ដោយៈ ស៊ីវ ម៉េង

       ភ្នំពេញៈ វិស័យវេជ្ជសាស្រ្តជាវិស័យមួយ ដែលមានឱកាសវិនិយោគ និងទទួលបានផលចំណេញខ្ពស់នៅកម្ពុជា ដោយសារការវិនិយោគលើវិស័យនេះនៅមានកម្រិតនៅឡើយ។

យោងតាមការសិក្សា របស់ក្រុមហ៊ុនអន្តរជាតិមួយបានបង្ហាញថា ប្រជាពលរដ្ឋកម្ពុជា បានចំណាយប្រាក់ប្រមាណ៦០០លានដុល្លារអាមេរិកក្នុងមួយឆ្នាំ ដើម្បីទៅព្យាបាលជំងឺនៅប្រទេសថៃ វៀតណាម និងសឹង្ហបុរីជាដើម។

លោកផល សម្បត្តិប្រធានផ្នែកវាយតម្លៃ នៃក្រុមហ៊ុនអចលនទ្រព្យPropNex Cambodiaបានមានប្រសាសន៍ឲ្យដឹងកាលពីចុងសប្តាហ៍មុនថា ការវិនិយោគលើវិស័យវេជ្ជសាស្រ្តនៅកម្ពុជា នៅមានកម្រិតនៅឡើយ ដែលអ្នកវិនិយោគជាតិ អន្តរជាតិធំៗ អាចចាប់យកឱកាសនេះ ដោយសារវាផ្តល់ផលចំណេញខ្ពស់ និងចូលរួមកាត់បន្ថយការចេញដំណើរទៅក្រៅប្រទេសរបស់ប្រជាពលរដ្ឋ។

លោកបន្តថា “គុណភាព និងសេវាកម្មប្រកបដោយទំនុកចិត្ត ជាផ្នែកមួយ នៃលំហូរជនជាតិខ្មែរទៅព្យាបាលនៅក្រៅប្រទេស ខណៈសេវាកម្មនេះនៅកម្ពុជា មិនទាន់រីកចម្រើនខ្លាំងនៅឡើយ”។

លោកនាយឧត្តមសេនីយ៍បណ្ឌិតហ៊ុន ម៉ាណែតអនាគរតនាយក​រដ្ឋមន្រ្តី​បានមានប្រសាសន៍កាលពីសប្តាហ៍មុនថា ការប្រឡងពេទ្យគឺតឹង ដែលការពិតការរឹតបន្តឹងជាការល្អ។

លោកបន្តថា “គ្រូពេទ្យធ្វើការងាររបស់ទេវតា តែគ្រូពេទ្យមិនមែនជាទេវតានោះទេ ប៉ុន្តែគ្រូពេទ្យធ្វើការត្រូវតែម៉ត់ចត់ និងប្រកបដោយក្រមសីលធ៌មវិជ្ជាជីវៈ”៕

ដោយ: គង់ លាងហួរ

អន្តរជាតិ: ក្រុមវិភាគអ្នកសេដ្ឋកិច្ច កំពុងមានការព្រួយបារម្ភអំពីឧស្សាហកម្មអចលនទ្រព្យពាណិជ្ជកម្ម (CRE)ទំហំ២០ពាន់ពាន់លា​នដុល្លារនៅសហរដ្ឋអាមេរិក។

បន្ទាប់​ពី​ការ​រីក​ចម្រើន​រាប់​ទសវត្សរ៍​ ដែល​ជំរុញ​ដោយ​អត្រា​ការ​ប្រាក់​ទាប និង​ឥណទាន​ងាយ​ស្រួល ពេលនេះវិស័យអចលនទ្រព្យ​បែបពាណិជ្ជកម្ម​របស់អាមេរិក បាន​ជួបប្រទះនឹងការបាត់បង់សន្ទុះ។

ការវាយតម្លៃអចលនទ្រព្យការិយាល័យ និងលក់រាយបាននិងកំពុងធ្លាក់ចុះចាប់តាំងពីជំងឺរាតត្បាត ដែលបាននាំមកនូវអត្រាកាន់កាប់ទាប និងការផ្លាស់ប្តូរកន្លែងដែលមនុស្សធ្វើការ និងរបៀបដែលពួកគេទិញទំនិញ។

