ដោយៈ តែម សុខុម

សៀងហៃ: និយ័តករមូលបត្រនៃប្រទេសចិន បានបង្ហាញកញ្ចប់វិធានការថ្មី កាលពីថ្ងៃសុក្រ ទី១៨ ខែសីហា ដើម្បីស្តារឡើងវិញនូវផ្សារហ៊ុនរបស់ខ្លួនដែលកំពុងដាំក្បាលចុះ។

ទោះជាយ៉ាងណា ក្រុមអ្នកវិនិយោគបានលើកឡើងថា វិធានការទាំងនោះ នឹងជួយបានតិចតូចណាស់ ក្នុងការបង្កើនទំនុកចិត្តក្នុងទីផ្សារ ប្រសិនបើសេដ្ឋកិច្ចនៅតែធ្លាក់ចុះ។

គណៈកម្មាធិការនិយ័តកម្មមូលបត្រចិន (CSRC) បានស្នើវិធានការនានា រួមទាំងការកាត់បន្ថយថ្លៃដើមនៃការជួញដូរ ការគាំទ្រការទិញយកភាគហ៊ុនត្រលប់មកវិញ និងការលើកទឹកចិត្តដល់ការវិនិយោគរយៈពេលវែង ដើម្បីគាំទ្រដល់ផ្សារហ៊ុន ដែលបានធ្លាក់ចុះដល់កម្រិ​តទាបរយៈពេល៩ខែផងដែរ។

និយ័តករមូបត្រនិយាយថា ខ្លួនមិនដឹងទេថានឹងមាន ឬគ្មានការកាត់ពន្ធប្រថាប់ត្រា ជាវិធានការមួយ ដែលត្រូវបានលើកយកទៅពិភាក្សានាពេលថ្មីៗនេះ ព្រោះគណៈកម្មាធិការនិយ័តកម្មមូលបត្រចិន (CSRC) និយាយថា វិធានការទាំងនោះ ហួសដែនអំណាចរបស់ខ្លួន ដោយសារវាស្ថិតក្រោមដែន អំណាចរបស់ក្រសួងហិរញ្ញវត្ថុ។

វិធានការផ្សេងៗទៀត ដែលដាក់ចេញដោយគណៈកម្មាធិការនិយ័តកម្មមូលបត្រចិន (CSRC) រួមទាំងការជំរុញការអភិវឌ្ឍមូលនិធិសមធម៌ ការសិក្សាផែនការបន្ថែមម៉ោងជួញដូរ និងការធ្វើឱ្យប្រសើរឡើង នូវភាពទាក់ទាញរបស់បណ្ដាក្រុមហ៊ុន ដែលបានចុះបញ្ជីផងដែរ។

ក្រុមមេដឹកនាំនៃប្រទេសចិន កាលពីចុងខែកក្កដា បានប្តេជ្ញាពង្រឹងឡើងវិញនូវផ្សារហ៊ុន ដែលបាននិងកំពុងដាំក្បាលចុះផងដែរ ខណៈការងើបឡើងវិញនៃសេដ្ឋកិច្ចចិន បានបាត់បង់សន្ទុះ ហើយវិបត្តិក្នុងទីផ្សារអចលនទ្រព្យក៏កាន់តែធ្ងន់ធ្ងរទៅៗ៕ Reuters៕

តែម សុខុម

ហាណូយ: ក្រុមហ៊ុនបណ្តាក់ទុនរួមគ្នាវៀតណាម-ឡាវ បានស្នើគម្រោងសាងសង់ផ្លូវដែកមួយខ្សែប្រវែង១០៣គីឡូម៉ែត្រឆ្លងកាត់ខេត្តពីរនៃប្រទេសវៀតណាម គឺខេត្តហាទិញ (Ha Tinh) និងខេត្តក្វាងប៊ិញ (Quang Binh) ឆ្ពោះទៅដល់ព្រំដែនប្រទេសឡាវ។

ការបណ្តាក់ទុនរួមគ្នារវាងក្រុមហ៊ុនវៀតណាម ដេវកា គ្រុប (Deo Ca Group) និងក្រុមហ៊ុនឡាវ Petroleum Trading Lao Public Company នេះបានដាក់សំណើទៅក្រសួងដឹកជញ្ជូនរបស់វៀតណាម ដើម្បីសុំសាងសង់ផ្លូវដែកនេះក្នុងទំហំទឹកប្រាក់១,១៦ពាន់លានដុល្លារអាមេរិក។ នេះបើយោងតាមសារព័ត៌មាន VN Express ចុះផ្សាយកាលពីថ្ងៃកាលពីសប្ដាហ៍មុន។

កំណាត់ផ្លូវដែកដែលមានឈ្មោះថា “វង់អាន-តាន់អាប់-មុហ្សា (Vung Ang – Tan Ap – Mu Gia) ខាងលើនេះនឹងរត់ពីកំពង់ផែវង់អាន (Vung Ang) ក្នុងខេត្តហាទិញ (Ha Tinh) ទៅកាន់មុហ្សា (Mu Gia) ជាជ្រលងភ្នំនៃជួរភ្នំអណ្ណាម (Annamite Range) ដែលស្ថិតនៅចន្លោះប្រទេសវៀតណាម និងប្រទេសឡាវ។

