ដោយៈ គង់ សូរិយា

        ព្រះសីហនុៈ ទីលានវាយកូនហ្គោល Bay19 តម្លៃ៥០លានដុល្លារអាមេរិក នៃគម្រោងBay of Lights ជាទីលានវាយកូនហ្គោលជាប់មាត់ឆ្នេរស្តង់ដាអន្តរជាតិUSGA រចនាឡើងដោយ​​ ក្រុមហ៊ុនអភិវឌ្ឍន៍ទីលានវាយហ្គោល ដ៏ល្បីល្បាញលំដាប់ពិភពលោក Greg Norman។

ក្នុងបរិវេណនៃទីលានវាយកូនហ្គោល Bay 19 ផងដែរ នឹងមាននូវសណ្ឋាគារផ្កាយបួនចំនួនបួន រីសតផ្កាយ៥ និងផ្កាយ៦ ចំនួនបី និងផ្លូវដើរលំហែចំនួនបួន ដែលនេះនឹងធ្វើឲ្យទីលានវាយកូនហ្គោល Bay 19 ក្លាយជាទីតាំងកម្សាន្តដ៏ល្អប្រពៃ ទាំងសម្រាប់អ្នកនិយមលេងកីឡាវាយកូនហ្គោល និងភ្ញៀវទេសចរទូទៅផងដែរ។

សម្រាប់ការសាងសង់ដំណាក់កាលដំបូង នឹងមានជាទីលានវាយកូនហ្គោលរយៈចម្ងាយឆ្ងាយ ដែលគ្រោងបើកដំណើរការនៅត្រឹមត្រីមាសទីបី នៃឆ្នាំ២០២៥ ហើយទីលានវាយកូនហ្គោលស្តង់ដា១៨រន្ធ គ្រោងនឹងទទួលស្វាគមន៍ភ្ញៀវជាតិ និងអន្តរជាតិ នៅត្រឹមឆ្នាំ២០២៧ ជាមួយនឹងគោលដៅសម្រេច ការសាងសង់ទាំងស្រុងត្រឹមឆ្នាំ២០២៩៕

ដោយ: គង់ លាងហួរ
អន្តរជាតិ: បើប្រៀបធៀបនឹងតម្លៃក្នុងពេលបិទការជួញដូរកាលពីថ្ងៃពុធម្សិលមិញ គេសង្កេតឃើញថា តម្លៃហាងឆេងមាសបានបន្តធ្លាក់ថ្លៃចុះនៅល្ងាចថ្ងៃព្រហស្បតិ៍នេះ។

តួយ៉ាង តម្លៃមាស Spot Gold បានធ្លាក់ចុះ០,២៣%ដល់២៣១៧,១៨ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,៩៣ភាគរយដល់២.៣៣៣ដុល្លារ ក្នុងមួយអោន គិតត្រឹមម៉ោង៥:២០នាទីល្ងាច។

គិតត្រឹមពេលបិទការជួញដូរកាលពីថ្ងៃពុធម្សិលមិញ តម្លៃមាស Spot Gold បានស្ថិតនៅត្រឹម២៣២២,៥៥ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold future បានស្ថិតនៅត្រឹម២៣៥៤,៨០ដុល្លារ ក្នុងមួយអោន៕

ដោយ: គង់ លាងហួរ

អន្តរជាតិ: យោងតាមរបាយការណ៍ថ្មីបង្ហាញថា ធនាគារពិភពលោក បានបង្កើនការព្យាករណ៍កំណើនសេដ្ឋកិច្ចសកលថា នឹងកើនឡើង២,៦% នៅឆ្នាំ២០២៤នេះ ដោយផ្អែកលើកំណើនសេដ្ឋកិច្ចប្រកបដោយនិរន្តរភាពរបស់សហរដ្ឋអាមេរិក។

