ដោយ: គង់ លាងហួរ

អន្តរជាតិ: យោងតាមសារពត៌មាន The Edge Malaysia បានចុះផ្សាយថា នាយករដ្ឋមន្ត្រីម៉ាឡេស៊ី លោក Anwar Ibrahim បានជួបជាមួយសមភាគីសិង្ហបុរី លោកLee Hsien Loong នៅថ្ងៃព្រហស្បតិ៍ ទី១១ ខែមករាកន្លងមកនេះ។

កិច្ចប្រជុំនេះអាចត្រូវបានពិពណ៌នាថា ជាព្រឹត្តិការណ៍ដ៏សំខាន់មួយទៀត នៅក្នុងទំនាក់ទំនងទ្វេរភាគី ខណៈប្រទេសជិតខាងទាំង២ បានគូសបញ្ជាក់ពីការប្តេជ្ញាចិត្ត ចំពោះគម្រោងធំៗចំនួន២។

នៅពេលព្រឹក នាយករដ្ឋមន្ត្រីទាំង២ បានអញ្ជើញទៅទស្សនាគម្រោងខ្សែរថភ្លើងRapid Transit System (RTS) ដែលថ្នាក់ដឹកនាំទាំងពីរបានទទួលព័ត៌មានថ្មីៗ អំពីវឌ្ឍនភាពនៃគម្រោងតម្លៃ២,១៥ពាន់លានដុល្លារមួយនេះ។គម្រោង RTS Link គឺជាការតភ្ជាប់ផ្លូវរថភ្លើង ដែលមានចម្ងាយប្រហែល៤គីឡូម៉ែត្រ ដោយមានស្ថានីយចំនួនពីរ គឺស្ថានីយ Bukit Chagar ក្នុងរដ្ឋ Johor របស់ប្រទេសម៉ាឡេស៊ី និងស្ថានីយ Woodlands North នៅក្នុងប្រទេសសិង្ហបុរី។

ចំណែក ក្រុមហ៊ុន Mass Rapid Transit Corp Sdn Bhd (MRT Corp) ត្រូវបានប្រគល់ភារកិច្ច ក្នុងការអភិវឌ្ឍកំណាត់ផ្លូវដែក នៅក្នុងម៉ាឡេស៊ី ប្រវែង២,៧គីឡូម៉ែត្រ និងរចនាសម្ព័ន្ធផ្សេងៗដែលត្រូវការជាចាំបាច់។ទន្ទឹមគ្នានេះ ប្រតិបត្តិការផ្លូវដែក គ្រោងនឹងធ្វើឡើងរួមគ្នាដោយក្រុមហ៊ុនដឹកជញ្ជូនសាធារណៈ Prasarana Malaysia Bhd និងក្រុមហ៊ុនដឹកជញ្ជូនសាធារណៈសិង្ហបុរី SMRT Corp Ltd.។

បន្ទាប់ពីបំពេញទស្សនកិច្ច ទៅកាន់គម្រោងខ្សែរថភ្លើងខាងលើ លោក Anwar និងលោក Lee ក៏បានអញ្ជើញចូលរួមព្រឹត្តិការណ៍មួយផ្សេងទៀត ដើម្បីធ្វើជាសាក្សីលើការចុះហត្ថលេខា លើអនុស្សរណៈនៃការយោគយល់មួយស្តីពី តំបន់សេដ្ឋកិច្ចពិសេសJohor-Singapore។គំនិតបង្កើតតំបន់សេដ្ឋកិច្ចពិសេសនេះ ត្រូវបានតាក់តែងជាលើកដំបូង ដោយរដ្ឋមន្ត្រីសេដ្ឋកិច្ចម៉ាឡេស៊ី លោក Rafizi Ramli បន្ទាប់ពីកិច្ចប្រជុំ ជាមួយរដ្ឋាភិបាលរដ្ឋ Johor  កាលពីខែឧសភា ឆ្នាំមុន ហើយបន្ទាប់ពីនោះ ប្រទេសទាំងពីរបានយល់ព្រមបោះជំហានមួយបន្ថែមទៀត ដោយបង្កើតក្រុមការងារពិសេសមួយ ដើម្បីសិក្សាពីការបង្កើតតំបន់សេដ្ឋកិច្ចពិសេស នៅក្នុងខែកក្កដាកន្លងមក៕