ផ្លូវដែកនេះនឹងត្រូវសាងសង់ក្រោមទម្រង់ចាប់ដៃគូសហកាតរវាងវិស័យសាធារណៈ និងឯកជន ជាផ្លូវដែកដែលអនុញ្ញាតឱ្យរថភ្លើងរត់ក្នុងល្បឿនអតិបរមា១៥០គីឡូម៉ែត្រក្នុងមួយម៉ោង សម្រាប់ដឹកជញ្ជូនទាំងអ្នកដំណើរ និងទំនិញ។ក្រុមហ៊ុនបណ្តាក់ទុនរួមគ្នានេះបានសន្យាថា នឹងរ៉ាប់រងចេញរាល់ការចំណាយសម្រាប់ការសិក្សាគម្រោងនេះ និងទទួលយកការខាតបង់ផ្នែកហិរញ្ញវត្ថុ ប្រសិនបើការសិក្សាសមិទ្ធលទ្ធភាពរបស់គម្រោងមិនត្រូវបានអនុម័ត។

គម្រោងផ្លូវដែកដែលបានស្នើឡើងនេះគឺជាផ្នែកមួយនៃគម្រោងផ្លូវដែកវៀតណាម-ឡាវ ប្រវែង៥៥៤គីឡូម៉ែត្រដែលនឹងតភ្ជាប់រដ្ឋធានីវៀងចន្ទន៍ របស់ឡាវ ជាមួយកំពង់ផែវង់អាន (Vung Ang) របស់វៀតណាម។គម្រោងផ្លូវដែកវៀតណាម-ឡាវ ប្រវែង៥៥៤គីឡូម៉ែត្រនេះត្រូវបានរដ្ឋាភិបាលអនុម័តឱ្យអនុវត្តមុនឆ្នាំ២០៣០៕ VN Express៕

        ដោយៈ សហការី

ភ្នំពេញៈ ក្រុមហ៊ុនអភិវឌ្ឍន៍អចលនទ្រព្យឈានមុខគេ ដែលបានបង្កើតឡើងដោយកូនខ្មែរសុទ្ធសាធ បានប្រកាសបើកសម្ពោធការិយាល័យកណ្តាលរបស់ខ្លួន ដែលស្ថិតនៅលើផ្លូវ២៧១កាលពីចុងសប្តាហ៍មុន។ក្រុមហ៊ុនបុស្បា ប្រូផឹធី ជាក្រុមហ៊ុនអភិវឌ្ឍន៍អចលនទ្រព្យលើគម្រោងលំនៅដ្ឋាន​ បុស្បា អប្សរមេរា ស្ថិតនៅភូមិព្រៃវែងខាងលិច សង្កាត់ព្រៃវែង ខណ្ឌដង្កោ រាជធានីភ្នំពេញ។

ការិយាល័យកណ្តាល ស្ថិតនៅក្នុងអគារលេខ​ 678 ផ្លូវលេខ 271 ភូមិព្រែកតានូ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដែលផ្តល់ជូនភាពងាយស្រួល និងទំនុកចិត្តដល់អតិថិជន​ ដើម្បីផ្តល់គុណតម្លៃ និងបោះជំហានទៅមុខ ប្រកបដោយនិរន្តរ៍ភាព និងគុណភាព។

លោកអ៊ី ពិសិដ្ឋ សមាជិកក្រុមបឹក្សាភិបាល និងជាតំណាងដ៏ខ្ពង់ខ្ពស់​ លោកឧកញ៉ាឈាង រ័ត្ន ប្រធានក្រុមបឹក្សាភិបាល និងស្ថាប​និក ក្រុមហ៊ុនបុស្បា ប្រផឹធីថា  “ខ្ញុំជឿជាក់យ៉ាងមុតមាំថា វត្តមានរបស់ក្រុមហ៊ុន បុស្បា ប្រផឹធី នឹងចូលរួមចំណែកដល់ការអភិវឌ្ឍន៍វិស័យអចលនទ្រព្យនៅកម្ពុជាយើង តាមរយៈបទពិសោធន៍ ចំណេះដឹង ជំនាញ ដែលក្រុមហ៊ុន​បុស្បា​ ប្រផឹធី មានក្នុងវិស័យអចលនទ្រព្យអស់រយៈពេលជាង៦ឆ្នាំកន្លងមក”។

