អតីតប្រធានាធិបតីទីម័រឡេស្តេកោតសរសើរការសម្តេចតេជោ និងការរៀបចំស៊ីហ្គេមលើកទី៣២

ជាមួយគ្នានេះដែរ លោក Xanana Gusmao ក៏បានកោតសរសើរចំពោះការរៀបចំ និងបដិសណ្ឋារកិច្ចរបស់កម្ពុជា ក្នុងពិធីបើកការប្រកួតកីឡាស៊ីហ្គេមលើកទី៣២ ដែលបានប្រព្រឹត្តិទៅនៅថ្ងៃទី៥ ខែឧសភា ឆ្នាំ២០២៣ នៅពហុកីឡដ្ឋានជាតិមរតកតេជោ រាជធានីភ្នំពេញ។

លោកបញ្ជាក់ថា “ខ្ញុំដឹងថា វាជាក្តីសុបិនរបស់ប្រជាជនកម្ពុជាក្នុងការធ្វើជាម្ចាស់ផ្ទះ។ អ្នកត្រូវរង់ចាំជាង៦០ឆ្នាំ ដើម្បីរៀបចំវា។ វាជាការៀបចំលើកដំបូង ហើយវាពិតជាអស្ចារ្យ និងឥតខ្ចោះ”។លោកបន្តថា “ ខ្ញុំមានការចាប់អារម្មណ៍យ៉ាងខ្លាំង ចំពោះការដែលប្រជាជនកម្ពុជា បានរៀបចំខ្លួនជាស្រេច ដើម្បីបង្ហាញទៅអាស៊ាន និងពិភពលោកថា ពួកគេបានត្រៀមខ្លួនរួចរាល់ហើយ”។

លោកបានបន្តថា ទាក់ទងនឹងការប្រកួតនេះ វាជាការប្រកួតក្នុងគោលបំណងពង្រឹងទំនាក់ទំនងរវាងកម្ពុជា និងទីម័រខាងកើតឱ្យកាន់​តែរឹងមាំបន្ថែមទៀត។ កីឡារស់នៅក្នុងសន្តិភាព ហើយកីឡាគឺសំដៅលើសពីក្បាច់គុន។

ក្នុងឱកាសនោះ អតីតប្រធានាធិបតី Xanana Gusmao ក៏បានសន្យាថានឹងពង្រឹងបន្ថែមទៀត នូវកិច្ចសហប្រតិបត្តិការដែលមានស្រាប់នៅកម្ពុជាលើវិស័យផ្សេងៗ ជាពិសេសវិស័យអប់រំ និងកសិកម្ម ហើយទីម័រខាងកើតបើកទ្វារ សម្រាប់កិច្ចសហប្រតិបត្តិការ ប្រកបដោ​យ​ប្រសិទ្ធភាពជាមួយកម្ពុជា។

អតីតប្រធានាធិបតី Xanana Gusmao បានដឹកនាំគណៈប្រតិភូមកបំពេញទស្សនកិច្ចនៅកម្ពុជា ចាប់ពីថ្ងៃទី៤ ដល់ថ្ងៃទី៧ ខែឧសភា ឆ្នាំ២០២៣ ដើម្បីចូលរួមការបើកការប្រកួតកីឡាស៊ីហ្គេម លើកទី៣២។

នាថ្ងៃទី៦ ខែឧសភា អតីតប្រធានាធិបតី រួមនិងគណៈប្រតិភូ បានចូលជួបសម្តែងការគួរសម និងជួបពិភាក្សាការងារទ្វេភាគីជាមួយ សម្តេចតេជោ ហ៊ុន សែន នៅវិមានសន្តិភាព ដើម្បីបង្កើនទំនាក់ទំនង និងកិច្ចសហប្រតិបត្តិការទ្វេភាគីរវាងប្រទេសទាំងពីរ៕