ដោយៈ គង់ សូរិយា

        ភ្នំពេញៈ មន្រ្តីជាន់ខ្ពស់ក្រសួងធនធានទឹក និងឧតុនិយមបានលើកឡើងនូវផែនការមួយចំនួន ដើម្បីប្រែក្លាយតំបន់ស្នូលសំខាន់ៗនៃបឹងទន្លេសាបជាតំបន់ស្តុកទឹក និងជាផ្លូវដឹកជញ្ជូនដ៏សំខាន់នាពេលអនាគត។

រដ្ឋលេខាធិការក្រសួងធនធានទឹក និងឧតុនិយមលោកចាន់ ស៊ីណាត បានមានប្រសាសន៍ឲ្យដឹងថា ក្រសួងនឹងអនុវត្តន៍នូវយុទ្ធសាស្រ្តខាងលើនៅក្នុងតំបន់៣ នៃបឹងទន្លេសាបឱ្យបានលទ្ធផលល្អ ដោយធ្វើការកសាង ប្រព័ន្ធប្រឡាយព្រំខណ្ឌសីមា រវាងតំបន់២ និងតំបន់៣ ដែលជាប្រព័ន្ធប្រឡាយដ៏មានសារសំខាន់ ក្នុងការរក្សាទឹកទុក ក្នុងពេលអាកាសធាតុមានការប្រែប្រួលយ៉ាងខ្លាំង និងធ្វើជាផ្លូវគមនាគមន៍តាមផ្លូវទឹក ប្រកបដោយសក្តានុពលផងដែរ។លោកបានអញ្ជើញដឹកនាំកិច្ចប្រជុំបន្ទាន់មួយ ដើម្បីត្រួតពិនិត្យលើការវិវឌ្ឍថ្មីៗ នាពេលបច្ចុប្បន្ននៅក្នុងតំបន់៣ នៃបឹងទន្លេសាប ក្នុងភូមិសាស្ត្រសុ្រកបាកាន ស្រុកកណ្តៀង និងស្រុកក្រគរ ខេត្តពោធិ៍​សាត់ ដោយមានការចូលរួមពីក្រុមការងាររបស់ក្រសួង មន្ទីរ និងអាជ្ញាធរពាក់ព័ន្ធ​ក្នុងមូលដ្ឋានទាំងអស់។

លោកចាន់ ស៊ីណាតបានបញ្ជាក់ថា កិច្ចប្រជុំនាពេលនេះ ដើម្បីធ្វើការវាយតម្លៃប្រកបដោយសុក្រឹតភាព និងមានប្រសិទ្ធភាពខ្ពស់ ឈានទៅកសាង និងអនុវត្តនូវយុទ្ធសាស្ត្រពង្រឹង និងពង្រីកការគ្រប់គ្រង និងប្រើប្រាស់វិស័យធនធានទឹក ដ៏សម្បូរបែបរបស់បឹងទន្លេសាប ក្នុងពេលដ៏ខ្លីខាងមុខ ដោយធានាឱ្យបាននូវសន្តិសុខទឹកលើគ្រប់វិស័យសម្រាប់ខេត្តពោធិ៍សាត់ ដែលយ៉ាងហោចណាស់អាចស្រោចស្រពផ្ទៃដី បានទំហំប្រមាណ៣០,០០០ហិកតាបន្ថែមទៀត៕

ដោយ: គង់ លាងហួរ

អន្តរជាតិ: ក្រុមហ៊ុនផ្លូវដែករដ្ឋរបស់ប្រទេសថៃ(SRT) គ្រោងនឹងពង្រីកសេវាកម្មរថភ្លើងបាងកក -ណងខៃ(Bangkok-Nong Khai)របស់ខ្លួន ទៅកាន់ទីក្រុងវៀងចន្ទន៍ ប្រទេសឡាវ ក្នុងខែមេសាខាងមុខ។

លោក Pichet Kunadhamraks អគ្គនាយកនៃនាយកដ្ឋានដឹកជញ្ជូនតាមផ្លូវដែកបានលើកឡើងថា រថភ្លើងនឹងចាប់ផ្តើមបើកដំណើរការជាបណ្តោះអាសន្ន ចេញពីស្ថានីយ៍ Thanaleng រួចឆ្លងកាត់ព្រំដែនក្នុងប្រទេសឡាវ ឆ្ពោះទៅកាន់ស្ថានីយ៍ Khamsavath ក្នុងទីក្រុងវៀងចន្ទន៍នៅខែមីនា ដើម្បីត្រៀមរៀបចំពង្រីកសេវាកម្មបន្ថែមទៀតនៅក្នុងខែមេសា។

លោកបានបន្តថា បច្ចុប្បន្ន ក្រុមហ៊ុន SRT បាននិងកំពុងបើកដំណើរការ រថភ្លើងចេញពីស្ថានីយ៍ Nong Khai ទៅកាន់ស្ថានីយ៍ Thanaleng ក្នុងប្រទេសឡាវ រួចទៅហើយ ខណៈជំហានចុងក្រោយគឺជាការធ្វើដំណើរចេញពីស្ថានីយ៍ Thanaleng ទៅស្ថានីយ៍ Khamsavath ក្នុងរដ្ឋធានីវៀងចន្ទន៍។

