ដោយៈ តែម សុខុម

ហុងកុង: Sunac ដែលជាក្រុមហ៊ុនអភិវឌ្ឍន៍អចលនទ្រព្យឈានមុខគេមួយរបស់ប្រទេសចិន បានដាក់ពាក្យសុំការពារការក្ស័យធននៅសហរដ្ឋអាមេរិក ភ្លាមៗបន្ទាប់ពីបានទទួលការយល់ព្រមពីម្ចាស់បំណុលរបស់ខ្លួន នៅក្នុងការរៀបចំបំណុលជិត១០ពាន់លានដុល្លារឡើងវិញ។

ក្រុមហ៊ុននេះបានដាក់ញត្តិ សុំការពារការក្ស័យធន តាមជំពូកទី១៥ ទៅតុលាការទទួលបន្ទុកដោះស្រាយ សំណុំរឿងក្ស័យធននៅសង្កាត់ Southern District ក្នុងក្រុងញូវយ៉ក សហរដ្ឋអាមេរិក កាលពីថ្ងៃអង្គារ ទី១៩ ខែកញ្ញា។នេះគឺជាក្រុមហ៊ុនអភិវឌ្ឍន៍ចិន ខ្នាតយក្សទី២ហើយ ក្នុងរយៈពេលប៉ុន្មានសប្តាហ៍មកនេះ ដែលស្វះស្វែងស្នើសុំការការពារបែបនេះ។ ក្រុមហ៊ុនអភិវឌ្ឍន៍ Evergrande បានស្នើសុំការការពារបែបនេះនៅក្នុងសហរដ្ឋអាមេរិក កាលពីមួយខែមុន បន្ទាប់ពីបានប្រកាសពីការខាតបង់ចំនួន៨១ពាន់លានដុល្លារ ក្នុងរយៈពេលពីរឆ្នាំចុងក្រោយនេះ។

ដំណើរការនេះអនុញ្ញាតឱ្យតុលាការ លូកដៃអន្តរាគមន៍ នៅពេលសំណុំរឿងក្ស័យធន ពាក់ព័ន្ធនឹងប្រទេសមួយផ្សេងទៀត ហើយវាមានបំណង ជួយលើកកម្ពស់កិច្ចសហប្រតិបត្តិការ រវាងតុលាការសហរដ្ឋអាមេរិក កូនបំណុល និងយុត្តាធិការផ្សេងទៀត ដែលពាក់ព័ន្ធនឹងដំណើរការក្ស័យធនឆ្លងដែន។

ការឈានជើងចូលក្នុងដំណើរការនេះ អាចជួយក្រុមហ៊ុន Sunac China ចរចាជាមួយអ្នកផ្តល់ប្រាក់កម្ចីនៅបរទេស ខណៈខ្លួនកំពុងប្រឹងប្រែងរៀបចំបំណុលរបស់ខ្លួនឡើងវិញ៕ CNN៕

ដោយ: គង់ លាងហួរ

អន្តរជាតិ: តម្រូវការខុនដូពីសំណាក់ជនបរទេស ក្នុងទីផ្សារនៅប្រទេសថៃ បានបន្តកើនឡើង ក្នុងឆមាសទីមួយ ឆ្នាំ២០២៣នេះ ខណៈអ្នកទិញភាគច្រើនបំផុតជាជនជាតិចិន។

កំណើននៃការផ្ទេរខុនដូ ទៅកាន់ជនបរទេស បានបណ្តាលមកពីការបើកដំណើរការឡើងវិញ យ៉ាងពេញលេញរបស់ប្រទេសថៃ នៅក្នុងឆមាសទីពីរ ឆ្នាំ២០២២ ដោយអនុញ្ញាតឱ្យជនបរទេស ដែលបានទិញខុនដូ Presale អាចវិលត្រលប់មកវិញ និងបញ្ចប់ដំណើរការក្នុងការផ្ទេរកម្មសិទ្ធិ។

