ដោយ: គង់ លាងហួរ
អន្តរជាតិ: នៅក្នុងសម័យបច្ចុប្បន្ននេះ បច្ចេកវិទ្យានៅលើពិភពលោកកំពុងបោះពួយឆ្ពោះទៅមុខយ៉ាងលឿនបំផុត ខណៈក្រុមហ៊ុនបច្ចេកវិទ្យាធំៗជាច្រើនបានលេចរូបរាងឡើង និងប្រកួតប្រជែងយ៉ាងខ្លាំង ជាពិសេសគឺនៅសហរដ្ឋអាមេរិក និងប្រទេសចិន។

ខាងក្រោមនេះគឺជាបញ្ជីក្រុមហ៊ុនបច្ចេកវិទ្យាលំដាប់យក្សទាំង៥ របស់ប្រទេសចិន ដែលរកប្រាក់ចំណូលបានច្រើនជាងគេបំផុត កាលពីឆ្នាំ២០២២៖

ទី១៖ ក្រុមហ៊ុន JD.com Inc
JD.com ត្រូវបានបង្កើតឡើងក្នុងឆ្នាំ១៩៩៨ និងមានទីស្នាក់ការកណ្តាលនៅទីក្រុងប៉េកាំង។ ក្រុមហ៊ុន JD.com (JD) គឺជាក្រុមហ៊ុនអ៊ីនធឺណេតដ៏ធំបំផុតរបស់ប្រទេសចិនបើគិតពីប្រាក់ចំណូល និងជាក្រុមហ៊ុនលក់រាយតាមអុីនធឺណិតធំជាងគេបំផុត។ ប្រាក់ចំណូលសុទ្ធរបស់ក្រុមហ៊ុន JD.com សម្រាប់ឆ្នាំ២០២០ មានចំនួន១១៤,៣ពាន់លានដុល្លារ កើនឡើង២៩,៣% ធៀបនឹងឆ្នាំ២០១៩។ គណនីអតិថិជនសកម្មប្រចាំឆ្នាំបានកើនឡើង៣០,៣% ដោយកើនឡើងពី៣៦២លានគណនីក្នុងឆ្នាំ២០១៩ ដល់៤៧១,៩លានគណនីក្នុងឆ្នាំ២០២០។ កាលពីឆ្នាំ២០២២ ក្រុមហ៊ុន JD.com Inc រកប្រាក់ចំណូលបានសរុបចំនួន១៥១,៧ពាន់លានដុល្លារអាមេរិក និងមានទ្រព្យសកម្មសរុបចំនួន៥៩៥ពាន់លានយ័ន។

ទី២៖ ក្រុមហ៊ុន China Mobile
ដូចទៅនឹងក្រុមហ៊ុនចិនធំៗជាច្រើនដែរ China Mobile Ltd. គឺជាក្រុមហ៊ុនរបស់រដ្ឋ ដែលត្រូវបានបង្កើតឡើងក្នុងឆ្នាំ១៩៩៧។ ក្រុមហ៊ុននេះគឺជាអ្នកផ្តល់សេវាទូរស័ព្ទជាចម្បង មិនមែនជាក្រុមហ៊ុនរចនាកម្មវិធីsoftware នោះទេ។ ក្រុមហ៊ុននេះត្រូវបានបង្កើតកាលពីឆ្នាំ ហើយប្រាក់ចំណូលប្រចាំឆ្នាំរបស់ក្រុមហ៊ុនបានឈានដល់១១១,៣ពាន់លានដុល្លារអាមេរិក ក្នុងឆ្នាំ២០២០។ កាលពីឆ្នាំ២០២២ ក្រុមហ៊ុន China Mobile រកប្រាក់ចំណូលបានសរុបចំនួន១៣៨,៨៥ពាន់លានដុល្លារអាមេរិកនិងមានទ្រព្យសកម្មសរុបចំនួន១,៩ទ្រីលានយ័ន។

ទី៣៖ ក្រុមហ៊ុន Alibaba Group Holdings Ltd.
ក្រុមហ៊ុននេះត្រូវបានបង្កើតឡើងក្នុងឆ្នាំ១៩៩៩ ដោយក្រុមសហគ្រិន ដែលដឹកនាំដោយលោក Jack Ma អតីតគ្រូបង្រៀនភាសាអង់គ្លេសមកពីទីក្រុង Hangzhou។ ក្រុមហ៊ុន Alibaba មានគោលបំណងជួយដល់អាជីវកម្មចិនខ្នាតតូច និងមធ្យមក្នុងការដាក់លក់ទំនិញរបស់ពួកគេទាំងក្នុងស្រុក និងទីផ្សារពិភពលោកនៅលើវេទិកាអនឡាញ។ កាលពីឆ្នាំ២០២២ ក្រុមហ៊ុន Alibaba Group រកប្រាក់ចំណូលបានសរុបចំនួន១៣៤,៥៦ពាន់លានដុល្លារអាមេរិក និងមានទ្រព្យសកម្មសរុបចំនួន២៦៧,៤៦ពាន់លានដុល្លារ។

ទី៤៖ ក្រុមហ៊ុន Huawei
ក្រុមហ៊ុននេះផលិតស្មាតហ្វូន នាឡិកាឆ្លាតវៃ កុំព្យូទ័រយួរដៃ និងឧបករណ៍ទូរគមនាគមន៍ ដោយត្រូវបានបង្កើតឡើងកាលពីឆ្នាំ១៩៨៧។ Huawei ជាប់ចំណាត់ថ្នាក់ជាអ្នកលក់ទូរស័ព្ទស្មាតហ្វូនធំជាងគេទីពីររបស់ពិភពលោក បន្ទាប់ពីក្រុមហ៊ុន Samsung របស់កូរ៉េខាងត្បូង។ កាលពីឆ្នាំ២០២០កន្លងទៅ ក្រុមហ៊ុន Huawei បានប្រកាសពីប្រាក់ចំណូលប្រចាំឆ្នាំរបស់ខ្លួន ចំនួន១៣៦,៧ពាន់លានដុល្លារអាមេរិក ដោយកើនឡើងប្រហែល៧១% ក្នុងរយៈពេល៥ឆ្នាំ។ ចំណែក កាលពីឆ្នាំ២០២២ ក្រុមហ៊ុន Huawei រកប្រាក់ចំណូលបានចំនួន៦៤២,៣ពាន់លានយ័ន(ប្រហែល៩៣,៥ពាន់លានដុល្លារអាមេរិក) និងមានទ្រព្យសកម្មសរុបជិត១.០៦៤ពាន់លានយ័ន។

