ដោយ: គង់ លាងហួរ
បាងកក: គណៈកម្មាធិការកិច្ចការបរទេសនៃសភាថៃកំពុងជំរុញឱ្យរដ្ឋាភិបាលរបស់ខ្លួនពន្លឿនកិច្ចពិភាក្សាជាមួយកម្ពុជា ជុំវិញតំបន់ទាមទារដែនសមុទ្រត្រួតស៊ីគ្នា ដោយអះអាងថា ក្រុមបច្ចេកទេសថ្មីមួយគួរតែត្រូវបានបង្កើតឡើងដើម្បីបន្តការចរចា។

លោក Noppadon Patama ប្រធានគណៈកម្មាធិការកិច្ចការបរទេសនៃសភាថៃ បានមានប្រសាសន៍ឱ្យដឹងកាលពីថ្ងៃសុក្រ ទី១៥ ខែធ្នូ ថា កិច្ចខិតខំប្រឹងប្រែង ដើម្បីដោះស្រាយបញ្ហានៅតំបន់ទាមទារត្រួតសុីគ្នាធ្លាប់បានជាប់គាំង ប៉ុន្តែការផ្លាស់ប្តូរថ្នាក់ដឹកនាំនាពេលថ្មីៗនេះនឹងផ្តល់ឱកាសសម្រាប់ការចាប់ផ្តើមការចរចាថ្មីមួយ។លោកបន្តថាទំនាក់ទំនងដ៏ស្និទ្ធស្នាលរវាងនាយករដ្ឋមន្ត្រីថៃលោកសេដ្ឋា ថាវីសុីន និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នឹងអនុញ្ញាតឲ្យភាគីទាំងពីរបង្កើតក្របខ័ណ្ឌគោលនយោបាយ ដែលអនុញ្ញាតឲ្យអាជ្ញាធរ នៃប្រទេសទាំង២បន្តកុងសង់សុីស ឬការឯកភាពគ្នា។

លោក Noppadon បានអះអាងថា វឌ្ឍនភាពក្នុងការចរចាអាចជួយប្រទេសទាំងពីររួមគ្នាអភិវឌ្ឍតំបន់ដែលមានជម្លោះ និងប្រើប្រាស់ធនធានដ៏មានតម្លៃដើម្បីធានាសន្តិសុខថាមពល។

តំបន់ទាមទារត្រួតស៊ីគ្នា ដែលគ្របដណ្តប់ផ្ទៃក្រឡាជាង២៦.០០០គីឡូម៉ែត្រការ៉េនៅក្នុងឈូងសមុទ្រថៃត្រូវបានគេជឿថា មានផ្ទុកធនធានប្រេង និងឧស្ម័នធម្មជាតិដ៏ច្រើនមហាសាល។

លោក Noppadon បានមានប្រសាសន៍ឱ្យដឹងទៀតថា “គណៈកម្មាការកិច្ចការបរទេសនៃសភាថៃស្នើឱ្យរដ្ឋាភិបាលបង្កើតគណៈកម្មាធិការបច្ចេកទេសរួមថ្មីមួយ ដើម្បីធ្វើការពិភាក្សាគ្នាលើតំបន់ទាមទារត្រួតស៊ីគ្នា ក្នុងផលប្រយោជន៍នៃការបោះបង្គោលព្រំដែន និងការអភិវឌ្ឍន៍រួមគ្នា”។

កាលពីឆ្នាំ២០០៩ អនុស្សរណៈនៃការយោគយល់គ្នាស្តីពីព្រំដែនសមុទ្រដែលត្រូវបានចុះហត្ថលេខាក្នុងឆ្នាំ ២០០១ ក្រោមអាណត្តិគ្រប់គ្រងរបស់លោក ថាក់ស៊ីន ស៊ីណាវ៉ាត្រា ត្រូវបានដកហូតដោយរដ្ឋាភិបាលរបស់លោក អាប់ភីស៊ីត វេចាជីវ៉ា បន្ទាប់ពីលោក ថាក់ស៊ីនត្រូវបានតែងតាំងជាទីប្រឹក្សារដ្ឋាភិបាលកម្ពុជា៕Bangkok Post៕

