ដោយៈ ជេស៊ីកា

ភ្នំពេញៈ វានឹងជាមោទនភាពសម្រាប់កម្ពុជា និងធ្វើឲ្យរាជធានីភ្នំពេញលេចត្រដែតមួយកម្រិតទៀត ប្រសិនជាអាគារភ្លោះកំពសើ៥៦៨ម៉ែត្រនេះ បញ្ចប់ការសាងសង់នាពេលខាងមុខ។

ប៉ុន្តែការពន្យាពេលគំរោងនេះអស់រយៈពេលរាប់ឆ្នាំ បន្ទាប់ពីការងារតេស្តដី និងការងារបច្ចេកទេសមួយចំនួនបានបញ្ចប់ បានធ្វើឲ្យមានការចោទឡើងជារឿយៗថា តើការសាងសង់អាគារនេះអាចចាប់ផ្តើមឡើងវិញឬយ៉ាងណា ហាក់មិនទាន់មានសភាពច្បាស់លា​ស់នៅឡើយ។

ប៉ុន្តែលោកសាស្រ្តាចារ្យទួស សាភឿនអ្នកដឹកនាំក្រុមស្ថាបត្យករជាតិ អន្តរជាតិគូរប្លង់អាគារកំពស់១៣៣ជាន់នេះ បានបញ្ជាក់ឲ្យដឹងកាលពីចុងសប្តាហ៍មុនថា បញ្ហានៃការពន្យាពេលសាងសង់អាគារភ្លោះនេះ មិនមែនជាបញ្ហារបស់ក្រុមហ៊ុនថៃ ប៊ុនរ៉ុងនោះទេ ប៉ុន្តែវាជាបញ្ហារបស់ក្រុមហ៊ុនជាដៃគូប៉ុណ្ណោះ។លោកបន្តថា “អាគារនេះ យើងមិនបោះបង់ចោលនោះទេ យើងនឹងនៅតែបន្តសាងសង់ នៅពេលស្ថានភាពសេដ្ឋកិច្ចប្រសើរឡើង”។ ទោះជាយ៉ាងណា លោកសាស្រ្តាចារ្យទួស សាភឿន ដែលជាថ្នាក់ដឹកនាំ ជាន់ខ្ពស់មួយរូបរបស់អាគារនេះ មិនបានបញ្ជាក់ពីពេលវេលាជាក់លាក់ ដែលអាគារនេះនឹងចាប់ផ្តើមសាងសង់នោះទេ។

តាមគំរោងអាគារភ្លោះកំពស់ខ្ពស់ជាងគេ នៅក្នុងតំបន់អាស៊ាន និងពិភពលោកនេះ(សំដៅតែលើអាគារភ្លោះ)នេះ នឹងប្រើប្រាស់សម្រា​ប់សណ្ឋាគារប្រណីតលំដាប់ផ្កាយ៦ ខុនដូ អាផាតម៉ិន ប្រណីតមជ្ឈមណ្ឌលពាណិជ្ជកម្ម ក្លឹបកំសាន្ត ការិយាល័យធ្វើការ ភោជនីយដ្ឋាន កន្លែងគយគន់ទិដ្ឋភាពរាជធានីភ្នំពេញជាដើម។
លោកសាស្រ្តាចារ្យទួស សាភឿនបានមានប្រសាសន៍ឲ្យដឹងលន្លងមកថា វានឹងជាមោទនភាពសម្រាប់កម្ពុជា ហើយវត្តមានអាគារនេះនឹងទាក់ទាញក្រុមហ៊ុនលំដាប់អន្តរជាតិធំៗ មកដាក់ការិយាល័យកណ្តាលនៅរាជធានីភ្នំពេញ ព្រោះអាគារនេះមានស្តង់ដាលំដាប់ពិភពលោកពិតប្រាកដ៕

ដោយៈ គង់ ហ្វីអូណា

        ភ្នំពេញៈ មន្រ្តីជាន់ខ្ពស់កម្ពុជា ចិនបានប្រារព្ធពិធីបើកដំណើរការជាផ្លូវការនូវឆ្នាំនៃការផ្លាស់ប្តូរបន្រជាជន និងប្រជាជនរវាងកម្ពុជា ចិនជាផ្លូវការហើយ បន្ទាប់ពីកម្មវិធីនេះបានប្រកាសកាលពីចុងឆ្នាំមុន។

ពិធីនេះបានប្រារព្ធធ្វើនៅថ្ងៃទី១៣ មករាកន្លងមកនេះ នៅបរិវេ​ណព្រះលានជល់ដំរី ខេត្តសៀមរាប សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា តំណាងដ៏ខ្ពង់ខ្ពស់សម្តេចតេជោ ហ៊ុន សែន ប្រធាន ឧត្តមក្រុមប្រឹក្សាផ្ទាល់ព្រះមហាក្ស​ និងជាប្រធានគណបក្សប្រជាជនកម្ពុជា និងលោកលី ស៊ូឡី សមាជិកការិយាល័យនយោបាយ និងជារដ្ឋមន្ត្រីឃោ​សនាការ នៃគណៈកម្មាធិការមជ្ឈិមបក្សកុម្មុយនីស្ដចិន បានអញ្ជើញជាអធិបតីបើក (ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤)។