ទី៥៖ ក្រុមហ៊ុន Tencent Holdings Ltd.
Tencent Holdings Ltd. (TCEHY) ដែលមានមូលដ្ឋាននៅទីក្រុង Shenzhen ដំណើរការជាក្រុមហ៊ុនវិនិយោគ ដែលផ្តោតលើការផ្សាយពាណិជ្ជកម្មតាមអុីនធឺណិត បច្ចេកវិទ្យាហិរញ្ញវត្ថុ (fintech) ហ្គេមអនឡាញ និងសេវាកម្មបន្ថែមតម្លៃ ដោយត្រូវបានបង្កើតឡើងក្នុងឆ្នាំ១៩៩៨។ កាលពីឆ្នាំ២០២២ ក្រុមហ៊ុន Tencent Holdings រកប្រាក់ចំណូលបានសរុបចំនួន៨២,០៣ពាន់លានដុល្លារអាមេរិក និងមានទ្រព្យសកម្មសរុបចំនួន២៣៤,៥១ពាន់លានដុល្លារ៕

លែងបារម្មណ៍ទៀតហើយ ចំពោះបញ្ហាហិរញ្ញវត្ថុ ក្នុងការទិញផ្ទះក្នុងក្តីស្រមៃរបស់លោកអ្នក បុរី ប៉េង ហួត បានសហការជាមួយធនាគារដៃគូ ទាំង 11 ដែលរួមមានធនាគារ ជេ ត្រាស់ រ៉ូយាល់ (J Trust Royal Bank) ធនាគារ ស្ថាបនា (Sathapana Bank) ធនាគារចិន (Bank of China) ធនាគារ មេយ ប៊ែង (May Bank) ធនាគារ ប្រេដ ប៊ែង  Bred Bank ធនាគារ ប៊ីអាយឌីស៊ី (BIDC Bank) ធនាគារ ស៊ិនហាន (Shinhan Bank) ធនាគារ ស៊ីអាយអិមប៊ី (CIMB Bank) ធនាគារ ហុង លីអុង (Hong Leong Bank) ធនាគារ អ៊ឹមប៊ី (MB Bank (Cambodia) Plc.) និងធនាគារ អ្វេហធីប៊ី (FTB Bank) ដើម្បីផ្តល់ជូនជម្រើសកម្ចីដ៏សម្បូរបែប ទៅកាន់អតិថិជន។

កិច្ចសហការនេះ ក្នុងគោលបំណង ​​ផ្ដល់ជូនភាពងាយស្រួលបន្ថែមទៅដល់អតិថិជនរបស់ បុរី ប៉េង ហួត ឱ្យទទួលបានគេហដ្ឋានក្នុងក្ដីប្រាថ្នា​កាន់តែឆាប់រហ័ស ជាមួយទំហំកម្ចី​​រហូត​ដល់ 100% នៃតម្លៃគេហដ្ឋាន ​ដោយអត្រាការ​ប្រាក់ទាបបំផុតចាប់ពី 4.69%ឡើងទៅ ក្នុងមួយឆ្នាំ និងរយៈពេល​រហូត​ដល់ទៅ 25ឆ្នាំ” ជាមួយធនាគារដៃគូទាំង11 ។ អតិថិជនអាចស្នើសុំ​កម្ចី​ពីធនាគារដៃគូ ​​បានដោយពុំចាំបាច់មានទ្រព្យបញ្ចាំ គ្រប់គម្រោងទាំងអស់ ក្នុងអំឡុងពេលសាងសង់ និងសាងសង់រួច ដោយអតិថិជនគ្រាន់តែចុះកិច្ចសន្យាទិញលក់ជាមួយបុរី ប៉េង ហួត ជាការសេ្រច។ ពួកយើងប្ដេជ្ញាចិត្តផ្តល់ជូននូវដំណោះស្រាយហិរញ្ញវត្ថុដែលជាតម្រូវការរបស់អតិថិជន​ ក្នុងការទទួលបានការផ្ទះដ៏កក់ក្តៅនិង មានផាសុកភាព ជាមួយជម្រើសបង់ប្រាក់កាន់តែច្រើន និងកាន់តែងាយស្រួលជាងមុន”។

អតិថិជន អាចធ្វើការស្នើសុំឥណទានគេហដ្ឋាន​ ពីធនាគារដៃគូទាំង11 ដើម្បីទទួលបានការផ្ដល់ជូននៅទំហំឥណទានរួមទាំងអត្រាការប្រាក់ដ៏ពិសេសមិនធ្លាប់មាន ជាមួយនឹងការអនុម័តយ៉ាងឆាប់រហ័ស ដើម្បីទទួលបានគេហដ្ឋានក្នុងក្តីស្រមៃរបស់លោកអ្នក។

សម្រាប់ព័ត៌មានបន្ថែម សូមទាក់ទងទូរសព្ទលេខ 015 90 6789 , Telegram: Borey Peng Huoth ឬ ចូលទៅកាន់ទំព័រហ្វេសប៊ុក www.facebook.com/boreypenghuoth ឬអាចអញ្ជើញមកសាកសួរព័ត៌មានពីគ្រប់ការិយាល័យលក់ ដែលមានទីតាំងក្បែរលោកអ្នក រៀងរាល់ម៉ោងធ្វើការ៕

តែម សុខុម

សេអ៊ូល: ប្រាក់ចំណូលពន្ធរបស់ប្រទេសកូរ៉េខាងត្បូង បានធ្លាក់ចុះ៣៩,០៧ពាន់លានដុល្លារអាមេរិក អំឡុងពេល១០ខែដើមឆ្នាំ២០២៣ ដោយសារការធ្លាក់ចុះសកម្មភាពអាជីវកម្ម និងការដាំក្បាលចុះរយៈពេលវែងក្នុងទីផ្សារអចលនទ្រព្យ។

