ដោយ: គង់ លាងហួរ
សេអ៊ូល: ក្រុមហ៊ុន Samsung C&T ដែលជាក្រុមហ៊ុនសំណង់ដ៏ធំមួយ របស់ប្រទេសកូរ៉េខាងត្បូង បានឱ្យដឹងកាលពីថ្ងៃព្រហស្បតិ៍ ទី១១ ខែមករា ថា ខ្លួនបានបញ្ចប់ការស្ថាបនាអគារ ដែលមានកំពស់១១៨ជាន់នៅទីក្រុងគូឡាឡាំពួ ប្រទេសម៉ាឡេសុី។

ក្រុមហ៊ុន Samsung C&T ដែលជាបុត្រសម្ព័ន្ធនៃក្រុមហ៊ុនមេ Samsung Group បានប្រកាសថា ពិធីបើកសម្ពោធអគារ Merdeka 118 ត្រូវបានធ្វើឡើងកាលពីថ្ងៃពុធ ទី១០ ខែមករា ដែលនេះជាអគារខ្ពស់ជាងគេទី២ នៅលើពិភពលោក ដែលមានកម្ពស់៦៧៩ម៉ែត្រ និងមានទីតាំងស្ថិតនៅចំកណ្តាលនៃទីក្រុងគូឡាឡាំពួ។ការសាងសង់អគារខ្ពស់កប់ពពក Merdeka 118 ត្រូវបានចាប់ផ្តើមឡើងនៅក្នុងឆ្នាំ២០១៤។
Merdeka 118 គឺជាអគារ និងរចនាសម្ព័ន្ធខ្ពស់ជាងគេបំផុតទីពីររបស់ពិភពលោក បន្ទាប់ពីអគារ Burj Khalifa ដែលមានកម្ពស់៨២៨ម៉ែត្រនៅទីក្រុងឌូបៃ ប្រទេសអារ៉ាប់រួម ដែលក្រុមហ៊ុន Samsung បានសាងសង់រួចរាល់ក្នុងឆ្នាំ២០០៩។

អគារ Merdeka 118 ដែលមានផ្ទៃក្រឡាខាងក្នុង(floor space)សរុបប្រហែល៦៧៣.៩០០ម៉ែត្រការ៉េ គឺជាអគារពហុមុខងារ ដែលរួមមានទាំងការិយាល័យ សណ្ឋាគារលំដាប់ខ្ពស់ និងផ្សារទំនើបចំនួនមួយផងដែរ។

សមិទ្ធិផលនេះបានសរបង្ហាញឱ្យឃើញពីការរីកចម្រើនឥតឈប់ឈរ ក្នុងវិស័យសំណង់របស់ម៉ាឡេស៊ី ដែលជាសមាជិកមួយ របស់សមាគមប្រជាជាតិអាស៊ីអាគ្នេយ៍ (អាស៊ាន) ហើយក៏ជាមុខមាត់ថ្មីគួរឱ្យស្ញប់ស្ញែង សម្រាប់ប្រទេសកាន់សាសនាអុីស្លាមភាគច្រើន ដែលមានប្រជាជនសរុបជាង៣២,៧លាននាក់មួយនេះផងដែរ។

អគារ ដែលចំណាយអស់ទឹកប្រាក់១,៥ពាន់លានដុល្លារអាមេរិក របស់ក្រុមហ៊ុន PNB Merdeka Ventures Sdn Bhd ខាងលើនេះ ត្រូវបានរចនាឡើងដោយក្រុមហ៊ុនស្ថាបត្យកម្មអូស្ត្រាលី Fender Katsalidis សហការជាមួយក្រុមហ៊ុនស្ថាបត្យកម្មម៉ាឡេស៊ី RSP KL និងទទួលសាងសង់ ដោយក្រុមហ៊ុនម៉ៅការកូរ៉េខាងត្បូង Samsung C&T និងក្រុមហ៊ុនម៉ៅការម៉ាឡេស៊ី UEM Group៕