លោកលី ស៊ូឡីបានថ្លែងថា រយៈពេលប៉ុន្មានឆ្នាំចុងក្រោយនេះ ក្រោមការជម្រុញយ៉ាងយកចិត្តទុកដាក់ ពីថ្នាក់ដឹកនាំនៃប្រទេសទាំងពីរចិន​ និងកម្ពុជា បានបង្កើតកិច្ចសហប្រតិបត្តិការយ៉ាងជិតស្និទ្ធ លើបណ្តាវិស័យ និងទទួលបានសមិទ្ធផលផ្លែផ្កាជាច្រើនអនេក។ ក្នុងនោះមានអាកាសយានដ្ឋានអន្តរជាតិសៀមរាបអង្គរ ដែលជំនួយសាងសង់ដោយភាគីចិន ត្រូវបានដាក់ឲ្យដំណើរការជាផ្លូវការ គម្រោងសាងសង់ផ្លូវល្បឿនលឿនភ្នំពេញ-សៀមរាប- ប៉ោយប៉ែតកំពុងដំណើរការជាបន្តបន្ទាប់ មជ្ឈមណ្ឌលឱសថបុរាណចិន-កម្ពុជាត្រូវបាន សម្ពោធជាផ្លូវការ និងសាកលវិទ្យាល័យខេមតិច បានសម្ពោធដាក់ឲ្យប្រើប្រាស់ជាផ្លូវការ។

លោកបន្តទៀតថា ក្នុងអំឡុងពេលនៃការផ្ទុះឡើងនូវជម្ងឺកូវីដយ៉ាងធ្ងន់ធ្ងរ សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ បានបំពេញទស្សនកិច្ច ជាបន្ទាន់ទៅកាន់ប្រទេសចិន និងបានពាំនាំនូវជំនួយដ៏ថ្លៃថ្លារបស់ប្រជាជនកម្ពុជា។

សម្តេចពិជ័យសេនា ទៀ បាញ់ បានលើកឡើងថា “ឆ្នាំនៃការផ្លាស់ប្តូរប្រជាជន​ និងប្រជាជន កម្ពុជា-ចិន ២០២៤” នេះ ជាមូលដ្ឋានមិនអាចខ្វះបាន ក្នុងការសម្រេចឲ្យបាននូវការ កសាងសហគមន៍ជោគវាសនារួមគ្នា រវាងប្រជាជាតិយើងទាំងពីរ កម្ពុជា-ចិន។ ក្នុងនោះដែរសម្តេចមានសុទិដ្ឋិនិយមថា ការកំណត់យកឆ្នាំ២០២៤ ជា “ឆ្នាំនៃការផ្លាស់ប្តូរប្រជាជន​ និងប្រជាជនកម្ពុជា-ចិន” នឹងក្លាយជាចលករយ៉ាងសំខាន់ ក្នុងការបង្កើនតភ្ជាប់វិស័យទេសចរ វប្បធម៌ និងទំនាក់ទំនងរវាងប្រជាជននៃប្រជាជាតិទាំងពីរ និងជាមូលដ្ឋានមិនអាចខ្វះបាន  ក្នុងការសម្រេចឲ្យបាននូវការ    កសាងសហគមន៍ជោគវាសនារួមគ្នា រវាងប្រជាជាតិយើងទាំងពីរ កម្ពុជា-ចិន”។

សម្តេចក៏បានលើកផងដែរ ពីការភ្ជាប់ទំនាក់ទំនងកម្ពុជា-ចិន នៅថ្ងៃទី១៩ ខែកក្កដា ឆ្នាំ១៩៥៨ ដែលរហូតមកដល់ពេលនេះ ប្រទេសទាំងពីរ បានក្លាយទៅជាដៃគូយុទ្ធសាស្ត្រ គ្រប់ជ្រុងជ្រោយ និងកំពុងកសាងសហគមន៍រួមវាសនាតែមួយ។

សម្តេចពិជ័យសេនាបានបញ្ជាក់ដែរថា តាមរយៈការកំណត់យកឆ្នាំ២០២៤ ជា “ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន” យើងនឹងអាចផ្សព្វផ្សាយ កាន់តែច្បាស់ពីវប្បធម៌ ប្រពៃណី សក្តានុពលទេសចរណ៍ និងទំនាក់ទំនងរវាងប្រជាជនយើងទាំងពីរ ដែលមិនត្រឹមតែចូលរួម ដល់ការពង្រឹងចំណងមិត្តភាព និងកិច្ចសហប្រតិបត្តិការល្អ ការបង្កើនទំនាក់ទំនងលើវិស័យទេសចរណ៍ និងពាណិជ្ជកម្ម និងការផ្លាស់ប្តូរវប្បធម៌គ្នា ទៅវិញទៅមករវាងកម្ពុជា-ចិនប៉ុណ្ណោះទេ ប៉ុន្តែព្រឹត្តិការណ៍នេះ បង្ហាញពីការយកចិត្តទុកដាក់ ជាអាទិភាពយ៉ាងសំខាន់ លើប្រភពទីផ្សារចិន សម្រាប់វិស័យទេសចរណ៍កម្ពុជាផងដែរ។

