ដោយ: គង់ លាងហួរ

ភ្នំពេញ: របាយការណ៍របស់ក្រសួងទេសចរណ៍ បានចេញផ្សាយឱ្យដឹងកាលពីថ្ងៃចន្ទថា ប្រទេសកម្ពុជាបានទាក់ទាញ ភ្ញៀវទេសចរចិនចំនួនជិតកន្លះលាននាក់ ក្នុងអំឡុងពេល១១ខែដំបូង នៃឆ្នាំនេះ កើនឡើង៤៤៩ភាគរយ បើធៀបត្រឹមតែ៩០.៦៤៨នាក់ ក្នុងរយៈពេលដូចគ្នាកាលពីឆ្នាំមុន។

របាយ​ការណ៍ដដែល​បាន​បន្ត​ថា ចំនួន​ខាងលើនេះ​គ្របដណ្តប់១០,១ភាគរយ ​នៃ​ចំនួន​ភ្ញៀវ​ទេសចរ​អន្តរជាតិ​ សរុប៤,៩១លាន​នាក់​ ដែលបានចូលមក​កាន់​ប្រទេស​កម្ពុជា  ក្នុង​អំឡុង​ខែ​មករា​ដល់​ខែ​វិច្ឆិកា​ឆ្នាំ២០២៣នេះ។

របាយការណ៍នេះបានឱ្យដឹងទៀតថា ប្រទេសចិនគឺជាប្រភពភ្ញៀវទេសចរបរទេសធំជាងគេទី៣ មកកាន់កម្ពុជា បន្ទាប់ពីប្រទេសថៃ និងវៀតណាម ដោយបានបន្ថែមថា ជនជាតិថៃប្រមាណ១,៦៥លាននាក់ និងជនជាតិវៀតណាម ចំនួន៩២០.០៩៣នាក់ បានធ្វើដំណើរមកកម្ពុជា ក្នុងរយៈពេល១១ខែ ឆ្នាំនេះ ដោយកើនឡើង១៣០ភាគរយ និង១២៩ភាគរយរៀងៗគ្នា។លោកតុប សុភ័ក្រ រដ្ឋលេខាធិការ និងជាអ្នកនាំពាក្យក្រសួងទេស​​ចរណ៍  បានមានប្រសាសន៍ឱ្យដឹងថា កម្ពុជាចង់ឃើញភ្ញៀវទេស​ចរចិនមកកម្សាន្តកាន់តែច្រើន ដោយធានាថាប្រទេសនេះ ជាគោលដៅទេសចរណ៍ប្រកបដោយសុវត្ថិភាព។

លោកបានប្រាប់សារពត៌មាន Xinhua ថា “យើងចង់បានភ្ញៀវទេសចរចិនកាន់តែច្រើន ដោយសារពួកគេបានចូលរួមចំណែកយ៉ាងសំខាន់ក្នុងការអភិវឌ្ឍន៍សេដ្ឋកិច្ច និងទេសចរណ៍របស់យើង ក៏ដូចជាការកាត់បន្ថយភាពក្រីក្រផងដែរ”។

វិស័យទេសចរណ៍គឺជាសសរស្តម្ភមួយ ក្នុងចំណោមសសរស្តម្ភទាំង៤ ដែលជួយទ្រទ្រង់ដល់សេដ្ឋកិច្ចរបស់កម្ពុជា បន្ថែមលើការនាំចេញសម្លៀកបំពាក់ ស្បែកជើង និងការនាំចេញទំនិញធ្វើដំណើរ កសិកម្ម សំណង់ និងអចលនទ្រព្យ។លោកស៊ិន ចាន់សិរីវុត្ថាអនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានថ្លែងឲ្យដឹងកាលពីពេលថ្មីៗនេះថា មិនមា​នក្រុមហ៊ុនអាកាសចរណ៍ចិនថ្មីៗ បានហោះហើរមកកម្ពុជានៅឡើយទេ ប៉ុន្តែក្រុមហ៊ុនអាកាសចរណ៍ចិននានា ដែលបានភ្ជាប់ជើងហោះហើរត្រង់មកកម្ពុជា បានបង្កើនចំនួនជើងហោះហើរមកកាន់ប្រទេសរបស់យើង។

