ក្រសួងសាធារណៈការប្រជុំជាមួយធនាគារAIIB លើគំរោងហេដ្ឋារចនាសម្ព័ន្ឋតាមព្រំដែន

ដោយៈ គង់ សូរិយា

ភ្នំពេញៈ មន្រ្តីជាន់ខ្ពស់ក្រសួងសាធារណៈការ បានបើកកិច្ចប្រជុំ Kick-off Meeting ជាមួយក្រុមការងារនៃធនាគារ Asian Infrastructure Investment Bank (AIIB) លើគម្រោងរចនាសម្ព័ន្ធនៅតាមព្រំដែនកម្ពុជា។

កិច្ចប្រជុំដែលបានធ្វើឡើងកាលពីថ្ងៃទី១៥ ឧសភា ត្រូវបានដឹកនាំដោយលោកជំទាវ ឥម នីថារ៉ា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងរចនាសម្ព័ន្ធ នៅតាមព្រំដែន បានអញ្ជើញដឹកនាំកិច្ចប្រជុំ Kick-off Meeting ដើម្បីពិនិត្យ និងពិភាក្សាលើការរៀបចំ គម្រោងរចនាសម្ព័ន្ធនៅតាមព្រំដែន នៅក្នុងព្រះរាជាណាចក្រកម្ពុជា។

កិច្ចប្រជុំនេះ មានការអញ្ជើញចូលរួមពី អនុរដ្ឋលេខាធិការ និងអគ្គនាយក ជាថ្នាក់ដឹកនាំក្រសួង មន្រ្តីបច្ចេកទេសជំនាញពាក់ព័ន្ធ និងតំណាងពីក្រសួងសេដ្ឋកិច្ច និងហិរញ្ញវត្ថុ ព្រមទាំងក្រុមការងារនៃធនាគារ AIIB (ដោយផ្ទាល់ និងតាមរយៈប្រព័ន្ធវីដេអូពីចម្ងាយ)។

គោលបំណងសំខាន់នៃកិច្ចប្រជុំ ធ្វើឡើងដើម្បីពិនិត្យ និងពិភាក្សាលម្អិតលើការចាប់ផ្តើមអនុវត្តគម្រោង ដែលផ្តោតលើការងារមួយចំនួនដូចជា៖ បទពិសោធន៍នៃការអនុវត្តគម្រោងរបស់ (AIIB) កិច្ចលទ្ធកម្មការងារបច្ចេកទេស ផ្នែកហិរញ្ញវត្ថុ ផ្នែកសង្គម និងបរិស្ថាន។

គម្រោងហេដ្ឋារចនាសម្ព័ន្ធច្រកទ្វារព្រំដែន ( Cross-border Facility Project ) នៅកម្ពុជា ត្រូវបានគាំទ្រដោយរាជរដ្ឋាភិបាលកម្ពុជា ក្រោមហិរញ្ញប្បទានរបស់ធនាគារ Asian Infrastructure Investment Bank (AIIB) ដើម្បីធ្វើការអភិវឌ្ឍរចនាសម្ព័ន្ធនានា នៅតាមព្រំដែន ដើម្បីឆ្លើយតបទៅនឹងការរីកចម្រើន នៃសេដ្ឋកិច្ចកម្ពុជា និងការកើនឡើងពាណិជ្ជកម្មតាមព្រំដែន៕

អុីតាលីសម្រេចបើកការិយាល័យពាណិជ្ជកម្មនៅសិង្ហបុរី ដើម្បីស្វែងរកឱកាសវិនិយោគទូទាំងតំបន់អាស៊ាន

ដោយ: គង់ លាងហួរ

អន្តរជាតិ: ប្រទេសអុីតាលីបានសម្រេចបើកការិយាល័យពាណិជ្ជកម្មថ្មីមួយ នៅប្រទេសសិង្ហបុរី ដើម្បីជួយដល់ក្រុមហ៊ុនរបស់ខ្លួនក្នុងការចាប់យកឱកាសពាណិជ្ជកម្ម និងការវិនិយោគដែលកំពុងរីកចម្រើននៅទូទាំងតំបន់អាស៊ាន។

ការិយាល័យនេះ នឹងគ្រប់គ្រងចាត់ចែងគម្រោងថ្មីៗ នៅតំបន់អាស៊ាន ដែលមានតម្លៃជាង៨ពាន់លានដុល្លារ ហើយដើរតួនាទីជាស្ពានតភ្ជាប់រវាងអ្នកលក់ទំនិញ និងបច្ចេកវិទ្យារបស់អុីតាលី ទៅកាន់ក្រុមហ៊ុនក្នុងតំបន់ ដែលត្រូវការពួកគេ។

ការិយាល័យនេះ ក៏ផ្តល់ការធានារ៉ាប់រង និងដំណោះស្រាយហិរញ្ញវត្ថុផ្សេងទៀត ដល់ក្រុមហ៊ុននាំចេញរបស់អុីតាលី ដោយផ្តោតលើសហគ្រាសធុនតូច និងមធ្យម (SMEs)។ការិយាល័យនេះ ត្រូវបានគ្រប់គ្រងដោយក្រសួងសេដ្ឋកិច្ច និងហិរញ្ញវត្ថុរបស់ប្រទេសអុីតាលី។