ដោយ: គង់ លាងហួរ
អន្តរជាតិ: យោងតាមទិន្នន័យគយចិនបានបង្ហាញឱ្យដឹងកាលពីថ្ងៃព្រហស្បតិ៍ ទី៧ ខែវិច្ឆិកា ថា ពាណិជ្ជកម្មរវាងប្រទេសចិន និងរុស្ស៊ីឈានដល់ទំហំទឹកប្រាក់២១៨,២ពាន់លានដុល្លារ គិតចាប់ពីខែមករា រហូតដល់ខែវិច្ឆិកា ឆ្នាំ២០២៣។

តួលេខខាងលើបានបង្ហាញថា ប្រទេសទាំងពីរសម្រេចបាននូវគោលដៅដែលបានកំណត់ក្នុងឆ្នាំ២០១៩ និងលឿនជាងកាលកំណត់រយៈពេល១ឆ្នាំ។

ជាក់ស្តែង នៅឆ្នាំ២០១៩ ប្រទេសចិន និងរុស្ស៊ីបានព្រមព្រៀងគ្នាក្នុងការបង្កើនទំហំពាណិជ្ជកម្មដល់២០០ពាន់លានដុល្លារនៅឆ្នាំ២០២៤ ពី១០៧ពាន់លានដុល្លារក្នុងឆ្នាំ២០១៨ ប៉ុន្តែ គិតត្រឹមរយៈពេល១១ខែដំបូងដើមឆ្នាំនេះ វាបានកើនលើស២០០ពាន់លានដុល្លាររួចស្រេចទៅហើយ។

ទំហំពាណិជ្ជកម្មទ្វេរភាគីរវាងប្រទេសទាំង២ ក្នុងរយៈពេល១១ខែដំបូងដើមឆ្នាំនេះ ក៏បានកើនលើសពីទំហំសរុបនៃពាណិជ្ជកម្មទ្វេរភាគីសម្រាប់ឆ្នាំ២០២២ផងដែរ។ នេះបើយោងតាមទិន្នន័យរបស់រដ្ឋបាលគយចិន។

ប្រទេសចិន ដែលជាមហាអំណាចសេដ្ឋកិច្ចទីពីររបស់ពិភពលោកបានក្លាយជាខ្សែជីវិតសេដ្ឋកិច្ចដ៏សំខាន់សម្រាប់ប្រទេសរុស្ស៊ី ដែលស្ថិតនៅក្រោមការដាក់ទណ្ឌកម្មរបស់លោកខាងលិច ស្របពេលមានសង្រ្គាមរុស្ស៊ី-អ៊ុយក្រែនដែលកំពុងបន្ត។

សម្រាប់ខែវិច្ឆិកា ពាណិជ្ជកម្មទ្វេរភាគីបានកើនឡើងដល់ទំហំទឹកប្រាក់២១,៥ពាន់លានដុល្លារ ដែលជាចំនួនខ្ពស់បំផុតគិតចាប់តាំងពីខែកុម្ភៈ ឆ្នាំ២០២២ និងជាពេល ដែលសង្រ្គាមនៅប្រទេសអ៊ុយក្រែនបានចាប់ផ្តើមផ្ទុះឡើង។

ការនាំចេញរបស់ចិនទៅកាន់ប្រទេសរុស្ស៊ីបានកើនឡើង៣៤% ដល់ទំហំទឹកប្រាក់១០,៣ពាន់លានដុល្លារក្នុងខែវិច្ឆិកា ធៀបនឹងឆ្នាំមុន ដែលកើនឡើងទ្វេរដង បើធៀបនឹងអត្រាកំណើន១៧% នៅក្នុងខែតុលា។ នេះបើយោងតាមការគណនារបស់សារពត៌មាន Reuters ដោយផ្អែកលើទិន្នន័យគយចិន។