ក្រសួងសេដ្ឋកិច្ច និងហិរញ្ញវត្ថុកូរ៉េខាងត្បូង បានបញ្ជាក់កាលពីថ្ងៃព្រហស្បតិ៍ ទី៣០ ខែវិច្ឆិកា ថា ប្រាក់ចំណូលពន្ធសរុបដែលប្រមូលបានមានចំនួន២៣៥,៥ពាន់លានដុល្លារអាមេរិក អំឡូងពីខែមករា ដល់ខែតុលា ដោយធ្លាក់ចុះ១៤,១៧% បើធៀបនឹងចំណូលពន្ធ២៧៤,២ពាន់លានដុល្លារអាមេរិក ដែលប្រមូលបានកាលពីឆ្នាំមុន។ការធ្លាក់ចុះចំណូលពន្ធក្នុងឆ្នាំនេះគឺបណ្ដាលមកពីការធ្លាក់ចុះពន្ធអាជីវកម្មដែលប្រមូលបាន ស្របពេលប្រាក់ចំណូលរបស់ក្រុមហ៊ុននានាធ្លាក់ចុះ។

ការប្រមូលពន្ធក្រុមហ៊ុនក្នុងរយៈពេល១០ខែដើមឆ្នាំនេះទទួលបានក្នុងចំនួន៥៨,៧ពាន់លានដុល្លារអាមេរិក ដោយធ្លាក់ចុះ២៣,៧% បើធៀបនឹងឆ្នាំមុន។

ចំនួនប្រាក់ចំណូលពន្ធដែលប្រមូលបានក៏បានធ្លាក់ចុះ១៣,៥%ផងដែរមកនៅត្រឹម៧២,៥ពាន់លានដុល្លារអាមេរិក ដោយសារការដាំក្បាលចុះក្នុងទីផ្សារអចលនទ្រព្យ៕ Korea Times ៕

ដោយ: គង់ លាងហួរ

សេអ៊ូល: យោងតាមទិន្នន័យរបស់រដ្ឋាភិបាលកូរ៉េ បានបង្ហាញថា ជនបរទេសជាង៨៥.០០០នាក់ បានកាន់កាប់ផ្ទះនៅប្រទេសកូរ៉េខាងត្បូង ដោយជនជាតិចិន បានកាន់កាប់ជាងពាក់កណ្តាល នៃចំនួនផ្ទះសរុប ក្នុងចំណោមជនបរទេសផ្សេងទៀត។

យោងតាមទិន្នន័យដែលចងក្រងឡើង ដោយក្រសួងដែនដី ហេដ្ឋារចនាសម្ព័ន្ធ និងដឹកជញ្ជូនបានឱ្យដឹងថា ជនជាតិបរទេសសរុបចំនួន៨៥.៣៥៨នាក់ បានកាន់កាប់ផ្ទះនៅប្រទេសកូរ៉េខាងត្បូង គិតត្រឹមដំណាច់ខែមិថុនា ឆ្នាំ២០២៣នេះ ដោយកើនឡើង៤,៦ភាគរយធៀបនឹងរយៈពេលដូចគ្នា កាលពីឆ្នាំមុន។តាមទិន្នន័យពីប្រភពខាងលើបានបង្ហាញទៀតថា ជិត៩៣,៥ភាគរយនៃជនបរទេសសរុប មានកម្មសិទ្ធិលើផ្ទះតែមួយគត់នៅប្រទេសកូរ៉េខាងត្បូង ខណៈដែល៥,២ភាគរយ នៃជនបរទេសកាន់កាប់ផ្ទះចំនួន២។

បណ្តាជនបរទេសទាំងនោះ បានកាន់កាប់ផ្ទះសរុបចំនួន៨៧.២២៣ខ្នង ដែលស្មើនឹង០,៤៦ភាគរយ នៃចំនួនផ្ទះទាំងអស់នៅក្នុងប្រទេសកូរ៉េខាងត្បូង។

ក្នុងចំណោមផ្ទះសរុបចំនួន៨៧.២២៣ខ្នង ក្នុងនោះ ជនជាតិចិនមានផ្ទះចំនួន៤៧.៣២៧ខ្នង ឬ៥៤,៣ភាគរយ ខណៈដែលជនជាតិអាមេរិកមានផ្ទះចំនួន២០.៤៦៩ខ្នង ឬ២៣,៥ភាគរយ ជនជាតិកាណាដាមានផ្ទះចំនួន៥.៩៥៩ខ្នង ឬ៦,៨ភាគរយ និងជនជាតិតៃវ៉ាន់មានផ្ទះចំនួន៣.២៨៦ខ្នង ឬ៣,៨ភាគរយ។

ជាង៧៣ភាគរយនៃផ្ទះសរុប ដែលកាន់កាប់ដោយជនបរទេសមានទីតាំង នៅក្នុងតំបន់ទីក្រុងសេអ៊ូល ដោយក្នុងនោះ៣៨ភាគរយនៅក្នុងខេត្ត Gyeonggi ២៥,៦ភាគរយនៅទីក្រុងសេអ៊ូល និង៩,៧ភាគរយនៅទីក្រុងអ៊ីនឈុន។

ក្រសួង​ដែនដី​កូរ៉េខាងត្បូងបាន​អះអាងថា ខ្លួន​នឹង​ពិនិត្យ​ឲ្យ​បាន​ហ្មត់ចត់ ​លើ​ការ​ជួញដូរ​អចលនទ្រព្យ​របស់​ជនបរទេស ​ក្នុង​ប្រទេស​របស់ខ្លួន ដើម្បី​បង្ក្រាប​ករណី​ទិញដីធ្លីទុកលក់ចំណេញ៕Yonhap៕

ដោយ: គង់ លាងហួរ
ភ្នំពេញ: យោងតាមក្រុមមន្ត្រីបានឱ្យដឹងកាលពីថ្ងៃព្រហស្បតិ៍ថា គម្រោងស្ថានីយ៍ទំនប់វារីអគ្គិសនីស្ទឹងតាតៃលើ ដែលវិនិយោគដោយក្រុមហ៊ុនចិន ដែលមានអានុភាពសរុបចំនួន១៥០មេហ្គាវ៉ាត់ (MWs) សម្រេចបានការសាងសង់៣១,៥ភាគរយ គិតមកទល់ពេលនេះ។