របាយការណ៍ធ្វើបច្ចុប្បន្នភាព ចុងក្រោយបង្អស់របស់ធនាគារពិភពលោក បានបង្ហាញសញ្ញាសុទិដ្ឋិនិយមកាន់តែខ្ពស់ បើប្រៀបធៀបទៅនឹងការព្យាករណ៍ កាលពីខែមករា ថា សេដ្ឋកិច្ចសកលនឹងកើនឡើងត្រឹមតែ២,៤% សម្រាប់ឆ្នាំ២០២៤។

ស្ថាប័នដ៏ធំមួយនេះអះអាងថា សេដ្ឋកិច្ចសកល ជាពិសេសគឺសេដ្ឋកិច្ចរបស់សហរដ្ឋអាមេរិក បានបង្ហាញពីភាពធន់ដែលយើងមិននឹកស្មានដល់ នៅចំពោះមុខការដំឡើងអត្រាការប្រាក់ ដោយធនាគារកណ្តាលអាមេរិក និងធនាគារកណ្តាលដទៃទៀត ដើម្បីទប់ស្កាត់អតិផរណា។

ប៉ុន្តែស្ថាប័ននេះបានព្រមានថា កំណើនសេដ្ឋកិច្ចសកលនៅតែមានល្បឿនយឺតយ៉ាវ បើធៀបនឹងអតីតកាល ខណៈបណ្តាប្រទេសក្រីក្របំផុត កំពុងរស់នៅក្រោមបន្ទុកបំណុលដ៏ធ្ងន់ និងកម្រិតអត្រាការប្រាក់ខ្ពស់។

ជាមួយគ្នានេះ ការដាក់របាំងពាណិជ្ជកម្ម នឹងបង្កគ្រោះថ្នាក់ដល់វិបុលភាពទូទាំងពិភពលោក ខណៈសង្គ្រាម​ដ៏​ឃោរឃៅ​ក្នុង​ប្រទេស​អ៊ុយក្រែន និង​តំបន់​ហ្គាហ្សា​ កំពុង​ដាក់​សម្ពាធ​បន្ថែម​ទៀត​លើ​សេដ្ឋកិច្ច​ក្នុង​តំបន់។

ធនាគារពិភពលោករំពឹងថា សេដ្ឋកិច្ចអាមេរិក នឹងកើនឡើងក្នុងអត្រា២,៥% នៅឆ្នាំ២០២៤នេះ ដែលដូចគ្នាទៅនឹងអត្រាកំណើនកាលពីឆ្នាំមុន។ ប៉ុន្តែការព្យាករណ៍ថ្មីនេះ បង្ហាញសញ្ញាពីការកើនឡើងយ៉ាងគំហុក បើធៀបនឹងអត្រា១,៦% នៅក្នុងរបាយការណ៍នៃការព្យាករណ៍កាលពីខែមករាកន្លងទៅ។

លោក Ayhan Kose អនុប្រធានសេដ្ឋវិទូរបស់ធនាគារពិភពលោកបានថ្លែងប្រាប់សារព័ត៌មាន The Associated Press មុនពេលចេញផ្សាយ របាយការណ៍ទស្សនវិស័យសេដ្ឋកិច្ចសកល ចុងក្រោយរបស់ខ្លួនយ៉ាងដូច្នេះថា “កំណើន​សេដ្ឋកិច្ចអាមេរិក​ មានភាពពិសេសខុសប្លែកពីធម្មតា”។

ធនាគារពិភពលោក ដែលត្រូវបានបង្កើតឡើងដោយបណ្តាប្រទេសសមាជិកចំនួន១៨៩ប្រទេស មានគោលបំណងកាត់បន្ថយភាពក្រីក្រ និងលើកកម្ពស់កម្រិតជីវភាព តាមរយៈការផ្តល់ជំនួយ និងប្រាក់កម្ចី ដែលមានអត្រាទាបដល់ បណ្តាប្រទេសកំពុងអភិវឌ្ឍន៍៕ប្រភព:AP៕

