ដោយៈ ម៉ាណា

    ភ្នំពេញៈ ក្រុមហ៊ុនGOMI RECYCLE បាននិងកំពុងវិនិយោគលើការកែច្នៃសំរាមពីថង់ផ្លាស្ទិក នៅក្នុងតំបន់សេដ្ឋកិច្ចពិសេសរ៉ូយាល់ភ្នំពេញ។

ព័ត៌មាននេះត្រូវបានបង្ហើបឲ្យដឹង នៅពេលលោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានអនុញ្ញាត្តទទួលជួបពិភាក្សាការងារ ជាមួយគណៈប្រតិភូក្រុមហ៊ុនGOMI RECYCLE ដឹកនាំដោយលោក Okumura Yusuke ប្រធានក្រុមហ៊ុន។

លោក Okumura Yusuke ប្រធានគណៈប្រតិភូបានជម្រាបជូនថា បច្ចុប្បន្នក្រុមហ៊ុនបាននិងកំពុង ដំណើរការគម្រោងវិនិយោគកែច្នៃសំរាម (ប្រមូលសំរាមប្លាស្ទិកដើម្បីកែច្នៃ) នៅក្នុងតំបន់សេដ្ឋកិច្ចពិសេ​ស រ៉ូយ៉ាល់ គ្រុបភ្នំពេញ។

ដោយមានការជឿជាក់លើរាជរដ្ឋាភិបាល ក្នុងការធានាបានូវបរិស្ថានវិនិយោគដ៏ល្អប្រសើរ នៅពេលនេះក្រុមហ៊ុនបានសម្រេចចិត្តពង្រីកការវិនិយោគ ដោយពង្រីកបន្ថែមលើការប្រមូលសំរាមប្លាស្ទិក គឺប្រមូលសំរាមទូទៅពីក្រុមហ៊ុន ដែលកំពុងមានផលិតកម្មនៅក្នុងតំបន់សេដ្ឋកិច្ចពិសេសនេះ ដើម្បីកែច្នៃ។ កន្លងមក ក្រុមហ៊ុនបានវិនិយោគកែច្នៃសំរាមប្លាស្ទិកដើម្បីផលិតជាវត្ថុអនុស្សាវរីយ៍ និងគ្រឿងសង្ហារិម។

ជាការឆ្លើយតប លោកអគ្គលេខាធិការ បានវាយតម្លៃខ្ពស់ចំពោះការសម្រេចចិត្តដ៏ត្រឹមត្រូវ របស់ក្រុមហ៊ុនក្នុងការពង្រីកការវិនិយោគនៅកម្ពុជា និងបានសម្តែងនូវការស្វាគមន៍ គម្រោងពង្រីកការវិនិយោគនេះ ដែលនឹងអាចចូលរួមបង្កើតការងារបន្ថែម ជូនដល់ប្រជាពលរដ្ឋកម្ពុជា និងចូលរួមសម្អាតបរិស្ថាន៕

ដោយៈ និស្ស័យ

    ភ្នំពេញៈ មន្រ្តីជាន់ខ្ពស់ក្រសួងសាធារណការ និងក្រុមអ្នកជំនាញការនៃJICA បានបើកកិច្ចប្រជុំពិភាក្សាពីការសិក្សាសំខាន់ៗ នៃប្រព័ន្ធភស្ដុភារកម្មកម្ពុជា។

កិច្ចពិភាក្សានេះ ត្រូវបានលើកយកមកពិភាក្សា ក្នុងកិច្ចប្រជុំលើកទី៤ របស់គណៈកម្មការចម្រុះ សម្រាប់សម្របសម្រួលការអនុវត្តគម្រោ​ងពង្រឹងសមត្ថភាព ក្នុងការសម្របសម្រួលសម្រាប់ ការធ្វើឱ្យប្រសើរឡើងនូវប្រព័ន្ធភស្ដុភារកម្មកម្ពុជា (SF-CLIP)។

កិច្ចប្រជុំកាលពីថ្ងៃទី២៨ តុលាបានដឹកនាំដោយលោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន ទទួលបន្ទុកជាប្រធានគណៈកម្មការ គ្រប់គ្រងគម្រោងSF-CLIP និងលោកស្រី MIURA Yoshiko តំណាងជាន់ខ្ពស់នៃទីភ្នាក់ងារសហប្រតិបត្តិការអន្តរជាតិជប៉ុន (JICA) ប្រចាំកម្ពុជា និងមន្រ្តីពាក់ព័ន្ឋ។

