ដោយ ស៊ីវ ម៉េង
ភ្នំពេញ៖ មន្ត្រីជាន់ខ្ពស់ក្រសួងទេសចរណ៍បានអះអាងថា កម្ពុជាបានបាត់បង់ចំណូលប្រមាណជាង ៨០០លានដុល្លាអាមេរិចពីវិស័យទេសចរណ៍ ពោលគឺស្នើនឹងរង្វង់២០ភាគរយ ហើយចំណូលនេះ នឹងបន្តបាត់បង់ថែម ប្រសិនបើប្រជាពលរដ្ឋក្នុងស្រុកមិនបង្កើតផលិត និងបន្តទទួលទិញទំនិញពីក្រៅប្រទេសយកទៅជូនភ្ញៀវទេសចរជាតិអន្តរជាតិ។
ថ្លែងប្រាប់អ្នកសារព័ត៌មាន លោកថោង ខុន រដ្ឋមន្ត្រីក្រសួងទេសចរណ៍ បានលើកឡើងថា បណ្តាប្រទេសទាំងអស់នៅលើពិភពលោក គឺសុទ្ធតែទទួលការខាតបង់ចំណូលដូចៗគ្នាពីវិស័យទេសចរណ៍។លោកបន្តថា ប្រទេសកម្ពុជានៅក្នុងអំឡុងឆ្នាំ១៩៩០ គឺបានបាត់បង់ចំណូលពីវិស័យទេសចរណ៍ប្រមាណជាង៤០ភាគរយ ប៉ុន្តែដោយសារសន្ទុះការអភិវឌ្ឍរហូតមកដល់បច្ចុប្បន្ន ការខាតបង់ចំណូលគឺបានធ្លាក់ចុះមកនៅត្រឹម២០ភាគរយ។
-->
លោកបន្តថា “នាពេលអនាគត ការខាតបង់ពីវិស័យទេសចរណ៍នៅកម្ពុជា នឹងបន្តការធ្លាក់ចុះនៅត្រឹម១៥%ដូចបណ្តាប្រទេសរីកចំរើន ប្រសិនបើពលរដ្ឋកម្ពុជា បង្កើនការផលិតផលិតផលក្នុងស្រុកសម្រាប់លក់ជូនភ្ញៀវទេសចរជាតិអន្តរជាតិ។
ក្រុមអ្នកជំនាញបានលើកឡើងថា ចំណូលថវិកាវិស័យទេសចរណ៍នេះ នឹងបន្តបាត់បង់ច្រើន បន្ថែមទៀត ប្រសិនបើចំនួនភ្ញៀវទេសចរបរទេសមកទស្សនាកម្ពុជាកាន់តែកើនឡើង ហើយប្រជាពលរដ្ឋក្នុងស្រុកមិនបង្កើនផលិតផលិតផលក្នុងស្រុកនោះទេ។
តាមការរំពឹងទុករបស់ក្រសួងទេសចរណ៍នៅកម្ពុជានៅឆ្នាំ២០១៨នេះ នឹងទទួលបានភ្ញៀវទេសចរអន្តរជាតិចំនួនប្រមាណ៦,១លាននាក់ ហើយនៅឆ្នាំ២០២០ នឹងកើនប្រមាណ៧លាននាក់ ប្រមាណ ១១លាននាក់នៅឆ្នាំ២០២៥ និងប្រមាណ១៥លាននាក់នៅឆ្នាំ២០៣០ខាងមុខ។ ចំនែកភ្ញៀវទេសចរក្នុងស្រុកប្រមាណ១៣លាននាក់នៅឆ្នាំ២០២០ និងប្រមាណ១៨លាននាក់នៅឆ្នាំ២០៣០ ជាមួយចំណូលសរុបប្រមាណ១០ពាន់លានដុល្លារអាមេរិក បង្កើតឱកាសការងារដោយផ្ទាល់ប្រមាណ២លាននាក់។
លោកធួន ស៊ីណានប្រធានសមាគមទេសចរណ៍អាស៊ីប៉ាស៊ីហ្វិកបានថ្លែងថា ការបាត់បង់ចំណូលពីវិស័យទេសចរណ៍ ពិតជារឿងមួយគួរឲ្យសោកស្តាយ និងគួរមានការវិនិយោគ ដើម្បីបង្កើតផលិតផល ទេសចរណ៍ឲ្យបានច្រើន ប៉ុន្តែដើម្បីឲ្យមានការវិនិយោគលើផលិតផលទេសចរណ៍ទាមទារឲ្យមានការលើកទឹកចិត្តពីរដ្ឋាភិបាល តាមរយៈការពង្រឹងការអនុវត្តច្បាប់ និងពង្រឹងទប់ស្កាត់ការនាំចូលផលិតផលពីបរទេស។
លោកបន្តថា “មានអ្នកវិនិយោគច្រើនណាស់ចង់វិនិយោគលើផលិតផលទាំងនោះ ប៉ុន្តែពួកគេត្រូវការការគាំទ្រពីរដ្ឋាភិបាល ពួកគេត្រូវការការលើកទឹកចិត្តពីរដ្ឋាភិបាល”៕
