ដោយៈ គង់ សូរិយា

        ភ្នំពេញៈ ក្រុមបេសកកម្មអង្គភាពស្រាវជ្រាវម៉ាក្រូ សេដ្ឋកិច្ចអាស៊ាន+៣ (AMRO) ដឹកនាំដោយ លោកបណ្ឌិត Hoe Ee Khor ប្រធានសេដ្ឋវិទូ បានបង្ហាញសុទិដ្ឋិនិយមពីការងើបឡើង នៃសេដ្ឋកិច្ចកម្ពុជាឆ្នាំនេះ និងឆ្នាំ២០២៥ខាងមុខ។

ព័ត៌មាននេះត្រូវបានលើកបង្ហាញ ក្នុងពេលលោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអនុញ្ញាតឱ្យក្រុមបេសកកម្មអង្គភាពស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) ដឹកនាំដោយ លោកបណ្ឌិត Hoe Ee Khor ប្រធានសេដ្ឋវិទូ ចូលជួបសម្តែងការគួរសម និងរាយការណ៍ជូនអំពីលទ្ធផលនៃការវាយតម្លៃបឋម លើស្ថានភាពសេដ្ឋកិច្ចកម្ពុជាកាលពីដើមសប្តាហ៍នេះ។

ក្រុមបេសកកម្មនៅតែបន្តមានសុទិដ្ឋិនិយម ចំពោះការងើបឡើងនៃសេដ្ឋកិច្ចកម្ពុជា ដោយបានព្យាករថា កំណើននៅឆ្នាំ២០២៤ នឹងមានកម្រិតខ្ពស់ជាងឆ្នាំ២០២៣ ហើយបន្តងើបឡើងខ្ពស់មួយកម្រិតទៀតក្នុងឆ្នាំ២០២៥ ខាងមុខ។

អតិផរណារំពឹងបន្តមានកម្រិតទាបត្រឹម២,៥% នៅឆ្នាំ២០២៤ និង២០២៥។ ទោះយ៉ាងណា សេដ្ឋកិច្ចកម្ពុជាក៏អាចប្រឈមនឹងហានិភ័យមួយចំនួន ដូចជា ហានិភ័យនៃការថមថយនៃតម្រូវការខាងក្រៅ ប្រសិនបើសេដ្ឋកិច្ចនៃប្រទេសជាដៃគូ ពាណិជ្ជកម្មមានកំណើនទាបជាងការរំពឹងទុក ការបែងចែកភូមិសាស្រ្តសេដ្ឋកិច្ច និងការប្រែប្រួលអាកាសធាតុ ជាដើម។

លោកជំទាវទេសាភិបាល បានថ្លែងអំណរគុណដល់ក្រុមបេសក​កម្មដែលតែងតែជួយតាមដាន និងវាយតម្លៃស្ថានភាពសេដ្ឋកិច្ចកម្ពុជាជាប់ជាប្រចាំ។លោកជំទាវ ទេសាភិបាល រង់ចាំស្វាគមន៍របាយការណ៍លម្អិតរបស់ក្រុមបេសកកម្ម និងអនុសាសន៍គោលនយោបាយ ដែលនឹងក្លាយជាធាតុចូលដ៏សំខាន់ សម្រាប់ការរៀបចំគោលនយោបាយម៉ាក្រូសេដ្ឋកិច្ចកម្ពុជា៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃ នៅល្ងាចថ្ងៃពុធនេះ ខណៈអ្នកវិនិយោគកំពុងរង់ចាំអ៊ុតមើលទិន្នន័យអតិផរណារបស់សហរដ្ឋអាមេរិក ដែលជាសូចនាករដ៏សំខាន់អាចចង្អុលបង្ហាញពីគោលនយោបាយរបស់ធនាគារFed។