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោក Wang Wentian ឯកអគ្គរដ្ឋទូតចិនប្រចាំនៅកម្ពុជា បានអញ្ជើញជាអធិបតី ក្នុងពិធីបិទស្ទឹង សាងសង់ស្ថានីយ៍ទំនប់វារីអគ្គិសនីស្ទឹងតាតៃលើ ដែលស្ថិតក្នុងស្រុកថ្មបែង ខេត្តកោះកុង ដោយមានអ្នកចូលរួមជាង១ពាន់នាក់។ថ្លែងក្នុងពិធីនោះ សម្តេចធិបតី ហ៊ុន ម៉ាណែត បានមានប្រសាសន៍ថា គម្រោងសាងសង់ទំនប់វារីអគ្គិសនីស្ទឹងតាតៃលើ ដែលវិនិយោគដោយក្រុមហ៊ុន China National Heavy Machinery Corporation (CHMC) គឺជាកិច្ចសន្យាសម្បទាននៃការសាងសង់-ដំណើរការ-ផ្ទេរ (BOT) រយៈពេល៣៩ឆ្នាំ ដែលក្នុងនោះ ៤ឆ្នាំសម្រាប់ការសាងសង់ និង៣៥ឆ្នាំសម្រាប់ប្រតិបត្តិការ។

លោក កែវ រតនៈ រដ្ឋមន្ត្រីក្រសួងរ៉ែ និងថាមពលកម្ពុជា បានមានប្រសាសន៍ឱ្យដឹងថា ការសាងសង់ស្ថានីយ៍ទំនប់វារីអគ្គិសនីស្ទឹងតាតៃលើនៅកម្ពុជា បានចាប់ផ្តើមតាំងពីខែធ្នូ ឆ្នាំ២០២២ ហើយមកដល់បច្ចុប្បន្ន សម្រេចបានការសាងសង់៣១,៥ ភាគរយនៃគម្រោងទាំងមូល។

លោករដ្ឋមន្ត្រីបានមានប្រសាសន៍បន្តថា គិតរហូតមកដល់ពេលនេះ ក្រុមហ៊ុន CHMC បានបញ្ចប់ការសាងសង់ផ្លូវឆ្ពោះទៅការដ្ឋានសាងសង់ ស្ពាន អគាររដ្ឋបាល និងហេដ្ឋារចនាសម្ព័ន្ធចាំបាច់ផ្សេងៗទៀត។

សម្តេចធិបតី ហ៊ុន ម៉ាណែត បានបន្ថែមថា នៅពេលដែលដាក់ឱ្យដំណើរការពេញលេញ ស្ថានីយ៍ទំនប់វារីអគ្គិសនីនេះ ត្រូវបានគេរំពឹងថា នឹងអាចផលិតថាមពលអគ្គិសនីបានចំនួន៥២៧លានគីឡូវ៉ាត់ម៉ោងក្នុងមួយឆ្នាំ ហើយថាមពលអគ្គិសនីដែលផលិតបាន នឹងលក់ទៅឱ្យអគ្គិសនីកម្ពុជា(EDC)៕Xinhua៕

ដោយ: គង់ លាងហួរ

ភ្នំពេញ: ប្រទេសឥណ្ឌា ដែលជាមហាអំណាចសេដ្ឋកិច្ចទី៥របស់ពិភពលោក មានបំណងពង្រឹងការចូលរួមរបស់ខ្លួន ជាមួយប្រ ទេសកម្ពុជា ខណៈដំណើរទស្សនកិច្ចនាពេលថ្មីៗនេះ ដោយគណៈប្រតិភូធុរកិច្ចឥណ្ឌា ដែលមានសមាជិកចំនួន៥០រូប អាចបន្តដំណើរទៅមុខទៀតក្នុងទិសដៅនេះ។

យោងតាមក្រុមអ្នកជំនាញបានឱ្យដឹងថា ភាពជាដៃគូសេដ្ឋកិច្ចដ៏រឹងមាំរវាងប្រទេសទាំងពីរ នឹងផ្តល់អត្ថប្រយោជន៍ ដល់ប្រទេសទាំងពីរ ជាពិសេសប្រទេសកម្ពុជា ក្នុងវិស័យឧស្សាហកម្មបច្ចេកវិទ្យាខ្ពស់/fintech និងការលើកកម្ពស់ជំនាញ។

នៅក្នុងពេលថ្លែងទៅកាន់គណៈប្រតិភូ នៅថ្ងៃចុងក្រោយនៃដំណើរទស្សនកិច្ចកាលពីថ្ងៃសុក្រ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោកអ៊ិត សំហេង បានគូសបញ្ជាក់ពីតម្រូវការសម្រា​ប់ប្រទេសទាំងពីរ ក្នុងការពង្រឹងកិច្ចសហប្រតិបត្តិការបន្ថែមទៀត។

លោកបានមានប្រសាសន៍ថា “ប្រទេសឥណ្ឌា គឺជាប្រទេសនាំមុខគេក្នុងវិស័យបច្ចេកវិទ្យាព័ត៌មាន និងការអភិវឌ្ឍន៍ជំនាញ ហើយកម្ពុជាអាចប្រើប្រាស់ជំនាញ របស់ឥណ្ឌានៅក្នុងវិស័យនេះ”។

លោក អ៊ិត សំហេង បានកត់សម្គាល់ថា “សន្តិភាពនៅកម្ពុជា គឺជាកត្តាសំខាន់ ក្នុងការរីកចម្រើនរបស់ខ្លួន ក្នុងរយៈពេលប៉ុន្មានទសវត្ស​រ៍ចុងក្រោយនេះ។  គួបផ្សំនឹងការអនុវត្តការអភិវឌ្ឍន៍ ប្រកបដោយនិរន្តរភាព បរិយាកាសធុរកិច្ចប្រកបដោយសន្តិភាព គឺជាការទាក់ទាញ​ពិតប្រាកដ សម្រាប់អ្នកវិនិយោគបរទេសនៅកម្ពុជា”។

ដំណើរទស្សនកិច្ចរយៈពេលបីថ្ងៃ របស់គណៈប្រតិភូឥណ្ឌាចាប់ពីថ្ងៃទី៥ ដល់ថ្ងៃទី៧ ខែមេសាត្រូវបានរៀបចំឡើង ដោយស្ថានកុង​ស៊ុលកិត្តិយសរបស់កម្ពុជា នៅទីក្រុង Bangalore ប្រចាំរដ្ឋឥណ្ឌាខាងត្បូង រួមជាមួយសភាពាណិជ្ជកម្មឥណ្ឌានៅកម្ពុជា (InCham)។