ស្ថានីយ៍ Nong Khai មានចម្ងាយ១៣គីឡូម៉ែត្រពីស្ថានីយ៍ Khamsavath ។ រីឯ សំបុត្រធ្វើដំណើរ នឹងមានតម្លៃប្រហែល១,៧ដុល្លារទៅ២ដុល្លារ ដោយចំណាយពេលលើការធ្វើដំណើរ ប្រហែល២០នាទី។

បច្ចុប្បន្ននេះ អាជ្ញាធរថៃ និងឡាវ កំពុងធ្វើការរួមគ្នាលើព័ត៌មានលម្អិតនៃនីតិវិធីអន្តោប្រវេសន៍។ អាជ្ញាធរនៃប្រទេសទាំង២ លើកឡើងថា ការត្រួតពិនិត្យឯកសារ គួរតែត្រូវបានធ្វើឡើងតែម្តងប៉ុណ្ណោះ ទាំងនៅទីក្រុងណងខៃ ឬទីក្រុងវៀងចន្ទន៍ ដើម្បីបង្កភាពងាយស្រួលដល់អ្នកដំណើរ។

នៅពេលដែលសេវាកម្មចាប់ផ្តើមបើកដំណើរការ សេវារថភ្លើងបាងកក-ណងខៃ ដែលចេញដំណើរពីស្ថានីយ Krung Thep Aphiwat Central Terminal នឹងត្រូវប្តូរឈ្មោះទៅជាសេវារថភ្លើងបាងកក-វៀងចន្ទន៍ជំនួសវិញ៕

        ដោយៈ គង់ ហ្វីអូណា

        ភ្នំពេញៈ ក្រុមហ៊ុន Prince Real Estate Group បានប្រកាសជាផ្លូវការនូវភាពជាដៃគូរវាង Prince Happiness Plaza និង Radisson Hotel Group ដែលគ្រោងនឹងបើកដំណើរការ នៅត្រីមាសទី1 ឆ្នាំ 2026។

សណ្ឋាគារ Radisson RED Phnom Penh និងសណ្ឋាគារ Radisson Blu Hotel & Residences គឺជាម៉ាកយីហោតំណាងឲ្យ Radisson Hotel Group ក្នុងការបោះជំហានចូលក្នុងទីផ្សាររបស់កម្ពុជា។

លោកសេង ម៉េងហុង រដ្ឋលេខាធិការ និងជានាយកខុទ្ទកាល័យក្រសួងទេសចរណ៍ លោក Ramzy Fenianos ប្រធានផ្នែកអភិវឌ្ឍន៍ប្រចាំតំបន់អាស៊ីបាស៊ីហ្វិកនៃ Radisson Hotel Group លោក Edward Lee នាយកប្រតិបត្តិនៃក្រុមហ៊ុន Prince Real Estate Group តំណាងពាក់ព័ន្ធក្នុងវិស័យបដិសណ្ឋារកិច្ច និងមិត្តអ្នកសារព័ត៌មានបានអញ្ជើញចូលរួម និងធ្វើជាសាក្ខីភាពក្នុងកម្មវិធីដ៏អស្ចារ្យនេះកាលពីព្រឹកថ្ងៃទី៧ កុម្ភៈកន្លងមកនេះ។Radisson Blu Hotel & Residences Phnom Penh នឹងផ្តល់ឱ្យភ្ញៀវទេសចរធុរកិច្ច នូវបន្ទប់ស្នាក់នៅប្រណិតចំនួន 250 ដែលក្នុងនោះ បន្ទប់ចំនួន160 ត្រូវបានរៀបចំយ៉ាងល្អប្រណិត និងបន្ទប់ចំនួន 90 ទៀតជាបន្ទប់ស្នាក់បែបម៉ាកយីហោ ដោយបន្ទប់ Deluxe Studio Residences មានទំហំ40 ម៉ែត្រការ៉េ ដល់បន្ទប់ស្នាក់មានបន្ទប់គេង 3 ដែលមានទំហំ 210 ម៉ែត្រការ៉េ ជាមួយនឹងស្កាយបារ និងអាងហែលទឹកលើអាកាស ដែលអាចឱ្យភ្ញៀវគយគន់ទេសភាពលើវេហា និងដងទន្លេបានយ៉ាងល្អប្រសើរ។