អង្គប្រជុំបានពិភាក្សាលើ របាយការណ៍លទ្ធផលការងារ បញ្ហាប្រឈម និងដំណោះស្រាយ ចំពោះគម្រោងនៃការសិក្សាមណ្ឌលភស្តុភារកម្មក្នុងតំបន់ (Regional Hub Study) និងការសិក្សាថ្មីៗក្នុងការរៀបចំការវិភាគផ្អែកលើភស្តុតាង ការធ្វើផែនការសម្រាប់ការកែលម្អភស្តុភារកម្ម និងការកែលម្អរបាយការណ៍ប្រចាំឆ្នាំផ្នែកភស្តុភារកម្ម និងសកម្មភាពកែលម្អ ការដឹកជញ្ជូនទំនិញតាមផ្លូវគោក និងសកម្មភាពកែលម្អការដឹកជញ្ជូនទំនិញតាមរថភ្លើង ក្នុងការសិក្សាត្រួតពិនិត្យ និងវាយតម្លៃស្ថានភាពចរាចរណ៍ផ្លូវគោកជាប្រចាំ និងការសម្របសម្រួលនៃការដឹកជញ្ជូនតាមផ្លូវទឹកអន្តរជាតិ ជាមួយប្រទេស ឡាវ វៀតណាម និងកម្ពុជា ដើម្បីឱ្យប្រព័ន្ធដឹកជញ្ជូន និងភស្ដុភារកម្មកម្ពុជាមានភាពប្រសើរឡើងនាពេលអនាគត។

ឆ្លៀតក្នុងឱកាសនោះដែរ លោកជំទាវប្រធានអង្គប្រជុំ បានថ្លែងអំណរគុណយ៉ាងជ្រាលជ្រៅ ដល់ក្រុមជំនាញការជប៉ុន ក្រុមការងាររបស់ក្រសួងសាធារណការ និងដឹកជញ្ជូន និងក្រុមការងារនៃគណៈកម្មការគ្រប់គ្រងគម្រោងSF-CLIP និងសមាជិកគណៈកម្មការចម្រុះសម្រ​បសម្រួល ការអនុវត្តគម្រោងនៃអន្តរក្រសួង ដែលបានខិតខំប្រឹងប្រែងបំពេញការងារយ៉ាងសកម្ម និងការចូលរួមពីគ្រប់ស្ថាប័ន និងភាគីពាក់ព័ន្ធទទួលលទ្ធផលបានល្អប្រសើរ និងបានសំណូមពរឱ្យក្រុមការ​ងារទាំងអស់ បន្តសហការបន្ថែមទៀត ដើម្បីលើកកម្ពស់វិស័យដឹកជញ្ជូន និងភស្ដុភារកម្មនៅកម្ពុ ជាឱ្យកាន់តែមានការរីកចម្រើននូវជំហា​នបន្តបន្ទាប់ខាងមុខទៀត៕

(ភ្នំពេញ)៖ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានបន្ដជំរុញលើកទឹកចិត្ដដល់ថ្នាក់ដឹកនាំ មន្ដ្រី-បុគ្គលិកសុខាភិបាលទាំងអស់ ត្រូវបន្ដសហការគ្នា បំពេញការងារប្រកបដោយបុរេសកម្ម ដើម្បីធានាបានការបម្រើសេវាឱ្យកាន់តែល្អប្រសើរ និងនៅកៀកនឹងប្រជាជន។