ការរៀបចំពិធីបើក “ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤” នេះ បានឆ្លុះបញ្ចាំងឲ្យឃើញថា វិស័យទេសចរណ៍ និងវប្បធម៌មានទំនាក់ទំនងគ្នា យ៉ាងស្អិតរមួតប្រៀបបានសរសៃអំបោះដែលវេញចូលគ្នា បានរួមចំណែកយ៉ាងសំខាន់ ក្នុងការពង្រឹងនូវភាពទាក់ទាញ និងភាពប្រកួតប្រជែង សម្រាប់តំបន់ទេសចរណ៍ ក៏ដូចជាសម្រាប់ប្រទេសជាតិ។

វិស័យវប្បធម៌បានដើរតួនាទី ជាឧបករណ៍ដ៏មានប្រសិទ្ធភាព សម្រាប់អភិវឌ្ឍន៍ផលិតផលទេសចរណ៍។ ជាមួយគ្នានេះ វិស័យទេស​ចរណ៍បានបង្កើតនូវប្រភពចំណូល និងធនធាន ដែលអាចគាំទ្រ និងពង្រឹងការអភិរក្ស និងអភិវឌ្ឍវប្បធម៌ក្នុងយុគសម័យ នៃភាពច្នៃប្រឌិត និងសាកលភាវូបនីយកម្ម ហើយទេសចរណ៍ និងវប្បធម៌ ផ្សាភ្ជាប់គ្នាតាមរយៈសក្កានុពល នៃកំណើនវិស័យទាំងពីរផងដែរ។

វប្បធម៌ និងឧស្សាហកម្មសិល្បៈច្នៃប្រឌិត ត្រូវបានកំពុងប្រើប្រាស់កាន់តែខ្លាំងឡើង ដើម្បីផ្សព្វផ្សាយពីគោលដៅទេសចរណ៍នីមួយៗ។ ការប្រើប្រាស់ និងការច្នៃប្រឌិតវប្បធម៌ ដើម្បីបង្កើនភាពទាក់ទាញនៃទីផ្សារទេសចរណ៍ បានជម្រុញមានភាពសម្បូរបែបនៃអត្តសញ្ញាណក្នុងតំបន់ និងលើកស្ទួយរូបភាពនៃគោលដៅទេសចរណ៍៕

ភ្នំពេញ៖ រាជរដ្ឋាភិបាល បានសម្រេចផ្តល់សិទ្ធិឱ្យ សម្ព័ន្ធក្រុមហ៊ុន ហ្វូខឺស សិក្សានិងវិនិយោគលើគម្រោងអាកាសយានដ្ឋានមណ្ឌលគិរីថ្មី ក្នុងទម្រង់សាងសង់-ធ្វើអាជីវកម្ម-ផ្ទេរ (BOT) និងការអភិវឌ្ឍទីក្រុងរណបពហុបំណង និងមជ្ឈមណ្ឌលទំនិញផ្លូវអាកាស នៅខេត្តមណ្ឌលគិរី។ នេះបើយោងតាមលិខិតរបស់ទីស្តីការគណរដ្ឋមន្រ្តី ដែលទទួលបាននៅថ្ងៃទី១៣ ខែមករា ឆ្នាំ២០២៣នេះ។

ជាមួយគ្នានេះ រាជរដ្ឋាភិបាល បានអនុញ្ញាត ឱ្យរដ្ឋាលេខាធិការដ្ឋានអាកាសចរណ៍ស៊ីវិល សហការជាមួយសម្ព័ន្ធក្រុមហ៊ុន ហ្វូខឺស ក្នុងការរៀបចំអភិវឌ្ឍគម្រោងខាងលើនេះស្របតាមច្បាប់ និងនិតិវិធីជាធរមាននៃកម្ពុជា។លោក ស៊ិន ចាន់សេរីវុត្ថា អនុរដ្ឋលេខាធិកា និងអ្នកនាំពាក្យអាកាសចរណ៍ស៊ីវិល បានប្រាប់បណ្តាញព័ត៌មាន Fresh News នៅថ្ងៃទី១៣ ខែមករា ឆ្នាំ២០២៤នេះថា ក្រុមហ៊ុន ហ្វូខឺស គ្រុប ដែលដឹកនាំដោយក្រុមហ៊ុន ហ្វូខឺស ត្រេន គ្លូប៊ល វេនឈ័រឯ.ក គឺជាក្រុមហ៊ុន ដែលមានចូលរួមពីវិនិយោគមកពីម៉ាឡេស៊ី ចិន និងអារ៉ាប់។