លោកស្រី Michal Ron ប្រធានផ្នែកធុរកិច្ចអន្តរជាតិនៅទីភ្នាក់ងារឥណទាននាំចេញរបស់អុីតាលី(SACE) បានមានប្រសាសន៍ឱ្យដឹងថា “ សិង្ហបុរីក្លាយជាគោលដៅ ប្រកបដោយសក្តានុពលខ្ពស់សម្រាប់ក្រុមហ៊ុនអុីតាលី ដែលកំពុងស្វែងរកឱកាស នៅក្នុងប្រទេសឥណ្ឌូនេស៊ី ម៉ាឡេស៊ី វៀតណាម និងហ្វីលីពីន”។

លោកស្រីបានអះអាងថា គម្រោងតម្លៃ៨ពាន់លានដុល្លារ ដែលយើងបាននិងកំពុងពិចារណា នឹងផ្តោតលើ វិស័យផ្សេងៗជាច្រើន រួមទាំងបច្ចេកវិទ្យាបៃតង ហេដ្ឋារចនាសម្ព័ន្ធប្រកបដោយនិរន្តរភាព អាហារ និងភេសជ្ជៈ កសិពាណិជ្ជកម្ម និងសារធាតុគីមី។

លោកស្រីបញ្ជាក់បន្ថែមថា “យើងកំពុងសម្លឹងរកមើលឱកាស និងមានចំណាប់អារម្មណ៍យ៉ាងខ្លាំង ចំពោះការអភិវឌ្ឍន៍សេដ្ឋកិច្ច និងផែនការផ្លាស់ប្តូរ ប្រកបដោយនិរន្តរភាព នៅក្នុងប្រទេសសិង្ហបុរី និងតំបន់អាស៊ាន”។

ប្រទេសអ៊ីតាលី ដែលមានទំហំសេដ្ឋកិច្ច២ទ្រីលានដុល្លារអាមេរិក និងក្បាលម៉ាស៊ីនមួយនៃសហភាពអឺរ៉ុប ត្រូវបានគេស្គាល់យ៉ាងច្បាស់ ដោយប្រទេសនេះ មានអាហារឆ្ងាញ់ៗ ដូចជា ភីហ្សា និងប៉ាស្តា ព្រមទាំងម៉ាកយីហោម៉ូដល្បីៗដូចជា Gucci និង Prada រួមទាំងរថយន្តស្ព័រ Ferrari និងរថយន្តម៉ាក Lamborghini ។

ប៉ុន្តែ ប្រទេសអ៊ីតាលី ក៏ជាបណ្តុំរបស់ក្រុមហ៊ុនពហុជាតិសាសន៍ផងដែរ ដូចជា ក្រុមហ៊ុនថាមពលអគ្គិសនី Enel ក្រុមហ៊ុនប្រេង និងឧស្ម័នយក្ស ENI និងធនាគារ UniCredit ដែលសុទ្ធតែមានវត្តមាននៅក្នុងប្រទេសសិង្ហបុរី៕ប្រភព: The Strait Times៕

ប្រជាពលរដ្ឋខ្មែររហូតដល់១,៨លាននាក់បានខ្ចីឥណទានពីស្ថាប័នហិរញ្ញវត្ថុនានានៅកម្ពុជាក្នុងត្រីមាសទី១

ដោយៈ គង់ ម៉ាលីនណា

ភ្នំពេញៈ ប្រជាពលរដ្ឋខ្មែរសរុប១,៨លាននាក់ បានខ្ចីលុយធនាគារ និងមីក្រូហិរញ្ញវត្ថុសរុបជាទឹកប្រាក់ មានប្រមាណជាង១៥ពាន់លានដុល្លារអាមេរិក។

នេះបើផ្អែកតាមរបាយការណ៍ចេញផ្សាយ ដោយការិយាល័យឥណទានកម្ពុជា Credit Bureau Cambodia។

ក្នុងទំហំប្រាក់កម្ចីទាំងជាង១៥ពាន់លានដុល្លារ មាន៨ពាន់លានដុល្លារ ត្រូវបានពលរដ្ឋខ្ចីដើម្បីទិញលំនៅឋាន និងមានជាង៧ពាន់លានដុល្លារផ្សេងទៀត ត្រូវបានពលរដ្ឋខ្ចី ដើម្បីប្រើប្រាស់ជាលក្ខណៈបុគ្គល។

តាមរបាយការណ៍របស់CBCបានបង្ហាញថា កំណើននៃប្រាក់កម្ចីប្រើប្រាស់លក្ខណៈឯកជន ក្នុងត្រីមាសទី១ ឆ្នាំ២០២៤ បានកើន ១០% និងប្រាក់កម្ចីទិញផ្ទះបានកើន១៣% នៅទូទាំងប្រទេស។

