ទីផ្សារលំនៅឋាន​នៅ​ប្រទេសហ្វីលីពីន​ នៅ​តែ​បន្តបង្ហាញ​ពី​តម្រូវការ​ប្រកប​ដោយស្ថិរភាព​ ទោះ​មាន​បញ្ហា​ផ្នែកសេដ្ឋកិច្ច​

ដោយ: សហសេវិក
អន្តរជាតិ: ទីផ្សារអចលនទ្រព្យលំនៅឋាននៅប្រទេសហ្វីលីពីន នៅតែបន្តបង្ហាញពីតម្រូវការប្រកបដោយស្ថិរភាព ទោះបីជាមានបញ្ហាប្រឈមផ្នែកសេដ្ឋកិច្ចយ៉ាងណាក្តី។

ខុនដូដែលមានតម្លៃសមរម្យ កម្មវិធីលំនៅឋានរបស់រដ្ឋាភិបាល និងទីក្រុងនានានៅតាមតំបន់ដែលកំពុងរីកចម្រើន សុទ្ធតែផ្តល់ឱកាសសម្រាប់ការអភិវឌ្ឍនាពេលអនាគត។

ទោះជាយ៉ាងណា ក្រុមហ៊ុនអភិវឌ្ឍន៍អចលនទ្រព្យកំពុងកែសម្រួលយុទ្ធសាស្ត្រ ដើម្បីឱ្យស្របទៅនឹងស្ថានភាពទីផ្សារ និងលទ្ធភាពទិញរបស់អ្នកទិញ។

យោងតាមក្រុមហ៊ុន Leechiu Property Consultants តម្រូវការលំនៅឋាននៅតែមានស្ថិរភាពនៅក្នុងឆមាសទីមួយនៃឆ្នាំ ២០២៦។ នៅតំបន់ Metro Manila មានខុនដូប្រហែល ៨២.៩០០ យូនីតដែលមិនទាន់លក់ចេញ ស្មើនឹងការផ្គត់ផ្គង់សម្រាប់រយៈពេល ៣៤ ខែ។

ជាលទ្ធផល អ្នកអភិវឌ្ឍន៍កំពុងផ្តោតលើការលក់លំនៅឋានដែលមានស្រាប់ និងពន្យារពេលការដាក់ឱ្យដំណើរការគម្រោងថ្មីៗ។ ក្រុមហ៊ុន Colliers Philippines កត់សម្គាល់ថា ការកែសម្រួលនេះនឹងជួយឱ្យទីផ្សារអាចស្រូបយកការផ្គត់ផ្គង់លើសតម្រូវការ ក្នុងបរិបទដែលកំណើនសេដ្ឋកិច្ចមានភាពយឺតយ៉ាវ អត្រាអតិផរណានៅតែបន្តកើតមាន និងអត្រាការប្រាក់ស្ថិតក្នុងកម្រិតខ្ពស់។

ការលក់លំនៅឋានមុនពេលសាងសង់រួច (pre-sales) សរុបរបស់ក្រុមហ៊ុន Ayala Land, SM Prime, Robinsons Land និង Megaworld បានធ្លាក់ចុះ ៧% នៅក្នុងឆមាសទីមួយនៃឆ្នាំ ២០២៦។

ទោះជាយ៉ាងណា លំនៅឋានដែលមានតម្លៃសមរម្យនៅតែជាប្រភពតម្រូវការដ៏សំខាន់ ដោយខុនដូដែលមានតម្លៃចន្លោះពី ១,៨ លានប៉េសូ ទៅ ៣,៦ លានប៉េសូ គ្របដណ្ដប់ជិតពីរភាគបីនៃការលក់ខុនដូទាំងអស់នៅក្នុងតំបន់ Metro Manila ក្នុងអំឡុងពេលដូចគ្នានេះ៕