យោងតាមទិន្នន័យបានបង្ហាញថា ការផ្ទេរកម្មសិទ្ធិខុនដូរបស់ប្រទេសថៃ ទៅឱ្យជនបរទេសបានកើនឡើង៦៥,៦ភាគរយ ក្នុងរយៈពេល៦ខែដំបូង ឆ្នាំនេះ បើធៀបនឹងរយៈពេលដូចគ្នា កាលពីឆ្នាំមុន ដោយសារតែការកើនឡើង នៃគម្រោងដែលទើបនឹងសាងសង់បញ្ចប់ថ្មីៗ។ខុនដូប្រហែល៧.៣៣៨យូនីត ដែលមានតម្លៃសរុបចំនួន ៣៥,២១ពាន់លានបាត (ជិត១ពាន់លានដុល្លារអាមេរិក) ត្រូវបានផ្ទេរទៅកាន់ជនបរទេស ក្នុងកំឡុងខែមករា រហូតដល់ខែមិថុនា ដែលភាគច្រើនស្ថិតនៅក្នុងខេត្តឈុនបុរី និងរាជធានីបាងកក។ នេះបើយោងតាមមជ្ឈមណ្ឌលព័ត៌មានអចលនទ្រព្យ(REIC)។

ជាក់ស្តែង ចំនួនអ្នកទិញជាជនជាតិចិន នៅតែឈរក្នុងលំដាប់កំពូលទី១ តាមពីក្រោយដោយចំនួនអ្នកទិញ ជាជនជាតិរុស្សី និងជនជាតិអាមេរិក។

ចំណែក ចំនួនអ្នកទិញមកពីប្រទេសមីយ៉ាន់ម៉ា ដែលមិនធ្លាប់ស្ថិតក្នុងលំដាប់កំពូលទាំង១០ កាលពីមុនឆ្នាំ២០២២ ប៉ុន្តែពេលនេះ ចំនួនអតិថិជនមកពីមីយ៉ាន់ម៉ា បានស្ថិតនៅលំដាប់ទី៨ បន្ទាប់ពីស្ថិតនៅលំដាប់ទី៦ កាលពីឆ្នាំមុន។ ផ្ទុយទៅវិញ តម្រូវការខុនដូពីជនជាតិថៃក្នុងស្រុក នៅតែមានការធ្លាក់ចុះ។

លោក Vichai Viratkapan អគ្គនាយកស្តីទីនៃមជ្ឈមណ្ឌលព័ត៌មានអចលនទ្រព្យ (REIC)បានមានប្រសាសន៍ថា “ដើម្បីជំរុញសេដ្ឋកិច្ច រដ្ឋាភិបាលថៃ គួរតែលើកកម្ពស់ការទិញខុនដូ ដែលផ្តោតលើជនបរទេស តាមរយៈការបង្កើនកូតាកម្មសិទ្ធិបរទេស នៅក្នុងតំបន់មួយចំនួនដូចជា ប៉ាតាយ៉ា និងភូកេត”៕

ភ្នំពេញ នាល្ងាចថ្ងៃទី១៩ ខែកញ្ញានេះ ពីសន្និសីទសារព័ត៌មាននៅក្នុងអាកាសយានដ្ឋានអន្តរជាតិលោក គង់ ពុទ្ធិកា បានបង្ហើបឱ្យដឹងថា “លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ កំពុងរៀបចំឯកសារ ដើម្បីស្នើសុំចុះបញ្ជីក្រមា ទៅក្នុងសម្បត្តិបេតិកភណ្ឌពិភពលោកវប្បធម៌អរូបី”។
ជុំវិញបញ្ហានៃការស្នើដាក់បញ្ចូលក្រមាជាសម្បត្តិបេតិកភណ្ឌពិភពលោករបស់កម្ពុជានេះ ភាគីថៃដែលមានក្រមាដូចនឹងកម្ពុជានោះ ក៏នឹងគ្រោងស្នើទៅអង្គការយូណេស្កូ ដើម្បីដាក់ក្រមាថៃចូលជាសម្បត្តិបេតិកភណ្ឌវប្បធម៌អរូបី។

