ដោយ វុត្ថា
ទីក្រុងឡុងដ៏ៈ តម្លៃលំនៅឋានជាមធ្យមនៅទូទាំងប្រទេសអង់គ្លេស បានកើនដល់ ២៣៣.៥៤១ ផោន ប្រហែល ២៨៧.៤២៨ដុល្លារអាមេរិក នៅក្នុងខែសីហាគឺខ្ពស់ជាងខែមុន ០,៣ ភាគរយ។
យោងតាមរបាយការណ៍របស់ក្រុមហ៊ុន Halifax ដែលផ្តល់ប្រាក់កម្ចីទិញអចលនទ្រព្យ បានបង្ហាញកាលពីចុងសប្តាហ៍កន្លងមកនេះបង្ហាញថា តម្លៃលំនៅឋាននៅខែមិថុនាដល់ខែសីហាគឺកើនឡើង០,១ ភាគរយច្រើនជាងរយៈពេល៣ខែមុន។ ហើយតម្លៃលំនៅឋានជាមធ្យមនៅក្នុងខែសីហា គឺខ្ពស់ជាងរយៈពេលដូចគ្នាកាលពីឆ្នាំមុន ១,៨ ភាគរយ។
-->
លោក Russell Galley នាយកគ្រប់គ្រងនៅក្រុមហ៊ុន Halifax បាននិយាយថា មិនមានការផ្លាស់ប្តូរតម្លៃលំនៅឋានពិតប្រាកដ នៅក្នុងខែសីហាទេ ដោយសារតែតម្លៃអចលនទ្រព្យជាមធ្យម បានកើនឡើងត្រឹមតែ០.៣ ភាគរយក្នុងមួយខែទៅមួយខែ។
លោកបន្ថែមថា ស្ថានភាពនេះបន្តពង្រីកនូវទំនោរជាទូទៅ ដែលយើងបានឃើញក្នុងរយៈពេលប្រាំមួយខែចុងក្រោយនេះ ជាមួយតំលៃលំនៅឋានជាមធ្យមបានផ្លាស់ប្តូរតាំងពីខែមីនាកន្លងមកនេះ។
លោក Galley បន្តថា “ខណៈពេលដែលភាពមិនប្រាកដប្រជា ផ្នែកសេដ្ឋកិច្ចនៅតែបន្តធ្វើឱ្យប៉ះពាល់ដល់អារម្មណ៍អ្នកប្រើប្រាស់ ទាំងអ្នកទិញ និងអ្នកលក់ ដែលជាកត្តាជះឥទ្ធិពលអក្រក់ដល់ទីផ្សារអលចនទ្រព្យខ្លះៗផង។
លោក Galley បានបន្ថែមថា“ ទោះបីជាទីផ្សារលំនៅដ្ឋាន នឹងត្រូវរងឥទ្ធិពលដោយព្រឹត្តិការណ៍នានានៅក្នុងសេដ្ឋកិច្ចក៏ដោយ ក៏វានៅតែបន្តបង្ហាញពីភាពរឹងមុំានាពេលបច្ចុប្បន្ន”។ លោកបន្តថា “យើងក៏មិនត្រូវភ្លេចអំពីការពិតដែលថាកត្តាជំរុញ និងសកម្មភាពធំបំផុតក្នុងរយៈពេលវែង នៅតែជាកង្វះខាតនៃអចលនទ្រព្យ ដែលអាចរកបានដើម្បីឆ្លើយតបនឹងតម្រូវការពីអ្នកទិញ”៕
