ដោយ ៖ ដែន ចែងចាំង
ភ្នំពេញ ៖ ការកើនឡើងនូវភាពប្រសើរឡើងនៃសុខមាលភាពសង្គម និងកំណើនប្រាក់ចំណូលប្រជាពលរដ្ឋ បានធ្វើឲ្យសង្គមកម្ពុជាចាប់ផ្តើមរងសម្ភាធដោយសារចំនួនមនុស្សចាស់កំពុងកើនឡើង។
ក្រសួងសង្គមកិច្ចបានកំណត់មនុស្សមានអាយុចាប់ពី 60 ឆ្នាំឡើង ជាមនុស្សចាស់ និងជាជនងាយរងគ្រោះ ប៉ុន្តែឆ្លើយតបបញ្ហានេះ រដ្ឋាភិបាលបានរៀបចំផែនការសកម្មភាពសម្រាប់មនុស្សចាស់ឆ្នាំ 2017- 2020 និងគោលនយោបាយស្តីពីមនុស្សចាស់ឆ្នាំ2017 -2030 ដើម្បីធ្វើឲ្យលក្ខខណ្ឌជីវិតរបស់ពួកគាត់កាន់តែល្អប្រសើរ។
អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានលេខាធិការដ្ឋាន នៃគណកម្មាធិការជាតិកម្ពុជា ដើម្បីមនុស្សចាស់ លោក មុំ ប៊ុនថន បានថ្លែង ក្នុងឱកាសសិក្ខាសាលាពិគ្រោះយោបល់ស្ដីពីផែនការសកម្មភាពនៃគោលនយោបាយជាតិស្ដីពី មនុស្សវ័យចាស់ 2017- 2030 នាព្រឹកថ្ងៃទី 17 ខែវិច្ឆិកា ថា មនុស្សវ័យចាស់នៅកម្ពុជា ដែលមានអាយុចាប់ពី 60 ឆ្នាំឡើងទៅ ជាពិសេស ក្រុមមនុស្សចាស់ជរាក្រីក្រគ្មានទីពឹង និងងាយរងគ្រោះថ្នាក់ ហេតុនេះគោលនយោបាយមនុស្សចាស់ នឹងជួយឲ្យមនុស្សចាស់ មានលក្ខខណ្ឌជីវិតកាន់តែប្រសើរឡើងជាលំដាប់ ហើយតួនាទីរបស់ក្រសួងពាក់ព័ន្ធទាំងអស់ត្រូវរៀបចំការងារនេះ ដើម្បីឆ្លើយតបទៅនឹងការវិវត្តនៃស្ថានភាពសេដ្ឋកិច្ចសង្គម។
លោកបន្តថា ក្រសួងសង្គមកិច្ច អតីតយុទ្ធជន និងយុវនីតិសម្បទា បាន និងកំពុងបង្កើតសមាគមមនុស្សចាស់ឲ្យបានចំនួន1646 ឃុំសង្កាត់ នៅក្នុងរាជធានីខេត្ត ហើយក៏មានគម្រោងបង្កើតមជ្ឈមណ្ឌល ថែទាំមនុស្សចាស់ជរាក្រីក្រគ្មានទីពឹងមួយកន្លែងក្នុងទីក្រុងភ្នំពេញផងដែរ។
សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអនុម័ត និងប្រកាសដាក់ឲ្យប្រើប្រាស់នូវគោលនយោបាយជាតិស្ដីពីមនុស្សវ័យចាស់ 2017-2030 កាលពីថ្ងៃទី 25 ខែសីហា ឆ្នាំ 2017 កន្លងទៅនេះ៕