ជាក់ស្តែង ប្រាក់កម្ចីទិញផ្ទះរបស់ពលរដ្ឋ រស់នៅក្នុងខេត្តសៀមរាប កំពង់ធំ បាត់ដំបង ពោធិ៍សាត់ កំពង់ឆ្នាំង បៃលិន បន្ទាយមានជ័យ និងឧត្តរមានជ័យ មានការកើនឡើងចំនួន១២% ។ ដោយឡែក កម្ចីរបស់ពលរដ្ឋរស់នៅក្នុងខេត្តកំពង់ចាម ត្បូងឃ្មុំ ព្រៃវែង ស្វាយរៀង កំពង់ស្ពឺ និងកណ្តាលវិញ បានកើនរហូតដល់១៥%។ ក៏ប៉ុន្តែសម្រាប់ពលរដ្ឋនៅក្នុងខេត្តកំពត កែប ព្រះសីហនុ និងកោះកុង ការខ្ចីលុយធនាគារ ដើម្បីទិញផ្ទះបានធ្លាក់ចុះចំនួន២% និងធ្លាក់ចុះ៣%ចំពោះអ្នកខេត្តក្រចេះ ស្ទឹងត្រែង មណ្ឌលគិរី រតនគិរី និងព្រះវិហារ។

ទាក់ទងនឹងកម្ចីប្រើប្រាស់ជាលក្ខណៈឯកជនវិញ មានការកើនឡើងនៅគ្រប់ខេត្តទាំងអស់ ក្នុងនោះខេត្តចំនួន៥ជាប់បឹងទន្លេសាបមានកំណើន១២,៤% ខេត្តស្ថិតក្នុងតំបន់កសិកម្មរួមមាន ខេត្តកំពង់ចាម ត្បូងឃ្មុំ ព្រៃវែង និងស្វាយរៀងកើន៩% ខណៈខេត្ត៤ ដែលជាប់មាត់សមុទ្របានកើនចំនួន១០% និងខេត្តចំនួន៥ស្ថិតក្នុងតំបន់ខ្ពង់រាបមានកំណើនចំនួន៧%៕

ក្រសួងបានចុះបញ្ជីររោងចក្រថ្មីចំនួន៧៥ក្នុងរយៈពេល៤ខែ ដើមឆ្នាំនេះ

ដោយៈ គង់ សូរិយា

ភ្នំពេញៈ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចុះបញ្ជីរោងចក្រថ្មីចំនួន ៧៥ ក្នុងអំឡុងខែមករា ដល់ខែមេសា ឆ្នាំនេះ ដែលនាំឱ្យចំនួនរោងចក្រ ដែលបានចុះបញ្ជីសរុបនៅក្នុងប្រទេសកើនដល់
២.១៩៥រោងចក្រ។

របាយការណ៍បានបង្ហាញថា រោងចក្រថ្មីស្ទើរតែទាំងអស់គឺជារោងចក្រកាត់ដេរសំលៀកបំពាក់ ដោយលើកឡើងថា ការវិនិយោគភាគច្រើនមកពីប្រទេសចិន បន្ទាប់មកគឺកូរ៉េខាងត្បូង ជប៉ុន និងថៃ។រដ្ឋលេខាធិការ និងជាអ្នកនាំពាក្យរបស់ក្រសួង លោកហេង សុខគង់ បានបញ្ជាក់ថា គិតត្រឹមក្នុងខែមេសា ក្រសួងបានចុះបញ្ជីរោងចក្រថ្មីចំនួន២០ ហើយរោងចក្រចំនួន១៩ បានដំណើរការឡើងវិញជាមួយនឹងការវិនិយោគសរុបចំនួន២៨៤លានដុល្លារ។លោកបានបន្តថា “ទំហំវិនិយោគ ទ្រព្យសកម្មថេររបស់រោងចក្រ បានកើន ដល់ចំនួន១៩ពាន់លានដុល្លារ គិតត្រឹមខែមេសាឆ្នាំនេះ កើនឡើង១៤ភាគរយ ធៀបនឹងរយៈពេលដូចគ្នាក្នុងឆ្នាំ ២០២៣”។រោងចក្រដែលបានចុះបញ្ជីទាំងអស់ បានបង្កើតការងារចំនួនដល់ប្រជាពលរដ្ឋខ្មែរ១,៥៨លានកន្លែង។

លោកវង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានមានប្រសាសន៍ថា លំហូរវិនិយោគផ្ទាល់ពីបរទេស(FDI)នៅឆ្នាំនេះ ភាគច្រើនចូលទៅក្នុងគម្រោងផលិតកម្ម មិនដូចសម័យមុនកូវីដ-១៩ ដែលការវិនិយោគភាគច្រើនស្ថិតនៅក្នុងវិស័យហិរញ្ញវត្ថុ និងអចលនទ្រព្យ។លោកបានថ្លែងក្នុងពិព័រណ៍ពាណិជ្ជកម្មអន្តរជាតិកម្ពុជា ឆ្នាំ ២០២៤ ក្នុងរាជធានីភ្នំពេញ កាលពីថ្ងៃអាទិត្យថា “នេះគឺជាលទ្ធផលនៃគំនិតផ្តួចផ្តើមជំរុញសេដ្ឋកិច្ចថ្មីរបស់កម្ពុជា ដែលនឹងមានភាពធន់ជាងក្នុងរយៈពេលយូរ ដោយសារការវិនិយោគភាគច្រើន គឺនៅក្នុងសកម្មភាពផលិតកម្ម ដូចជា ការផលិតគ្រឿងអេឡិចត្រូនិក ការបង្កើតមជ្ឈមណ្ឌលទិន្នន័យ និងការដំឡើងយានយន្ត ដែលឆ្លុះបញ្ចាំងពីការរៀបចំរចនាសម្ព័ន្ធសេដ្ឋកិច្ចរបស់កម្ពុជាឡើងវិញ៕

