វិស័យបច្ចេកវិទ្យា AI រំពឹងជំរុញសេដ្ឋកិច្ច និងបង្កើនតម្រូវការអចលនទ្រព្យពាណិជ្ជកម្មនៅទូទាំងតំបន់អាស៊ីប៉ាស៊ីហ្វិក

ដោយ: សហសេវិក
អន្តរជាតិ: យោងតាមការសិក្សាចុងក្រោយមួយដោយក្រុមហ៊ុន Cushman & Wakefield បានឱ្យដឹងថា បញ្ញាសិប្បនិម្មិត (AI) នឹងជំរុញការពង្រីកសេដ្ឋកិច្ច និងបង្កើនតម្រូវការអចលនទ្រព្យពាណិជ្ជកម្មនៅទូទាំងតំបន់អាស៊ីប៉ាស៊ីហ្វិក (APAC)។

ការសិក្សាបានកត់សម្គាល់ថា បញ្ញាសិប្បនិម្មិត (AI) នឹងដើរតួជាកម្លាំងវិជ្ជមានសម្រាប់ទាំងកំណើនសេដ្ឋកិច្ច និងតម្រូវការអចលនទ្រព្យ ខណៈតំបន់នេះពង្រឹងជំហររបស់ខ្លួនជាមជ្ឈមណ្ឌលសកលសម្រាប់ផលិតកម្ម សេវាកម្ម និងនវានុវត្តន៍។

លោក Dominic Brown ប្រធានផ្នែកស្រាវជ្រាវអន្តរជាតិ អាស៊ីប៉ាស៊ីហ្វិក និង EMEA នៃក្រុមហ៊ុន Cushman & Wakefield បានអះអាងថា ការវិភាគរបស់យើងបង្ហាញថា បញ្ញាសិប្បនិម្មិត (AI) ពង្រីកសកម្មភាពសេដ្ឋកិច្ច ហើយការណ៍នេះនឹងជំរុញឱ្យមានតម្រូវការអចលនទ្រព្យកាន់តែច្រើន។

សេដ្ឋកិច្ចរបស់តំបន់អាស៊ីប៉ាស៊ីហ្វិកត្រូវបានព្យាករថានឹងកើនឡើងប្រហែល៣ភាគរយទៅ៤ភាគរយជារៀងរាល់ឆ្នាំរហូតដល់ឆ្នាំ២០៣០ ដោយសារការកើនឡើងនៃផលិតភាពដែលជំរុញដោយបញ្ញាសិប្បនិម្មិត (AI) និងការវិនិយោគលើហេដ្ឋារចនាសម្ព័ន្ធដូចជាមជ្ឈមណ្ឌលទិន្នន័យ និងថាមពល។

បញ្ញាសិប្បនិម្មិត (AI) ត្រូវបានគេរំពឹងថានឹងដើរតួនាទីយ៉ាងសំខាន់ក្នុងការគាំទ្រដល់កំណើនសេដ្ឋកិច្ចរយៈពេលវែងរបស់តំបន់អាស៊ីប៉ាស៊ីហ្វិក ដោយជំនួសប្រជាជនវ័យចំណាស់នៅក្នុងប្រទេសអភិវឌ្ឍន៍ និងជំរុញផលិតភាពនៅក្នុងទីផ្សារដែលកំពុងរីកចម្រើន។

បញ្ញាសិប្បនិម្មិត (AI) ត្រូវបានគេរំពឹងថានឹងបង្កើនតម្រូវការអចលនទ្រព្យពាណិជ្ជកម្មខណៈកំណើនសេដ្ឋកិច្ចកាន់តែរឹងមាំ និងការបង្កើតអាជីវកម្មថ្មីជំរុញឱ្យមានតម្រូវការការិយាល័យ និងឧស្សាហកម្មកាន់តែខ្ពស់។

ទីផ្សារអចលនទ្រព្យផ្នែកភស្តុភារ និងឧស្សាហកម្មត្រូវបានគេរំពឹងថា នឹងទទួលបានអត្ថប្រយោជន៍យ៉ាងខ្លាំងពីបញ្ញាសិប្បនិម្មិត (AI) ដែលជំរុញដោយស្វ័យប្រវត្តិកម្ម ពាណិជ្ជកម្មអេឡិចត្រូនិក និងខ្សែសង្វាក់ផ្គត់ផ្គង់៕

គម្រោងអភិវឌ្ឍន៍័ប្រមាណ៧០បាន និងកំពុងអភិវឌ្ឍន៍នៅជុំវិញអាកាសយានដ្ឋានអន្តរជាតិតេជោ

ដោយៈ ចំណាន

កណ្តាលៈ ជាធម្មតា តំបន់ជុំវិញព្រលានយន្តហោះ តែងតែទាក់ទាញអ្នកអភិវឌ្ឈន៍ ដើម្បីសាងសង់គម្រោងលំនៅដ្ឋាន ខុនដូ មជ្ឈមណ្ឌលពាណិជ្ជកម្ម និងឃ្លាំងស្តុកទំនិញជាដើម។

យោងតាមទិន្ន័យដែលបានកត់ត្រាបច្ចុប្បន្ន នៅតំបន់ជិំវិញព្រលានយន្តហោះអន្តរជាតិតេជោ មានបុរី (លំនៅដ្ឋានដែលមានរបងព័ទ្ធជុំវិញ) ដែលមានគម្រោងចន្លោះពី២៥ ទៅ៣៥។ គម្រោងខុនដូមានប្រមាណ៨គំរោង។ គម្រោងពាណិជ្ជកម្ម និងគម្រោងប្រើប្រាស់ចម្រុះ មានចន្លោះពី១០ ទៅ១៥គំរោង។ ឡូជីស្ទីក ឃ្លាំង និងសួនឧស្សាហកម្មមានចំនូនចន្លោះពី១៥ ទៅ២០គំរោង។ សរុបមកគំរោងដែលបាន និងកំពុងអភិវឌ្ឍន៍មានសរុបចន្លោះពី៥៥ ទៅ៧៥គម្រោង។

