ដោយៈ ម៉ាលីនណា
ព្រះសីហនុៈ ក្រុមការងារពិសេសជំរុញការវិនិយោគ បានចេញលិខិតអនុញ្ញាតជាគោលការណ៍ចំនួន៤១២គម្រោង មានទុនវិនិយោគសរុបប្រមាណ៧៩៧០លានដុល្លារ និងប៉ាន់ស្មានអាចបង្កើតឱកាសការងារ៥២,០០៤កន្លែង។
លោកឯម ភាពអភិបាលរងខេត្តព្រះសីហនុបានមានប្រសាសន៍ឲ្យដឹងទៀតថា វិធានការដោះស្រាយគម្រោងវិនិយោគជាប់គាំង ក្នុងខេត្តព្រះសីហនុ ដើរតួនាទីជា “ច្រកចេញ-ចូលតែមួយ” ដែលមានសិទ្ធិពិនិត្យ សម្រេច និងផ្តល់លិខិតអនុញ្ញាត ឬអាជ្ញាបណ្ណនានាជាកញ្ចប់លើគម្រោងវិនិយោគ និងសកម្មភាពធុរកិច្ចស្នើសុំដាក់ចេញ នូវលិខិតបទដ្ឋានគតិយុត្តចាំបាច់នានាតាមរយៈ គណៈកម្មាធិការគោលនយោបាយសេដ្ឋកិច្ចនិងហិរញ្ញវត្ថុ និងអនុវត្តនូវកិច្ចការផ្សេងទៀតពាក់ព័ន្ធនឹងកម្មវិធីពិសេសនេះ តាមការសម្រេចរបស់រាជរដ្ឋាភិបាល។
-->
លោក ឯម ភាព បានមានប្រសាសន៍បែបនេះ ក្នុងពេលអញ្ជើញបើកសិក្ខាសាលាផ្សព្វផ្សាយសេចក្តីណែនាំស្តីពី “នីតិវិធីនៃការអនុវត្តការលើកទឹកចិត្តផ្នែកពន្ធដារ ក្រោមកម្មវិធីពិសេសជំរុញការវិនិយោគក្នុងខេត្តព្រះសីហនុ។
លោកបន្តថា ក្នុងនាមសមាជិកក្រុមការងារជំរុញ ការវិនិយោគខេត្តព្រះសីហនុ រីករាយ ព្រោះសិក្ខាសាលាក្នុងថ្ងៃនេះ មានគោលបំណងដើម្បីផ្សព្វផ្សាយអំពីសេចក្តីណែនាំលេខ ២៩៧២២ អពដ ស្តីពី “នីតិវិធីនៃការអនុវត្តការលើកទឹកចិត្តផ្នែកពន្ធដារ ក្រោមវិសាលភាពកម្មវិធីពិសេស” ដោយជំនាញមន្ត្រីបច្ចេកទេស របស់អគ្គនាយកដ្ឋានពន្ធដារផ្ទាល់៕
លោកអភិបាលរងខេត្តបានបន្ថែមថា ស្ថានភាពនៃការវិនិយោគ របស់ក្រុមហ៊ុននានា នៅទូទាំងខេត្តព្រះសីហនុ ផ្តោតលើវិស័យមួយចំនួន ដូចជា តំបន់សេដ្ឋកិច្ចពិសេស អភិវឌ្ឍន៍ទេសចរណ៍(ដីជួលរយៈពេលវែង ដីឆ្នេរ និងកោះ) កសិកម្ម កសិ-ឧស្សាហកម្ម ឧស្សាហកម្ម រោងចក្រ សហគ្រាស សិប្បកម្ម ហេដ្ឋារចនាសម្ព័ន្ធ សេវាកម្មទេសចរណ៍ និងសណ្ឋាគារ កសិដ្ឋានចិញ្ចឹមសត្វ កំពង់ផែសម្រាប់ធ្វើការនាំចេញ-ចូល ក្នុង និងក្រៅប្រទេស។
កាលខែមករា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអញ្ជើញជាអធិបតី ក្នុងពិធីប្រកាសដាក់ឱ្យអនុវត្ត ជាផ្លូវការនូវ “កម្មវិធីពិសេសជំរុញការវិនិយោគ ក្នុងខេត្តព្រះសីហនុ ឆ្នាំ ២០២៤” ក្នុងគោលបំណង ដើម្បីដាក់ចេញនូវវិធានការនិងយន្តការ ដែលមានលក្ខណៈជាកញ្ចប់ប្រទាក់ក្រឡាមុតស្រួច និងសាមញ្ញ៕