ការចូលរួមនេះ ក៏ត្រូវបានគាំទ្រដោយស្ថានទូតឥណ្ឌា ប្រចាំនៅកម្ពុជា ស្ថានទូតកម្ពុជាប្រចាំប្រទេសឥណ្ឌា និងសភាពាណិជ្ជកម្មកម្ពុជា (CCC)ផងដែរ។

លោក Karthik Tallam ស្ថានកុងស៊ុលកិត្តិយសរបស់កម្ពុជានៅទីក្រុង Bangalore ប្រចាំរដ្ឋឥណ្ឌាខាងត្បូងបានអះអាងថា “ឥណ្ឌាគឺជាប្រទេសមួយ ក្នុងចំណោមប្រទេសដំបូងគេ ដែលទទួលស្គាល់កម្ពុជា ហើយទំនាក់ទំនងនេះបានរីកចម្រើន ក្នុងរយៈពេលប៉ុន្មានឆ្នាំកន្លងមកនេះ”។

លោក​ក៏​បាន​បង្ហាញ​ដែរ​ថា ការ​ពិភាក្សា​កំពុង​ដំណើរការ​ទៅ​មុខ​អំពី​ដំណើរ​ទស្សនកិច្ច ​របស់​គណៈប្រតិភូ​សហគ្រិន​ស្ត្រី​ឥណ្ឌា ​មក​កម្ពុជា​ក្នុង​ខែកក្កដា​ខាងមុខនេះ។

យោងតាមលោក Karthik បានឱ្យដឹងថា វិនិយោគិនឥណ្ឌាមួយចំនួនចាប់អារម្មណ៍ជាពិសេស លើឱកាសវិនិយោគក្នុងវិស័យបច្ចេកវិទ្យាខ្ពស់ ក៏ដូចជា វិស័យអភិវឌ្ឍន៍ជំនាញនៅកម្ពុជា។

លោកបានបន្តទៀតថា “នឹងមានការចូលរួមតាមវិស័យកាន់តែច្រើននាពេលអនាគត ហើយយើងក៏ជឿជាក់ផងដែរថា ការចាប់ផ្តើមជើងហោះហើរត្រង់ គឺមានសារៈសំខាន់ក្នុងការពង្រឹង ទំនាក់ទំនងពាណិជ្ជកម្ម និងទេសចរណ៍រវាងប្រទេសទាំងពីរ”។

លោក Sandeep Majumdar ប្រធានសភាពាណិជ្ជកម្មឥណ្ឌានៅកម្ពុជា InCham បានអះអាងថា“យើងជឿជាក់ថា ដំណើរទស្សនៈកិច្ចរបស់គណៈប្រតិភូឥណ្ឌា អាចបង្កើនការយល់ដឹងអំពីឱកាសសម្រាប់ការវិនិយោគនៅកម្ពុជា”។ លោកបន្តថា “គណៈប្រតិភូ​អាច​ជួប​ជាមួយ​អ្នកជំនួញ​កំពូលៗ ​មួយចំនួន​ក្នុង​ប្រទេស​កម្ពុជា ហើយ​ថែមទាំង​អាច​ជួប​មន្ត្រី​កំពូលៗ និង​អ្នកធ្វើ​ការសម្រេចចិត្ត​ផងដែរ​”។

ទន្ទឹមនឹងនេះ លោកបានសង្កត់ធ្ងន់លើសារៈសំខាន់ នៃការចាប់ផ្តើមជើងហោះហើរត្រង់រវាងប្រទេសទាំងពីរ។

លោក Sandeep បានកត់សម្គាល់ថា ការហោះហើរត្រង់អាចដើរបានឆ្ងាយ ក្នុងការពង្រឹងទំនាក់ទំនងពាណិជ្ជកម្ម និងទេសចរណ៍ ហើយសភាពាណិជ្ជកម្មឥណ្ឌានៅកម្ពុជា នឹងបន្តចូលរួមជាមួយកុង​ស៊ុល ដើម្បីផ្សព្វផ្សាយកម្ពុជានៅក្នុងប្រទេសឥណ្ឌា។

ជាមួយគ្នានេះ លោក Anthony Galliano នាយកប្រតិបត្តិនៃក្រុមហ៊ុន Cabodian Investment Management Holdings ដែលជាអ្នកជឿជាក់យ៉ាងមុតមាំ លើការរំពឹងទុករបស់កម្ពុជា ក្នុងការក្លាយជាខ្លាអាស៊ីនៃសតវត្សរ៍ទី២១ បានប្រាប់គណៈប្រតិភូឥណ្ឌា ដែលកំពុងបំពេញទស្សនកិច្ចថា កត្តាជាច្រើនធ្វើឱ្យកម្ពុជា ក្លាយជាគោលដៅវិនិយោគដ៏ល្អ។

លោក Anthony បានអះអាងថា កំណើនសេដ្ឋកិច្ចកម្ពុជាមានអត្រាប្រចាំឆ្នាំជាមធ្យម៧,៧ភាគរយ នៅចន្លោះឆ្នាំ១៩៩៨ និង២០១៩ ដែលជាកំណើនលឿន បំផុតមួយនៅក្នុងពិភពលោក។

ប្រទេសកម្ពុជា ក៏បានងើបចេញពីវិបត្តិជំងឺកូវីដ ជាមួយនឹងភាពរឹងមាំជាថ្មី និងភាពធន់ ហើយអត្រាកំណើនសេដ្ឋកិច្ច អាចឈានដល់ជិត៦ភាគរយនៅឆ្នាំនេះ នេះបើយោងតាមការព្យាករណ៍មួយចំនួនធៀបនឹង៥,១ភាគរយនៅឆ្នាំ២០២២។

លោក Anthony ក៏​បាន​ចង្អុល​បង្ហាញ​ថា កម្ពុជា​ជា​ប្រទេស​មួយ​ក្នុង​ចំណោម​ប្រទេស​មួយ​ចំនួន ​ក្នុង​តំបន់​ដែល​អនុញ្ញាត​ឱ្យ​មាន​ភាព​ជា​ម្ចាស់​កម្មសិទ្ធ​ពី​បរទេស ចំនួន១០០ភាគរយ ​សម្រាប់​អ្នក​វិនិយោគ។