ការអភិវឌ្ឍមួយចំនួនដែលល្បីល្បាញជាងនេះ រួមមាន ទីក្រុង TIA City គម្រោងផ្ទះសម្រាប់អ្នកជីវភាពមធ្យម Worldbridge
* បុរីប្រណីត Hi-techជាដើម។

មូលហេតុដែលការអភិវឌ្ឍកំពុងកើនឡើងគឺថា អាកាសយានដ្ឋាននេះមានបំណងក្លាយជាចំណុចកណ្តាល នៃច្រករបៀងទីក្រុងធំជាង។

យោងតាមផែនការមេរបស់អាកាសយានដ្ឋាន ផ្ទៃដីប្រហែល៥០០០ហិកតា ជុំវិញអាកាសយានដ្ឋានត្រូវបានកំណត់ សម្រាប់ការអភិវឌ្ឍលំនៅដ្ឋាន ពាណិជ្ជកម្ម ភស្តុភារកម្ម ផលិតកម្ម និងតំបន់សេដ្ឋកិច្ចពិសេស (SEZ) ដែលបង្ហាញពីការធ្វើផែនការរយៈពេលវែងជាជាងគ្រាន់តែជាគម្រោងអាកាសយានដ្ឋាន។

ទស្សនវិស័យរបស់ខ្ញុំដល់ឆ្នាំ២០៣០ ប្រសិនបើសេដ្ឋកិច្ចកម្ពុជាកើនឡើងប្រហែលចន្លោះពី៥ ទៅ៦ភាគរយជារៀងរាល់ឆ្នាំ ហើយចរាចរណ៍អ្នកដំណើរអាកាសយានដ្ឋានបន្តកើនឡើង តំបន់នេះនឹងមានចំនួនបុរីកើនដល់ចន្លោះពី៤០ ទៅ៦០គំរោង។ គម្រោងខុនដូអាចកើនឡើងដល់១០ ទៅ២០គំរោង ទោះបីជាកំណើនទំនងជាបន្តិចម្តងៗក៏ដោយ ព្រោះតម្រូវការខុនដូ នៅតែខ្សោយជាងលំនៅដ្ឋានដែលមានដី។

ចំណែកការអភិវឌ្ឍ អគារពាណិជ្ជកម្ម សណ្ឋាគារ ការិយាល័យ លក់រាយ និងគម្រោងដឹកជញ្ជូន ទំនងជានឹងពង្រីកខ្លួនលឿនបំផុត ខណៈដែលអាជីវកម្មនានា កំពុងតាមដានសកម្មភាពអាកាសយានដ្ឋាន។

ច្រករបៀងអាកាសយានដ្ឋានតេជោ នឹងក្លាយជាច្រករបៀងកំណើនអចលនទ្រព្យដ៏រឹងមាំបំផុតមួយ របស់ប្រទេសកម្ពុជានៅឆ្នាំ ២០៣០ រួមជាមួយភាគខាងជើងនៃទីក្រុងភ្នំពេញ និងច្រករបៀងដឹកជញ្ជូនខាងលិច ដរាបណាហេដ្ឋារចនាសម្ព័ន្ធ និងការវិនិយោគនៅតែបន្តដូចការគ្រោងទុក៕

ទីផ្សារលំនៅឋាននៅទីក្រុងហុងកុងបានងើបឡើងវិញលឿនជាងការរំពឹងទុកនៅឆ្នាំនេះ

ដោយ: សហសេវិក
អន្តរជាតិ: ទីផ្សារលំនៅឋានរបស់ទីក្រុងហុងកុងបានងើបឡើងវិញលឿនជាងការរំពឹងទុកនៅឆ្នាំនេះ ប៉ុន្តែក្រុមអ្នកវិភាគព្រមានថា ការកើនឡើងយ៉ាងឆាប់រហ័សនៃតម្លៃផ្ទះអាចធ្វើឱ្យផ្ទះលែងមានតម្លៃសមរម្យសម្រាប់អ្នកទិញក្នុងស្រុក។

ការងើបឡើងវិញនៃទីផ្សារលំនៅឋានហុងកុងត្រូវបានជំរុញដោយការវិលត្រឡប់មកវិញរបស់អ្នកទិញក្នុងស្រុក ភាពរឹងមាំនៃតម្រូវការជួលរបស់និស្សិត និងបណ្តាវិនិយោគិនចិនដីគោកដែលឈានចូលទីផ្សារឡើងវិញ។

អំណាចនៃការទិញដ៏រឹងមាំរបស់ពួកគេបានជំរុញឱ្យតម្លៃលំនៅឋាននៅទីក្រុងហុងកុងកើនឡើងលឿនជាងការរំពឹងទុករបស់អ្នកទិញលើកដំបូង ឬអ្នកទិញក្នុងស្រុកជាច្រើន។

យោងតាមក្រុមហ៊ុន Centaline Property បានឱ្យដឹងថា អតិថិជនដែលទិញផ្ទះច្រើនខ្នងបានបញ្ចប់ប្រតិបត្តិការចំនួន៥៦៣ ដែលមានតម្លៃ១៤,៥ពាន់លានដុល្លារហុងកុង (១,៨៤ពាន់លានដុល្លារអាមេរិក) ក្នុងរយៈពេល៥ខែដំបូងនៃឆ្នាំនេះ កើនឡើងជាងទ្វេដងធៀបនឹងឆ្នាំមុន។

ភាពរឹងមាំនៃតម្រូវការបានជំរុញសន្ទុះទីផ្សារ និងអនុញ្ញាតឱ្យម្ចាស់ផ្ទះដំឡើងតម្លៃផ្ទះ។ ប៉ុន្តែក្រុមអ្នកវិភាគអះអាងថា ការកើនឡើងយ៉ាងឆាប់រហ័សបែបនេះអាចធ្វើឱ្យអ្នកទិញផ្ទះក្នុងស្រុកកាន់តែច្រើនមិនហ៊ានឈានចូលទីផ្សារ៕ប្រភព: SCMP៕