ដោយៈ គង់ សូរិយា

        ព្រះសីហនុៈ ក្រុមការងារចម្រុះខេត្ត ដឹកនាំដោយលោក អ៊ី សុខឡេង អភិបាលរង នៃគណៈអភិបាលខេត្តព្រះសីហនុ បានចុះត្រួតពិនិត្យទីតាំងស្នើសុំសាងសង់អាងតន្ត្រីបាញ់ទឹក និងរបាំងការពាររលកសមុទ្រ របស់ក្រុមហ៊ុនយូណាន ជីងចេង ខូអិលធីឌី ដែលមានទីតាំងស្ថិតនៅតាមបណ្តោយឆ្នេរអូរត្រេះ ភូមិ៦ សង្កាត់លេខ៤ ក្រុងព្រះសីហនុ ខេត្តព្រះសីហនុ។

យោងតាមលិខិតលេខ១០៤២ ដនស/ខុទ្ទ ចុះថ្ងៃទី៨​ ខែឧសភា ឆ្នាំ២០២៤ របស់ក្រសួងរៀបចំដែនដី នគរូបនីយកម្ម និងសំណង់ គឺបានឯកភាពជាគោលការណ៍ ចំពោះសំណើសុំអនុញ្ញាតសាងសង់អាងតន្ត្រីបាញ់ទឹកទំហំ៨.៦១២ម៉ែត្រក្រឡា និងរបាំងការពាររលកសមុទ្រប្រវែង៤២០ម៉ែត្រ នៅតាមបណ្ដោយឆ្នេរអូរត្រេះ។

បន្ទាប់ពីទទួលបានគោលការណ៍អនុញ្ញាតនេះ ក្រុមហ៊ុនត្រូវអនុវត្តលក្ខខ័ណ្ឌ ៣ចំណុចដូចខាងក្រោម៖ ១/ ស្នើសុំកិច្ចសហការពីមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះសីហនុ កំណត់ និយាមកាទីតាំងសាងសង់អាងតន្ត្រីបាញ់ទឹក និងរបាំងការពា​ររលកសមុទ្រឱ្យបានច្បាស់លាស់ និងត្រូវស្នើសុំគោលការណ៍ប្រើប្រាស់ដីសាធារណៈពីរាជរដ្ឋាភិបាល។

២/ សិក្សាគម្រោងប្លង់អាងតន្ត្រីបាញ់ទឹក និងរបាំងការពាររលកសមុទ្រឱ្យបានច្បាស់លាស់ ត្រឹមត្រូវតាម លក្ខណៈបច្ចេកទេស និងអត្តសញ្ញាណល្អឯក សម្រាប់ខេត្តព្រះសីហនុ ដែលផ្ដល់បន្ថែមនូវសោភណភាព ដល់តំបន់ឆ្នេរសមុទ្រ ទាញភ្ញៀវទេសចរណ៍ជាតិ និងអន្តរជាតិ។

៣/ ស្នើសុំលិខិតអនុញ្ញាតសាងសង់ និងលិខិតអនុញ្ញាតបើកការដ្ឋានសំណង់ ពីក្រសួងរៀបចំដែនដី នគរូបនីយកម្ម និងសំណង់ ស្របតាមនីតិវិធីជាធរមាន។

ប៉ុន្តែនៅពេលដែលក្រុមការងារចម្រុះខេត្ត ចុះពិនិត្យទីតាំងជាក់ស្តែងឃើញថាក្រុមហ៊ុន យូណាន ជីងចេង ខូអិលធីឌី មិនទាន់មានលិខិតបទដ្ឋានគតិយុត្តិគ្រប់គ្រាន់ ពិសេសលក្ខខ័ណ្ឌទាំង ៣ចំណុចរបស់លិខិតលេខ១០៤២ ដនស/ខុទ្ទ ចុះថ្ងៃទី៨​ ខែឧសភា ឆ្នាំ២០២៤ របស់ក្រសួងរៀបចំដែនដី នគរូបនីយកម្ម និងសំណង់ គឺក្រុមហ៊ុនមិនទាន់បានបំពេញនៅឡើយទេ។