លោកបន្តថា “នេះជាសញ្ញាវិជ្ជមានមួយ សម្រាប់វិស័យអាកាសចរណ៍ ក៏ដូចជាសម្រាប់វិស័យទេសចរណ៍ និងការធ្វើធុរកិច្ចរវាងចិន និងកម្ពុជា”៕

ដោយៈ ជេស៊ីកា

        កណ្តាលៈ រដ្ឋបាលក្រុងអរិយក្សត្រ នឹងសាងសង់ផ្លូវមេចំនួន៤ខ្សែ ដើម្បីពង្រីកសក្តានុពលសេដ្ឋកិច្ច និងទាក់ទាញការវិនិយោគនៅទីក្រុង ដែលទើបបង្កើតថ្មីនេះ។

យោងតាមសេចក្តីជូនដំណឹង របស់រដ្ឋបាលក្រុងអរិយក្សត្រ ដែលបានប្រកាសបានឲ្យដឹង និងបានគោរព ជម្រាបជូនដំណឹងដល់ ឯកឧត្ដម លោកជំទាវ លោក លោកស្រី អ្នកនាង កញ្ញា ដែលមានក្បាលដីជាប់សងខាងផ្លូវ និងក្បាលដីចំគម្រោងបើកផ្លូវ ស្ថិតនៅក្នុងភូមិទួលមាស សង្កាត់អរិយក្សត្រ ក្រុងអរិយក្សត្រ ខេត្តកណ្ដាល ឲ្យបានជ្រាបថា ក្រុងអរិយក្សត្រនឹងស្ថាបនាបើកផ្លូវចំនួន៤ខ្សែ ឆ្ពោះចូលទៅរហូតដល់ទីតាំងសម្រាប់សងសង់ អាគារសាលាក្រុងអរិយក្សត្រ និងហេដ្ឋារចនាសម្ព័ន្ធជុំវិញ តំបន់រដ្ឋបាលក្រុងអរិយក្សត្រ។

ផែនការនេះធ្វើឡើងស្របតាមប្លង់គោល នៃប្លង់ប្រព័ន្ធតាមតម្រាយផ្លូវដូចជា ខ្សែទី១ ចាប់ផ្តើមចេញពីចំណុចចាប់ពីកែងផ្លូវ ៧០បេ ដល់រង្វង់មូល។ ខ្សែទី២ ចំណុចចាប់ពីរបងសាលាបឋមសិក្សាពេជ្រម្កុដ ដល់ផ្លូវ៧០បេ។ ខ្សែទី៣ ចំណុចចាប់ពីកែងផ្លូវ ៧០បេ ដល់ផ្លូវបេតុងចូលបុរីទួលសង្កែ និងខ្សែទី៤ ចំណុចចាប់ពីផ្លូវកែង ១៥ម៉ែត្រ ដល់ផ្លូវប្រសព្វ១៥ម៉ែត្រទៅបុរីទួលសង្កែ។

សេចក្តីជូនដំណឹងដដែលបានបន្តថា ដូចនេះ ដើម្បីឱ្យការអនុវត្តគម្រោងស្ថាបនា ហេដ្ឋារចនាសម្ព័ន្ធសាធារណៈ ខាងលើដំណើរការដោយរលូន ស្របតាមផែនការងារដែលបានគ្រោងទុក រដ្ឋបាលក្រុងអរិយក្សត្រ ស្នើដល់លោក លោកស្រី ដែលមានក្បាលដី ពាក់ព័ន្ធ សូមចូលរួមផ្ដល់កិច្ចសហការ បង្កលក្ខណៈងាយស្រួល ដល់ក្រុមមន្ត្រីជំនាញចុះអនុវត្តគម្រោងខាងលើ ចាប់ពីថ្ងៃជូនដំណឹងនេះតទៅ៕