បន្ថែមពីនេះ កិច្ចខិតខំប្រឹងប្រែងរបស់ធនាគារ កណ្តាលអាមេរិក Fed ក្នុងការប្រយុទ្ធប្រឆាំងនឹងអតិផរណា ដោយការដំឡើងអត្រាការប្រាក់ ក៏បានធ្វើឱ្យប៉ះពាល់ដល់ឧស្សាហកម្មមួយនេះ ដែលពឹងផ្អែកលើឥណទានផងដែរ។

ភាពតានតឹងផ្នែកធនាគារនាពេលថ្មីៗនេះ ទំនងជានឹងជំរុញបញ្ហាទាំងនោះបន្ថែមទៀតផងដែរ។ ការផ្តល់ប្រាក់កម្ចីដល់អ្នកអភិវឌ្ឍន៍ និងអ្នកគ្រប់គ្រងអចលនទ្រព្យពាណិជ្ជកម្ម ភាគច្រើនទទួលបានមកពីធនាគារខ្នាតតូច និងមធ្យម ដែលសម្ពាធលើសាច់ប្រាក់ងាយស្រួលមានកម្រិតធ្ងន់ធ្ងរបំផុត។

ប្រហែល៨០ភាគរយ នៃប្រាក់កម្ចីធនាគារទាំងអស់ សម្រាប់អចលនទ្រព្យពាណិជ្ជកម្ម បានមកពីធនាគារក្នុងតំបន់។នេះបើយោងតាមក្រុមអ្នកសេដ្ឋកិច្ចរបស់ក្រុមហ៊ុន Goldman Sachs៕

ដោយៈ សុខុម

ហុងកុង: ភ្នាក់ងារលក់របស់ក្រុមហ៊ុន JLL បានទម្លាយឱ្យដឹងថា ក្រុមហ៊ុនអភិវឌ្ឍន៍ចិន Shimao Group ដែលជំពាក់បំណុលយ៉ាងច្រើន កំពុងប្រកាសលក់ឡាយឡុង សណ្ឋាគារដ៏ធំមួយរបស់ខ្លួនមានទីតាំងនៅជិតអាកាសយានដ្ឋានក្រុងហុងកុង។

ភ្នាក់ងារលក់ដដែលបានលើកឡើងថា ការប្រកាសលក់ឡាយ​ឡុងនេះរំពឹងថា នឹងទទួលបានការចាប់អារម្មណ៍ខ្លាំង ស្របពេលវិស័យ​ទេសចរណ៍ក្នុងទីក្រុងរំពឹងងើបឡើងវិញ។

ទីភ្នាក់ងារព័ត៌មាន Reuters បានចុះផ្សាយថា ក្រុមហ៊ុន Shimao Group បានប្រកាសលក់ឡាយឡុងសណ្ឋាគារ Sheraton កម្ពស់១៨ជាន់ នៅតំបន់ Tung Chung ដែលបានបើកដំណើរការក្នុងឆ្នាំ២០២០ ក្នុងតម្លៃ៨២៨លានដុល្លារអាមេរិក។ នេះបើយោងតាមសារព័ត៌មាន South China Morning Post ចុះផ្សាយកាលពីថ្ងៃច័ន្ទ ទី២៧ ខែមីនា។

ដោយមានបន្ទប់ចំនួន១.២១៩បន្ទប់ និងសាលប្រជុំខាងក្នុង និងសាលប្រជុំ ខាងក្រៅសរុបទំហំ៣.៤០០ម៉ែត្រការ៉េ សណ្ឋាគារនេះគឺជាសណ្ឋាគារធំបំផុតទី២ ប្រចាំក្រុងហុងកុង បើគិតពីចំនួនបន្ទប់ដោយតាមពីក្រោយសណ្ឋាគារ Nina Tsuen Wan West ដែលមានបន្ទប់ចំនួន១.៦០៨បន្ទប់។

