ដោយៈ ស៊ីវ ម៉េង

        ភ្នំពេញៈ មជ្ឈមណ្ឌលពាណិជ្ជកម្មអាស៊ាន-អន្តរជាតិ(ផ្សារដើមគរថ្មី) លើផ្ទៃដី៣០ហិកតា​ ត្រូវបានប្រកាសដាក់ឱ្យដំណើរការជាផ្លូវការ ក្រោមចក្ខុវិស័យប្រែក្លាយទៅជាទីផ្សារដ៏ធំ នៅក្នុងរាជធានីភ្នំពេញនាពេលអនាគត។

ផ្សារបោះដុំដ៏ធំមួយនេះ មិនត្រឹមនាំមកនូវកសិផល និងទំនិញមានគុណភាពល្អ ជាមួយតម្លៃសមរម្យជូនសម្រាប់ប្រជាជនខ្មែរប៉ុណ្ណោះទេ តែនឹងជួយជំរុញកសិផល និងទំនិញផ្សេងៗទៀតរបស់កម្ពុជាទៅកាន់ទីផ្សារអន្តរជាតិ ថែមទៀត។​

លោក សៀក លូភីង (Xie Luping) ប្រធានក្រុមប្រឹក្សាភិបាលនៃផ្សារដើមគរថ្មីបានមានប្រសាសន៍ក្នុងពិធីសម្ភោធផ្សារដើមគរថ្មីកាលពីចុងសប្តាហ៍មុនថា “ការប្តេជ្ញារបស់ខ្ញុំនាពេលនេះ គឺដើម្បីផលប្រ​យោជន៍ទៅវិញទៅមក ពង្រឹងកិច្ចសហប្រតិបត្តិការឈ្នះ រវាងប្រជាជនកម្ពុជា-ចិន និងប្រជាជនក្នុងតំបន់អាស៊ានផងដែរ ស្របតាមគំនិតផ្ដួចផ្ដើមខ្សែក្រវាត់និងផ្លូវ”។

លោក វ៉ាង វិនធាន ឯកអគ្គរដ្ឋទូតចិនប្រចាំកម្ពុជា​ ជាមួយនឹងលោក ឃួង ស្រេង អភិបាលរាជធានីភ្នំពេញបានអញ្ជើញជាអធិបតីក្នុងពិធីនេះ។

លោក វ៉ាង វិនធាន បានបង្ហាញក្ដីសង្ឃឹមចំពោះមជ្ឈមណ្ឌលពាណិជ្ជកម្មអាស៊ាន-អន្តរជាតិនេះ នឹងបម្រើការដល់ការអភិវឌ្ឍសង្គម សេដ្ឋកិច្ចកម្ពុជា ជាពិសេស គឺរួមចំណែកដល់ទំនាក់ទំនងពាណិជ្ជកម្មរវាងកម្ពុជានិងចិន។

លោកបន្តថា “កិច្ចសហប្រតិបត្តិការក្នុងវិស័យពាណិជ្ជកម្ម រវាងកម្ពុជា និងចិនបានទទួលលទ្ធផលជាផ្លែផ្កាច្រើន ហើយប្រទេសចិនបានបន្តជាដៃគូពាណិជ្ជកម្មធំបំផុត និងប្រទេសវិនិយោគធំបំផុតនៅកម្ពុជា”។ លោកបន្ថែមថា “មជ្ឈមណ្ឌលពាណិជ្ជកម្មអាស៊ាន-អន្តរជាតិ ជាគម្រោងលើកកម្ពស់ជីវភាពប្រជាពលរដ្ឋ ដ៏សំខាន់នៅរាជធានីភ្នំពេញ”។

លោកឃួង ស្រេងអភិបាលរាជធានីភ្នំពេញបានមានប្រសាសន៍ថា មជ្ឈមណ្ឌលពាណិជ្ជកម្មអាស៊ាន-អន្តរជាតិ ដើរតួនាទីសំខាន់ក្នុងការនាំចេញ-នាំចូលកសិផល និងរក្សាស្ថិរភាពនៃខ្សែច្រវាក់ផ្គត់ផ្គង់។ លើសពីនេះ ផ្សារមួយនេះ នឹងដើរតួនាទី ក្នុងការបង្កើនទំហំពាណិជ្ជកម្មនៃកសិផលកម្ពុជា ឱ្យក្លាយទៅជាមជ្ឈមណ្ឌលចែកចាយកសិផល។

លោកបន្តថា “មជ្ឈមណ្ឌលពាណិជ្ជកម្មនេះ នឹងអំណោយផលដល់ការផ្សព្វផ្សាយកសិផលកម្ពុជា ដ៏មានគុណភាពល្អៗទៅដល់តំបន់ផ្សេងៗលើពិភពលោក”។

តាមរយៈរៀបចំផ្សារឱ្យបានសមស្របនិងត្រឹមត្រូវ ទំនិញដែលធូរថ្លៃនិងមានគុណភាពខ្ពស់ នឹងលើកកម្ពស់កម្រិតពាណិជ្ជកម្មនៃផ្សារបោះដុំធំនៅភ្នំពេញ យ៉ាងមានប្រសិទ្ធភាព ហើយអាចសម្រួលភាពស្ទះចរាចរណ៍នៅកណ្តាលទីក្រុង​ កាត់បន្ថយហានិភ័យនានា និងកែលម្អបរិស្ថានរាជធានីភ្នំពេញ។
លោកឃួង ស្រេងបានបញ្ជាក់ថា “រាជរដ្ឋាភិបាលកម្ពុជានឹងបន្តគាំទ្រ ដល់ការកសាងនិងអភិវឌ្ឍនៃផ្សារថ្មីនេះ”៕