ក្រសួងកំពុងពិចារណារៀបចំកិច្ចព្រមព្រៀងរវាងរដ្ឋាភិបាលនិងវិស័យឯកជន ដើម្បីបញ្ចប់ការសាងសង់កំពង់ផែខេត្តកំពត

ដោយៈ គង់ សូរិយា

ភ្នំពេញៈ ក្រសួងសាធារណការ និងដឹកជញ្ជូន កំពុងពិចារណាលើកិច្ចព្រមព្រៀងភាពជាដៃគូរដ្ឋាភិបាល និងវិស័យឯកជន (PPP) ជាមួយក្រុមហ៊ុនអភិវឌ្ឍន៍ក្នុងស្រុក AZ Builder ដើម្បីបញ្ចប់កំពង់ផែទេសចរណ៍អន្តរជាតិកំពត។

យោងតាមរបាយការណ៍បឋមបានឱ្យដឹងថា ក្រុមហ៊ុន AZ Builder ដែលជាក្រុមហ៊ុនបុត្រសម្ព័ន្ធ នៃក្រុមហ៊ុនអាជីវកម្មដ៏លេចធ្លោរបស់កម្ពុជា AZ Group បានផ្តល់ការវិនិយោគពី៥ ទៅ១០លានដុល្លារ ដើម្បីបើកដំណើរការកំពង់ផែនេះ។

ទោះបីជាការសាងសង់កំពង់ផែនេះ ត្រូវបានបញ្ចប់នៅឆ្នាំ២០២២ ប៉ុន្តែវាមិនទាន់ដំណើរការនៅឡើយទេ ដោយសារបញ្ហាបច្ចេកទេសមួយចំនួន។

វិនិយោគិនដ៏មានសក្តានុពលAZ Builder ស្វែងរកការបញ្ចប់ហេដ្ឋារចនាសម្ព័ន្ធកំពង់ផែ ហើយសំខាន់គឺបូមដីតំបន់ជុំវិញ ដើម្បីសម្រួលផ្លូវទឹក សម្រាប់កប៉ាល់ដែលចូលកំពង់ផែ ដោយបង្កើនជម្រៅផ្លូវទឹក។

លោកប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ថ្លែងកាលពីដើមខែនេះថា រដ្ឋាភិបាលប្តេជ្ញាធានាឱ្យកំពង់ផែនេះ មានសុវត្ថិភាព សម្រាប់ការប្រើប្រាស់ ហើយថាកំពុងផែនេះ អាចផ្ទុកនាវាបានច្រើនប្រភេទ។

លោកបញ្ជាក់ថា “រាជរដ្ឋាភិបាលនឹងជ្រើសរើស ប្រតិបត្តិករកំពង់ផែ ដើម្បីចុះកិច្ចព្រមព្រៀង PPP ដោយតម្រូវឱ្យប្រតិបត្តិករកំពង់ផែបំពេញកាតព្វកិច្ចមួយចំនួន ដូចជា ការជីក បូមទឹក និងស្តារផ្លូវទឹកឡើងវិញ” ដោយលោកបានលើកឡើងថា សំខាន់កំពង់ផែថ្មីត្រូវមានគុណភាពស្តង់ដារអន្តរជាតិ ដើម្បីទាក់ទាញភ្ញៀវទេសចរអន្តរជាតិ”។

លោក ប៉េង ពោធិ៍នា បានពន្យល់ថា ដៃគូដែលត្រូវបានជ្រើសរើសសម្រាប់គម្រោងនេះ ក៏ត្រូវតែប្តេជ្ញាចិត្តក្នុងការសិក្សាលម្អិតអំពីបច្ចេកទេសរុករក ការដំឡើងឧបករណ៍ជំនួយសម្រាប់នាវាចរណ៍ រួមជាមួយនឹងការវិនិយោគយ៉ាងច្រើន នៅក្នុងហេដ្ឋារចនាសម្ព័ន្ធសន្តិសុខរបស់កំពង់ផែ។

កំពង់ផែនេះនឹងដើរតួជាច្រកចេញ ចូលសម្រាប់ភ្ញៀវទេសចរតាមសមុទ្រចូលទៅកាន់ខេត្តកំពត រួមទាំងគោលដៅសំខាន់ៗដូចជាភ្នំបូកគោ និងកោះនៅជិតឆ្នេរសមុទ្រដូចជាកោះទន្សាយ ជាដើម។

កំពង់ផែនេះនឹងត្រូវតភ្ជាប់ ទៅនឹងបណ្តាញឆ្នេរនៃគោលដៅសក្តានុពលនៅទូទាំងប្រទេសកម្ពុជា រួមមាន កំពង់ផែនៅខេត្តព្រះសីហនុ កោះកុង កោះរ៉ុង និងកោះត្រល់។ សំខាន់បំផុត កំពង់ផែសមុទ្រក៏នឹងអនុញ្ញាត ឱ្យមានការជំរុញការតភ្ជាប់ ជាមួយអ្នកធ្វើដំណើរក្នុងតំបន់ពីកំពង់ផែនានាក្នុងដីគោក និងកោះនៃប្រទេសវៀតណាម ប្រទេសថៃ និងគោលដៅផ្សេងៗទៀត៕

