ដោយ: គង់ លាងហួរ
អន្តរជាតិ: ក្រុមហ៊ុនសណ្ឋាគារ Standard International គ្រោងបើកដំណើរការ គម្រោងលំនៅដ្ឋានចំនួន២នៅខេត្តភូកេត និងហួហ៊ីន និងបើកសណ្ឋាគារថ្មីចំនួន៥ទៀត នៅទូទាំងគោលដៅចំនួន៤ក្នុងប្រទេសថៃ នៅកំឡុងឆ្នាំ២០២៣-២០២៦។
លោក Boripat Louichareon នាយកគ្រប់គ្រងរបស់ក្រុមហ៊ុន Standard International សម្រាប់តំបន់អាស៊ីប៉ាស៊ីហ្វិក និងមជ្ឈិមបូព៌ា បានលើកឡើងថា គម្រោងលំនៅដ្ឋានថ្មីមួយ ក្នុងចំណោមគម្រោងលំនៅដ្ឋានម៉ាកល្បីៗទាំង២ គឺស្ថិតនៅ Laguna Phuket ដែលជាគម្រោងទី៣ របស់ក្រុមហ៊ុនបន្ទាប់ពីទីក្រុង Miami និងទីក្រុង Lisbon។
-->
លោកបានបន្តថា “The Standard Residences និង Phuket Laguna នឹងត្រូវបានអភិវឌ្ឍន៍ ដោយក្រុមហ៊ុនបុត្រសម្ព័ន្ធ Central Group។ ទីតាំងនេះនឹងមានកន្លែងលក់រាយ ជាមួយនឹងភោជនីយដ្ឋាន និងបារសម្រាប់ភ្ញៀវខាងក្រៅ និង The Peri Phuket ដែលជាម៉ាកយីហោសណ្ឋាគារមួយរបស់យើង ដែលមាន១៥០បន្ទប់”។
ចំណែកឯ អតិថិជនគោលដៅ នឹងជាជនបរទេសជាចម្បង ដោយផ្តោត ជាពិសេសទៅលើជនជាតិចិន និងរុស្ស៊ី ដែលពួកគេបានបង្ហាញពីតម្រូវការអចលនទ្រព្យនៅខេត្តភូកេត។
នៅក្នុងត្រីមាសទីមួយ ឆ្នាំ២០២៤ គម្រោងលំនៅដ្ឋានម៉ាកយីហោទី២របស់ The Standard នៅក្នុងប្រទេសថៃនឹងត្រូវបានដាក់ឱ្យដំណើរការនៅទីក្រុងហួហ៊ីន (Hua Hin)។
គម្រោងទី២ The Standard Residences នៅទីក្រុង Hua Hin នឹងមានលំនៅដ្ឋានចំនួន២៥៨យូនីត ដែលមានចាប់ពីយូនីតបន្ទប់គេងចំនួន១ ទំហំ៤៥ម៉ែត្រការ៉េ រហូតដល់វីឡាអាងហែលទឹកទំហំ២២០ម៉ែត្រការ៉េ។
គម្រោងលំនៅដ្ឋាននេះ នឹងត្រូវបានបង្កើតឡើង ដោយក្រុមហ៊ុន Sansiri Plc នៅលើទីតាំងឆ្នេរមួយ ដែលមានចម្ងាយ៤,៥គីឡូម៉ែត្រពីសណ្ឋាគារ The Standard Hua Hin។ លោក Boripat បានអះអាងថា លំនៅដ្ឋានទាំងនេះ នឹងត្រូវបានដាក់លក់ជូន ក្នុងតម្លៃខ្ពស់បំផុតមិនធ្លាប់មាននៅក្នុងទីក្រុង Hua Hin ៕