ដោយ: គង់ លាងហួរ

ឥណ្ឌា: តម្រូវការទីផ្សារលំនៅដ្ឋាន នៅក្នុងប្រទេសឥណ្ឌាកំពុងស្ទុះងើបឡើងវិញ ដែលស្តែងឱ្យឃើញតាមរយៈការកើនឡើង នៃការទិញដីធ្លីដោយបណ្តាអ្នកអភិវឌ្ឍន៍។ នេះបើយោងតាមការចុះផ្សាយដោយសារពត៌មាន Times of India។

យោងតាមក្រុមហ៊ុនប្រឹក្សាអចលនទ្រព្យ Anarock បានឱ្យដឹងថា ក្រៅពីផ្នែកលំនៅដ្ឋានហើយនោះ គេក៏សង្កេតឃើញថា ផ្នែកអច​លនទ្រព្យពាណិជ្ជកម្ម ការលក់រាយ ឧស្សាហកម្ម ភស្តុភារ និងឃ្លាំងក៏កំពុងជំរុញឱ្យមានកិច្ចព្រមព្រៀងទិញ -លក់ដីធ្លីជាច្រើន ក្នុងទីតាំងសំខាន់ៗនៅទូទាំងប្រទេសឥណ្ឌាផងដែរ។

យោងតាមទិន្នន័យរបស់ក្រុមហ៊ុន Anarock បានបង្ហាញថា អ្នកអភិវឌ្ឍន៍ និងអង្គភាពនានាបានចុះកិច្ចព្រមព្រៀង ទិញដីធ្លីប្រមាណ១០១ ដាច់ដោយឡែកពីគ្នា ក្នុងឆ្នាំសារពើពន្ធ២០២៣-២០២៤ ដែលគិតជាផ្ទៃក្រឡា មានទំហំជិត២.៩៨៩ហិកតា នៅទូទាំងប្រទេស។ ផ្ទុយទៅវិញ កាលពីឆ្នាំសារពើពន្ធ២០២២-២០២៣ អ្នកអភិវឌ្ឍន៍បានចុះហត្ថលេខា លើចំនួនកិច្ចព្រមព្រៀងទិញដីធ្លី ត្រឹមតែ៨៨ប៉ុណ្ណោះ ដែលគិតជាផ្ទៃក្រឡាមានទំហំប្រមាណ១.៨៨៦ហិកតា នៅទូទាំងទីក្រុងនានាក្នុងប្រទេសឥណ្ឌា។

លោក Anuj Puri ប្រធានក្រុមហ៊ុន ANAROCK Group បានមានប្រសាសន៍ឱ្យដឹងថា “អ្វីដែលគួរឱ្យចាប់អារម្មណ៍ នៅត្រង់ថាក្នុងចំណោមកិច្ចព្រមព្រៀងដីធ្លីសរុប នៅក្នុងឆ្នាំសារពើពន្ធ២០២៣-២០២៤ ក្នុងនោះ កិច្ចព្រមព្រៀងជាង៨៣ ដែលគិតជាទំហំប្រហែល១.១៣៥ហិកតា ត្រូវបានសម្រេចនៅក្នុងទីក្រុង លំដាប់កំពូលទាំង៧”។

ទីក្រុងទាំង៧នោះ រួមមាន ទីក្រុង Mumbai ទីក្រុង Delhi ទីក្រុង Kolkata ទីក្រុង Chennai ទីក្រុង Bangalore ទីក្រុង Hyderabad  និងទីក្រុង Pune។

លោក Anuj Puri បានបន្តថា “កិច្ចព្រមព្រៀង ដែលនៅសេសសល់ចំនួន១៨ទៀត ដែលមានផ្ទៃដីជាង១.៨៥៣ហិចតា ត្រូវបានសម្រេចនៅក្នុងទីក្រុងលំដាប់ទី២ និងទី៣ផ្សេងៗដូចជាទីក្រុង Ayodhya ទីក្រុង Jaipur ទីក្រុង Nagpur ទីក្រុង Mysuru និងទីក្រុង Ludhianaជាដើម”។

លោកបញ្ជាក់បន្ថែមថា “ទីក្រុងលំដាប់ទី២ និងទី៣ បានក្លាយជាម៉ាស៊ីនកំណើន ដែលមិនអាចប្រកែកបាន ដោយសារតែការកែលម្អហេដ្ឋារចនាសម្ព័ន្ធ និងឱកាសរីកចម្រើនយ៉ាងឆាប់រហ័សរបស់ពួកគេ”៕ ប្រភព: Times of India៕

ដោយ: គង់ លាងហួរ

អន្តរជាតិ: មហាសន្និបាត AIM Congress គឺជាវេទិកាវិនិយោគកំពូលនៅមជ្ឈឹមបូព៌ា ដែលផ្ដោតសំខាន់លើការវិនិយោគផ្ទាល់ពីបរទេស ទីក្រុងអនាគត និងសហគ្រាសធុនតូច និងមធ្យម។

AIM Congress ផ្តោតលើការលើកកម្ពស់សេដ្ឋកិច្ច និងពង្រឹងទំនាក់ទំនងអន្តរជាតិ ដោយកន្លងមកបានទទួលស្វាគមន៍គណៈប្រតិ​ភូចូលរួមជាង១ម៉ឺននាក់ មកពី១៧៥ប្រទេស និងមានការដាក់តាំងបង្ហាញអាជីវកម្មពីក្រុមហ៊ុនជាង៥០០ មកពីជុំវិញពិភពលោក។

កិច្ចប្រជុំវិនិយោគប្រចាំឆ្នាំ (AIM) គឺជាគំនិតផ្តួចផ្តើមរបស់មូលនិធិ AIM Foundation ដែលជាអង្គការអន្តរជាតិឯករាជ្យមួយ ដែលបានប្តេជ្ញាចិត្តយ៉ាងពេញលេញ ក្នុងការផ្តល់អំណាចដល់សេដ្ឋកិច្ចពិភពលោក តាមរយៈការជំរុញយុទ្ធសាស្រ្ត លើកកម្ពស់ប្រកបដោយប្រសិទ្ធភាព និងសម្របសម្រួលឱកាសសម្រាប់ផលិតភាព និងការពង្រីកសេដ្ឋកិច្ច។