ដោយ: គង់ លាងហួរ

អន្តរជាតិ: លោកនាយករដ្ឋមន្ត្រីឥណ្ឌា Narendra Modi បានលើកឡើងពីទស្សនវិស័យ សេដ្ឋកិច្ចរបស់ឥណ្ឌា នៅឯកិច្ចប្រជុំកំពូលធុរកិច្ចដ៏សំខាន់មួយ នៅក្នុងរដ្ឋGujarat កាលពីថ្ងៃពុធទី១០ ខែមករា។

ក្នុងកិច្ចប្រជុំនេះ ត្រូវបានធ្វើឡើង នៅពេលក្រុមហ៊ុនខ្នាតយក្សចំនួន២ គឺក្រុមហ៊ុន Maruti Suzuki និងក្រុមហ៊ុន Adani បានបង្ហាញផែនការវិនិយោគ ដែលមានតម្លៃជិត៣០ពាន់លានដុល្លារអាមេរិក។

នៅឯកិច្ចប្រជុំកំពូល Vibrant Gujarat Global Summit លោក Modi បានថ្លែងថា ប្រទេសឥណ្ឌា​ជា​មហាអំណាច ​សម្រាប់​យុវជន​ដែល​មាន​ទេពកោសល្យ ជា​មជ្ឈមណ្ឌល​បច្ចេកវិទ្យា​ សម្រាប់​ការ​ស្វែងរក​ដំណោះស្រាយ និង​ជាប្រទេសដែលមានលទ្ធិប្រជាធិបតេយ្យ។លោកបានបន្តថា ប្រទេសឥណ្ឌា កំពុងធ្វើដំណើរឆ្ពោះទៅក្លាយជាប្រទេស ដែលមានសេដ្ឋកិច្ចធំជាងគេទី៣ របស់ពិភពលោកក្នុងរយៈពេលប៉ុន្មានឆ្នាំមុខ។ នេះបើយោងតាមការចុះផ្សាយដោយសារពត៌មាន Reuters។

លោក Modi បានគូសបញ្ជាក់ឱ្យដឹងថា សេដ្ឋកិច្ចរបស់ប្រទេសឥណ្ឌា បានបង្ហាញពីសន្ទុះ និងភាពធន់ ទោះបីជាមានបញ្ហាភូមិសាស្ត្រនយោបាយនៅជុំវិញពិភពលោកយ៉ាងណាក្តី។

លើសពីនេះ លោក Narendra Modi បានអញ្ជើញបណ្តាអ្នកវិនិយោគ ឱ្យចូលរួមជាផ្នែកមួយ នៃដំណើររីកចម្រើនរបស់ឥណ្ឌា ដោយលោកបន្ថែមថា “ការប្តេជ្ញាចិត្តរបស់ខ្ញុំនឹងធំដូចក្តីស្រមៃរបស់អ្នក”។

ការថ្លែងបែបនេះរបស់លោក Modi បានធ្វើឡើង ខណៈការបោះឆ្នោតជាតិខិតជិតមកដល់ ដែលលោកនឹងឈរឈ្មោះនៅអាណត្តិទី៣បន្ថែមទៀត និងស្របពេលដែល ក្រុមហ៊ុនសកលកំពុងងាកមកកាន់ប្រទេសឥណ្ឌា ដើម្បីធ្វើពិពិធកម្មសង្វាក់ផ្គត់ផ្គង់ពីប្រទេសចិន។

នៅមុនកិច្ចប្រជុំកំពូលខាងលើ រដ្ឋGujarat ដែលជាមជ្ឈមណ្ឌលឧស្សាហកម្មកំពូលមួយរបស់ប្រទេសឥណ្ឌា បានចុះហត្ថលេខាលើកិច្ចព្រមព្រៀងវិនិយោគដំបូង ជាមួយក្រុមហ៊ុនចំនួន៥៨ ដែលមានតម្លៃសរុបចំនួន៨៦ពាន់លានដុល្លារអាមេរិក៕