ឯកអគ្គរដ្ឋទូតចិនប្រចាំនៅរុស្ស៊ីបានមានប្រសាសន៍ឱ្យដឹងកាលពីខែមុនថា ខណៈដែលរុស្ស៊ីបានក្លាយជាអ្នកទិញរថយន្តចិនដ៏សំខាន់ ដូច្នេះប្រទេសចិនសង្ឃឹមថា រុស្ស៊ីនឹងផ្តល់ការគាំទ្រគោលនយោបាយសម្រាប់សហគ្រាសផលិតរថយន្តចិនក្នុងការផលិត លក់ និងប្រតិបត្តិការនៅក្នុងប្រទេសរុស្ស៊ី។

ចំណែកឯ ការនាំចូលរបស់ចិនពីប្រទេសរុស្ស៊ីបានកើនឡើង៦% ដល់ទំហំទឹកប្រាក់១១,២ពាន់លានដុល្លារកាលពីខែវិច្ឆិកា បន្ទាប់ពីកើនឡើង៩% ក្នុងខែតុលា៕

ដោយ: គង់ លាងហួរ
អន្តរជាតិ: សន្ទស្សន៍ទំនុកចិត្តរបស់អ្នកទិញផ្ទះនៅប្រទេសថៃ ក្នុងឆ្នាំ២០២៣នេះ បានធ្លាក់ចុះ ដោយសារស្ថានភាពហិរញ្ញវត្ថុរបស់អ្នកទិញមានភាពតានតឹង ដែលពួកគេយល់ឃើញថា វាពុំមែនជាពេលវេលាត្រឹមត្រូវក្នុងការវិនិយោគលើវត្ថុដែលមានតម្លៃខ្ពស់នោះទេ។

លោកស្រី Sumitra Wongpakdee នាយកគ្រប់គ្រងនៃក្រុមហ៊ុនស្រាវជ្រាវ និងប្រឹក្សាអចលនទ្រព្យ Terra Media and Consulting បានអះអាងថា សន្ទស្សន៍ទំនុកចិត្តរបស់អ្នកទិញផ្ទះនៅឆ្នាំនេះ គឺ៧៦ពិន្ទុ ពោលគឺធ្លាក់ចុះពី៨០ពិន្ទុ ក្នុងឆ្នាំ២០២២។

លោកស្រីបន្តថា “ក្រុមអ្នកប្រើប្រាស់ពេញចិត្ត នឹង សេដ្ឋកិច្ចថៃ ប៉ុន្តែទំនុកចិត្តលើស្ថានភាពហិរញ្ញវត្ថុបច្ចុប្បន្នរបស់ពួកគេបានធ្លាក់ចុះបើធៀប នឹងឆ្នាំមុនហើយអ្នកជំនាញវិជ្ជាជីវៈគឺជាក្រុមអាជីពតែមួយគត់ដែលបង្ហាញពីទំនុកចិត្តទាបលើប្រាក់ចំណូលរបស់ពួកគេ”។

លោកស្រី Sumitra បានគូសបញ្ជាក់ឱ្យដឹងថា ហេតុផលមួយ ដែលបង្ហាញថា ក្រុមអ្នកជំនាញវិជ្ជាជីវៈ ប្រហែលជាមិនទិញផ្ទះនៅឆ្នាំ២០២៤គឺការកើនឡើងនៃតម្លៃផ្ទះ។