មូលនិធិនេះក៏អនុវត្តន៍ប្រតិបត្តិការ និងការគ្រប់គ្រងបណ្តាញវិនិយោគសកល AIM និងក្រុមធុរកិច្ច ដែលពាក់ព័ន្ធចំនួន១៥របស់ខ្លួន រួមទាំងការត្រួតពិនិត្យ នៃកិច្ចប្រជុំវិនិយោគប្រចាំឆ្នាំសកល និងថ្នាក់តំបន់។

ចាប់តាំងពីត្រូវបានបង្កើតឡើង កិច្ចប្រជុំវិនិយោគប្រចាំឆ្នាំ(AIM) បានប្រែក្លាយខ្លួន ទៅជាវេទិកាវិនិយោគឈានមុខគេ  នៅតំបន់មជ្ឈិ​មបូព៌ា ដែលមានបំណងជំរុញការផ្លាស់ប្តូរជាវិជ្ជមាន ដោយបង្កើតឱកាសវិនិយោគ ពង្រឹងសាមគ្គីភាព និងការអភិវឌ្ឍន៍ទំនាក់ទំនងសេដ្ឋកិច្ចក្នុងចំណោមប្រជាជាតិនានា ក៏ដូចជាការដោះស្រាយវិបត្តិសកល ដែលនឹងផ្តល់ផលប្រយោជន៍យ៉ាងខ្លាំងដល់កំណើនសេដ្ឋកិច្ច។

រាល់ការរៀបចំកិច្ចប្រជុំវិនិយោគប្រចាំឆ្នាំ គឺជាព្រឹត្តិការណ៍ និងឱកាសមួយ ដើម្បីដោះស្រាយបញ្ហាប្រឈមជាមូលដ្ឋាន ដែលប្រទេសនានាកំពុងប្រឈមមុខ ក្នុងដំណើររបស់ពួកគេ ដើម្បីសម្រេចបាននូវការអភិវឌ្ឍន៍ និងដើម្បីពិភាក្សាអំពីនិន្នាការ និងយុទ្ធសាស្រ្តនៃការវិនិយោគដែលអាចប្រើប្រាស់បាន ដើម្បីបង្កើនសក្តានុពលនៃគ្រប់អាជីវកម្ម ប្រទេស និង  តំបន់ ដើម្បីជំរុញការធ្វើពិពិធកម្មសេដ្ឋកិច្ច។

ជាមួយគ្នានេះ មហាសន្និបាត AIM Congress ប្រ​ចាំឆ្នាំ២០២៤ នឹងបន្តប្រមូលផ្តុំថ្នាក់ដឹកនាំសាជីវកម្ម អ្នកបង្កើតគោលនយោបាយ អ្នកជំនួញ អ្នកវិនិយោគក្នុងតំបន់ និងអន្តរជាតិ សហគ្រិន អ្នកសិក្សាឈានមុខគេ និងអ្នកជំនាញ ដែលពួកគេនឹងធ្វើបទបង្ហាញអំពីព័ត៌មា​នថ្មីៗ យុទ្ធសាស្ត្រ និងចំណេះដឹងស្តីពីការទាក់ទាញការវិនិយោគ។

ក្រុមហ៊ុនចាប់ផ្តើមអាជីវកម្ម (start-ups) ជាង៣០០ក្រុមហ៊ុន នៅគ្រប់វិស័យ បានបញ្ជាក់ពីការចូលរួមរបស់ពួកគេ ជាផ្លូវការនៅក្នុងមហាសន្និបាត AIM លើកទី១៣ ឆ្នាំ២០២៤នេះ។ ព្រឹត្តិការណ៍ដ៏ធំនេះនឹងប្រព្រឹត្តទៅចាប់ពីថ្ងៃទី៧ ដល់ថ្ងៃទី៩ ខែឧសភា ឆ្នាំ២០២៤ នៅមជ្ឈមណ្ឌលពិព័រណ៍ជាតិ Abu Dhabi ប្រទេសអារ៉ាប់រួម ។

ការរៀបចំមហាសន្និបាតនេះឡើង មានគោលបំណងស្វែងយល់អំពីដំណោះស្រាយ ប្រកបដោយភាពច្នៃប្រឌិត ស្វែងយល់ពីអនាគតនៃការវិនិយោគ ជំរុញភាពជាដៃគូ និងសម្របសម្រួលការផ្លាស់ប្តូរចំណេះដឹងក្នុងចំណោមសហគ្រិនទូទាំងពិភពលោក។

លើសពីនេះ វេទិកា AIM ផ្តល់ឱកាសដែលមិនអាចកាត់ថ្លៃបាន និងមិនអាចប្រៀបផ្ទឹមបាន សម្រាប់អង្គភាពសាធារណៈ និងឯកជនក្នុងការរួមគ្នា ដើម្បីសម្រេចបាននូវចក្ខុវិស័យរួមគ្នានៃកំណើន និងនិរន្តរភាពរបស់ពួកគេ។

តាមរយៈការចូលរួមក្នុងមហាសន្និបាទនេះ អ្នកវិនិយោគ នឹងទទួលបានអត្ថប្រយោជនសំខាន់ៗដូចជា:ទី១ ស្វែងយល់ពីគម្រោងវិនិយោគដែលមានសក្តានុពល ឬឱកាសដែលស្របតាមលក្ខណៈវិនិច្ឆ័យ និងគោលបំណងនៃការវិនិយោគរបស់អ្នក។ ទី២ -ផ្សារភ្ជាប់ទំនាក់ទំនងជាមួយដៃគូវិនិយោគ និងកិច្ចសហការនាពេលអនាគត តាមរយៈការបង្ហាញទិសដៅវិនិយោគ វគ្គបណ្ដុះបណ្ដាល សកម្មភាពផ្គូផ្គង និងការតាំងពិពណ៌អន្តរជាតិ ដែលមានរៀបចំនៅក្នុងព្រឹត្តិការណ៍។