លើកលែងតែប្រភេទមួយចំនួនដូចជា (ការផលិតបារី ការផលិតភាពយន្ត ការកិនស្រូវ ការជីកយករ៉ែត្បូង និងកែច្នៃ) អ្នកវិនិយោគបរទេស អាចកាន់កាប់ក្រុមហ៊ុនទាំងស្រុង នៅក្នុងប្រទេសកម្ពុជា ហើយមិនមានការរឹតបន្តឹង លើសញ្ជាតិរបស់នាយក ឬម្ចាស់ភាគហ៊ុន និងគ្មានការរឹតបន្តឹង លើការធ្វើពាណិជ្ជកម្មនោះទេ។ ដើម្បីកាន់កាប់ដីធ្លីបាន៥១ភាគរយ នៃភាគហ៊ុនរបស់ក្រុមហ៊ុន ត្រូវកាន់កាប់ដោយពលរដ្ឋកម្ពុជា។

កម្រិតខ្ពស់នៃប្រាក់ដុល្លាររបស់កម្ពុជា គឺជាការទាក់ទាញមួយទៀតសម្រាប់អ្នកវិនិយោគ។ លោក Anthony បានចង្អុលបង្ហាញថា កត្តានេះលុបបំបាត់ហានិភ័យនៃការកែតម្រូវ អត្រាប្តូរប្រាក់យ៉ាងមុតស្រួច និងកាត់បន្ថយលំហូរចេញនៃមូលធន។

លោកក៏បានបន្ថែមថា ក្រុមហ៊ុនបរទេស ដែលត្រូវបានចុះបញ្ជីជាគម្រោងវិនិយោគ ដែលមានលក្ខណៈសម្បត្តិគ្រប់គ្រាន់ (QIPs) មានសិទ្ធិទទួលបាន ការលើកលែងពន្ធបន្ថែម ឬរំលោះពន្ធពិសេស។

យោងតាមលោក Anthony មនុស្សម្នាក់អាចចាប់ផ្តើមក្រុមហ៊ុនឯកជនមានកំណត់ក្នុងប្រទេសកម្ពុជា ដោយចំណាយត្រឹមតែ១.០០០ដុល្លារប៉ុណ្ណោះ។

អត្ថប្រយោជន៍ដ៏អស្ចារ្យមួយទៀតគឺចំនួន ប្រជាជនវ័យក្មេងរបស់ប្រទេសកម្ពុជា  ដែលធានាបាននូវកម្លាំងពលកម្ម គ្រប់គ្រាន់សម្រាប់កំណើននាពេលអនាគត។

ក្នុងចំណោមប្រជាជនកម្ពុជា ចំនួន១៧,៣លាននាក់ ក្នុងនោះប្រជាជនប្រហែលពាក់កណ្តាល មានអាយុក្រោម២៥ឆ្នាំ។ ចំណែកអត្រាភាពអត់ការងារធ្វើ នៅក្នុងប្រទេសមានកម្រិត៦ភាគរយ ដែលជាអត្រាមួយទាបបំផុតនៅលើពិភពលោក ហើយកម្ពុជាក៏ជាប្រទេសមួយក្នុងចំណោមប្រទេស ដែលមានសុវត្ថិភាពបំផុត ក្នុងការរស់នៅផងដែរ។

លោកបានកត់សម្គាល់បន្ថែមទៀតថា ទិន្នផលឧស្សាហកម្មរបស់កម្ពុជា ធ្លាប់ត្រូវបានគេរំពឹងទុកថា នឹងកើនឡើង៨,១ភាគរយនៅឆ្នាំ២០២២ និង៩,១ភាគរយនៅឆ្នាំ២០២៣នេះ។

ច្បាប់ថ្មីស្តីពីការវិនិយោគ ដែលត្រូវបានអនុម័តដោយប្រទេសក្នុងខែតុលា ឆ្នាំ២០២១ កំពុងជួយទាក់ទាញការវិនិយោគផ្ទាល់ ក្នុងស្រុក និងពីបរទេសបន្ថែមទៀតចូលទៅក្នុងការផលិត។

លោក Anthony បានកត់សម្គាល់ថា ច្បាប់នេះផ្តល់នូវក្របខ័ណ្ឌច្បាប់ដ៏ទូលំទូលាយ តម្លាភាព និងអាចព្យាករណ៍បាន ដើម្បីធ្វើឱ្យប្រទេសកម្ពុជា ក្លាយជាគោលដៅវិនិយោគដ៏ទាក់ទាញបន្ថែមទៀត។

លោកក៏បានទាញចំណាប់អារម្មណ៍ ចំពោះវណ្ណៈកណ្តាលដែលកំពុងកើនឡើង នៅក្នុងប្រទេសកម្ពុជាផងដែរ ដោយបង្ហាញថា វាធានានូវកំណើននៃតម្រូវការ ក្នុងវិស័យអចលនទ្រព្យ និងសេវាកម្ម។

ខណៈ​និយាយ​អំពី​អគារ​ខ្ពស់ៗ និង​ផ្សារ​ទំនើប​ជា​ច្រើន​ ដែល​កំពុ​ង​ដុះដាលពេញ​ទីក្រុង លោក Anthony បាន​បញ្ជាក់ថា“ពេល​ខ្ញុំ​មក​ទី​នេះ មាន​អគារ​ខ្ពស់​មួយ​ក្នុង​ទីក្រុង​ភ្នំពេញ និង​ផ្សារ​ទំនើប​តូច​មួយ​ប៉ុណ្ណោះ។

លោក Anthony បានចង្អុលបង្ហាញ ខណៈលើកទឹកចិត្តដល់អ្នកវិនិយោគឥណ្ឌា ដែលមានសក្តានុពលឱ្យចូលរួម ជាមួយកម្ពុជាថា “មានឱកាសជាច្រើនក្នុងវិស័យសេវាកម្ម ដែលកំពុងរីកចម្រើននៅក្នុងប្រទេសកម្ពុជា ហើយវិស័យធានារ៉ាប់រង និងធនាគារកំពុងមានការរីកចម្រើនយ៉ាងឆាប់រហ័ស”។

លោក ស៊ាង សុបញ្ញា ប្រធានសមាគមសហគ្រិនវ័យក្មេងកម្ពុជា (YEAC) មានប្រសាសន៍ថា កម្ពុជានឹងក្លាយជាប្រទេស ដែលមានចំណូលមធ្យមកម្រិតខ្ពស់នាពេលឆាប់ៗនេះ។