ដោយ: គង់ លាងហួរ

ភ្នំពេញ: យោងតាមការសិក្សារបស់ក្រុមហ៊ុនប្រឹក្សា ផ្នែកអចលនទ្រព្យ CBRE Cambodia បានបញ្ជាក់ឱ្យដឹងថា បញ្ហាប្រឈមក្នុងឆ្នាំ២០២៣ ត្រូវបានគេរំពឹងថា នឹងបន្តកើតមាននៅឆ្នាំនេះ ជាពិសេសសម្រាប់វិស័យការិយាល័យ ការលក់រាយ និងខុនដូនៅរាជធានីភ្នំពេញ។

លោក Marc Townsend អគ្គនាយកក្រុមហ៊ុន CBRE Cambodia ដែលជាបុគ្គលឆ្នើមមួយរូបក្នុងវិស័យនេះ បានផ្តល់នូវការយល់ឃើញរបស់លោកអំពីគន្លង នៃទីផ្សារអចលនទ្រព្យនៅកម្ពុជាពេញមួយឆ្នាំ២០២៤នេះ។លោកបញ្ជាក់ថា “បញ្ហានានា ដែលទីផ្សារកំពុងប្រឈម ដូចជាការផ្គត់ផ្គង់លើសតម្រូវការ បានកើតមានឡើង នៅទូទាំងពិភពលោក ស្របពេលដែលសេដ្ឋកិច្ចសកលជួបបញ្ហា ក្រោយជំងឺកូវីដ-១៩ សង្គ្រាម ការបោះឆ្នោត ការដំឡើងអត្រាការប្រាក់ អតិផរណា និងផលប៉ះពាល់នៃការកើនឡើង ភាពតានតឹងភូមិសាស្ត្រនយោបាយ”។

លោក Townsend បានបន្តដោយផ្តល់អនុសាសន៍ថា “អ្នកអភិវឌ្ឍន៍គួរមានដំណោះស្រា​យជាច្រើន ដែលអាចធ្វើទៅបាន រាប់ចាប់ពីដំណោះស្រាយសាមញ្ញ ដូចជា ការធ្វើទីផ្សារឱ្យកាន់តែប្រសើរ កំណត់តម្លៃឱ្យមានភាពប្រកួតប្រជែង ផ្តល់លក្ខខណ្ឌនៃការទូទាត់ងាយស្រួល និងដំណោះស្រាយស្មុគស្មាញ ដូចជា ការរៀបចំ និងការកំណត់ទីតាំងនៃការអភិវឌ្ឍន៍ឡើងវិញ។លោកបញ្ជាក់ថា “ដំណោះស្រាយប្រាកដជាមាន ប្រសិនបើអ្នកមានឆន្ទៈក្នុងការស្វែងរកវា”។

ចំណែក លោក Lawrence Lennon នាយកគ្រប់គ្រងក្រុមហ៊ុន CBRE Cambodia បានលើកឡើងថា ពុំមានពេលវេលាណាដែលល្អប្រសើរនេះ ក្នុងការទិញអចលនទ្រព្យនោះទេ ដោយសារជម្រើសបានកើនឡើងយ៉ាងខ្លាំង ខណៈដែលតម្លៃលក់ បន្តដាំក្បាលចុះអស់រហូតដល់ទៅ៣០% ក្នុងរយៈពេលប៉ុន្មានឆ្នាំកន្លងមកនេះ។ទន្ទឹមគ្នានេះ លោកស្រី គីម គិនកេសា នាយិការងគ្រប់គ្រងក្រុមហ៊ុន CBRE Cambodia បានកត់សម្គាល់ថា យើងអាចមានឱកាស ដែលបង្កប់ នៅក្នុងបញ្ហាប្រឈមនាពេលបច្ចុប្បន្ន។ជាឧទាហរណ៍ រដ្ឋាភិបាល និងវិស័យធនាគារ អាចធ្វើការអន្ត​រាគមន៍ ដើម្បីបង្កើតកម្មវិធីអ្នកទិញផ្ទះលើកដំបូង សម្រាប់គម្រោងជាក់លាក់មួយចំនួន ដើម្បីជំរុញការលក់ និងធ្វើឱ្យគម្រោងខុនដូ ដែលមានទីតាំងនៅតំបន់ កណ្តាលរាជធានីភ្នំពេញ មានតម្លៃសមរម្យសម្រាប់អតិថិជនក្នុងស្រុក។