ទី៣ ទទួលបានការយល់ដឹងដោយផ្ទាល់ លើគំនិតផ្តួចផ្តើមរបស់រដ្ឋាភិបាល គោលនយោបាយវិនិយោគ និងក្របខ័ណ្ឌបទប្បញ្ញត្តិដែលជះឥទ្ធិពលដល់ការវិនិយោគ។ ទី៤ ជ្រៀតចូលទៅក្នុងទីផ្សារអន្តរជាតិ និងស្វែងរកឱកាសវិនិយោគ ក្នុងប្រទេសផ្សេងទៀត ដែលអាចនាំឱ្យមានការធ្វើពិពិធកម្មផលប័ត្រ និងការកាត់បន្ថយហានិភ័យ។

ចំណែកឯសហគ្រិន នឹងទទួលបានឱកាសស្វែងរកការវិនិយោគដែលមានសក្តានុពល តាមរយៈឱកាសវិនិយោគដ៏ធំទូលាយ នៅទូទាំងវិស័យផ្សេងៗ ដែលបានបង្ហាញនៅក្នុងព្រឹត្តិការណ៍នេះ កសាងទំនាក់ទំនង សហការ និងបង្កើតភាពជាដៃគូដែលមានសក្តានុពលជាមួយអ្នកចូលរួម រួមទាំងអ្នកវិនិយោគ មន្ត្រីរដ្ឋាភិបាល និងអ្នកជំនាញក្នុងឧស្សាហកម្ម ព្រមទាំងទទួលបានការយល់ដឹងអំពីឱកាសអាជីវកម្មថ្មី និងកម្លាំងរំខាន ដែលអាចមានផលប៉ះពាល់ដល់ឧស្សាហកម្មរបស់សហគ្រិន តាមរយៈបច្ចេកវិទ្យាដែលកំពុងរីកចម្រើន និងការច្នៃប្រឌិត៕

ដោយៈ គង់ សូរិយា

        ភ្នំពេញៈ អ្នកអភិវឌ្ឍន៍នានាហាក់បន្តសម្ងំ ដោយមិនបានបើកលក់គម្រោងថ្មីរបស់ពួកគេ ថ្នាក់ដឹកនាំធនាគារធំៗនៅតែមានការប្រុងប្រយ័ត្នក្នុងការផ្តល់ឥណទានរបស់ពួកគេ ហើយអ្នកឆ្លៀតឱកាសទិញដី នៅតែស្វែងរកដីតម្លៃក្រោមទីផ្សារចន្លោះពី៣០ ទៅ៥០ភាគរយ។
តើស្ថានភាពដែលកម្ពុជា រង់ចាំការងើបឡើងវិញក្នុងវិស័យនេះត្រូវការដំណោះស្រាយបែបណា?។

លោកយិន លាងគង់ ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា និងជាអគ្គនាយកគេហទំព័រ Propertyarea.asia & Cambodiafinancialtimes.com បានមានប្រសាសន៍ឲ្យដឹងកាលពីល្ងាចថ្ងៃទី២៨ មេសាថា ទីផ្សារនេះ បានស្លោកស្រពោនរយៈពេល៥ឆ្នាំមកហើយ ចាប់តាំងពីវិបត្តិកូវីដ១៩បានចាប់ផ្តើម និងកំលាំងចលករ​សេដ្ឋកិច្ចខ្លះ បានរងផលប៉ះពាល់តាំងពីចុងឆ្នាំ២០១៩ ក្នុងស្ថានភាពនេះ កម្ពុជាត្រូវការលំហូរទុនពីក្រៅប្រទេស ហូរចូលមករាប់ពាន់លានដុល្លារមកជាថ្មី ដើម្បីជម្រុញទីផ្សារនេះឲ្យងើបឡើងវិញ។

លោកបន្តថា “ស្ថានភាពទីផ្សារបែបនេះ កម្ពុជាត្រូវការការវិនិ​យោគពីអ្នកក្នុងស្រុក ជាមួយចលនាមួយ ដែលមានសភាពដូចជាទឹកជោរ ដែលកើនឡើងបន្តិចម្តងៗ ដើម្បីស្តារទំនុកចិត្តក្នុងវិស័យនេះឡើងវិញ ក្នុងចំណោមសាធារណៈជន”។ លោកបន្តថា “ជាមួយគ្នានេះ ធនាគារនានាគួរតែបន្ឋូរបន្ថយ លក្ខខ័ណ្ឌលើការផ្តល់ឥណទាន ដើម្បីបង្ហូរសាច់ប្រាក់ ចូលក្នុងវិស័យនេះឡើងវិញ ដើម្បីជម្រុញទីផ្សារ និងបង្កើនទំនុកចិត្តក្នុងទីផ្សារ”។លោកយិន លាងគង់បានបន្តថា ជាមួយគ្នានេះ រាជរដ្ឋាភិបាលគួរមានកញ្ចប់ថវិកាលើកទឹកចិត្តមួយចំនួន ពិសេសដាក់ចេញគោល​នយោបាយថ្មីៗបន្ថែម ដូចជា កម្មវិធីជម្រុញការវិនិយោគនៅខេត្តព្រះសីហនុ ជម្រុញការបង្កើតតំបន់សេដ្ឋកិច្ចពិសេសឲ្យបានច្រើន នៅទីតាំងដែលមានសក្តានុពល សម្រាប់ការអភិវឌ្ឍវិស័យអចលនទ្រព្យ និងបន្តលើកទឹកចិត្ត ដល់ការវិនិយោគអចលនទ្រព្យ ដែលមានគុណតម្លៃដល់សង្គម សេដ្ឋកិច្ច និងការអភិវឌ្ឍន៍បែបអេកូឡូស៊ីក្នុងវិស័យនេះផងដែរ។