ដោយៈ ស៊ីវ ម៉េង

ភ្នំពេញៈ អគ្គនាយកក្រុមហ៊ុនអចលនទ្រព្យERA Cambodia លោកខន គង្គាបានមានប្រសាសន៍ឲ្យដឹងថា ក្រុមហ៊ុនជាតិ អន្តរជាតិមួយចំនួន នឹងចាប់ផ្តើមបើកការដ្ឋានសាងសង់ គំរោងខុនដូរបស់ខ្លូននៅឆ្នាំ២០២៤ខាងមុខនេះ។

លោកបន្តឲ្យដឹងកាលពីចុងសប្តាហ៍មុនថា បន្ទាប់ពីស្ងប់ស្ងាត់មួយរយៈ អ្នកអភិវឌ្ឍន៍បានចាប់ផ្តើម មើលឃើញឱកាសក្នុងទីផ្សារឡើងវិញ ដោយពួកគាត់នឹងចាប់ផ្តើមសាងសង់ខុនដូ ចន្លោះពី៣ ទៅ៤គំរោង ដែលគំរោងភាគច្រើន ស្ថិតនៅក្នុងតំបន់បឹងកេងកង១ ខ័ណ្ឌបឹងកេងកង រាជធានីភ្នំពេញ។លោកបានបន្តថា “ទីផ្សារខុនដូចាប់ផ្តើមមានសភាពល្អប្រសើរឡើងវិញ ដោយជនបរទេសកាន់តែច្រើន បានវិលមកកាន់ទីផ្សារកម្ពុជាឡើងវិញ”។ លោកបន្តថា “ជនជាតិម៉ាឡេស៊ី សឹង្ហបុរី កូរ៉េ ជប៉ុន ភូមា រុស្ស៊ីជាដើមបានចាប់ផ្តើមវិនិយោគលើខុនដូនៅកម្ពុជា”។

]លោកខន គង្គាបានបន្តទៀតថា ក្នុងចំណោមជនបរទេសទាំងនោះ អ្នកទិញខុនដូភាគច្រើនបានទិញសម្រាប់ស្នាក់នៅ និងវិនិយោគយកផលចំណេញ ដោយសារតែទីផ្សារនេះមានភាពល្អប្រសើរ ព្រោះតម្លៃបានធ្លាក់ចុះ ដល់កម្រិតមួយដែលអ្នកវិនិយោគ មើលឃើញផលចំណេញខ្ពស់ពីការវិនិយោគ។លោកបន្តថា “ផលចំណេញពីការវិនិយោគលើខុនដូ នឹងមានអត្រាចំណេញកាន់តែខ្ពស់នាពេលអនាគត”៕

ដោយ: គង់ លាងហួរ

អន្តរជាតិ: យោងតាមការស្ទង់មតិថ្មីមួយ របស់ធនាគារ HSBC Commercial Bankingបានបង្ហាញថា ក្រុមហ៊ុនអន្តរជាតិមកពីបណ្តាប្រទេសសេដ្ឋកិច្ចធំៗចំនួន៩ មានសុទិដ្ឋិនិយមអំពីទស្សនវិស័យកំណើនរបស់ពួកគេ នៅក្នុងតំបន់អាស៊ាន និងអាស៊ីទាំងមូល។

ក្រុមហ៊ុនធំៗទាំងនោះរំពឹងថា ការលក់របស់ពួកគេ នៅក្នុងតំបន់អាស៊ី នឹងកើនឡើង២៣,២% ក្នុងរយៈពេល១២ខែបន្ទាប់ បើធៀបនឹង២០,១% ក្នុងការស្ទង់មតិកាលពីឆ្នាំមុន។ កំណើននេះបង្ហាញពីការកើនឡើងនៃទំនុកចិត្ត របស់ក្រុមហ៊ុនអន្តរជាតិធំៗនៅក្នុងតំបន់។