សណ្ឋាគារ Radisson RED Hotel Phnom Penh ដែលមានការឌីហ្សាញទំនើបនាំមុខគេ នឹងទាក់ទាញភ្ញៀវទេសចរបែបធុរកិច្ចនិងភ្ញៀវធ្វើដំណើរកម្សាន្តឲ្យមកស្នាក់នៅ ដើម្បីទទួលបានភាពស្រស់ស្អាតនៃទីក្រុង។ សណ្ឋាគារទាន់សម័យមួយនេះ មានបន្ទប់ចំនួន 200 ដែលរួមមានបន្ទប់Deluxe Room និងបន្ទប់ស្វីតគ្រែមួយ ដ៏ទំនើបទាន់សម័យ។សណ្ឋាគារទាំងពីរនេះ ក៏មានភោជនីយដ្ឋានពេញមួយថ្ងៃ សាលទទួលភ្ញៀវ ស្ប៉ា និងកន្លែងហាត់ប្រាណផងដែរ។ ភ្ញៀវទេសចរអាចប្រើប្រាស់កន្លែងការងាររួម កន្លែងអានសៀវភៅ និងកន្លែងរៀបចំព្រឹត្តិ​ការណ៍ សម្រាប់ការប្រជុំបែបធុរកិច្ច និងការទំនាក់ទំនងក្នុងសង្គមផងដែរ។ការសហការជាមួយ Radisson ដើម្បីនាំយកម៉ាកសណ្ឋាគារ Radisson Blu Hotel & Residences ចូលក្នុងប្រទេសកម្ពុជាលើកដំបូងគេនេះ នឹងធ្វើឱ្យ Prince Happiness Plaza ក្លាយជាជម្រើសទីមួយសម្រាប់ការវិនិយោគលើអចលនទ្រព្យ ក៏ដូចជា ភាពជាម្ចាស់ ដោយសារតម្លៃជួលថេររបស់វា។ ជាមួយនឹងគ្រឿងបរិក្ខារពេញលេញ សណ្ឋាគារ Radisson Blu Hotel & Residences Phnom Penh នឹងក្លាយជាការផ្តល់ជូនបន្ថែមថ្មីបំផុត ក្នុងវិស័យអចលនទ្រព្យលំដាប់ខ្ពស់ ដែលជាជម្រើសមួយផ្សេងទៀត សម្រាប់អភិជនក្នុងទីក្រុងដែលស្វែងរកការរស់នៅប្រកបដោយឧត្តមភាព។

លោក Edward Lee នាយកប្រតិបត្តិនៃក្រុមហ៊ុន Prince Real Estate Group បានមានប្រសាសន៍ក្នុងពិធីនេះថា កិច្ចសហប្រតិបត្តិការរវាង Prince Happiness Plaza និង Radisson Hotel Group នឹងពង្រីកបន្ថែមទៀត នូវអាជីវកម្មផ្នែកសណ្ឋាគារលំដាប់ខ្ពស់ នៅក្នុងរាជធានីភ្នំពេញ និងផ្តល់នូវសេវាកម្ម concierge ស្តង់ដារពិភពលោក និងអន្តរជាតិដល់អតិថិជនទាំងក្នុង និងក្រៅប្រទេស តាមរយៈសម្ព័ន្ធភាពដ៏រឹងមាំ ក្នុងគោលបំណងបង្កើតជាគំរូថ្មីនៃជីវិតរស់នៅ និងទេសចរណ៍ ដែលមានគុណភាពខ្ពស់នៅក្នុងតំបន់។ក្នុងពេលជាមួយគ្នានេះ ប្រាក់ចំណូលពីការជួលខុនដូដែលមានស្ថិរភាព ដែលធ្វើការគ្រប់គ្រងដោយ Radisson Blu នឹងផ្តល់ជាជម្រើសកាន់តែច្រើនដល់អតិថិជន ហើយវាក៏ជាការបោះជំហានថ្មីមួយទៀតរបស់ក្រុមហ៊ុន Prince Real Estate Group ផងដែរ។

លោក Ramzy Fenianos បានមានប្រសាសន៍ថា កិច្ចសហប្រតិបត្តិការនេះ គឺជាការបង្ហាញខ្លួនលើកដំបូងរបស់ Radisson Hotel Group នៅកម្ពុជា។ កម្ពុជាគឺជាទីផ្សារដែលមានការរីកចម្រើនមួយ និងមានសក្ដានុពលធំធេងសម្រាប់អាជីវកម្ម និងការធ្វើដំណើរកម្សាន្ត ដូច្នេះការអភិវឌ្ឍម៉ាកយីហោទាំងពីរនេះ នឹងបន្ថែមតម្លៃយ៉ាងខ្លាំងដល់ផលបត្រ ដែលកំពុងរីកចម្រើនយ៉ាងឆាប់រហ័ស របស់ក្រុមហ៊ុននៅក្នុងតំបន់អាស៊ីអាគ្នេយ៍។ជាមួយគ្នានេះ លោកសេង ម៉េងហុង បានមានប្រសាសន៍ថា Prince Happiness Plaza គឺជាគម្រោងអចលនទ្រព្យ ដែលត្រូវបានអភិវឌ្ឍដោយក្រុមហ៊ុន Prince Real Estate Group ដែលជាក្រុមហ៊ុនអចលនទ្រព្យឈានមុខគេមួយនៅកម្ពុជា។ លោកបន្តថា “កិច្ចសហប្រតិបត្តិការជាមួយ Radisson លើកនេះ នឹងជួយជំរុញការអភិវឌ្ឍក្នុងសចរណ៍របស់កម្ពុជា”។ដោយមានការចូលរួមពីភ្ញៀវកិត្តិយសទាំងអស់ លោក Edward Lee និងលោក Ramzy Fenianos បានចុះហត្ថលេខាលើកិច្ចព្រមព្រៀង និងថតរូបជាក្រុម ដើម្បីជាសក្ខីភាពនៃការបើកទំព័រថ្មីសម្រាប់ Prince Happiness Plaza ។
សម្រាប់ព័ត៌មានលម្អិត សូមទូរស័ព្ទមកលេខ៖ 023951666 / 023952666