ជាមួយគ្នានេះ លោកនាយកប្រតិបត្តិ លោក ទីម វណ្ណនី បានមានប្រសាសន៍ថា ក្នុងនាមជាវិនិយោគិន ដែលមានការប្តេជ្ញាចិត្តខ្ពស់  ក្រុមហ៊ុន បុស្បា​ ប្រផឹធី នឹងផ្តល់ជូនលំនៅដ្ឋានបែបអភិជន ការរស់នៅបែបស៊ីវិល័យ​ ឯកជន និងសេវាកម្មរបស់ខ្លួននៅក្នុងប្រទេសកម្ពុជាយូរអង្វែង។

លោកបញ្ជាក់ថា “ក្រុមហ៊ុនបានត្រៀមខ្លួនរួចជាស្រេច ដើម្បីបម្រើ និងបំពេញតម្រូវការលំនៅដ្ឋានលំដាប់ខ្ពស់ ជូនដល់ប្រជាជនកម្ពុជាគ្រប់រូប ដូចពាក្យស្លោករប​ស់ក្រុមហ៊ុន បុស្បា ប្រផឹធី និយាយថា “បង្កើតអនាគតជាមួយបុរីបុស្បា”។

នៅថ្ងៃដដែលនេះ នៅការិយាល័យកណ្តាលរបស់ខ្លួន ដើម្បីចូលរួមអបអរសាទរដល់ក្រុមហ៊ុន បុស្បា ប្រផឹធី ក៏ទទួលបានពានរង្វាន់ ការអភិវឌ្ឍន៍ល្អបំផុតនៅក្នុងរាជធានីភ្នំពេញ នៃគម្រោងលំនៅឋាន អប្សរមេរា​ របស់ក្រុមហ៊ុន​បុស្បា​ ប្រផឹធី ឮឬ Best Housing Development Greater Phnom Penh Apsor Mera by Bosba Property Company នៅសណ្ឋាគារ សូហ្វីតែល ភ្នំពេញ ភូគីត្រា រៀបចំឡើងដោយ ក្រុមហ៊ុន PropertyGuru Asia កាលពីថ្ងៃទី១៨ ខែសីហា ឆ្នាំ២០២៣ ដែលមានការចូលរួមពីក្រុមហ៊ុនជាតិ និងអន្តរជាតិយ៉ាងច្រើនកុះករ។

លោកទីម វណ្ណនីបានបន្ថែមថា “ក្នុងនាមជាថ្នាក់ដឹកនាំ ព្រមទាំងបុគ្គលិក​ទាំងអស់ មានសេចក្តីត្រេកអរសោមន្សយ៉ាងក្រៃលែង ចំពោះពានរង្វាន់មួយនេះ គិតត្រឹមថ្ងៃទី១៩ ខែសីហា ឆ្នាំ២០២៣កន្លងមក នេះ​ បុស្បាទទួលបានពានរង្វាន់ទាំងក្នុងស្រុក និងក្រៅស្រុកសរុប១៣ពានរង្វាន់​ ដែលទាំងអស់នេះ គឺជាសមិទ្ធិផលលើសពីការរំពឹងទុក​ ដែលបង្ហាញពីការរីកចម្រើនយ៉ាងរហ័ស របស់ក្រុមហ៊ុនបុស្បា ដើម្បីកសាងនូវទំនុកចិត្ត និងសុទិដ្ឋិនិយមខ្ពស់។​

លោកបន្តថា “យើងជឿជាក់ថាម៉ូតផ្ទះដ៏ស្រស់ស្អាត នៃគម្រោងលំនៅដ្ឋានដ៏ស្រស់ត្រកាលនេះ នឹងបំពេញនូវភាពសុខរមនា ការរស់នៅបែបសម័យថ្មី និងតម្លៃសមរម្យដល់អតិថិជនរបស់យើងខ្ញុំ”។ លោកបន្តថា “ពួកយើងជឿជាក់ទៅលើវិជ្ជាជីវៈ សុច្ចរិតភាព គុណភាពជាចម្បង និងការប្តេជ្ញាចិត្តរបស់ក្រុមហ៊ុន បុស្បា នឹងផ្តល់ជូនលំនៅដ្ឋានដ៏ឯកជូនអតិថិជន។ឆ្លៀតនៅក្នុងថ្ងៃដ៏នេះក្រុមហ៊ុន បុស្បា ក៏មានការផ្តល់ជូនយ៉ាងល្អ ភាពបត់បែនដ៏បំផុតសម្រាប់អតិថិជនជាច្រើនរួមមាន ទី១ ទិញវីឡាអេនជែល បញ្ចុះតម្លៃ15% រួមទាំងដំណើរកម្សាន្តទៅកាន់ទីក្រុងឌូប៉ៃ 5ថ្ងៃ4យប់ ចំនួន 2សំបុត្រ។ ទី២ ទិញវីឡាកូនកាត់ទំនើបថ្មី បញ្ចុះតម្លៃ $32,000 និងកាដូយ៉ាងស្រស់ស្អាតមួយឈុតភ្លាមៗ។ ទី៣ រីឯផ្ទះវីឡាផ្សេងទៀត៖​ ​វីឡាស៊ុបពើធីន វីឡាភ្លោះម៉ូឌីន​ ផ្ទះអាជីវកម្ម អេ និងប៊ី បញ្ចុះតម្លៃ 15% និងកាដូយ៉ាងស្រស់ស្អាតមួយឈុតភ្លាមៗ។ កាន់អស្ចារ្យជាងនេះទៅទៀតផ្តល់ជូនកង ដើម្បីបង្វិលយកសំណាងទ្វេដង គ្រាន់តែអតិថិជន អញ្ជើញទៅកាន់ការិយាល័យលក់។
អតិថិជនទាំងអស់សូមអញ្ជើញទស្សនាផ្ទះគំរូ និងជួបជាមួយទីបឹក្សាផ្នែកលក់តាមរយៈលេខ៖ 081/067/099 230 789៕