បើតាមសារព័ត៌មានរបស់ថៃឈ្មោះថា The Nation Thailand កាលពីថ្ងៃទី២១ខែឧសភា ឆ្នាំ២០២៣ កន្លងទៅថ្មីៗនេះ បានចុះផ្សាយថា “ថៃគ្រោងនឹងស្នើអង្គការយូណេស្កូ ចុះបញ្ជីក្រមាថៃ ជាសម្បត្តិបេតិកភណ្ឌវប្បធម៌អរូបី ដើម្បីផ្សព្វផ្សាយវប្បធម៌ថៃទៅកាន់ពិភពលោក”។
ស្ថិតក្នុងបញ្ហាប្រឈមគ្នារវាងភាគីកម្ពុជា-ថៃ ពាក់ព័ន្ធនឹងការចុះបញ្ជីក្រមាចូលជាសម្បត្តិបេតិកភណ្ឌវប្បធម៌អរូបីនេះ លោក គង់ ពុទ្ធិកា បានឆ្លើយតបជាមួយកម្ពុជាថ្មីថា “ នេះជាបញ្ហាប្រឈមមួយរបស់យើង(របស់កម្ពុជា) ដែលយើងត្រូវតែខិតប្រឹងប្រែងគៀងគនូវមិត្តភក្ដិអន្តរជាតិ ដើម្បីគាំទ្រយើងនូវក្នុងការចុះបញ្ជីក្រមានេះ”។

ជាមួយគ្នានេះ លោក គង់ ពុទ្ធិកា ក៏បង្ហាញក្ដីសង្ឈឹមជឿជាក់លើ ក្រុមការងារ ដែលរៀបចំឯកសារចុះបញ្ជីក្រមាខ្មែរជាសម្បត្តិបេតិកភណ្ឌវប្បធម៌អរូបីនេះ នឹងគិតគូរត្រៀមប្រកួតប្រជែង យកបញ្ហាក្រមាដែលកំពុងកើតឡើងរវាងកម្ពុជា-ថៃនេះ ធ្វើជាបញ្ហាអាទិភាពដោះស្រាយ ដើម្បីធ្វើយ៉ាងណាឱ្យក្រមារបស់ខ្មែរបានចូលជាសម្បត្តិបេតិកភណ្ឌវប្បធម៌អរូបី៕

ដោយ: គង់ លាងហួរ

អន្តរជាតិ: លោកស្រី Janet Yellen រដ្ឋមន្ត្រីក្រសួងរតនាគារអាមេរិក លើកឡើងថា លោកស្រីមិនឃើញមានសញ្ញាណាមួយ ដែលបង្ហាញថា សេដ្ឋកិច្ចអាមេរិកកំពុងឈានទៅរកការធ្លាក់ចុះនោះទេ។

ទោះបីជាយ៉ាងនេះក្តី លោកស្រីបានព្រមានថា ការបរាជ័យរបស់សភាក្នុងការអនុម័តច្បាប់ ដើម្បីបន្តធ្វើឱ្យរដ្ឋាភិបាល ដំណើរការទៅមុខ អាចបង្កហានិភ័យចំពោះការធ្លាក់ចុះនៃសន្ទុះសេដ្ឋកិច្ច។

លោកស្រី Yellen បានប្រាប់សារពត៌មាន CNBCថា “ខ្ញុំមិនឃើញសញ្ញាណាមួយ ដែលបង្ហាញថាសេដ្ឋកិច្ចមានហានិភ័យ នៃការធ្លាក់ចុះនោះទេ ដោយកត់សម្គាល់ថា ទីផ្សារការងាររបស់សហរដ្ឋអាមេរិកក៏នៅតែរឹងមាំ ហើយអតិផរណាបាននិងកំពុងធ្លាក់ចុះ”។លោកស្រី Yellen បានបន្តថា “វាឆាប់ពេកក្នុងការវាស់ស្ទង់ពីផលប៉ះពាល់នៃកូដកម្ម ប្រឆាំងនឹងក្រុមហ៊ុនផលិតរថយន្ត នៅទីក្រុង Detroit Three របស់សហរដ្ឋអាមេរិក  ដោយកត់សម្គាល់ថា វាអាស្រ័​យទៅលើថាតើកូដកម្មនេះ នឹងអូសបន្លាយយូរប៉ុណ្ណា ហើយតើនរ​ណា​ជាអ្នករងផលប៉ះពាល់”។

លោកស្រី Yellen ដែលជាអតីតប្រធានធនាគារកណ្តាលអាមេរិកបានអះអាងថា ចំណាត់ការរបស់ធនាគារកណ្តាល ក្នុងការដំឡើងអត្រាការប្រាក់ បានចាប់ផ្តើមជះផលប៉ះពាល់ ដល់ទីផ្សារលំនៅដ្ឋាន ប៉ុន្តែការចំណាយរបស់អ្នកប្រើប្រាស់នៅតែរឹងមាំ។