ក្រុមហ៊ុន Shimao Group ដែលកំពុងស្ថិតក្នុងដំណើរការរៀបចំឡើងវិញ នូវបំណុលចំនួន១១,៨ពាន់លានដុល្លារអាមេរិក របស់ខ្លួនបានទិញដី ទីតាំងសណ្ឋាគារខាងលើនេះ ជាមួយក្រុមហ៊ុន Mingfa Group International ក្នុងតម្លៃ២៣៣លានដុល្លារអាមេរិក ក្នុងឆ្នាំ២០១៤។

នីតិវិធីលក់នេះ នឹងពាក់ព័ន្ធនឹងការដេញថ្លៃ២ ឬ៣ជុំ ដោយថ្ងៃផុតកំណត់ សម្រាប់ការបង្ហាញពីចំណាប់អារម្មណ៍ នៅពាក់កណ្តាលខែឧសភា។ នេះបើយោងតាមលោក Jonathan Law អនុប្រធានក្រុមហ៊ុន JLL Hotels & Hospitality Group៕ South China Morning Post៕

 ដោយៈ រតនៈ

ពោធិសាត់ៈ ខណៈដែលប្រមុខរាជរដ្ឋាភិបាលកម្ពុជា សម្ដេចតេ​ជោហ៊ុន សែន គ្រោងនឹងបង្កើតប៉ូលសេដ្ឋកិច្ចទី៤ ដែលគ្រប់ដណ្ដប់ទៅលើខេត្តសំខាន់ៗ រួមមាន ខេត្តពោធិ៍សាត់ បាត់ដំបង បន្ទាយមានជ័យ ប៉ៃលិន អាជ្ញាធរខេត្តពោធិ៍សាត់ បានត្រៀមវិស័យសក្តានុពលមួយចំនួន ដើម្បីធ្វើឱ្យតំបន់សេដ្ឋកិច្ចទី៤នេះ ដំណើរការទៅដោយជោគជ័យ និងនាំផលប្រយោជន៍ជូនជាតិ និងប្រជាជន។

ថ្លែងក្នុងពិធីចុះពិនិត្យការដ្ឋានសាងសង់ ទំនប់វារីអគ្គិសនីស្ទឹងពោធិ៍សាត់១ កាលពីថ្ងៃទី១៤ ខែមីនា សម្ដេចតេជោ ហ៊ុន សេន បានបញ្ជាក់ថា ដើម្បីជំរុញឲ្យផែនការនេះ ដំណើរការបានលឿនរហ័ស។

សម្ដេចតេជោ បានស្នើសុំចិនឲ្យជួយសាងសង់ផ្លូវតភ្ជាប់ នៅក្នុងប៉ូលសេដ្ឋកិច្ចថ្មីនេះ សរុបចំនួន៥ខ្សែ រួមមាន ផ្លូវលេខ៥៥ បង្កើតផ្លូវតភ្ជាប់ផ្លូវលេខ៥៧ ដែលតភ្ជាប់ពីបាត់ដំបងទៅប៉ៃលិន ៥៧បេ តភ្ជាប់ពីបាវិល ទៅកាន់ស្រុកកំរៀង ភ្នំព្រឹក ទល់ព្រំដែនប្រទេសកម្ពុជា-ថៃ ផ្លូវ៥៦ ផ្លូវ៥៩ តភ្ជាប់ពីខេត្តបន្ទាយមានជ័យ ទៅកាន់ប៉ៃលិន។ ជាមួយគ្នានេះ តាមរយៈការរៀបចំផ្លូវ សម្ដេចតេជោ ក៏ចង់ឱ្យតំបន់ស្ទឹងពោធិ៍​សាត់១ ក្លាយជាតំបន់ទេសចរណ៍ ដ៏ទាក់ទាញនាពេលខាងមុខ ការសាងសង់រមណីយដ្ឋាន ទេសចរណ៍ និងកន្លែងស្នាក់នៅ ដូចជា រីស្សត ជាដើម។