ក្រុមហ៊ុនលំដាប់យក្សរបស់ចិនគាំទ្រគោលនយោបាយលើកលែងទិដ្ឋាការពីកម្ពុជាសម្រាប់ភ្ញៀវទេសចរណ៍ចិន

ដោយៈ ចំណាន

ប្រទេសចិនៈ ក្រុមហ៊ុនធានារ៉ាប់រងធំជាងគេលើពិភពលោក និងនៅប្រទេសចិន Ping An គាំទ្រគោលនយោបាយលើកលែងទិដ្ឋាការរបស់កម្ពុជាសម្រាប់ប្រជាជនចិន និងប្តេជ្ញាចូលរួមជាមួយក្រសួងទេសចរណ៍ផ្តល់សេវាធានារ៉ាប់រង ប្រកបដោយគុណភាពខ្ពស់ដល់ភ្ញៀវទេសចរចិន និងអន្តរជាតិ។

នាឱកាសអមសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បំពេញទស្សនកិច្ចការងារ នៅរដ្ឋធានីប៉េកាំង និងចូលរួមកម្មវីធី 2026 World Al Conference and High-Level Meeting on Global Al Governance ចាប់ពីថ្ងៃទី១៥-១៧ ខែកក្កដា ឆ្នាំ២០២៦ នៅទីក្រុងសៀងហៃ សាធារណរដ្ឋប្រជាមានិតចិន និងដោយទទួលបានការអនុញ្ញាត ដ៏ខ្ពង់ខ្ពស់លោក ហួត ហាក់ រដ្ឋមន្រ្តីក្រសួងទេសចរណ៍ បានឆ្លៀតឱកាសធ្វើទស្សនកិច្ច និងពិភាក្សាការងារជាមួយថ្នាក់ដឹកនាំជាន់ខ្ពស់ នៃក្រុមហ៊ុនធានារ៉ាប់រង Ping An នៃសាធារណរដ្ឋប្រជាមានិតចិន ដឹកនាំដោយលោក Shi Hequn នាយកប្រតិបត្តិក្រុមហ៊ុន Ping An Property & Casualty Insurance Company of China, Ltd នារសៀលថ្ងៃទី១៥ ខែកក្កដា ឆ្នាំ២០២៦ នៅរដ្ឋធានីប៉េកាំង។

នាឱកាសជំនួបប្រកបដោយផ្លែផ្កានេះ លោករដ្ឋមន្រ្តី បានជម្រាបជូនលោកនាយកប្រតិបត្តិ ក្រុមហ៊ុនអំពីសក្តានុពល និងបច្ចុប្បន្នភាពនៃវិស័យទេសចរណ៍កម្ពុជា កិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការលុបបំបាត់ទាំងស្រុង នូវបញ្ហា Online Scam និងពីគោលនយោបាយលើកលែងទិដ្ឋាការសម្រាប់ប្រជាពលរដ្ឋចិន។

ជាលទ្ធផល ភាគីទាំងសងខាង បានឯកភាពជំរុញ និងពង្រឹងកិច្ចសហប្រតិបត្តិការទេសចរណ៍រួមគ្នា តាមរយៈការដាក់ចេញផែនការនិយោគ លើប្រព័ន្ធធានាសុវត្ថិភាពភ្ញៀវទេសចរ ពិសេសការពង្រឹងប្រព័ន្ធធានារ៉ាប់រងរួមគ្នា កម្ពុជា-ចិន សម្រាប់ភ្ញៀវទេសចរចិន និងភ្ញៀវទេសចរអន្តរជាតិមកកាន់កម្ពុជា។

ទន្ទឹមនឹងនេះ ក្រុមហ៊ុនPing An នឹងធ្វើការសិក្សាពីលទ្ធភាពវិនិយោគបង្កើតខ្សែទស្សនកិច្ច ទេសចរណ៍លំដាប់ខ្ពស់ (Exclusive Luxury Tour) ដើម្បីបង្កើនទំនុកចិត្តដល់ភ្ញៀវទេសចរ និងវិនិយោគិនចិនលំដាប់ខ្ពស់ ដែលមានបំណងធ្វើទស្សនកិច្ចទេសចរណ៍ និងស្វែងយល់ពីសក្តានុពលវិនិយោគនៅកម្ពុជា។

ដើម្បីអនុវត្តឱ្យមានប្រសិទ្ធភាព និងប្រសិទ្ធផលនៃផែនការសកម្មភាពខាងលើ ភាគីទាំងពីរ បានធ្វើការចាត់តាំងមន្រ្តីបង្គោល (Focal Point) ទៅវិញទៅមក ដើម្បីរៀបចំការងារលម្អិត និងការត្រៀមសិក្សាស្វែងយល់ជាក់ស្តែងនៅកម្ពុជា។

ក្រុមហ៊ុន Ping An Property & Casualty Insurance Company of China, Lt ជាក្រុមហ៊ុនធានារ៉ាប់រងរបស់ប្រទេសចិនធំជាងគេលើពិភពលោក លើផែ្នកទ្រព្យសកម្ម (1st in Asset size) និងក៏ជាក្រុមហ៊ុនធានារ៉ាប់រងធំជាងគេ លើពិភពលោកលើផ្នែកប្រាក់ចំណូល(1st in Revenue) មានអតិថិជនទូទៅ (Retail Customers) សរុបប្រមាណ ២៥១លាននាក់ និងអតិថិជនជាក្រុមហ៊ុន(Corporate Customers) ប្រមាណ៤លានក្រុមហ៊ុន៕

សមាគមឧកញ៉ាកម្ពុជាចូលរួមកម្មវិធី “រ៉ូដសូសម្រាប់ការផ្សាយលក់ IPO របស់ក្រុមហ៊ុន បុរី វិមានសំណាង ម.ក.”