ដោយៈ គង់ ហ្វីអូណា

        សៀមរាបៈ  អនុវត្តតាមផែនការមេអភិវឌ្ឍន៍ទេសចរណ៍ ខេត្តសៀមរាប ឆ្នាំ២០២១-២០៣៥ ក្រសួងទេសចរណ៍បានដាក់ឱ្យអនុវត្ត “ផែនការយុទ្ធសាស្ត្រផ្សព្វផ្សាយ និងទាក់ទាញទេសចរណ៍ខេត្តសៀម​រាប ឆ្នាំ២០២៣-២០២៦”។ ការប្រកាសនេះ ធ្វើឡើងតាមរយៈប្រកាសរបស់ក្រសួងទេស​ចរណ៍ លេខ ១៣៦ប្រក ចុះនៅថ្ងៃទី១១ ខែសីហា ឆ្នាំ២០២៣។

គោលបំណងនៃផែនការយុទ្ធសាស្រ្ត គឺដាក់ចេញនូវសកម្មភាពផ្សព្វផ្សាយ និងផ្តោតសំខាន់លើការទាក់ទាញ ប្រភពទីផ្សារទេសច​រណ៍គោលដៅ ក្នុងរយៈពេលខ្លី និងមធ្យមខាងមុខ តាមរយៈការធ្វើអាទិភាវូបនីយកម្ម ជម្រើសសកម្មភាពផ្សព្វផ្សាយ និងទាក់ទាញទេស​ចរណ៍ សម្រាប់ខេត្តសៀមរាប តាមគ្រប់រូបភាព និងគ្រប់មធ្យោបាយ ស្របតាមការវិវត្តន៍នៃបរិបទទីផ្សារ និងបង្កើនកិត្តិនាមខេត្តសៀមរាបជា “តារារះនាទិសឧត្តរ”។

ដើម្បីសម្រេចបាននូវចក្ខុវិស័យ និងគោលបំណងខាងលើ ផែន​ការយុទ្ធសាស្រ្តនេះ បានកំណត់នូវគោលដៅសំខាន់ៗ រួមមាន ទី១).ទាក់ទាញប្រភពទីផ្សារទេសចរណ៍សំខាន់ៗ សម្រាប់ខេត្តសៀមរាប និង ទី២) ពង្រឹងការផ្សព្វផ្សាយទេសចរណ៍ខេត្តសៀមរាប តាមគ្រប់រូបភាព និងគ្រប់មធ្យោបាយឱ្យកាន់តែមានប្រសិទ្ធភាព ដោយដាក់ចេញនូវ២១សកម្មភាព អនុវត្តន៍សម្រាប់ ឆ្នាំ២០២៣-២០២៦ ក្នុងគោលបំណងទាក់ទាញភ្ញៀវទេសចរអន្តរជាតិ និងភ្ញៀវទេសចរផ្ទៃក្នុងឱ្យមកកម្សាន្តក្នុងខេត្តសៀមរាបឡើងវិញ ឱ្យបានកម្រិតស្មើ ឬប្រសើរជាងមុនពេលវិបត្តិជំងឺ​កូវីដ-១៩ (ឆ្នាំ២០១៩) ដោយសម្រេចឱ្យបាននូវចំនួនភ្ញៀវទេសចរអន្តរជាតិប្រមាណ៣លាននាក់ និងភ្ញៀវទេសចរជាតិប្រមាណ៤លាននាក់ នៅត្រឹមឆ្នាំ២០២៦៕

(ភ្នំពេញ)៖ ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រនៃកម្ពុជា ទ្រង់មានជំនឿថា រាជរដ្ឋាភិបាលកម្ពុជា អាណត្តិថ្មី នឹងបំពេញភារកិច្ចតាមគោលនយោបាយ បន្តជំរុញកំណើនសេដ្ឋកិច្ច លើកកម្ពស់កម្រិតជីវភាពប្រជាពលរដ្ឋ។

ព្រះរាជឱង្ការរបស់ព្រះមហាក្សត្រ បានធ្វើឡើងតាមរយៈព្រះរាជសុន្ទរកថាមួយ នៅក្នុងឱកាសប្រារព្ធបើកសម័យប្រជុំលើកដំបូង នៃរដ្ឋសភា នីតិកាលទី៧ នៅថ្ងៃទី២១ ខែសីហា ឆ្នាំ២០២៣នេះ។