នាយកគ្រប់គ្រងរូបនេះបានឱ្យដឹងទៀតថា នៅក្នុងអំឡុងពេលនៃការផ្ទុះជំងឺរាតត្បាតកូវីដ-១៩ ក្រុមអ្នកជំនាញវិជ្ជាជីវៈមួយចំនួនរកបានប្រាក់ចំណូលច្រើនជាងធម្មតា ហើយពួកគេប្រហែលជាបានទិញផ្ទះរួចទៅហើយក្នុងរយៈពេលពីរឆ្នាំកន្លងមកនេះ។

ក្រុមហ៊ុន Terra Media បានធ្វើការស្ទង់មតិសម្រាប់សន្ទស្សន៍ទំនុកចិត្តអ្នកប្រើប្រាស់ក្នុងចំណោមអ្នកចង់ទិញផ្ទះចំនួន២.០០០នាក់ តាមរយៈបណ្តាញអុីនធឺណេតចាប់ពីថ្ងៃទី១ ខែតុលាដល់ថ្ងៃទី៨ ខែវិច្ឆិកា។

ទោះបីជាមានការធ្លាក់ចុះបែបនេះយ៉ាងណាក្តី ក៏សន្ទស្សន៍ទំនុកចិត្តរបស់អ្នកទិញផ្ទះក្នុងឆ្នាំ២០២៣នេះនៅតែមានកម្រិតខ្ពស់ជាង បើធៀបនឹង សន្ទស្សន៍ទំនុកចិត្តរបស់អ្នកទិញផ្ទះ ដែលមានកម្រិត៦៨ពិន្ទុ និង៤៤ពិន្ទុ ក្នុងឆ្នាំ២០២០ និងឆ្នាំ២០២១រៀងៗគ្នា។

ការស្ទង់មតិបានរកឃើញថា ៨៤០នាក់នៃអ្នកឆ្លើយសំណួរទាំង២.០០០នាក់គ្រោងនឹងទិញលំនៅដ្ឋានក្នុងរយៈពេល៣ឆ្នាំខាងមុខ ដែលក្នុង នោះ ៧៨% មាន បំណង ទិញ ផ្ទះ ទោល ៤៧% ចង់ ទិញផ្ទះ townhouse ២៧% ចង់ទិញខុនដូ និង ២០% ចាប់អារម្មណ៍ ជម្រើស ផ្សេង ទៀត៕

ដោយ: គង់ លាងហួរ      

ភ្នំពេញ: ក្រុមហ៊ុន Strategic Realty Investment Co., Ltd (SRI) បានបើកដំណើរការកោះឯកជនមួយ ដែលមានឈ្មោះថា “កោះឋានសួគ៌” ស្ថិតនៅក្នុងគម្រោងខ្នាតយក្ស Banteay Srei Eco City ។

Banteay Srei Eco City គឺជាគម្រោងប្រើប្រាស់ចម្រុះខ្នាតយក្ស ដែលកំពុងត្រូវបានអភិវឌ្ឍឡើងយ៉ាងសកម្ម លាតសន្ធឹងលើផ្ទៃដីប្រមាណ៣០០ហិកតា ដែលស្ថិតក្នុងស្រុកបន្ទាយស្រី ខេត្តសៀមរាប។លោកបណ្ឌិត Alexander Evengroen ដៃគូ និងជានាយកផ្នែកអភិវឌ្ឍន៍គម្រោងរបស់ក្រុមហ៊ុន Strategic Realty Investment Co., Ltd  បានលើកឡើងថា “ខ្ញុំរីករាយយ៉ាងខ្លាំង ដែលបានមើលឃើញការវិវឌ្ឍន៍លើការរចនាគម្រោង Banteay Srei Eco City របស់យើងគឺកោះឋានសួគ៌”។