លោកបញ្ជាក់ថា ការឈានទៅដល់ការដាក់ទុនវិនិយោគ លើគម្រោងអាកាសយានដ្ឋានមណ្ឌលគិរីថ្មី និងការអភិវឌ្ឍទីក្រុងរណបពហុបំណង នៅខេត្តមណ្ឌលគិរី គឺអាស្រ័យទៅលើការសិក្សា ប្រសិនបើក្រុមហ៊ុននេះ សិក្សារកឃើញថាដំណើរការល្អ នោះនឹងឈានទៅដល់ការវិនិយោគ។សូមជម្រាបថា រាជរដ្ឋាភិបាលធ្លាប់បានអនុញ្ញាតឱ្យក្រុមហ៊ុនចិន China Power ធ្វើការសិក្សាលើគម្រោងវិនិយោគអាកាសយានដ្ឋាន នៅខេត្តមណ្ឌលគិរីនេះ។ ព្រលានយន្ដហោះខេត្តមណ្ឌលគីរី គ្រោងសាងសង់លើផ្ទៃដី៣០០ហិកតា មានចម្ងាយប្រហែល២០គីឡូម៉ែត្រ ពីទីក្រុងសែនមនោរម្យ ដែលតាមការប៉ាន់ស្មានអាចនឹងចំណាយថវិកាវិនិយោគប្រមាណជាង៨០លានដុល្លារ។
ដោយសារតែវិបត្តិនៃជំងឺកូវីដ១៩ និងស្ថានភាពសេដ្ឋកិច្ចសកល ធ្វើឱ្យក្រុមហ៊ុន China Power ធ្វើឱ្យគម្រោងនេះត្រូវបានជាប់គាំងមិន ដំណើរការ។ ទើបតែពេលនេះ រាជរដ្ឋាភិបាលផ្តល់សិទ្ធិឱ្យក្រុមហ៊ុនថ្មី សិក្សាពីគម្រោងវិនិយោគព្រលានយន្តហោះមណ្ឌលគិរីនេះ ៕

ដោយ: គង់ លាងហួរ
ប៉េកាំង: ប្រធានាធិបតីចិនលោក សុី ជីនពីង បានមានប្រសាសន៍ឱ្យដឹងកាលពីពេលថ្មីៗនេះ ថា ការធ្វើទំនើបកម្មរបស់ប្រទេសចិននឹងផ្តល់ឱកាសកាន់តែច្រើនសម្រាប់ក្រុមហ៊ុនអាជីវកម្មមកពីសហរដ្ឋអាមេរិក និងប្រទេសដទៃទៀតនៅទូទាំងពិភពលោក។

លោក សុី ជីនពីង បានធ្វើការកត់សម្គាល់បែបនេះ នៅក្នុងសារអបអរសាទរចំពោះពិធីជប់លៀងអាហារពេលល្ងាចដើម្បីប្រារព្ធអបអរខួបលើកទី៥០ នៃការបង្កើតក្រុមប្រឹក្សាធុរកិច្ចសហរដ្ឋអាមេរិក-ចិន។

លោក សុី ជីនពីង បានធ្វើការកត់សម្គាល់ថា “យើងមានសក្ដានុពលដ៏ធំ លំហដ៏ធំទូលាយ និងអនាគតដ៏ជោគជ័យសម្រាប់កិច្ចសហប្រតិបត្តិការសេដ្ឋកិច្ច និងពាណិជ្ជកម្មកាន់តែអស្ចារ្យរវាងប្រទេសចិន និងសហរដ្ឋអាមេរិក”។លោក សុី បានបន្តថា ប្រទេសចិននឹងនៅតែប្តេជ្ញាចិត្តយ៉ាងមុតមាំ ក្នុងការជំរុញការអភិវឌ្ឍន៍ប្រកបដោយគុណភាពខ្ពស់ និងការបើកទូលាយប្រកបដោយស្តង់ដារខ្ពស់ ដើម្បីជំរុញបរិយាកាសធុរកិច្ចដែលផ្តោតលើទីផ្សារ ផ្អែកលើច្បាប់ និងស្ថិតក្នុងលំដាប់ថ្នាក់ពិភពលោក។

លោកបានគូសបញ្ជាក់បន្ថែមថា ប្រទេសចិនបានត្រៀមខ្លួនរួចជាស្រេចក្នុងការធ្វើការជាមួយភាគីអាមេរិក ដើម្បីលើកកម្ពស់ការអភិវឌ្ឍន៍ប្រកបដោយសុខភាពល្អ ស្ថិរភាព និងការអភិវឌ្ឍន៍ប្រកបដោយចីរភាពនៃទំនាក់ទំនងទ្វេរភាគី។

លោក សុី ជីនពីង ក៏បានអះអាងផងដែរថា ប្រទេសចិនបានត្រៀមខ្លួនរួចជាស្រេច ក្នុងគោលការណ៍នៃការគោរពគ្នាទៅវិញទៅមក ការរួមរស់ដោយសន្តិភាព និងកិច្ចសហប្រតិបត្តិការឈ្នះ-ឈ្នះ ដើម្បីបង្កើតកិច្ចខិតខំប្រឹងប្រែងរួមគ្នាជាមួយសហរដ្ឋអាមេរិក ក្នុងការអនុវត្តលទ្ធផលផ្លែផ្កាពីកិច្ចប្រជុំនៅទីក្រុងសាន់ហ្វ្រាន់សុីស្កូ កាលពីខែវិច្ឆិកា ឆ្នាំមុន៕ប្រភព៖The edge malaysia៕

ដោយ: គង់ លាងហួរ
អន្តរជាតិ: មហាសេដ្ឋីចិន លោក Chen Tianqiao បានជាប់ឈ្មោះនៅក្នុងបញ្ជី Land Report 100 ដែលជាជនបរទេស មានដីធ្លីច្រើនជាងគេទីពីរ និងជាម្ចាស់អចលនទ្រព្យធំជាងគេបំផុតទី៨២ នៅសហរដ្ឋអាមេរិក។

Land Report 100 គឺជាបញ្ជី ដែលចាត់ថ្នាក់បុគ្គល ដែលមានដីធ្លីច្រើនជាងគេទាំង១០០រូប នៅសហរដ្ឋអាមេរិក ដោយក្នុងនោះ រួមមានទាំងម្ចាស់ដីជាជនជាតិអាមេរិក និង ជនបរទេសផងដែរ។