តម្លៃមាស Spot Gold បានងើបឡើង០,៦៥%ដល់២៣៧៣,៣២ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,១៣ភាគរយដល់២.៣៦៣ដុល្លារ ក្នុងមួយអោន គិតត្រឹមម៉ោង៥:០០នាទីល្ងាច។

គិតត្រឹមពេលបិទការជួញដូរកាលពីថ្ងៃអង្គារម្សិលមិញនេះ តម្លៃមាស Spot Gold បានងើបឡើងដល់២៣៥៧,៩៧ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើងដល់២៣៥៩,៩ដុល្លារ ក្នុងមួយអោន៕

ដោយ: គង់ លាងហួរ

អន្តរជាតិ: ការវិនិយោគអចលនទ្រព្យ នៅតំបន់អាស៊ីប៉ាស៊ីហ្វិក ត្រូវបានគេរំពឹងថា នឹងបន្តធ្លាក់ចុះ មុនពេលស្ទុះងើបឡើងវិញ នៅចុងឆ្នាំនេះ ឬដើមឆ្នាំ២០២៥ខាងមុខ ដោយសារការពន្យារពេលនៃការកាត់បន្ថយអត្រាការប្រាក់របស់សហរដ្ឋអាមេរិក។

យោងតាមការស្ទង់មតិរបស់ក្រុមហ៊ុន ប្រឹក្សាអចលនទ្រព្យ CBRE ដែលចេញផ្សាយកាលពីពេលថ្មីៗនេះបានបង្ហាញថា ការវិនិ យោគ នៅក្នុងតំបន់អាស៊ីប៉ាស៊ីហ្វិក បានធ្លាក់ចុះក្នុងអត្រាប្រចាំឆ្នាំ១៤ភាគរយ ដល់ទំហំទឹកប្រាក់២៤ពាន់លានដុល្លារ កាលពីត្រីមាសទី១ ខណៈកម្រិតអត្រាការប្រាក់ដ៏ខ្ពស់ បានធ្វើឱ្យតម្លៃអចលនទ្រព្យពាណិជ្ជកម្មកើនឡើង។

វិនិយោគិនភាគច្រើននៅក្នុងតំបន់ ជាពិសេសមូលនិធិអចលនទ្រព្យ ក្រុមហ៊ុនអចលនទ្រព្យ និងធនាគារ បានសម្រុកលក់ចេញអចលនទ្រព្យរបស់ពួកគេ ជាជាងការទិញអចលនទ្រព្យទុក។ ការស្ទង់មតិនេះ បានធ្វើឡើងទៅលើអ្នកវិនិយោគ ចំនួន១៣៦នាក់នៅក្នុងតំបន់ចាប់ពីថ្ងៃទី១ ដល់ថ្ងៃទី១៧ ខែមេសា។

ការវិនិយោគអចលនទ្រព្យ នៅក្នុងប្រទេសជប៉ុន ឥណ្ឌា និងសិង្ហបុរីនៅតែមានភាពរឹងមាំ ខណៈទីផ្សារក្នុងប្រទេសផ្សេងទៀត នឹងស្ទុះងើបឡើងវិញនៅចុងឆ្នាំនេះ ឬដើមឆ្នាំក្រោយ។ ជាក់ស្តែងការស្ទុះងើបឡើងវិញត្រូវបានគេរំពឹងថា នឹងចាប់ផ្តើមចេញពីប្រទេសកូរ៉េខាងត្បូង និងតំបន់ប៉ាស៊ីហ្វិក បន្ទាប់មកគឺប្រទេសចិន។