ទាក់ទងនឹងករណីនេះ អភិបាលរងខេត្តពោធិ៍សាត់ លោក ចេង ឡៃ បានប្រាប់ propertyarea.asia ថាវិស័យពាណិជ្ជកម្ម  កសិកម្ម ឧស្សាហកម្ម និង វិស័យទេសចរណ៍ គឺជាវិស័យសំខាន់ៗដែលខេត្តពោធិ៍សាត់ នឹងជម្រុញសក្តានុពលខេត្តមួយនេះ ដើម្បីក្លាយជាប៉ូលសេដ្ឋកិច្ចទី៤នេះ ។

លោកបន្តថា នៅក្នុងស្រុកវាលវែងនៃខេត្តពោធិ៍សាត់ គឺមានផ្លូវតភ្ជាប់សំខាន់ៗ ពីខេត្តមួយទៅខេត្តមួយ និងទៅប្រទេសថៃផងដែរដែលអំណោយផល ដល់វិស័យពាណិជ្ជកម្មនាំចេញ នាំចូល និងជាទីតាំងល្អអំណោយផល ដល់ការធ្វើជារមណីដ្ឋាននានា  ហើយក៏អាចដាំដុះដំណាំបែបឧស្សាហកម្មបានផងដែរ។

លោកបន្តថា សម្រាប់វិស័យកសិកម្មវិញ លោកឱ្យដឹងថាខេត្តពោធិ៍សាត់ គឺមានតំបន់មួយចំនួន អំណោយផលដល់ការដាំដុះដំណាំផ្សេងៗ ដូចជា នៅស្រុកតាលោសែនជ័យ និងស្រុកបាកាន គឺអំណោយផលខាងដំណាំស្រូវ។ សម្រាប់ស្រុកក្រគរវិញ គឺមានរោងចក្រឧស្សាហកម្មជាច្រើន បាននិងកំពុងរីកដុះដាល និងមានតំបន់ទេសចរណ៍ជាច្រើន ដូចជា ទឹកធ្លាក់ច្រកល្អៀង តំបន់បឹងទន្លេសាបក្នុងឃុំ កំពង់ហ្លួង  និងរមណីយដ្ឋានទើបបង្កើតថ្មី នៅក្នុងឃុំអន្សារចំបក់ ដូចជារមណីយដ្ឋានភ្នំនាគសជាដើម។

យោងតាមគេហទំព័ររបស់រដ្ឋបាលខេត្តពោធិ៍សាត់ ខេត្តនេះមានផ្ទៃដីសរុប១២,៦៩២គីឡូម៉ែត្រការ៉េ ស្ថិតនៅភាគខាងលិចនៃប្រទេស មានព្រំប្រទល់ជាប់ខេត្តកំពង់ឆ្នាំង កំពង់ស្ពឺ កោះកុង និងខេត្តបាត់ដំបង៕

ដោយ៖ វឌ្ឍនៈ

ភ្នំពេញ ៖ ម៉ាឡេស៊ីធ្លាប់ជាប្រទេសដែលបានបណ្ដាក់វិនិយោគច្រើនជាងគេមួយ ក្នុងប្រទេសកម្ពុជាទៅលើវិស័យជាច្រើន ប៉ុន្តែរយៈពេលក្រោយមក ក៏មានការថមថយបន្តិចវិញ ។ ថ្លែងនៅក្នុងពិធីចុះហត្ថលេខារវាងរដ្ឋាភិបាលកម្ពុជា និងម៉ាឡេស៊ី នៅរសៀលថ្ងៃទី ២៧ មីនា ២០២៣
សម្ដេចតេជោបានថ្លែងនៅចំពោះមុខនាយករដ្ឋមន្ត្រីម៉ាឡេស៊ីថា កម្ពុជាបានលើកទឹកចិត្តដល់ក្រុមហ៊ុនម៉ាឡេស៊ីដែលចង់ចូលមកបណ្ដាក់ទុនវិនិយោគនៅកម្ពុជា ។