ដោយសម្លឹងឆ្ពោះទៅរយៈពេល២ឆ្នាំខាងមុខ ប្រទេសកម្ពុជា ឈរនៅតំណែងទី៧ ក្នុងតំបន់អាស៊ាន ដោយក្រុមហ៊ុន១ក្នុងចំណោ​មក្រុមហ៊ុនអន្តរជាតិចំនួន៨ គ្រោងពង្រីកអាជីវកម្មបន្ថែមនៅកម្ពុជា។ចំណែក ប្រទេសសិង្ហបុរីទទួលបានតំណែងទី១ ក្នុងតំបន់អាស៊ាន ដោយ១ ក្នុងចំណោមក្រុមហ៊ុនអន្តរជាតិចំនួន២ គ្រោងពង្រីកអាជីវកម្មបន្ថែមក្នុងប្រទេសនេះ ខណៈម៉ាឡេស៊ីទទួលបានតំណែងទី២ ដោយ១ ក្នុងចំណោមក្រុមហ៊ុនអន្តរជាតិចំនួន៣ គ្រោងពង្រីកខ្លួនក្នុងប្រទេសម៉ាឡេស៊ី។

ប្រទេសថៃទទួលបានតំណែងទី៣ ក្នុងចំណោមប្រទេសសមាជិ​កអាស៊ានទាំង១០  ដោយក្រុមហ៊ុន១ ក្នុងចំណោមក្រុមហ៊ុនអន្តរជាតិចំនួន៤ គ្រោងពង្រីកអាជីវកម្មរបស់ពួកគេបន្ថែមនៅប្រទេសថៃ។

ប្រទេសឥណ្ឌូនេស៊ី ឈរនៅតំណែងទី៤ ដោយក្រុមហ៊ុន១ ក្នុងចំណោមក្រុមហ៊ុនអន្តរជាតិចំនួន៥ គ្រោងពង្រីកខ្លួនបន្ថែមក្នុងប្រទេ​សនេះ  ប្រទេសហ្វីលីពីនឈរនៅតំណែងទី៥ ដោយក្រុមហ៊ុន១ ក្នុងចំណោមក្រុមហ៊ុនអន្តរជាតិចំនួន៦ គ្រោងពង្រីកខ្លួនបន្ថែមក្នុងប្រទេ​សនេះ។

ប្រទេសវៀតណាមឈរនៅតំណែងទី៦ ដោយក្រុមហ៊ុន១ ក្នុងចំណោមក្រុមហ៊ុនអន្តរជាតិចំនួន៧ គ្រោងពង្រីកខ្លួនក្នុងប្រទេសនេះខណៈប្រទេសមីយ៉ាន់ម៉ា ឡាវ និងប្រ៊ុយណេជាប់ចំណាត់ថ្នាក់ចុងក្រោយគេបង្អស់៕

ដោយ: គង់ លាងហួរ

អន្តរជាតិ: ការលក់ផ្ទះថ្មីនៅសហរដ្ឋអាមេរិក បានធ្លាក់ចុះនៅក្នុងខែវិច្ឆិកា ដោយសារអត្រាការប្រាក់ លើកម្ចីទិញផ្ទះបានធ្លាក់ចុះបន្តិចម្តងៗពីកម្រិតខ្ពស់បំផុត ដែលឈានដល់នៅឆ្នាំ២០២៣នេះ។

ការលក់ផ្ទះដែលទើបសាងសង់ថ្មី បានធ្លាក់ចុះ១២,២% នៅក្នុងខែវិច្ឆិកា ដល់៥៩០.០០០យូនីត បើធៀបនឹងការលក់ចំនួន៦៧២.០០០យូនីត ក្នុងខែតុលា។ នេះបើយោងតាមរបាយការណ៍រួមពីក្រសួងលំនៅដ្ឋាន និងការអភិវឌ្ឍន៍ទីក្រុង និងការិយាល័យជំរឿនរបស់សហរដ្ឋអាមេរិក។ ប៉ុន្តែបើធៀបនឹងឆ្នាំមុន ការលក់ផ្ទះថ្មីបានកើនឡើង១,៤%។

