ដោយវុត្ថា
ខេត្តព្រះសីហនុ៖ លោក W.Patrick Murphyឯកអគ្គរដ្ឋទូតសហរដ្ឋអាមេរិកអះអាងថា ខេត្តព្រះសីហនុ មានការអភិវឌ្ឍលើវិស័យសំណង់យ៉ាងច្រើន ដោយផ្តល់នូវគម្រោងថ្មីៗ ដូចជាប្រភពថាមពលអគ្គិសនី ដែលបានចូលរួមចំណែកក្នុងការអភិវឌ្ឍរីកចម្រើននាពេលខាងមុខ។
លោក W.Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា បានឱ្យដឹងបែបនេះ នៅក្នុងជំនួបជាមួយលោក គួច ចំរើន អភិបាល នៃគណៈអភិបាលខេត្តព្រះសីហនុ កាលពីថ្ងៃទី ១៤ ខែមករាម្សិលមិញនេះ ខណៈ លោក ទៅបំពេញទស្សនកិច្ច ហាងកាហ្វេ Starbuck និងចូលរួមកម្មវិធីកីឡានៅសាលាឡាយហ្វ ក្រុងព្រះសីហនុ។
លោកបន្តថា ការទស្សនកិច្ចជាផ្លូវការនាពេលនេះទទួលបានផ្លែផ្កា និងមានឱកាសជួបជាមួយធុរកិច្ចក្នុងស្រុក ក៏ដូចជាធុរកិច្ចក្រុមហ៊ុនអាមេរិក ព្រមទាំងបានតំណាងអង្គការសង្គមស៊ីវិល នៅខេត្តព្រះសីហនុផងដែរ ។
លោកថា សម្រាប់ឆ្នាំនេះ ក៏ជាខួបលើកទី៧០ នៃចំណងការទូតរវាងសហរដ្ឋអាមេរិក និងកម្ពុជា ផ្តោតលើវិស័យ នៃកិច្ចសហប្រតិបត្តិការវិនិយោគកាន់តែស៊ីជម្រៅ ព្រមទាំងបានផ្តល់អនុសាសន៍មួយចំនួនដូចជា: អង្គការសង្គមស៊ីវិល ជាធនធានមួយមានតម្លៃ ព្រោះពួកគាត់មានជំនាញធ្វើការងារជាមួយកម្មករ និយោជិក ដែលមិនបានគោរពតាមបទដ្ឋាន ប៉ុន្តែយើងត្រូវស្តាប់ពីគ្រប់ភាគី ដើម្បីរួមចំណែកក្នុងការអភិវឌ្ឍផងដែរ ។
លោក គួច ចំរើន អភិបាលខេត្តព្រះសីហនុ ឱ្យដឹងដែរថា ខេត្តព្រះសីហនុ គឺមានការចូលរួមចំណែករបស់សហរដ្ឋអាមេរិកដូចជា ផ្លូវជាតិលេខ៤ ដោយផ្តើមចេញពីផ្លូវនេះ ធ្វើឱ្យខេត្តព្រះសីហនុ មានឈ្មោះបោះសំឡេងមកដល់បច្ចុប្បន្ន ផ្លូវជាតិលេខ៤ បានជួយសម្រួលក្នុងការធ្វើដំណើរ និងដឹកជញ្ជូន និងលើកកម្ពស់ជីវភាពរស់នៅរបស់ប្រជាពលរដ្ឋ ។
លោកបន្តថា កន្លងមកកងទ័ពសហរដ្ឋអាមេរិក ក៏បានធ្វើលំហាត់សមយុទ្ធជាមួយនឹងកងទ័ពជើងទឹកកម្ពុជា ” រាម ” និងបានជួយកម្ពុជា ពិសេសខេត្តព្រះសីហនុ លើវិស័យសុខាភិបាល វិស័យអប់រំ និងការងារក្នុងសហគមន៍មួយចំនួន ដែលប្រជាពលរដ្ឋកោតសរសើរ និងវាយតម្លៃខ្ពស់ ។ ខេត្តព្រះសីហនុមានជនជាតិអាមេរិកស្នាក់នៅជាង ៣០នាក់ ប្រកបមុខរបរកស៊ី ហើយកាលពីឆ្នាំ២០១៩ មានអ្នកទេសចរសហរដ្ឋអាមេរិកជាង ២៣.០០០នាក់ មកធ្វើទេសចរនៅខេត្តព្រះសីហនុ ។
លោកអភិបាលខេត្តរូបនេះបន្តថា ខេត្តព្រះសីហនុក៏បានចុះ MOU ជាមួយក្រុង ស៊ីអាថល នៃសហរដ្ឋអាមេរិក ជាក្រុង-ខេត្តបងប្អូន និងសូមឱ្យស្ថានទូតជួយជំរុញខេត្ត ក្រុងបងប្អូន មកធ្វើការវិនិយោគ និងទេសចរនៅខេត្តព្រះសីហនុឱ្យបានកាន់តែច្រើន ព្រោះរាជរដ្ឋាភិបាលកម្ពុជាមានគោលនយោបាយប្រកាន់ភ្ជាប់នូវទីផ្សារសេរី ស្វាគមន៍អ្នកវិនិយោគ និងទេសចរមកពីគ្រប់ទិសទី។ កន្លងមករដ្ឋបាលខេត្តព្រះសីហនុ បានធ្វើការជួបជុំជាមួយអង្គការសង្គមស៊ីវិលក្នុងមួយឆ្នាំ ២លើក ដោយសកម្មភាពនេះ គឺធ្វើជារៀងរាល់ឆ្នាំ ៕