ដោយៈ ចំណាន

ភ្នំពេញៈ លោកអ្នកឧកញ៉ាលី យ៉ុងផាត់ប្រធានសមាគមឧកញ៉ាកម្ពុជា បានចាត់តាំងអ្នកឧកញ៉ាហាន់ ឃាង អនុប្រធានសមាគមទទួលបន្ទុកខែកក្កដា និងជាប្រធានគណៈកម្មការវិនិយោគ និងអភិវឌ្ឍន៍ ដឹកនាំគណៈប្រតិភូសមាគមឧកញ៉ាកម្ពុជា ចូលរួមកម្មវិធី “រ៉ូដសូសម្រាប់ការផ្សាយលក់មូលបត្រកម្មសិទ្ធិ ជាសាធារណៈលើកដំបូង (IPO) របស់ក្រុមហ៊ុន បុរី វិមានសំណាង ម.ក.” ដែលរៀបចំឡើងនៅផ្សារមូលបត្រកម្ពុជា។

ពិធីនេះធ្វើឡើង ក្រោមអធិបតីភាពដ៏ខ្ពង់ខ្ពស់របស់ លោកស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃនិយ័តករមូលបត្រកម្ពុជា (ន.ម.ក.)។

កម្មវិធីរ៉ូដសូនេះ រៀបចំឡើងក្នុងគោលបំណងផ្សព្វផ្សាយ អំពីការបោះផ្សាយលក់ និងការធ្វើបរិវិសកម្មមូលបត្រកម្ម សិទ្ធិជាសាធារណៈលើកដំបូង (IPO) របស់ក្រុមហ៊ុន បុរី វិមានសំណាង ម.ក. ដែលមាន ឧកញ៉ាបណ្ឌិតគីម ហ៊ាង សមាជិកសមាគមឧកញ៉ាកម្ពុជា ជាប្រធានក្រុមប្រឹក្សាភិបាលប្រតិបត្តិ។

កម្មវិធីនេះ ក៏មានគោលបំណងបង្ហាញជូនវិនិយោគិន និងសាធារណជន អំពីសក្តានុពលវិនិយោគ ផែនការអាជីវកម្ម យុទ្ធសាស្ត្រកំណើន និងចក្ខុវិស័យអភិវឌ្ឍន៍របស់ក្រុមហ៊ុននាពេលអនាគត។

ក្រុមហ៊ុន បុរី វិមានសំណាង ម.ក. បានទទួលការអនុញ្ញាតពី និយ័តករមូលបត្រកម្ពុជា (ន.ម.ក.) ឱ្យធ្វើការបោះផ្សាយលក់មូលបត្រកម្មសិទ្ធិជាសាធារណៈលើកដំបូង កាលពីថ្ងៃទី២២ ខែមិថុនា ឆ្នាំ២០២៦ ដែលជាជំហានដ៏សំខាន់ ក្នុងការបោះជំហានចូលទីផ្សារមូលបត្រកម្ពុជា និងពង្រីកប្រភពទុនសម្រាប់ការអភិវឌ្ឍអាជីវកម្ម ប្រកបដោយចីរភាព៕

ក្រុមហ៊ុនកូរ៉េមួយគ្រោងវិនិយោគបង្កើតកសិដ្ឋានដាំដុះ និងខ្សែច្រវាក់នាំចេញផ្សិតនៅកម្ពុជា

ដោយៈ ចំណាន

កូរ៉េខាងត្បូងៈ លោកស្រីនួន ផានិត អនុព័ន្ធពាណិជ្ជកម្ម អមស្ថានឯកអគ្គរាជទូតកម្ពុជា ប្រចាំសាធារណរដ្ឋកូរ៉េ បានទទួលជួបពិភាក្សាការងារជាមួយ លោក Karl Gonzalez Kim ប្រធានផ្នែកផែនការនៃក្រុមហ៊ុន CHEONGDO Mushroom នៅស្ថានឯកអគ្គរាជទូតកម្ពុជាប្រចាំទីក្រុងសេអ៊ូល។

ក្នុងឱកាសនោះ លោក Karl Gonzalez Kim បានបញ្ជាក់ពីគោលបំណងរបស់ក្រុមហ៊ុន ក្នុងការស្វែងរកឱកាសវិនិយោគ លើផលិតកម្មផ្សិតនៅកម្ពុជា ព្រោះប្រទេសកម្ពុជា មានទីតាំងភូមិសាស្ត្រយុទ្ធសាស្ត្រ សម្រាប់ការនាំចេញទៅកាន់តំបន់អាស៊ាន មជ្ឈិមបូព៌ា និងទីផ្សារអន្តរជាតិដទៃទៀត។

បន្ថែមពីនេះ លោកបបានបង្ហាញចំណាប់អារម្មណ៍ យ៉ាងខ្លាំងក្នុងការបង្កើតកសិដ្ឋានដាំដុះ និងខ្សែច្រវាក់នាំចេញផ្សិតនៅកម្ពុជា ហើយបានស្នើសុំកិច្ចសម្របសម្រួល និងការគាំទ្រពីស្ថានឯកអគ្គរាជទូតកម្ពុជា ក្នុងការស្វែងរកដៃគូក្នុងស្រុកដែលមានសក្តានុពល និងសមស្រប។

ក្រុមហ៊ុន CHEONGDO Mushroom បង្កើតឡើងតាំងពីឆ្នាំ១៩៨៣ មានបទពិសោធន៍ជាង៤០ឆ្នាំ ក្នុងការដាំដុះផ្សិត និងជាក្រុមហ៊ុនផលិតផ្សិតឈានមុខគេមួយ នៅសាធារណរដ្ឋកូរ៉េ និងមានជំនាញបច្ចេកទេសក្នុងការផលិតផ្សិតម្ជុល (Enoki) ផ្សិតអយស្ទ័រយក្ស (King Oyster) និងផ្សិតប្រភេទផ្សេងៗទៀត។