យោងតាមរបាយការណ៍បានបង្ហាញថា កាលពីឆ្នាំ២០១៥ លោក Chen Tianqiao បានទិញដីក្នុងតំបន់ Oregon ចំនួន៨០.១២៧ហិកតា ពីក្រុមហ៊ុនវិនិយោគ Fidelity National Financial Ventures ដែលការណ៍នេះបានធ្វើឱ្យលោកជាប់ឈ្មោះក្នុងបញ្ជីខាងលើ។ចំណែកឯ ជនបរទេស ដែលមានដីធ្លីច្រើនបំផុតនៅអាមេរិក គឺគ្រួសារត្រកូល Irving មកពីប្រទេសកាណាដា ដែលមានដីធ្លីសរុបរហូតដល់ទៅ៥១៣.០៥៧ហិកតា។

កាសែត New York Post បានរាយការណ៍ថា លោក Chen និងភរិយារបស់លោក គឺលោកស្រី Chrissy Luo ក៏បានទិញភូមិគ្រឹះ Vanderbilt Mansion នៅផ្លូវ East 69th Street ក្នុងរដ្ឋ Manhattan ក្នុងតម្លៃ៣៩លានដុល្លារនៅឆ្នាំ២០១៨ និងភូមិគ្រឹះ Seeley Mudd Estate នៅជាយក្រុង Los Angeles ក្នុងតម្លៃ២៥លានដុល្លារកាលពីឆ្នាំ២០២១ផងដែរ។

លោក Chen Tianqiao បានឡើងឋានៈជាមហាសេដ្ឋី នៅឆ្នាំ១៩៩៩ ដោយលោកជាស្ថានិកក្រុមហ៊ុន Shanda Interactive Entertainment ដែលជាក្រុមហ៊ុនដ៏ធំបំផុតមួយនៅក្នុងឧស្សាហកម្មហ្គេមអនឡាញរបស់ប្រទេសចិន។

ក្រោយមក លោក Chen បានលាលែងពីតំណែងជានាយកប្រតិបត្តិរបស់ក្រុមហ៊ុនហ្គេមអនឡាញនេះ និងបានប្តូរទីតាំងក្រុមហ៊ុនវិនិយោគ Shanda Group ទៅកាន់ប្រទេសសិង្ហបុរី ជាទី ដែលលោកបានចាប់ផ្តើមវិនិយោគលើអចលនទ្រព្យ តាមរយៈការបង្កើតក្រុមហ៊ុន Shanda World ។

គិតត្រឹមថ្ងៃទី៩ ខែមករា ឆ្នាំ២០២៤ ទ្រព្យសម្បត្តិសុទ្ធរបស់លោក Chen ត្រូវបានប៉ាន់ស្មានថា មានចំនួន១ពាន់លានដុល្លារ។ នេះបើយោងតាមការចុះផ្សាយទស្សនាវដ្តី Forbes៕

ដោយ: គង់ លាងហួរ
ហាណូយ: អ្នកជំនាញបានអះអាងថា ទីផ្សារអចលនទ្រព្យវៀតណាមនឹងចាប់ផ្តើមស្ទុះងើបឡើងវិញ ចាប់ពីពាក់កណ្តាលឆ្នាំ២០២៤ ប៉ុន្តែការងើបឡើងវិញដ៏រឹងមាំ និងប្រកបដោយនិរន្តរភាពនឹងមិនអាចសម្រេចបានទេ រហូតទាល់តែដល់ត្រីមាសទី៣ ឆ្នាំ២០២៥ខាងមុខ។

យោងតាមរបាយការណ៍ថ្មីចុងក្រោយបំផុតរបស់ខ្លួនស្តីអំពីទីផ្សារ ក្រុមហ៊ុនស្រាវជ្រាវអចលនទ្រព្យ និងវេទិកាទិញ-លក់ Batdongsan បានអះអាងថា នៅត្រីមាសទី៣ ឆ្នាំ២០២៤ នឹងក្លាយជា “ចំណុចរបត់”សម្រាប់ទីផ្សារអចលនទ្រព្យនៅប្រទេសវៀតណាម។

លោក Nguyen Quoc Anh អគ្គនាយករងរបស់ក្រុមហ៊ុនខាងលើបានលើកឡើងថា ការព្យាករណ៍នេះធ្វើឡើងដោយផ្អែកលើកត្តាជាច្រើន ដូចជាច្បាប់ថ្មីដែលចូលជាធរមាន កំណើនសេដ្ឋកិច្ចដែលរំពឹងទុកនៅឆ្នាំក្រោយ និងទំនុកចិត្តរបស់អ្នកទិញ។លោកបានបន្តថា “ចំណុចរបត់” គ្រាន់តែជាសញ្ញាសម្គាល់ពីការបញ្ចប់នៃការធ្លាក់ចុះប៉ុណ្ណោះ ប៉ុន្តែការស្ទុះងើបឡើងវិញនឹងចាប់ផ្តើមដំណើរការល្អបន្ទាប់ពីនោះ។