Prince Happiness Plaza (តំណភ្ជាប់ទៅកាន់គេហទំព័រផ្លូវការរបស់គម្រោង Prince Happiness Plaza)
Prince Happiness Plaza មានទីតាំងនៅត្រង់ចំណុចប្រសព្វនៃមហាវិថីធំៗទាំងបី គឺមហាវិថីព្រះមុនីវង្ស មហាវិថីកងយុទ្ធពលខេមរភូមិន្ទ និងមហាវិថីសម្តេចតេជោហ៊ុនសែន ដោយមានភាពងាយស្រួលក្នុងការធ្វើដំណើរ។ នៅជុំវិញគម្រោងមានទីតាំងសំខាន់ៗជាច្រើន ដូចជា វិមានឯករាជ្យ សារមន្ទីរជាតិ និងព្រះបរមរាជវាំង ព្រមទាំងស្ថានទូតនៃប្រទេសជាច្រើនដូចជា អូស្ត្រាលី ជប៉ុន ថៃ រុស្សី និងម៉ាឡេស៊ី។ល។

គម្រោងនេះមានទម្រង់អាជីវកម្មជាច្រើនប្រភេទ ដូចជាអគារការិយាល័យកម្រិត5A ផ្សារទំនើបលំដាប់កំពូល និងសណ្ឋាគារលំដា​ប់ផ្កាយប្រាំលំដាប់ថ្នាក់អន្តរជាតិ។ វាក៏ជាតំបន់ពាណិជ្ជកម្មអន្តរជាតិលំដាប់ខ្ពស់ដំបូងគេ នៅក្នុងរាជធានីភ្នំពេញ ដែលរួមបញ្ចូល “លំនៅឋាន + ការិយាល័យ + បដិសណ្ឋារកិច្ច + ផ្សារទំនើប”។

លើសពីនេះ សាលធំបែបសណ្ឋាគារ ស្កាយបារទំហំ900 ម៉ែត្រការ៉េ អាងហែលទឹកលើអាកាសទំហំ700 ម៉ែត្រការ៉េ និងកន្លែងហាត់ប្រាណទំហំ496ម៉ែត្រការ៉េ ដែលត្រូវបានឌីហ្សាញស្របតាមស្តង់ដារកំពូលក្នុងទីផ្សារ។

Prince Happiness Plaza មានផ្តល់ជូននូវបន្ទប់ខុនដូដែលមានទំហំប្រមាណ32-96 ម៉ែត្រការ៉េ ដែលមានទាំងបន្ទប់ស្ទូឌីយ៉ូ បន្ទប់គេងមួយ និងបន្ទប់គេងពីរដែលមានផាសុកភាព និងទាន់សម័យ។ យើងបង្កើតជីវិតរស់នៅដ៏ថ្លៃថ្នូរមួយ សម្រាប់ឥស្សរជនក្នុងទីក្រុងភ្នំពេញ។ Prince Happiness Plazaផ្តល់នូវតម្លៃបន្ថែមតាមរយៈអាផាតម៉ិន បែបសណ្ឋាគារលំដាប់ផ្កាយប្រាំ និងហាងទំនិញម៉ាកល្បីៗដែលនឹងមកដល់ក្នុងពេលឆាប់ៗនេះ។ Prince Happiness Plaza គឺជាជម្រើសដ៏ល្អបំផុតមួយ សម្រាប់ការវិនិយោគនៅទីក្រុងភ្នំពេញ។

អំពី Radisson Hotel Group
Radisson Hotel Group គឺជាក្រុមសណ្ឋាគារអន្តរជាតិមួយ ដែលកំពុងប្រតិបត្តិការនៅអឺរ៉ុប មជ្ឈិមបូព៌ា និងអាស៊ីប៉ាស៊ីហ្វិក ដែលមានសណ្ឋាគារជាង1,270 នៅក្នុងប្រទេសជាង90 ។ ក្រុមសណ្ឋាគារអន្តរជាតិមួយនេះ កំពុងពង្រីកខ្លួនយ៉ាងឆាប់រហ័ស ជាមួយនឹងផែនការបង្កើន ផលប័ត្ររបស់ខ្លួនក្នុងកម្រិតធំមួយ។ ការសន្យាម៉ាកយីហោដ៏សំខាន់បំផុតរបស់ Radisson គឺ Every Moment Matters ជាមួយនិងស្មារតីសេវាកម្ម ” Yes I Can!” ។

ម៉ាករបស់ Radisson រួមមាន Radisson Collection, art’otel, Radisson Blu, Radisson, Radisson RED, Radisson Individuals, Park Plaza, Park Inn by Radisson, Country Inn & Suites by Radisson៕