បច្ចុប្បន្ន ក្រុមហ៊ុនមានកសិដ្ឋានចំនួន៩កន្លែង នៅសាធារណរដ្ឋកូរ៉េ និងមានរោងចក្រ ព្រមទាំងប្រតិបត្តិការនៅបរទេស ដូចជា សហព័ន្ធអាល្លឺម៉ង់ ព្រះរាជាណាចក្រហូឡង់ ចក្រភពអង់គ្លេស សហព័ន្ធអូស្ត្រាលី និងសាធារណរដ្ឋប្រជាមានិតចិនជាដើម៕

តម្រូវការលំនៅឋានកំពុងកើនឡើងនៅតំបន់ជុំវិញព្រលានយន្តហោះអន្តរជាតិតេជោ

ដោយៈ ចំណាន

កណ្តាលៈ លំនៅឋានជាប់ដីបាននិងកំពុងមានការកើនឡើងនូវតម្រូវការ នៅតំបន់ជុំវិញអាកាសយានដ្ឋានអន្តរជាតិតេជោ ប៉ុន្តែមិនទាន់មានសម្រាប់ខុនដូច្រើននៅឡើយទេ។

តម្រូវការសម្រាប់ផ្ទះ (ជាពិសេសបុរី និងផ្ទះដែលមានតម្លៃសមរម្យ) នៅជុំវិញអាកាសយានដ្ឋានថ្មីត្រូវបានគេរំពឹងថា នឹងកើនឡើងដោយសារកត្តាមួយចំនួនដូចជា

ទី១ បុគ្គលិកអាកាសយានដ្ឋាន និងអាជីវកម្មពាក់ព័ន្ធ។

ទី២ កម្មករផ្នែកភស្តុភារកម្ម ឃ្លាំង និងឧស្សាហកម្ម។

ទី៣ គ្រួសារដែលកំពុងស្វែងរកលំនៅឋាន ដែលមានតម្លៃសមរម្យនៅខាងក្រៅកណ្តាលទីក្រុងភ្នំពេញ។

ទី៤ ការតភ្ជាប់ផ្លូវកាន់តែប្រសើរឡើង រវាងទីក្រុងភ្នំពេញ ខេត្តកណ្តាល និងតាកែវ។

ក្រុមហ៊ុន Knight Frank Cambodia កត់សម្គាល់ថា តម្រូវការក្នុងស្រុកបច្ចុប្បន្ន កំពុងប្រមូលផ្តុំនៅក្នុងលំនៅឋាន ដែលមានដីមានតម្លៃសមរម្យ និងមធ្យម ហើយស្រុកដូចជាដង្កោ កំបូល និងព្រែកព្នៅ គឺជាតំបន់ពង្រីកសំខាន់ៗ ខណៈដែលទីក្រុងកំពុងរីកចម្រើនឆ្ពោះទៅភាគខាងត្បូងឆ្ពោះទៅអាកាសយានដ្ឋានថ្មី។

ចំណែកទីផ្សារខុនដូ តម្រូវការនៅតែមានកម្រិត ស្របនឹងទស្សនវិស័យសម្រាប់ខុនដូមានការប្រុងប្រយ័ត្នជាងមុន។

តម្រូវការបច្ចុប្បន្ននៅជិតអាកាសយានដ្ឋាន មិនទាន់ខ្លាំងគ្រប់គ្រាន់ ដើម្បីគាំទ្រគម្រោងខុនដូខ្ពស់ៗ មួយចំនួនធំនៅឡើយទេ ដោយសារតែ កត្តាមួយចំនូនដូចជា បុគ្គលិកអាកាសយានដ្ឋានភាគច្រើននឹងចូលចិត្តផ្ទះ ឬអាផាតមិនដែលមានតម្លៃសមរម្យ ជាជាងខុនដូប្រណីត។ ជនបរទេសនៅតែចូលចិត្ត ទីតាំងកណ្តាលទីក្រុងភ្នំពេញដូចជា បឹងកេងកង ដូនពេញ និងទួលទំពូង ដើម្បីភាពងាយស្រួល និងរបៀបរស់នៅ។

រាជធានីភ្នំពេញនៅតែបន្តមានការផ្គត់ផ្គង់ យូនីតខុនដូយ៉ាងច្រើន ដូច្នេះអ្នកអភិវឌ្ឍន៍នៅតែជ្រើសរើស អំពីការចាប់ផ្តើមគម្រោងថ្មីៗ៕

កូរ៉េអនុវត្តន៍ “គម្រោងសាកល្បងប្រព័ន្ធដឹកជញ្ជូនឆ្លាតវៃផ្អែកលើទិន្នន័យចម្រុះនៅកម្ពុជា”

ដោយៈ ចំណាន

ភ្នំពេញៈ មន្រ្តីនិងភាគីកូរ៉េបានធ្វើពិធីប្រគល់-ទទួល “គម្រោងសាកល្បងប្រព័ន្ធដឹកជញ្ជូនឆ្លាតវៃ (ITS) ផ្អែកលើទិន្នន័យចម្រុះ (BIG DATA) នៅកម្ពុជា ក្រោមជំនួយឥតសំណងរបស់រដ្ឋាភិបាលសាធារណរដ្ឋកូរ៉េ។

ពិធីនេះធ្វើឡើងក្រោមអធិបតីភាព លោកនឹម សុធា អនុរដ្ឋលេខាធិការ តំណាងលោកប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន។

ពិធីនេះក៏មានការ អញ្ជើញចូលរួមពីថ្នាក់ដឹកនាំក្រសួង តំណាងក្រសួងដែនដី ហេដ្ឋារចនាសម្ព័ន្ធ និងដឹកជញ្ជូនសាធារណរដ្ឋកូរ៉េ តំណាងឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា និងក្រុមហ៊ុន សមាគម ព្រមទាំងមន្ត្រីបច្ចេកទេសពាក់ព័ន្ធប្រមាណជា៥០រូបផងដែរ។

