ដោយ: គង់ លាងហួរ

អន្តរជាតិ: រដ្ឋបាលលោកប្រធានាធិបតីអាមេរិក ចូ បៃដិន នៅថ្ងៃពុធទី២៦ ខែមិថុនានេះ បានប្រកាសផ្តល់មូលនិធិលំនៅដ្ឋានចំនួន៨៥លានដុល្លារដល់បណ្តារដ្ឋ និងតំបន់មូលដ្ឋានចំនួន២១ ដើម្បីជួយលុបបំបាត់ឧបសគ្គ ចំពោះការអភិវឌ្ឍន៍ និងជំរុញការសាងសង់លំនៅដ្ឋាន ដែលមានតម្លៃសមរម្យជាងមុន។

លោកស្រី Kamala Harris អនុប្រធានាធិបតីអាមេរិក និងលោកស្រី Adrianne Todman រដ្ឋមន្ដ្រីស្តីទីនៃក្រសួងលំនៅដ្ឋាន និងអភិវឌ្ឍន៍ទីក្រុង បានគូសបញ្ជាក់ថា មូលនិធិនេះនឹងជួយធ្វើបច្ចុប្បន្នភាព លើផែនការលំនៅដ្ឋានរបស់បណ្តារដ្ឋ និងតំបន់មូលដ្ឋាន ព្រមទាំងជួយកែសម្រួល គោលនយោបាយប្រើប្រាស់ដីធ្លី និងសម្រួលដំណើរការអនុញ្ញាតសម្រាប់ ការអភិវឌ្ឍថ្មី។

មូលនិធិនេះត្រូវបានប្រកាសដាក់ចេញ ស្របពេលដែលរដ្ឋបាលលោកប្រធានាធិបតី ចូ បៃដិន ក្នុងសប្តាហ៍នេះ កំពុងព្យាយាមបង្ហាញ ទៅកាន់ប្រជាជនអាមេរិក ឱ្យបានឃើញថា លោកកំពុងចាត់វិធានការ ដើម្បីដោះស្រាយការហក់ឡើងនៃតម្លៃផ្ទះ ដែលបានក្លាយជាកង្វល់ដ៏ធំមួយ សម្រាប់អ្នកបោះឆ្នោតវ័យក្មេង។បញ្ហាកង្វះលំនៅដ្ឋានដ៏រ៉ាំរ៉ៃ កំពុងបន្តជំរុញឱ្យថ្លៃជួល និងអត្រាអតិផរណាតម្លៃទំនិញ ប្រើប្រាស់កើនឡើង ដែលការណ៍នេះចូលរួមចំណែក ដល់ការពន្យារពេលក្នុងការកាត់បន្ថយអត្រាការប្រាក់របស់ធនាគារកណ្តាលអាមេរិក។

លោកស្រី Harris បានថ្លែងប្រាប់អ្នកយកព័ត៌មាននៅក្នុងអំឡុងពេលប្រកាសអំពីជំនួយនេះថា “ការវិនិយោគនេះគឺជាផ្នែកមួយ នៃយុទ្ធសាស្រ្តកាន់តែធំជាងមុន ដើម្បីកាត់បន្ថយថ្លៃជួល និងជួយប្រជាជនអាមេរិក ឱ្យមានលទ្ធភាពកាន់តែច្រើនក្នុងការទិញផ្ទះ ហើយយើងបានស្នើផែនការ សាងសង់លំនៅដ្ឋាន ដែលមានតម្លៃសមរម្យចំនួន២លានយូនីត”។