លោកបន្តថា ជាការពិត ការរីកចម្រើនរបស់ប្រទេសមួយ ពិតជាត្រូវការលំហូរទុនវិនិយោគពីបរទេស និងជម្រុញលំហូរពាណិជ្ជកម្មទៅកាន់បរទេស ប៉ុន្តែនៅកម្ពុជាទីផ្សារតូចមួយនេះ ទាមទារឲ្យរដ្ឋាភិបាលកសាងភាពយូនីកមួយ សម្រាប់ប្រទេស និងមូលដ្ឋានសេដ្ឋកិច្ចរបស់ខ្លួន ដើម្បីប្រែក្លាយប្រទេសនេះ ជាមូលដ្ឋានមួយដែលអ្នកវិនិយោគសម្លឹងមករៀងរាល់ពេល ជាមួយនឹងបរិយាកាស និងបរិស្ថានវិនិយោគមានភាពអំណោយផល ជាមួយនឹងការិយាធិបតេយ្យត្រូវ កាត់បន្ថយឲ្យបានជាអតិបរិមា។

លោកបញ្ជាក់ថា “ប្រសិនជាប្រទេសថៃ ឬវៀតណាម ពួកគាត់រាំបទធ្វីស កម្ពុជាក៏គួរមានបទខ្លួនឯងសម្រាប់រាំផងដែរ ដូចជា បទរាំវង់ ឬរាំក្បាច់ តាមស្ថានភាពសង្គម និងសេដ្ឋកិច្ចរបស់ខ្លួន”។

 តើកម្ពុជាអាចពឹងផ្អែកលើការវិនិយោគរបស់ចិន ក្នុងវិស័យនេះបានតទៅទៀរឬយ៉ាងណា លោកយិន លាងគង់បានបញ្ជាក់ថា ការពឹងផ្អែកលំហូរវិនិយោគពីប្រទេសចិន សម្រាប់ជម្រុញការវិនិយោគលើវិស័យអចលនទ្រព្យ និងធ្វើឲ្យទីផ្សារនេះពុះកញ្រ្ជោលឡើងវិញ យើ​ងអាចមើលឃើញក្នុងសញ្ញាមួយ ហាក់ស្ថិតក្នុងសភាពអស់សង្ឃឹ​ម ដោយសារការដួលរលំ ក្នុងវិស័យអចលនទ្រព្យចិន ព្រោះគោលនយោបាយរបស់មេដឹកនាំប្រទេសនេះ ផ្តោតលើការអភិវឌ្ឍអចលនទ្រព្យសម្រាប់ស្នាក់នៅ មិនមែនសម្រាប់ទាញយកប្រាកើចំណេញ។ មេដឹកនាំចិនបាន និងកំពុងដាក់ចេញគោលនយោបាយថ្មី ដោយកាត់បន្ថយការពឹងផ្អែកលើវិស័យនេះ ដែលធ្វើឲ្យក្រុមហ៊ុនអភិវឌ្ឍន៍អចល​នទ្រព្យ លំដាប់យក្សរបស់ចិន ជាច្រើន ដូចជា Country Graden, Evergrade, Shimaoជាដើមបានដួលរលំ៕

        ដោយៈ គង់ សូរិយា

        ភ្នំពេញៈ គេហទំព័រវេបសាយ និងបណ្តាញទំនាក់ទំនងសង្គមដូចជា facebook Page, Telegram , Tik Tokរបស់សមាគមសហគ្រិនសារព័ត៌មានសេដ្ឋកិច្ចកម្ពុជា បាននិងកំពុងផ្តោតការផ្សព្វផ្សាយជាបីភាសា។

ភាសាដែលបាន និងកំពុងផ្សព្វផ្សាយព័ត៌មានទាក់ទងសេដ្ឋកិច្ច អចលនទ្រព្យ ហិរញ្ញវត្ថុ ផ្សារហ៊ុន ទីផ្សារឧបករណ៍និស្សន៍ជាដើម គឺផ្តោតលើភាសាខ្មែរ ភាសាអង់គ្លេស និងភាសាចិន។

លោកយិន លាងគង់ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា(CEMEA) បានមានប្រសាសន៍ឲ្យដឹងកាលពីថ្ងៃទី២៨ មេសាថា អ្វីដែលយើងបានដាក់ចេញនូវចក្ខុវិស័យ ដ៏មុតស្រួចរបស់ខ្លួន គឺផ្តោតលើការផ្សព្វផ្សាយព័ត៌មានសេដ្ឋកិច្ច បែបវិភាគ មានលក្ខណៈស៊ីជម្រៅ និងសម្បូរបែប ដែលជាព័ត៌មាន មានមូលដ្ឋានវិជ្ជាជីវៈ និងក្រមសិលធ៌ម ដែលអាចជឿទុកចិត្តបាន។
លោកបន្តថា “ការខិតខំរបស់រដ្ឋាភិបាល ដើម្បីកសាងប្រទេសតែម្នាក់ឯងមិនគ្រប់គ្រាន់ទេ តែទាមទារឲ្យមានការចូលរួមពីគ្រប់វិស័យ ពិសេសវោស័យសារគមនាគមន៍ ដើម្បីដើរតួនាទីជាអ្នកគាំទ្រ ដើម្បីលើកកំពស់មុខមាត់កម្ពុជា នៅលើឆាកអន្តរជាតិបន្ថែមទៀត”។