ការថ្លែងបែបនេះរបស់លោកសាស្ដ្រាចារ្យរដ្ឋមន្ដ្រី ក្នុងឱកាសដឹកនាំកិច្ចប្រជុំកម្រិតថ្នាក់ដឹកនាំលើកទី២ នៃខែតុលា ដើម្បីពិនិត្យវឌ្ឍនភាពការងារ និងលើកទិសដៅការងារបន្ត ដែលមានការអញ្ជើញចូលរួមពីរដ្ឋលេខាធិការ អនុរដ្ឋលេខាធិការ ទីប្រឹក្សាក្រសួង អគ្គនាយក អគ្គនាយករង និងគ្រប់ប្រធានអង្គភាពថ្នាក់កណ្តាលក្រោមឱវាទក្រសួងសុខាភិបាល ប្រធានមន្ទីរសុខាភិបាលរាជធានីភ្នំពេញ និងតាមប្រព័ន្ធ Zoom ប្រធានមន្ទីរសុខាភិបាលខេត្ត នារសៀលថ្ងៃចន្ទ ៦កើត ខែកត្តិក ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៧ ខែតុលា ឆ្នាំ២០២៥ នៅទីស្ដីការក្រសួងសុខាភិបាល ។

លោកសាស្រ្តាចារ្យរដ្ឋមន្រ្តី បានណែនាំដល់ថ្នាក់ដឹកនាំ និងមន្ទីរពេទ្យទាំងអស់ ត្រូវជំរុញការបម្រើសេវាសុខាភិបាលដល់ប្រជាជនឱ្យប្រកបដោយគុណភាព ប្រសិទ្ធភាព ស័ក្តិសិទ្ធិភាព និងសមធម៌។ ពិសេសត្រូវណែនាំដល់មន្រ្តី បុគ្គលិកសុខាភិបាល ឱ្យមានស្មារតីរួបរួមគ្នា សហការគ្នា បុរេសកម្ម បង្កើតសកម្មភាព ដើម្បីជំរុញការងារឱ្យកាន់តែល្អប្រសើរ និងរលូនទៅមុខ ហើយត្រូវកែលម្អនូវចំនុចដែលខ្វះខាត និងមិនទាន់ល្អប្រសើរ។ ត្រូវយកចិត្តទុកដាក់ខិតខំអនុវត្តភារកិច្ចរបស់ខ្លួនឱ្យបានខ្ជាប់ខ្ជួន ស្របតាមគោលនយោបាយរាជរដ្ឋាភិបាល និងក្រសួងសុខាភិបាល។

ទន្ទឹមនឹងនោះលោកសាស្រ្តាចារ្យរដ្ឋមន្រ្តី បានគូសរំលេចឱ្យថ្នាក់ដឹកនាំ បន្តចុះពង្រឹងមណ្ឌលសុខភាពជុំទី២ និងមន្ទីរពេទ្យបង្អែកគ្រប់កម្រិត ឱ្យបានគ្រប់មូលដ្ឋានសុខាភិបាល ក្នុងការចុះពិនិត្យផ្ទៀតផ្ទាង និងជួយគាំទ្រផ្នែកបច្ចេកទេស រដ្ឋបាល ដើម្បីធានាបានការបម្រើសេវាឱ្យកាន់តែល្អប្រសើរ និងនៅកៀកនឹងប្រជាជន។

បន្ថែមពីនេះលោកសាស្រ្តាចារ្យរដ្ឋមន្រ្តី បានសង្កត់ធ្ងន់ឱ្យថ្នាក់ដឹកនាំទាំងអស់ ត្រូវបន្តយកចិត្តទុកដាក់លើសុវត្ថិភាពអ្នកជំងឺ ដែលជាកត្តាសំខាន់ក្នុងការបម្រើសេវាសុខាភិបាលជូនដល់ប្រជាជន ដោយត្រូវអនុវត្តឱ្យបានខ្ជាប់ខ្ជួន និងមានទំនួលខុសត្រូវខ្ពស់ ក្នុងនាមអ្នកវិជ្ជាជីវៈសុខាភិបាល៕

ដោយៈ ចំណាន

    ភ្នំពេញៈ សមាគមសហគ្រិនសារព័ត៌មានសេដ្ឋកិច្ចកម្ពុជា(CEMEA) សូមប្រកាសគាំទ្រយ៉ាងពេញទំហឹង ចំពោះដំណើរការចរចាសន្តិភាព រវាងព្រះរាជាណាចក្រកម្ពុជា និងព្រះរាជាណាចក្រថៃ ក្នុងការចុះហត្ថលេខាលើ សេចក្តីថ្លែងការណ៍រួមស្តីពី កិច្ចព្រមព្រៀងសន្តិភាព ទីក្រុងកូឡាឡាំពួ” នៅថ្ងៃទី២៦ ខែតុលា ឆ្នាំ២០២៥ ប្រទេសម៉ាឡេស៊ី។