សម្ដេចតេជោមានប្រសាសន៍ថា ក្នុងការពង្រីកវិសាលភាពនិងកិច្ចសហប្រតិបត្តិការ ពាណិជ្ជកម្មនិងវិនិយោគ រវាងប្រទេសទាំងពីរ កម្ពុជាបានស្នើម៉ាឡេស៊ី បង្កើនការទិញទំនិញដែលបំពេញតម្រូវការ ឱ្យគ្នាទៅវិញទៅមក និងបានលើកទឹកចិត្តឱ្យក្រុមហ៊ុននិងធុរជនម៉ាឡេស៊ី មកវិនិយោគ ឱ្យបានកាន់តែច្រើន ។ ចំពោះវិស័យទេសចរណ៍ សម្ដេចក៏បានស្នើឱ្យអនុវត្ត អនុស្សរណៈនៃការយោគយល់គ្នាស្ដីពីសហប្រតិបត្តិការ ទេសចរណ៍ឱ្យមានប្រសិទ្ធភាព និងស្នើម៉ាឡេស៊ីជួយ គាំទ្រដល់កម្ពុជា ក្នុងការអភិវឌ្ឍទេសចរណ៍មូស្លីម តាមរយៈការបណ្ដុះបណ្ដាលនិងបច្ចេកទេស ។

សម្ដេចតេជោមានប្រសាសន៍បន្តថា ចំពោះវិស័យកសិកម្ម ភាគីទាំងពីរបានឯកភាព បន្តជំរុញការអនុវត្តឱ្យមានប្រសិទ្ធភាពនូវអនុស្សរណៈ នៃការយោគយល់ស្ដីពីកិច្ចសហប្រតិបត្តិការអភិវឌ្ឍវិស័យឧស្សាហកម្មឬស្សីនៅកម្ពុជា ។ ទន្ទឹមនឹងនេះសម្ដេចតេជោក៏បានស្នើម៉ាឡេស៊ីបន្តបង្កើនការទិញអង្ករនិងកសិផលនៅកម្ពុជា តាមរយៈ ការបង្កើតក្រុមហ៊ុនប្រមូលទិញ និងកែច្នៃនៅកម្ពុជា សម្រាប់ដាក់លក់នៅលើទីផ្សារប្រទេសកម្ពុជានិងនាំចេញទៅប្រទេសម៉ាឡេស៊ី ក៏ដូចជាទីផ្សារផ្សេងទៀតតាមផ្លូវដឹកជញ្ជូនដែលមានដូចជាកំពង់ផែក្រុងព្រះសីហនុ ។

សម្ដេចតេជោបន្ថែមថា ទាក់ទងនឹងវិស័យឧស្សាហកម្ម វិទ្យាសាស្ត្រ បច្ចេកវិទ្យានិងនុវានុវត្តន៍ កម្ពុជាលើកទឹកចិត្តដល់វិនិយោគិនម៉ាឡេស៊ី ឱ្យចូលរួមអភិវឌ្ឍន៍ ឧស្សាហកម្មផលិតកម្ម ឧស្សាហកម្មកែច្នៃ ឧស្សាហកម្មហាឡាល់ និងឧស្សាហម្មផ្នែកចំណេះដឹងបច្ចេកវិទ្យានៅកម្ពុជាផងដែរ ។

លោក Anwar bin Ibrahim នាយករដ្ឋមន្ត្រីនៃប្រទេសម៉ាឡេស៊ីបានមានប្រសាសន៍ផងដែរថា លោកនឹងជំរុញឱ្យវិនិយោគិននិងធុរជនម៉ាឡេស៊ីមកស្វែងរកការវិនិយោគនិងធ្វើមុខជំនួញនៅកម្ពុជា ដូចជាការបង្កើតក្រុមហ៊ុនប្រមូលទិញនិងនាំចេញអង្ករ និងគ្រាប់ស្វាយចន្ទីពីកម្ពុជាទៅកាន់ប្រទេសម៉ាឡេស៊ី ជាដើម ។

លោកបន្តថា ចំណាប់អារម្មណ៍មួយរបស់សម្ដេចតេជោដែលលោកចាប់អារម្មណ៍ គឺឧស្សាហកម្មឬស្សី ហើយម៉ាឡេស៊ីនឹងជំរុញឱ្យវិនិយោគិនមកកម្ពុជាសិក្សាពីការវិនិយោគកែច្នៃឬស្សីនេះ ដើម្បីនាំចេញទៅកាន់ប្រទេសម៉ាឡេស៊ី ៕