ដោយ: គង់ លាងហួរ

អន្តរជាតិ: ប្រទេស​ចិន​ គឺ​ជា​ម្ចាស់​ជើង​ឯក​​ ដែលបំបែកកំណត់ត្រា ក្នុង​ការ​សាង​សង់​ទំនប់វារីអគ្គិសនី ធំបំផុតនៅលើពិភព​លោក ជាពិសេស ចិនបានសាងសង់ទំនប់វារីអគ្គិសនី ដែលមានសមត្ថភាពធំជាងគេ និងកំពុងបើកដំណើរការនាពេលបច្ចុប្បន្ន គឺទំនប់ Three Gorges នៅលើទន្លេ Yangtze។

នៅពេលនេះ ប្រទេសមហាអំណាចសេដ្ឋកិច្ចធំជាងទី២ នៅលើពិភពលោកមួយនេះ កំពុងដំណើរការសាងសង់ ទំនប់វារីអគ្គិសនីធំជាងគេបង្អស់របស់ពិភពលោក ដើម្បីបំបែកកំណត់ត្រាសារជាថ្មីម្តងទៀត។

ទំនប់វារីអគ្គិសនីនេះ នឹងស្ថិតនៅផ្នែកខាងក្រោមនៃទន្លេ Yarlung Zangbo ដែលត្រូវបានគេស្គាល់ថា ជាទន្លេ Brahmaputra ក្នុងប្រទេសឥណ្ឌា ស្ថិតក្នុងចន្លោះជើងភ្នំហិម៉ាឡៃ ក្នុងតំបន់ស្វយ័តទីបេ។

ទន្លេ Yarlung Zangbo ហូរឆ្លង​កាត់​តំបន់​ទីបេ ដែលមានចម្ងាយ​ប្រហែល១.៦០០គីឡូម៉ែត្រ​ ហើយ​បន្ទាប់​មក​ហូរ​ចូល​ទៅ​កាន់ប្រទេស​ឥណ្ឌា។ ទឹក​ទន្លេ​នេះ ហូរ​កាត់រដ្ឋ Arunachal Pradesh ដែលស្ថិតនៅភាគឦសាន ប្រទេសឥណ្ឌា មុន​ពេល​ហូរ​ចូល​ទន្លេ Brahmaputra ប្រទេស​បង់ក្លាដែស។

ផែនការ​របស់​ប្រទេស​ចិន ដើម្បី​សាងសង់​ទំ នប់​វារីអគ្គិសនី ឆ្លង​កាត់​ទន្លេ Yarlung Zangbo បាន​បង្កឱ្យ​មាន​ការ​ព្រួយ​បារម្ភ​ នៅ​ក្នុង​ប្រទេស​ឥណ្ឌា និងបង់ក្លាដែស ​ដែល​ជា​ប្រទេស​ស្ថិត​នៅ​ខ្សែ​ទឹក​ខាង​ក្រោម​នៃ​ទំនប់​វារីអគ្គិសនី​តែ​មួយ។

ប៉ុន្តែទោះជាយ៉ាងនេះក្តី រដ្ឋាភិបាលចិនបានព្យាយាមបង្ហាញពីភាពត្រឹមត្រូវនៃគម្រោងរបស់ខ្លួន ដោយគូសបញ្ជាក់ថា ការកសាងទំនប់នេះនឹងជួយឱ្យប្រទេសចិន សម្រេចបាននូវគោលដៅអព្យាក្រឹតភាពកាបូនរបស់ខ្លួន នៅត្រឹមឆ្នាំ២០៦០ខាងមុខ។

ទន្ទឹមគ្នានេះ អ្នកនាំពាក្យក្រសួងធនធានទឹករបស់ប្រទេសឥណ្ឌាបានបញ្ជាក់ប្រាប់កាសែត Al Jazeera ថា ខ្លួនកំពុងរៀបចំគម្រោងសាងសង់ គម្រោងថាមពល១០ជីហ្គាវ៉ាត់ នៅលើដៃទន្លេ Brahmaputra ដើម្បីទប់ទល់នឹងផលប៉ះពាល់ នៃទំនប់វារីអគ្គិសនីរបស់ប្រទេសចិន៕

ដោយ: គង់ លាងហួរ

ភ្នំពេញ: ធនាគារពាណិជ្ជកម្មក្រៅប្រទេសនៃកម្ពុជា (FTB) បានចូលរួមជាមួយកម្មវិធីហិរញ្ញវត្ថុ ខ្សែសង្វាក់ពាណិជ្ជកម្ម និងការផ្គត់ផ្គង់ (TSCFP) របស់ធនាគារអភិវឌ្ឍន៍អាស៊ី (ADB) ដើម្បីបង្កើនហិរញ្ញវត្ថុពាណិជ្ជកម្ម សម្រាប់សហគ្រាសធុនមីក្រូ តូច និងមធ្យម (MSMEs) នៅកម្ពុជា។

លោក ឌិត សុចល នាយកប្រតិបត្តិធនាគារ FTB  និងលោកស្រី Jyotsana Varma នាយិកាធនាគារ ADB ប្រចាំប្រទេសកម្ពុជា  បានចុះហត្ថលេខា លើកិច្ចព្រមព្រៀងនេះនៅរាជធានីភ្នំពេញ។

