លៃពី ១០%ទៅ៣០% ដល់ដំណាច់រដូវកាលសម្បូរភ្ញៀវទេសចរណ៍(Peak season)”។

លោក​បាន​បន្ត​ថា សណ្ឋាគារ និង​ផ្ទះ​សំណាក់​ក្នុង​ខេត្ត​ Ha Giang បាន​ត្រៀម​ខ្លួន​រួចជា​ស្រេច​សម្រាប់​ស្វាគមន៍ភ្ញៀវ​ទេសចរណ៍មកកំសាន្ត និងស្នាក់នៅ។

រដូវកាលសម្បូរភ្ញៀវទេសចរណ៍នៅខេត្ត Ha Giang ដែលជាតំបន់ភ្នំនៅក្នុងប្រទេសវៀតណាម រួមមាននៅនិទាឃរដូវ និងរដូវស្លឹកឈើជ្រុះ ចាប់ពីខែមីនាដល់ខែឧសភា និងចាប់ពីខែកញ្ញាដល់ខែវិច្ឆិកា។

ចាប់តាំងពីដើមខែតុលា ភ្នាក់ងារទេសចរណ៍ជាច្រើនបានធ្វើដំណើរទៅកាន់ខេត្ត Ha Giang ដើម្បីវាយតម្លៃស្ថានភាព។ ខេត្ត​នេះបាន​ដាំ​ផ្កា Buckwheat ឡើងវិញជាថ្មី និង​ជួសជុល​រមណីយដ្ឋាន​ទេសចរណ៍​សំខាន់ៗ និង​ទីតាំង​សម្គាល់​ប្រវត្តិសាស្ត្រ។

ខេត្ត​នេះ​បានរង​ផល​ប៉ះពាល់​យ៉ាង​ខ្លាំង​ដោយ​សារទឹក​ជំនន់​ក្នុង​ខែ​សីហា និង​ព្យុះ​ទីហ្វុង Yagi ក្នុង​ខែ​កញ្ញា។ ភ្ញៀវទេសចរណ៍ជាច្រើនបានសម្រុកលុបចោលការធ្វើដំណើររបស់ពួកគេក្នុងខែកញ្ញា ដែលបណ្តាលឱ្យភោជនីយដ្ឋានមួយចំនួននៅខេត្ត Ha Giang ត្រូវបង្ខំចិត្តបិទទ្វារ ដោយសារតែកង្វះអតិថិជន និងប្រាក់ចំណូលធ្លាក់ចុះ។

ចំនួនភ្ញៀវទេសចរណ៍ ដែលបានចូលមកទស្សនាក្នុងអំឡុងពេលនេះភាគច្រើនជាជនបរទេស ដោយសារប្រជាជនក្នុងស្រុកនៅតែព្រួយបារម្ភអំពីសុវត្ថិភាពរបស់ពួកគេ បន្ទាប់ពីរងគ្រោះដោយទឹកជំនន់ និងព្យុះទីហ្វុងនាពេលថ្មីៗនេះ។

លោក Nguyen Hong Hai ប្រធានមន្ទីរវប្បធម៌ កីឡា និងទេសចរណ៍ខេត្ត Ha Giang បានមានប្រសាសន៍ឱ្យដឹងថា យើងបានដាក់ចេញវិធានការសុវត្ថិភាពចាំបាច់ទាំងអស់ ហើយយើងមិនមានការរឹតបន្តឹងការធ្វើដំណើរនោះទេ។

ក្នុងឆ្នាំ២០២៣ ខេត្ត Ha Giang បានទាក់ទាញភ្ញៀវទេសចរណ៍ជាង៣លាននាក់ ដោយបង្កើតប្រាក់ចំណូលជិត៧,១ទ្រីលានដុង (ប្រហែល២៩៥លានដុល្លារអាមេរិក) និងចូលរួមចំណែកចំនួន១០%ទៅក្នុងផលទុនជាតិសរុប (GDP)របស់ខេត្តនៃតំបន់ភ្នំមួយនេះ៕ប្រភព: Vnexpress ៕