តាមការបញ្ជាក់របស់ក្រុមហ៊ុន គឺមានការភាន់ច្រឡំថា លិខិតរបស់ក្រសួងរៀបចំដែនដី នគរូបនីយកម្ម និងសំណង់ អនុញ្ញាតឱ្យក្រុមហ៊ុនមានសិទ្ធិសាងសង់ ទើបក្រុមហ៊ុនចាប់ផ្តើមដំណើរការការដ្ឋានរបស់ខ្លួន ប៉ុន្តែបន្ទាប់ពីស្តាប់ការណែនាំ របស់ក្រុមការងារចម្រុះខេត្តរួច ក្រុមហ៊ុនមានការយល់ច្បាស់ និងសូមអនុវត្តតាមខ្លឹមសារទាំង ៣ចំណុច របស់លិខិតលេខ១០៤២ ដនស/ខុទ្ទ ចុះថ្ងៃទី៨​ ខែឧសភា ឆ្នាំ២០២៤ របស់ក្រសួងរៀបចំដែនដី នគរូបនីយកម្ម និងសំណង់ និងក្រុមការងារចម្រុះខេត្ត។

ចំពោះគម្រោងសាងសង់អាងតន្ត្រីបាញ់ទឹក និងរបាំងការពាររលកសមុទ្រនេះ គឺជាផលិតផលទេសចរណ៍ ដ៏ទាក់ទាញថ្មីមួយទៀតសម្រាប់តំបន់ឆ្នេរនៅខេត្តព្រះសីហនុ ដោយអាងតន្ត្រីបាញ់ទឹក មានភ្លើងព័ណ៌ និងអាចបាញ់ទឹកបានកម្ពស់៦០ម៉ែត្រ ដោយផុសអណ្តែតខ្លួននៅលើលំហសមុទ្រ។

ដោយឡែកចំពោះរបាំងការពាររលកសមុទ្រ ក្រៅពីជួយទប់រលកសមុទ្រមកប៉ះលើលើនាវា ក៏មានការរៀបចំជាផ្លូវថ្មើរជើងនៅលើទំនប់នោះ ដោយអនុញ្ញាតឱ្យសាធារណជន អាចចេញចូលទៅស្ទូចត្រី ថតរូប និងទស្សនាអាងតន្ត្រីបាញ់ទឹកកំសាន្តដោយសេរី។

រដ្ឋបាលខេត្តមានការគាំទ្រ ប៉ុន្តែមុនពេលសាងសង់សូមក្រុមហ៊ុនត្រូវអនុវត្តតាមខ្លឹមសារទាំង ៣ចំណុចរបស់លិខិតលេខ១០៤២ ដនស/ខុទ្ទ ចុះថ្ងៃទី៨​ ខែឧសភា ឆ្នាំ២០២៤ របស់ក្រសួងរៀបចំដែនដី នគរូបនីយកម្ម និងសំណង់។