ជាងនេះទៅទៀត ក្រុមហ៊ុន CBRE Cambodia គ្រោងនឹងរៀបចំព្រឹត្តិការណ៍ Fearless Forecast ដែលនឹងប្រព្រឹត្តទៅនៅថ្ងៃទី១២ ខែមករា ឆ្នាំ២០២៤នេះ នៅសាលធំ Oakwood Premier Phnom Penh ។

ព្រឹត្តិការណ៍នេះ នឹងផ្តល់នូវទិដ្ឋភាពទូទៅនៃម៉ាក្រូសេដ្ឋកិច្ច និងស្ថានភាពនៃទីផ្សារ អចលនទ្រព្យរបស់ប្រទេសកម្ពុជា នៅក្នុងឆ្នាំ២០២៤។ ម្យ៉ាងវិញទៀត ព្រឹត្តិការណ៍នេះ នឹងក្លាយទៅជាបទពិសោធន៍ដ៏ល្អ និងប្រកបដោយការយល់ដឹង។

ការរៀបចំព្រឹត្តិការណ៍ Fearless Forecast ប្រចាំឆ្នាំ២០២៤នេះឡើង មានគោលបំណងផ្តល់នូវការយល់ដឹង ដ៏មានតម្លៃទៅដល់អ្នកដឹកនាំ ឧស្សាហកម្ម និងអ្នកដែលចង់ធ្វើការសម្រេចចិត្តប្រកប​ដោយការយល់ដឹង នៅក្នុងទីផ្សារអចលនទ្រព្យនៅកម្ពុជា៕

ដោយ: គង់ លាងហួរ

អន្តរជាតិ: យោងតាមរបាយការណ៍បានបង្ហាញថា កម្ពុជា​ជាប់​ចំណាត់លេខ៨៦ ក្នុង​សន្ទស្សន៍​លិខិតឆ្លងដែន ឬប៉ាស្ព័រ​សកល (The Henly Passport Index) សម្រាប់​ឆ្នាំ២០២៤នេះ។

ផ្អែកតាម​សន្ទស្សន៍​នេះ ពលរដ្ឋកម្ពុជា​ដែល​កាន់លិខិត​ឆ្លងដែន​កម្ពុជា អាច​ធ្វើដំណើរ​ចេញចូល​ក្នុង​ប្រទេស ឬគោលដៅ​ធ្វើដំណើរ​សរុប​ចំនួន៥៦ ក្នុងចំណោម​ប្រទេស ឬគោលដៅ​ធ្វើដំណើរ​សរុបចំនួន២២៧ នៅទូទាំង​ពិភពលោក ដោយ​ពុំចាំបាច់​សុំទិដ្ឋាការ។

រីឯ ប្រទេស​ដែល​ជាប់លេខ១ ខាង​លិខិតឆ្លងដែន​មាន​ឥទ្ធិពល​ខ្លាំងជាងគេ​បំផុត​នៅលើ​ពិភពលោក គឺ​ប្រទេសបារាំង អាល្លឺម៉ង់ អ៊ីតាលី សិង្ហបុរី អេស្ប៉ាញ និងជប៉ុន ដែល​ពលរដ្ឋ​កាន់​លិខិត​ឆ្លងដែន​របស់ប្រទេស​ទាំងនេះ​ អាច​ធ្វើ​ដំណើរ​ចេញចូល​ ដោយ​ពុំចាំបាច់​ស្នើសុំ​ទិដ្ឋាការ​ទៅកាន់ប្រទេស​ ឬគោលដៅ​ធ្វើដំណើរ​ចំនួន១៩៤ នៅទូទាំង​ពិភពលោក។ចំណែក ប្រទេស​ហ្វាំងឡង់ ស៊ុតអែត និង​កូរ៉េខាងត្បូង ឈរ​នៅ​លេខរៀង​ទី២ ដែលពលរដ្ឋកាន់​លិខិត​ឆ្លងដែន ​​នៃ​ប្រទេស​ទាំងនេះ​ អាច​ធ្វើ​ដំណើរ​ចេញចូល​ ដោយ​ពុំចាំបាច់​ស្នើសុំ​ទិដ្ឋាការ​ ទៅកាន់ប្រទេ​ស​ ឬគោលដៅ​ធ្វើដំណើរ​ចំនួន១៩២ នៅទូទាំង​ពិភពលោក។