កោះឋានសួគ៌នេះ មានផ្ទះវីឡាដ៏ស្រស់ស្អាត និងប្រណីតចំនួន៧ និងត្រូវបានហ៊ុំព័ទ្ធទៅដោយទឹក ជាប់មាត់ស្ទឹងសៀមរាប ដែលស្ថិតក្នុងស្រុកបន្ទាយស្រីនៃខេត្តសៀមរាប។លោកបណ្ឌិត Alexander បានមានប្រសាសន៍ឱ្យដឹងថា ស្ថាបត្យករ និងក្រុមការងាររបស់ក្រុមហ៊ុន SRI បានខិតខំធ្វើការយ៉ាងខ្លាំង ដើម្បីបញ្ចប់ការរចនាផ្ទះវីឡា នៅលើកោះឋានសួគ៌ សម្រាប់បំពេញគម្រោង Banteay Srei Eco City ។

លោកបានបន្តថា យើង​បាន​បញ្ជាក់ និងធ្វើ​ឱ្យ​ប្រាកដ​ថា​ ក្រុមហ៊ុននឹង​សាងសង់វីឡា​ដ៏​ប្រណីត មានភាពច្នៃប្រឌិត និង​មិន​ប៉ះពាល់​ដល់​បរិស្ថាន ដែល​នឹង​បន្សល់​ទុក​នូវ​កេរដំណែលដ៏អស្ចារ្យ។វីឡាទាំងនោះត្រូវបានសាងសង់ លើផ្ទៃដីប្រមាណ២.០០០ម៉ែត្រការ៉េ ហើយត្រូវបានដាក់ឈ្មោះដូចជា វីឡា Heritage Villa ទំហំ៤០០ម៉ែត្រការ៉េ វីឡា Diamond Villa ទំហំ៣៨៦ម៉ែត្រការ៉េ វីឡា Emerald Villa ទំហំ៣៩៤ម៉ែត្រការ៉េ និងវីឡា Sunshine Villa ទំហំ៣៩៤ម៉ែត្រការ៉េ។

លោកបណ្ឌិត Alexander Evengroen បានបន្ថែមថា នៅជាប់កោះឋានសួគ៌របស់យើង មានរបស់ជាច្រើនទៀត ដែលគួរឱ្យចាប់អារម្មណ៍ ដូចជាតំបន់សហគ្រាសធុនតូច និងមធ្យម សាលារៀន សាកលវិទ្យាល័យ ផ្សារទំនើប កន្លែងលេងកីឡា និងសួនទឹក ដីឡូតិ៍ ផ្សារក្នុងស្រុក សួនច្បារ កន្លែងលក់ទំនិញ កន្លែងស្រស់ស្រូបអាហារ តំបន់កសិកម្ម មជ្ឈមណ្ឌលអាពាហ៍ពិពាហ៍ និងសន្និបាត កីឡដ្ឋានបាល់ទាត់ និងអ្វីៗជាច្រើនផ្សេងទៀត។ក្រុមហ៊ុន Strategic Realty Investment Co., Ltd ត្រូវបានបង្កើតឡើងកាលពីខែកុម្ភៈ ឆ្នាំ២០២២ ហើយសព្វថ្ងៃនេះ SRI គឺជាក្រុមហ៊ុនមួយ ក្នុងចំណោមក្រុមហ៊ុនអភិវឌ្ឍន៍អចលនទ្រព្យ ដែលប្រកបដោយភាពច្នៃប្រឌិតខ្ពស់នៅកម្ពុជា។

ដោយសារមានជំនាញជាសកលនៅក្នុងទីផ្សារ មហិច្ឆតាកំនើនដ៏រឹងមាំ និងគំនិតនៃការច្នៃប្រឌិតខ្ពស់ ក្រុមហ៊ុន Strategic Realty Investment Co., Ltd កំពុងផ្តោតលើការរីកចម្រើន ការអភិវឌ្ឍន៍ជាយុទ្ធសាស្ត្រ និងការរួមចំណែកដល់ការអភិវឌ្ឍន៍ ប្រកបដោយភាពច្នៃប្រឌិតនៅកម្ពុជា។ជាមួយគ្នានេះ ក្រុមហ៊ុន Strategic Realty Investment Co., Ltd កំពុងខិតខំធ្វើការយ៉ាងខ្លាំង ដើម្បីប្រែក្លាយខ្លួនជាក្រុមហ៊ុនដ៏ល្បីឈ្មោះ តាមរយៈការផ្តល់ជូននូវគុណភាពខ្ពស់ ភាពជឿជាក់ ការអភិវឌ្ឍប្រកបដោយភាពច្នៃប្រឌិត ភាពប្លែក និងទំនុកចិត្តដល់អតិថិជន។