តួលេខនៃការលក់ផ្ទះប្រចាំខែវិច្ឆិកា គឺទាបជាងការរំពឹងទុករបស់អ្នកវិភាគ ដែលបានព្យាករណ៍ការលក់ ចំនួន៦៨៥.០០០យូនីត និងជាការធ្លាក់ចុះយ៉ាងខ្លាំង បំផុតមិនធ្លាប់មាន ចាប់តាំងពីខែមេសា ឆ្នាំ២០២២។ នេះបើយោងតាមការចុះផ្សាយ ដោយកាសែតអាមេរិក CNN។ចំណែក ការលក់ផ្ទះដែលមានស្រាប់ នៅសហរដ្ឋអាមេរិក បានស្ថិតក្នុងកម្រិតទាបបំផុត ក្នុងរយៈពេល៣០ឆ្នាំ។  ការលក់ផ្ទះដែលមានស្រាប់ទាំងនេះ មាននិន្នាការធ្លាក់ចុះ ចាប់តាំងពីខែកុម្ភៈមកម្ល៉េះ លើកលែងតែការកើនឡើង ដ៏គួរឱ្យភ្ញាក់ផ្អើលក្នុងខែវិច្ឆិកាប៉ុណ្ណោះ។

លោកស្រី Lisa Sturtevant ប្រធានសេដ្ឋវិទូរបស់ទីភ្នាក់ងារអចលនទ្រព្យ Bright Multiple Listing Service លើកឡើងថា “ការ​លក់​ផ្ទះ​ថ្មី​សរុប​នៅ​ឆ្នាំ​នេះ​រំពឹង​ថា​ នឹង​កើន​ឡើង​ជិត១០ភាគរយ ​ធៀបនឹងឆ្នាំ​មុន។ ផ្ទុយទៅវិញ ការលក់ផ្ទះដែលមានស្រាប់ បានធ្លាក់ចុះជិត២០% ធៀបនឹងឆ្នាំមុន”។ចំណែកឯ នៅប្រទេសចិនវិញ ទីភ្នាក់ងារពត៌មាន Caixin បានរាយការណ៍ថា ការលក់ផ្ទះបានធ្លាក់ចុះក្នុងខែវិច្ឆិកា ដោយសារអ្នកទិញនៅតែប្រុងប្រយ័ត្ន ចំពោះភាពចលាចល នៅក្នុងវិស័យអចលនទ្រព្យរបស់ប្រទេសនេះ។

យោងតាមទិន្នន័យបឋមពីក្រុមហ៊ុន China Real Estate Information Corp. បានឱ្យដឹងថា តម្លៃនៃការលក់ផ្ទះថ្មីក្នុងចំណោមក្រុមហ៊ុនអចលនទ្រព្យ ធំបំផុតទាំង១០០ បានធ្លាក់ចុះ២៩,៦% ធៀបនឹងឆ្នាំមុន មកនៅត្រឹម៣៩០,១៩ពាន់លានយ័ន (ប្រហែល៥៤,៦ពាន់លានដុល្លារ)។

ការលក់ផ្ទះថ្មីរបស់ប្រទេសចិន បានធ្លាក់ចុះ៤,១% ក្នុងខែវិច្ឆិកា បើធៀបនឹងខែតុលា។  ការលក់ប្រចាំឆ្នាំសរុបរបស់ក្រុមហ៊ុនអភិវឌ្ឍន៍ទាំង១០០ ត្រូវបានគេរំពឹងថានឹងធ្លាក់ចុះ១៥% ធៀបនឹងឆ្នាំ២០២២។ នេះបើយោងតាមរបាយការណ៍ខាងលើ។

ដើម្បី​រក្សា​ស្ថិរភាព​ទីផ្សារ​អចលនទ្រព្យ ​នៅក្នុងប្រទេស​របស់ខ្លួន អាជ្ញាធរ​ចិន បាន​ដាក់ចេញ​នូវ​គោលនយោបាយ​ជាច្រើន ដើម្បី​បន្ធូរបន្ថយ​ការ​ទប់ស្កាត់​ការ​ទិញផ្ទះ និង​បន្ថយ​លក្ខខណ្ឌ​នៃ​ការ​កក់ប្រាក់មុន៕