ពិធីនេះរៀបចំឡើងក្នុងគោលបំណង ដើម្បីអបអរសាទរក្នុងកម្រិតបច្ចេកទេស ក្នុងការប្រគល់ទទួលសម្ភារៈ និងដាក់ឱ្យប្រើប្រាស់សាកល្បងប្រព័ន្ធដឹកជញ្ជូនឆ្លាតវៃ (ITS) ផ្អែកលើទិន្នន័យចម្រុះ (BIG DATA)នៅកម្ពុជា។

ថ្លែងចំណាប់អារម្មណ៍ក្នុងឱកាសនោះ លោកអនុរដ្ឋលេខាធិការ បានថ្លែងអំណរគុណ ដល់សាធារណរដ្ឋកូរ៉េ ដែលជានិច្ចជាកាលតែងតែផ្ដល់ជាជំនួយហិរញ្ញវត្ថុ និងបច្ចេកទេស សម្រាប់អនុវត្តគម្រោងហេដ្ឋារចនាសម្ព័ន្ធនៅកម្ពុជា ក្រោមកិច្ចសហប្រតិបត្តិការដ៏ល្អរវាងក្រសួងដែនដី ហេដ្ឋារចនាសម្ព័ន្ធ និងដឹកជញ្ជូនសាធារណរដ្ឋកូរ៉េ និងក្រសួងសាធារណការ និងដឹកជញ្ជូន ប្រទេសកម្ពុជា។

បន្ថែមពីនេះ គម្រោងITS បានបង្កើតមជ្ឈមណ្ឌលទិន្នន័យ សម្រាប់ប្រតិបត្តិការ និងបានអនុវត្តសាកល្បង បំពាក់ឧបករណ៍តាមដានចរាចរណ៍១៩ទីតាំង ប្រកបដោយជោគជ័យ នៅតាមខ្សែផ្លូវមេសំខាន់ៗមួយចំនួន ក្នុងតំបន់ភូមិសាស្ត្រ រាជធានីភ្នំពេញ ក្នុងការលើកកម្ពស់ប្រសិទ្ធភាពនៃការគ្រប់គ្រងចរាចរណ៍ បង្កើនចល័តភាព និងសុវត្ថិភាពក្នុងទីក្រុង ព្រមទាំងបង្កើតប្រព័ន្ធផ្តល់ព័ត៌មានចរាចរណ៍ឆ្លាតវៃ ដែលអាចផ្តល់ទិន្នន័យបានត្រឹមត្រូវ និងទាន់ពេលវេលា ជូនអ្នកប្រើប្រាស់ផ្លូវ និងដើម្បីសម្រួលដល់ការធ្វើដំណើរ កាត់បន្ថយការកកស្ទះ និងរួមចំណែកកាត់បន្ថយគ្រោះថ្នាក់ចរាចរណ៍ផងដែរ៕

ក្រុមហ៊ុន បុរី វិមានសំណាង ម.ក សហការរៀបចំសិក្ខាសាលាណែនាំអំពី «ផ្សារមូលបត្រកម្ពុជា» ជូនដល់និស្សិតសាកលវិទ្យាល័យ អាស៊ី អឺរ៉ុប ជាង ២០០នាក់

[រាជធានីភ្នំពេញ, ថ្ងៃទី១៥ ខែកក្កដា ឆ្នាំ២០២៦] — ក្នុងគោលបំណងពង្រឹង និងពង្រីកចំណេះដឹងផ្នែកហិរញ្ញវត្ថុ ក៏ដូចជាការវិនិយោគលើទីផ្សារភាគហ៊ុននៅកម្ពុជា ក្រុមហ៊ុន បុរី វិមានសំណាង ម.ក បានសហការរៀបចំកម្មវិធីបទបង្ហាញ និងសិក្ខាសាលាដ៏មានសារៈសំខាន់មួយ ក្រោមប្រធានបទស្តីពី «ការស្វែងយល់ពីផ្សារមូលបត្រកម្ពុជា» ជូនដល់និស្សិតនៃសាកលវិទ្យាល័យ អាស៊ី អឺរ៉ុប (AEU) ប្រមាណជាង ២០០នាក់។

កម្មវិធីដ៏មានអត្ថន័យនេះ ត្រូវបានប្រារព្ធឡើងក្រោមអធិបតីភាពដ៏ខ្ពង់ខ្ពស់របស់ថ្នាក់ដឹកនាំ និងអ្នកជំនាញឆ្នើមៗក្នុងវិស័យអចលនទ្រព្យ និងហិរញ្ញវត្ថុ រួមមាន៖
-លោកឧកញ៉ាបណ្ឌិត គីម ហ៊ាង ប្រធានក្រុមប្រឹក្សាភិបាលប្រតិបត្តិនៃក្រុមហ៊ុន បុរី វិមានសំណាង ម.ក
-លោកជំទាវឧកញ៉ា គង់ សំណាង អគ្គនាយិកានៃក្រុមហ៊ុន បុរី វិមានសំណាង ម.ក
– កញ្ញា គីម សំណាងជូលី សមាជិកក្រុមប្រឹក្សាភិបាលមិនប្រតិបត្តិ នៃក្រុមហ៊ុន បុរី វិមានសំណាង ម.ក
-លោក ពៅ សូវណ្ណារិទ្ធ អគ្គនាយកនៃក្រុមហ៊ុនមូលបត្រ កម្ពុ ម.ក (ក្នុងនាមជាក្រុមហ៊ុនធានាទិញបង្គោល)
-លោក ស៊ាង បុត្រ អ្នកប្រឹក្សាផ្សារហ៊ុនកម្ពុជា