ការរីកចម្រើនទំនាក់ទំនងកម្ពុជា ចិនជាកត្តាលីករជម្រុញ លំហូរវិនិយោគចិន

ដោយៈ គង់ សូរិយា

ភ្នំពេញៈ មន្រ្តីជាន់ខ្ពស់នៃក្រុមប្រឹក្សាអភិវឌ្ឍន៍កម្ពុជាបានថ្លែងថា

ភាពរីកលូតលាស់ នៃទំនាក់ទំនងសេដ្ឋកិច្ចរវាងចិន និងកម្ពុជាគឺជាកាតាលីករដែលជំរុញរំហូរវិនិយោគិនចិន ឱ្យមកប្រកបធុរកិច្ចនៅកម្ពុជាឱ្យកាន់តែមានកំណើន ឆ្ពោះទៅរកវិបុលភាពនៃសហគមន៍ វាសនារួមកម្ពុជា-ចិន។

លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា កាលពីថ្ងៃទី១៥ ឧសភា បានដឹកនាំសហការី ទទួលជួបពិភាក្សាការងារជាមួយគណៈប្រតិភូ Zhejiang Construction Investment Group Co.,Ltd តំណាងដោយ លោក Tao Guanfeng ប្រធានក្រុមប្រឹក្សាភិបាល ក្នុងគោលបំណងបញ្ជ្រាបការឈ្វេងយល់ អំពីសក្តានុពល និងកាលានុវត្តភាពវិនិយោគនៅកម្ពុជា។

មានមតិក្នុងជំនួបខាងលើ លោកអគ្គលេខាធិការបានសម្តែងនូវការស្វាគមន៍យ៉ាងកក់ក្តៅ ជូនចំពោះគណៈប្រតិភូ ដែលបានចំណាយពេលវេលាដ៏មានតម្លៃ មកធ្វើទស្សនកិច្ចសិក្សាដោយផ្ទាល់ នៅកម្ពុជាដើម្បីស្វែងយល់ឱ្យកាន់តែច្បាស់ អំពីឱកាសវិនិយោគលើវិស័យដែលមានភាពលេចធ្លោនៅកម្ពុជា បន្ថែមពីលើគម្រោងអភិវឌ្ឍន៍ហេដ្ឋារចនាសម្ព័ន្ធរូបវ័ន្ត ដែលក្រុមហ៊ុនបានបណ្តាក់ទុនវិនិយោគនៅកម្ពុជាអស់រយៈពេល១៥ឆ្នាំរួចមកហើយ។

ជាមួយគ្នានេះ លោកជា វុទ្ឋី បានថ្លែងនូវការកត់សម្គាល់អំពីភាពរីកលូតលាស់ នៃទំនាក់ទំនងសេដ្ឋកិច្ច រវាងសាធារណរដ្ឋប្រជាមានិតចិន និងព្រះរាជាណាចក្រកម្ពុជានិយាយជារួម និងនិយាយដោយឡែករវាងខេត្ត Zhejiang និងកម្ពុជា ដែលការណ៍នេះជាសក្ខីភាពឆ្លុះបញ្ចាំងអំពីការយល់ចិត្តគ្នាទៅវិញ ទៅមករវាងវិស័យឯកជនចិន និងរាជរដ្ឋាភិបាលកម្ពុជា ព្រមទាំងជាកាតាលីករដែលជំរុញរំហូរវិនិយោគិនចិន ឱ្យមកប្រកបធុរកិច្ចនៅកម្ពុជា ឱ្យកាន់តែមានកំណើនឆ្ពោះទៅរកវិបុលភាព នៃសហគមន៍វាសនារួមកម្ពុជា-ចិន។

ឆ្លៀតឱកាសនៃជំនួបខាងលើ លោកក៏បានលើកទឹកចិត្តឱ្យក្រុមហ៊ុនមេត្តាពិនិត្យ លទ្ធភាពបណ្តាក់ទុនវិនិយោគ លើគម្រោងផលិតវត្ថុធាតុដើម និងផលិតផលពាក់កណ្តាលសម្រេច សម្រាប់ផ្គត់ផ្គង់ទីផ្សារក្នុងស្រុកជំនួសឱ្យការនាំចូលពីបរទេស ក៏ដូចជាសម្លឹងមើលកាលានុវត្តភាពក្នុងការចាប់ដៃគូ ជាមួយក្រុមហ៊ុនមកពីខេត្ត Zhejiang ដើម្បីឆក់ឱកាសបំពេញតម្រូវការទីផ្សារក្នុងតំបន់ និងសកលលោក។

ជាការឆ្លើយតប លោកប្រធានក្រុមប្រឹក្សាភិបាលក៏បានបង្ហាញនូវការកត់សម្គាល់ អំពីភាពរីកចម្រើនឥតឈប់ឈរ របស់កម្ពុជា ហើយវឌ្ឍនភាពនេះហើយ គឺជាកម្លាំងចលករជំរុញក្រុមហ៊ុនក្នុងការបុកគ្រឹះ នៃមុខសញ្ញាវិនិយោគរបស់ខ្លួន ឱ្យកាន់តែមានពិពិធភាព និងចីរភាពនៅកម្ពុជា៕

Japan to provide 140 billion yen loan to Jakarta for rapid train project

The Japanese government said Monday it will provide a loan of up to about 140.7 billion yen ($900 million) for the construction of the second train line in Jakarta under Indonesia’s mass rapid transit system project.