នេះជាជំហានវិជ្ជមានដ៏សំខាន់ និងជាប្រវត្តិសាស្រ្ត ក្រោមយុទ្ធសាស្រ្ត “ស្ងាត់ តែមិនស្ងៀម” របស់សម្តេចធិបតី ហ៊ុន ម៉ាណែត ដើម្បីឈានទៅរកប្រក្រតីភាព នៃទំនាក់ទំនងរវាងប្រជាជាតិទាំងពីរ និងប្រែក្លាយតំបន់ព្រំដែន មានជម្លោះទៅជាតំបន់សន្តិភាព មិត្តភាព សហប្រតិបត្តិការ និងអភិវឌ្ឍន៍រួម។

សមាគមសហគ្រិនសារព័ត៌មានសេដ្ឋកិច្ចកម្ពុជា សូមចូលរួមអបអរសាទរ ចំពោះកិច្ចខិតខំប្រឹងប្រែងរបស់រាជរដ្ឋាភិបាល នៃប្រទេសទាំងពីរ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តម អានុទីន ចាន់វីរៈគុល នាយករដ្ឋមន្ត្រី នៃព្រះរាជាណាចក្រថៃ និងតួនាទីស្នូលរបស់ ឯកឧត្តម អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានប្តូរវេនអាស៊ាន ជាពិសេសតួនាទីមិនអាចខ្វះបានរបស់ ឯកឧត្តម ដូណាល់ ត្រាំ ប្រធានាធិបតី សហរដ្ឋអាមេរិក។

“សន្តិភាពគឺទ្រព្យដ៏ពិសិដ្ឋ មិនអាចកាត់ថ្លៃបាន” ដែលជាបំណងប្រាថ្នាតែមួយគត់របស់ប្រជាពលរដ្ឋគ្រប់រូប និងជាមូលដ្ឋានគ្រឹះនៃការ អភិវឌ្ឍសេដ្ឋកិច្ចសង្គម ដែលយើងទាំងអស់គ្នាចាំបាច់ ត្រូវចូលរួមការពារថែរក្សាឱ្យបានគង់វង្ស។

កម្ពុជា និងថៃ ជាអ្នកជិតខាងអចិន្ត្រៃយ៍ ដែលចាំបាច់ខិតខំប្រឹងប្រែងរួមគ្នាធ្វើយ៉ាងណា រក្សាឱ្យបាននូវសុខសន្តិភាព ស្ថិរភាព សុខ​ដុម​រមនា និងការអភិវឌ្ឍរួម ដោយឈរលើមូលដ្ឋាននៃការគោរពគ្នា និងការឱ្យតម្លៃគ្នាទៅវិញទៅមក ការយោគយល់គ្នា ការជឿទុកចិត្តគ្នាដើម្បីផលប្រយោជន៍រួម ដោយផ្អែកលើស្មារតីនៃអ្នកជិតខាងល្អ តាមរយៈ ការប្រកាន់ខ្ជាប់នូវវប្បធម៌សន្ទនាការទូត និងការគោរពច្បាប់អន្តរជាតិ។

ជាថ្មីម្តងទៀត ជាមួយនឹងអំណរសាទរ ប្រកបដោយមោទនភាពនេះ សូមគោរពជូនពរសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ព្រមទាំងសមាជិក សមាជិកានៃរាជរដ្ឋាភិបាល សូមមានសុខភាពល្អបរិបូរណ៌ សុភមង្គល និងជ័យជម្នះលើគ្រប់ភារកិច្ចក្នុងបុព្វហេតុ ជាតិ សាសនា និងព្រះមហាក្សត្រ៕

ដោយៈ សហសេវិក

    ភ្នំពេញៈ លោកស្រី ជា សិរី ទេសាភិបាលធនាគារជាតិ​នៃ​កម្ពុជា ​បាន​សម្តែង​ការព្រួយបារម្ភ​អំពី​អ្វី ដែល​លោកស្រី​បាន​ពិពណ៌នា​ថា​ជា “ការចោទប្រកាន់​ដ៏​បង្ក​គ្រោះថ្នាក់​” ដែល​ភ្ជាប់​កម្ពុជា​ទៅនឹង​មជ្ឈមណ្ឌ​ល​ឆបោកអនឡាញ​។