កាលពីថ្ងៃអង្គារ លោកស្រី Janet Yellen រដ្ឋមន្ត្រីក្រសួងរតនាគារអាមេរិក បានប្រកាសថា ប្រាក់ចំណូលចំនួន១០០លានដុល្លារ ដែលយើងទទួលបានមកពីការវិនិយោគ លើការផ្តល់ប្រាក់កម្ចីដល់អាជីវកម្ម និងបុគ្គលនៅក្នុងសហគមន៍ កាលពីសម័យកូវីដ-១៩ នឹងត្រូវបានបង្វែរទៅជាមូលនិធិផ្តល់ហិរញ្ញប្បទានសាងសង់លំនៅដ្ឋានថ្មី ដែលមានតម្លៃសមរម្យ។

ជាមួយគ្នានេះ លោកស្រី Harris និងលោកស្រី Yellen ក៏បានអំពាវនាវឱ្យសភាអនុម័ត ឥណទានពន្ធចំនួន១០.០០០ដុល្លារអាមេរិក សម្រាប់អ្នកទិញផ្ទះលើកដំបូង និងផ្តល់ជំនួយឥតសំណងចំនួន២៥.០០០ដុល្លារអាមេរិក សម្រាប់អ្នកទិញផ្ទះជំនាន់ទី១ មកពីគ្រួសារដែលជួបការលំបាកផ្នែកជីវភាព៕ប្រភព:Reuters៕

        ដោយៈ គង់ សូរិយា

        ភ្នំពេញៈ ក្រុមមន្រ្តីទីស្តីការគណៈរដ្ឋមន្រ្តី និងក្រសួងពាក់ព័ន្ឋបានបើកកិច្ចប្រជុំ ទាក់ទងនឹងសេចក្តីព្រាងច្បាប់នេះ មានសារប្រយោជន៍ ក្នុងបង្កើតបរិ​យាកាសអំណោយផល ក្នុងការទាក់ទាញវិនិយោគិន ឲ្យមកវិនិយោគលើវិស័យឧស្សាហកម្ម។

សេចក្តីព្រាងច្បាប់នេះ មានវិសាលភាពគ្របដណ្តប់មកលើការវិនិយោគលើការរៀបចំ និងកសាងឧស្សាហកម្ម(រោងចក្រ) ផលិត និងដំឡើងយានយន្ត បរិក្ខារ និងគ្រឿងបន្លាស់ និងដើម្បីចូលរួម កាត់បន្ថយគ្រោះថ្នាក់ចរាចរណ៍ ធានាសុវត្ថិភាពយានយន្តក្នុងកម្រិតខ្ពស់ ការពារបរិស្ថាន ជំរុញការប្រើប្រាស់ថាមពលស្អាត សន្សំសំចៃថាមពល និងទប់ស្កាត់ការនាំចូលយានយន្តចោរកម្មជាដើម។

ម៉្យាងទៀតសេចក្តីព្រាងច្បាប់នេះ ផ្តល់ផលប្រយោជន៍ឧស្សាហកម្ម និងអ្នកប្រើប្រាស់ ដោយប្រើប្រាស់ឯកភាវូបនីយកម្មលើយថាប្រភេទ សម្រាប់ដំណើរការផលិតយានយន្តថ្មី កាត់បន្ថយចំណាយថ្លៃដើម តាមរយៈប្រសិទ្ធភាព(សន្សំសំចៃ) លើការអភិវឌ្ឍ ការផលិត ដំណើរការផ្តល់លិខិតបញ្ជាក់អនុ​លោមភាព ព្រមទាំងអាចនាំចេញផលិតរបស់ខ្លួន ទៅក្នុងទីផ្សារអន្តរជាតិ ដោយមិនមានរនាំងបច្ចេកទេស និងអ្នកប្រើប្រាស់នៃប្រទេសជាសមាជិក នឹងទទួលបានយានយន្តប្រកប​ដោយគុណភាព សុវត្ថិភាពខ្ពស់ តម្លៃសមរម្យ សន្សំសំចៃថាម​ពល និងកាត់បន្ថយផលប៉ះពាល់ចំពោះបរិស្ថាន។