The construction of the 84.1-kilometer East-West Line project consists of two phases, with the work for the 24.5-km first stage set to begin by 2026 and be completed in 2031, according to the Japanese Embassy in Jakarta.

The new train line will be built with Japanese technology for the vehicle and signaling systems.

Jakarta faces serious traffic congestion and air pollution with its rapid economic growth and population increase.

Under the MRT project, the first phase of a 15.7-km stretch of the North-South Line opened in 2019 with the help of a loan from Japan. Source: kyodo news

មន្រ្តីជាន់ខ្ពស់ៈ កម្ពុជាទទួលបានទុនវិនិយោគជាង២៥០០លានដុល្លារកើនឡើងជាង៣០០ភាគរយ

ដោយៈ គង់ សូរិយា

ភ្នំពេញៈ ឧបនាយករដ្ឋមន្ត្រី និងជារដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី លោកវង្សី វិស្សុត បានមានប្រសាសន៍ថា កម្ពុជាទទួលបានគម្រោងវិនិយោគចំនួន១២៨ មានទំហំទឹកប្រាក់២,៥១ពាន់លានដុល្លារ ក្នុងរយៈពេល៤ខែដំបូង កើនឡើង៣២៧ភាគរយ បើធៀបនឹងរយៈពេលដូចគ្នាក្នុងឆ្នាំ២០២៣។

លោកឧបនាយករដ្ឋមន្ត្រីបានថ្លែងបែបនេះ ក្នុងឱកាសអញ្ជើញជាអធិបតីក្នុងពិធីសម្ពោធ ពិព័រណ៍ពាណិជ្ជកម្មអន្តរជាតិកម្ពុជាឆ្នាំ២០២៤ (CITF 2024) ដោយមានព្រះវត្តមានរបស់ព្រះនាង នរោត្តម ជេនណា និងលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម រួមជាមួយនឹងពាណិជ្ជករ និងអ្នកវិនិយោគអន្តរជាតិចំនួន២.៥០០នាក់ ដែលតំណាងឱ្យ ប្រទេសចំនួន១៦ នៅរាជធានីភ្នំពេញ ដែលបានចាប់ពីថ្ងៃទី ១០ ដល់ ១២ ឧសភាកន្លងមកនេះ។

ថ្លែងក្នុងពិធីនេះ លោក វង្សី វិស្សុត បានលើកឡើងជាសង្ខេបអំពីសារៈសំខាន់នៃការតាំងពិព័រណ៍នេះ ដែលបើកផ្លូវសម្រាប់ពាណិជ្ជករក្នុងស្រុក និងបរទេសក្នុងការបង្ហាញ ផលិតផលរបស់ពួកគេ ក៏ដូចជាប្រើប្រាស់ឱកាស ក្នុងការភ្ជាប់ទំនាក់ទំនង និងពង្រឹងភាពជាដៃគូពាណិជ្ជកម្ម។

លោកមានសុទិដ្ឋិនិយមថា CITF 2024 នឹងទាក់ទាញការវិនិយោគកាន់តែច្រើន ចូលមកក្នុងព្រះរាជាណាចក្រកម្ពុជា រួមទាំងបច្ចេកវិទ្យាថ្មីៗ និងចំណេះដឹងផ្នែកធុរកិច្ច ទន្ទឹមនឹងនោះក៏បង្កើតការងារបន្ថែមទៀតដល់ប្រជាពលរដ្ឋខ្មែរផងដែរ។

លោកឧបនាយករដ្ឋមន្ត្រី ក៏បានលើកទឹកចិត្តឲ្យមានការដាក់តាំងបង្ហាញផលិតផលខ្មែរ ក្នុងព្រឹត្តិការណ៍ពិព័រណ៍បែបនេះ ក្នុងគោលបំណង ពង្រីកសក្តានុពលនាំចេញទៅកាន់តំបន់ និងពិភពលោក ស្របតាមពាក្យស្លោក“ នាំកម្ពុជាទៅកាន់ពិភពលោក” ដោយលោកបានសង្កត់ធ្ងន់ថា ពាណិជ្ជកម្ម និងការវិនិយោគត្រូវតែផ្សារភ្ជាប់គ្នា។លោកបានបញ្ជាក់ថា “សេដ្ឋកិច្ចរបស់កម្ពុជាត្រូវបានគេរំពឹងថានឹងកើនឡើងប្រហែល៦ភាគរយ ក្នុងឆ្នាំនេះ និងឆ្នាំ ២០២៥”។

ក្នុងរយៈពេល៤ខែដំបូង នៃឆ្នាំ២០២៤ ទំហំពាណិជ្ជកម្មបានកើនឡើង១១,៩ ភាគរយ បើធៀបនឹងរយៈពេលដូចគ្នា ក្នុងឆ្នាំ២០២៣។លោកបន្តថា ក្រៅពីការផលិតសម្លៀកបំពាក់ គម្រោងវិនិយោគភាគច្រើន គឺជារោងចក្រផលិតគ្រឿងអេឡិចត្រូនិក ការបង្កើតមជ្ឈមណ្ឌលទិន្នន័យ និងរោងចក្រដំឡើងរថយន្ត។

