ដោយ : ស៊ីវ ម៉េង
ភ្នំពេញ : រដ្ឋាភិបាលតាមរយៈក្រសួងទេសចរណ៍ និងក្រសួងអប់រំយុវជន និងកីឡា បានសម្រេចដាក់បញ្ចូលវិជ្ជាជីវៈទេសចរណ៍ ទៅក្នុងកម្មវិធីសិក្សារបស់សាលារដ្ឋ ដើម្បីពង្រីកការយល់ដឹងទាក់ទងនឹងវិស័យនេះ និងរួមចំណែកក្នុងការទាញយកសក្តានុពលពីវិស័យទេសចរណ៍សម្រាប់ប្រទេស។
អគ្គនាយករងឧស្សាហកម្មទេសចរណ៍ នៃក្រសួងទេសចរណ៍ លោក ទ្រី ឈីវបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី១០ខែធ្នូនេះថា បច្ចុប្បន្ន ក្រុមអ្នកជំនាញរបស់ក្រសួងទេសចរណ៍ និងក្រសួងអប់រំយុវជន និងកីឡា បានបញ្ចប់កិច្ចពិភាក្សាហើយ។ ម្យ៉ាងទៀត ក្រុមគណៈកម្មការអន្តរក្រសួងបានកំពុងពិនិត្យ វាយតំលៃ ដើម្បីដាក់បញ្ចូលកម្មវិធីសិក្សាវិជ្ជាជីវទេសចរណ៍អោយបាននៅក្នុងឆ្នាំ២០១៩នេះ។ លោកបន្តថា យ៉ាងយូរ កម្មវិធីសិក្សាវិជ្ជាជីវៈទេសចរណ៍ នឹងអាចត្រូវដាក់បញ្ចូលក្នុងកម្មវិធីសិក្សានៅកម្រិតថ្នាក់វិទ្យាល័យចាប់ពីឆ្នាំសិក្សា២០១៩ ២០២០តទៅ។
លោក ទ្រី ឈីវ បានបន្តថា “ការចាប់ផ្តើមដាក់បញ្ចូលកម្មវិធីសិក្សាវិជ្ជាជីវៈទេសចរណ៍ឆ្នាំសិក្សា២០១៩ ឆ្នាំ២០២០ នឹងសាកល្បងផ្តល់ការបណ្តុះបណ្តាលនៅតាមថ្នាក់វិទ្យាល័យចំនួនពីបីទៅបួនវិទ្យាល័យ ដែលជាគោលដៅភ្ញៀវទេសចរបរទេសអញ្ជើញទៅទស្សនាច្រើន”។
-->
លោកបន្តថា “បំណងនៃការបញ្ច្រាបវិជ្ជាជីវៈទេសចរណ៍នេះ ជម្រុញអោយសិស្សរៀនចប់នៅវិទ្យាល័យទាំងអស់ គឺចេះរៀបចំអត្តចរឹកល្អ និងជួយតម្រង់ទិសលើការងារបដិសណ្ឋារកិច្ចល្អ មានភាពរួសរាយរាក់ទាក់ មានទំនាក់ទំនងល្អជាមួយភ្ញៀវទេសចរ ពិសេសសិស្សទាំងអស់នៅពេលរៀនចប់ថ្នាក់ទី១២ គឺគេអាចមានលទ្ធភាពរកការងារបានធ្វើនៅក្នុងវិស័យទេសចរណ៍ផងដែរ”។
លោក ទ្រី ឈីវ បានបន្តឲ្យដឹងផងដែរថា សិស្សានុសិស្ស ដែលមានសញ្ញាបត្រមធ្យមសិក្សាទុតិយភូមិថ្នាក់ទី១២ ហើយមានបទពិសោធន៍ការងារ២ឆ្នាំឡើងទៅនៅក្នុងវិស័យទេសចរណ៍ គឺគេមានលទ្ធភាពគ្រប់គ្រាន់ នឹងអាចទទួលបានការវាយតំលៃការងារពីក្រសួងទេសចរណ៍ ដើម្បីទទួលយកសញ្ញាបត្រឬ វិញ្ញាបនបត្រថ្មីមួយទៀត ដែលមានការទទួលស្គាល់ដោយអាស៊ាន ដើម្បីមានលទ្ធភាពអាចស្វែងរកការងារបំលាស់ទីនៅក្នុងតំបន់អាស៊ាន។
ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន បានមានប្រសាសន៍ថា វាជារឿងល្អមែនទែន ប្រសិនជាក្រសួងទាំងពីរដាក់បញ្ចូលកម្មវិធីសិក្សាទាក់ទងនឹងវិជ្ជាជីវៈ ក្នុងកម្មវិធីសិក្សាចាប់ពីថ្នាក់ទី១០ នៅតាមសាលារដ្ឋទូទាំងប្រទេស ព្រោះវានឹងផ្តល់ជូនសិស្សានុសិស្សក្រោយបញ្ចប់បាក់ឌុប មិនមានលទ្ធភាពសិក្សានៅកម្រិតឧត្តមសិក្សាអាចរកការងារធ្វើបាន។ លោកបន្តថា បច្ចុប្បន្នការបណ្តុះបណ្តាលជំនាញទេសចរណ៍នៅតាមសាកលវិទ្យាល័យភាគច្រើន មិនអាចទទួលយកបាននោះទេ ដោយសារកម្មវិធីបណ្តុះបណ្តាលផ្តោតតែលើទ្រឹស្តីជាជាងការអនុវត្តន៍ ដែលធ្វើឲ្យយើងពិបាកក្នុងការជ្រើសរើសពួកគេមកធ្វើការ និងបើអាចធ្វើការបានទាមទារការបណ្តុះបណ្តាលរយៈពេលវែង។
លោកបន្តថា “ការសិក្សាជំនាញទេសចរណ៍មិនមែនត្រូវសិក្សាតែទ្រឹស្តីទេ វាត្រូវការការអនុវត្តន៍ជាក់ស្តែងច្រើន ព្រោះវាជា reality មិនមែនូចសិក្សាមុខវិជ្ជាខ្លះត្រូវសិក្សាតែទ្រឹស្តី ហើយអាចធ្វើការបាននោះទេ”៕