លោកយិន​ លាងគង់បានបន្តថា ការរួមចំណែកពីវិស័យសារព័ត៌មាន ដែលមានក្រមសីលធ៌មវិជ្ជាជីវៈ មានសារៈសំខាន់លើផ្នែកសំខាន់ៗចំនួនបួន ដូចជា ទី១ ការផ្សព្វផ្សាយដោយផ្តោតលើព័ត៌មានវិជ្ជមាន ដែលផ្តល់ពុទ្ឋិជាប្រទីប សម្រាប់បញ្ញាញ្ញាណរបស់សាធារណៈជន ទី២ បង្ហាញពីមុខមាត់កម្ពុជាលើឆាកអន្តរជាតិ តាមរយៈសារព័ត៌មាន ដែលនិយាយពីការអភិវឌ្ឍសេដ្ឋកិច្ច សង្គមកម្ពុជា។
ទី៣ បង្កើតនូវចលនាជាតិនិយមមួយ តាមរយៈបណ្តាញព័ត៌មាន ដើម្បីឥ្យប្រជាពលរដ្ឋ បានយល់ដឹងពីគោលនយោបាយរបស់រាជរដ្ឋាភិបាលថាដើរទៅលើផ្លូវណា ក្នុងគោលដៅអ្វី និងដើម្បីអ្វី។ ទី៤ សារព័ត៌មានជាដៃគូរបស់រាជរដ្ឋាភិបាល សម្រាប់ជាកញ្ចក់ឆ្លុះពីរដ្ឋាភិបាលទៅកាន់ប្រជាពលរដ្ឋ និងពីប្រជាពលរដ្ឋមកកាន់រដ្ឋាភិបាល។លោកយិន លាងគង់បានបញ្ជាក់ថា “ចក្ខុវិស័យរបស់CEMEA គឺចង់ឃើញ និងចង់រួមចំណែកជាមួយរាជរដ្ឋាភិបាល ដោយនាំប្រទេសឆ្ពោះ ទៅកាន់ឋានៈជាប្រទេស មានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងប្រទេសមានប្រាក់ចំណូលខ្ពស់នៅឆ្នាំ២០៥០ខាងមុខ៕

        ដោយៈ ស៊ីវ ម៉េង

        ភ្នំពេញៈ ក្រុមហ៊ុនCanopy Sands Development(CSD)​ដែលបាននិងកំពុងអភិវឌ្ឍន៍គំរោងThe Bay of Lightតម្លៃ១៦ពាន់លានដុល្លារ បាននាំយកនូវក្រុមហ៊ុនAIM Congressលំដាប់ពិភពលោកមកកាន់កម្ពុជា។

ក្រុមហ៊ុនCDS បានប្រកាសឲ្យដឹងកាលពីពេលថ្មីៗនេះអំពីការចាប់ដៃគូយុទ្ធសាស្ត្រ ជាមួយសន្និបាត Annual Investment Meeting ដែលជាវេទិកាវិនិយោគដ៏ល្បី របស់សហភាពអារ៉ាប់រួម ក្នុងគោលដៅពង្រឹងទំនាក់ទំនងរវាងទីផ្សារអាស៊ី ជាមួយទីផ្សារមជ្ឈឹមបូព៌ា ក៏ដូចជាជំរុញដល់កំណើនសេដ្ឋកិច្ចកម្ពុជាផងដែរ។ក្រោមកិច្ចសហការនេះ នឹងមានការបង្កើតនូវសន្និបាត AIM Congress Asia នៅលើទឹកដីនៃគម្រោងអភិវឌ្ឍន៍ Bay of Lights ក៏ដូចជាការបង្កើតមជ្ឈមណ្ឌលសន្និបាត និងពិព័រណ៌ស្តង់ដារអន្តរជាតិដំបូងនៃខេត្តព្រះសីហនុ លើផ្ទៃដីទំហំ១១ហិកតា ក្នុងគម្រោងអភិវឌ្ឍន៍ Bay of Lights។

ក្នុងសន្និបាត AIM Congress ឆ្នាំ ២០២៤ ខាងមុខនេះនៅទីក្រុងអាប៊ូដាប៊ី គម្រោង Bay of Lights និង AIM Congress ក៏គ្រោងនឹងសម្រេចសម្រួលគ្នា លើកិច្ចព្រមព្រៀងអភិវឌ្ឍន៍រួមគ្នា ថ្មីមួយទៀត ដែលកាន់តែសបញ្ជាក់ពីការប្ដេជ្ញាខ្ពស់ របស់ភាគីទាំងពីរក្នុងការបង្កើ​តអនាគតដ៏រីកចម្រើន តាមរយៈយុទ្ធសាស្ត្រអភិវឌ្ឍន៍ ប្រកបដោយភាពច្នៃប្រឌិតខ្ពស់។មហាសន្និបាត AIM Congress គឺជាវេទិកាវិនិយោគកំពូលនៅមជ្ឈឹមបូព៌ាដែលផ្ដោតសំខាន់លើ ការវិនិយោគផ្ទាល់ពីបរទេ ស ទីក្រុងអនាគត និងសហគ្រាសធុនតូច និងមធ្យម ដែលសំដៅលើកកម្ពស់សេដ្ឋកិច្ច និងពង្រឹងទំនាក់ទំនងអន្តរជាតិ ដោយកន្លងមកបានទទួលស្វាគមន៍គណៈប្រតិភូចូលរួមជាង១ម៉ឺននាក់ មកពី១៧៥ប្រទេស និងមានការដាក់តាំងបង្ហាញអាជីវកម្ម ពីក្រុមហ៊ុនជាង៥០០ មកពីជុំវិញពិភពលោក។ កិច្ចប្រជុំវិនិយោគប្រចាំឆ្នាំ (AIM) គឺជាគំនិតផ្តួចផ្តើមរបស់មូលនិធិ AIM Foundation ដែលជាអង្គការអន្តរជាតិឯករាជ្យមួយ ដែលបានប្តេជ្ញាចិត្តយ៉ាងពេញលេញ ក្នុងការផ្តល់អំណាចដល់សេដ្ឋកិច្ចពិភពលោក តាមរយៈការជំរុញយុទ្ធសាស្រ្ត លើកកម្ពស់ប្រកបដោយប្រសិទ្ធភាព និងសម្របសម្រួលឱកាសសម្រាប់ផលិតភាព និងការពង្រីកសេដ្ឋកិច្ច៕ ប្រភពPropertyarea.asia