សុខុម

ហុងកុង: លោក Jack Ma ស្ថាបនិកក្រុមហ៊ុនខ្នាតយក្ស Alibaba Group Holding បានវិលត្រលប់មកប្រទេសចិន វិញគួរឱ្យភ្ញាក់ផ្អើលកាលពីពេលថ្មីៗនេះ បន្ទាប់ពីធ្វើដំណើរនៅក្រៅប្រទេសជាងមួយឆ្នាំ ហើយបានទៅពិនិត្យមើលសាលារៀនមួយដែលលោកបានបង្កើតឡើងនៅទីក្រុង Hangzhou ដែលជាមូលដ្ឋាននៃក្រុមហ៊ុន Alibaba។

ប្រភពច្បាស់ការបានទម្លាយឱ្យដឹងថា នៅថ្ងៃច័ន្ទ ទី២៧ ខែមីនា នេះ លោក Jack Ma បានជួបជាមួយលោកគ្រូ អ្នកគ្រូ និងសិស្សានុសិស្សនៅសាលារៀន Yungu School ជាសាលាឯកជនមួយដែលផ្ដល់ការសិក្សាចាប់ពីថ្នាក់មត្តេយ្យដល់វិទ្យាល័យ ក្រោមមូលនិធិរបស់ស្ថាបនិកក្រុមហ៊ុន Alibaba ក្នុងឆ្នាំ២០១៧។ មហាសេដ្ឋីរូបនេះបានពិភាក្សាអំពីបញ្ហាអប់រំ និងបច្ចេកវិទ្យា ChatGPT ជាមួយសាលានេះ។

លោក Jack Ma បានត្រលប់មកប្រទេសចិន វិញ បន្ទាប់ពីឈប់សំចតនៅហុងកុង ទីដែលលោកបានជួបជាមួយមិត្តភក្ដិ និងបានទៅទស្សនាសាលសិល្បៈ Art Basel ផងដែរ។ គេដឹងថា លោក Jack Ma មានចំណង់ចំណូលចិត្តស្រលាញ់ការគូរគំនូរ និងសិល្បៈខ្លាំងណាស់។

ក្រុមហ៊ុន Alibaba ពិតជាធំខ្លាំងណាស់ ហើយក៏ជាម្ចាស់កាសែត South China Morning Post ផងដែរ។

លោក Jack Ma ដែលបានចុះចេញពីតំណែងប្រធានក្រុមហ៊ុន Alibaba ក្នុងថ្ងៃខួបកំណើតគម្រប់៥៥ឆ្នាំឈានចូល៥៦ឆ្នាំរបស់លោកក្នុងឆ្នាំ២០១៩ បានធ្វើដំណើរទៅកាន់ប្រទេសផ្សេងៗគ្នាដើម្បីស្វែងយល់អំពីបច្ចេកវិទ្យាកសិកម្ម។ ការធ្វើដំណើររបស់លោកត្រូវបានតាមដានយ៉ាងស្អិតដោយក្រុមអ្នកឃ្លាំមើលសកម្មភាពប្រទេសចិន។

ខណៈលោក Jack Ma បាត់មុខជាសាធារណៈយ៉ាងយូរដែលខុសពីទម្លាប់របស់លោក កន្លែងដែលលោកសម្ងំលាក់ខ្លួនត្រូវបានឃ្លាំមើលយ៉ាងយកចិត្តទុកដាក់បំផុត ជាពិសេសបន្ទាប់ពីក្រុមហ៊ុនដែលលោកបានបង្កើតរួមទាំងក្រុមហ៊ុន Alibaba និងក្រុមហ៊ុនបុត្រសម្ព័ន្ធបច្ចេកវិទ្យាហិរញ្ញវត្ថុ Ant Group ផងត្រូវបានដាក់ឱ្យស្ថិតក្រោមការត្រួតពិនិត្យរបស់ក្រុមនិយ័តករចិន ស្របពេលក្រុងប៉េកាំង ធ្វើការបង្ក្រាបកាន់តែខ្លាំងឡើងទៅលើវិស័យបច្ចេកវិទ្យាហិរញ្ញវត្ថុ៕ South China Morning Post៕

