ដោយៈ រ៉ាណេត
ភ្នំពេញៈ មានការលើកឡើងថា នៅក្នុងវិស័យអចលនទ្រព្យកម្ពុជានាពេលបច្ចុប្បន្ននេះ អ្នកវិនិយោគភាគច្រើនសុទ្ធតែបានបង្ហាញ ពីចំណាប់អារម្មណ៍ទៅលើការធ្វើជំនួញលើវិស័យដីធ្លីច្រើនជាងវិស័យសំណង់ ដោយសារតែការវិនិយោគដី អាចធ្វើបានចាប់ពីទំហំតូចឡើងទៅរហូតដល់ទ្រង់ទ្រាយធំ និងងាយទទួលបានចំណេញ។
អគ្គនាយកក្រុមហ៊ុនអចលនទ្រព្យអន្តរជាតិ Century 21 Land Station លោក កាង សុធី បានមានប្រសាសន៍ឲ្យដឹងកាលពីពេលថ្មីៗនេះថា ការវិនិយោគលើវិស័យដីធ្លីត្រូវបានបែងចែកជាច្រើនរូបភាព និងច្រើនសណ្ឋាន សម្រាប់អ្នកដែលចង់ចូលប្រឡូកនៅក្នុងវិស័យមួយនេះ សុទ្ធតែមានឱកាសទាំងអស់ ហើយក៏អាចរីកលូតលាស់ក្នុងពេលដ៏ខ្លីផងដែរ។
-->
លោកបានបន្តទៀតថា “សម្រាប់អ្នកដែលដាក់ចិត្តរកស៊ីនៅក្នុងវិស័យនេះ ទាមទារឱ្យមានការចេះសង្កេតបរិយាកាសជុំខ្លួន និងមានភាពឆ្លាតវៃក្នុងការសម្រេចិត្ត។
អ្នកជំនាញដែលកំពុងតែឡូកយ៉ាងជ្រៅ នៅក្នុងវិស័យដីធ្លីរូបនេះបានបន្តទៀតថា “ការទិញដីទុកលក់យកចំណេញ ត្រូវតែធ្វើឡើងដោយភាពរីករាយ និងមានសេរីភាពក្នុងការសម្រេចចិត្ត។ លោកបានថា “មានមនុស្សមួយចំនួនបានបាត់បង់ឱកាស ដោយសារតែមហិច្ឆតាខ្ពស់ ចង់បានចំណេញច្រើនហួសប្រមាណ។
លោកកាង សុធីបានលើជាឧទាហរណ៍ថា “ អ្នកខ្លះ ដីទើបតែនឹងទិញបានប្រហែលជា២ខែ ហើយមានគេសាកសួរដោយផ្តល់ប្រាក់ចំណេញ ប្រមាណ ៣០ភាគរយនៃតម្លៃដើម ប៉ុន្តែពួកគេមិនលក់នោះទេ ដោយសារតែគិតថា ភាពលោកលន់ចង់ចំណេញច្រើន ក៏បង្អង់ចិត្តទុកលក់ពេលក្រោយ។ ការសម្រេចចិត្តបែបនេះ នឹងធ្វើឱ្យអតិថិជនងាកទៅសម្លឹងមើលតំបន់ដែលនៅជិតគ្នាជំនួសវិញ។
លោកបានបន្តថា “ដីដែលមានទីផ្សារខ្ពស់ មានហាងឆេងល្អ មិនពិបាកលក់ គួរតែជាប្រភេទដីដែលមានតម្លៃក្រោម ៣០ម៉ឺនដុល្លារ”។
លោកកាង សុធី បានមានប្រសាសន៍ទៀតថា បង្កើនការលក់ក្នុងរយៈពេលដ៏ខ្លី ទោះចំណេញតិចក៏ដោយ ឱ្យតែមានឱកាសច្រើនដង គួរកុំអូសបន្លាយពេល ត្រូវតែលក់ចេញ ហើយរកទិញជំនួសបន្ថែមវិញ។ លោកបន្តថា យើងគួរប្រកាន់គោលការណ៍ថា ស៊ូចំណេញតិចតែលក់ឱ្យបានច្រើនដង នោះចំណូលនៃប្រាក់ចំណេញក៏នឹងកើនឡើង ដែល ប្រសើរជាងការទន្ទឹងរង់ចាំទ្រព្យចំណេញច្រើនក្នុងក្ដីស្រមៃ៕