        ដោយៈ គង់ ហ្វីអូណា

        ភ្នំពេញៈ ការគាំទ្រគម្រោងព្រែកជីកហ្វូណន-តេជោ បានក្លាយជាចលនាជាតិមួយដ៏ខ្លាំង ក្រោយការប្រកាសសុំការចូលរួមគាំទ្រពីសំណាក់សម្ដេចតេជោហ៊ុន សែន អតីតនាយករដ្ឋមន្ដ្រីនៃកម្ពុជា ដែលបច្ចុប្បន្នជាប្រធានព្រឹទ្ធសភា ហើយក៏ជាអ្នកសម្រេចចិត្តក្នុងគណៈរដ្ឋមន្ដ្រីកាលពីអាណត្តិទី៦កន្លងទៅនេះ។

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានថ្លែងក្នុងពិធីអបអរទិវាពលកម្មអន្តរជាតិ១ ឧសភា ដោយបានបន្ដលើកឡើងពាក់ព័ន្ធ ជាមួយគម្រោងដ៏មានសារៈសំខាន់មួយនេះ សម្រាប់ជាតិ និងប្រជាជនកម្ពុជាទាំងមូល។

សម្ដេចធិបតីបានបញ្ជាក់ថា “គម្រោងព្រែកជីកហ្វូណន-តេជោ បើទោះបីមិនមានបរទេសណាចូលរួម ក៏ខ្មែរអាចកសាងព្រែកជីកមួយនេះបានដោយខ្លួនឯងផងដែរ ដោយសម្ដេចបានបង្ហាញនូវសេណារីយ៉ូ ឬរូបមន្ដ ចំនួន៣ ក្នុងការសម្រេចបាននូវព្រែកជីកមួយនេះ”។

សម្ដេចធិបតីនាយករដ្ឋមន្ដ្រីនៃកម្ពុជា បានមានប្រសាសន៍ថា យើងស្វាគមន៍វិនិយោគពីបរទេស ដែលបានធ្វើកិច្ចការមួយជំហ៊ានហើយ យើងលើកទឹកចិត្ត។

សម្តេចបញ្ជាក់ថា “ខ្ញុំសូមបញ្ជាក់ថា មាន ឬមិនមានការចូលរួមពីវិនិយោគបរទេស ខ្មែរត្រូវតែធ្វើឲ្យបានគម្រោងមួយនេះ (ព្រែកជីកហ្វូណន-តេជោ) អត់មានថយក្រោយទេ”។ សម្តេចបន្តថា “យើងបានរៀបចំសេណារីយ៉ូ៣តង់រួចមកហើយ ដែលឯកឧត្តម ស៊ុន ចាន់ថុល ជាមួយខ្ញុំពិភាក្សារួចហើយ”។

បើទោះបីមិនទាន់បង្ហាញនូវរូបមន្ដឬសេណារីយ៉ូ៣ ដែលសម្ដេចធិបតី ហ៊ុន ម៉ាណែត បានបង្ហើបនោះ តែសម្ដេចបានបង្ហាញក្ដីរំពឹងថា សម្តេចនឹងមានឱកាសជិះកាណូតកម្សាន្ត លើព្រែកជីកហ្វូណន-តេជោ ខណៈការដ្ឋានសាងសង់ព្រែកជីកហ្វូណន -តេជោ អាចនឹងបើកការដ្ឋាននៅចុងឆ្នាំ២០២៤នេះ ហើយបើយូរបំផុត គឺនៅឆ្នាំ២០២៥។

សម្ដេចធិបតី ហ៊ុន ម៉ាណែត បានអះអាងថា “ថវិកាសម្រាប់សាងសង់ព្រែកជីកហ្វូណន-តេជោ បានត្រៀមបម្រុងរួចហើយ មិនតម្រូវការមូលនិធិពីប្រជាពលរដ្ឋនោះទេ ខណៈការគាំទ្រផ្នែកស្មារតី គឺជាការគាំទ្រដ៏ធំធេង”។ សម្ដេចធិបតីបានបន្តថា “រាជរដ្ឋាភិបាលមិនមានគម្រោងបង្កើតមូលនិធិ សម្រាប់សាងសង់ព្រែកជីកហ្វូណន-តេជោនោះឡើយ”។

ទន្ទឹមគ្នានេះ សម្ដេចធិបតីប្រមុខនៃរាជរដ្ឋាភិបាល បានអំពាវនាវដល់ប្រជាពលរដ្ឋខ្មែរគ្រប់និន្នាការ និងសាសនា ចូលរួមគាំទ្រឲ្យគម្រោ​ងព្រែកជីកហ្វូណន-តេជោ សម្រេចបានជោគជ័យ ហើយសម្ដេចបានថ្លែងអំណរគុណប្រជាពលរដ្ឋខ្មែរទាំងក្នុង និងក្រៅប្រទេស ដែលបានចេញសារយ៉ាងច្រើនអនេក មកគាំទ្រគម្រោងព្រែកជីកហ្វូណន-តេជោ ដើម្បីកម្ពុជាផ្លូវដឹកជញ្ជូនដោយខ្លួន មានកន្លែងដកដង្ហើមដោយខ្លួនឯង។

ទាក់ទិននឹងការលើកឡើងផ្សេងៗ ពាក់ព័ន្ធគម្រោងព្រែកជីកហ្វូណន-តេជោ, សម្តេចធិបតី ហ៊ុន ម៉ាណែត ឆ្លៀតចោទសួរទៅត្រឡប់ទៅជនក្បត់ជាតិ សម រង្ស៉ី តើមានចេតនាបែបណា និងរូបភាពបែបណា ដែលប្រឆាំងគម្រោងព្រែកជីកហ្វូណន-តេជោ ដូចនឹងអ្នកស្រា​វជ្រាវរបស់វៀតណាម?។

