ដោយ គង់ សូរិយា
ភ្នំពេញ៖ ចរន្តនៃការទិញលក់ និងតម្លៃដីនៅខេត្តកំពង់ឆ្នាំង ចាប់ផ្តើមកើនឡើងបន្ទាប់ពីរដ្ឋាភិបាលអំពាវនាវឲ្យអ្នកវិនិយោគចិនសាងសង់ឡើងវិញ នូវព្រលានយន្តហោះក្នុងខេត្តជាប់មាត់បឹងទន្លេសាបមួយនេះ។
លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូនបានមានប្រសាសន៍ឲ្យដឹងកាលពីពេលថ្មីៗនេះថា ខេត្តកំពង់ឆ្នាំងមានសក្តានុពលលើផ្នែកដឹកជញ្ជូន ដោយសារភូមិសាស្រ្តរបស់ខេត្តនេះមានបណ្តាញគមនាគមតភ្ជាប់ផ្លូវទឹក ផ្លូវគោក ផ្លូវដែក និងព្រលានយន្តហោះស្រាប់។ លោកបានអំពាវនាវឲ្យអ្នកវិនិយោគចិន ដែលលោកបានជួបសាងសង់ព្រលានយន្តហោះក្នុងខេត្តនេះឡើងវិញផងដែរ។
ការសិក្សារបស់ទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) បានរកឃើញថា ខេត្តកំពង់ឆ្នាំងមានភាពអំណោយផលក្នុងការរៀបចំមជ្ឈមណ្ឌល Cargo Hub (កន្លែងផ្ទុកទំនិញ) ដោយសារវាមានភូមិសាស្រ្តល្អប្រសើរ ងាយស្រួលតភ្ជាប់រាជធានីភ្នំពេញ តភ្ជាប់ជាមួយបណ្តាខេត្តភាគពាយ័ព្យតាមរយៈផ្លូវជាតិលេខ៥។
-->
ជាមួយគ្នានេះរដ្ឋាភិបាលក៏បានប្រកាសសាងសង់ស្ពានឆ្លងកាត់បឹងទន្លេសាប ដែលតភ្ជាប់ពីខេត្តកំពង់ឆ្នាំង ទៅកាន់ខេត្តកំពង់ធំដែលមានប្រវែង៣៩០០ម៉ែត្រ ជាស្ពានវែងជាងគេនៅកម្ពុជា និងកំណាត់ផ្លូវ៥៧គីឡូម៉ែត្រតភ្ជាប់់រវាងខេត្តទាំងពីរផងដែរ។
នាយកក្រុមហ៊ុនអចលនទ្រព្យ Khmer Foundation Appraisal Co., Ltd លោកឧកញ៉ា នួន រិទ្ឋីបាន ថា កន្លងមកគេបានមើលរំលងពីសក្តានុពលភូមិសាស្រ្តរបស់ខេត្តកំពង់ឆ្នាំង ខណៈខេត្តនេះជាកន្លែងដ៏ល្អសម្រាប់ការវិនិយោគលើគ្រប់វិស័យ ព្រោះមានទាំងផ្លូវគោក ផ្លូវដែក ផ្លូវទឹក និងផ្លូវអាកាស។
លោកបន្តថា “ការប្រកាសពីគម្រោងភ្ជាប់ផ្លូវថ្មីនេះ និងហេដ្ឋារចនាសម្ព័ន្ឋធំៗឆ្លងកាត់ខេត្តនេះ នឹងធ្វើឲ្យវិស័យអចលនទ្រព្យនៅខេត្តកំពង់ឆ្នាំងមានសម្ទុះឡើងបន្ថែមទៀតនាពេលអនាគត”។
ដីតំបន់ពាណិជ្ជកម្មនៅក្នុងក្រុងកំពង់ឆ្នាំងមានតម្លៃជាមធ្យមពី ៥០០ ទៅ ៦០០ ដុល្លារក្នុង ១ ម៉ែត្រការ៉េ ខណៈដីលំនៅឋានក្នុងក្រុង មានចន្លោះពី ១០០ ទៅ ២០០ ដុល្លារ។ ដីសម្រាប់សង់រោងចក្រ មានតម្លៃចន្លោះពី ១៥ ទៅ ២០ ដុល្លារ ដីកសិកម្ម មានតម្លៃជាមធ្យមពី ២ ទៅ ៥ ដុល្លារ និងដីចម្ការធំៗដែលនៅឆ្ងាយៗអាចនៅចន្លោះ ០,២ ទៅ ០,៥ ដុល្លារ(២ ៥០០ ទៅ ៣ ០០០ ដុល្លារក្នុង ១ ហិកតា)។
អនុប្រធានក្រុមប្រឹក្សាភិបាល នៃសមាគមអ្នកជំនាញអចលនទ្រព្យកម្ពុជា លោក យិន លាងគង់ បានមានប្រសាសន៍គាំទ្រការលើកឡើងខាងលើ ដោយលោកបានមានប្រសាសន៍ថា តាមផែនការរដ្ឋាភិបាលគ្រោងប្រែក្លាយតំបន់នៅសងខាងផ្លូវជាតិលេខ៥ ជាតំបន់ឧស្សាហកម្ម ដោយសារក្រោយពង្រីករួចផ្លូវនេះ នឹងក្លាយជាផ្លូវហាយវេលំដាប់អាស៊ាន ពិសេសគំរោងហេដ្ឋារចនាសម្ព័ន្ឋធំៗរបស់រដ្ឋាភិបាល នឹងធ្វើឲ្យខេត្តកំពង់ឆ្នាំងកាន់តែមានសក្តានុពលបន្ថែមទៀតនាពេលអនាគត។
លោកបន្តថា “ប្រសិនជាព្រលានយន្តហោះខេត្តនេះ ត្រូវសាងសង់ឡើងវិញពិតមែន ខេត្តនេះនឹងមានការរីកចម្រើនលឿន ហើយវានឹងក្លាយជាមជ្ឈមណ្ឌលពាណិជ្ជកម្មសំខាន់មួយទៀតរបស់កម្ពុជា”៕