លោកអ៊ី សុខឡេង អភិបាលរង នៃគណៈអភិបាលខេត្តព្រះសីហនុ និងជាប្រធានក្រុមការងារ បានធ្វើការណែនាំក្រុមហ៊ុនដូចខាងក្រោម៖
-ក្រុមហ៊ុនត្រូវផ្អាកការដ្ឋានសាងសង់ទាំងស្រុង
-ក្រុមហ៊ុនត្រូវកាយដី ដែលបានចាក់លើឆ្នេរសមុទ្រចេញវិញ និងជួសជុលផ្លូវក្រានីតឱ្យបានស្អាតដូចដើមវិញ។
-ក្រុមហ៊ុនត្រូវសហការជាមួយមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ក្នុងការកំណត់និយាមកាទីតាំងសាងសង់អាងតន្ត្រីបាញ់ទឹក និងរបាំងការពាររលកសមុទ្រ ឱ្យបានច្បាស់លាស់ រួចដាក់ជូនរដ្ឋបាលខេត្ត ដើម្បីប្រជុំពិនិត្យ មុននឹងដាក់ស្នើសុំគោលការណ៍ប្រើប្រាស់ដីឆ្នេរសាធារណៈពីរាជរដ្ឋាភិបាល។
-ក្រុមហ៊ុនត្រូវសិក្សាគម្រោងប្លង់អាងតន្ត្រីបាញ់ទឹក និងរបាំងការពាររលកសមុទ្រឱ្យបានច្បាស់លាស់ ត្រឹមត្រូវតាមលក្ខណៈបច្ចេកទេស និងអត្តសញ្ញាណល្អឯកសម្រាប់ខេត្តព្រះសីហនុ ដើម្បីទាក់ទាញអ្នកទេសចរណ៍ និងអ្នកវិនិយោគ។
-ក្រុមហ៊ុនត្រូវសិក្សាពីផលប៉ះពាល់បរិស្ថានឱ្យបានហ្មត់ចត់ ។
-ក្រុមហ៊ុនត្រូវស្នើសុំលិខិតអនុញ្ញាតសាងសង់ និងលិខិតអនុញ្ញាតបើកការដ្ឋាន ពីក្រសួងរៀបចំដែនដី នគរូបនីយកម្ម និងសំណង់។
-ក្រុមហ៊ុនត្រូវសហការជាមួយអាជ្ញាធរ និងមន្ទីរជំនាញពាក់ព័ន្ធ ក្នុងការអនុវត្តគម្រោងឱ្យស្របតាមនីតិវិធី និងលិខិតបទដ្ឋានគតិយុត្តិដែលមានចែងជាធរមាន៕

ដោយ: គង់ លាងហួរ
ប៉េកាំង: វិបត្តិ​អចលនទ្រព្យ​នៅ​​ប្រទេសចិនត្រូវបានគេ​​រំពឹង​ថា​ នឹង​ស្ថិតក្នុងភាពជាប់គាំងដូចជាប្រទេស​​ជប៉ុនកាលពីឆ្នាំ១៩៩១ ​បន្ទាប់​ពី​ការផ្គត់ផ្គង់លំនៅដ្ឋាន​លើសតម្រូវការបានផ្ទុះ​ឡើង​ ខណៈរដ្ឋាភិបាលជប៉ុនបានចំណាយពេលវេលាអស់១៨ឆ្នាំ ដើម្បីស្តារទីផ្សារអចលនទ្រព្យឱ្យងើបឡើងវិញ។

វិបត្តិអចលនទ្រព្យនៅប្រទេសចិននាពេលនេះ ហាក់មានភាពស្រដៀងគ្នាស្ទើរតែទាំងស្រុង បើប្រៀបធៀបនឹងភាពស្ថិតនៅទ្រឹងនៃវិបត្តិអចលនទ្រព្យនៅសហរដ្ឋអាមេរិក និងប្រទេសអេស្ប៉ាញកាលពីទសវត្សរ៍ឆ្នាំ២០០០។ តួយ៉ាង នាពេលនេះ ការ​សាងសង់​លំនៅដ្ឋាន​ថ្មីនៅ​ប្រទេសចិនបានដាំក្បាលចុះ​អស់ពាក់កណ្តាល​ បើធៀបនឹងឆ្នាំ២០២១។

ជាពិសេស ក្នុងរយៈពេល១២ខែគិតត្រឹមខែមេសា ឆ្នាំនេះ ការសាងសង់ផ្ទះថ្មីនៅចិនបានដាំក្បាលចុះ៦៣ភាគរយ បើធៀបនឹងឆ្នាំ២០២១ មកនៅត្រឹមទំហំ៦៣៤លានម៉ែត្រការ៉េ។លោក Logan Wright អ្នកវិភាគមួយរូបនៅក្រុមហ៊ុន Rhodium Group បានលើកឡើងថា សកម្មភាពសាងសង់នៅប្រទេសចិន ត្រូវបានរំពឹងទុកថា នឹងមានស្ថិរភាពក្នុងពេលឆាប់ៗខាងមុខនេះ។ជាមួយគ្នានេះ ដោយផ្អែកលើកត្តាប្រជាសាស្ត្រ មូលនិធិរូបិយវត្ថុអន្តរជាតិ (IMF) បានព្យាករណ៍ថា តម្រូវការលំនៅដ្ឋាននៅប្រទេសចិននឹងមានកម្រិតជាមធ្យមប្រមាណ៩៥០លានម៉ែត្រការ៉េក្នុងរយៈពេល១០ឆ្នាំខាងមុខ។