ដោយ: គង់ លាងហួរ

អន្តរជាតិ: យោងតាមការសិក្សាថ្មីមួយពីក្រុមហ៊ុន Wood Mackenzie Ltd បានឱ្យដឹងថា គំនិតផ្តួចផ្តើមខ្សែក្រវ៉ាត់ និងផ្លូវរបស់ប្រទេសចិន(BRI) កំពុងជំរុញឆ្ពោះទៅរកការអភិវឌ្ឍន៍ថាមពលកកើតឡើងវិញ បន្ទាប់ពីBRI បានជួយប្រទេសផ្សេងទៀត ក្នុងការអភិវឌ្ឍការផលិតថាមពល ដ៏ច្រើនសន្ធឹកសន្ធាប់ អស់រយៈពេល១០ឆ្នាំកន្លងមក។

របាយ​ការណ៍​បាន​បន្ត​ថា វិស័យថាមពលកកើត​ឡើង​វិញ​គ្របដណ្តប់៥៧% នៃគម្រោងអភិវឌ្ឍន៍នៅក្រៅប្រទេស ដែលបច្ចុប្បន្នកំពុងរៀបចំផែនការ ឬកំពុងសាងសង់  បើ​ធៀប​នឹង៣៧% នៃ​សមត្ថភាព​ដែល​បាន​សាង​សង់ ​ក្នុង​រយៈ​ពេល​១ទសវត្សរ៍​ចុង​ក្រោយ​នេះ។

ការផ្លាស់ប្តូរនេះបានកើតឡើង ស្របពេលដែលតម្លៃទួរប៊ីនខ្យល់ និងបន្ទះស្រូបពន្លឺព្រះអាទិត្យបានធ្លាក់ចុះ ហើយរដ្ឋាភិបាលនៅតាមបណ្តាប្រទេសនានា កំពុងបង្កើនកិច្ចខិតខំប្រឹងប្រែង ដើម្បីងាកចេញឆ្ងាយពីការបំពុលឥន្ធនៈហ្វូស៊ីល។ លោក Alex Whitworth ប្រធានទីប្រឹក្សានៃថាមពលអាស៊ីប៉ាស៊ីហ្វិក និងការស្រាវជ្រាវលើថាមពល កកើតឡើងវិញបានអះអាងថា ប្រទេសចិនកំពុងផ្លាស់ប្តូរយុទ្ធសាស្រ្តរួមរបស់ខ្លួន ដូច្នេះយើងរំពឹងថា នឹងមើលឃើញការផ្តោត ការយកចិត្តទុកដាក់បន្ថែមទៀត លើការកកើតឡើងវិញ និងការបណ្តាក់ទុនវិនិយោគ ដោយផ្ទាល់ច្រើនជាងការផ្តល់ប្រាក់កម្ចីទ្វេរភាគី។

យោងតាម​របាយការណ៍ ​ពី​មជ្ឈមណ្ឌល​ស្រាវជ្រាវ​ថាមពល និង​ខ្យល់​ស្អាតបានឱ្យដឹងថា កំណើននៃការផលិតថាមពលស្អាត ក្នុងស្រុករបស់ប្រទេសចិន នៅតែបន្តស្ទុះឡើងយ៉ាងលឿន ហើយការដំឡើងថាមពលពន្លឺព្រះអាទិត្យ ខ្យល់ នុយក្លេអ៊ែរ និងវារីអគ្គិសនីនៅឆ្នាំនេះ អាចនឹងបង្កើតអគ្គិសនីបានគ្រប់គ្រាន់ ដើម្បីផ្តល់ថាមពលដល់ប្រទេសបារាំងទាំងមូល។

ការសិក្សារបស់ក្រុមហ៊ុន Wood Mackenzie បានរកឃើញថា សមត្ថភាពផលិតថាមពល១២៨ជីហ្គាវ៉ាត់ ដែលស្មើនឹងទឹកប្រាក់វិនិយោគប្រហែល២០០ពាន់លានដុល្លារ ត្រូវបានបញ្ចប់ជាស្ថាពរនៅឆ្នាំ២០២៣នេះ តាមរយៈគំនិតផ្តួចផ្តើម BRI ដែលត្រូវបានប្រកាសដាក់ចេញដោយប្រធានាធិបតីចិន លោកស៊ីជីនពីង ក្នុងឆ្នាំ២០១៣៕Bloomberg៕