គោលបំណងចម្បងនៃសិក្ខាសាលានេះ គឺដើម្បីផ្ដល់នូវចំណេះដឹងជាមូលដ្ឋានគ្រឹះ យន្តការនៃការជួញដូរភាគហ៊ុន និងអត្ថប្រយោជន៍នៃការចូលរួមក្នុងទីផ្សារទុននៅកម្ពុជា ដល់យុវជនជំនាន់ក្រោយដែលជាទំពាំងស្នងឫស្សី និងជាកម្លាំងចលករសេដ្ឋកិច្ចនាពេលអនាគត។

លោកឧកញ៉ាបណ្ឌិត គីម ហ៊ាង បានមានប្រសាសន៍ចែករំលែកទៅកាន់និស្សិតថា៖ «ការស្វែងយល់ពីទីផ្សារមូលបត្រ មិនមែនជាជំនាញដាច់ដោយឡែកសម្រាប់តែអ្នករៀនសេដ្ឋកិច្ចនោះទេ ប៉ុន្តែវាជាឧបករណ៍ហិរញ្ញវត្ថុដ៏សំខាន់សម្រាប់គ្រប់គ្នា ក្នុងការបង្កើតឱកាសវិនិយោគ និងការបង្កើនទ្រព្យសម្បត្តិដោយឆ្លាតវៃ ស្របពេលដែលសេដ្ឋកិច្ចកម្ពុជាកំពុងមានការអភិវឌ្ឍយ៉ាងលឿន។»

ទន្ទឹមនឹងនោះ ក្នុងនាមជាក្រុមហ៊ុនធានាទិញមូលបត្រ លោក ពៅ សូវណ្ណារិទ្ធ អគ្គនាយកនៃក្រុមហ៊ុនមូលបត្រ កម្ពុ ម.ក និងលោក ស៊ាង បុត្រ អ្នកប្រឹក្សាផ្សារហ៊ុនកម្ពុជា ក៏បានធ្វើការបង្ហាញយ៉ាងលម្អិតអំពី៖

-របៀបនៃការវិនិយោគ៖ ដំណាក់កាល និងនីតិវិធីនៃការបើកគណនីជួញដូរភាគហ៊ុន។
-អត្ថប្រយោជន៍៖ ឱកាសទទួលបានផលចំណេញពីភាគលាភ និងការកើនឡើងតម្លៃភាគហ៊ុន។
-តួនាទីក្រុមហ៊ុនធានាទិញ៖ របៀបដែលក្រុមហ៊ុនមូលបត្រជួយគាំទ្រដល់អាជីវកម្មក្នុងការកៀរគរទុនពីសាធារណជន។

វត្តមានរបស់និស្សិតសាកលវិទ្យាល័យ អាស៊ី អឺរ៉ុប ជាង ២០០នាក់ ក្នុងកម្មវិធីនេះ បានបង្ហាញពីការយកចិត្តទុកដាក់ និងការចង់ចេះចង់ដឹងយ៉ាងខ្លាំងលើវិស័យផ្សារហ៊ុន។ តាមរយៈបទបង្ហាញ និងការឆ្លើយសំណួរដោយផ្ទាល់ពីវាគ្មិនកិត្តិយស និស្សិតទាំងអស់ទទួលបាននូវការយល់ដឹងកាន់តែច្បាស់ ដែលជាទុនដ៏មានតម្លៃសម្រាប់យកទៅអនុវត្តផ្ទាល់ ឬត្រៀមខ្លួនចូលក្នុងទីផ្សារការងារ និងការវិនិយោគ។

ក្រុមហ៊ុន បុរី វិមានសំណាង ម.ក នៅតែបន្តប្តេជ្ញាចិត្តយ៉ាងមុតមាំ មិនត្រឹមតែក្នុងការអភិវឌ្ឍគម្រោងអចលនទ្រព្យប្រណីតៗ និងមានគុណភាពប៉ុណ្ណោះទេ ប៉ុន្តែថែមទាំងចូលរួមចំណែកយ៉ាងសកម្មក្នុងការលើកកម្ពស់ចំណេះដឹងផ្នែកហិរញ្ញវត្ថុ និងសង្គម ដើម្បីគាំទ្រដល់ការរីកចម្រើនប្រកបដោយចីរភាពនៅព្រះរាជាណាចក្រកម្ពុជា។

**សម្រាប់ព័ត៌មានបន្ថែម សូមទំនាក់ទំនង៖
លេខទូរស័ព្ទ៖ 011 62 6789 / 061 96 2000
អ៊ីមែល៖ [email protected]
គេហទំព័រ៖ www.bvs.com.kh

លោកបណ្ឌិតតេង រិទ្ធីៈ កម្ពុជាទឹកដីនៃការវិនិយោគ និងឱកាសអាជីវកម្មសម្រាប់អនាគត

ដោយៈ គង់ សូរិយា

ភ្នំពេញៈ ប្រទេសកម្ពុជា កំពុងឈានចូលដំណាក់កាលថ្មីនៃការអភិវឌ្ឍសេដ្ឋកិច្ច។ ទោះបីសេដ្ឋកិច្ចពិភពលោក នៅតែប្រឈមនឹងភាពមិនច្បាស់លាស់ក៏ដោយ កម្ពុជានៅតែបន្តបង្ហាញពីភាពរឹងមាំ និងសក្ដានុពលនៃការរីកចម្រើន ដោយមានស្ថិរភាពនយោបាយ ទីតាំងភូមិសាស្ត្រយុទ្ធសាស្ត្រ គោលនយោបាយលើកទឹកចិត្តការវិនិយោគ និងការអភិវឌ្ឍហេដ្ឋារចនាសម្ព័ន្ធជាបន្តបន្ទាប់។