លោកស្រីបាន​សង្កត់ធ្ងន់ថា “​របា​យ​ការណ៍​បែបនេះ ​មិន​តំណាងឱ្យ​រូបភាព​ពិត​របស់​ប្រទេស​នោះទេ​”។​

ថ្លែង​ក្នុង​វេទិកា​សំខាន់ៗ​ពីរ​ ដែល​បាន​ធ្វើឡើង​រួមគ្នា​ជាមួយ​កិច្ចប្រជុំ​កំពូល​អាស៊ាន កិច្ចប្រជុំ​កំពូល​ពាណិជ្ជកម្ម និង​វិនិយោគ​អាស៊ាន និង​កិច្ចប្រជុំ​កំពូល​ពាណិជ្ជកម្ម Bloomberg នៅ​អាស៊ាន លោកស្រី សីរី បាន​និយាយថា ខណៈ​​កម្ពុ​ជាយ​ក​ចិត្ត​ទុកដាក់​ចំពោះ​បញ្ហា​នេះ​យ៉ាង​ម៉ត់ចត់ រឿងរ៉ាវ​នេះ​មិនគួរ​មើលរំលង​សមិទ្ធផល និង​សក្តានុពល​វិនិយោគ​ដ៏​ទូលំទូលាយ​របស់​ប្រទេសជាតិ​នោះទេ​។​

លោកស្រី​បាន​ថ្លែង​កាលពី​ថ្ងៃទី ២៧ ខែតុលា នៅលើ​ប្រព័ន្ធ​ផ្សព្វផ្សាយ​សង្គម​របស់លោក​ស្រី​ថា “​​ព័ត៌មាន​អំពី​មជ្ឈមណ្ឌល​ឆបោក​នៅ​កម្ពុជា​ ជា​ការចោទប្រកាន់​ដ៏​គួរឱ្យ​ព្រួយបារម្ភ និង​បង្ក​គ្រោះថ្នាក់​យ៉ាងខ្លាំង​ដល់​រូបភាព​ប្រទេស​។ ប៉ុន្តែ​កម្ពុជា​មិន​ដូច​ការ​ចោទ​តាម​បណ្ដាញ​​ព័ត៌មាន​នេះ​ទេ។

លោកស្រី​បាន​គូសបញ្ជាក់​ ពី​មូលដ្ឋានគ្រឹះ​សេដ្ឋកិច្ច​វិជ្ជមាន​របស់​កម្ពុជា រួមទាំង​បរិយាកាស​វិនិយោគ​អំណោយផល ការលើកលែង​ពន្ធ​សម្រាប់​គម្រោង​ ដែលមាន​លក្ខណៈសម្បត្តិ​គ្រប់គ្រាន់ ប្រភព​ថាមពល​ស្អាត និង​អាកាសយានដ្ឋាន​អន្តរជាតិ​ភ្នំពេញ​តេ​ជោ ​ដែល​ទើបនឹង​បើក​ដំណើរការ​ថ្មី។

លោកស្រី​បាន​គូសបញ្ជាក់ថា “​អាកាសយានដ្ឋានថ្មីនេះ​ ត្រូវ​បានផ្តល់​មូលនិធិ​យ៉ាង​ពេញលេញ និង​គ្រប់គ្រង​ដោយ​ប្រជាជន​កម្ពុជា ផ្ទុយ​ពី​ចំណងជើង​ជាច្រើនរបស់​សារព័ត៌មាន​”។​

លោកស្រី សិរី​ បាន​សង្កត់ធ្ងន់ថា មជ្ឈមណ្ឌល​បោកប្រាស់​គឺជា​បញ្ហា​សកល​ដ៏​ស្មុគស្មាញ​មួយ មិនមែន​កំណត់​ចំពោះតែ​ប្រទេស​កម្ពុជា​នោះទេ ហើយ​ទាមទារ​កិច្ចសហប្រតិបត្តិការ​អន្តរជាតិ ​ដើម្បី​ដោះស្រាយ​ប្រកបដោយ​ប្រសិទ្ធភាព​។​