ទោះជាយ៉ាងណាក្តី ការដាំក្បាលចុះនៃទីផ្សារលំនៅដ្ឋាននៅប្រទេសចិន ត្រូវបានមើលឃើញថា មានភាពស្រដៀងគ្នាកាន់តែច្រើន បើធៀបទៅនឹងវិបត្តិជាប់គាំងនៃទីផ្សារអចលនទ្រព្យជប៉ុនកាលពីអំឡុងឆ្នាំ១៩៩១ដល់ដើមទសវត្សរ៍ឆ្នាំ២០០០។

វិបត្តិអចលនទ្រព្យនៅអាមេរិក និងអេស្ប៉ាញ ត្រូវចំណាយពេល៥ឆ្នាំដើម្បីស្តារតម្លៃផ្ទះពីកម្រិតបាតតារាង បន្ទាប់ពីដាំក្បាលចុះ៣០ ទៅ៤០ភាគរយ។ ចំណែក ជប៉ុនបានចំណាយពេលវេលាអស់១៨ឆ្នាំដើម្បីស្តារទីផ្សារឡើងវិញ បន្ទាប់តម្លៃអចលនទ្រព្យនៅប្រទេសមួយនេះបានដាំក្បាលចុះ៤៧ភាគរយ។ចំណែក តម្លៃផ្ទះថ្មី និងផ្ទះដែលមានស្រាប់នៅប្រទេសចិនបានធ្លាក់ចុះ១១ភាគរយ ចាប់តាំងពីបញ្ហាសេដ្ឋកិច្ចបានផ្ទុះឡើង។ នេះបើយោងតាមទិន្នន័យផ្លូវការរបស់ក្រុមហ៊ុន ​​JPMorgan ។

ចំណែក ក្រុមអ្នកវិភាគផ្សេងទៀតបានអះអាងទៀតថា គិតរហូតមកដល់ពេលនេះ ការដាំក្បាលចុះនៃតម្លៃផ្ទះនៅប្រទេសចិន មានកម្រិតប្រហាក់ប្រហែលគ្នាទៅនឹងប្រទេសជប៉ុនកាលពីមុន ហើយនិន្នាការនេះអាចនឹងបន្តកើតមានតទៅមុខទៀត។

ម្យា៉ងវិញទៀត វិធានការដែលរដ្ឋាភិបាលជប៉ុន និងចិន បានដាក់ចេញដើម្បីដោះស្រាយវិបត្តិនេះ ក៏មានលក្ខណៈស្រដៀងគ្នាផងដែរ។ តួយ៉ាង រដ្ឋាភិបាលជប៉ុន​បានតម្រូវ​ឱ្យ​ធនាគារ​នានា ជួយទិញ​អចលនទ្រព្យ​ដែលជាប់គាំង ខណៈរដ្ឋាភិបាលចិនបានជំរុញឱ្យរដ្ឋបាលក្នុងតំបន់មូលដ្ឋានប្រមូលទិញផ្ទះដែលលក់មិនដាច់ពីអ្នកអភិវឌ្ឍន៍ ដើម្បីកាត់បន្ថយចំនួនផ្ទះដែលមានស្រាប់ក្នុងស្តុក។

កាលពីខែឧសភាកន្លងទៅ ទីក្រុងប៉េកាំងបានប្រកាសបញ្ចេញកញ្ចប់លើកទឹកចិត្តថ្មីមួយ ដែលអនុញ្ញាតឱ្យធនាគារនានាអាចកាត់បន្ថយអត្រាការប្រាក់លើប្រាក់កម្ចីទិញផ្ទះ និងតម្រូវឱ្យរដ្ឋបាលក្នុងតំបន់ទិញផ្ទះពីអ្នកវិនិយោគ ដើម្បីប្រែក្លាយទៅជាលំនៅដ្ឋានដែលមានតម្លៃសមរម្យ។