កិច្ចប្រជុំឆ្លងបញ្ចប់លើការរៀបចំ សេចក្តីព្រាងច្បាប់ស្តីពីការអនុម័តយល់ព្រម លើកិច្ចព្រមព្រៀងអង្គការសហប្រជាជាតិ ឆ្នាំ១៩៥៨ ស្តីពីការទទួលយកបទបញ្ញត្តិ បច្ចេកទេសរួមនេះបានដឹកនាំដោយលោកឆឺយ រឿន រដ្ឋលេខាធិការទីស្តីការគណៈរដ្ឋមន្ត្រី លោកប៉ាល់ ចន្ទតារា រដ្ឋលេខាធិការក្រសួងសាធា​រណការ និងដឹកជញ្ជូន និងមន្រ្តីពាក់ព័ន្ឋ៕

ដោយៈគង់ លាងហួរ

ភ្នំពេញ: គម្រោងអគារលំនៅដ្ឋានសហកម្មសិទ្ឋលំដាប់ខ្ពស់ចំនួន៣ នៅទីក្រុងរណបខ្នាតយក្ស ក្នុងរាជធានីភ្នំពេញ នឹងផុសត្រដែតឡើង ពីលើផ្លូវទឹកទន្លេមេគង្គ នាពេលឆាប់ៗខាងមុខនេះ។

គម្រោងអគារប្រើប្រាស់ចម្រុះនេះមានឈ្មោះថា Diamond Bay Garden និងមានទីតាំងនៅទីក្រុងរណបកោះពេជ្រ ដែលត្រូវបានអភិវឌ្ឍន៍ ដោយក្រុមហ៊ុនសាជីវកម្មវិនិយោគ Overseas Cambodian Investment Corporation (OCIC)។

លោក Thierry Tea អនុប្រធានក្រុមហ៊ុន OCIC បានមានប្រសាសន៍ឱ្យដឹងថា “ជាមូលដ្ឋាន យើងមានឱកាសបង្កើត និងកសាងលំនៅដ្ឋាន ដែលមានទីតាំងយុទ្ធសាស្ត្រល្អ ដែលអនុ​ញ្ញាតឱ្យអ្នករស់នៅ អាចមើលឃើញទេសភាពទន្លេរ ក្នុងរាជធានីភ្នំពេញ”។

ចំណែកលោក Charles Vann អនុប្រធានប្រតិបត្តិក្រុមហ៊ុន Canadia Group បានរំលឹកថា “មុនពេលមានការអភិវឌ្ឍន៍ទីក្រុងរណបនេះឡើង ប្រជាពលរដ្ឋជិត១ពាន់គ្រួសារ បានរស់នៅក្នុងផ្ទះបណ្តោះអាសន្ន នៅភាគខាងលិចតំបន់កោះពេជ្រ ដោយគ្មានហេដ្ឋារចនាសម្ព័ន្ធគ្រប់គ្រាន់”។

លោកបន្តថា ក្រោយមក ដោយសារតែមានការគាំទ្រពីរដ្ឋាភិបាលកម្ពុជា កាលពីឆ្នាំ២០០៦ ក្រុមហ៊ុន OCIC បានចាប់ផ្តើមដំណើរដ៏វែងឆ្ងាយមួយក្នុងការស្តារ និងអភិវឌ្ឍន៍កោះនេះឡើងវិញ។  ទីបំផុត កោះពេជ្រ បានក្លាយជាទីក្រុងរណបដំបូងគេ ដែលត្រូវបានសាងសង់ និងផ្តល់ហិរញ្ញប្បទានដោយក្រុមហ៊ុន OCIC។

សព្វថ្ងៃនេះ គម្រោងលំនៅដ្ឋាននៅលើដីកោះ ដែលមានទំហំ១០០ហិកតាមួយនេះ បានរីកដុះដាលយ៉ាងឆាប់រហ័ស។ ក្នុងចំណោមនោះ គម្រោង Diamond Bay Garden គឺជាគម្រោងលំនៅដ្ឋានដ៏លេចធ្លោមួយ ដែលលាតសន្ធឹងលើផ្ទៃដីទំហំ៩.៧៥៧ម៉ែត្រការ៉េ និងមានទីតាំងពិសេស នៅត្រង់ចំណុចប្រសព្វរវាងទន្លេមេគង្គ និងទន្លេបាសាក់។