លោក​បាន​កត់​សម្គាល់​ថា​ “បរិយាកាស​ធុរកិច្ច​នៅ​កម្ពុជា ​គឺ​ស័ក្តិសម​ខ្លាំង ​ក្នុង​ការ​ទាក់​ទាញ​ការ​វិនិយោគ​ពី​បរទេស ហើយ​យើង​ក៏​កំពុង​តាម​ទាន់​ប្រទេស​ជិត​ខាង​ដូចជាថៃ និង​វៀតណាម​ផង​ដែរ”។

យោងតាម ​​ស៊ាង សុបញ្ញា បានឱ្យដឹងទៀតថា អ្នកធុរកិច្ចឥណ្ឌាមានឱកាសល្អ ក្នុងការវិនិយោគលើវិស័យ បច្ចេកវិទ្យានៅកម្ពុជា ការទូទាត់តាមឌីជីថលគឺជាវិស័យមួយ ដែលប្រទេសឥណ្ឌាអាចជួយឱ្យរីកចម្រើន ខណៈយើងក៏ត្រូវការវិទ្យាស្ថាន បណ្តុះបណ្តាលជំនាញបន្ថែមទៀតផងដែរ។

លោកបានបន្ថែមថា យុវជនកម្ពុជារហូតដល់១,៥លាននាក់ នឹងទទួលបានការបណ្តុះបណ្តាល ជំនាញចន្លោះឆ្នាំ២០២៣និង២០២៥​។ ក្រុមហ៊ុននានាក៏ត្រូវបានផ្តល់ការលើកទឹកចិត្ត ផ្នែកពន្ធផងដែរ សម្រាប់ការបង្កើនជំនាញរបស់បុគ្គលិក។

លោក​បាន​កត់​សម្គាល់​ថា​ “មួយ​ផ្នែក​ធំ​នៃ​កម្លាំង​ពលកម្ម​កម្ពុជា​ឥឡូវ​អាច​និយាយ​ភាសា​អង់គ្លេស​បាន ហើយ​ពួកគេ​ភាគ​ច្រើន​ក៏​និយា​យ​ភាសា​ចិន​បានដែរ”។លោក​បញ្ជាក់ថា​ “នៅ​កម្ពុជា​មិន​មាន​ឧបសគ្គ​ផ្នែក​ភាសា​សម្រាប់​ជនបរទេស​ទេ ប្រជាជនកម្ពុជាក៏រួសរាយរាក់ទាក់ណាស់។  ខ្ញុំស្វាគមន៍សហគ្រិនឥណ្ឌា ជាពិសេសសហគ្រិនវ័យក្មេងមកកាន់កម្ពុជា ហើយអង្គការ​របស់​ខ្ញុំ​ត្រៀម​ខ្លួន​ជា​ស្រេច ​ក្នុង​ការ​ផ្តល់​ការ​គាំទ្រ​ទាំង​អស់​ដល់​ពួក​គេ”។

ចំណែកលោក ឡោ វិចិត្រ អនុប្រធានសមាគមពាណិជ្ជកម្មចិនកម្ពុជា (CCCA) បានមានប្រសាសន៍ថា កម្ពុជាចាំបាច់ត្រូវចូលរួមបន្ថែមទៀតជាមួយឥណ្ឌា។

លោក​បាន​បន្ត​ថា​ “ប្រទេស​ឥណ្ឌា​គឺជា​ប្រទេស ​ដែល​មាន​សេដ្ឋកិច្ច​លូតលាស់​លឿន​បំផុត​ក្នុង​ពិភពលោក ហើយ​កម្ពុជា​អាច​ចូល​ក្នុង​ទីផ្សារ​នេះ​។  ប្រជាជនឥណ្ឌា មិនត្រឹមតែអាចវិនិយោគ នៅក្នុងប្រទេ​សកម្ពុជាប៉ុណ្ណោះទេ ប៉ុន្តែពួកគេក៏អាចទិញទំនិញ កាន់តែច្រើនពីកម្ពុជាផងដែរ”។

ទន្ទឹមនឹងនោះ លោក ឡោ វិចិត្រ ក៏បានក្រើនរំលឹកអ្នកវិនិយោគឥណ្ឌាអំពីច្បាប់ពន្ធដារថ្មីរបស់កម្ពុជា។  លោក​បញ្ជាក់ថា​“ច្បាប់​ថ្មី​នឹង​ផ្តល់​ការ​លើក​ទឹក​ចិត្ត​បន្ថែម​ទៀត ហើយ​នឹង​មានភាព អាចព្យាករ​ណ៍ទុកបានកាន់​តែ​ច្រើន​ រួម​ជាមួយ​នឹង​ច្បាប់​វិនិយោគ វា​អាច​ជួយ​ទាក់ទាញ​ដល់ការ​វិនិយោគ ​ពី​បរទេស​កាន់​តែ​ច្រើន​មក​កម្ពុជា”។

លោក ឡោ វិចិត្រ បានកត់សម្គាល់ថា ប្រទេសកម្ពុជាកំពុងឆ្ពោះទៅរកឧស្សាហកម្មបច្ចេកវិទ្យាខ្ពស់ និងគំនិតផ្តួចផ្តើមសេដ្ឋកិច្ចបៃតង ហើយអ្នកធុរកិច្ចឥណ្ឌា អាចស្វែងរកឱកាសវិនិយោគ ក្នុងវិស័យទាំងនេះ។

លោកបានចង្អុលបង្ហាញថា “ដោយសារប្រទេសឥណ្ឌាជាប្រទេ​ស ដែលមានក្រុមហ៊ុនទូរគមនាគមន៍ ឱសថ និងបច្ចេកវិទ្យាឈានមុខគេមួយចំនួន ភាពជាដៃគូដ៏រឹងមាំជាមួយប្រទេសនេះ អាចជួយកម្ពុជាក្នុងការពង្រឹងឧស្សាហកម្ម ផ្អែកលើចំណេះដឹងរបស់ខ្លួន”។