ដោយ: គង់ លាងហួរ
អន្តរជាតិ: ប្រព័ន្ធផ្សព្វផ្សាយក្នុងស្រុកជប៉ុនបានរាយការណ៍ថា ប្រទេសជប៉ុនត្រូវបានព្យាករណ៍ថា នឹងប្រឈមមុខនឹងកង្វះកម្លាំងពលកម្ម ដែលស្មើនឹង៣,៨៤លាននាក់នៅត្រឹមឆ្នាំ២០៣៥ខាងមុខ។នេះបើយោងតាមការដកស្រង់ចុះផ្សាយបន្តដោយទីភ្នាក់ងារសារពត៌មានចិន Xinhua។

យោងតាមរបាយការណ៍របស់ស្ថាប័នស្រាវជ្រាវ Persol Research and Consulting និងសាកលវិទ្យាល័យ Chuo បានព្យាករណ៍ថា កង្វះកម្លាំងពលកម្មនៅប្រទេសជប៉ុននឹងកើនឡើង១,៨៥ដងធៀបនឹងឆ្នាំ២០២៣។ វិបត្តិនេះបណ្តាលមកពីការថយចុះនៃម៉ោងធ្វើការរបស់បុគ្គល ដោយសារតែការកែទម្រង់បែបបទការងារ និងវិធានការផ្សេងទៀត ក្នុងគោលបំណងកែលម្អតុល្យភាពជីវិតការងារ។

ចំនួនកម្លាំងពលកម្ម ត្រូវបានគេរំពឹងថានឹងកើនឡើងពី៦៧,៤៧លាននាក់ក្នុងឆ្នាំ២០២៣ ដល់៧១,២២លាននាក់ក្នុងឆ្នាំ២០៣៥ ដោយរួមមានស្ត្រី កម្មករវ័យចាស់ជរា និងលំហូរជនបរទេសកាន់តែច្រើនចូលក្នុងទីផ្សារការងារជប៉ុន។ទោះបីជាចំនួនកម្លាំងពលកម្មត្រូវបានព្យាករណ៍ថា នឹងកើនឡើងយ៉ាងណាក្តី ក៏ចំនួននេះនៅតែមិនអាចបំពេញកំណើននៃតម្រូវការបានគ្រប់គ្រាន់នោះទេ។

ជាមួយគ្នានេះ ចំនួន​ពលករ​បរទេស​ត្រូវ​បាន​គេ​ព្យាករ​ណ៍ថា​ នឹង​កើន​ឡើង​ពី​២,០៥​លាន​ដល់​៣,៧៧​លាន​នាក់​នៅឆ្នាំ២០៣៥។

ទោះជាយ៉ាងណាក្តី ចំនួនម៉ោងធ្វើការជាមធ្យមប្រចាំឆ្នាំក្នុងមនុស្សម្នាក់ត្រូវបានគេរំពឹងថា នឹងធ្លាក់ចុះ៨,៨ភាគរយនៅឆ្នាំ២០៣៥ខាងមុខ ដោយសារតែការកើនឡើងនៃចំនួនពលករដែលមានវ័យចំណាស់ និងការអនុវត្តន៍កំណែទម្រង់ក្នុងវិស័យការងារ។

ដើម្បីកាត់បន្ថយបញ្ហាខ្វះខាតកម្លាំងពលកម្ម របាយការណ៍បានផ្តល់ជាអនុសាសន៍លើកំណែទម្រង់ រួមទាំងការកែសម្រួលប្រព័ន្ធពន្ធ និងរបបសន្តិសុខសង្គម ដើម្បីទប់ស្កាត់ការកាត់បន្ថយម៉ោងធ្វើការ ការលើកទឹកចិត្តការងារ និងការបង្កើនផលិតភាព ជាពិសេសតាមរយៈការច្របាច់រួមបញ្ចូលនូវបច្ចេកវិទ្យាបញ្ញាសិប្បនិម្មិត៕ប្រភព: Xinhua៕

ដោយ: គង់ លាងហួរ
អន្តរជាតិ: លោកស្រី Kristalina Georgieva នាយិកាគ្រប់គ្រងមូលនិធិរូបិយវត្ថុអន្តរជាតិ(IMF) បានអះអាងថា ប្រទេសចិនមិនអាចបន្តពឹងផ្អែកលើការនាំចេញដើម្បីជំរុញសេដ្ឋកិច្ចរបស់ខ្លួនបានទៀតនោះទេ លុះត្រាតែចិនងាកឆ្ពោះទៅរកគម្រូសេដ្ឋកិច្ច ដែលជំរុញដោយអ្នកប្រើប្រាស់។

