ដោយ គង់ សូរិយា
ភ្នំពេញ៖ ក្រសួងទេសចរណ៍បានចាប់ផ្តើមបញ្ជ្រាបការយល់ដឹងពីវិស័យទេសចរណ៍ ដល់ តាមរយៈការរៀបចំកិច្ចប្រជុំបណ្តាញអ្នកជំនាញទេសចរណ៍ និងសាស្ត្រាចារ្យក្នុងវិស័យទេសចរណ៍លើកទីមួយ អមជាមួយពិធីប្រកាសផ្សព្វផ្សាយសៀវភៅតម្រង់ទិសការសិក្សា និងមុខរបរក្នុងវិស័យទេសចរណ៍ និងផ្សព្វផ្សាយជាផ្លូវការចលនាប្រឡងប្រណាំងអ្នកជំនាញទេសចរណ៍គំរូប្រចាំឆ្នាំ២០១៩ ។
រដ្ឋមន្ត្រីក្រសួងទេសចរណ៍ លោកបណ្ឌិត ថោង ខុនបានមានប្រសាសន៍ក្នុងកិច្ចប្រជុំកាលពីថ្ងៃទី៤ មករាកន្លងមកថា កិច្ចប្រជុំបណ្តាញអ្នកជំនាញ និងសាស្ត្រាចារ្យក្នុងវិស័យទេសចរណ៍លើកទី១នេះ បានឯកភាពបង្កើនកិច្ចសហការឱ្យកាន់ល្អរវាងភាគីពាក់ព័ន្ធទាំងអស់នៅក្នុងការរួមគិត រួមធ្វើទាំងអស់គ្នា ដើម្បីសម្រេចឱ្យបានការអភិវឌ្ឍទេសចរណ៍ប្រកបដោយគុណភាព និរន្តរភាព និងការទទួលខុសត្រូវ សំដៅចូលរួមសម្រេចឲ្យបានគោលដៅអភិវឌ្ឍប្រកបដោយនិរន្តរភាព ក្នុងឆ្នាំ២០៣០ និងជំរុញលើកកម្ពស់គុណភាពសេវាកម្មទេសចរណ៍ឱ្យកាន់តែល្អ ជាពិសេសជំរុញការអភិវឌ្ឍធនធានមនុស្ស និងការបណ្តុះបណ្តាលជំនាញទេសចរណ៍ និងបដិសណ្ឋារកិច្ចឱ្យមានគុណភាព សមត្ថភាព និងគុណវុឌ្ឍិ ឆ្លើយតបទៅនឹងស្តង់ដាជាតិ អាស៊ាន តំបន់ និងអន្តរជាតិ ពោលគឺ សម្រេចឱ្យបាននូវគោលដៅយុទ្ធសាស្ត្រ។
-->
ជាមួយនេះក្រសួងបានដាក់ចេញយុទ្ឋសាស្ត្រជាច្រើន រួមមានៈ ទី១ ឆ្នាំ២០២០: បង្កើតការងារផ្ទាល់ឲ្យបានប្រមាណ១លាននាក់ ហើយត្រូវជំរុញឲ្យអ្នកជំនាញយ៉ាងតិច ៥០% ត្រូវមានវិញ្ញាបនបត្រ ឬសញ្ញាបត្របញ្ជាក់សមត្ថភាពស្របតាមស្តង់ដាជាតិ និងអាស៊ានតាមរយៈការបណ្តុះបណ្តាល និងការវាយតម្លៃសមត្ថភាព។ ទី២ ឆ្នាំ២០២៥: បង្កើតការងារផ្ទាល់ឲ្យបានប្រមាណ ១.២ លាននាក់ និងត្រូវសម្រេចឲ្យបានយុទ្ធនាការ “បុគ្គលិកម្នាក់ ជំនាញមួយ” ពោលគឺជំរុញឲ្យអ្នកជំនាញទេសចរណ៍ទាំងអស់ (១០០%) ឲ្យមានវិញ្ញាបនបត្រ ឬសញ្ញាបត្របញ្ជាក់សមត្ថភាពស្របតាមស្តង់ដាជាតិ និងអាស៊ាន។
ទី៣ ឆ្នាំ២០៣០: សម្រេចឲ្យបានគោលដៅអភិវឌ្ឍប្រកបដោយនិរន្តរភាព SDG4: “ធានាឲ្យបាននូវការអប់រំបណ្តុះបណ្តាលប្រកបដោយគុណភាព សមធម៌ និងបរិយាបន្ន ព្រមទាំងលើកកម្ពស់ ឱកាសសិក្សាពេញមួយជីវិតដល់ជនគ្រប់រូប” និង SDG8: “ជំរុញកំណើនសេដ្ឋកិច្ច និងការងារសមរម្យដល់ជនគ្រប់រូប” ក្នុងវិស័យទេសចរណ៍កម្ពុជា តាមរយៈការអភិវឌ្ឍមូលធនមនុស្សទាំងក្នុងបរិបទជាតិ និងតំបន់។
អង្គប្រជុំបានឯកភាពលើការរៀបចំឱ្យមាន ការជួបជុំបណ្តាញអ្នកជំនាញ និងសាស្ត្រាចារ្យក្នុងវិស៍យទេសចរណ៍រៀងរាល់៣ខែម្តង សម្រាប់កិច្ចប្រជុំបចេ្ចកទេសនិង៦ខែម្តងសម្រាប់កិច្ចពិភាក្សាកម្រិតថ្នាក់ដឹកនាំ ដើម្បីពិភាក្សាការងារទាក់ទងទៅនឹងបណ្តាញអ្នកជំនាញ និងសាស្ត្រាចារ្យក្នុងវិស័យទេសចរណ៍ និងបានគាំទ្រលើការរៀបចំវេទិកាជាតិទេសចរណ៍ប្រចាំឆ្នាំ ដែលតាមរយៈវេទិកាជាតិនេះ វានឹងក្លាយជាទីណាត់ជួបមួយសម្រាប់ចែករំលែក និងចងបណ្តាញរវាងសិស្ស និស្សិត សាស្រា្តចារ្យ អ្នកស្រាវជ្រាវក្នុងវិស័យទេសចរណ៍ គ្រឺះស្ថានអប់រំ និងបណ្តុះបណ្តាលជំនាញទេសចរណ៍ សាលាបណ្តុះបណ្តាលវិជ្ជាជីវៈទេសចរណ៍ ប្រតិបត្តិករទេសចរណ៍ទាំងអស់ ក៍ដូចជាពិភាក្សារកឱ្យឃើញបញ្ហា និងដំណោះស្រាយបញ្ហាប្រឈមផ្សេងៗ ដែលរាំងស្ទះដល់ដំណើរការនៃការអភិវឌ្ឍធនធានមនុស្ស ក្នុងវិស័យទេសចរណ៍និយយាយដោយឡែក និងការអភិវឌ្ឍវិស័យទេសចរណ៍កម្ពុជានិយាយជារួម។
អង្គប្រជុំបានប្រកាសសមាជិកបណ្តាញអ្នកជំនាញ និងសាស្ត្រាចារ្យក្នុងវិស័យទេសចរណ៍ចំនួន៦៨នាក់ និងបាន ឯកភាពដាក់បញ្ចូលសមាជិកបណ្តាញអ្នកជំនាញ និងសាស្ត្រាចារ្យក្នុងវិស័យទេសចរណ៍ចំនួន១៨នាក់បន្ថែមផងដែរ៕