ព្រះមហាក្សត្រ បានមានព្រះបន្ទូលថា៖ «ខ្ញុំមានជំនឿយ៉ាងមុតមាំថា រាជរដ្ឋាភិបាលកម្ពុជាអាណត្តិថ្មី ដែលនឹងទទួលការទុកចិត្តពី រដ្ឋសភា នឹងបំពេញភារកិច្ចតាមគោលនយោបាយ បន្តជំរុញកំណើនសេដ្ឋកិច្ច លើកកម្ពស់កម្រិត ជីវភាពប្រជាពលរដ្ឋ បន្តអភិវឌ្ឍ និងពង្រឹងប្រព័ន្ធការពារសង្គម ដែលមានវិសាលភាពគ្របដណ្តប់ ប្រជាពលរដ្ឋគ្រប់រូប ទាំងការអភិរក្ស និងអភិវឌ្ឍវប្បធម៌ដោយចីរភាព ដើម្បីធានាអត្ថិភាពដ៏រឹង មាំនៃអត្តសញ្ញាណជាតិ ជំរុញការអភិវឌ្ឍសេដ្ឋកិច្ចសង្គម ស្របគ្នានឹងការលើកកម្ពស់សីលធម៌ សម្រាប់ភាពសុខដុមនៃសង្គមជាតិ»។

ព្រះអង្គបានសម្ដែងនូវក្តីសោមនស្សរីករាយចូលរួមអបអរសាទរ ពិធីបើកសម័យប្រជុំដំបូងនៃរដ្ឋសភា នីតិកាលទី៧ និងសូមសម្ដែងនូវអំណរសាទរដ៏កក់ក្តជូន ចំពោះ សមាជិក សមាជិការដ្ឋសភាទាំងអស់ ដែលប្រជាពលរដ្ឋបានសម្ដែងឆន្ទៈ និងជំនឿទុក ចិត្តតាមរយៈការបោះឆ្នោតជាសកលកន្លងទៅនេះ ។

ព្រះមហក្សត្រ បានមានព្រះបន្ទូលទៀតថា ចាប់ពីពេលដែលរដ្ឋសភាបានចាប់បដិសន្ធិជាថ្មីនាឆ្នាំ១៩៩៣ រហូតមកដល់ពេលនេះ មានរយៈពេល ៣០ឆ្នាំកន្លងមកហើយ ដែលកម្ពុជាបានប្រែក្លាយពីការបែកបាក់ជាតិ និងការបែងចែក ទឹកដី ទៅជាប្រទេសដែលមានសន្តិភាព ស្ថិរភាព ប្រជាធិបតេយ្យ និងអភិវឌ្ឍគ្រប់វិស័យ ដែល ធ្វើឱ្យប្រជាពលរដ្ឋបានរស់នៅក្រោមដំបូលសន្តិភាព ប្រកបដោយក្តីសង្ឃឹម និងសុខក្សេមក្សាន្ត។

ព្រះមហក្សត្រ បានមានព្រះបន្ទូលបន្តថា រដ្ឋសភាដែលជាអង្គការមានអំណាចនីតិប្បញ្ញត្តិ នឹងបន្តបំពេញភារកិច្ចរបស់ខ្លួនដូចមាន កំណត់ក្នុងរដ្ឋធម្មនុញ្ញ និងច្បាប់ជាធរមាន ដើម្បីបន្តនិរន្តរភាពនយោបាយ សេដ្ឋកិច្ចសង្គម វប្បធម៌ កសាងព្រះរាជាណាចក្រកម្ពុជា ជារដ្ឋដ៏រឹងមាំ និងជឿនលឿន ដោយផ្អែកលើច្បាប់ ធានាការអនុវត្តច្បាប់ដោយស្មើភាពសម្រាប់ប្រជាពលរដ្ឋគ្រប់រូប និងធានាការពារលើកស្ទួយ សិទ្ធិសេរីភាពគ្រប់បែបយ៉ាងរបស់ប្រជាពលរដ្ឋ ។ តំណាងរាស្ត្រក្នុងរដ្ឋសភា ជាតំណាងប្រជាជាតិខ្មែរទាំងមូល ធ្វើយ៉ាងណាខិតខំប្រឹង ប្រែងបន្ថែមទៀតជួយប្រជាពលរដ្ឋឲ្យរស់នៅបានស្មើភាពគ្នាក្នុងជំនឿសាសនា ការសិក្សារៀន សូត្រ ការមានការងារធ្វើសមរម្យទៅតាមកម្លាំងសមត្ថភាព និងកម្រិតវិជ្ជារបស់ខ្លួន។ ច្បាប់ទាំងឡាយដែលរដ្ឋសភាបានអនុម័ត គឺជាឧបករណ៍គតិយុត្តិសម្រាប់រាជរដ្ឋាភិបាល អនុវត្ត និងលើកកម្ពស់នីតិរដ្ឋ សំដៅឲ្យប្រទេសយើងមានក្របខ័ណ្ឌច្បាប់គ្រប់គ្រាន់ និងល្អ ស្របតាមការវិវឌ្ឍរីកចំរើនរបស់សង្គមជាតិ ។