លោកស្រី Georgieva បានថ្លែងប្រាប់សារពត៌មាន Reuters នៅក្នុងបទសម្ភាសន៍មួយថា កំណើនសេដ្ឋកិច្ចរបស់ប្រទេសចិនអាចធ្លាក់ចុះមកនៅក្រោម៤% ក្នុងរយៈពេលមធ្យម ប្រសិនបើចិនបន្តដើរនៅលើផ្លូវបច្ចុប្បន្នរបស់ខ្លួន។តួលេខនៃកំណើននេះជាកម្រិតមួយដ៏ទាប ដែលនឹងបង្កការលំបាកដល់ប្រទេសចិន និងទស្សនៈក្នុងសង្គម។

ភាពតានតឹងផ្នែកពាណិជ្ជកម្មជុំវិញបញ្ហាលំហូរទំនិញថោកៗចេញពីប្រទេសចិននឹងក្លាយជាប្រធានបទដ៏ក្តៅ ក្នុងកិច្ចប្រជុំប្រចាំឆ្នាំរបស់មូលនិធិ IMF និងធនាគារពិភពលោកនៅទីក្រុងវ៉ាស៊ីនតោន។ លោកស្រី Georgieva បានអះអាងថា កំណើនសេដ្ឋកិច្ចចិន​អាច​នឹង​កើនឡើង​ក្នុង​អត្រា​កាន់តែ​ខ្ពស់​ ប្រសិនបើ​ចិនធ្វើ​ការផ្លាស់ប្តូរ​ដើម្បី​ផ្តល់​ទំនុកចិត្ត​ដល់​អ្នកប្រើប្រាស់​ឱ្យចំណាយ​ប្រាក់កាន់តែច្រើន​។

លោកស្រី Georgieva បានអះអាងថា “ប្រទេសចិនបានដើរដល់ផ្លូវបំបែកហើយ។ ដូច្នេះចិនត្រូវសម្រេចចិត្តថា តើខ្លួនគួរដើរលើផ្លូវមួយណា?។ ប្រសិនបើចិនបន្តដើរលើផ្លូវបច្ចុប្បន្ន ដោយនៅតែពឹងផ្អែកលើការនាំចេញ នោះប្រាកដជានឹងមានបញ្ហា ដោយ​សារ​តែ​សេដ្ឋកិច្ច​ចិន​បាន​រីក​ចម្រើន​ដល់​ចំណុច​មួយ​ ដែល​ការ​នាំ​ចេញ​ទំនិញរបស់​ចិន​មិនមែនជា​រឿង​ ឬចំណែកដ៏តូចនៅក្នុង​ទំហំពាណិជ្ជកម្ម​របស់ពិភពលោក​ដូចកាលពីមុនទៀតនោះទេ”។

លោកស្រី Georgieva បានលើកទឹកចិត្តថា ការប្រកាសដាក់ចេញផែនការជំរុញសារពើពន្ធនាពេលថ្មីៗនេះរបស់ប្រទេសចិនមានទិសដៅត្រឹមត្រូវ ក្នុងគោលបំណងស្តារឡើងវិញនូវទំនុកចិត្តរបស់អ្នកប្រើប្រាស់ ដែលត្រូវបានបំផ្លាញដោយវិបត្តិអចលនទ្រព្យអស់រយៈពេលជាច្រើនឆ្នាំ។

ការដាំក្បាលចុះនៃតម្រូវការប្រើប្រាស់ក្នុងប្រទេសចិន បានបង្វែរទិន្នផលផលិតកម្មជាច្រើនរបស់ចិនទៅជាការនាំចេញ ដែលនាំឱ្យសហរដ្ឋអាមេរិក សហភាពអឺរ៉ុប និងបណ្តាប្រទេសដទៃទៀតបង្កើនរបាំងពន្ធគយដើម្បីការពារកម្មករ និងក្រុមហ៊ុនក្នុងស្រុករបស់ពួកគេ ក្នុងវិស័យនានាដូចជារថយន្តអគ្គិសនីជាដើម។

លោកស្រី Georgieva បានមានប្រសាសន៍ឱ្យដឹងបន្តថា ប្រទេសចិនចាំបាច់ត្រូវធ្វើកំណែទម្រង់ស៊ីជម្រៅ ដើម្បីធ្វើពិពិធកម្មសេដ្ឋកិច្ចរបស់ខ្លួនទៅជាសេដ្ឋកិច្ចដែលពឹងផ្អែកលើការប្រើប្រាស់ក្នុងស្រុក ជំនួសឱ្យការនាំចេញ។