        ដោយៈ ជេស៊ីកា

        ភ្នំពេញៈ ជាសច្ចៈភាព អ្នវិនិយោគចិន ពិតជាបានធ្វើឲ្យកម្ពុជាផ្លាស់ប្តូរយ៉ាងសម្បើម ក្នុងរយៈពេលពីរទសវត្សរ៍ចុងក្រោយនេះ។

នៅកម្ពុជា ក្រៅពីវិស័យអចលនទ្រព្យ រដ្ឋាភិបាលនិងអ្នកវិនិយោ​គចិនបានចូលរួមចំណែក អភិវឌ្ឍន៍សេដ្ឋកិច្ចសង្គមកម្ពុជា លើវិស័យសំខាន់ៗជាច្រើន ដូចជា វិស័យថាមពល ហេដ្ឋារចនាសម្ព័ន្ឋ វិស័យឧស្សាកម្ម វិស័យរ៉ែ និងវិស័យកសិកម្មជាដើម។

ប៉ុន្តែវិបត្តិកូវីដ១៩ សង្រ្គាមរុស្ស៊ី អ៊ុយក្រែន សង្រ្គាមរវាងអ៊ីស្រាអែល និងក្រុមហាម៉ាស់ បាននិងកំពុងធ្វើឲ្យសេដ្ឋកិច្ចពិភពលោក ស្ទើរតែដួលរលំ រួមទាំងប្រទេសចិនខ្លួនឯងផងដែរ។ នេះជាមូលហេតុធំ ដែលវត្តមានអ្នកវិនិយោគចិន មិនបានវិលមកកម្ពុជាក្នុងចំនួនច្រើនដូចមុន។លោកយិន លាងគង់អគ្គនាយកគេហទំព័រ Propertyarea.asia & Cambodiafinancialtimes.com ដែលបានតាមដានដំណើរវិវត្តន៍នៃវិស័យសេដ្ឋកិច្ច និងអចលនទ្រព្យបានមានប្រសាសន៍ថា អ្នកវិនិយោគចិន បានធ្វើឲ្យវិស័យអចលនទ្រព្យកម្ពុជា ហក់ឡើងដល់ចំណុ​ចកំពូលមួយ ដែលស្ថានភាពនេះពិបាក ធ្វើឲ្យទីផ្សារងើបឡើងវិញដល់កម្រិតកំពូលសាជាថ្មី ដោយសារហេតុផលមួយចំនួនដូចជា ទី១ កំណើនខុនដូ លំនៅដ្ឋាន ក្នុងទីផ្សារអចលនទ្រព្យ ហាក់បានឆ្អែកនៅក្នុងទីផ្សារនេះ ទី២ លំហូរវិនិយោគិនបរទេស មកកាន់កម្ពុជានៅតែ​បន្តស្ងប់ស្ងាត់។

ទី៣ ផលចំណេញពីការវិនិយោគនៅកម្ពុជា បានធ្លាក់ចុះក្នុងកម្រិតទាបជាងមុន ទី៤ កំណើននៃតម្លៃអចលនទ្រព្យ មានភាពខុសគ្នាដាច់ស្រលះ ជាមួយនឹងផលចណូលប្រចាំឆ្នាំ របស់ប្រជាពល​រដ្ឋម្នាក់ៗ ទី៥ អំណាចទីផ្សារនៅមានកម្រិត ដែលទាមទារឲ្យមានការធ្វើកំណែទម្រង់ច្រើន លើការិយាធិបតេយ្យ នៅក្នុងប្រព័ន្ឋការងាររដ្ឋាភិបាល។

តើចិនត្រលប់មកវិញឬទេ? លោកយិន លាងគង់បានពន្យល់ថា ការវិលត្រលប់មកកាន់កម្ពុជា របស់អ្នកធុរកិច្ចចិន អាចនឹងមកម្តងទៀត ប៉ុន្តែនៅពេលសមស្របណាមួយដែលសេដ្ឋកិច្ច និងវិស័យអចលនទ្រព្យ នៅប្រទេសចិនមានស្ថេរភាពជាមុនសិន។

