ដោយ គង់ សូរិយា
ភ្នំពេញ៖ ស្របពេលកំនើនប្រជាសាស្រ្ត និងការកើនឡើងនូវគម្រោងវិនិយោគនានា នៅភាគខាងត្បូងរាជធានីភ្នំពេញ សាលាក្រុងប៉ារីសសហការជាមួយរដ្ឋបាលរាជធានីភ្នំពេញកំពុងសិក្សាពីការអភិវឌ្ឍន៍ និងបញ្ហាប្រឈមនាពេលអនាគតនៅតំបន់ខាងលើនេះ។
អ្នកនាំពាក្យសាលារាជធានីភ្នំពេញ លោកម៉េត មាសភក្តីបានថ្លែងឲ្យដឹងតាមទូរស័ព្ទកាលពីម្សិលម៉ិញនេះថា សាលាក្រុងប៉ារីសបាននិងកំពុងសិក្សាពីការអភិវឌ្ឍ និងបញ្ហាប្រឈម ដើម្បីរកដំណោះស្រាយនាពេលអនាគត នៅពេលចំនួនប្រជាពលរដ្ឋកើនឡើងនៅតំបន់ភាគខាងត្បូង ឈៀងខាងលិចរាជធានីភ្នំពេញ។ លោកបន្តថា ការសិក្សានេះនឹងផ្តោតលើបញ្ហាហេដ្ឋារចនាសម្ព័ន្ឋ ប្រព័ន្ឋចម្រោះទឹកកខ្វក់ តំបន់បៃតង និងបញ្ហាមួយចំនួន ទៀត ដើម្បីធ្វើជាមូលដ្ឋានសម្រាប់រៀបចំផែនការអភិវឌ្ឍនាពេលអនាគត។
លោកបន្តថា “ការសិក្សានេះនឹងមានលក្ខណៈវិទ្យាសាស្រ្ត ដើម្បីរៀបចំផែនការអភិវឌ្ឈន៍នាពេលអនាគតថាគួររៀបចំប្រព័ន្ឋលូ ផ្លូវ អាងចម្រោះទឹកកខ្វក់ និងតំបន់បៃតងយ៉ាងដូចម្តេច នៅពេលចំនួនប្រជាពលរដ្ឋកើនឡើងខ្លាំងនាពេលអនាគត”។លោកបន្តថា “ការសិក្សានេះក៏អាចផ្តល់ជាចំណេះដឹង និងសម្រាប់ឲ្យសាលារាជធានីភ្នំពេញរៀបចំផែនការអភិវឌ្ឍន៍នៅតំបន់នេះនាពេលអនាគត”។
អតីតវីរស្ថាបត្យករកម្ពុជា លោកវណ្ណ ម៉ូលីវណ្ណបានជម្រុញឲ្យមានការពង្រីកក្រុងភ្នំពេញឆ្ពោះទៅកាន់ភាគខាងត្បូង ដោយសារតំបន់នេះជាតំបន់មានសណ្ឋានដីខ្ពស់ មិនប្រឈមនឹងទឹកជំនន់ និងជាតំបន់ដែលងាយស្រួល ក្នុងការរៀបចំផែនការអភិវឌ្ឍនាពេលអនាគត”៕