ជាមួយគ្នានេះ លោកស្រី ចម និម្មល បានមានប្រសាសន៍ថា ទំហំពាណិជ្ជកម្មរបស់កម្ពុជា បានឈានដល់ទំហំទឹកប្រាក់ជាង១៦ ពាន់លានដុល្លារ ដែលក្នុងនោះការនាំចេញឈានដល់៨ពាន់លានដុល្លារ កើនឡើងប្រហែល១២ភាគរយ ដែលបញ្ជាក់ពីសក្ដានុពលពាណិជ្ជកម្ម ដែលកំពុងរីកចម្រើនរបស់ប្រទេស និងដើរតួនាទីយ៉ាងសំខាន់ក្នុងសកម្មភាពសេដ្ឋកិច្ចជាតិ។

លោកស្រីបានវាយតម្លៃខ្ពស់ ចំពោះកិច្ចខិតខំប្រឹងប្រែងដ៏ធំធេង ក្នុងការកៀងគរពាណិជ្ជករ និងអ្នកវិនិយោគរាប់ពាន់នាក់នៅទូទាំងពិភពលោកឱ្យចូលរួមក្នុង CITF 2024 ក៏ដូចជាការស្វែងរកសក្តានុពលវិនិយោគបន្ថែមទៀត នៅក្នុងប្រទេសកម្ពុជាផងដែរ។

លោកស្រី ចម និម្មល បានបន្ថែមថា “ក្រសួងពាណិជ្ជកម្ម ប្តេជ្ញាបង្កើននូវការអភិវឌ្ឍន៍វេទិកាពាណិជ្ជកម្ម ដោយបង្វែរបញ្ហាប្រឈមទៅជាឱកាស តាមរយៈកំណែទម្រង់ស៊ីជម្រៅលើគ្រប់វិស័យ រួមមាន ការកាត់បន្ថយថ្លៃដើម ការពង្រឹងការប្រកួតប្រជែង នៃផលិតផលនាំចេញទៅកាន់ទីផ្សារអន្តរជាតិ និងបង្កើតបរិយាកាសអំណោយផលសម្រាប់អាជីវកម្ម និងការវិនិយោគ”។

លោក វង្សី វិស្សុត បានបន្តទៀតថា “ទោះបីជាពិភពលោកកំពុងប្រឈមមុខ នឹងភាពមិនច្បាស់លាស់ជាច្រើន ទាក់ទងនឹងទិដ្ឋភាពនយោបាយ សេដ្ឋកិច្ច ហិរញ្ញវត្ថុ និងសង្គម ដោយសារការផ្លាស់ប្តូរភូមិសាស្ត្រនយោបាយ ការបែកបាក់នៃសេដ្ឋកិច្ច និងពាណិជ្ជកម្មពិភពលោកក៏ដោយ ក៏រាជរដ្ឋាភិបាលកម្ពុជា ជឿជាក់ និងប្រកាន់ខ្ជាប់នូវ គោលនយោបាយពហុភាគីនិយម និងការបើកទូលាយក្នុងការជំរុញពាណិជ្ជកម្ម និងការវិនិយោគ”។

លោកបានលើកទឹកចិត្តពាណិជ្ជករក្នុងស្រុក និងបរទេសឱ្យពង្រីកគម្រោងវិនិយោគ ខណៈដែលរាជរដ្ឋាភិបាលបានដាក់ចេញនូវវិធានការ និងបទប្បញ្ញត្តិវិនិយោគថ្មីៗ ហើយតែងតែខិតខំការពារ និងរក្សាស្ថិរភាពម៉ាក្រូសេដ្ឋកិច្ច។

លោកឧបនាយករដ្ឋមន្ត្រី បានលើកឡើងបន្ថែមអំពីវិធានការសំខាន់ៗដែលត្រូវបានដាក់ចេញ ដោយលោកនាយករដ្ឋមន្ត្រី ហ៊ុន ម៉ាណែត ក្នុងវេទិការាជរដ្ឋាភិបាល -វិស័យឯកជនលើកទី១៩ (19th G-PSF) ដើម្បីដោះស្រាយបញ្ហាប្រឈម និងកង្វល់របស់វិស័យឯកជន ដែលបង្ហាញថា កម្ពុជាត្រៀមខ្លួនរួចជាស្រេចក្នុងការស្វាគមន៍ ការវិនិយោគគ្រប់ប្រភេទនៅទូទាំងពិភពលោក៕

ជប៉ុនគ្រោងផ្តល់ប្រាក់កម្ចី៩០០លានដុល្លារដល់គម្រោងសាងសង់ខ្សែរថភ្លើងនៅក្នុងប្រទេសឥណ្ឌូនេស៊ី

ដោយ: គង់ លាងហួរ

តូក្យូ: រដ្ឋាភិបាលជប៉ុនបានប្រកាសថា ខ្លួននឹងផ្តល់ប្រាក់កម្ចីប្រមាណ៩០០លានដុល្លារ សម្រាប់ការសាងសង់ខ្សែរថភ្លើងទី២ នៅក្នុងទីក្រុងហ្សាកាតា ដែលស្ថិតក្រោមគម្រោងប្រព័ន្ធដឹកជញ្ជូនរហ័ស(MRT)របស់ប្រទេសឥណ្ឌូនេស៊ី។

