ដោយៈ ចំណាន
ភ្នំពេញៈ លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានទទួលជួបពិភាក្សាការងារជាមួយបណ្ឌិត ម៉ឹង មករា រដ្ឋលេខាធិការទីស្តីការគណៈរដ្ឋមន្ត្រី និងជាប្រធានក្រុមការងារពិសេសនាយករដ្ឋមន្ត្រី លើកិច្ចការតាមដានត្រួតពិនិត្យ និងវាយតម្លៃការអនុវត្តគោលនយោបាយ ពាក់ព័ន្ធនឹងសេដ្ឋកិច្ចក្រៅប្រព័ន្ធ សហគ្រាសធុនមីក្រូ តូច និងមធ្យម អំពីគម្រោងវិនិយោគអភិវឌ្ឍន៍ថ្នាលបច្ចេកវិទ្យាឌីជីថល សម្រាប់គាំទ្រដល់សហគ្រាសធុនមីក្រូ តូច និងមធ្យម របស់ក្រុមហ៊ុន KHEMRA NEXUS Co., Ltd.។
តាមរយៈការធ្វើបទបង្ហាញ ភាគីក្រុមហ៊ុនបានបញ្ជាក់ថា គោលគំនិតចម្បងរបស់ក្រុមហ៊ុន គឺធ្វើការអភិវឌ្ឍហេដ្ឋារចនាសម្ព័ន្ធបច្ចេកវិទ្យាឌីជីថលមួយ ដែលជួយសហគ្រាសធុនមីក្រូ តូច និងមធ្យម មានលទ្ធភាពតភ្ជាប់មូលដ្ឋានផលិតកម្ម របស់ខ្លួនទៅដល់ទីផ្សារ ពិសេសការតភ្ជាប់នឹងសេវាហិរញ្ញវត្ថុ ដែលការណ៍នេះនឹងជួយលើកកម្ពស់សមត្ថភាព និងការរីកលូតលាស់របស់សហគ្រាសធុនមីក្រូ តូច និងមធ្យម ប្រកបដោយចីរភាព ស្របតាមចក្ខុវិស័យរបស់រាជរដ្ឋាភិបាល។
លោកអគ្គលេខាធិការ បានសម្តែងនូវសេចក្តីសោមនស្សរីករាយចំពោះគម្រោងវិនិយោគរបស់ក្រុមហ៊ុន ដែលអាចចូលរួមចំណែកសម្រួលដល់សកម្មភាពអាជីវកម្ម របស់សហគ្រាសធុនមីក្រូ តូច និងមធ្យម ក៏ដូចជាជួយដោះស្រាយបញ្ហា ប្រឈមនាពេលបច្ចុប្បន្នមួយចំនួនដូចជា ការតភ្ជាប់នឹងទីផ្សារ ការទទួលសេវាហិរញ្ញវត្ថុ។ល។ មួយវិញទៀត គម្រោងវិនិយោគនេះ ក៏នឹងចូលរួមចំណែកអភិវឌ្ឍន៍សេដ្ឋកិច្ចឌីជីថលរបស់កម្ពុជាផងដែរ៕