សម្ដេចធិបតី ហ៊ុន ម៉ាណែត បានចោទសួរជនក្បត់ជាតិ៣ជំនាន់ថា តើចំណេញ ឬខាតរវាងដឹកចេញតាមព្រែកជីករបស់ខ្លួនឯង និងចំណាយលុយឆ្លងកាត់តាមប្រទេសគេ? សម្ដេចផ្តាំទៅជនក្បត់ជាតិ សម រង្ស៉ី សូមតម្កល់ប្រយោជន៍សម្រាប់ជាតិ កុំប្រឆាំង ដើម្បីប្រឆាំង។

គម្រោងព្រែកជីកហ្វូណនតេជោនេះ តភ្ជាប់ផ្លូវទឹករវាងទន្លេរទៅកាន់សមុទ្រកម្ពុជា ដោយឆ្លងកាត់ ខេត្តកណ្តាល តាកែវ កំពត និងខេត្តកែប ដែលមានប្រវែង១៨០គីឡូម៉ែត្រ។

ព្រែកជីកហ្វូណនតេជោ និងផ្តល់អត្ថប្រយោជន៍ដ៏មហាសាលដល់ប្រទេសកម្ពុជា ជាពិសេសវិស័យដឹកជញ្ជូន ដូចជា កាត់បន្ថយតម្លៃដឹកជញ្ជូន កាត់បន្ថយពេលវេលា ចម្ងាយ ការខូចខាតផ្លូវថ្នល់ ការកកស្ទះចរាចរណ៍ គ្រោះថ្នាក់ចរាចរណ៍ ក៏ដូចជាកាត់ បន្ថយនីតិវិធីសម្រាប់នាវា និងបែបបទក្នុងការ ឆ្លងកាត់ទំនិញពីកម្ពុជាទៅសមុទ្រ ការបង្កើតតំបន់ពាណិជ្ជកម្ម តំបន់សេដ្ឋកិច្ចពិសេស ការអភិវឌ្ឍន៍ផែរណបថ្មីៗជាច្រើន ការពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម ទេសចរណ៍ ជួយរំដោះទឹកជំនន់ក្នុងរដូវវស្សា ជួយបង្កើនផលត្រីទឹកសាបនៅតាមព្រែក អចលនទ្រព្យ និងការវិនិយោគផ្សេងៗ។ល។ និយាយជារួម គម្រោងព្រែកជីកហ្វូណនតេជោនេះ គឺជាគម្រោងបម្រើផល ប្រយោជន៍ជាតិដ៏ធំធេង ជាពិសេស ផ្នែកសេដ្ឋកិច្ចសង្គមនៅកម្ពុជា៕

ដោយៈ ស៊ីវ ម៉េង

        ភ្នំពេញៈ ផ្ទៃដីប្រមាណ៤០ភាគរយ ត្រូវបានរក្សាទុកសម្រាប់ក្រុមអ្នកមាន ដែលរស់នៅក្នុងបុរីវិមានសំណាង សម្រាប់ការសំរាកលំហែរ រត់ហាត់ប្រាណ និងបង្កើតនូវខ្យល់បរិសុទ្ឋ ក្នុងសហគមន៍នេះ។

លោកជំទាវឧកញ៉ាគង់ សំណាងអគ្គនាយិកាបុរីវិមានសំណាងបានមានប្រសាសន៍ឲ្យដឹងថា ការរចនាប្លង់បុរីរបស់យើង បានធ្វើឡើងប្រកបដោយភាពClassic ដែលអាចអនុញ្ញាត្តឲ្យអ្នករស់នៅក្នុងសហគមន៍នេះរីករាយជាមួយខ្យល់អាកាស និងបរិស្ថានស្រស់បំព្រង។

លោកជំទាវបន្តថា “យើងបាននិងកំពុងរក្សាទុកផ្ទៃដីប្រមាណ៤០ភាគរយ និងព្រែកធម្មជាតិប្រវែង១គីឡូម៉ែត្រ សម្រាប់ផ្តល់នូវសំណើមត្រជាក់ និងខ្យល់បរិសុទ្ឋ”។ លោកជំទាវបន្តថា “ស្ថិតនៅលើផ្ទៃដី២៥ហិកតា ក្រុមហ៊ុនសាងសង់ផ្ទះវីឡា តែជាង៤០០ប៉ុណ្ណោះ សម្រាប់សហគមន៍ ដែលពោរពេញដោយភាពស៊ីវិល័យមួយនេះ”។

លោកជំទាវឧកញ៉ាគង់ សំណាងបានបន្តថា ការគិតគូអតិថិជន ជាគោលដៅររបស់យើង មិនផ្តោតតែប្រាក់ចំណេញមួយមុខ ទើបយើង​សាងសង់ផ្ទះជាមួយរចនាបទរសរវើក តាមបែបសហសម័យ ដោយ​ប្រើប្រាស់ឥដ្ឋ២០ ដែលផ្តល់ភាពត្រជាក់មនោរម្យ ដល់ម្ចាស់ផ្ទះនិមួយៗ ដែលយើងបានសម្រិតសម្រាំងឡើង  សម្រាប់ក្រុមអភិជនសម័​យ​ថ្មី។

លោកជំទាវបន្តថា ក្រៅពីសេវាកម្មថែរទាំបុរី យ៉ាងយកចិត្តទុកដាក់នាពេលអនាគត បុរីវិមានសំណាងក៏បានគិតគូ ដល់បរិស្ថានជុំវិញ ជាមួយការថែរទាំយ៉ាងយកចិត្តទុកដាក់ ពីសំណាក់បុគ្គលិករបស់យើង។

ជាមួយគ្នានេះ លោកឧកញ៉ាបណ្ឌិតគីម ហ៊ាងប្រធានKW Cambodia និងជាអ្នកអភិវឌ្ឍន៍បុរីវិមានសំណាងក៏បានប្រកាសផ្តល់នូវដំណើរកំសាន្ត ទៅកាន់សហរដ្ឋអាមេរិក និងទៅទស្សនាបាល់ទាត់នៅចក្រភពអង់គ្លេស ដល់អ្នកទទួលបានជោគជ័យ ក្នុងការលក់បុរីនេះផងដែរ៕