ការសាងសង់អគារ Tower A នៅក្នុងគម្រោង Diamond Bay Garden កំពុងសម្រេចបានវឌ្ឍនភាពឈានឡើងជាលំដា​ប់ ដែលមានកំពស់រហូតដល់កម្ពស់១៤៦ម៉ែត្រ។ អគារលំនៅដ្ឋាន​ទាំង៣ នេះនឹង​ត្រូវបានតភ្ជាប់គ្នា ដោយ​ស្ពាន​អាកាស​​ ឬហៅថា “Sky Bridge”។

ជាមួយគ្នានេះ អ្នកអភិវឌ្ឍន៍ក៏គ្រោងនឹងបើកដំណើរការសួនច្បារ Sky Terrace និងក្លឹបកំសាន្ត Sky Bar នៅជាន់ខាងលើអគារ សម្រាប់ទាក់ទាញអ្នករស់នៅ និងសាធារណៈជនទូទៅ ឱ្យចូលមកទស្សនាកំសាន្តសប្បាយផងដែរ។

ដោយមានលំនៅដ្ឋានចំនួន៥៩១យូនីត អគារទី១នៃគម្រោងDiamond  Bay Garden ត្រូវបានគេរំពឹងថា នឹងបញ្ចប់ការសាងសង់រួចរាល់ នៅត្រីមាសទី២ ឆ្នាំ២០២៥ខាងមុខ។ គម្រោងអគារទាំង៣នេះ នឹងមានលំនៅដ្ឋានសរុបប្រមាណ១.៥០០យូនីត។ ការអភិវឌ្ឍន៍ត្រូវបានចែកចេញ ជា៣ដំណាក់កាល ដែលអគារនីមួយៗត្រូវបានគេប៉ាន់ស្មានថា មានតម្លៃទុនវិនិយោគប្រហែល១០០លានដុល្លារអាមេរិក៕ ប្រភព: Asia Property Award៕

ដោយៈ គង់ សូរិយា

ភ្នំពេញៈ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាអ្នកសម្របសម្រួលក្រុមការងារទាំង១៦ ផ្នែកឯកជន នឹងដឹកនាំកិច្ចប្រជុំក្រុមការងារផ្នែកឯកជន នៃវេទិការាជរដ្ឋាភិបាល–ផ្នែកឯកជន។

  កិច្ចប្រជុំដែលបានធ្វើកាលពីថ្ងៃទី២៦ មិថុនាកន្លងមកនេះ អញ្ជើញចូលរួមពីសហប្រធាន និងសហប្រធានក្រុមការងារ១៦ផ្នែកឯកជន និងសហប្រធាន និងអនុសហប្រធានក្រុមការងារបច្ចេកទេស ភាពជាដៃគូអគ្គនាយកដ្ឋាន–ពន្ធដារ–គយ–ផ្នែកឯកជន ព្រមទាំងលេខាធិការដ្ឋាននៃក្រុមការងារនីមួយៗ ផងដែរ។