ក្រុមអ្នកវិភាគលើកឡើងថា “គោលបំំណងដ៏សំខាន់នៃចំណាត់ការនេះ គឺដើម្បីផ្ទេរទ្រព្យសកម្មដែលមានបញ្ហាចេញពីអ្នកអភិវឌ្ឍន៍ទៅឱ្យអាជ្ញាធរមូលដ្ឋាន។ ប៉ុន្តែ នៅទីបំផុត ការខាតបង់នឹងមានទំហំប្រហាក់ប្រហែលទៅនឹងប្រទេសជប៉ុនកាលឆ្នាំ១៩៩១”៕ប្រភព:Reuters៕

        ដោយៈ គង់ សូរិយា

        ហ្សាការតាៈ ប្រធានាធិបតី​ឥណ្ឌូ​នេ​ស៊ី​ លោក​ Joko ​W​i​do​do​ ​បាន​ស្នើ​ឱ្យ​ទីភ្នាក់ងារ​ភ័ស្តុ​ភារ​រដ្ឋ​ (Bu​log​) ​ពិចារណា​អំពី​លទ្ធភាព​ទិញ​ ក្រុមហ៊ុន​ផលិត​អង្ករ​នៅ​កម្ពុជា​។​

លោក​បាន​បញ្ជាក់​ថា​ “​វា​ជា​ការ​ប្រសើរ​ សម្រាប់​ប្រទេស​ឥណ្ឌូ​នេ​ស៊ី ក្នុង​ការ​វិនិយោគ​លើ​ក្រុមហ៊ុន​ផលិត​តែមួយ​ ​ជាជាង​ការ​បន្ត​នាំចូល​ពី​ប្រទេសជិតខាង​”។​

ទិន្នន័យ​ពី​ក្រសួង​កសិកម្ម​សហរដ្ឋអាមេរិក​ ​បាន​បង្ហាញ​ថា​ ​ឥណ្ឌូ​នេ​ស៊ី​ ​គឺជា​ប្រទេស​ផលិត​អង្ករ​ធំ​ជាងគេ​ទី​៤ ​របស់​ពិភពលោក​ ​ដោយ​ផ្អែកលើ​ផលិតកម្ម​ប្រចាំ​ឆ្នាំ​ ជាមធ្យម​ក្នុងរយៈពេល​៥​ ​ឆ្នាំ​កន្លងមក​នេះ​។​ ​

ប៉ុន្តែ​ប្រទេស​នេះ​នៅតែ​បន្ត​នាំចូល​អង្ករ​ ​ដោយសារ​អង្ករ​ក្នុងស្រុក​មាន​តម្លៃ​ខ្ពស់​ ក្នុង​ប៉ុន្មាន​ឆ្នាំ​ចុងក្រោយ​នេះ​។​ ​ជាពិសេស​​បាតុភូត​អាកាសធាតុ​ ​E​l​ N​in​o ​និង​រដូវប្រាំង​អូស​បន្លាយ​ក្នុង​តំបន់​ ​បាន​ធ្វើ​ឱ្យ​ផលិតកម្ម​ស្រូវ​ក្នុងស្រុក​ធ្លាក់ចុះ​។​

យោង​តាម​ Bu​log​បានឲ្យដឹងថា ​ឥណ្ឌូ​នេ​ស៊ី​បាន​ទិញ​អង្ករ​ចំនួន​១​,​៩​ ​លាន​តោន​ក្នុងឆ្នាំនេះ​ ​ដែល​ស្មើនឹង​៥​២​% ​នៃ​ផែនការ​ប្រចាំ​ឆ្នាំ​។​ ​កាលពីឆ្នាំមុន​ ​ឥណ្ឌូ​នេ​ស៊ី​ បាន​នាំចូល​គ្រាប់​ធញ្ញជាតិ​ចំនួន​​៣​,​៣​ ​លាន​តោន​។​ ​V​N​A៕

