ដោយ វុត្ថា
ភ្នំពេញ៖ រដ្ឋាភិបាលតាមរយៈក្រសួងសាធារណៈការ និងដឹកជញ្ជូនសហការជាមួយក្រុមហ៊ុនផ្ដល់ប្រឹក្សា Korea Consultants International (KCI)បានចាប់ផ្តើមបើកកិច្ចប្រជុំពិភាក្សាលើឯកសារបច្ចេកទេសរបស់គម្រោងលើកកម្រិតផ្លូវជាតិលេខ៤៨ (Concept of Detailed Design of Upgrading of National Road 48 Project)។
យោងតាមការចុះផ្សាយតាមរយៈហ្វេសបុករបស់ក្រសួងសាធារណៈការ និង និងដឹកជញ្ជូននៅថ្ងៃទី ៧ ខែឧសភា ឆ្នាំ ២០១៩ នេះ បានឲ្យដឹងថា កិច្ចពិភាក្សានេះរៀបចំឡើងក្នុងគោលបំណងដើម្បី ពិនិត្យលើបច្ចុប្បន្នភាពនៃការអនុវត្តគម្រោង និងពិនិត្យមើលឯកសារលម្អិតលើគម្រោងលើកកម្រិតផ្លូវជាតិលេខ៤៨ដែលបានរៀបចំឡើងដោយក្រុមហ៊ុនផ្ដល់ប្រឹក្សា Korea Consultants International (KCI)។
ប្រភពដដែលបន្តថា បន្ទាប់ពីកិច្ចពិភាក្សានេះ ក្រុមការងាររបស់ក្រសួងក៏បានពិភាក្សាលម្អិតជាមួយក្រុមហ៊ុន ផ្ដល់ទីប្រឹក្សា Korea Consultants International (KCI) ដើម្បីពិនិត្យ និងផ្តល់អានុសាសន៍មួយចំនួនលើផ្នែកបច្ចេកទេសសំខាន់ៗពាក់ព័ន្ធផងដែរ។សម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជាធ្លាប់បានថ្លែងនៅក្នុងពិធីជួបសំណេះ សំណាល ជាមួយកម្មករ និយោជិតនៅតំបន់សេដ្ឋកិច្ចពិសេសកោះកុង កន្លងមកនេះថា ផ្លូវជាតិលេខ៤៨ នឹងក្លាយទៅជាផ្លូវហាយវេ នាពេលអនាគត ក្រោមហិរញ្ញប្បទានរបស់កូរ៉េខាងត្បូង។
សម្តេចតេជោ ហ៊ុន សែន ថ្លែងថា មហិច្ឆតារបស់សម្តេច មិនត្រឹមតែតភ្ជាប់ខេត្តកោះកុង ទៅព្រះសីហនុ នឹងទៅភ្នំពេញនោះ គឺនឹងសាងសង់ផ្លូវតភ្ជាប់កោះកុង ទៅតំបន់ថ្មដានៅខេត្តពោធិ៍សាត់ នឹងទៅខេត្តបាត់ដំបង និងប៉ៃលិន។ សម្តេចតេជោថ្លែងថា “នៅថ្ងៃខាងមុខនេះ ផ្លូវលេខ៤៨ ពីខេត្តកោះកុង ទៅខេត្តព្រះសីហនុ នឹងក្លាយទៅជាផ្លូវហាយវេ (Hight Way) ដ៏សំខាន់មួយសម្រាប់បម្រើដល់ការធ្វើដំណើរ របស់ប្រជាពលរដ្ឋយើង ដែលផ្លូវនេះ នឹងត្រូវស្ថាបនាឡើង ដោយជំនួយសាធារណរដ្ឋកូរ៉េ។
ក្នុងពេលបច្ចុប្បន្ននេះ យើងក៏មានផ្លូវចេញពីខេត្តកោះកុង ទៅតំបន់ ថ្មដា នៃខេត្តពោធិ៍សាត់ និងខេត្តបាត់ដំបងទៀតផង ដើម្បីឲ្យការធ្វើដំណើររបស់ប្រជាពលរដ្ឋយើង កាន់តែងាយស្រួល និងចំណេញទាំងពេលវេលា និងថវិកា ។
សម្តេចតេជោ បានបន្ថែមថា បន្ទាប់ពីការដាក់ចេញនូវ នយោបាយ ឈ្នះ-ឈ្នះ រួចហើយនោះ គឺកម្ពុជា បានកំណត់ដាក់ចេញ នូវយុទ្ធសាស្ត្រពីរសំខាន់គឺ ១)ការប្រែក្លាយតំបន់អតីតសមរភូមិក្តៅ ទាំងអស់ ឲ្យទៅជាតំបន់ទីផ្សារ និងតំបន់អភិវឌ្ឍ និង ២) ការប្រែក្លាយតំបន់ព្រំដែនកម្ពុជា ជាមួយបណ្តាប្រទេសជិតខាង ឲ្យទៅជាតំបន់ដែលមានសន្តិភាព កិច្ចសហប្រតិបត្តិការ និងការអភិវឌ្ឍ។
ផ្លូវលេខ៤៨មានប្រវែង១៥០គីឡូម៉ែត្រ ចាប់ពីផ្លូវបំបែកស្រែអំបិលទៅដល់ទីរួមខេត្តកោះកុង ត្រូវបានរការខូចខាត ដោយដល់អាយុកាល ហើយត្រូវស្ថាបនាឡើងវិញ និងដោយសារការដឹកលើសទម្ងន់កំណត់ ព្រមទាំងស្ថានភាពអាកាសធាតុ ដែលមានភ្លៀងឥតឈប់ឈរនៅតំបន់នោះ៕