លោក Henry Chin ប្រធានផ្នែកស្រាវជ្រាវរបស់ក្រុមហ៊ុន CBRE នៅតំបន់អាស៊ីប៉ាស៊ីហ្វិក បានលើកឡើកថា “អត្រាការប្រាក់ក្នុងតំបន់បានហក់ឡើង ដល់កំពូលរួចទៅហើយ ខណៈសម្ពាធហិរញ្ញវត្ថុកំពុងថយចុះ។ ចំណែក ទីផ្សារអចលនទ្រព្យប្រណីតៗ ដែលស្ថិតនៅក្នុងទីតាំងស្នូលសំខាន់ៗ និងសណ្ឋាគារ នៅតែមានតម្រូវការ”។លោក Greg Hyland ប្រធានទីផ្សារមូលធនរបស់ក្រុមហ៊ុនCBRE ប្រចាំតំបន់អាស៊ីប៉ាស៊ីហ្វិក បានបញ្ជាក់ថា “វិនិយោគិនគួរតែកំណត់គោលដៅទិញអចលនទ្រព្យ នៅឆមាសទីពីរនៃឆ្នាំនេះ ហើយផ្តោតលើអចលនទ្រព្យប្រណីតៗ ព្រោះបុគ្គល ឬអង្គភាពអាជីវកម្មដែលត្រូវការលក់អចលនទ្រព្យជាបន្ទាន់ នឹងប្រកាន់ជំហរបត់បែនជាងមុន នៅពេលអ្នកទិញសាកសួរអំពីតម្លៃ”៕ប្រភព: SCMP៕

ដោយៈគង់ សូរិយា
ភ្នំពេញៈ រដ្ឋមន្រ្តីក្រសួងព័ត៌មានលោកនេត្រ ភ័ត្រាបានបង្ហាញការគាំទ្រ និងវាយតម្លៃខ្ពស់ចំពោះការបង្កើត សមាគមសហគ្រិនសារព័ត៌មានសេដ្ឋកិច្ចកម្ពុជា(CEMEA)។
លោករដ្ឋមន្រ្តីបានថ្លែងបែបនេះ ក្នុងឱកាសអនុញ្ញាត្តឲ្យថ្នាក់ដឹកនាំសមាគមសហគ្រិន សារព័ត៌មានសេដ្ឋកិច្ចកម្ពុជា បានជួបសម្តែងការគួរសម និងសុំអនុសាសន៍ណែនាំ កាលពីរសៀលថ្ងៃទី១៥ ឧសភានេះ។

ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា លោកយិន លាងគង់ បានជម្រាបជូនលោករដ្ឋមន្រ្តីថា សមាគមទើបបង្កើតឡើងបានរយៈពេលប្រមាណ២ខែ បន្ទាប់ពីទទួលច្បាប់អនុញ្ញាត្តពីក្រសួងមហាផ្ទៃ ប៉ុន្តែសមាគមបាន និងកំពុងដំណើរការយ៉ាងសកម្មលើការផ្សព្វផ្សាយព័ត៌មានសេដ្ឋកិច្ចជាតិ អន្តរជាតិ ជាបីភាសា គឺភាសាខ្មែរ ភាសាអង់គ្លេស និងភាសាចិនយ៉ាងទូលំទូលាយ។

លោកបានជម្រាបជូនលោករដ្ឋមន្រ្តីថា សមាគមបង្កើតឡើងដើម្បីគាំទ្រគោលនយោបាយរបស់រដ្ឋាភិបាល លើវិស័យសេដ្ឋកិច្ចដោយធ្វើយ៉ាងណាសមាគមនេះ អាចផ្សព្វផ្សាយព័ត៌មានសេដ្ឋកិច្ចជាតិ អន្តរជាតិមានលក្ខណៈស៊ីជម្រៅ ដល់មជ្ឈដ្ឋានជាតិ និងអន្តរជាតិ ពិសេសសមាគមចង់រួមចំណែក បណ្តុះបណ្តាលធនធានមនុស្សផ្នែកសរសេរ វិភាគព័ត៌មានសេដ្ឋកិច្ចផងដែរ។

