ដោយ: គង់ លាងហួរ
អន្តរជាតិ: យោងតាមការស្ទង់មតិរបស់ទីភ្នាក់ងារសារព័ត៌មាន Reuters លើក្រុមអ្នកវិភាគអចលនទ្រព្យបានបង្ហាញថា តម្លៃផ្ទះនៅប្រទេសនូវែលហ្សេឡង់(New Zealand) នឹងកើនឡើងក្នុងអត្រាទាបជាងការរំពឹងទុកពីមុនរហូតដល់ឆ្នាំ២០២៧ខាងមុខ។
ការធ្លាក់ចុះនៃសេដ្ឋកិច្ចរបស់ប្រទេសនេះបានជះផលប៉ះពាល់លើទំនុកចិត្តរបស់អ្នកទិញផ្ទះ បើទោះជាធនាគារកណ្តាលនូវែលហ្សេឡង់បានបន្ធូរបន្ថយគោលនយោបាយរូបិយវត្ថុជាបន្តបន្ទាប់យ៉ាងណាក្តី។
ដើម្បីស្តារសេដ្ឋកិច្ចដែលបានធ្លាក់ចូលទៅក្នុងវិបត្តិកាលពីឆ្នាំមុន ធនាគារកណ្តាលនូវែលសេឡង់បានកាត់បន្ថយអត្រាការប្រាក់ចំនួន២,៥ភាគរយ ចាប់តាំងពីពាក់កណ្តាលឆ្នាំមុន មកនៅត្រឹម៣ភាគរយក្នុងកិច្ចប្រជុំកាលពីខែសីហា និងគ្រោងបន្តទាញទម្លាក់អត្រាការប្រាក់បន្ថែមទៀតនៅចុងឆ្នាំនេះ។
ទោះជាយ៉ាងណា ការបញ្ចុះអត្រាការប្រាក់មិនបានជំរុញឱ្យតម្រូវការលំនៅដ្ឋានក្នុងប្រទេសនូវែលហ្សេឡង់ស្ទុះងើបឡើងវិញនោះទេ។ ការកើនឡើងនៃអត្រាភាពអត់ការងារធ្វើ បាននាំឱ្យការចំណាយក្នុងគ្រួសារ និងទំនុកចិត្តរបស់អ្នកទិញផ្ទះធ្លាក់ចុះ។
យោងតាមការស្ទង់មតិចាប់ពីថ្ងៃទី១៨ ខែសីហាដល់ថ្ងៃទី១១ ខែកញ្ញា បានបង្ហាញថា តម្លៃផ្ទះជាមធ្យមនៅប្រទេសនូវែលហ្សេឡង់នឹងកើនឡើង១,៣ភាគរយនៅឆ្នាំនេះ បើធៀបនឹងការស្ទង់មតិកាលពីខែមិថុនា ដែលរំពឹងថា នឹងកើនឡើង៣,៨ភាគរយ។
តម្លៃផ្ទះត្រូវបានគេរំពឹងថា នឹងកើនឡើង៥ភាគរយនៅឆ្នាំ២០២៦ និងកើនឡើង៤,៣ភាគរយនៅឆ្នាំ២០២៧ បើធៀបនឹងការព្យាករណ៍ពីមុនថា នឹងកើនឡើង៦ភាគរយ និង៥,១ភាគរយរៀងគ្នា។
យោងតាមវិទ្យាស្ថានអចលនទ្រព្យនៃប្រទេសនូវែលសេឡង់ (REINZ)បានឱ្យដឹងថា តម្លៃផ្ទះជាមធ្យមទូទាំងប្រទេសនូវែលហ្សេឡង់មានទំហំទឹកប្រាក់ប្រមាណ៤៥៧.៥៥៤ដុល្លារអាមេរិកក្នុងមួយយូនីត៕ប្រភព: Reuters៕
