ដោយៈ សុខុម
ម៉ានីល: ធនាគារអភិវឌ្ឍន៍អាស៊ី (ADB) បានបញ្ជាក់កាលពីថ្ងៃព្រហស្បតិ៍ ទី៩ ខែមិថុនា ថា ខ្លួនបានអនុម័តប្រាក់កម្ចី រហូតដល់៤,៣ពាន់លានដុល្លារអាមេរិក សម្រាប់គម្រោងផ្លូវដែកមួយ នៅក្នុងប្រទេសហ្វីលីពីន ដែលកំពុងប្រឹងប្រែង កែលម្អហេដ្ឋារចនាសម្ព័ន្ធផ្លូវដែក ដែលចាស់ទ្រុឌទ្រោមរបស់ខ្លួន។
ទិន្នន័យរបស់រដ្ឋាភិបាលបង្ហាញថា នៅមុនសង្គ្រាមលោកលើកទី២ ប្រទេសហ្វីលីទីន មានផ្លូវដែកសរុបប្រវែងជាង១.១០០គីឡូម៉ែត្រ ប៉ុន្តែគិតត្រឹមឆ្នាំ២០១៦ ផ្លូវដែកដែលដាក់ឱ្យដំណើរការក្នុងប្រទេសនេះ មានប្រវែងត្រឹមតែ៧៧គីឡូម៉ែត្រប៉ុណ្ណោះ ដោយចាញ់គេឆ្ងាយណាស់ បើធៀបនឹងប្រទេសផ្សេងៗនៅទូទាំងតំបន់អាស៊ី។
លោក Ahmed Saeed អនុប្រធានធនាគារ ADB បានចេញសេចក្តីថ្លែងការណ៍ថា គម្រោងផ្លូវដែក South Commuter Railway ដែលមានប្រវែង៥៥គីឡូម៉ែត្រខាងលើនេះ គឺជាហិរញ្ញប្បទានហេដ្ឋារចនាសម្ព័ន្ធដ៏ធំបំផុតរបស់ADB នៅក្នុងតំបន់អាស៊ី-ប៉ាស៊ីហ្វិក គិតមកទល់នឹងពេលបច្ចុប្បន្ន។
បច្ចុប្បន្នការធ្វើដំណើរ រវាងរដ្ឋធានីម៉ានីល និងក្រុង Calamba ក្នុងខេត្ត Laguna ត្រូវប្រើពេល២ម៉ោងកន្លះ ហើយគម្រោងផ្លូវដែកនេះ នឹងជួយធ្វើឱ្យចំណេញ ពេលធ្វើដំណើរដល់ទៅពាក់កណ្ដាល។ នៅក្នុងគម្រោងផ្លូវដែក ដែលទទួលបានហិរញ្ញប្បទានទាំងស្រុង ពីធនាគារ ADB នេះ ទីភ្នាក់ងារសហប្រតិបត្តិការអន្តរជាតិជប៉ុន (JICA) នឹងជួយផ្ដល់ក្បាលរថភ្លើង និងប្រព័ន្ធផ្លូវដែក។
ក្នុងឆ្នាំ២០១៩ ធនាគារ ADB ដែលមានមូលដ្ឋាននៅទីក្រុងម៉ានីល បានប្តេជ្ញាផ្តល់ហិរញ្ញប្បទាន សម្រាប់គម្រោងផ្លូវដែកមួយ តម្លៃ២,៥ពាន់លានដុល្លារ នៅភាគខាងជើងក្រុងម៉ានីល ដែលបច្ចុប្បន្នកំពុងស្ថិតក្រោមការស្ថាបនា។
គម្រោងផ្លូវដែកចំនួន២ ត្រូវបានស្ថាបនាបញ្ចប់ជាស្ថាបពរ ក្រោមការដឹកនាំរបស់លោកប្រធានាធិបតី រ៉ូទ្រីហ្គោ ឌូទើតេ ខណៈគម្រោងចំនួន៦កំពុងស្ថិតក្រោមការស្ថាបនា និងគម្រោងចំនួន៦ទៀត មិនទាន់បានចាប់ផ្ដើមការស្ថាបនានៅឡើយ។
នៅពេលគម្រោងទាំងនេះ ត្រូវបានស្ថាបនាបញ្ចប់ជាស្ថាពរ ប្រទេសហ្វីលីពីន នឹងមានផ្លូវដែកសរុបប្រវែង១.២០៩គីឡូម៉ែត្រ៕ Reuters៕