លោកបន្តថា ហេតុផលដែលពួកគេ(អ្នកធុរកិច្ចចិន) នឹងត្រលប់មកវិញ ដោយសារហេតុផលមួយចំនួនទី១ ទំនាក់ទំនងនយោ​បាយរវាងប្រទេសទាំងពីរ មានភាពកាន់តែប្រសើរ ទី២ កត្តាសេដ្ឋកិច្ច និងបញ្ហាច្បាប់បទដ្ឋានគតិយុត្តិ នៅកម្ពុជាកាន់តែប្រសើរជាងនេះ។

ទី៣ ការចាប់ផ្តើមសាងសង់ឡើងវិញ នូវអគារជាប់គាំងក្នុងក្រុងព្រះសីហនុបញ្ចប់ ទី៤ ផលចំណេញពីការវិនិយោគ មានភាពប្រសើរឡើង នឹងទាក់ទាញអ្នកវិនិយោគចិន និងអ្នកវិនិយោគបណ្តាប្រទេសជាច្រើនទៀតត្រលប់មកកាន់កម្ពុជាជាថ្មី ទី៦ កំនើនសេដ្ឋកិច្ចកម្ពុជាមានភាពរ៉ឹងមាំ និងកំណើនពិតប្រាកដ៕

ដោយៈ គង់ សូរិយា

        ភ្នំពេញៈ ការសិក្សាថ្មីមួយរបស់អ្នកជំនាញជប៉ុន បានរកឃើញថា កម្ពុជា មិនមានសញ្ញានៃការរញ្ជួយដីឡើយ ដោ​យសារកត្តាសំខាន់ៗមួយចំនួន។

លោកសាស្រ្តាចារ្យទួស សាភឿនអគ្គលេខាធិការរងគណៈស្ថាបត្យករកម្ពុជា​ ដែលបានអញ្ជើញចូលរួមស្តាប់ បទបង្ហាញរបស់អ្នកជំនាញជប៉ុនបានស​ម្តែងការសាទរ នឹងព័ត៌មានដ៏ល្អនេះ ដោយលោកលើកឡើងថា នេះជាព័ត៌មានដ៏ល្អមួយរបស់អ្នកសាងសង់ ដែលពួកគេអាចសន្សំសំចៃបានច្រើន លើគំរោងសំណង់នានារបស់ខ្លួន។

លោកបានបញ្ជាក់ថា “កន្លងមក មានការបារម្ភពីការរញ្ជួយដីអាចកើតមាននាពេលអនាគត ប៉ុន្តែពេលនេះព័ត៌មានមានភាពច្បាស់លា​ស់ហើយ ដោយកម្ពុជាមិនរញ្ជួយដីឡើយ”។ លោកបន្តថា “ការសិក្សា​បានបង្ហាញថា កម្ពុជាមានស្រទាប់ដីក្រាស់ និងជាស្រទាប់ដីចាស់រាប់​លានឆ្នាំ ដែលមិនអាចឲ្យកម្ពុជាប្រឈមមុខ នឹងបញ្ហារញ្ជួយដីឡើយ”។លោកសាស្រ្តាចារ្យទួស សាភឿនបានបន្តថា ការសាងសង់ដែលការពារដល់ការរញ្ជួយដី ប្រៀបដូចជាការដុតលុយចោល ព្រោះ​ការចំណាយការសាងសង់ ដើម្បីការពារការរញ្ជួយដី និងការសាងសង់ធម្មតាមិនការពារ មានតម្លៃខុសគ្នាចន្លោះពី២០ ទៅ៣០ភាគរយឯណោះ។

លោកសាស្រ្តាចារ្យបានបន្តថា នៅក្នុងបទដ្ឋានបច្ចេកទេស សម្រាប់ប្រទេសមានការរញ្ជួយដី គេកំណត់មេគុណបេតុង ដែក និងបទដ្ឋានសំណង់ដទៃទៀត ដែលធ្វើឲ្យមានការចំណាយខ្ពស់ ប៉ុន្តែប្រ​ទេសមិនមានហានិភ័យពីការរញ្ជួយដី និងខ្យល់ព្យុះ គឺចំណេ​ញ​ច្រើន។
ព័ត៌មាននេះ ត្រូវបានសិក្សា និងធ្វើបទបង្ហាញដោយនាយកដ្ឋានស្រាវជជ្រាវទាក់ទង ការរញ្ជួយដីរបស់រដ្ឋាភិបាលជប៉ុន។ បទបង្ហាញនេះបានធ្វើនៅក្រសួងរៀបចំដែនដី នគរូបនីយកម្ម និងសំណង់កាលពីថ្ងៃទី១១ មករាកន្លងមកនេះ៕