លោកស្រីបានបន្ថែមថា រដ្ឋបាលលោកចូ បៃដិន កំពុងតាមដានយ៉ាងដិតដល់លើតម្លៃប្រេងសាំង បន្ទាប់ពីការកើនឡើងនាពេលថ្មីៗនេះ ហើយលោក បៃដិន បានប្តេជ្ញាចិត្ត និងធានាថា ថាមពលនៅតែមានតម្លៃសមរម្យសម្រាប់ប្រជាជនអាមេរិក៕

        ដោយៈ គង់ សូរិយា

        ភ្នំពេញៈ អ្នកជំនាញបានមើលឃើញថា ផ្នែកមួយនៃវិស័យអច​ល​នទ្រព្យបែបបដិសណ្ឋារកិច្ច និងទេសចរណ៍នៅតែមានឱកាសរីកចម្រើន​ សម្រាប់រយៈពេលវែងនាពេលខាងមុខ។

ប្រធានសមាគមអចលនទ្រព្យសកល លោកឧកញ៉ាសំ សុខនឿនបានមានប្រសាសន៍ឲ្យដឹង ក្នុងវេទិកានិយាយពីដំណោះស្រាយ ក្នុងវិស័យអចលនទ្រព្យកាលពីសប្តាហ៍មុនថា នៅជុំវិញរាជធានីភ្នំពេញ ចម្ងាយចន្លោះ៣០ ទៅ៥០គីឡូម៉ែត្រ ជាតំបន់ដែលមានឱកាសវិនិយោគលើរមណីយដ្ឋានកែច្នៃ ដើម្បីទាក់ទាញភ្ញៀវទេសចរណ៍ក្នុងស្រុក និងអន្តរជាតិ។

លោកបន្តថា “បច្ចុប្បន្ន នៅថ្ងៃចុងសប្តាហ៍ មិនទាន់មានកន្លែងសំរាប់ភ្ញៀវទេសចរណ៍ជាតិ អន្តរជាតិ ដែលអាចទៅទស្សនា និងលំហែរកំសាន្តបានតាមស្តង់ដាអន្តរជាតិនៅឡើយ”។ លោកបន្តថា “ហេតុនេះការវិនិយោគក្នុងវិស័យនេះ នៅតែមានសារៈសំខាន់ និងឆ្លើយតបតម្រូវការនៅឡើយ”។

ជាមួយគ្នានេះ លោកធួន ស៊ីណានប្រធានសមាគមអាស៊ីប៉ាស៊ីហ្វិកកម្ពុជា(PATA)បានមានប្រសាសន៍ឲ្យដឹងផងដែរថា វិស័យទេស​ចរណ៍កម្ពុជាពឹងផ្អែកខ្លាំង លើទេសចរណ៍បែបវប្បធ៌ម និងប្រវត្តិ​សា​ស្រ្ត ប៉ុន្តែយើងខ្វះការវិនិយោគរមណីយដ្ឋានកែច្នៃ តាមស្តង់ដាអន្តរជាតិនៅឡើយ ដែលបញ្ហានេះ ទាមទារឲ្យមានការវិនិយោគបន្ថែ​មពីអ្នកវិនិយោគជាតិ អន្តរជាតិ។

លោកបន្តថា “ហេតុនេះការចូលរួមពីវិស័យឯកជន ពិតជាមានសារៈសំខាន់ណាស់ ដើម្បីចូលរួមទាក់ទាញភ្ញៀវទេសចរណ៍អន្តរជាតិមកទស្សនា និងស្នាក់នៅរយៈពេលវែងនៅកម្ពុជា”៕

ដោយៈ គង់ សូរិយា

        ភ្នំពេញៈ រាជរដ្ឋាភិបាលកម្ពុជា បានសម្រេចដោះដូរដីរដ្ឋចំនួន៤កន្លែង ដែលមានទំហំសរុបជាង ៣.៧៥៦ហិកតា នៅក្នុងស្រុកកោះធំ ស្រុកលើកដែក និងក្រុងសំពៅពូន នៃខេត្តកណ្តាល ឱ្យទៅក្រុមហ៊ុនឯកជនមួយ ជាថ្នូរនឹងការសាងសង់ហេដ្ឋារចនាសម្ព័ន្ធផ្លូវថ្នល់ ស្ពាននិងអគាររដ្ឋបាល មានតម្លៃសរុបចំនួន៤៥លានដុល្លារ។