ជាការឆ្លើយតបលោកនេត្រ ភ័ត្រារដ្ឋមន្រ្តីក្រសួងព័ត៌មានបានបង្ហាញការវាយតម្លៃខ្ពស់ ចំពោះការបង្កើតសមាគមនេះឡើង ដោយលោកចាត់ទុកថា វាជាគំនិតដ៏ល្អមួយ ដែលត្រូវរួមគ្នាផ្តោតលើព័ត៌មានសេដ្ឋកិច្ច ជាជាងរឿងបែបDramaផ្សេងៗ។

លោករដ្ឋមន្រ្តីបានផ្តល់អនុសាសន៍ ដោយឲ្យថ្នាក់ដឹកនាំសមាគមពិចារណា លើការសរសេរព័ត៌មានសេដ្ឋកិច្ច ដែលអាចផ្សារភ្ជាប់នឹងជីវភាពប្រចាំថ្ងៃរបស់ប្រជាពលរដ្ឋ។ ឧទាហរណ៍ដូចជាតម្លៃទំនិញលើទីផ្សារត្រី សាច់ជ្រូក តម្លៃប្រាក់ដុល្លារ ជាមួយប្រាក់រៀល តម្លៃមាស ជាដើម។

លោកបញ្ជាក់ថា “អ្នកសារព័ត៌មានខ្លះ មានការយល់ច្រឡំថា ទាល់តែសរសរព័ត៌មាន ដែលបានសម្ភាសន៍ជាមួយឧបនាយករដ្ឋមន្រ្តីទើបជារឿងល្អ នោះជាការភ័ន្តច្រឡំមួយ”។ លោកបន្តថា “បច្ចុប្បន្ននៅកម្ពុជា មានសារព័ត៌មានអនឡាញប្រមាណ១០០០ មានអ្នកប្រើTik Tok ប្រមាណ១០លាននាក់ អ្នកប្រើFacebook ចំនួន១៣លាននាក់ ហេតុនេះ ការផ្តោតលើព័ត៌មាន ត្រូវតែលឿន រហ័ស មានគុណភាព និងអាចទុកចិត្តបានសម្រាប់សាធារណៈជន។

ជាមួយគ្នានេះ លោកនេត្រ ភ័ត្រាក៏បានបង្ហាញការគាំទ្រ ដល់សមាគមសហគ្រិនសារព័ត៌មានសេដ្ឋកិច្ចកម្ពុជា ដើម្បីរៀបចំបណ្តុះបណ្តាលធនធានមនុស្ស ផ្នែកសារព័ត៌មានផ្នែកសេដ្ឋកិច្ចឲ្យបានច្រើនផងដែរ៕

ដោយ: គង់ លាងហួរ

អន្តរជាតិ: រដ្ឋ Johor នៃប្រទេសម៉ាឡេស៊ី កំពុងពិចារណាលើការអនុវត្តន៍គោលនយោបាយ ទប់ស្កាត់ការទិញអចលនទ្រព្យទុកលក់ចំណេញ ស្របពេលមានការអភិវឌ្ឍន៍ តំបន់សេដ្ឋកិច្ចពិសេស Johor-Singapore (SEZ)។

លោក Onn Hafiz Ghazi មេដឹកនាំរដ្ឋ Johor បានគូសបញ្ជាក់ថា គំនិតផ្តួចផ្តើមនេះ កើតចេញពីការព្រួយបារម្ភ ទាក់ទងនឹងការទិញស្តុកទុកលក់ចំណេញ ដែលធ្វើឱ្យតម្លៃអចលនទ្រព្យកើនឡើង ស្របពេលមានផែនការអភិវឌ្ឍន៍តំបន់សេដ្ឋកិច្ចពិសេស។

លោក​បាន​កត់​សម្គាល់​ថា ការ​ទិញអចលនទ្រព្យ​ស្តុកទុកលក់ចំណេ​ញបាន​នាំ​ឱ្យ​​តម្លៃ​ដី និង​លំនៅដ្ឋាន​ក្នុង​តំបន់​មួយ​ចំនួនកើនឡើងយ៉ាងគំហុក ដែល​ទាមទារ​ឱ្យ​មានការ​ត្រួតពិនិត្យ និង​ការចាត់វិធានការពី​រដ្ឋាភិបាល។