លោក Michael Kokalari នាយកប្រតិបត្តិនៃក្រុមហ៊ុនគ្រប់គ្រងការវិនិយោគ Vina Capital ជឿជាក់ថា ភាពអាក្រក់បំផុតសម្រាប់ទីផ្សារបានបញ្ចប់ ខណៈប្រតិបត្តិការទិញ-លក់បានកើនឡើងបន្ទាប់ពីធនាគារនានាបានកាត់បន្ថយអត្រាការប្រាក់កម្ចីទិញផ្ទះក្នុងខែសីហា ឆ្នាំ២០២៣។

ជាមួយគ្នានេះ ប្រជាជនក៏បានផ្លាស់ប្តូរបន្តិចម្តងៗពីការសន្សំដាក់ប្រាក់តាមធនាគារទៅវិនិយោគលើទីផ្សារភាគហ៊ុន និងអចលនទ្រព្យ ដែលជាសញ្ញាវិជ្ជមានសម្រាប់ទីផ្សារក្នុងឆ្នាំ២០២៤។

លោក Can Van Luc ប្រធានសេដ្ឋវិទូនៅធនាគាររដ្ឋ BIDV បានមានប្រសាសន៍ឱ្យដឹងថា ឆ្នាំ២០២៤ នឹងនាំមកនូវឱកាសសម្រាប់ទីផ្សារអចលនទ្រព្យ។

លោកបានបន្តថា ការបើកព្រំដែនឡើងវិញរបស់ប្រទេសចិន ការផ្លាស់ប្តូរខ្សែសង្វាក់ផ្គត់ផ្គង់ពិភពលោក លំហូរមូលធន ការជំរុញឱ្យមានការអភិវឌ្ឍន៍ហេដ្ឋារចនាសម្ព័ន្ធបន្ថែម កម្មវិធីស្តារសេដ្ឋកិច្ចសង្គម នឹងផ្តល់អត្ថប្រយោជន៍ខ្ពស់សម្រាប់កំណើនសេដ្ឋកិច្ចរបស់ប្រទេសវៀតណាម។

លោកបានបន្ថែមថា អតិផរណា និងបំណុលអាក្រក់របស់ប្រទេសវៀតណាមស្ថិតនៅក្រោមការគ្រប់គ្រងបាន ដែលការណ៍នេះនឹងជួយទាក់ទាញលំហូរមូលធនចូលទៅក្នុងទីផ្សារលំនៅដ្ឋាន៕

ដោយៈ គង់ សូរិយា

        ភ្នំពេញៈ ចំណតផែរណបពហុបំណងចំនួន៣ទីតាំង របស់កំពង់ផែស្វយ័តភ្នំពេញ ត្រូវបានសម្ពោធបើកឱ្យប្រើប្រាស់ជាផ្លូវការ ក្រោមអធិបតីភាព រដ្ឋមន្ត្រីក្រសួងសាធារណការ និងដឹកជញ្ជូន។

លោកប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនបានអញ្ជើញជាអធិបតី ក្នុងពិធីសម្ពោធបើកឱ្យប្រើប្រាស់ជាផ្លូវការនូវចំណតផែរណបពហុបំណង TS១១, UM២ និង LM២៦ របស់កំពង់ផែស្វយ័តភ្នំពេញ (ក.ស.ភ.) កាលពីថ្ងៃទី១២ មករាកន្លងមកនេះ។

ចំណតផែរណបពហុបំណងទាំង៣ទីតាំង ដែលប្រារព្ធពិធីសម្ពោធនាឱកាសនេះ គឺជាសមិទ្ធផលថ្មីបន្ថែមទៀតរបស់កំពង់ផែស្វយ័តភ្នំពេញ ដែលនឹងបម្រើឱ្យប្រតិបត្តិការផ្ទេរ ផ្ទុកទំនិញ និងលើកដាក់កុងតឺន័រ។ ជាមួយនឹងកិច្ចខិតខំប្រឹងប្រែង និងសមិទ្ធផលដែលសម្រេចបានទាំងនេះ គឺពិតជាបាននិងកំពុងរួមចំណែក ឆ្លើយតបទៅនឹងចក្ខុវិស័យរបស់ក្រសួង កម្មវិធីនយោបាយ និងយុទ្ធសាស្ត្ររបស់រាជរដ្ឋាភិបាល ជាពិសេសស្របទៅនឹងទិសដៅក្នុងការពង្រីក និងអភិវឌ្ឍហេដ្ឋារចនាសម្ព័ន្ធកំពង់ផែនៅកម្ពុជា។ថ្លែងក្នុងឱកាសនេះ លោករដ្ឋមន្ត្រី បានលើកឡើងថា ដើម្បីចូលរួមសម្រេចឱ្យបានស្របតាមចក្ខុវិស័យ មាគ៌ានយោបាយ និងយុទ្ធសាស្ត្របញ្ចកោណ របស់រាជរដ្ឋាភិបាលអាណត្តិទី៧នេះ ក្រសួងសាធារ​ណការ និងដឹកជញ្ជូនក៏បានដាក់ចេញនូវ ផែនការអាទិភាពក្នុងការពង្រឹង និងលើកកម្ពស់ការអភិវឌ្ឍ វិស័យកំពង់ផែនៅកម្ពុជា រួមទាំងការធ្វើកំណែទម្រង់ ដើម្បីធ្វើយ៉ាងណាឱ្យតម្លៃឡូជីស្ទីក មានភាពប្រកួ​តប្រជែង និងការផ្តល់សេវាមានភាពឆាប់រហ័ស តម្លាភាព និងប្រសិទ្ធភាពផងដែរ។