ដោយឡែក សហរដ្ឋអាមេរិកជាប់លេខ៧ ដែល​ពលរដ្ឋ​កាន់​លិខិតឆ្លងដែន​អាមេរិកាំង អាច​ធ្វើដំណើរ​ទៅកាន់​ប្រទេស ឬគោលដៅ​ធ្វើដំណើរ​សរុប​ចំនួន១៨៨ ដោយ​ពុំចាំបាច់​សុំ​ទិដ្ឋាការ​ជាមុន ឬ​ទិដ្ឋាការ​នៅពេល​មកដល់។

ចំណែក ប្រទេស​អាហ្វហ្កានីស្ថាន (Afghanistan) គឺជា​ប្រទេស​ជាប់ចំណាត់ថ្នាក់​បាតតារាង លេខ១០៤ ដែល​លិខិតឆ្លងដែន​មានឥទ្ធិពល​ខ្សោយជាង​គេបំផុត​នៅលើពិភពលោក ខណៈ​ពលរដ្ឋ​នៃ​ប្រទេសនេះ ​អាច​ធ្វើដំណើរ​ចេញចូល​ប្រទេស ឬគោលដៅ​តែ២៨ ប៉ុណ្ណោះ ដោយ​ពុំចាំបាច់​សុំទិដ្ឋាការ។

សន្ទស្សន៍​លិខិត​ឆ្លងដែន​សាកល ឬ The Henly Passport Index ធ្វើ​ឡើង​ផ្អែកតាម​ទិន្នន័យ​ទទួលបាន ​ពី​អាជ្ញាធរ​ដឹកជញ្ជូន​ផ្លូវអាកាស​អន្តរជាតិ (IATA)។

សន្ទស្សន៍​នេះត្រូវ​បាន​ធ្វើបច្ចុប្បន្នភាព ​ជារៀងរាល់​ត្រីមាស ដោយ​វាយតម្លៃ​លើ​លិខិតឆ្លងដែន ​សរុប​ចំនួន១៩៩ និង​គោលដៅ​ធ្វើដំណើរ​សរុប​ចំនួន២២៧ នៅទូទាំង​ពិភពលោក៕

ដោយ: គង់ លាងហួរ

អន្តរជាតិ: យោងតាមសារពត៌មាន The Edge Malaysia បានចុះផ្សាយថា នាយករដ្ឋមន្ត្រីម៉ាឡេស៊ី លោក Anwar Ibrahim បានជួបជាមួយសមភាគីសិង្ហបុរី លោកLee Hsien Loong នៅថ្ងៃព្រហស្បតិ៍ ទី១១ ខែមករាកន្លងមកនេះ។

កិច្ចប្រជុំនេះអាចត្រូវបានពិពណ៌នាថា ជាព្រឹត្តិការណ៍ដ៏សំខាន់មួយទៀត នៅក្នុងទំនាក់ទំនងទ្វេរភាគី ខណៈប្រទេសជិតខាងទាំង២ បានគូសបញ្ជាក់ពីការប្តេជ្ញាចិត្ត ចំពោះគម្រោងធំៗចំនួន២។