សេដ្ឋវិទូជាន់ខ្ពស់រូបនេះបានផ្តល់អនុសាសន៍ថា ការកែទម្រង់ដើម្បីជំរុញការប្រើប្រាស់របស់ប្រជាជនចិន រួមមានកំណែទម្រង់ប្រាក់សោធននិវត្តន៍ និងការបង្កើតបណ្តាញសុវត្ថិភាពសង្គម ដើម្បីកាត់បន្ថយការសន្សំប្រាក់ទុកជាមុន ហើយប្រទេសចិនក៏គួរបោះទុនវិនិយោគលើវិស័យសេដ្ឋកិច្ចផ្សេងទៀត រួមទាំងការថែទាំសុខភាព និងការអប់រំ៕ប្រភព: Reuters៕

ដោយ: គង់ លាងហួរ
សេអ៊ូល: ប្រធានាធិបតីកូរ៉េខាងត្បូងលោក Yoon Suk Yeol បានប្រកាសថា រដ្ឋាភិបាលរបស់លោកគ្រោងនឹងកំណត់យកកោះ Jeju ជាតំបន់ធ្វើតេស្តសាកល្បងចល័តតាក់សុីហោះ(flying taxis) ដើម្បីជំរុញឧស្សាហកម្មទេសចរណ៍នៅលើកោះដ៏ល្បីមួយនេះ។

លោក Yoon ក៏បានរៀបរាប់ពីផែនការដើម្បីជំរុញប្រែក្លាយកោះ Jeju ជាមជ្ឈមណ្ឌលទេសចរណ៍ និងថាមពលបៃតង ក្នុងសម័យប្រជុំពិភាក្សាដេញដោលអំពីគោលនយោបាយដែលបានរៀបចំឡើងនៅលើកោះ Jeju កាលពីថ្ងៃទី១៥ ខែតុលា។

តាក់សុីហោះជាប្រព័ន្ធមធ្យោបាយដឹកជញ្ជូន ដែលប្រើប្រាស់ថាមពលអគ្គិសនី ដើម្បីដឹកជញ្ជូនមនុស្ស និងទំនិញនៅក្នុងតំបន់ទីក្រុង។

ហេតុនេះ កោះ Jeju ដែលមានតំបន់ទេសចរណ៍សំខាន់ៗដូចជាភ្នំភ្លើង Halla និងភ្នំភ្លើង Seongsan Ilchulbong ត្រូវបានគេមើលឃើញថា ជាទីតាំងដ៏ល្អសម្រាប់តេស្តសាកល្បងតាក់សុីហោះ ដើម្បីទាក់ទាញភ្ញៀវទេសចរណ៍មកកំសាន្តនាពេលអនាគត។

លោក Yoon ក៏បានប្តេជ្ញាធ្វើការជាមួយរដ្ឋបាលខេត្តស្វយ័ត Jeju ដើម្បីសាងសង់កំពង់ផែថ្មីមួយនៅលើកោះនេះដើម្បីប្រែក្លាយជាមជ្ឈមណ្ឌលសម្រាប់ការដឹកជញ្ជូនតាមផ្លូវសមុទ្រ និងនាវាទេសចរណ៍ ព្រមទាំងកសាងព្រលានយន្តហោះថ្មីមួយនៅលើកោះនេះផងដែរ។

ក្នុងវេទិកាជជែកដេញដោលគ្នា រដ្ឋាភិបាលរបស់លោក Yoon បានប្រកាសផែនការបណ្តាក់ទុនវិនិយោគចំនួន៥៦ពាន់លានវ៉ុន (ប្រហែល៤១លានដុល្លារ) នៅឆ្នាំ២០២៦ សម្រាប់គម្រោងផលិតថាមពលអុីដ្រូសែនបៃតង និងចាប់ផ្តើមគម្រោងសាកល្បងកែច្នៃអាគុយរថយន្តអគ្គិសនីដែលបានប្រើប្រាស់រួច។

ថាមពលអុីដ្រូសែនពណ៌បៃតងត្រូវបានផលិតដោយប្រើប្រាស់ប្រភពថាមពលកកើតឡើងវិញ ដូចជាខ្យល់ ពន្លឺព្រះអាទិត្យ ឬទំនប់វារីអគ្គិសនី តាមរយៈដំណើរការមួយហៅថា “Electrolysis”៕ប្រភព:Yonhap៕

