ដោយ: គង់ លាងហួរ
បាងកក: យោងតាមសារពត៌មាន Bangkok Post បានចុះផ្សាយថា ក្រុមហ៊ុនចំណីអាហារ Thai President Foods ជាក្រុមហ៊ុនផលិតមីកញ្ចប់ Mama បានប៉ាន់ប្រមាណថា ទីផ្សារមីកញ្ចប់នឹងបន្តកើនឡើងនៅឆ្នាំនេះ និងគ្រោងពង្រីករោងចក្រនៅបរទេស។
លោក Pun Paniangvait អ្នកគ្រប់គ្រងការិយាល័យប្រធានក្រុមហ៊ុន Thai President Foods បានមានប្រសាសន៍ឱ្យដឹងថា ក្រុមហ៊ុន គ្រោងនឹងពង្រីករោងចក្ររបស់ខ្លួន នៅប្រទេសហុងគ្រី និងកម្ពុជា។ ទោះជាយ៉ាងណា លោកពុំបានបង្ហើបអំពីទំហំទុនវិនិយោគ ឬពេលវេលាជាក់លាក់នៃការពង្រីកនោះទេ។
-->
លោកបានបន្តថា ទីផ្សារមីកញ្ចប់របស់ប្រទេសថៃ បានកើនឡើងចន្លោះពី៨ទៅ៩ភាគរយ នៅក្នុងឆមាសទីមួយឆ្នាំនេះ ហើយក្រុមហ៊ុនបានព្យាករណ៍ អត្រាកំណើនដូចគ្នានេះសម្រាប់ពេញមួយឆ្នាំ២០២៤។
លោក Pun បានបញ្ជាក់ថា “ក្រុមហ៊ុនចំណីអាហារ Thai President Foods រំពឹងថា កំណើននៃការលក់មីកញ្ចប់របស់យើងនឹងសម្រេចបានអត្រាខ្ពស់ ជាងកំណើននៃការលក់នៅលើទីផ្សាររួមបន្តិច”។
ទន្ទឹមគ្នានេះ ក្រុមហ៊ុនក៏ជឿជាក់ថា ផ្នែកមីកញ្ចប់ពិសេសដូចជាប្រភេទមី Ok Mama មានសក្តានុពលខ្ពស់ ក្នុងការលក់ដាច់ច្រើនជាងផលិតផលមីធម្មតារបស់ខ្លួន។
យោងតាមក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិថៃបានឱ្យដឹងថា អំណាចនៃការទិញរបស់អ្នកប្រើប្រាស់ នៅក្នុងប្រទេសថៃកំពុងធ្លាក់ចុះ ខណៈសមាមាត្របំណុលគ្រួសារបានកើនឡើង ដល់៩០,៨%នៃទំហំផលទុនជាតិសរុប (GDP) នៅក្នុងត្រីមាសទីមួយឆ្នាំ២០២៤។
លោក Pun បានបញ្ជាក់បន្ថែមថា ការដាក់ចេញវិធានការជំរុញថ្មីណាមួយ របស់រដ្ឋាភិបាល នឹងអាចធ្វើឱ្យប្រសើរឡើងនូវអំណាច នៃការទិញរបស់អ្នកប្រើប្រាស់។ ប៉ុន្តែការណ៍នេះនឹងមិនជះឥទ្ធិពលខ្លាំង លើការលក់របស់ក្រុមហ៊ុននោះទេ៕ប្រភព: Bangkok Post៕