នៅពេលព្រឹក នាយករដ្ឋមន្ត្រីទាំង២ បានអញ្ជើញទៅទស្សនាគម្រោងខ្សែរថភ្លើងRapid Transit System (RTS) ដែលថ្នាក់ដឹកនាំទាំងពីរបានទទួលព័ត៌មានថ្មីៗ អំពីវឌ្ឍនភាពនៃគម្រោងតម្លៃ២,១៥ពាន់លានដុល្លារមួយនេះ។គម្រោង RTS Link គឺជាការតភ្ជាប់ផ្លូវរថភ្លើង ដែលមានចម្ងាយប្រហែល៤គីឡូម៉ែត្រ ដោយមានស្ថានីយចំនួនពីរ គឺស្ថានីយ Bukit Chagar ក្នុងរដ្ឋ Johor របស់ប្រទេសម៉ាឡេស៊ី និងស្ថានីយ Woodlands North នៅក្នុងប្រទេសសិង្ហបុរី។

ចំណែក ក្រុមហ៊ុន Mass Rapid Transit Corp Sdn Bhd (MRT Corp) ត្រូវបានប្រគល់ភារកិច្ច ក្នុងការអភិវឌ្ឍកំណាត់ផ្លូវដែក នៅក្នុងម៉ាឡេស៊ី ប្រវែង២,៧គីឡូម៉ែត្រ និងរចនាសម្ព័ន្ធផ្សេងៗដែលត្រូវការជាចាំបាច់។ទន្ទឹមគ្នានេះ ប្រតិបត្តិការផ្លូវដែក គ្រោងនឹងធ្វើឡើងរួមគ្នាដោយក្រុមហ៊ុនដឹកជញ្ជូនសាធារណៈ Prasarana Malaysia Bhd និងក្រុមហ៊ុនដឹកជញ្ជូនសាធារណៈសិង្ហបុរី SMRT Corp Ltd.។

បន្ទាប់ពីបំពេញទស្សនកិច្ច ទៅកាន់គម្រោងខ្សែរថភ្លើងខាងលើ លោក Anwar និងលោក Lee ក៏បានអញ្ជើញចូលរួមព្រឹត្តិការណ៍មួយផ្សេងទៀត ដើម្បីធ្វើជាសាក្សីលើការចុះហត្ថលេខា លើអនុស្សរណៈនៃការយោគយល់មួយស្តីពី តំបន់សេដ្ឋកិច្ចពិសេសJohor-Singapore។គំនិតបង្កើតតំបន់សេដ្ឋកិច្ចពិសេសនេះ ត្រូវបានតាក់តែងជាលើកដំបូង ដោយរដ្ឋមន្ត្រីសេដ្ឋកិច្ចម៉ាឡេស៊ី លោក Rafizi Ramli បន្ទាប់ពីកិច្ចប្រជុំ ជាមួយរដ្ឋាភិបាលរដ្ឋ Johor  កាលពីខែឧសភា ឆ្នាំមុន ហើយបន្ទាប់ពីនោះ ប្រទេសទាំងពីរបានយល់ព្រមបោះជំហានមួយបន្ថែមទៀត ដោយបង្កើតក្រុមការងារពិសេសមួយ ដើម្បីសិក្សាពីការបង្កើតតំបន់សេដ្ឋកិច្ចពិសេស នៅក្នុងខែកក្កដាកន្លងមក៕

        ដោយៈ ជេស៊ីកា

        ភ្នំពេញៈ ជាសច្ចៈភាព អ្នវិនិយោគចិន ពិតជាបានធ្វើឲ្យកម្ពុជាផ្លាស់ប្តូរយ៉ាងសម្បើម ក្នុងរយៈពេលពីរទសវត្សរ៍ចុងក្រោយនេះ។

នៅកម្ពុជា ក្រៅពីវិស័យអចលនទ្រព្យ រដ្ឋាភិបាលនិងអ្នកវិនិយោ​គចិនបានចូលរួមចំណែក អភិវឌ្ឍន៍សេដ្ឋកិច្ចសង្គមកម្ពុជា លើវិស័យសំខាន់ៗជាច្រើន ដូចជា វិស័យថាមពល ហេដ្ឋារចនាសម្ព័ន្ឋ វិស័យឧស្សាកម្ម វិស័យរ៉ែ និងវិស័យកសិកម្មជាដើម។