នេះបើយោងតាមលិខិតមួយច្បាប់ ចុះលេខ៧៨៥ សជណ.ហធ របស់ទីស្តីការគណៈរដ្ឋមន្ត្រី ដែលបានចុះហត្ថលេខាដោយឯកឧត្តម ហ៊ីង ថូរ៉ាក់ស៊ី រដ្ឋលេខាធិការប្រចាំការ ទីស្តីការគណៈរដ្ឋមន្ត្រី នៅថ្ងៃទី១៨ ខែសីហា ឆ្នាំ២០២៣។

លិខិតនេះបានបញ្ជាក់ឱ្យដឹង ពីសំណើសុំលក់ផ្តាច់នូវទីតាំងដីរដ្ឋចំនួន៤កន្លែង នៃរដ្ឋបាលខេត្តកណ្តាល ដែលមានទំហំសរុបចំនួន ៣៧.៥៦៩.០៧២ម៉ែត្រការ៉េ ស្មើនិងជាង៣.៧៥៦ហិកតា ទៅឱ្យក្រុមហ៊ុនឯកជនមួយគឺក្រុមហ៊ុន ខេធី ឆាយណា អេស៊ា ហ្រ្គីនស៊ីធី អ៊ិនវេសម៉ិនឯ.ក ជាថ្នូរនឹងការសាងសង់ហេដ្ឋារចនាសម្ព័ន្ធ ផ្លូវថ្នល់ ស្ពាន និងអគាររដ្ឋបាលរបស់ក្រុងសំពៅពួន ខេត្តកណ្តាល សរុបជាទឹកប្រាក់មានតម្លៃជាង៤៥លានដុល្លារ។

ទីតាំងដីរដ្ឋទាំង៤កន្លែងនោះ រួមមាន ទីតាំងដីមួយផ្នែកនៃអាងទឹកក្របីកូន អាងទឹកម្លេច អាងទឹកបឹងធំ និងអាងទឹកស្រះ៨ ស្ថិតនៅស្រុកកោះធំ និងក្រុងសំពៅពូន ដោយត្រូវអភិវឌ្ឍហេដ្ឋារចនាសម្ព័ន្ធដូចខាងក្រោម ទី១ ស្ថាបនាផ្លូវដី “ស” ចំនួន២ខ្សែ ប្រវែងសរុបប្រមាណ ២០គីឡូម៉ែត្រ តម្លៃ១២លានដុល្លារ ដោយតភ្ជាប់ពីផ្លូវជាតិលេខ២៣ មកដល់ស្ពានឆ្លងកាត់ទន្លេបាសាក់ថ្មី ក្រុងសំពៅពូន។
ទី២ ស្ថាបនាផ្លូវ “ស” ចំនួន២ខ្សែ ប្រវែងប្រមាណ ៣០គីឡូម៉ែត្រ តម្លៃសរុប៨លានដុល្លារ ចាប់ពីចំណុបប្រសព្វផ្លូវជាតិលេខ២៣ រហូតដល់ផ្លូវប៉ាក់ណាម ឆ្លងកាត់ឃុំលើកដែក ស្រុកកោះធំ និងសង្កាត់ព្រែកជ្រៃ ក្រុងសំពៅពូន។
ទី៣ ស្ថាបនាស្ពានឆ្លងកាត់ទន្លេបាសាក់ ប្រវែង៥០០ម៉ែត្រ ទទឹង ១២ម៉ែត្រ តម្លៃ២៤លានដុល្លារ ឆ្លងកាត់ពីសង្កាត់សំពៅពូន ទៅសង្កាត់ព្រែកជ្រៃ ក្រុងសំពៅពូន។
ទី៤ អគាររដ្ឋបាលក្រុងសំពៅពួនទំហំ៣០ម៉ែត្រ គុណ១៥ម៉ែត្រ កម្ពស់៣ដាន់ រួមទាំងជាន់ផ្ទាល់ដី ដែលមានតម្លៃ១.០៥០.០០០ដុល្លារ។

