ដោយ វុត្ថា
ភ្នំពេញៈ ក្រសួងសាធារណៈការ និងដឹកជញ្ជូននឹងចុះហត្ថលេខាជាមួយក្រុមហ៊ុន China Railway International Group C, Ltd ដើម្បីសិក្សាគំរោងសាងសង់ផ្លូវល្បឿនលឿនជាប្រវត្តិសាស្រ្តភ្នំពេញ បាវិត។
លោក វ៉ាស៊ីម សូរិយា អ្នកនាំពាក្យក្រសួងសាធារណៈការ និងដឹកជញ្ជូនបានឱ្យដឹងតាមទូរស័ព្ទនៅថ្ងៃទី៤ ខែវិច្ឆិកា ឆ្នាំ ២០១៩ នេះ បានឱ្យដឹងថា គម្រោងដែលនឹងចុះហត្ថលេខានៅរសៀលនេះ គ្រាន់តែជាគម្រោងក្របខណ្ឌរបស់រដ្ឋាភិបាល តាមរយៈក្រសួងសាធារណៈការ និងដឹកជញ្ជូនប្រគល់ឱ្យក្រុមហ៊ុន សម្រាប់សិក្សាប៉ុណ្ណោះ បន្ទាប់ពីសិក្សា និងដឹងពីតម្លៃថ្លៃអស់ប៉ុន្មានរួចរាល់ហើយនោះ នឹងធ្វើកុងត្រាមួយទៀតចាប់ផ្តើមសាងសង់ហើយ។
-->
លោកបន្តថា “នេះគឺជាកិច្ចព្រមព្រៀងក្របខណ្ឌ ដែលសិក្សារួចហើយ គឺសាងសង់ដោយក្រុមហ៊ុន China Rail Way International Group .,Ltd នេះ”។ លោកបន្តថា “មានន័យថា ក្រសួងអនុញ្ញាតឱ្យក្រុមហ៊ុនតែមួយប៉ុណ្ណោះ គឺក្រុមហ៊ុនដែលនឹងចុះហត្ថលេខានៅរសៀលនេះ”។
គម្រោងផ្លូវល្បឿនលឿនភ្នំពេញ-បាវិត (Phnom Penh-Bavet Expressway) ផ្លូវល្បឿនលឿនភ្នំពេញ-បាវិត មានប្រវែងសរុបប្រហែល ១៣៥ គ.ម។ ផ្លូវនេះត្រូវសាងសង់ជា ០៤គន្លង តួផ្លូវមានទទឹង ២៥,៥ ម៉ែត្រ។ ខ្សែផ្លូវនេះ នឹងចេញពីភ្នំពេញនៅចំណុចផ្លូវខ្សែក្រវ៉ាត់ក្រុងទី៣ កាត់តាមខេត្តកណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាម។
យោងតាមរបាយការណ៍សិក្សារបស់ទីភ្នាក់ងារសហប្រតិបត្តិការអន្តរជាតិជប៉ុន (JICA) ផ្លូវល្បឿនលឿននេះ ជាប្រភេទផ្លូវលើអាកាស (Viaduct) ប្រវែងប្រហែល ១២ គ.ម មានលូប្រអប់ (Box Culvert) ប្រវែងប្រហែល ២៨,៤ គ.ម និងជាប្រភេទ ផ្លូវលើកកម្ពស់ (Embankment) ប្រវែងប្រហែល ៨៥,៨ គ.ម។ ផ្លូវល្បឿនលឿន ភ្នំពេញ-បាវិត មានផ្លូវបំបែក ប្តូរទិស (Inter-Change) ចំនួន ៧ កន្លែង កន្លែងឈប់សម្រាក ៦កន្លែង និងច្រកទ្វារ ព្រំដែនថ្មីចំនួន១ផងដែរ។
គម្រោងសាងសង់ផ្លូវល្បឿនលឿនភ្នំពេញ-បាវិត ត្រូវបានបញ្ចប់ការសិក្សាសមិទ្ធិលទ្ធភាព និងកំពុងស្ថិតក្នុង ដំណាក់កាលពិភាក្សាលើតម្លៃនៃគម្រោង និងប្រភពថវិកា។
ក្រសួងសាធារណការ និងដឹកជញ្ជូន នៃព្រះរាជាណាចក្រកម្ពុជា និងក្រសួងដឹកជញ្ជូនរបស់ប្រទេសវៀតណាម ក៏បានចុះអនុស្សរណៈយោគយល់គ្នា ស្តីពីការជំរុញការសិក្សា និងសាងសង់ផ្លូវល្បឿនលឿនភ្នំពេញ-បាវិត និងផ្លូវល្បឿនលឿនហូជីមិញ-ម៉ុកបៃ រួចរាល់ផងដែរ។
ព៌តមានលំអិតពីការចុះហត្ថលេខានេះ គេហទំព័រ Propertyarea.asia នឹងធ្វើបច្ចុប្បន្នភាពជូននាពេលរសៀលនេះ៕