ប៉ុន្តែវិបត្តិកូវីដ១៩ សង្រ្គាមរុស្ស៊ី អ៊ុយក្រែន សង្រ្គាមរវាងអ៊ីស្រាអែល និងក្រុមហាម៉ាស់ បាននិងកំពុងធ្វើឲ្យសេដ្ឋកិច្ចពិភពលោក ស្ទើរតែដួលរលំ រួមទាំងប្រទេសចិនខ្លួនឯងផងដែរ។ នេះជាមូលហេតុធំ ដែលវត្តមានអ្នកវិនិយោគចិន មិនបានវិលមកកម្ពុជាក្នុងចំនួនច្រើនដូចមុន។លោកយិន លាងគង់អគ្គនាយកគេហទំព័រ Propertyarea.asia & Cambodiafinancialtimes.com ដែលបានតាមដានដំណើរវិវត្តន៍នៃវិស័យសេដ្ឋកិច្ច និងអចលនទ្រព្យបានមានប្រសាសន៍ថា អ្នកវិនិយោគចិន បានធ្វើឲ្យវិស័យអចលនទ្រព្យកម្ពុជា ហក់ឡើងដល់ចំណុ​ចកំពូលមួយ ដែលស្ថានភាពនេះពិបាក ធ្វើឲ្យទីផ្សារងើបឡើងវិញដល់កម្រិតកំពូលសាជាថ្មី ដោយសារហេតុផលមួយចំនួនដូចជា ទី១ កំណើនខុនដូ លំនៅដ្ឋាន ក្នុងទីផ្សារអចលនទ្រព្យ ហាក់បានឆ្អែកនៅក្នុងទីផ្សារនេះ ទី២ លំហូរវិនិយោគិនបរទេស មកកាន់កម្ពុជានៅតែ​បន្តស្ងប់ស្ងាត់។

ទី៣ ផលចំណេញពីការវិនិយោគនៅកម្ពុជា បានធ្លាក់ចុះក្នុងកម្រិតទាបជាងមុន ទី៤ កំណើននៃតម្លៃអចលនទ្រព្យ មានភាពខុសគ្នាដាច់ស្រលះ ជាមួយនឹងផលចណូលប្រចាំឆ្នាំ របស់ប្រជាពល​រដ្ឋម្នាក់ៗ ទី៥ អំណាចទីផ្សារនៅមានកម្រិត ដែលទាមទារឲ្យមានការធ្វើកំណែទម្រង់ច្រើន លើការិយាធិបតេយ្យ នៅក្នុងប្រព័ន្ឋការងាររដ្ឋាភិបាល។

តើចិនត្រលប់មកវិញឬទេ? លោកយិន លាងគង់បានពន្យល់ថា ការវិលត្រលប់មកកាន់កម្ពុជា របស់អ្នកធុរកិច្ចចិន អាចនឹងមកម្តងទៀត ប៉ុន្តែនៅពេលសមស្របណាមួយដែលសេដ្ឋកិច្ច និងវិស័យអចលនទ្រព្យ នៅប្រទេសចិនមានស្ថេរភាពជាមុនសិន។

លោកបន្តថា ហេតុផលដែលពួកគេ(អ្នកធុរកិច្ចចិន) នឹងត្រលប់មកវិញ ដោយសារហេតុផលមួយចំនួនទី១ ទំនាក់ទំនងនយោ​បាយរវាងប្រទេសទាំងពីរ មានភាពកាន់តែប្រសើរ ទី២ កត្តាសេដ្ឋកិច្ច និងបញ្ហាច្បាប់បទដ្ឋានគតិយុត្តិ នៅកម្ពុជាកាន់តែប្រសើរជាងនេះ។