លោកក៏បានជម្រាបជូនអង្គពិធីដែរថា នាពេលថ្មីៗនេះ ប្រមុខរាជរដ្ឋាភិបាល បានណែនាំក្រសួងសាធារណការ និងដឹកជញ្ជូន ឱ្យសហការគ្នាជាមួយក្រសួងសេដ្ឋកិច្ច និងហិរញ្ញវត្ថុ ដើម្បីពិនិត្យ និងសិក្សារៀបចំផែនការមេ និងក្របខណ្ឌអភិវឌ្ឍន៍ គ្រប់គ្រងអាជីវកម្មកំពង់ផែទន្លេ និងការតភ្ជាប់បណ្តាញប្រព័ន្ធដឹកជញ្ជូន តាមផ្លូវទឹកទន្លេរជាមួយផ្លូវសមុទ្រ រួមទាំងមណ្ឌលអាជីវកម្មអាទិភាព សម្រាប់ប្រតិបត្តិការអាជីវកម្មកំពង់ផែផងដែរ។ទន្ទឹមនឹងនេះ ក្រោមកិច្ចសម្របសម្រួល របស់ក្រុមប្រឹក្សាអភិវឌ្ឍន៍កម្ពុជា ក្រសួងសាធារណការ និងដឹកជញ្ជូនក៏បាននិងកំពុងចូលរួមសិក្សា និងរៀបចំផែនការមេអភិវឌ្ឍន៍កំពង់ផែ និងមជ្ឈមណ្ឌលភស្ដុភារកម្មនៅក្រុងព្រះសីហនុ ដើម្បីជំរុញលើកកម្ពស់ការអភិវឌ្ឍវិស័យកំពង់ផែនៅកម្ពុជា។

ចំណតផែរណបពហុបំណង TS១១ មានទីតាំងស្ថិតនៅសង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ កើតចេញពីការសហការវិនិយោគរវាងក.ស.ភ. ជាមួយក្រុមហ៊ុន PTLS Cooperation Co., Ltd. លើផ្ទៃដីទំហំ៤ហិកតា។ គោលបំណងនៃការបង្កើតចំណតផែរណបពហុបំណង TS១១ ដើម្បីប្រតិបត្តិការផ្ទេរ-ផ្ទុក លើកដាក់ កុងតឺន័រ និងទំនិញរាយ ដូចជា គ្រឿងសំណង់ ដែក ថ្មម៉ាប ដំឡូងមី។ល។បច្ចុប្បន្ននេះ ចំណតផែរណបពហុបំណងTS១១ បានសាងសង់ហេដ្ឋារចនាសម្ព័ន្ធគ្រប់គ្រាន់ ដើម្បីបម្រើឱ្យប្រតិបត្តិការលើកដាក់ទំនិញនិងកុងតឺន័រ និងស្ថិតនៅទីតាំង ដែលមានសក្តានុពលខ្ពស់សម្រា​ប់បម្រើឱ្យសេចក្តីត្រូវការ ប្រើប្រាស់របស់អតិថិជន ក្នុងរាជធានីភ្នំពេញ ខេត្តកណ្តាល និងខេត្តផ្សេងៗទៀត ជាពិសេសចូលរួមចំណែ​កបានយ៉ាងច្រើន ក្នុងការកាត់បន្ថយការកកស្ទះចរាចរណ៍ ក្នុងរាជធានីភ្នំពេញ។

ចំពោះចំណតផែរណបពហុបំណងUM២ មានទីតាំងស្ថិតនៅ ភូមិដូនម៉ៅលើ ឃុំទន្លេរបិទ ស្រុកត្បូងឃ្មុំ ខេត្តត្បូងឃ្មុំ។ ចំណតផែរណបពហុបំណង UM២ គឺកើតចេញពីការសហការវិនិយោគរវាង ក.ស.ភ. ជាមួយក្រុមហ៊ុន PTLS Cooperation Co., Ltd. លើផ្ទៃដីទំហំ ១៦,៣ ហិកតា។គោលបំណងនៃការបង្កើតចំណត ផែរណបពហុបំណងUM២ ដើម្បីប្រតិបត្តិការផ្ទេរ-ផ្ទុក លើកដាក់ កុងតឺន័រ និងទំនិញរាយ ដូចជា គ្រឿងសំណង់ ចំណីសត្វ សសរគ្រឹះបេតុង ដែក កៅស៊ូ ស្រូវ ផលិត​ផលកសិផលផ្សេងទៀត។ ចំណតផែរណបពហុបំណង UM២ ក៏ជាចំណតផែទន្លេដែលមានសក្តានុពលខ្ពស់ សម្រាប់បម្រើឱ្យសេចក្តីត្រូវការរបស់អ្នកប្រើប្រាស់ នៅតំបន់ជុំវិញតាមដងទន្លេមេគង្គលើ ដើម្បីធ្វើការនាំចេញទៅក្រៅប្រទេស និងនាំចូលទំនិញពីខាងក្រៅមកចំណតផែរណបនេះវិញ។