គោលបំណងនៃកិច្ចប្រជុំនេះ ផ្តោតលើចំណុចសំខាន់ជាច្រើនរួមមាន ទី១ ការធ្វើបច្ចុប្បន្នភាពក្រុមការងារផ្នែកឯកជន សរុបមានចំនួន១៦ក្រុមការងារផ្នែកឯកជន តាមសេចក្តីសម្រេ​ចលេខ៩៧ សសរ ចុះថ្ងៃទី២១ ខែឧសភា ឆ្នាំ២០២៤, ទី២ ការផ្តល់អនុសាសន៍ អ្នកឧកញ៉ា ប្រធានសម្របសម្រួលក្រុមការងា​រ​ទាំង១៦ផ្នែកឯកជន ដើម្បីពង្រឹងនិងបង្កើនសកម្មភាពតាមក្រុមការងារនីមួយៗ អោយមានប្រសិទ្ធភាពធ្វើយ៉ាងណា សម្រ​បសម្រួលសកម្មភាព និងបរិយាកាសធុរកិច្ច និងវិនិយោគកាន់​តែប្រសើក្នុងប្រទេសកម្ពុជា។

ទី៣ ការធ្វើសេចក្តីរាយការណ៍សង្ខេប ពីសហប្រធាននៃក្រុមការងារផ្នែកឯកជន អំពីសកម្មភាពក្រុមការងាររបស់ខ្លួន និងទិសដៅបន្តនាពេលខាងមុខ ទី៤. ពិភាក្សាពង្រីកកិច្ចសហប្រតិបត្តិការភាពជាដៃគូ ក្រោម យន្តការវេទិការាជរដ្ឋាភិបាល–ផ្នែកឯកន ដែលបង្កើតក្រុមការងារចំពោះកិច្ច អនុវត្តន៍សម្របសម្រួលក្រុមការងារទាំង១៦ផ្នែកឯកជន នៃវេទិការាជរដ្ឋាភិបាល–ផ្នែកឯកជន។

ទី៥ បទបង្ហាញ ពីក្រុមជំនាញការនៃកម្មវិធីភាពជាដៃគូកម្ពុជា–អូស្ត្រាលី សម្រាប់ការអភិវឌ្ឍសេដ្ឋកិច្ច ប្រកបដោយភាពធន់ (CAPRED) លើចំណុច (១). ការប្រើប្រាស់ប្រព័ន្ធតាមដាន ការអនុវត្តវិធានការ វេទិការាជរដ្ឋាភិបាល– ផ្នែកឯកជនលើកទី១៩, (២) ផ្ទាំងវិភាគទិន្នន័យ (Dashboard), និង(៣). តារាងបណ្តុំទិន្នន័យ (Dataset) និង ៦. ពិនិត្យនិងពង្រឹងអនុវត្តន៍ អោយកាន់តែប្រសើឡើង នូវយន្តការមានស្រាប់ ដូចជា ខេត្តថ្នាក់ក្រោមជាតិ ជាមួយបណ្តាសភាពា​ណិ​ជ្ជកម្ម មណ្ឌលខេត្ត ក្រុងផងដែរ៕

ដោយ: គង់ លាងហួរ

អន្តរជាតិ: រដ្ឋបាលក្រុងហ្សាការតា កំពុងរៀបចំផែនទីបង្ហាញផ្លូវមួយ ដើម្បីរក្សាតួនាទីរបស់ទីក្រុងហ្សាការតា ក្នុងនាមជាចំណុចស្នូល នៃសេដ្ឋកិច្ចរបស់ប្រទេសឥណ្ឌូនេស៊ី។ នេះបើយោងតាមការចុះផ្សាយដោយសារពត៌មាន CNA។

ទីក្រុងហ្សាការតា នឹងត្រូវបាត់បង់ឋានៈជា រដ្ឋធានី ក្រោយពីលោកប្រធានាធិបតី Joko Widodo ចេញក្រឹត្យមួយប្រកាសដាក់ឈ្មោះរដ្ឋធានីជាផ្លូវការថា “Nusantara” ដែលជាគម្រោងខ្នាតយក្សតម្លៃ៣២ពាន់លានដុល្លារអាមេរិក។