លោក Onn Hafiz បានសង្កត់ធ្ងន់លើការប្តេជ្ញាចិត្ត ទប់ស្កាត់មិនឱ្យតម្លៃអចលនទ្រព្យ ហក់ឡើងថ្លៃខ្ពស់កប់ពពក ព្រោះវានឹងធ្វើឱ្យប្រជាជនរស់នៅរដ្ឋJohor ជួបប្រទះការលំបាកខ្លាំង ក្នុងការទិញអច​ល​នទ្រព្យនៅក្នុងរដ្ឋមួយនេះ។លោកបានបញ្ជាក់ទៀតថា “រដ្ឋាភិបាល ក៏គ្រោងនឹងពិភាក្សាផងដែរអំពីការសាងសង់លំនៅដ្ឋាន ដែលមានតម្លៃសមរម្យនៅក្នុងតំបន់សេដ្ឋកិច្ចពិសេស (SEZ) ដែលលាតសន្ធឹងទៅលើរដ្ឋ Johor នៃប្រទេសម៉ាឡេស៊ី និងព្រំដែនសិង្ហបុរី”។

កាលពីខែមករាកន្លងទៅ ប្រទេសសិង្ហបុរី និងម៉ាឡេស៊ីបានចុះហត្ថលេខាលើអនុស្សរណៈ នៃការយោគយល់គ្នាលើការបង្កើតតំបន់សេដ្ឋកិច្ចពិសេស Johor-Singapore ដែលមានគោលបំណងជំរុញការតភ្ជាប់សេដ្ឋកិច្ចឆ្លងព្រំដែន។

តាមរយៈខ្លឹមសារ MOU ភាគីទាំងពីរនឹងធ្វើការឆ្ពោះទៅរកការជំរុញលំហូរទំនិញឆ្លងកាត់ព្រំដែន និងប្រជាជន។ ជាមួយគ្នានេះ ភាគីម៉ាឡេស៊ី និងសិង្ហបុរី ក៏កំពុងស្វែងរកគំនិតផ្តួចផ្តើមផ្សេងទៀត ដូចជាប្រព័ន្ធលើកលែងលិខិតឆ្លងដែន នៅតាមច្រកព្រំដែននៃប្រទេសទាំងពីរ។

នាយករដ្ឋមន្ត្រីម៉ាឡេស៊ី លោក Anwar Ibrahim បានលើកឡើងថា ការបង្កើតតំបន់សេដ្ឋកិច្ចពិសេស Johor-Singapore  និងតំបន់ហិរញ្ញវត្ថុពិសេស ក្នុងទីក្រុង Forest City អាចជួយជំរុញសេដ្ឋកិច្ចរបស់រដ្ឋJohor ឱ្យប្រសើរជាងរដ្ឋម៉ាឡេស៊ីផ្សេងទៀត ក្នុងរយៈពេលប៉ុន្មានឆ្នាំខាងមុខនេះ៕ប្រភព:Bernama៕

        ដោយៈ ស៊ីវ ម៉េង

        ភ្នំពេញៈ ដោយសិក្សាពីទីផ្សារច្បាស់លាស់ និងស្គាល់រសនិយម​របស់អតិថិជន បុរីវិមានសំណាងនៅតែបន្តឆ្ពោះទៅមុខ ប្រកបដោយវឌ្ឍនភាព។