គម្រោងសាងសង់ខ្សែរថភ្លើង តភ្ជាប់ពីភាគខាងកើត ទៅកាន់ភាគខាងលិចទីក្រុងហ្សាការតា ដែលមានប្រវែង៨៤,១គីឡូម៉ែត្រ ត្រូវបានចែកចេញទៅជា២ដំណាក់កាល។ កំណាត់ផ្លូវនៅដំណាក់កាលទី១ មានប្រវែង២៤,៥គីឡូម៉ែត្រ គ្រោងនឹងចាប់ផ្តើមបើកការដ្ឋានសាងសង់នៅឆ្នាំ២០២៦ និងបញ្ចប់នៅឆ្នាំ២០៣១។ នេះបើយោងតាមការឱ្យដឹងពីស្ថានទូតជប៉ុន ប្រចាំនៅទីក្រុងហ្សាការតា។

ខ្សែរថភ្លើងថ្មីនេះ នឹងត្រូវបានសាងសង់ឡើង ដោយប្រើប្រាស់បច្ចេកវិទ្យារបស់ប្រទេសជប៉ុន ដូចជារថភ្លើង និងប្រព័ន្ធផ្តល់សញ្ញា។នេះបើយោងតាមការចុះផ្សាយ ទីភ្នាក់ងារសារពត៌មានជប៉ុន KYODO NEWS។

ការសាងសង់ខ្សែរថភ្លើង មានសារៈសំខាន់ណាស់ ខណៈនាពេលបច្ចុប្បន្ន ទីក្រុងហ្សាកាតាកំពុងប្រឈមមុខ នឹងការកកស្ទះចរាចរណ៍ធ្ងន់ធ្ងរ និងការបំពុលបរិយាកាស ស្របពេលសេដ្ឋកិច្ច និងចំនួនប្រជាជនឥណ្ឌូនេស៊ី កើនឡើងយ៉ាងឆាប់រហ័ស។

ក្រោមគម្រោងប្រព័ន្ធដឹកជញ្ជូនរហ័ស(MRT) របស់ប្រទេសឥណ្ឌូនេស៊ីដំណាក់កាលទី១ នៃខ្សែរថភ្លើងតភ្ជាប់ពីភាគខាងជើងទៅកាន់ភាគខាងត្បូង នៃទីក្រុងហ្សាការតា ដែលមានប្រវែង១៥,៧គីឡូម៉ែត្រ បានបើកដាក់ឱ្យដំណើរការនៅឆ្នាំ២០១៩ ដោយមានជំនួយពីប្រាក់កម្ចីពីប្រទេសជប៉ុន។

លើសពីនេះ នាពេលបច្ចុប្បន្ន ឥណ្ឌូនេស៊ី គឺជាប្រទេសទី១ដំបូងគេ នៅក្នុងតំបន់អាស៊ាន ដែលមានរថភ្លើងល្បឿនលឿនរត់បានចម្ងាយ៣៥០គីឡូម៉ែត្រក្នុងមួយម៉ោង តភ្ជាប់ពីរដ្ឋធានីហ្សាការតាទៅកាន់ទីក្រុងបាងដុង។

ការសាងសង់ខ្សែរថភ្លើងហ្សាការតា-បានដុង បានចំណាយទុនវិនិយោគអស់៥២លានដុល្លារ ក្នុង១គីឡូម៉ែត្រ ដែលថ្លៃជាងការសាងសង់ផ្លូវដែកល្បឿនលឿន ក្នុងប្រទេសចិនទៅទៀត ដែលមានតម្លៃចន្លោះពី១៧ ទៅ៣០លានដុល្លារប៉ុណ្ណោះក្នុង១គីឡូម៉ែត្រ៕ ប្រភព: Kyodo News៕

Minister of Information Supports Cambodian Economic Media Entrepreneurs Association

By Kong Sorya
Phnom Penh: The Minister of Information, HE. Neth Pheaktra, expressed his support and appreciation for the establishment of the Cambodian Economic Media Association (CEMEA).
The Minister has allowing the leaders of the Cambodian Economic Media Entrepreneurs Association to pay a courtesy call and make recommendations on May 15.Z

President of the Cambodian Economic Media Entrepreneurs Association, Mr. Yin Leang Kong, informed the Minister that the association was established about two months after receiving permission from the Ministry of Interior, but the association has been actively working on the dissemination of national and international economic information in three languages: including Khmer, English and Chinese.

Mr Leang Kong said the association was established to support the government’s policy on the economy, so that the association can disseminate national and international economic information in depth to the national and international community, especially CEMEA wants to contribute to the training of human resources in information analysis as well.
In response, Information Minister Neth Pheaktra praised the association, by saying it was a good idea to focus on economic news rather than the dramatic news.

The Minister recommended that the association’s leaders consider writing economic news which directly linked to people’s daily lives. For example, the market price of fish, pork, the price of the dollar with the riel, the price of gold and so on.
“Some journalists have the misconception that it is a good thing that writing a news interview with a deputy prime minister is a good thing,” he said.

Minister said nowadays , there are about 1,000 online newspapers in Cambodia, about 10 million Tik Tok users, and 13 million Facebook users, so the focus on information must be fast, high quality and reliable for the public,” he said.
At the same time, Mr. Neth Pheaktra also highly support for the Cambodia Economic Media Entrepreneurs Association to organize training course in profession of economic journalists. Reporting by CEMEA.