សភាឥណ្ឌូនេស៊ី បានកំណត់ឋានៈពិសេស សម្រាប់ទីក្រុងហ្សាកាតា ដើម្បីអនុញ្ញាតឱ្យទីក្រុងនេះ នៅតែអាចប្រកួតប្រជែ ងជាមួយ ទីក្រុងលំដាប់ពិភពលោកផ្សេងទៀត។ ទីក្រុងហ្សាកាតានឹងនៅតែដើរតួនាទី ជាមជ្ឈមណ្ឌលសេដ្ឋកិច្ច និងជាមជ្ឈ មណ្ឌលសកល សម្រាប់ពាណិជ្ជកម្ម សេវាកម្ម ហិរញ្ញវត្ថុ និងអាជីវកម្ម។

បច្ចុប្បន្ន រដ្ឋាភិបាលឥណ្ឌូនេស៊ី កំពុងរៀបចំផែនទីបង្ហាញផ្លូវ ដែលរៀបរាប់យ៉ាងលម្អិត អំពីផែនការអភិវឌ្ឍន៍រយៈពេលវែងក្នុងទីក្រុងហ្សាការតា សម្រាប់រយៈពេល២០ឆ្នាំខាងមុខ ខណៈការរៀបចំឯកសារ ​ត្រូវ​បាន​គេ​រំពឹង​ថា​ នឹង​បញ្ចប់​រួចរាល់ក្នុង​ឆ្នាំ​នេះ។

លោកស្រី Sri Haryati ជំនួយការផ្នែកសេដ្ឋកិច្ច និងហិរញ្ញវត្ថុប្រចាំ នៅលេខាធិការដ្ឋាន តំបន់រដ្ឋបាលខេត្ត Jakarta បានអះអាងថា “យើងមានចក្ខុវិស័យ ប្រែក្លាយទីក្រុងហ្សាកាតាទៅជាទីក្រុងលំដាប់ថ្នាក់សកលលោក ដែលមានវឌ្ឍនភាព ព្រមទាំងមានការប្រកួតប្រជែង និងមាននិរន្តរភាព”។

លោកស្រីបន្តថា និរន្តរភាព ពិតជាមានសារៈសំខាន់ណា ស់ ព្រោះយើងកំពុងពិភាក្សា អំពីបញ្ហាទាក់ទងនឹងបរិស្ថាន និងការប្រែប្រួលអាកាសធាតុជាដើម។ ដូច្នេះ និរន្តរភាព​គឺ​ជា​អ្វី​ ដែល​ទីក្រុង​ហ្សាការតា ​ត្រូវផ្តោត​យក​ចិត្ត​ទុក​ដាក់​។

លោកស្រីបន្ថែមថា “ធនធាន​មនុស្ស​ នៅ​ទីក្រុង​ហ្សាកាតា​មាន​គុណភាព​ល្អ មានផលិតភាព និង​មានវិបុលភាព។  សេដ្ឋកិច្ច​របស់​ទីក្រុង​ហ្សាការតា​ មិន​ត្រឹម​តែ​រីក​ចម្រើន​ប៉ុណ្ណោះ​ទេ ប៉ុន្តែ​ថែម​ទាំង​មានបរិយាបន្ន មានសមត្ថភាពប្រកួតប្រជែង​ជា​សាកល និង​មាន​និរន្តរភាព”៕ប្រភព:CNA៕

ដោយ: គង់ លាងហួរ

ម៉ានីល: ក្រសួងទេសចរណ៍ហ្វីលីពីន គ្រោងបន្តកិច្ចខិតខំប្រឹងប្រែងរបស់ខ្លួន ក្នុងការទាក់ទាញប្រភពភ្ញៀវទេសចរណ៍ផ្សេងទៀតក្រៅពីប្រទេសចិន បន្ទាប់ពីក្រសួងការបរទេសហ្វីលីពីនបានរឹតបន្តឹងលក្ខខណ្ឌចំពោះពលរដ្ឋចិន ដែលចូលមកស្នើសុំទិដ្ឋាការ។