ដោយ: គង់ លាងហួរ
បាងកក: រដ្ឋាភិបាលថៃគ្រោងនឹងផ្តល់ប្រាក់កម្ចីដែលមានអត្រាការប្រាក់ទាបចំនួន៥៥ពាន់លានបាត (ប្រហែល១,៦៦ពាន់លានដុល្លារ) ដើម្បីគាំទ្រវិស័យអចលនទ្រព្យ និងជួយជំរុញសេដ្ឋកិច្ច។

លោក Paopoom Rojanasakul អនុរដ្ឋមន្ត្រីក្រសួងហិរញ្ញវត្ថុថៃ បានបញ្ជូនសារមួយទៅកាន់ក្រុមអ្នកសារព័ត៌មានថា ផែនការនេះនឹងត្រូវបានដាក់ជូនគណៈរដ្ឋមន្ត្រីដើម្បីធ្វើការអនុម័ត។

លោក Paopoom បានអះអាងកាលពីសប្តាហ៍មុនថា វិធានការជំរុញអចលនទ្រព្យនឹងកំណត់គោលដៅទាំងតម្រូវការ និងការផ្គត់ផ្គង់ ដែលមានបំណងជួយទាំងអ្នកទិញ និងអ្នកអភិវឌ្ឍន៍ ដើម្បីបង្កើតឥទ្ធិពលគ្រប់ជ្រុងជ្រោយ។

លោក​បាន​មានប្រសាសន៍ឱ្យដឹងបន្ត​ថា យើងចាំបាច់ត្រូវដាក់ចេញវិធានការ​ជំរុញ​ថ្មី​ ​ព្រោះ​វិធានការដែល​មាន​ស្រាប់​ត្រូវ​បាន​ប្រើប្រាស់​យ៉ាង​ពេញលេញរួចទៅហើយ។

នាពេលកន្លងមកថ្មីៗនេះ ក្រសួងហិរញ្ញវត្ថុថៃបានប្រើប្រាស់ស្ថាប័នហិរញ្ញវត្ថុរបស់រដ្ឋ ដូចជា ធនាគារលំនៅដ្ឋានរដ្ឋាភិបាល (GH) ដើម្បីគាំទ្រដល់ការជំរុញវិស័យអចលនទ្រព្យ។

កាលពីខែមេសា ធនាគារលំនៅដ្ឋានរដ្ឋាភិបាល (GH) បានដាក់ចេញកម្មវិធីផ្តល់ប្រាក់កម្ចី ដែលមានអត្រាការប្រាក់ទាប ឈ្មោះថា “ផ្ទះរីករាយ(Happy Home)”ជាមួយនឹងទំហំទឹកប្រាក់កម្ចីសរុបចំនួន២០ពាន់លានបាត។

កម្មវិធី“ផ្ទះរីករាយ”របស់ធនាគារខាងលើ បានកំណត់លក្ខខណ្ឌផ្តល់ប្រាក់កម្ចីដែលអាចបត់បែនបាន ដើម្បីជួយបុគ្គលដែលមានចំណូលទាប សំដៅធ្វើយ៉ាងណាឱ្យពួកគេអាចទទួលបានកម្ចីទិញផ្ទះ ដោយមនុស្ស១នាក់អាចទទួលបានប្រាក់កម្ចីជាអតិបរមា៣លានបាត និងបង់អត្រាការប្រាក់ថេរ៣% សម្រាប់រយៈពេល៥ឆ្នាំដំបូង។

ដោយឡែក កាលពីថ្ងៃពុធសប្តាហ៍នេះ ធនាគារកណ្តាលរបស់ប្រទេសថៃបានកាត់បន្ថយអត្រាការប្រាក់ដោយមិននឹកស្មានដល់ចំនួន០,២៥ភាគរយជាលើក​ដំបូង​គិតចាប់​តាំង​ពី​ខែ​ឧសភា ឆ្នាំ២០២០។

ធនាគារកណ្តាល និងក្រសួងហិរញ្ញវត្ថុថៃក៏គ្រោងនឹងជួបប្រជុំគ្នាម្តងទៀតនៅចុងខែតុលានេះ ដើម្បីពិភាក្សាអំពីការកំណត់ទិសដៅអតិផរណា៕ប្រភព: Bangkok Post៕