លោកស្រី Varma បានថ្លែងនៅក្នុងព្រឹត្តិការណ៍នោះថា “កិច្ចព្រមព្រៀងនេះ គឺជាផ្នែកមួយនៃគំនិតផ្តួចផ្តើម អភិវឌ្ឍន៍វិស័យឯកជនរបស់ ADB ដើម្បីលើកកម្ពស់ការចូលរួមរបស់វិស័យនេះ ក្នុងការធ្វើពិពិធកម្មសេដ្ឋកិច្ចរបស់កម្ពុជា”។

លោកស្រីបានបន្ថែមថា “វានឹងបំពេញចន្លោះប្រហោង នៅក្នុងទីផ្សារ ដោយផ្តល់ហិរញ្ញប្បទានតាមរយៈធនាគារដៃគូ ដើម្បីគាំទ្រដល់ពាណិជ្ជកម្ម និងសហគ្រាសធុនមីក្រូ តូច និងមធ្យម ដែលតំណាងឱ្យប្រហែល៩៩ភាគរយ នៃសហគ្រាសទាំងអស់នៅក្នុងប្រទេសកម្ពុជា”។

លោកស្រីបញ្ជាក់ទៀតថា ក្នុងនាមជាធនាគារដៃគូរបស់កម្មវិធី TSCFP ធនាគារពាណិជ្ជកម្មក្រៅបរទេសនៃកម្ពុជា នឹងផ្តល់ការគាំទ្រដល់អតិថិជនជាសហគ្រិន និង MSME នៅកម្ពុជា ដោយអនុញ្ញាតឱ្យឧបករណ៍ហិរញ្ញវត្ថុពាណិជ្ជកម្ម ដែលចេញដោយFTB ទទួលបានការធានាឥណទានពីកម្មវិធី TSCFP ។ជាមួយគ្នានេះ លោក ឌិត សុចល បាននមានប្រសាសន៍ឱ្យដឹងថា ធនាគារ FTB បាននិងកំពុងធ្វើការជាមួយកម្មវិធី ADB រួចមកហើយ ដើម្បីបង្កើនចំណេះដឹង និងជំនាញរបស់ខ្លួនក្នុងការសម្របសម្រួលពាណិជ្ជកម្ម។

លោកបន្ថែមថា កម្មវិធីនេះបានជួយកសាងសមត្ថភាពរបស់ធនាគារ FTB លើការរៀបចំរបាយការណ៍ ការអនុវត្តល្អ យុទ្ធសាស្រ្តច្នៃប្រឌិត ការបណ្តុះបណ្តាល និងការវាស់វែងការអនុវត្ត។

ដោយឡែក លោកស្រី Ratchel Thompson នាយិកាប្រតិបត្តិក្នុង ក្រុមប្រឹក្សាភិបាល ធនាគារអភិវឌ្ឍន៍អាស៊ី បានសម្ដែងការគាំទ្រ មហិច្ឆតារបស់កម្ពុជា ក្នុងការបង្កើតបណ្តាញ អគ្គិសនីអាស៊ាន ក្នុងទស្សនៈចែករំលែក ការពារបរិស្ថាន និងបង្កើនសន្តិសុខថាមពលបៃតងរបស់អាស៊ាន។ការសម្ដែងការគាំទ្រនេះ បានធ្វើឡើងក្នុងឱកាសដែលលោកស្រីនាយិកា ចូលជួបពិភាក្សាការងារ ជាមួយលោក កែវ រតនៈ រដ្ឋមន្រ្តីក្រសួងរ៉ែ និងថាមពល។

ក្នុងជំនួបនោះ លោកស្រី Ratchel Thompson បានវាយតម្លៃខ្ពស់លើគោលនយោបាយ និងការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងស្ថានភាពដែលសេដ្ឋកិច្ចពិភពលោកកំពុងជួបបញ្ហាគ្រប់ទិសទី។

លើសពីនេះ លោកស្រីបានបង្ហាញសុទិដ្ឋិនិយមខ្ពស់ លើភាពជាដៃគូរវាងធនាគារ ADB និងរដ្ឋាភិបាលកម្ពុជា ហើយប្តេជ្ញាបន្តការគាំទ្រ លើផែនការអភិវឌ្ឍន៍វិស័យរ៉ែ និងថាមពលនៅកម្ពុជា៕ប្រភព៖ Xinhua៕

ដោយ: គង់ លាងហួរ
អន្តរជាតិ: អគារមួយ ដែលនឹងក្លាយជាអគារខ្ពស់ជាងគេទី១ នៅសហរដ្ឋអាមេរិក និងខ្ពស់ជាងគេលំដាប់ទី៥ នៅលើពិភពលោក គ្រោងនឹងសាងសង់ឡើង នៅក្នុងទីក្រុងដែលមនុស្សមួយចំនួនប្រហែលនឹកស្មានមិនដល់។
ក្រុមហ៊ុនអភិវឌ្ឍន៍អចលនទ្រព្យ ដែលស្ថិតនៅពីក្រោយគម្រោងនេះ បានដាក់សំណើរសាងសង់អគារថ្មី ដែលមានកំពស់១.៩០៧ហ្វីត និងមានប៉មចំនួន៤ ដែលនឹងវ៉ាដាច់អគារ One World Trade Center។