លោកស្រី Christina Frasco  រដ្ឋមន្ត្រីក្រសួងទេសចរណ៍ហ្វីលីពីនបានអះអាងថា “ការកំណត់ដាក់លក្ខខណ្ឌ និងតម្រូវការបន្ថែមទៀត លើការដាក់ពាក្យស្នើសុំទិដ្ឋាការ ដោយជនជាតិចិន នឹងពិតជាបង្កបញ្ហាលំបាក ចំពោះភ្ញៀវ​ទេសចរ​ណ៍ចិន​ ដែលមានបំណងចូលមក​កាន់​ប្រទេស​របស់យើង”។

លោកស្រីបានបន្ថែមថា ទោះជាយ៉ាងណាក្តី យើងយល់ឃើញពីទិសដៅគោលនយោបាយ ក៏ដូចជាការសម្រេចចិត្តរបស់ក្រសួងការបរទេស ជាពិសេសគឺផ្អែកលើមូលហេតុសន្តិសុខជាតិមួយចំនួន។

ប៉ុន្តែដើម្បីទប់ស្កាត់ផលប៉ះពាល់ ពីគោលនយោបាយទិដ្ឋា ការថ្មីនេះ ក្រសួងទេសចរណ៍ហ្វីលីពីន គ្រោងបន្តកិច្ចខិតខំប្រឹងប្រែងរបស់ខ្លួន ដើម្បីទាក់ទាញអ្នកធ្វើដំណើរ មកពីទីផ្សារក្រៅប្រទេសផ្សេងទៀត ដែលរួមមានដូចជា កូរ៉េខាងត្បូង សហរដ្ឋអាមេរិក និងជប៉ុនជាដើម។

យោងតាមទិន្នន័យ ពីក្រសួងទេសចរណ៍ហ្វីលីពីន (DOT) បានបង្ហាញថា គិតមកដល់ពេលនេះ ប្រទេសហ្វីលីពីនបានទទួលស្វាគមន៍ អ្នកដំណើរអន្តរជាតិចំនួន២.៥៦៩.៣៧៩នាក់ ចាប់ពីខែមករា ដល់ខែឧសភា ឆ្នាំ២០២៤នេះ។

ក្នុងចំណោមនោះ អ្នកដំណើរមកពីប្រទេសកូរ៉េខាងត្បូងមានចំនួន៦៨២.៣៦២នាក់ ខណៈអ្នកដំណើរមកពីសហរដ្ឋអាមេរិកមានចំនួន៤០៣.៧២១នាក់ និងអ្នកដំណើរមកពីប្រទេសជប៉ុនមានចំនួន១៥៨.៤៦១នាក់។

ជាមួយគ្នានេះ រដ្ឋាភិបាលហ្វីលីពីន ក៏កំពុងពង្រីកការផ្សព្វផ្សាយ គោលដៅទេសចរណ៍ដ៏ទាក់ទាញរបស់ខ្លួន ទៅកាន់ទីផ្សារផ្សេងទៀត ដែលរួមមានដូចជាប្រទេសឥណ្ឌា និងតំបន់មជ្ឈិមបូព៌ា ដើម្បីធានាថា ហ្វីលីពីននៅមានសមត្ថភាពប្រកួតប្រជែងខ្ពស់ ក្នុងការទាក់ទាញអ្នកដំណើរអន្តរជាតិចម្រុះជាតិសាសន៍។

ម្យ៉ាងវិញទៀត រដ្ឋាភិបាលហ្វីលីពីន ​បានដាក់ចេញ​គោលដៅ​ ក្នុងការស្រូបទាញលំហូរ​ភ្ញៀវ ​ទេសចរ​ណ៍អន្តរជាតិឱ្យចូល​មក​ទស្សនាប្រទេសរបស់ខ្លួន ឱ្យបានចំនួន៧,៧លាន​នាក់​ នៅ​ក្នុងឆ្នាំ​២០២៤នេះ៕ប្រភព:Philstar.com៕