ដោយ: គង់ លាងហួរ

អន្តរជាតិ: ក្រុមហ៊ុនបដិសណ្ឋារកិច្ច Dusit International គ្រោង​នឹង​បើក​សណ្ឋាគារ​ថ្មី ​ជាង​១០ទីតាំង​បន្ថែមទៀត នៅ​ក្រៅ​ប្រទេស​ ក្នុងឆ្នាំ​២០២៤ខាងមុខ ស្របពេលដែល​តម្រូវការ​ លើធ្វើ​ដំណើរកំពុងស្ទុះងើបឡើងវិញ។

លោក Siradej Donavanik អនុប្រធានផ្នែកអភិវឌ្ឍន៍សកលនៅក្រុមហ៊ុន Dusit International បានលើកឡើងថា ឧស្សាហកម្មទេសចរណ៍បានកម្រើកឡើងវិញ ពីជំងឺរាតត្បាត ដោយសារការហោះហើរអន្តរជាតិបានកើនឡើង ហើយតម្លៃសំបុត្រយន្តហោះ ត្រូវបានគេព្យាករណ៍នឹងធ្លាក់ចុះនៅឆ្នាំក្រោយ។ លោកបានបន្តថា ការអភិវឌ្ឍន៍សណ្ឋាគាររបស់ក្រុមហ៊ុន Dusit នឹងផ្តោតលើការចូល ទៅក្នុងទីផ្សារថ្មីនៅតំបន់អាស៊ី តំបន់អឺរ៉ុប និងតំបន់អាហ្វ្រិក ដើម្បីធ្វើពិពិធកម្មផលប័ត្ររបស់ខ្លួន។ក្រុមហ៊ុននេះមានសណ្ឋាគារចំនួន២ រួចមកហើយនៅក្នុងទីក្រុង Kyoto ប្រទេសជប៉ុន ស្ថិតក្រោមម៉ាកយីហោ Dusit Thani និង Asai ហើយក្រុមហ៊ុនគ្រោង នឹងបើកសណ្ឋាគារថ្មីៗបន្ថែម នៅក្នុងទីក្រុងធំៗរបស់ប្រទេសជប៉ុន ដូចជាទីក្រុង Osaka ជាដើម។ លោក​ Siradej បាន​គូសបញ្ជាក់ថា ទីតាំង​ថ្មី​សម្រាប់ការអភិវឌ្ឍន៍សណ្ឋាគារ ដែល​ក្រុម​ហ៊ុនកំពុង​ពិចារណា ​ក្នុង​តំបន់​អាស៊ី​អាគ្នេយ៍​រួម​មាន ទីក្រុងម៉ាឡាកា និង​ទីក្រុងកូឡាឡាំពួរ ក្នុង​ប្រទេស​ម៉ាឡេស៊ី។លោក Siradej បានបន្តទៀតថា ក្រុមហ៊ុនDusit ចង់បើកសណ្ឋាគារ នៅក្នុងប្រទេសឥណ្ឌូនេស៊ី បន្ថែមពីលើផ្ទះវីឡា ដែលមានស្រាប់ក្រោមម៉ាកយីហោ Elite Havens ។ ជាមួយគ្នានេះ ក្រុម​ហ៊ុន Dusit International ក៏​កំពុង​សិក្សា​ទីតាំង​ថ្មី​ក្នុង​ប្រទេស​អាល្លឺម៉ង់ និង​ប្រទេសបារាំងផងដែរ ខណៈក្រុមហ៊ុននេះ គ្រោងសាងសង់គម្រោងសណ្ឋាគារ Dusit Suites នៅ​ទីក្រុង Athens ប្រទេស​ក្រិក។ លោកបានបន្ថែមថា លើសពីនេះ ក្រុមហ៊ុន Dusit International គ្រោងពង្រីកខ្លួនទៅកាន់ទីក្រុងផ្សេងទៀត ក្នុងទ្វីបអាហ្រ្វិក ដើម្បីកសាងវត្តមានរបស់ខ្លួន នៅទីក្រុងណៃរ៉ូប៊ី(Nairobi) ប្រទេសកេនយ៉ា៕