កម្ពុជា និងឥណ្ឌាបានពន្លឿនការងារ បច្ចេកទេសផ្ទៃក្នុងរបស់ខ្លួន ដើម្បីបង្កើតការចរចា សម្រាប់កិច្ចព្រមព្រៀងពាណិជ្ជកម្មសេរីទ្វេរភាគី។  កិច្ចព្រមព្រៀង​បែបនេះ​ នឹង​ជួយ​ប្រទេស​ទាំងពីរ​ ក្នុងការ​នាំមក​នូវ​ផលិតផល និង​សេវាកម្ម​បន្ថែមទៀត​ ក្រោម​ពាណិជ្ជកម្ម​គ្មាន​ពន្ធ។

លោកសាស្ត្រាចារ្យ Ujjwal Anu Chowdhury នាយកប្រតិបត្តិនៃសាកលវិទ្យាល័យអន្តរជាតិអនឡាញ ដែលមានមូលដ្ឋាននៅទីក្រុងឌូបៃ ដែលជាវាគ្មិនម្នាក់ នៅក្នុងព្រឹត្តិការណ៍នេះ បានលើកទឹកចិត្តអ្នកវិនិយោគ ឱ្យពិនិត្យមើលតម្រូវការ ដែលកំពុងកើនឡើងសម្រាប់ការអប់រំឧត្តមសិក្សា ប្រកបដោយគុណភាពផងដែរ។

លោកបានបន្តថា ទីផ្សារអប់រំពិភពលោកមានតម្លៃ៥,៩ពាន់ពាន់លានដុល្លារក្នុងឆ្នាំ២០២០ ហើយនឹងឈានដល់១០,២ពាន់ពាន់លានដុល្លារនៅឆ្នាំ២០២៦។ ទំហំទីផ្សារអប់រំអាស៊ីប៉ាស៊ីហ្វិក មានតម្លៃ១,០៩ពាន់ពាន់លានដុល្លារក្នុងឆ្នាំ២០២០ ហើយត្រូវបានគេរំពឹងថា នឹងកើនឡើងដល់២,០៥ពាន់ពាន់លានដុល្លារនៅឆ្នាំ២០២៦។

យោងតាមសាស្រ្តាចារ្យ Ujjwal តំបន់អាស៊ីដែលជាកន្លែងសម្រាប់មនុស្សច្រើន ជាងទីតាំងផ្សេងទៀត នៅតែត្រូវការការវិនិយោគបន្ថែមទៀត នៅក្នុងការអប់រំឧត្តមសិក្សា។ តាមគំនិតរបស់លោក ប្រទេសកម្ពុជាអាចក្លាយជាមជ្ឈមណ្ឌលសម្រាប់ឧត្តមសិក្សានៅអាស៊ីអាគ្នេយ៍ ដែលមានដីគ្រប់គ្រាន់ ងាយស្រួលចូល និងក្លាយជាចំណុចក្តៅនៃទេសចរណ៍ពិភពលោក។

ទន្ទឹមនឹងនោះ ប្រតិភូមួយចំនួនបានលើកឡើងច្រើន អំពីបរិយា​កាសធុរកិច្ច ដែលកំពុងកើតមាននៅកម្ពុជា។លោក Anil Joseph Pinto មន្ត្រីអត្រានុកូលដ្ឋាននៃសាកលវិទ្យាល័យ Christ Deemed នៅទីក្រុង Bangalore បានបញ្ជាក់ថា ដំណើរទស្សនកិច្ចលើកដំបូងរបស់គាត់ មកកាន់ប្រទេសកម្ពុជាគឺជាបទពិសោធន៍វិជ្ជមានសម្រាប់លោក៕

តែម សុខុម

តូក្យូ: ក្រុមហ៊ុនជប៉ុន Honda នឹងបោះទុនវិនិយោគដល់ទៅ៣,៤ពាន់លានដុល្លារអាមេរិក លើអាជីវកម្មផលិតម៉ូតូអគ្គិសនីនៅត្រឹមឆ្នាំ២០៣០។ នេះបើយោងតាមសារព័ត៌មាន Japan Times ចុះផ្សាយកាលពីថ្ងៃព្រហស្បតិ៍ ទី៣០ ខែវិច្ឆិកា។

ក្រុមហ៊ុននេះបានបង្កើនគោលដៅលក់ម៉ូតូអគ្គិសនីប្រចាំឆ្នាំរបស់ខ្លួនឱ្យឈានដល់៤លានគ្រឿងសម្រាប់ឆ្នាំនោះ ដោយកើនឡើងពីគោលដៅមុនដែលមានចំនួន៣,៥លានគ្រឿង។ក្រុមហ៊ុននេះបានចេញសេចក្ដីថ្លែងការណ៍កាលពីថ្ងៃពុធ ទី២៩ ខែវិច្ឆិកា ថា ខ្លួនគ្រោងបញ្ចេញម៉ូតូអគ្គិសនីថ្មីចំនួន៣០ម៉ូឌែលទូទាំងពិភពលោកនៅត្រឹមឆ្នាំ២០៣០ ហើយនឹងចាប់ផ្ដើមដំណើរការរោងចក្រផលិតម៉ូតូអគ្គិសនីទូទាំងពិភពលោកចាប់ពីឆ្នាំ២០២៧។

ក្រុមហ៊ុននេះនិយាយទៀតថា បច្ចេកវិទ្យាថ្មីនឹងជួយកាត់បន្ថយរយៈពេលនៃខ្សែសង្វាក់ដំឡើងបានប្រមាណ៤០%។ក្រុមហ៊ុននេះគូសបញ្ជាក់ថា ប្រទេសឥណ្ឌា និងតំបន់អាស៊ាន គឺជាកន្លែងដែលខ្លួនមានគោលដៅពង្រីកទីផ្សាររបស់ខ្លួន។

លោក Daiki Mihara ប្រធានផ្នែកអភិវឌ្ឍន៍ម៉ូតូអគ្គិសនីនៃក្រុមហ៊ុន Honda បានលើកឡើងថា រោងចក្រផលិតម៉ូតូថ្មីៗទំនងជាស្ថិតនៅក្នុងប្រទេសឥណ្ឌា និងតំបន់អាស៊ីអាគ្នេយ៍។

ក្រុមហ៊ុន Honda បន្ថែមថា ខ្លួនបាននិងកំពុងអភិវឌ្ឍអាគុយលីចូមហ្វេរ៉ូផូស្វាត (Lithium Ferro-Phosphate Battery) ហើយគ្រោងយកអាគុយនេះមកប្រើប្រាស់នៅឆ្នាំ២០២៥៕ Japan Times ៕