លើសពីនេះ ស្តង់ដារខ្ពស់បំផុតនៃការរចនា និងសំណង់ និរន្តរភាព ការផ្តល់ត្រឡប់ទៅកាន់សហគមន៍ និងធម្មជាតិ ការបង្កើតឱកាសការងារ និងការវិនិយោគដ៏គួរឱ្យភ្ញាក់ផ្អើល គឺជាកម្លាំងចលករជំរុញរបស់ក្រុមហ៊ុន Strategic Realty Investment៕

ដោយៈ គង់ សូរិយា

ភ្នំពេញៈ ជាអ្នកជំនាញជើងចាស់ និងបានក្លាយជាអ្នកអភិវឌ្ឍន៍អចលនទ្រព្យដោយខ្លួនឯង លោកឧកញ៉ានួន រឹទ្ធី បានមានប្រសាសន៍ថា ទីផ្សារអចលនទ្រព្យនឹងងើបឡើងវិញបន្តិចម្តងៗ ចាប់ពីពាក់កណ្តា​លឆ្នាំ២០២៤។

លោកឧកញ៉ាបានមានប្រសាសន៍ឲ្យដឹង តាមបណ្តាញតេឡេក្រាមកាលពីចុងសប្តាហ៍មុនថា ការងារលើវិស័យអចលនទ្រព្យនឹងមានសភាពធូរស្បើយបន្តិចម្តងៗ ហើយនៅឆ្នាំ២០២៥ អ្វីៗនឹងមានសភាពមករកសភាពដើមបន្តិចម្តងៗ ប៉ុន្តែសន្ទុះនៃការវិលមករកសភាពដើមពេញលេញ នឹងចាប់ផ្តើមនៅចុងឆ្នាំ២០២៥ និងឆ្នាំ២០២៦ខាងមុខ។លោកឧកញ៉ាបានបន្តថា បើសភាពការណ៍ពិភពលោក មានការធូរស្រាលលើបញ្ហាភូមិសាស្រ្ត នយោបាយរវាងអាមេរិក និងចិននឹងធ្វើឲ្យសេដ្ឋកិច្ចពិភពលោក នឹងងាយភាពប្រសើរឡើងទាំងពិភពលោក និងកម្ពុជា”។

សញ្ញាសុទិដ្ឋិនិយមបាន និងកំពុងចាប់ផ្តើមនៅកម្ពុជា ដោយសា​រធនាគារពាណិជ្ជ និងស្ថាប័នហិរញ្ញវត្ថុដទៃទៀត នឹងចាប់ផ្តើមបញ្ចេ​ញឥណទាននៅឆ្នាំ២០២៤ ស្របពេលវិស័យទេសចរណ៍រំពឹងនឹងងើបឡើងវិញ ជាមួយនឹងវិស័យឧស្សាហមកម្ម និងកសិកម្ម និងកសិឧស្សា​ហក​ម្មផងដែរ។