លោកឧកញ៉ាបណ្ឌិតគីម ហ៊ាងប្រធាន KW Cambodia និងជាអ្នកអភិវឌ្ឍន៍បុរីវិមានសំណាង បានមានប្រសាសន៍ឲ្យដឹងថា ការសាងសង់ និងការលក់បុរីវិមានសំណាង នៅតែបន្តទៅមុខក្នុងសភាពវិជ្ជមាន ទោះបីជាស្ថានភាពមានសភាពយឺតយ៉ាវជាងមុនក្តី ប៉ុន្តែយើងនៅតែបន្តសកម្មភាពសាងសង់ផ្ទះ សម្រាប់អតិថិជនរបស់យើង។លោកបន្តថា “ស្ថិតនៅលើផ្ទៃដីទំហំ២៥ហិកតា យើងសាងសង់​ផ្ទះវីឡាជាង៤០០ប៉ុណ្ណោះ ដោយទុកផ្ទៃដី៤០ភាគរយ សម្រាប់​សហគមន៍បៃតង”។ លោកបន្តថា “យើងកំពុងបង្កើតសហគមន៍មួយប្រកប​ដោយភាពស៊ីវល័យ សម្រាប់មនុស្សជំនាន់ក្រោយ និងផ្តោតលើចក្ខុវិស័យរយៈពេលវែង សម្រាប់ផ្គត់ផ្គង់លំនៅដ្ឋានដល់ប្រជាពលរដ្ឋ”។

 លោកឧកញ៉ាបណ្ឌិតគីម ហ៊ាងបានបន្តថា អ្នកមានប្រាក់ខ្ទង់៤០ទៅ៥០ម៉ឺនដុល្លារ ពួកគេមិនអាចទិញផ្ទះវីឡាឃីង និងវីឡាឃ្វីននៅកណ្តាលរាជធានីបានទេ ប៉ុន្តែពួកគេគួរងាកមកកាន់បុរីវិមានសំណាង ដែលពួកគេអាចជ្រើសរើសផ្ទះ ដែលបានរចនាឡើងបែបក្លាសិកសម្រាប់អនាគតគ្រួសារ និងសហគមន៍របស់ពួកគេ”។ លោកបន្ថែមថា “យើងផ្តោតជាចម្បងលើក្រុមអ្នកមានសម័យថ្មី ដែលត្រូវការរសនិយមថ្មី និងផ្សារភ្ជាប់ជីវិតជាមួយធម្មជាតិ។

បុរីវិមានសំណាងស្ថិតនៅលើមហាវិថីឈ្នះ ឈ្នះ មានចម្ងាយប្រមាណ២៥០០ម៉ែត្រ ពីក្រសួងរៀបចំដែនដី នគរូបនីយកម្ម និងសំណង់ថ្មី និងជាទីតាំងដែលហ៊ុំព័ទ្ឋ ទៅដោយមជ្ឈមណ្ឌលពាណិជ្ជកម្ម ផ្សារទំនើប ផ្សារសហគមន៍ជាដើម។ បុរីនេះមានព្រែកធម្មជាតិប្រវែង១០០០ម៉ែត្រហូរកាត់ ដែលផ្តល់បរិយាកាសរស់នៅ ប្រកបដោយផាសុខភាព និងភាពមនោរម្យសម្រា​ប់អតិថិជន៕

ដោយ: គង់ លាងហួរ

អន្តរជាតិ: ក្រុមហ៊ុនបច្ចេកវិទ្យាយក្ស Samsung របស់ប្រទេសកូរ៉េខាងត្បូង គ្រោងបោះទុនវិនិយោគបន្ថែមក្នុងទំហំទឹកប្រាក់ប្រមាណ១ពាន់លានដុល្លារ នៅក្នុងប្រទេសវៀតណាមជារៀងរាល់ឆ្នាំ។

ការប្រកាសនេះបានធ្វើឡើង ក្នុងអំឡុងពេលដែលលោក Park Hark-kyu ប្រធានប្រតិបត្តិផ្នែកហិរញ្ញវត្ថុ (CFO) នៃក្រុមហ៊ុន Samsung Electronics បានជួបពិភាក្សាការងារជាមួយនាយករដ្ឋមន្ត្រីវៀតណាមលោក Pham Minh Chinh នៅទីក្រុងហាណូយ។