ដោយៈ ជេស៊ីកា
ភ្នំពេញៈ ក្រុមមន្រ្តីរដ្ឋាភិបាលដឹកនាំដោយ លោកឧបនាយករដ្ឋមន្រ្តីស៊ុន ចាន់ថុលអនុប្រធានទី១នៃក្រុមប្រឹក្សាអភិវឌ្ឍន៍កម្ពុជា បានដឹកនាំកិច្ចប្រជុំអន្តរក្រសួង ជាមួយគណៈប្រតិភូនៃប្រទេសជប៉ុនដោយផ្តោតលើវិស័យភស្តុភារកម្ម និងហេដ្ឋារចនាសម្ព័ន្ឋ។

ភាគីជប៉ុនត្រូវបានដឹកនាំដោយលោកUENO Atsushi ឯកអគ្គ​រដ្ឋទូតជប៉ុនប្រចាំនៅកម្ពុជា។ កិច្ចប្រជុំនេះបានផ្តោតកិច្ចពិភាក្សាលើការងារភស្តុភារកម្ម ហេដ្ឋារចនាសម្ព័ន្ធដឹកជញ្ជូន និងកំពង់ផែ។ កិច្ចប្រជុំនេះមានការអញ្ជើញចូលរួមពី លោកឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ រដ្ឋមន្ត្រីក្រសួងរ៉ែ និងថាមពល រដ្ឋមន្ត្រីក្រសួងសាធារណការ និងដឹកជញ្ជូន លោកជំទាវ ជាថ្នាក់ដឹកនាំក្រសួង-ស្ថាប័នពាក់ព័ន្ធ និងអ្នកតំណាងទីភ្នាក់ងារ JICA ប្រចាំកម្ពុជា។

អង្គប្រជុំបានជជែកពិភាក្សា ដោយផ្តោតសំខាន់លើការងារធំៗចំនួន២ រួមមាន ទី១ ការពង្រីកវិសាលភាព កំពង់ផែស្វយ័តក្រុងព្រះសីហនុ ឱ្យក្លាយទៅជាកំពង់ផែប្រចាំតំបន់ (The Regional Port) និង ទី២ គម្រោងសិក្សានិងរៀបចំបង្កើត តំបន់សេដ្ឋកិច្ចពិសេសកម្ពុជា-ជប៉ុន (Cambodia-Japan Special Economic Zone) ដែលជាតំបន់សេដ្ឋកិច្ចពិសេសមួយ បង្កើតឡើងដើម្បីជំរុញលើកទឹកចិត្តបណ្តាវិនិយោគិនជប៉ុន ងាកមកវិនិយោគនៅកម្ពុជាឱ្យបានច្រើន។

អង្គប្រជុំក៏បានលើកឡើងអំពីផែនការមេ គ្រប់ជ្រុងជ្រោយស្តីពី ប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ (Comprehensive Intermodal Transport and Logistics Masterplan 2023-2033 – CIT-MP) ដែលសហការរៀបចំដោយក្រសួងសាធារណការ និងដឹកជញ្ជូន និងឧត្តមក្រុមប្រឹក្សាសេដ្ឋកិច្ចជាតិ ដោយមានការជួយគាំទ្រ ពីសំណាក់ដៃគូអភិវឌ្ឍន៍សំខាន់ៗ។

ផែនការមេមួយនេះ ត្រូវបានរៀបចំឡើងដោយការធ្វើសំយោគបញ្ចូលគ្នា នូវផែនការមេសំខាន់ៗចំនួន៧ ដើម្បីឱ្យមានលក្ខណៈស៊ីសង្វាក់ប្រទាក់ក្រឡាគ្នា ដើម្បីសម្រួលដល់ការដឹកជញ្ជូនទំនិញ-អ្នកដំណើរ-សេវា ទាំងក្របខណ្ឌក្នុងប្រទេស ក្នុងតំបន់ និងពិភពលោក៕