នៅក្នុងលក្ខខណ្ឌនៃការដោះដូរនេះ ក្រសួងមហាផ្ទៃ  និងក្រសួងសេដ្ឋកិច្ចនិងហិរញ្ញវត្ថុ នឹងចេញប្រកាសរួមមួយ ដើម្បីផ្ទេរកម្មសិទ្ធជូនក្រុមហ៊ុនខាងលើ មុនពេលចាប់ផ្តើមដំណើរការសាងសង់ ប្រព័ន្ធហេដ្ឋារចនាសម្ព័ន្ធ ដោយពន្ធនៃការផ្ទេរកម្មសិទ្ធជាបន្ទុករបស់រដ្ឋ។

ចំណែកក្រុមហ៊ុនត្រូវធ្វើការដោះស្រាយ គោលនយោបាយជូនប្រជាពលរដ្ឋប៉ះពាល់ ក្នុងអត្រា០.‌១៥ ទៅ០.២ដុល្លារ ក្នុងមួយម៉ែត្រការ៉េ។ ជាជំហានបន្ទាប់ ក្រសួងមហាផ្ទៃត្រូវដឹកនាំភាគីរដ្ឋាភិបាលនិងភាគីឯកជនដែលពាក់ព័ន្ធ ក្នុងការចាប់ផ្តើមសាងសង់នូវហេដ្ឋារចនាសម្ព័ន្ធ​មុន នឹងឈានទៅកាន់ការប្រគល់ទទួល ជាកិច្ចបញ្ជប់នីតិវិធីស្តីពីការដោះដូរ៕

        ដោយៈ គង់ ហ្វីអូណា

        ភ្នំពេញៈ សមាគម​វិនិយោគិន ​នវានុវត្តន៍ និង​អភិវឌ្ឍន៍​ក្នុងស្រុក (IDI)​ សម្រេចបាន​កិច្ច​ព្រម​ព្រៀង​សហប្រតិបត្តិការ​ជា​យុទ្ធសាស្ត្រ​ជាមួយ​Chongqing HongJiu ដែលជា​ក្រុម​​ហ៊ុន​នាំចូល​ផ្លែឈើ​ឈានមុខ​គេ​របស់​ប្រទេស​ចិន និងAsia Cassava Holding ជា​ក្រុមហ៊ុន​លក់ដុំ និង​នាំចូល​ដំឡូង​មី​ដ៏​សំខាន់​មួយ ​ទៅកាន់​ប្រទេស​ចិន​។​

កិច្ចព្រមព្រៀង​នេះ​សម្រេច បាន​កាលពី​ថ្ងៃទី១៧ ខែកញ្ញា ក្នុង​ពិធី​ចុះហត្ថលេខា​ពិព័រណ៍​កម្ពុជា ​-​អាស៊ាន​លើក​ទី២០ នៅ​ទីក្រុង​ណាន​នី​ង ប្រទេស​ចិន​។​

លោកបណ្ឌិតហោ សេរី​វឌ្ឍន៍ ប្រធាន​ក្រុមប្រឹក្សាភិបាល​របស់ IDI​ បាន​សរសេរ​នៅលើ​ទំព័រ​ហ្វេ​ស​ប៊ុ​ក​ផ្លូវការ​របស់លោក​ថា កិច្ច​ព្រម​ព្រៀង​សហប្រតិបត្តិការ ​ជា​យុទ្ធ​សាស្ត្រ​ជាមួយ​Chongqing HongJiu​ ដែលជា​ក្រុមហ៊ុន​នាំចូល​ផ្លែឈើ ​ឈានមុខ​គេ​របស់​ប្រទេស​ចិន និង Asia Cassava Holding ដែលជា​ក្រុម​ហ៊ុន​លក់ដុំ និង​នាំចូល​ដំឡូង​មី​ដ៏​សំខាន់​ទៅកាន់​ប្រទេស​ចិន ដែល​ចាត់ទុកថា​ជា​គម្រោង​ដ៏​ធំ​ចំនួន​ ២​ នៅក្នុង​ពិធី​ចុះហត្ថលេខា​ នៅក្នុង​ពិព័រណ៍​កម្ពុជា​-​អាស៊ាន​លើក​ទី២០​។​លោក​បានសរសេរថា​ “​យើង​ស្វាគមន៍​ក្នុងការ​ធ្វើការ​រួមគ្នា​ជាមួ​យ​គ្រប់ភាគី ​ដើម្បី​ជួយ​វិនិយោគ​លើ​វិស័យ​កសិកម្ម ​នៅ​កម្ពុជា​សម្រាប់​ការនាំចេញ​កាន់តែច្រើន​”។​