ដោយ: គង់ លាងហួរ

បាងកក: លោក Phumtham Wechayachai រដ្ឋមន្ត្រីក្រសួងពាណិជ្ជកម្មថៃ បានចូលរួមក្នុងនាមជាប្រធាននៃកិច្ចប្រជុំមួយ ជាមួយក្រុមប្រឹក្សាភិបាល ច្រករបៀងសេដ្ឋកិច្ចភាគខាងកើត (EEC) ដើម្បីពិនិត្យមើលគម្រោងអភិវឌ្ឍន៍ហេដ្ឋារចនាសម្ព័ន្ធសំខាន់ៗ។

ក្នុងចំណោមនោះ ការសាងសង់បណ្តាញផ្លូវដែកល្បឿនលឿន ដើម្បីតភ្ជាប់អាកាសយានដ្ឋានចំនួន៣ ត្រូវបានគេរំពឹងថា អាចនឹងចាប់ផ្តើមឡើងវិញ នៅក្នុងឆ្នាំ២០២៥ខាងមុខ។ នេះបើយោងតាមលទ្ធផលពីកិច្ចប្រជុំ ក្រុមប្រឹក្សាភិបាលច្រករបៀង សេដ្ឋកិច្ចភាគខាងកើត (EEC) កាលពីថ្ងៃទី១០ ខែមិថុនា។

គម្រោងផ្លូវរថភ្លើងល្បឿនលឿននេះ មានគោលបំណងតភ្ជាប់អាកាសយានដ្ឋានធំៗចំនួន៣ រួមមានដូចជា អាកាសយានដ្ឋានដុនមឿង អាកាសយានដ្ឋានសុវណ្ណភូមិ និងអាកាសយានដ្ឋានអ៊ូតាប៉ាវ។នេះបើយោងតាមការដកស្រង់ចុះផ្សាយ ដោយសារពត៌មាន The Nation។ជុំវិញរឿងនេះ ក្រុមហ៊ុនផ្លូវដែករដ្ឋថៃ (SRT) និងដៃគូឯកជនរបស់ខ្លួន បានដាក់សំណើរទៅកាន់ក្រុមប្រឹក្សាភិបាល EEC ដើម្បីពិនិត្យឡើងវិញ ចំពោះភាពជាដៃគូសាធារណៈ និងឯកជន (PPP) របស់គម្រោងនេះ ដែលត្រូវបានអនុម័តដោយគណៈរដ្ឋមន្ត្រីចាស់ កាលពីថ្ងៃទី២៧ ខែមីនា ឆ្នាំ២០១៨កន្លងទៅ។

បន្ទាប់ពីកែប្រែរួច សំណើរនេះត្រូវបានគេរំពឹងថា នឹងបញ្ជូនទៅកាន់គណៈរដ្ឋមន្ត្រីនៅខែកក្កដាខាងមុខ។ ជាមួយគ្នានេះ  ក្រុមហ៊ុន SRT និងដៃគូរបស់ខ្លួន គ្រោងនឹងពិភាក្សាគ្នាអំពីការរៀបចំវិសោធនកម្មលើកិច្ចសន្យា ដែលនឹងត្រូវដាក់ស្នើទៅកាន់ ការិយាល័យអគ្គមេធាវី ក្រុមប្រឹក្សាភិបាល EEC និងគណៈរដ្ឋមន្ត្រីតាមលំដាប់លំដោយ។

ក្រុមប្រឹក្សាភិបាល EEC បានអះអាងថា នៅពេលដែលទទួលបានការអនុម័តពី គណៈរដ្ឋមន្ត្រី ដៃគូឯកជននឹងទទួលបានសេចក្តីជូនដំណឹង ដើម្បីស្តារគម្រោងមួយនេះឡើងវិញ ហើយការសាងសង់នឹងចាប់ផ្តើមនៅខែមករា ឆ្នាំ២០២៥ខាងមុខ៕ប្រភព: The Nation ៕