បន្ថែមពីនេះ ចំណតផែរណបពហុបំណងនេះ នឹងចូលរួមចំណែ​កកាត់បន្ថយថ្លៃដឹកជញ្ជូនទំនិញ និងការខូចខាតផ្លូវថ្នល់។ ដោយឡែកចំណតផែរណបពហុបំណងLM២៦ មានទីតាំងស្ថិតនៅ ឃុំកោះរកា ស្រុកពាមជរ ខេត្តព្រៃវែង មានផ្ទៃដី ទំហំ ១៨,៦ ហិកតា។ បច្ចុប្បន្នចំណតដែរណបពហុបំណងនេះ បានសាងសង់ហេដ្ឋារចនាសម្ព័ន្ធសំខាន់ៗជាច្រើន ដោយប្រើប្រាស់ប្រភពទុនវិនិយោគផ្ទាល់របស់ក.ស.ភ.។

គោលបំណងនៃការបង្កើតចំណតផែ រណបពហុបំណង LM២៦ គឺដើម្បីបម្រើដល់ប្រតិបត្តិការផ្ទេរ-ផ្ទុក លើកដាក់ កុងតឺន័រ និងទំនិញរាយ ដូចជា គ្រឿងសំណង់ ធ្យូងថ្ម ទំនិញកសិផល ដូចជា ស្រូវ អង្ករ ពោត ដំឡូងមី កៅស៊ូ ម្រេចជាដើម៕

ដោយ: គង់ លាងហួរ
សេអ៊ូល: ក្រុមហ៊ុន Samsung C&T ដែលជាក្រុមហ៊ុនសំណង់ដ៏ធំមួយ របស់ប្រទេសកូរ៉េខាងត្បូង បានឱ្យដឹងកាលពីថ្ងៃព្រហស្បតិ៍ ទី១១ ខែមករា ថា ខ្លួនបានបញ្ចប់ការស្ថាបនាអគារ ដែលមានកំពស់១១៨ជាន់នៅទីក្រុងគូឡាឡាំពួ ប្រទេសម៉ាឡេសុី។

ក្រុមហ៊ុន Samsung C&T ដែលជាបុត្រសម្ព័ន្ធនៃក្រុមហ៊ុនមេ Samsung Group បានប្រកាសថា ពិធីបើកសម្ពោធអគារ Merdeka 118 ត្រូវបានធ្វើឡើងកាលពីថ្ងៃពុធ ទី១០ ខែមករា ដែលនេះជាអគារខ្ពស់ជាងគេទី២ នៅលើពិភពលោក ដែលមានកម្ពស់៦៧៩ម៉ែត្រ និងមានទីតាំងស្ថិតនៅចំកណ្តាលនៃទីក្រុងគូឡាឡាំពួ។ការសាងសង់អគារខ្ពស់កប់ពពក Merdeka 118 ត្រូវបានចាប់ផ្តើមឡើងនៅក្នុងឆ្នាំ២០១៤។
Merdeka 118 គឺជាអគារ និងរចនាសម្ព័ន្ធខ្ពស់ជាងគេបំផុតទីពីររបស់ពិភពលោក បន្ទាប់ពីអគារ Burj Khalifa ដែលមានកម្ពស់៨២៨ម៉ែត្រនៅទីក្រុងឌូបៃ ប្រទេសអារ៉ាប់រួម ដែលក្រុមហ៊ុន Samsung បានសាងសង់រួចរាល់ក្នុងឆ្នាំ២០០៩។

អគារ Merdeka 118 ដែលមានផ្ទៃក្រឡាខាងក្នុង(floor space)សរុបប្រហែល៦៧៣.៩០០ម៉ែត្រការ៉េ គឺជាអគារពហុមុខងារ ដែលរួមមានទាំងការិយាល័យ សណ្ឋាគារលំដាប់ខ្ពស់ និងផ្សារទំនើបចំនួនមួយផងដែរ។

សមិទ្ធិផលនេះបានសរបង្ហាញឱ្យឃើញពីការរីកចម្រើនឥតឈប់ឈរ ក្នុងវិស័យសំណង់របស់ម៉ាឡេស៊ី ដែលជាសមាជិកមួយ របស់សមាគមប្រជាជាតិអាស៊ីអាគ្នេយ៍ (អាស៊ាន) ហើយក៏ជាមុខមាត់ថ្មីគួរឱ្យស្ញប់ស្ញែង សម្រាប់ប្រទេសកាន់សាសនាអុីស្លាមភាគច្រើន ដែលមានប្រជាជនសរុបជាង៣២,៧លាននាក់មួយនេះផងដែរ។

អគារ ដែលចំណាយអស់ទឹកប្រាក់១,៥ពាន់លានដុល្លារអាមេរិក របស់ក្រុមហ៊ុន PNB Merdeka Ventures Sdn Bhd ខាងលើនេះ ត្រូវបានរចនាឡើងដោយក្រុមហ៊ុនស្ថាបត្យកម្មអូស្ត្រាលី Fender Katsalidis សហការជាមួយក្រុមហ៊ុនស្ថាបត្យកម្មម៉ាឡេស៊ី RSP KL និងទទួលសាងសង់ ដោយក្រុមហ៊ុនម៉ៅការកូរ៉េខាងត្បូង Samsung C&T និងក្រុមហ៊ុនម៉ៅការម៉ាឡេស៊ី UEM Group៕