លោកស្រី​បាន​​ថ្លែង​ថា “​​ប្រតិបត្តិការ​របស់​ពួកគេ​មាន​ភាពមិនច្បាស់លាស់ និង​មាន​ទំនាក់ទំនង​គ្នា​ទៅវិញទៅមក​ទូទាំង​ពិភពលោក”​។ លោកស្រីបន្តថា “មជ្ឈមណ្ឌល​ឆបោក ​​មិន​ត្រឹមតែ​មាននៅ​ក្នុងប្រទេស​ក​ម្ពុ​ជា​ប៉ុណ្ណោះ​ទេ តែ​កម្ពុជា​ទទួល​​រងគ្រោះ​ក៏​ដូចគ្នា​ដែរ​​​។ ​​ដើម្បី​ដោះស្រាយ​បញ្ហា​នេះ យើង​ត្រូវការ​កិច្ចសហប្រតិបត្តិការ មិនមែន​ចង្អុល​ដាក់​គ្នា​ឡើយ​​”។​

លោកស្រី​បានបញ្ជាក់​ជាថ្មី​ នូវ​ការប្តេជ្ញាចិត្ត​របស់​កម្ពុ​ជា​ ក្នុងការ​ក្លាយជា​សមាជិក​ដ៏​គួរឱ្យ​ទុកចិត្ត និង​មាន​តម្លាភាព​នៃ​សហគមន៍​ហិរញ្ញវត្ថុ​អន្តរជាតិ ដោយ​កត់សម្គាល់ថា ប្រទេស​នេះ​បាន​ពង្រឹង​វិធានការ​ប្រឆាំង​ការលាង​លុយកខ្វក់ និង​ប្រឆាំង​ហិរញ្ញប្បទាន​ភេរវកម្ម (AML/CFT)ហើយនឹង​បន្ត​សហការ​ជាមួយ​អាជ្ញាធរ​អន្តរជាតិ ​ដើម្បី​ប្រយុទ្ធ​ប្រឆាំងនឹង​ឧក្រិដ្ឋកម្ម​បែបនេះ​។​

ពី​ទស្សនៈ​ទូលំទូលាយ លោកស្រី​បាន​បន្ថែមថា ការកើនឡើង​នៃប្រតិបត្តិ​ការបោកប្រាស់​ ឆ្លុះបញ្ចាំង​ពី​បញ្ហា​ដ៏​ជ្រៅ​ជាង​នេះ ដែល​តម្រូវការ​ ក្នុងការ​កែលម្អ​អក្ខរកម្ម​ឌីជីថល​ នៅពេល​១ខ្សែបន្ទាត់​រវាងAI និង​ការពិត​កាន់តែ​មិន​ច្បាស់លាស់​។​

ជាមួយគ្នានេះ នៅក្នុងអំឡុងពេល​ទស្សន​កិច្ច​រយៈពេល៣០​ ម៉ោង​​ ទៅកាន់​ទីក្រុង​គូ​ឡា​ឡាំ​ពួរ លោកស្រី សិរី​ ក៏បាន​ជួប​ជាមួយ​មេដឹកនាំ​អាជីវកម្ម​អាស៊ាន និង​បាន​ផ្លាស់ប្តូរ​ការយល់ដឹង​ជាមួយ​អ្នកធ្វើ​គោលនយោបាយ និង​អ្នកសិក្សា​សកល រួមទាំង​លោក Mark Carney, Kristalina Georgieva និង Jeffrey Sachs​។​

ការកត់សម្គាល់​របស់​លោកស្រី ​នៅក្នុង​កិច្ចប្រជុំ​កំពូល​ធុរកិច្ច​ទាំងពីរ​ បានបញ្ជាក់​ជាថ្មី​អំពី​ការត្រៀមខ្លួន​ របស់​ប្រទេស​កម្ពុជា​ក្នុងការ​ចូលរួម​ប្រកបដោយ​ស្ថាបនា ​លើ​កិច្ចសហប្រតិបត្តិការ​អន្តរជាតិ ការពារ​ភាពជឿជាក់​ផ្នែក​សេដ្ឋកិច្ច​របស់ខ្លួន និង​ធានាថា ​រឿងរ៉ាវ​របស់​​កម្ពុជា​​ត្រូវបាន​គេ​មើលឃើញ​ហួស​ ពី​ចំណងជើង​ព័ត៌មាន ​ដែល​នាំ​​ឱ្យ​​មានការ​យល់ច្រឡំ៕