ថ្លែង​ក្នុង​ពិធី​បើក​ពិព័រណ៍​ចិន​-​អាស៊ាន លើក​ទី​២០ នៅ​ទីក្រុង​ណាន​នី​ង ប្រទេស​ចិន នា​ថ្ងៃទី១៧ ខែកញ្ញា សម្តេចធិបតីហ៊ុន ម៉ា​ណែ​តនាយករដ្ឋមន្រ្តីនៃកម្ពុជាបាន​លើកឡើងថា ការធ្វើ​ពាណិជ្ជកម្ម​ដោយ​សេរី និង​បើកចំហ គឺជា​វិថី​តែ១​គត់ ដែល​នាំមក​នូវ​សុខ​សន្តិភាព និង​វិបុលភាព​រួម​យ៉ាងពិត​ប្រាកដ ហើយ​កម្ពុជា​ក៏បាន​ប្តេជ្ញា ​បន្ត​ប្រឹងប្រែង កែ​លម្អ​បរិយាកាស​ធុរកិច្ច និង​វិនិយោគ ដើម្បី​ធ្វើយ៉ាងណា​ឆ្លើយតប​នឹង​តម្រូវការ​របស់​វិនិយោគិន​ពី​គ្រប់​មជ្ឈដ្ឋាន​។​

សម្តេច​បាន​ថ្លែងថា “​ក្នុង​បរិការណ៍​សកលលោក​ ដែល​ពោរពេញ​ទៅដោយ​ភាពមិនប្រាកដប្រជា​ ការ​រៀបចំ​ពិព័រណ៍​ចិន​-​អាស៊ាន លើក​ទី​២០នេះ ពិត​ជាមាន​សារៈសំខាន់ សម្រាប់​ផ្សារភ្ជាប់​ទំនាក់ទំនងរ​វាង​តំបន់​ឱ្យ​កាន់តែ​ស្អិតល្មួត ប្រកបដោយ​ភាព​សុខដុម ដើម្បី​ចូលរួម​លើក​កម្ពស់​ការអភិវឌ្ឍ​ប្រកបដោយ​ចីរភាព”​។​សម្តេចធិបតីហ៊ុន ម៉ា​ណែ​ត ថ្លែងថា អាស៊ាននិង​ចិន មាន​កិច្ច​សហ​ប្រតិបត្តិការ​ដ៏​ប្រសើរ​ជាមួយគ្នា តាមរយៈ​និម្មាបនកម្ម​តំបន់ ​ដែល​ដឹកនាំ​ដោយ​អាស៊ាន ដូចជា​កិច្ចព្រមព្រៀង​ពាណិជ្ជកម្ម​សេរី​អាស៊ាន​-​ចិន​កិច្ចព្រមព្រៀង​អា​សិប និង​កិច្ចព្រមព្រៀង​ពាណិជ្ជកម្ម​ទ្វេរភាគី​​ជាច្រើន​ទៀត បង្ហាញ ឱ្យឃើញថា​កិច្ចសហប្រតិបត្តិការ​រួម​បញ្ចូល​ជាមួយនឹង​ការធ្វើ​ពាណិជ្ជកម្ម​ដោយ​សេរី និង​បើកចំហ គឺជា​វិថី​តែមួយគត់ ដែល​នាំមក​នូវ​សុខសន្តិភាព និង​វិបុលភាព​រួម​យ៉ាងពិត​ប្រាកដ​។​

យោងតាម​អគ្គនាយក​​ដ្ឋា​ន​កសិកម្ម (GDA)​ នៃ​ក្រសួងកសិកម្ម រុក្ខាប្រមាញ់ និង​នេសាទបានឱ្យដឹងថា ប្រទេស​កម្ពុជា​បានធ្វើការ​នាំចេញ​កសិផល​ជាច្រើន​ប្រភេទ ​មានតម្លៃ​ជិត១,៣៨៥​ ពាន់​លាន​ដុល្លា​រ​ក្នុង​ត្រីមាស​ទី១ ឆ្នាំ​ ២០២៣ ទៅកាន់​ទីផ្សារ​ប្រទេសចំនួន៥៣៕

​