ដោយ: គង់ លាងហួរ

ហុងកុង: សារពត៌មាន South China Morning Post បានរាយការណ៍ថា ក្រុមហ៊ុន China State Railway Group គ្រោងបញ្ចប់ការផលិតគំរូ និងបើកដំណើរការសាកល្បង រថភ្លើងល្បឿនលឿនបំផុតរបស់ពិភពលោកនៅឆ្នាំនេះ។

ការអភិវឌ្ឍន៍ដោយក្រុមហ៊ុនរដ្ឋចិន China State Railway Group  គឺជារបកគំហើញមួយ សម្រាប់គម្រោងច្នៃប្រឌិតបច្ចេកវិទ្យារថភ្លើង CR450 ដែលបានដាក់ចេញដោយទីក្រុងប៉េកាំង កាលពី៣ឆ្នាំមុន។

ប្រតិបត្តិករខាងលើបានគូសបញ្ជាក់ ក្នុងអំឡុងសន្និសីទការងារប្រចាំឆ្នាំរបស់ខ្លួនថា រថភ្លើងម៉ាកCR450 នេះនឹងមានល្បឿនពិសោ ធន៍ រហូតដល់៤៥០គីឡូម៉ែត្រក្នុងមួយម៉ោង  និងល្បឿនប្រតិបត្តិការពាណិជ្ជកម្មចំនួន៤០០គីឡូម៉ែត្រក្នុងមួយម៉ោង។ជាពិសេស រថភ្លើង CR450 អាចជួយកាត់បន្ថយពេលវេលាធ្វើដំណើររវាងទីក្រុងប៉េកាំង និងទីក្រុងសៀងហៃ ដែលជាផ្លូវដ៏មមាញឹកបំផុតរបស់ប្រទេសចិនពីជាង៤ម៉ោង មកនៅសល់ត្រឹមតែ២ម៉ោងកន្លះប៉ុណ្ណោះ។

ប្រទេសចិនបានបើកដំណើរការ ខ្សែរថភ្លើងល្បឿនលឿនជាលើកដំបូងរបស់ខ្លួន ក្នុងឆ្នាំ២០០៨ ហើយបណ្តាញនេះត្រូវបានគេចាត់ទុកថា មានសារៈសំខាន់សម្រាប់សេដ្ឋកិច្ចចិន និងចំនួនប្រជាជន១,៤ពាន់លាននាក់របស់ខ្លួន។

រថភ្លើង CR450 គ្រោងនឹងដាក់ឱ្យប្រើប្រាស់ នៅឆ្នាំ២០២៥ ខណៈគម្រោងស្រាវជ្រាវ បានធ្វើឡើងនៅទូទាំងប្រទេស ដើម្បីផ្តោតលើបច្ចេកវិទ្យាផ្លូវដែកសំខាន់ៗ រាប់ចាប់ពីការគ្រប់គ្រងដោយស្វ័យ ប្រវត្តិ និងការរចនាកង់ រហូតដល់ប្រព័ន្ធចង្កូត ការកែលម្អផ្លូវដែក និងវិធានការសុវត្ថិភាព។

ក្រុមហ៊ុន China State Railway Group បានអះអាងថា ការប្រើប្រាស់រថភ្លើងCR450 ត្រូវបានគេរំពឹងថា នឹងមិនសូវប៉ះពាល់ដល់បរិស្ថាន និងសន្សំសំចៃថាមពលជាងមុន បើធៀបទៅនឹងរថភ្លើងល្បឿនលឿនFuxing ដែលមានស្រាប់នាពេលបច្ចុប្បន្ន៕