ទី៣ ការចាប់ផ្តើមសាងសង់ឡើងវិញ នូវអគារជាប់គាំងក្នុងក្រុងព្រះសីហនុបញ្ចប់ ទី៤ ផលចំណេញពីការវិនិយោគ មានភាពប្រសើរឡើង នឹងទាក់ទាញអ្នកវិនិយោគចិន និងអ្នកវិនិយោគបណ្តាប្រទេសជាច្រើនទៀតត្រលប់មកកាន់កម្ពុជាជាថ្មី ទី៦ កំនើនសេដ្ឋកិច្ចកម្ពុជាមានភាពរ៉ឹងមាំ និងកំណើនពិតប្រាកដ៕

ដោយៈ គង់ សូរិយា

        ភ្នំពេញៈ ការសិក្សាថ្មីមួយរបស់អ្នកជំនាញជប៉ុន បានរកឃើញថា កម្ពុជា មិនមានសញ្ញានៃការរញ្ជួយដីឡើយ ដោ​យសារកត្តាសំខាន់ៗមួយចំនួន។

លោកសាស្រ្តាចារ្យទួស សាភឿនអគ្គលេខាធិការរងគណៈស្ថាបត្យករកម្ពុជា​ ដែលបានអញ្ជើញចូលរួមស្តាប់ បទបង្ហាញរបស់អ្នកជំនាញជប៉ុនបានស​ម្តែងការសាទរ នឹងព័ត៌មានដ៏ល្អនេះ ដោយលោកលើកឡើងថា នេះជាព័ត៌មានដ៏ល្អមួយរបស់អ្នកសាងសង់ ដែលពួកគេអាចសន្សំសំចៃបានច្រើន លើគំរោងសំណង់នានារបស់ខ្លួន។

លោកបានបញ្ជាក់ថា “កន្លងមក មានការបារម្ភពីការរញ្ជួយដីអាចកើតមាននាពេលអនាគត ប៉ុន្តែពេលនេះព័ត៌មានមានភាពច្បាស់លា​ស់ហើយ ដោយកម្ពុជាមិនរញ្ជួយដីឡើយ”។ លោកបន្តថា “ការសិក្សា​បានបង្ហាញថា កម្ពុជាមានស្រទាប់ដីក្រាស់ និងជាស្រទាប់ដីចាស់រាប់​លានឆ្នាំ ដែលមិនអាចឲ្យកម្ពុជាប្រឈមមុខ នឹងបញ្ហារញ្ជួយដីឡើយ”។លោកសាស្រ្តាចារ្យទួស សាភឿនបានបន្តថា ការសាងសង់ដែលការពារដល់ការរញ្ជួយដី ប្រៀបដូចជាការដុតលុយចោល ព្រោះ​ការចំណាយការសាងសង់ ដើម្បីការពារការរញ្ជួយដី និងការសាងសង់ធម្មតាមិនការពារ មានតម្លៃខុសគ្នាចន្លោះពី២០ ទៅ៣០ភាគរយឯណោះ។

លោកសាស្រ្តាចារ្យបានបន្តថា នៅក្នុងបទដ្ឋានបច្ចេកទេស សម្រាប់ប្រទេសមានការរញ្ជួយដី គេកំណត់មេគុណបេតុង ដែក និងបទដ្ឋានសំណង់ដទៃទៀត ដែលធ្វើឲ្យមានការចំណាយខ្ពស់ ប៉ុន្តែប្រ​ទេសមិនមានហានិភ័យពីការរញ្ជួយដី និងខ្យល់ព្យុះ គឺចំណេ​ញ​ច្រើន។
ព័ត៌មាននេះ ត្រូវបានសិក្សា និងធ្វើបទបង្ហាញដោយនាយកដ្ឋានស្រាវជជ្រាវទាក់ទង ការរញ្ជួយដីរបស់រដ្ឋាភិបាលជប៉ុន។ បទបង្ហាញនេះបានធ្វើនៅក្រសួងរៀបចំដែនដី នគរូបនីយកម្ម និងសំណង់កាលពីថ្ងៃទី១១ មករាកន្លងមកនេះ៕