ដោយ វុត្ថា
ភ្នំពេញ៖ អាជ្ញាធរខេត្តបាត់ដំបង បានរៀបចំអតីតអគារសាលាខេត្តនេះ ឲ្យទៅជាសារមន្ទីរបេតិកភ័ណរបស់ខេត្ត ដើម្បីឲ្យភ្ញៀវជាតិ និងអន្តរជាតិចូលទស្សនាកម្សាន្ត ដោយមានការដាក់តាំងរូបភាព ទស្សនីយភាពផ្សេងៗ ដែលកើតឡើងក្នុងសម័យគ្រប់គ្រងដោយលោកម្ចាស់នីមួយៗតាំងពីឆ្នាំ១៩០៧ និងក្នុងសម័យអាណានិគមនិយមបារាំង ប្រវត្តិនៃការដឹកនាំខេត្តបាត់ដំបង និងរូបថតអភិបាខេត្តពីសម័យអាណានិគមនិយមបារាំងរហូតដល់បច្ចុប្បន្ន។
យោងតាមការចុះផ្សាយរបស់គេហទំព័រហ្វេសបុករបស់ មន្ទីរទេសចរណ៍ខេត្តបាត់ដំបងបានបញ្ជាក់ឲ្យដឹងថា ក្រៅពីនេះក៏មានការរៀបចំដាក់តាំងនូវវត្ថុបុរាណ រូបចម្លាក់ រូបភាពសិល្បៈ បញ្ចូលសម្លេងនិងរូបភាពដោយរៀបរាប់ប្រវត្តិខ្លីៗ តាមប្រវត្តិកាលនីមួយៗផងដែរ។
-->
អតីតអគារសាលាខេត្តបាត់ដំបងដំបង ដែលមានអាយុកាល១១៣ឆ្នាំ (១៩០៥-២០១៨)អតីតអគារសាលាខេត្តបាត់ដំបង បានកសាងឡើងនៅក្នុងសម័យលោកម្ចាស់កថាថន ឈុំ ពេលដែលខេត្តបាត់ដំបងស្ថិតក្រោមការគ្រប់គ្រងរបស់ថៃពីឆ្នាំ១៧៩៥ ដល់១៩០៧ (លោកម្ចាស់កថាថន ឈុំ គឺជាពូជពង្សរបស់ចៅហ្វាបែន ដែលបានគ្រប់គ្រងខេត្តបាត់ដំបងរហូត ៥ ជំនាន់តៗគ្នា)។
ក្នុងឆ្នាំ១៩០៥ ស្ដេចត្រាញ់ កថាថន ឈុំ បានជួលស្ថាបត្យករអ៊ីតាលីពីទីក្រុងបាងកកឲ្យមកសាងសង់អគារនេះឡើង សម្រាប់ធ្វើជាលំនៅឋានផ្ទាល់ខ្លួនប៉ុន្តែក្នុងឆ្នាំ១៩០៧ ពេលដែលបារាំងទាមទារបានខេត្តទាំងបី រួមមានខេត្តបាត់ដំបង សិរីសោភណ្ឌ (ស្វាយស៊ីសុផុន) និងអង្គរ (សៀមរាប) ពីថៃមកឲ្យកម្ពុជាវិញ ស្ដេចត្រាញ់រូបនេះក៏បានលក់លំនៅឋានរបស់លោកទាំងអស់រួមទាំងអាគារនេះផង ដែលលោកមិនទាន់បានរស់នៅនៅឡើយ ឲ្យមកអាជ្ញាធរបារាំង ។ អគារនេះក៏ត្រូវបានប្រើប្រាស់ជាកន្លែងធ្វើការ និងកន្លែងស្នាក់នៅរបស់មន្ត្រីជាន់ខ្ពស់បារាំង និងក្រោយមកជាសាលាខេត្តបាត់ដំបង រហូតមកដល់ឆ្នាំ២០០៥។
និយាយពីលោក កថាថន ឈុំ វិញ ពេលដែលផ្លាស់ទៅរស់នៅក្នុងខេត្ត Prachin Buri ប្រទេសថៃ ក្នុងឆ្នាំ១៩០៩ លោកបានសាងសង់លំនៅឋានផ្ទះមួយទៀត ដែលស្ទើរតែដូចគ្នាបេះបិទ នឹងអាគារចាស់នៅខេត្តបាត់ដំបងនេះដែរ លើកលែងតែហោជាងខាងមុខបន្តិច ព្រោះសូម្បីតែជាងចម្លាក់ក៏លោក ជួលពីអ្នកធ្លាប់ឆ្លាក់នៅផ្ទះចាស់របស់លោកមកដែរ។
អគារនោះមានឈ្មោះថា Chaophraya Abhaibhubejhr បច្ចុប្បន្នវាត្រូវបានប្រើប្រាស់ជាមន្ទីរពេទ្យខេត្ត Prachin Buri និងក្រោយមកបានប្ដូរឈ្មោះទៅជា Chaophraya Abhaibhubejhr Hospital វិញ៕