លោកបណ្ឌិតតេង រិទ្ធីអគ្គនាយកក្រុមហ៊ុន R-Investment Groupបានមានប្រសាសន៍ថា ក្នុងរយៈពេលប៉ុន្មានឆ្នាំចុងក្រោយនេះ កម្ពុជាបានទាក់ទាញ ការវិនិយោគផ្ទាល់ពីបរទេស (FDI) កាន់តែច្រើន ជាពិសេសលើវិស័យផលិតកម្ម ភស្តុភារកម្ម ហេដ្ឋារចនាសម្ព័ន្ធ និងឧស្សាហកម្មនាំចេញ។ នេះបានបង្ហាញពីទំនុកចិត្តរបស់វិនិយោគិនទាំងក្នុងតំបន់ និងអន្តរជាតិ ចំពោះអនាគតសេដ្ឋកិច្ចរបស់កម្ពុជា។

លោកបញ្ជាក់ថា “ខ្ញុំជឿជាក់ថា កម្ពុជាកំពុងផ្តល់ឱកាសវិនិយោគដ៏ទាក់ទាញលើវិស័យសំខាន់ៗជាច្រើន”។

លោកបាមសម្លឹងទៅមុខ និងមើលឃើញនូវសក្តានុពលលើវិស័យចំនួយដូចជា៖

១. អចលនទ្រព្យ និងការអភិវឌ្ឍទីក្រុង

ការរីកចម្រើននៃទីក្រុងថ្មី បុរី គម្រោងប្រើប្រាស់ចម្រុះ (Mixed-use Development) និងសហគមន៍ប្រកបដោយនិរន្តរភាព កំពុងបង្កើតតម្លៃវិនិយោគរយៈពេលវែង។

២. ទេសចរណ៍ និងបដិសណ្ឋារកិច្ច

កម្ពុជាមានសក្តានុពលខ្ពស់ ក្នុងការទាក់ទាញភ្ញៀវទេសចរអន្តរជាតិ តាមរយៈប្រាសាទអង្គរវត្ត តំបន់ឆ្នេរសមុទ្រ និងទេសចរណ៍ធម្មជាតិ ដែលអាចជំរុញកំណើនសេដ្ឋកិច្ចបានយ៉ាងខ្លាំង។

៣. ផលិតកម្ម និងឧស្សាហកម្មនាំចេញ

កម្ពុជាកំពុងក្លាយជាមជ្ឈមណ្ឌលផលិតកម្មថ្មីក្នុងតំបន់ ដោយទទួលបានអត្ថប្រយោជន៍ ពីកិច្ចព្រមព្រៀងពាណិជ្ជកម្មសេរី និងទីផ្សារនាំចេញដ៏ទូលំទូលាយ។

៤. កសិកម្ម និងកែច្នៃផលិតផលកសិកម្ម

ការបន្ថែមតម្លៃលើផលិតផលកសិកម្ម តាមរយៈការកែច្នៃ និងបច្ចេកវិទ្យា នឹងបង្កើតឱកាសវិនិយោគថ្មីៗ និងបង្កើនការប្រកួតប្រជែងលើទីផ្សារអន្តរជាតិ។

៥. ភស្តុភារកម្ម និងហេដ្ឋារចនាសម្ព័ន្ធ

ការវិនិយោគលើផ្លូវល្បឿនលឿន អាកាសយានដ្ឋាន កំពង់ផែ តំបន់សេដ្ឋកិច្ចពិសេស និងមជ្ឈមណ្ឌលភស្តុភារកម្ម កំពុងពង្រឹងសមត្ថភាពប្រកួតប្រជែងរបស់ប្រទេស។

៦. បច្ចេកវិទ្យា និងសេដ្ឋកិច្ចឌីជីថល

បច្ចេកវិទ្យាហិរញ្ញវត្ថុ (FinTech) ការទូទាត់តាមប្រព័ន្ធឌីជីថល ពាណិជ្ជកម្មអេឡិចត្រូនិក (E-Commerce) និងនវានុវត្តន៍ កំពុងបង្កើតកាលានុវត្តភាពថ្មីសម្រាប់អាជីវកម្ម។

លើសពីនេះ កម្ពុជាមានកម្លាំងពលកម្មវ័យក្មេង ស្ថិតនៅចំកណ្ដាលតំបន់អាស៊ាន មានគោលនយោបាយគាំទ្រវិនិយោគ និងកិច្ចព្រមព្រៀងពាណិជ្ជកម្មជាច្រើន ដែលជាកត្តាសំខាន់ក្នុងការពង្រឹងសមត្ថភាពប្រកួតប្រជែង និងទាក់ទាញវិនិយោគិនពីជុំវិញពិភពលោក។

លោកបណ្ឌិតតេង រិទ្ធីបានបញ្ជាក់ថា “ការវិនិយោគមិនមែនគ្រាន់តែស្វែងរកប្រាក់ចំណេញក្នុងរយៈពេលខ្លីនោះទេ ប៉ុន្តែជាការបង្កើតតម្លៃរយៈពេលវែង ការកសាងភាពជាដៃគូយុទ្ធសាស្ត្រ និងការរួមចំណែកអភិវឌ្ឍសង្គម និងសេដ្ឋកិច្ចជាតិប្រកបដោយចីរភាព”។

លោកបន្តថា ក្នុងនាមជាវិនិយោគិន និងអ្នកអភិវឌ្ឍន៍ “ខ្ញុំជឿជាក់ថា កម្ពុជា មិនមែនគ្រាន់តែជាគោលដៅវិនិយោគប៉ុណ្ណោះទេ ប៉ុន្តែជាទឹកដីនៃឱកាស ដែលអាចបង្កើតគម្រោងមានចក្ខុវិស័យ បង្កើតការងារ លើកកម្ពស់គុណភាពជីវិតប្រជាពលរដ្ឋ និងជំរុញការអភិវឌ្ឍសេដ្ឋកិច្ចជាតិឱ្យកាន់តែរឹងមាំ”។

លោកបន្តថា “អនាគតជាកម្មសិទ្ធិរបស់អ្នក ដែលមានចក្ខុវិស័យក្នុងការវិនិយោគ មានវិន័យក្នុងការអនុវត្ត និងបង្កើតតម្លៃសម្រាប់មនុស្សជំនាន់ក្រោយ”៕