សុខុម

សិង្ហបុរី: ក្រុមហ៊ុនអារ៉ាប៊ីសាអូឌីត Aramco និងបណ្ដាដៃគូចិន របស់ខ្លួនមានបំណងចាប់ផ្តើមប្រតិបត្តិការពេញលេញនៅគម្រោងរោងចក្រចម្រាញ់ប្រេង និងគីមីឥន្ធនៈមួយនៅភាគឦសាននៃប្រទេសចិន ត្រឹមឆ្នាំ២០២៦ ដើម្បីបំពេញតម្រូវការប្រេងឥន្ធនៈ និងគីមីឥន្ធនៈដែលកំពុងកើនឡើងរបស់ប្រទេសចិន។

ក្រុមហ៊ុនខ្នាតយក្សដែលគ្រប់គ្រងដោយរដ្ឋខាងលើនេះនិយាយកាលពីថ្ងៃអាទិត្យ ទី២៦ ខែមីនា ថា គម្រោងក្នុងទីក្រុងផានជីន (Panjin) នៃខេត្តលាវនីង (Liaoning) ដែលរំពឹងថានឹងចំណាយអស់រហូតដល់ទៅ១០ពាន់លានដុល្លារអាមេរិក នេះនឹងក្លាយជាគម្រោងវិនយោគដ៏ធំបំផុតទី២ របស់ក្រុមហ៊ុន Aramco លើការចម្រាញ់ប្រេង និងគីមីឥន្ធនៈនៅក្នុងប្រទេសចិន។

ក្រុមហ៊ុន Aramco បានចេញសេចក្ដីថ្លែងការណ៍ថា ក្រុមហ៊ុនបណ្តាក់ទុនរួមគ្នាមានឈ្មោះថា Huajin Aramco Petrochemical Company (HAPCO) នឹងទទួលបន្ទុកសាងសង់ និងដំណើរគម្រោងនេះដែលមានរោងចក្រជាមួយនឹងសមត្ថភាពចម្រាញ់ប្រេងបាន៣០០.០០០បារ៉ែលក្នុងមួយថ្ងៃ (bpd) និងរោងចក្រមួយទៀតដែលមានសមត្ថភាពចម្រាញ់ឧស្ម័ន ethylene បាន១,៦៥លានតោនក្នុងមួយឆ្នាំ និងឧស្ម័ន paraxylene បាន២លានតោនក្នុងមួយឆ្នាំ។

ក្រុមហ៊ុន Aramco បានបន្ថែមទៀតថា ការសាងសង់រោងចក្រនេះនឹងចាប់ផ្តើមនៅត្រីមាសទី២ ដើមឆ្នាំ២០២៣ បន្ទាប់ពីទទួលបានការអនុម័តពីរដ្ឋាភិបាល។ តាមការរំពឹងទុករោងចក្រនេះនឹងដំណើរការពេញលេញនៅឆ្នាំ២០២៦។

ក្រុមហ៊ុន Aramco នឹងផ្គត់ផ្គង់ប្រេងឆៅរហូតដល់២១០.០០០លានបារ៉ែលក្នុងមួយថ្ងៃសម្រាប់រោងចក្រនេះ។

ក្រុមហ៊ុនរដ្ឋ NORINCO Group ដែលជាក្រុមហ៊ុនផលិតគ្រឿងបរិក្ខារយោធានៃប្រទេសចិន កាន់កាប់ភាគហ៊ុន៥១%នៃក្រុមហ៊ុនបណ្ដាក់ទុនរួមគ្នា HAPCO ខណៈក្រុមហ៊ុន Aramco កាន់កាប់ភាគហ៊ុន៣០% ចំណែកឯក្រុមហ៊ុន Panjin Xincheng Industrial Group កាន់កាប់ភាគហ៊ុន១៩%៕ Reuters៕