លោក Park បានកត់សម្គាល់ថា គិតរហូតមកដល់ពេលនេះ ក្រុមហ៊ុន Samsung បានបណ្តាក់ដើមទុនវិនិយោគ ប្រមាណ២២,៤ពាន់លានដុល្លារ នៅក្នុងប្រទេសវៀតណាម ហើយខ្លួនគ្រោងបន្តបោះទុនបន្ថែម១ពាន់លានដុល្លារជារៀងរាល់ឆ្នាំ។

លោកបានបន្តថា ក្រៅពីការស្រាវជ្រាវ ការអភិវឌ្ឍ ការផលិត និងការនាំចេញផលិតផលអេឡិចត្រូនិក និងបច្ចេកវិទ្យាជាន់ខ្ពស់ ក្រុមហ៊ុន Samsung ក៏បាននិងកំពុងវិនិយោគ លើការជួយដល់ឧស្សាហកម្ម និងការបណ្តុះបណ្តាលធនធានមនុស្ស សម្រាប់ក្រុមហ៊ុនវៀតណាម ព្រមទាំងជួយក្រុមហ៊ុនក្នុងស្រុក ឱ្យចូលរួមក្នុងខ្សែសង្វាក់ផលិតកម្ម និងការផ្គត់ផ្គង់របស់ខ្លួនផងដែរ។

លោកបន្ថែមថា “ក្រុមហ៊ុន Samsung សង្ឃឹមថា ខ្លួននឹងបន្តការអភិវឌ្ឍន៍ ដើម្បីរួមចំណែកដល់កំណើនពាណិជ្ជកម្ម និងសេដ្ឋកិច្ចបរទេសរបស់ប្រទេសវៀតណាម”។

ជាមួយគ្នានេះ លោកបានវាយតម្លៃខ្ពស់ ចំពោះបរិយាកាសវិនិយោគ និងធុរកិច្ច ព្រមទាំងការត្រៀមខ្លួន របស់នាយករដ្ឋមន្ត្រីវៀតណាម ក្នុងការស្តាប់ និងជួយដល់សហគ្រាស ដោយបន្ថែមថា ក្រុមហ៊ុន Samsung នឹងបន្តឈរជាមួយវៀតណាម នៅលើមាគ៌ាអភិវឌ្ឍន៍។

ជាការឆ្លើយតប លោកនាយករដ្ឋមន្ត្រីវៀតណាម បានលើកឡើងថា ខ្លួននឹងបន្តផ្តល់នូវលក្ខខណ្ឌដ៏ល្អប្រសើរ សម្រាប់គម្រោងវិនិយោគរបស់ក្រុមហ៊ុន Samsung ឱ្យដំណើរការទៅមុខប្រកបដោយផ្លែផ្កា និងការអភិវឌ្ឍន៍ប្រកបដោយនិរន្តរភាព ក្នុងប្រទេសវៀតណាម ក្នុងស្មារតីនៃការចុះសម្រុងគ្នា ព្រមទាំងផលប្រយោជន៍ និងការចែករំលែកហានិភ័យ៕ប្រភព:Vnexpress៕

        ដោយៈ គង់ សូរិយា

        កំពតៈ អភិបាលខេត្តកំពត លោកម៉ៅ ធនិនបានបង្ហាញការប្ដេជ្ញាចិត្តថា នឹងធ្វើឲ្យខេត្តក្លាយជាគោលដៅ ទេសចរណ៍ដ៏ទាក់ទាញ សម្រាប់ភ្ញៀវទេសចរជាតិ និងអន្តរជាតិ។