បច្ចុប្បន្ននេះ អគារខ្ពស់ជាងគេបំផុតលំដាប់លេខ១ នៅសហរដ្ឋអាមេរិកគឺអគារ One World Trade Center ដែលមានទីតាំងនៅទីក្រុងញូវយ៉ក និងមានកម្ពស់ចំនួន១.៧៧៦ហ្វីត។
គម្រោងអគារខាងលើ មិនត្រូវបានស្នើសាងសង់ឡើងនៅក្នុងទីក្រុងធំៗ ដូចជាញូវយ៉ក ឈីកាហ្គោ ឬទីក្រុងផ្សេងទៀតដែលល្បីល្បាញ និងសម្បូរទៅដោយអគារខ្ពស់ៗនោះទេ។ប៉ុន្តែផ្ទុយទៅវិញ ក្រុមហ៊ុនអភិវឌ្ឍន៍អចលនទ្រព្យ Matteson Capital និងក្រុមហ៊ុនរចនាបថស្ថាបត្យកម្ម AO កំពុងដាក់សំណើសាងសង់អគារនេះនៅទីក្រុងOklahoma។ ទីក្រុងនេះគឺជារដ្ឋដ៏តូចមួយនៅសហរដ្ឋអាមេរិក ដែលមានប្រជាជនជាង៤លាននាក់។

ក្រុមហ៊ុន AO បានអះអាងថា គម្រោងនេះ រួមមានការសាងសង់ប៉មចំនួន៤ ដែលក្នុងនោះ ប៉មចំនួន៣នឹងមានកម្ពស់៣៤៥ហ្វីតដូចៗគ្នា ខណៈប៉មទី៤ ឈ្មោះ “Legends Tower” នឹងមានកំពស់ខ្ពស់ជាងគេចំនួន១.៩០៧ហ្វីត។

នៅពេលសាងសង់បញ្ចប់ អគារ Legends Tower នឹងក្លាយទៅជាអគារពហុមុខងារ ដែលក្នុងអគារនោះ រួមមានទាំង សណ្ឋាគារ ខុនដូ លំនៅដ្ឋាន ផ្សារទំនើប ហាងលក់រាយ និងភោជនីយដ្ឋានប្រណីតផងដែរ៕ប្រភព៖USA Today៕

ដោយៈ ជេស៊ីកា

        មណ្ឌលគិរីៈ គំរោងសិក្សាដើម្បីឈានទៅ សម្រេចចិត្តវិនិយោគឬអត់របស់ក្រុមហ៊ុនធំមួយ គ្រោងចំណាយពេលសិក្សារហូតដល់មួយឆ្នាំឬយូរជាងនេះ ដើម្បីក្រុមហ៊ុនមានមូលដ្ឋានក្នុងការសម្រេចចិត្ត។

អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកា​សចរណ៍ស៊ីវិល លោកស៊ីន ចាន់សិរីវត្ថាបានមានប្រសាសន៍ឲ្យដឹងកាលពីសប្តាហ៍មុនថា គំរោងសិក្សាព្រលាននេះ គឺនៅឆ្ងាយណាស់ យ៉ាងហោចណាស់ ត្រូវការយៈពេល១ឆ្នាំដែរ។

លោកបញ្ជាក់ថា “ឥលូវនេះក្រុមហ៊ុនកំពុងរៀបចំសិក្សា លើទិដ្ឋភាពច្បាប់ ទិដ្ឋភាពពាណិជ្ជកម្មច្រើន បច្ចេកទេសច្រើន ហើយជ្រើសរើសក្រុមអ្នកជំនាញ ប្រឹក្សាយោបល់ច្រើនណាស់ ទើបចាប់ផ្តើមធ្វើការសិក្សា”។

លោកស៊ីន ចាន់សិរីវត្ថាបានបន្តថា ការរៀបចំធនធានមនុស្ស និងហិរញ្ញវត្ថុរួច ទើបជ្រើសរើសអ្នកជំនាញផ្តល់ប្រឹក្សា ទើបឈានដល់ការសិក្សា។

យោងតាមផែនការមេអភិវឌ្ឍន៍ វិស័យទេសចរណ៍ខខេត្តមណ្ឌ​លគិរីឆ្នាំ២០២៣ ២០៣៥ រដ្ឋាភិបាលកម្ពុជាគ្រោងទាក់ទាញភ្ញៀវទេសចរណ៍អន្តរជាតិ ទៅទស្សនាខេត្តនេះឲ្យបាន១លាននាក់ និងភ្ញៀវទេសចរណ៍ក្នុងស្រុក ឲ្យបានប្រមាណ៤លាននាក់ក្នុងមួយឆ្នាំ។