        ដោយៈ គង់ សូរិយា

កំពតៈ អាគារភ្លោះកំពស់កប់ពពក នៅក្រុងកំពត ដែលជាគំរោងវិនិយោគរបស់ក្រុមហ៊ុនថៃ ប៊ុនរ៉ុងនឹងមិនស្ថិតក្នុងសភាពជាប់គាំងទៀតទេ។

លោកសាស្រ្តាចារ្យទួស សាភឿនអគ្គលេខាធិការរងស្ថាបត្យករកម្ពុជា និងជាថ្នាក់ដឹកនាំជាន់ខ្ពស់មួយរូប នៃក្រុមហ៊ុននេះបានមានប្រសាសន៍ឲ្យដឹងកាលពីល្ងាចថ្ងៃទី១១ មករាថា ការផ្អាកកន្លងមក មិន​មែនជាបញ្ហាផ្ទៃក្នុងរបស់ក្រុមហ៊ុននោះទេ តែជាបញ្ហារបស់ក្រុមហ៊ុនដៃគូសហការ ដែលរងវិបត្តិដោយសារបញ្ហាជម្ងឺកូវីដ១៩ ប៉ុន្តែនៅពេលបញ្ហានេះចប់ ពួកគេក៏បានរងវិបត្តិខ្លួនឯងបន្តទៀត។លោកបន្តបញ្ជាក់ថា “នេះមិនមែនជាបញ្ហារបស់យើងទេ យើងមិនទុកអាគារនេះចោលឡើយ ក្រុមហ៊ុនកំពុងជ្រើសរើសក្រុ​មជាងដើម្បីចាប់ផ្តើមសាងសង់អាគារនេះឡើងវិញហើយ”។

តាមព័ត៌មានកន្លងមកបានបង្ហាញថា អាគារកប់ពពក ដែលស្ថិតនៅកណ្តាលក្រុងកំពតនេះ នឹងប្រើប្រាស់ជាខុនដូ អាផាតម៉ិន សណ្ឋា គារប្រណីត ក្លឹបកំសាន្តលំដាប់អន្តរជាតិ ការិយាល័យធ្វើការរបស់ក្រុមហ៊ុន និងសេវាកម្មចាំបាច់ដទៃទៀត។មជ្ឈមណ្ឌលពាណិជ្ជកម្មថៃ ប៊ុនរ៉ុងកំពស់៤៥ជាន់នេះ នៅពេល​សាងសង់បញ្ចប់ នឹងជួយលើកកំពស់សក្តានុពលសេដ្ឋកិច្ច និងទាក់ទាញការវិនិយោគបន្ថែមទៀតនៅក្នុងខេត្តកំពត ដែលមានសក្តានុពលលើវិស័យទេសចរណ៍ធម្មជាតិ និងសក្តានុពលលើផ្នែកសេដ្ឋកិច្ចដ៏សំខាន់ផងដែរ៕

ដោយៈ គង់ សូរិយា

ព្រះសីហនុៈ ប្រភពព័ត៌មានគួរឲ្យទុកចិត្តមួយ បានបង្ហើបឲ្យដឹងថា​ ក្រុមហ៊ុនចិនមួយនឹងបើកដំណើរការធនាគារមួយ ដើម្បីផ្តល់មូលនិធិដល់ការសាងសង់ អាគារជាប់គាំងនៅខេត្តព្រះសីហនុ។

ប្រភពដដែលបានឲ្យដឹងទៀតថា ធនាគារនោះនឹងបើកដំណើរការឆាប់ៗនេះ ដោយបច្ចុប្បន្នធនាគារនេះបាន និងកំពុងរៀបចំនិតិវិធីច្បាប់ ដើម្បីបើកដំណើរការនាពេលខាងមុខនេះ។ ប្រភពដដែលបានបន្តថា អាគារជាប់គាំងនៅទីក្រុងនេះ ត្រូវការមូលនិធិជាច្រើន ដើម្បីសាងសង់ឡើងវិញ ពិសេសធ្វើឲ្យខេត្តនេះ មានសកម្មភាពរសរវើកឡើងវិញផងដែរ។