លោកបន្តថា រដ្ឋបាលខេត្តមានគម្រោងជាច្រើន ដើម្បីលើកកម្ព​ស់វិស័យទេសចរណ៍ខេត្ត ប៉ុន្ដែតម្រូវឲ្យមន្ត្រីជំនាញ អាជ្ញាធរ ពិសេសប្រតិបត្តិករ និងអ្នកផ្តល់សេវាទេសចរណ៍ អាជីវករសូមចូលរួមរក្សាសេចក្តីថ្នៃថ្នូរ និងកិត្តិយសរបស់ខេត្ត តាមរយៈការទទួលបដិស​ណ្ឋាកិច្ចល្អ រមណីយដ្ឋានស្អាត និងសេវាកម្មជឿទុកចិត្តបាន។

ក្នុងកិច្ចប្រជុំរវាងរដ្ឋបាលខេត្ត ជាមួយវិស័យឯកជន ប្រតិបត្តិករទេសចរណ៍ក្នុងខេត្តកំពត នៅព្រឹកថ្ងៃទី១៤ ខែឧសភា ២០២៤កន្លងមកនេះ លោក ម៉ៅ ធនិន បានលើកឡើងថា ដោយផ្អែកតាមគោលនយោបាយអាទិភាពរបស់រាជរដ្ឋាភិបាល និងផ្អែកតាមសក្តានុពលរបស់ខេត្តកំពត រដ្ឋបាលខេត្តនឹងធ្វើឲ្យវិស័យទេសចរណ៍ ក្លាយជាវិស័យស្នូល ដើម្បីជួយទ្រទ្រង់ដល់សេដ្ឋកិច្ចរបស់ប្រជាពលរដ្ឋ។

រដ្ឋបាលខេត្តបានបន្តដាក់ចុះ នូវគម្រោងអភិវឌ្ឍន៍ជាច្រើន ដើម្បីលើកកម្ពស់វិស័យទេសចរណ៍ ធ្វើយ៉ាងណាទាក់ទាញភ្ញៀវទេសចរជាតិ និងអន្តរជាតិ ឲ្យមកសម្រាកកម្សាន្តនៅខេត្តកំពតកាន់តែច្រើន។

លោកបញ្ជាក់ថា “លោកនឹងធ្វើឲ្យខេត្តកំពត ក្លាយជាខេត្តគោលដៅទេសចរណ៍ដ៏ទាក់ទាញ សម្រាប់ភ្ញៀវទេសចរជាតិ និងអន្តរជាតិ ពិសេសក្លាយជាខេត្តតំបន់ឆ្នេរ ដែលមានភាពលេចធ្លោជាងគេ”។

លោកម៉ៅ ធនិនបានស្នើដល់មន្ត្រីជំនាញ អាជ្ញាធរ ពិសេសប្រតិបត្តិករទេសចរណ៍ សូមរក្សាឲ្យបាននូវបដិសណ្ឋាកិច្ចល្អ រមណី​យដ្ឋានស្អាត សេវាកម្មជឿទុកចិត្តបាន ពិសេសរក្សាឲ្យបាននូវតម្លៃសម​រម្យ មិនមានការតម្លើងថ្លៃ មានភាពស្មោះត្រង់ក្នុងការលក់ដូរ ដើម្បីទទួលបានការទុកចិត្ត ពីសំណាក់ភ្ញៀវទេសចរណ៍ ដែលមកសម្រាកកម្សាន្តក្នុងខេត្ត។

ជាងនេះទៅទៀត លោក ម៉ៅ ធនិន ក៏បានបង្ហាញអំពីចក្ខុវិស័យ និងគម្រោងអភិវឌ្ឍន៍ វិស័យទេសចរណ៍ជាច្រើនទៀត មានដូចជា បង្កើតសេវាកម្សាន្តតាមដៃព្រែកនានា ការបង្កើតផ្សារលើទឹក និងគម្រោងបង្កើតឆ្នេរសមុទ្រ ដ៏ស្រស់ស្អាតមួយបន្ថែមទៀតជាដើម៕