ដោយៈ សុផារី
ភ្នំពេញៈ ធនាគារជាតិនៃកម្ពុជា នៅថ្ងៃទី៦ ខែមិថុនានេះ បានប្រកាសដាក់ឱ្យប្រើប្រាស់ជាផ្លូវការ “សន្ទស្សន៍ថ្លៃលំនៅដ្ឋាន” ដែលជាសូចនាករដ៏សំខាន់ ក្នុងការតាមដានការវិវត្តនៃវិស័យអចលនទ្រព្យ និងលំនៅដ្ឋាននៅក្នុងប្រទេសកម្ពុជា។
ធនាគារជាតិដាក់ឱ្យប្រើប្រាស់សន្ទស្សន៍ថ្លៃលំនៅដ្ឋានតាមដានការវិវត្តវិស័យអចលនទ្រព្យ
ឧបការីទេសសាភិបាល និងជាអគ្គនាយកបច្ចេកទេសធនាគារជាតិនៃកម្ពុជា លោកស្រីជា សេរីបានមានប្រសាសន៍ថា ការដាក់ឱ្យប្រើប្រាស់សន្ទស្សន៍ថ្លៃលំនៅដ្ឋាន គឺជាជំហាន និងសមិទ្ធផលថ្មីមួយទៀត នៃការងារចងក្រងស្ថិតិសេដ្ឋកិច្ច និងហិរញ្ញវត្ថុ សម្រាប់បម្រើដល់ការវិភាគ និងវាយតម្លៃដំណើរការសេដ្ឋកិច្ច ពិសេសវិស័យអចលនទ្រព្យ និងសំណង់។
លោកស្រីបានបន្តថា “ការដាក់ឱ្យប្រើប្រាស់សន្ទស្សន៍ ថ្លៃលំនៅដ្ឋាន នឹងរួមចំណែកដ៏សំខាន់ក្នុងការតាមដាន វាយតម្លៃ និងរៀបចំគោលនយោបាយអភិវឌ្ឍន៍ ក៏ដូចជាវិធានការនានា ដើម្បីកាត់បន្ថយហានិភ័យជាអតិបរមា ក្នុងគោលដៅស្ថិរភាពម៉ាក្រូសេដ្ឋកិច្ច”។
លោកស្រីបានលើកឡើងថា ការចងក្រងស្ថិតិមានសារៈសំខាន់ណាស់ ព្រោះនៅក្នុងសេដ្ឋកិច្ចមួយ ដែលដើរលឿនទៅមុខ នៅពេលដែលយើងអត់មានអ្វីមកវាស់វែង និងដើរបានជំហានប៉ុន្មាន វាប្រៀបដូចមនុស្សខ្វះភ្នែកអ៊ីចឹងដែរ។ យើងបើកបរឡាននៅតាមផ្លូវ បើយើងអត់មានកុងទ័រសម្រាប់មើលថា ជិះទៅប៉ុន្មានគីឡូម៉ែត្រក្នុង១ម៉ោង និងជិះទៅបានប៉ុន្មានគីឡូទេ ដោយអត់មានទិសដៅ និងមិនដឹងថា ធ្វើដំណើរបានប៉ុន្មានក៏វាលំបាកដែរ។
លោកស្រីជា សេរីបានបញ្ជាក់ថា វិស័យអចលនទ្រព្យ និងសំណង់បានក្លាយជាសសរស្តម្ភ ដ៏សំខាន់ក្នុងការគាំទ្រ កំណើនសេដ្ឋកិច្ច ហើយព័ត៌មាន និងទិន្នន័យពាក់ព័ន្ធនឹងវិស័យនេះ រឹតតែសំខាន់ទៅទៀត សម្រាប់អ្នករៀបចំគោលនយោបាយសេដ្ឋកិច្ច និងរូបិយវត្ថុ សំដៅតាមដានអតុល្យភាពម៉ាក្រូ សេដ្ឋកិច្ច និងវាយតម្លៃហានិភ័យ ដែលអាចកើតមានលើវិស័យពាក់ព័ន្ធ ពិសេសវិស័យហិរញ្ញវត្ថុ។
ជាមួយគ្នានេះ លោកស្រី ហង់ លីណា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកវិទ្យាស្ថានជាតិស្ថិតិ មានប្រសាសន៍ថា សន្ទស្សន៍ថ្លៃលំនៅដ្ឋាន ដែលផ្សព្វផ្សាយនាពេលនេះ នឹងជាសូចនាករមួយដ៏សំខាន់ក្នុងការតាមដានការវិវត្តនៃវិស័យអចលនទ្រព្យ និងលំនៅដ្ឋានដែលកំពុងរីកចម្រើនខ្លាំង ក្នុងពេល២ទសវត្សរ៍កន្លងមកនេះ។
លោកស្រីបានបន្តថា វិស័យអចលនទ្រព្យ និងលំនៅដ្ឋាននេះគឺជាវិស័យមួយ ក្នុងចំណោមវិស័យធំៗសំខាន់បួន រួមមាន វិស័យទេសចរណ៍ កម្មន្តសាល់កាត់ដេរ សំណង់ និងកសិកម្ម ដែលបានជម្រុញកំណើនសេដ្ឋកិច្ចកម្ពុជា២ទសវត្សកន្លងមកនេះ និងជំរុញឱ្យមានកំណើនក្នុងវិស័យពាក់ពន្ធ័ រួមមាន វិស័យធនាគារ ហិរញ្ញវត្ថុ ធនារ៉ាប់រង សំណង់ លក់ដុំលក់រាយ ដឹកជញ្ចូន ។ល។
លោកស្រីបានបន្តទៀតថា ដូចនេះការតាមដាន និងត្រួតពិនិត្យទាន់ពេល នឹងជួយបង្ការហានិភ័យផ្សេងៗ រួមទាំងវិធានការទប់ទល់មានប្រសិទ្ធភាព នឹងជួយឱ្យសេដ្ឋកិច្ចកម្ពុជាកាន់តែរឹងមាំ ជៀសផុតវិបត្តិសេដ្ឋកិច្ចទាំងឡាយ ដែលអាចកើតឡើងចេញ ពីវិបត្តិនៃវិស័យអចលនទ្រព្យនេះ ដូចប្រទេសមួយចំនួនធ្លាប់ជួបប្រទះក្នុងអតីតកាល៕