ខេត្តព្រះសីហនុ មានអគារជាប់គាំងរាប់រយ ដែលបានសាងសង់បញ្ចប់ និងមិនទាន់បញ្ចប់ការសាងសង់ជាង៣០០អាគារ ដែលនឹងសាងសង់បញ្ចប់ឡើងវិញនាពេលខាងមុខ។ព័ត៌មាននេះ ស្របនឹងការប្រកាសរបស់សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាកាលពីសប្តាហ៍មុន។សម្តេ​ចធិបតីហ៊ុន ម៉ាណែតបានថ្លែងឲ្យដឹងក្នុងពិធីសម្ភោធស្ពានកោះយ៉ នៅខេត្តកោះកុងកាលពីថ្ងៃទី៨ មករាកន្លងមកថា កម្មវិធីគោលនយោ​បាយថ្មីនេះ គឺផ្តោតសំខាន់លើការជម្រុញសកម្មភាពធុរកិច្ច និងពាណិ​ជ្ជកម្មនៅក្រុងព្រះសីហនុ ឲ្យមានភាពរសរវើកឡើងវិញ។

សម្តេចបន្តថា “ឆ្នាំ២០២៤ជាឆ្នាំ សម្រាប់ជម្រុញការវិនិយោគនៅខេត្តព្រះសីហនុ ពិសេសការដោះស្រាយបញ្ហា អាគារជាប់គាំងនៅក្នុងទីក្រុងនេះ”។

រដ្ឋាភិបាលដាក់ចេញនូវគោលការណ៍ចំនួន២ ទាក់ទងអាគារជាប់គាំងនៅក្រុងព្រះសីហនុ ដែលគោលការណ៍ទី១ គឺជម្រុញការសាងសង់អាគារដែលមិនទាន់​ចប់ នឹងសាងសង់បញ្ចប់ និងទី២ អាគា​រសាងសង់ចប់រួចអាចនឹងធ្វើឲ្យមានសកម្មភាពវិនិយោគ ឬធុរកិច្ច។

នៅខេត្តព្រះសីហនុ នាពេលប​ច្ចុប្ប​ន្ននេះ មានអាគារ៣៦៤អាគារបានផ្អាកការសាងសង់ អាគារចំនួន១៧៧សាងសង់រួចតែមិនដំណើរការ អាគារ៥៣កន្លែងកំពុងដំណើរការសាងសង់ និងអគារចំនួន៤៧៥កន្លែងបានសាងសង់រួច និងកំពុងដំណើរការ។

នៅចន្លោះឆ្នាំ២០១៦ ដល់២០១៩ ខេត្តព្រះសីហនុបានទាក់ទាញលំហូរទុនវិនិយោគពីបរទេស ប្រមាណ៨០០០លានដុល្លារអាមេរិក ដែលភាគច្រើនជាគំរោងវិនិយោគរបស់ចិន។

ទោះជាយ៉ាងណាអភិបាលរងខេត្តព្រះសីហនុ លោកឡុង ឌីម៉ង់បានបញ្ជាក់ថា លោកមិនបានដឹងព័ត៌មានទាក់ទង នឹងការបើកដំណើ​រការធនាគារ ដែលបានលើកឡើងខាងលើនេះនៅឡើយទេ៕

(ភ្នំពេញ)៖ ក្រុមហ៊ុនវិនិយោគអាកាសយានដា្ឋនអន្តរជាតិសៀមរាប-អង្គរ បានសម្រេចមិនគិតកម្រៃថ្លៃចត សម្រាប់រថយន្តធុនតូចមិនលើស៧កៅអី ក្រោមរយៈពេល ១៥នាទី និងរយៈពេល៣០នាទី សម្រាប់ប្រភេទរថយន្តផ្សេងៗទៀត និងយល់ព្រម បញ្ចុះតម្លៃបន្ថែម សម្រាប់យាន្តយន្តគ្រប់ប្រភេទ ដែលចូល-ចេញអាកាសយានដា្ឋនអន្តរជាតិសៀមរាប-អង្គរ។