ការប្រកាសសាងសង់ព្រលានយន្តហោះ នៅខេត្តមណ្ឌលគិរី កាលពីពេលកន្លងមក ត្រូវបានសិក្សានិងចាប់អារម្មណ៍វិនិយោគដោ​យក្រុមហ៊ុនChina Power ប៉ុន្តែក្រុមហ៊ុននេះមានវិបត្តិហិរញ្ញវត្ថុ ទើបបានដកខ្លួនចេញពីគំរោងនេះ ខណៈក្រុមហ៊ុនសិក្សាបច្ចុប្បន្នជាក្រុមហ៊ុនពហុជាតិសាសន៍៕

        ដោយៈ គង់ សូរិយា

        កោះកុងៈ ក្រុមមន្រ្តីនៃលេខាធិការដ្ឋាន គណៈកម្មាធិការគ្រប់​គ្រងនិងអភិវឌ្ឍតំបន់ឆ្នេរសមុទ្រកម្ពុជា ខេត្តកោះកុង បានចុះពិនិត្យស្ថានភាពឆ្នេរសមុទ្រ ការងារអនាម័យ បរិស្ថាន និងទេសចរណ៍នៅកោះកុងក្រៅ។

តំបន់ទេសចរណ៍នេះ ស្ថិតក្នុងភូមិជ្រោយប្រស់ ឃុំជ្រោយប្រស់ ស្រុកកោះកុង ខេត្តកោះកុង។ដោយមានការចាត់តាំងរបស់លោកជំទាវអភិបាល នៃគណៈអភិបាលខេត្ត លោកអន សុធារិទ្ធ អភិបាលរងខេត្ត និងជាប្រធានលេខាធិការដ្ឋានគណៈកម្មាធិការគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ខេត្តកោះកុង បានដឹកនាំក្រុមការងារខេត្ត និងមានការចូលរួមពីមន្ទីរជំនាញ ស្ថាប័នពាក់ព័ន្ធ និងរដ្ឋបាលស្រុកកោះកុង ឃុំជ្រោយប្រស់ បានចុះពិនិត្យស្ថានភាពឆ្នេរសមុទ្រ ការងារអនាម័យ បរិស្ថាន និងទេសចរណ៍នៅតំបន់ខាងលើនេះ។

ក្រោយការចុះពិនិត្យស្ថានភាពឆ្នេរទី៣ កោះកុងក្រៅ ក្រុមការ​ងារបានពិនិត្យឃើញថា មានការសម្អាតសំរាម និងមានការរៀបចំបន្ទប់ទឹក កន្លែងងូតទឹកសាប និងកន្លែងបោះតង់ ក្នុងនោះគឺនៅសល់សំរាមតិចតួចតាមឆ្នេរ ដែលនាំមកពីសមុទ្រ។

បន្ទាប់ពីការចុះពិនិត្យ និងប្រជុំពិភាក្សា ជាមួយកងកម្លាំងប្រចាំការនៅឆ្នេរសមុទ្រទី៣ កោះកុងក្រៅ គឺតាមបណ្តោយឆ្នេរសមុទ្រ នៃកោះកុងក្រៅ មិនមានប្រព័ន្ធទូរស័ព្ទនោះទេ និងជាលទ្ធផលលោកប្រធានគណៈកម្មាធិការ គ.អ.ឆ.ក ខេត្តកោះកុង បានដាក់ចេញទិសដៅចំនួន៣ ដូចជា​ទី ១.អាជ្ញាធរស្រុក ឃុំ សហគមន៍ និងសេវាករ ត្រូវរៀបចំឱ្យមានការគ្រប់គ្រងសំរាម សំណល់រឹង ពិសេសសំរាមប្លាស្ទិកឱ្យបានល្អប្រសើរ នៅតាមឆ្នេរសមុទ្រនានានៃកោះកុងក្រៅ។

ទី២ ស្នើទៅស្ថាប័នពាក់ព័ន្ធ ដើម្បីរៀបចំឱ្យមានការសិក្សាលើការតម្លើងអង់តែនប្រព័ន្ធទូរស័ព្ទ នៅកោះកុងក្រៅ និងទី៣ រាល់សេវាកម្មនានា នៅតាមឆ្នេរសមុទ្រ នៃកោះកុងក្រៅ ត្រូវឱ្យមានតម្លៃសមរម្យ និងចេញជាតារាងតម្លៃត្រឹមត្រូវ។

គណៈកម្មាធិការគ្រប់គ្រង និងអភិវឌ្ឍតំបន់ឆ្នេរសមុទ្រកម្ពជា ខេត្តកោះកុង ក៏បានបោះបង្គោលព័ត៍មាន ក្រមប្រតិបត្តិឆ្នេរសមុទ្រ Beach Code of Conduct និងស្នើសុំខាងក្រុមហ៊ុនសេវាកម្មទេសចរណ៍ ភ្ញៀវទេសចរ និងអ្នកមកលេងកម្សាន្តតាមបណ្តារឆ្នេរនានានៃកោះកុងក្រៅ សូមចូលរួមទុកដាក់សំរាមឱ្យបាមត្រឹមត្រូវ កាត់បន្ថយសំរាមប្លាស្ទិក និងអនុវត្តន៍ក្រមប្រតិបត្តិឆ្នេរសមុទ្រឱ្យបានល្អប្រសើរ៕