ព្រះមហក្សត្រ បានមានព្រះបន្ទូលបន្តទៀតថា ដើម្បីសម្រេចភារកិច្ចដ៏ឧត្តុង្គឧត្តមនេះ ប្រជាជាតិកម្ពុជាត្រូវមានឯកភាព និងសាមគ្គីភាព ជាតិខ្ពស់ ដោយឈរលើស្មារតីបង្រួបបង្រួមជាតិ និងប្រកាន់ខ្ជាប់នូវព្រហ្មវិហារធម៌៤ គឺ មេត្ត ករុណា មុទិតា និងឧបេក្ខា ។

នៅក្នុងឱកាសដ៏ឧត្តុង្គឧត្តមនេះ ព្រះករុណាជាអម្ចាស់ជីវិតតម្កល់លើត្បូង បានប្រសិទ្ធពរ សូមរដ្ឋសភានីតិកាលទី៧ មានដំណើរ ការល្អ និងអនុវត្តតួនាទីរបស់ខ្លួនប្រកបដោយមនសិការទទួលខុសត្រូវ ដើម្បីទទួលបានជោគ ជ័យថ្មីៗថែមទៀត ជាឧត្តមប្រយោជន៍រួម ជូនជាតិមាតុភូមិ និងប្រជាជាតិយើងទាំងមូល។ ព្រះអង្គបានជូនពរ សម្តេចអគ្គមហាពញាចក្រី សម្តេចវិបុលសេនាភក្តី សម្តេចអគ្គមហាសេនាបតីតេជោ សម្ដេចចៅហ្វាវាំង សម្ដេចក្រឡាហោម សម្តេចពិជ័យសេនា សម្តេច កិត្តិសង្គហបណ្ឌិត ឯកឧត្តមកិត្តិទេសាភិបាលបណ្ឌិត និងព្រះអង្គម្ចាស់ សមាជិក សមាជិកា ដ៏ឧត្តុង្គឧត្តមនៃរដ្ឋសភា នីតិកាលទី៧ ព្រមទាំងភ្ញៀវជាតិ និងអន្តរជាតិ សូមបានប្រកបតែនឹងព្រះពុទ្ធពរគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

ដោយៈ ច្រាយ ចំណាន

        ភ្នំពេញៈ អគ្គនាយកបុរីបុស្បា លោកឧកញ៉ាឈាង រ័ត្នបានមានប្រសាសន៍ឲ្យដឹងថា ទីផ្សារលំនៅដ្ឋាននឹងនៅតែបន្តរីកចម្រើន ហេតុនេះក្រុមហ៊ុននឹងបន្តអភិវឌ្ឍន៍បន្តទៀត។

លោកឧកញ៉ាបានមានប្រសាសន៍ឲ្យដឹង ក្នុងពិធីសម្ភោធការិ​យាល័យកណ្តាលរបស់ក្រុមហ៊ុនបុស្បា ប្រូផឹធីកាលពីចុងសប្តាហ៍មុនថា ក្នុងនាមជាក្រុមហ៊ុនអភិវឌ្ឍន៍អចលនទ្រព្យថ្មី ប៉ុន្តែយើងមានភាពលេចធ្លោលើការអភិវឌ្ឍ និងយុទ្ឋសាស្រ្តទីផ្សារ ដោយការលក់ ​និងការសាងសង់របស់យើងនៅតែមានសកម្មភាព និងវឌ្ឍនភាពតាមផែន​ការដែលបានគ្រោងទុក។

លោកបន្តថា “ការអភិវឌ្ឍរបស់យើង បាននិងកំពុងទទួលបានការទទួលស្គាល់ពីមជ្ឈដ្ឋានជាតិ និងអន្តរជាតិ ដោយយើងទទួលបានពានរង្វាន់ចំនួន១៣ពីអន្តរជាតិ ពិសេសពីអាមេរិក ចក្រភពអង់គ្លេស ប្រទេសថៃ និងពានរង្វាន់ក្នុងស្រុកជាច្រើន”។ លោកបន្តថា “ការទទួលបានពានរង្វាន់នេះ បានបញ្ជាក់ពីគុណតម្លៃរបស់យើង ព្រោះបើសួរថាហេតុអី យើងត្រូវប្រកួតប្រជែងយកពានរង្វាន់ គឺវាប្រៀបដូចជាសិស្ស បើមិនចូលរួមប្រលងទេ ពួកគេមិនដឹងពួកគេស្ថិតនៅចំណាត់ថ្នាក់ណាឡើយ”។