នេះបើយោងតាមសេចក្តីប្រកាសព័ត៌មាន របស់អង្គភាពអ្នកនាំពាក្យរាជរដ្ឋាភិបាល ស្តីពីដំណោះស្រាយលើបញ្ហាតម្លៃសេវា ការប្រើប្រាស់ផ្លូវចូល-ចេញអាកាសយានដា្ឋនអន្តរជាតិសៀមរាប-អង្គរ និងតម្លៃចំណតយានយន្ត ដែលបណ្តាញព័ត៌មាន Fresh News ទទួលបាននៅថ្ងៃទី១១ ខែមករា ឆ្នាំ២០២៤នេះ។

សេចក្តីប្រកាសព័ត៌មានបានបញ្ជាក់ថា ដោយមានការចង្អុលបង្ហាញ និងយកចិត្តទុកដាក់ខ្ពស់ ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃ កម្ពុជា លើកង្វល់របស់បងប្អូនប្រជាពលរដ្ឋ ក្នុងការប្រើប្រាស់ផ្លូវចូល-ចេញ អាកាសយានដ្ឋានអន្តរជាតិសៀមរាប-អង្គរ និងតម្លៃចំណតយានយន្ត, សម្ដេចបានឱ្យបង្កើតគណៈកម្មការចំពោះកិច្ចជាបន្ទាន់មួយ ដឹកនាំដោយ ឧបនាយករដ្ឋមន្ត្រី ស៊ុន ចាន់ថុល ដែលមានការចូលរួមពីលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន, លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល, បណ្ឌិតសភាចារ្យ ហ៊ីង ថូរ៉ាក់ស៊ី រដ្ឋលេខាធិការប្រចាំការ ទីស្តីការគណៈរដ្ឋមន្ត្រី លោក ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ, អភិបាលរងខេត្តសៀមរាប តំណាងក្រសួងស្ថាប័នដែលពាក់ព័ន្ធ ដើម្បីចុះទៅពិនិត្យ និងដោះស្រាយបញ្ហា នេះជាបន្ទាន់ជូនបងប្អូនប្រជាពលរដ្ឋ។

បន្ទាប់ពីបានចុះទៅពិនិត្យស្ថានភាពនៅទីតាំងជាក់ស្ដែង និងប្រជុំជាមួយក្រុមហ៊ុនវិនិយោគ ដែលបានបណ្តាក់ទុនវិនិយោគជាប្រភេទ BOT ទាំងអាកាសយានដ្ឋាន និងផ្លូវ ក្រុមការងារចំពោះកិច្ចបាន ពិភាក្សាចរចាបន្ថែម លើអ្វីដែលបានឯកភាពកាលពីពេលមុន។ ក្នុងនោះ ក្រុមហ៊ុនបានឯកភាពមិនគិតកម្រៃថ្លៃចត សម្រាប់ការចូលទៅក្នុងអាកាសយានដ្ឋានអន្តរជាតិ
សៀមរាបអង្គរ ក្រោមរយៈពេល ១៥នាទី សម្រាប់រថយន្តធុនតូចមិនលើស៧កៅអី និងរយៈពេល៣០នាទី សម្រាប់ប្រភេទរថយន្តផ្សេងៗទៀត។

ជាមួយគ្នានេះ ក្រុមហ៊ុនបានយល់ព្រមធ្វើការបញ្ចុះតម្លៃបន្ថែម ក្នុងការប្រើប្រាស់ផ្លូវ សម្រាប់គ្រប់ប្រភេទយានយន្ត មួយចំនួន សម្រាប់រយៈពេលពីរឆ្នាំ ចាប់ពីឆ្នាំ២០២៤ និងឆ្នាំ២០២៥ ។

អង្គប្រជុំក៏បានឯកភាពគ្នា បង្កើតគណៈកម្មការអន្តរក្រសួង ដែលមានក្រសួងសេដ្ឋកិច្ច និងហិរញ្ញវត្ថុ ក្រសួងសាធារណការ និងដឹកជញ្ជូន រដ្ឋលេខាធិការដ្ឋានអាកាសចរណ៍ស៊ីវិល និងអាជ្ញាធរដែនដី ដើម្បីគ្រប់គ្រងលើផ្លូវនេះ ទាក់ទងទៅនឹងការជួសជុលថែទាំផ្លូវ និងសុវត្ថិភាព ក្នុងការធ្វើដំណើរតាមដងផ្លូវនេះផងដែរ៕Fresh News