ជាមួយគ្នានេះ លោកឧកញ៉ាបណ្ឌិតគីម ហ៊ាង ប្រធានKW Cambodia និងជាអ្នកអភិវឌ្ឍន៍បុរីវិមានសំណាងបានមានប្រសាសន៍ឲ្យដឹងផងដែរថា ឆ្នាំ២០២៤នឹងមានសភាពល្អច្រើន សម្រាប់វិស័យនេះ ដោយសារមនុស្សសាំនឹងសង្រ្គាម កូវីដ១៩បញ្ចប់ ការបោះឆ្នោតបញ្ចប់ហើយ ហើយសមាសភាពដឹកនាំរបស់រដ្ឋាភិបាល ភាគច្រើនជាមនុស្សវ័យក្មេង ដែលមានថាមពល និងភាពឈ្លាសវៃ។លោកបន្តថា “វិស័យផ្សេងៗក្រៅពីអចលនទ្រព្យ នឹងងើបឡើងផងដែរ ហើយបើវិស័យដទៃទៀតមានភាពប្រសើរ នឹងធ្វើឲ្យវិស័យអចលនទ្រព្យងើបឡើងផងដែរ”។ លោកបន្តថា “ឆ្នាំ២០២៣ យើងធ្លាក់ដល់បាតហើយ យើងឈប់ធ្លាក់ហើយ ហេតុនេះវិស័យនេះនឹងងើបឡើង តែតម្លៃមិនកើនឡើងទេ”៕

ដោយ: គង់ លាងហួរ
ប៉េកាំង: ក្រុមហ៊ុនអភិវឌ្ឍន៍អចលនទ្រព្យចិន Country Garden បានប្រកាសឱ្យដឹងនៅថ្ងៃទី១៤ ខែធ្នូនេះថា ខ្លួនបានលក់ភាគហ៊ុននៅក្នុងក្រុមហ៊ុនបុត្រសម្ព័ន្ធ Gold Ease Global ប្រមាណ ១,៧៩% ទៅឱ្យក្រុមហ៊ុន Zhuhai Wanda Commercial Management Group។

ការលក់ភាគហ៊ុនចំនួន១,៧៩%នេះ ស្ថិតក្នុងទំហំទឹកប្រាក់ចំនួន៣,០៧ពាន់លានយ័ន(ប្រហែល៤២៨លានដុល្លារ)។ នេះបើយោងតាមការចុះផ្សាយដោយសារព័ត៌មាន CNA។ការប្រកាសដាក់លក់ភាគហ៊ុនដ៏ប្រញាប់ប្រញាល់នេះ បានធ្វើឡើង ស្របពេលដែលម្ចាស់បំណុលរបស់ក្រុមហ៊ុន Country Garden កំពុង ទាមទារការសងប្រាក់ ខណៈវិស័យអចលនទ្រព្យនៅប្រទេសចិនក៏កំពុង ប្រឈម ហានិភ័យកាន់តែខ្ពស់បន្ថែមទៀត។ក្រុមហ៊ុនអភិវឌ្ឍន៍អចលនទ្រព្យខ្នាតយក្សរបស់ប្រទេសចិនមួយនេះបានលើកឡើងថា ពួកគេនឹងប្រើប្រាស់ថវិកា ដែលទទួលបានមកពីការលក់ភាគហ៊ុនទាំងនេះ ដើម្បីរៀបចំរចនាសម្ព័ន្ធបំណុល ជាមួយម្ចាស់បំណុលបរទេស ឡើងវិញ។

បច្ចុប្បន្ននេះ ក្រុមហ៊ុន Country Garden កំពុងជំពាក់បំណុលគេប្រហែល១៩០ពាន់លានដុល្លារ និងមានគម្រោងជាង៣.០០០ ដែលកំពុងស្ថិតនៅក្រោម ការសាងសង់នៅឡើយ។

កន្លងមក ក្រុមហ៊ុន Country Garden តែងតែព្យាយាមដោះស្រាយជាមួយម្ចាស់បំណុល តាមរយៈការរៀបចំ រចនាសម្ព័ន្ធបំណុល ប៉ុន្តែភាគីទាំងសងខាងមិនទាន់ឈានដល់ កិច្ចព្រមព្រៀងជាផ្លូវការ ជុំវិញការ ដោះស្រាយបញ្ហាមួយនេះនៅឡើយទេ៕