លោកបញ្ជាក់ថា “ពានរង្វាន់នេះ មិនមែនជាការទិញនោះទេ តែវាបានមកពីការប្រកួតប្រជែងយ៉ាងស្វិតស្វាញ និងមានការវាយតម្លៃត្រឹមត្រូវ ហើយបើមិនជាប់ក្នុងលក្ខខ័ណ្ឌរបស់ពួកគេកំណត់ទេ យើងមិនមានឱកាសទទួលបានការវាយតម្លៃ និងទទួលបានពានរង្វាន់ឡើយ”។

លោកឧកញ៉ាឈាង រ័ត្នបានប​ន្តថា យើងនឹងពង្រីកគំរោងបុរីបុស្បានាពេលបន្តបន្ទាប់ទៀត ប៉ុន្តែល្បឿនលឿនឬយឺត វាអាស្រ័យលើស្ថានភាពទីផ្សារ និងសេដ្ឋកិច្ចរបស់យើង ប៉ុន្តែគោលបំណងរបស់យើងនឹងមិនផ្លាស់ប្តូរទេ គឺនឹងបន្តរួមចំណែកអភិវឌ្ឈន៍លំនៅដ្ឋានសម្រាប់ប្រជាពលរដ្ឋរាប់រយពាន់ ម៉ឺនខ្នងបន្ថែមទៀតនាពេលអនាគត៕

        ដោយៈ គង់ សូរិយា

        ភ្នំពេញៈ ឧស្សាហកម្ម​វាយនភណ្ឌ​របស់​កម្ពុជា ​គឺ​ជា​វិស័យ​មួយ​ដែល​មាន​ការ​រីក​ចម្រើន​ លឿន​បំផុត​ក្នុង​ពិភពលោក។ ប្រទេសកម្ពុជាបានដាក់ចេញ នូវផែនទីបង្ហាញផ្លូវថ្មីមួយ នៅថ្ងៃទី១៧ ខែមីនា ដើម្បីកែលម្អឧស្សាហកម្មវាយនភណ្ឌ និងសម្លៀកបំពាក់របស់ខ្លួន ដែលជាសសរស្តម្ភសេដ្ឋកិច្ចដ៏សំខាន់ ដែលមានចំនួនជាងមួយភាគបី នៃផលិតផលក្នុងស្រុកសរុបរបស់ប្រទេស។

យោងតាមរបាយការណ៍បានបង្ហាញថា ឧស្សាហកម្ម​កាត់ដេរសំលៀកបំពាក់ស្បែកជើង និងផលិតផល​ធ្វើ​ដំណើរ​​ មានចំនួន៥៧ភាគរយ ​នៃ​ការ​នាំ​ចេញ​សរុប​របស់​កម្ពុជា​កាល​ពី​ឆ្នាំ​មុន។ វាមានតម្លៃ១២,៦ពាន់លានដុល្លារ ក្នុងឆ្នាំ២០២២ និងកើនឡើង១៤,៩ភាគរយ ពី ១១ប៊ីលានដុល្លារកាលពីឆ្នាំមុន។ នៅទូទាំងពិភពលោក កម្ពុជាគឺជាប្រទេសនាំចេញសម្លៀកបំពាក់ ស្បែកជើង និងផលិតផលធ្វើដំណើរធំជាងគេទី៩។ ធុរកិច្ចនានាគួរតែមើលឱកាសថ្មីៗ ដើម្បីរីកចម្រើនពីការផ្លាស់ប្តូររបស់កម្ពុជា ឆ្ពោះទៅរកវិស័យវាយនភណ្ឌ និងសំលៀកបំពាក់ដែលមានតម្លៃខ្ពស់ជាងមុន។ នេះបើយោងតាមFibre2Fashion News Desk (NB)។

កិច្ច​ប្រជុំ​កំពូល​វាយនភ័ណ្ឌ និង​សម្លៀក​បំពាក់ កម្ពុជា-អាស៊ីអាគ្នេយ៍២០២៤ (SEA-Cambodia 2024) គ្រោង​នឹង​ប្រព្រឹត្ត​ទៅ​នៅ​រាជធានី​ភ្នំពេញ ពី​ថ្ងៃ​ទី១៤ ដល់ថ្ងៃទី១៥ ខែ​មីនា ឆ្នាំ២០២៤។

កិច្ចប្រជុំកំពូលនេះ មានគោលបំណងលើកឡើង ពីនិន្នាការនៅក្នុងតំបន់អាស៊ីអាគ្នេយ៍ ដោយផ្តោតលើប្រធានបទដូចជា គោលនយោបាយ យុទ្ធសាស្ត្រផ្តល់ប្រភព ឌីជីថលនីយកម្មខ្សែច្រវ៉ាក់ផ្គត់ផ្គង់ រោងចក្រក្នុងស្រុក និងការអភិវឌ្ឍន៍ប្រកបដោយចីរភាព៕

ដោយៈ គង់ សូរិយា

        ភ្នំពេញៈ តំបន់សេដ្ឋកិច្ចពិសេសគឺជាតំបន់ ដែលមានទីតាំងយុទ្ធសាស្ត្រត្រៀមរួចជាស្រេច សម្រាប់អាជីវកម្ម និងការវិនិយោគឱ្យដំណើរការជាមួយនឹងភាពងាយស្រួល នៃហេដ្ឋារចនាសម្ព័ន្ធដឹកជញ្ជូន។

យោងតាមទិន្នន័យដែលចេញផ្សាយ ដោយក្រុមប្រឹក្សាអភិវឌ្ឍន៍កម្ពុជា បច្ចុប្បន្នកម្ពុជាមានតំបន់សេដ្ឋកិច្ច ពិសេសចំនួន២៤ និងមានគម្រោងវិនិយោគសរុបចំនួន៥៦១គម្រោង ព្រមទាំងអាចបង្កើតការងារ ដល់ប្រជាជនក្នុងតំបន់បានប្រមាណ១៦ម៉ឺនកន្លែង។

អ្នកឧកញ៉ាលឹម ហេងអនុប្រធានសភាពាណិជ្ជកម្មកម្ពុជាបានមានប្រសាសន៍ឲន្យដឹងកាលពីសប្តាហ៍មុនថា ការបង្កើតតំបន់សេដ្ឋកិច្ចពិសេសបានកាន់តែច្រើន​ សេដ្ឋកិច្ចជាតិក៏នឹងរីកចម្រើន កាន់តែខ្លាំងដូចគ្នា។អ្នកឧកញ៉ាបានបញ្ជាក់ថា “តំបន់សេដ្ឋកិច្ចពិសេស មានកាន់តែច្រើន កាន់តែល្អ សម្រាប់សេដ្ឋកិច្ចយើង ជាពិសេសនៅតាមខេត្តជាប់ព្រំដែន វាធ្វើឱ្យមានកំណើនជីវភាពប្រជាពលរដ្ឋ ដែលនៅជុំវិញនោះកាន់តែធូរធា ដោយសារមានការងារធ្វើច្រើន សេដ្ឋកិច្ចមានដំណើរការ”។

ជាមួយគ្នានេះ លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជាក៏បានលើ​កឡើងផងដែរថា ការបង្កើតតំបន់សេដ្ឋកិច្ចពិសេសគឺមិនមាន ផ្ដល់ផលប៉ះពាល់ជាអវិជ្ជមាន សម្រាប់កម្ពុជានោះទេ។ ផ្ទុយទៅវិញវាគឺជារឿងចំណេញសម្រាប់សេដ្ឋកិច្ចជាតិ។ម្យ៉ាងទៀត សម្រាប់បរិបថនៃប្រទេសជឿនលឿន ពួកគេបានប្រើប្រាស់តំបន់សេដ្ឋកិច្ចពិសេសនេះ​ ដើម្បីជំរុញកំណើនសេដ្ឋកិច្ចជាតិ។ ហើយអ្វីដែលកម្ពុជាធ្វើកន្លងមកនេះ ក៏ជាការដើរតាមគម្រូ របស់ប្រទេសមានសេដ្ឋកិច្ចជឿនលឿនផងដែរ។

លោកបណ្ឌិតហុង វណ្ណៈបានបន្តថា គេបង្កើតតំបន់នេះឡើងដើម្បីប្រមូលផ្ដុំអ្នកវិនិយោគឱ្យ​មកនៅជុំគ្នា​ និងមានការគាំទ្រពីរដ្ឋាភិបាល ដោយកសាងហេដ្ឋារចសម្ព័ន្ធជូន ហើយវិនិយោគិនក៏​មានភាពងាយស្រួលច្រើនក្នុងការធ្វើអាជីវកម្ម។

យោងតាមរបាយការណ៍ ពីក្រុមប្រឹក្សាអភិវឌ្ឍន៍កម្ពុជាបានបង្ហាញថា ទំហំការនាំចេញទំនិញពីកម្ពុជាទៅខាងក្រៅ ក្នុងរយៈពេល ១០ឆ្នាំជាប់ៗគ្នានេះ មានការកើនឡើងប្រមាណ១០ភាគរយ ក្នុងមួយឆ្នាំ។ ហើយការកើនឡើងបែបនេះ ជាការរួមចំណែកមួយផ្នែកធំមកពីតំបន់សេដ្ឋកិច្ចពិសេសនេះឯង។

អ្នកឧកញ៉ា លឹម ហេងបានបង្ហាញសុទិដ្ឋិនិយមថា នៅពេលអនាគត តំបន់សេដ្ឋកិច្ចពិសេស នៅតែមានការកើនឡើង តាមរយៈច្បាប់វិនិយោគថ្មីរបស់រាជរដ្ឋាភិបាល ដែលមានការយោគយល់ច្រើន ក្រៅពីនោះ ក៏មាននូវកិច្ចព្រមព្រៀងផ្សេងៗ ដែលជំរុញឱ្យមានការនាំ​ចេញផងដែរ៕